Marzo

Iñchiñ ayüquelaiñ taiñ üdengeal ca inacangeal. Feimu, ¿chumngelu ayüucüleafuiñ fente ñi üdengen mu rume? Ngüneduamnge cüla dungu. Quiñe, nehuencüleliyiñ, ayühulafiyiñ ta Jehová (1 Ped. 4:13, 14, TNM). Epu, doi maneluucüleiñ Chau Jehová mu (1 Ped. 1:7). Ca cüla, Jehová eluaiñmu taiñ rumel mongeleal (Rom. 2:6, 7). Pichi rupalu müten Jesús tañi huiñomongetun mu, pu apostol huimacangei ca feipingei ñi amuldunguhuenoal. Femngelu rume, ayüucülefuingün. ¿Chumngelu? Pu apostol quimnieingün ñi femngechi cutrancahun Jesús ñi duam meu (Hech. 5:40-42). Rume piuqueyefingün ta Jesús, feimu llicalcalaeyu tañi pu caiñe. Doi mai fentecünulaingün ñi amuldunguchequen. Famülque mu, fentren taiñ pu peñi, pu lamngen serfiniefingün ta Jehová huesa rupan mu rume. Quimnieingün Jehová tañi falintunieteu com tañi femquen engün ca tañi piuqueyefiel. w21.03 pag. 25 parr. 18, 19

Pu dullin cristiano choyüngelu müten, maneluulafuingün ñi amual ta huenu. Chau Dios tuculeleyu tüfachi maneluhun tañi piuque mu engün. Pu dullin cristiano raquiduamnieingün tañi maneluhun, llellipuqueingün tañi maneluhun mu ca rume ayüfuingün ñi mülepual ta huenu (Filip. 3:20, 21; 1 Juan 3:2, TNM). Quimlaingün rume chem cuerpo ñi nietual huenu, huelu rume ayünieingün ñi coneltual Chau Dios tañi Gobierno mu. Choyüngelu müten che, ayüniei tañi turpu lanoal. Feimu tati pu caquelu ufisa maneluucülei tañi rumel mongeleal Mapu mu. Ayünieingün cüdahual ñi huecünutuafiel tüfachi Mapu. Ayünieingün quisuque ñi deumayal ruca, ñi anümcayal ca ñi cüme feletual quiñentrür tañi pu che engün (Is. 65:21-23). Ayünieingün amual huallque püle ñi quim mapumeal, ñi quimafiel fütraque huincul, fütraque mahuidantu, lafquen, femngechi ñi doi ngüneduamafiel com ñi deumael ta Jehová. Huelu doi mai ayünieingün fill antü ñi doi cüme hueniyenieafiel ta Jehová. w21.01 pag. 18 parr. 17, 18

Deu apümcangelu Jerusalén huaria, pu che feipilehuei: “Ti mapu huellilehuei, ngehuelai che, culliñ rume ngehuelai. Tüfachi mapu elungei tati pu caldeo” (Jer. 32:43). Doi 200 tripantu deu ñi huirintucuel Joel chem tañi rupayal, Jehová ca feipifi ta Jeremías ca chem dungu ñi rupayafel feichi antü tañi nüngeal ta Jerusalén. Jehová feipi tati pu hueichafe ñi cüme quintuafiel com pu huesaque israelche, femngechi tañi nüafiel com tüfa engün. Chau Ngünechen feipi: “Mütrümafiñ fentren challhuafe, fei tüfa engün nüafingün tati pu israelche. Fei hula, mütrümafiñ fentren pu nüquelu pu auca culliñ, fei tüfa engün nüafingün tati pu israelche cheu rume tañi mülen, mahuidantu mu, huincul mu, cafei cheu ñi triralen pu cura cütu”. Jehová ca feipi ñi huesalcayafiel pu israelche tañi culpan meu. Cheu rume ellcaufule pu culpafe israelche, peafeyu pu babilonia ñi hueichafe (Jer. 16:16, 18). w20.04 pag. 5, 6 parr. 12, 13

Lot alüñmai ñi femal tañi feipingeel. Iñchiñ raquiduamafuiñ: “Lot duamcünulai rume ñi feipieteu ta Jehová”. Huelu Jehová femngechi raquiduamlai. Feimu epu cümeque püllü entufi ta Lot ca tañi pu che tati huaria mu. ¿Chumngelu am? Jehová rume cutranpiuqueyefi ta Lot, feimu montulfi (Gén. 19:15, 16). Jehová ngüneduamfi Lot ñi chum duamcülen, feimu cutranpiuqueyefi. Lot llicaquepelafui pu che mülelu huecuntu ti huaria mu, feimu peno pilafui ñi tripayal. Cafei huecuntu ti huaria mu, lolcaucülequefui ti mapu quiñeque mu, feimu rume cuñihun-ngefui. Lot allcüpelai ñi ütrüfconpun epu lonco ülmen üye püle (Gén. 14:8-12). Cafei Lot raquiduamcülepelafui ñi chumlerpual tañi pu che. Ca femngechi Lot cüme mongen niequefui, feimu quiñe cüme ruca niequepelafui (Gén. 13:5, 6). Lot chem raquiduam niefule rume, cümelai ñi inanofiel Jehová tañi feipieteu. Huelu Jehová rulpacünufi müten ñi femün ta Lot, feimu “quiñe lif mongen huentru” troquifi (2 Ped. 2:7, 8). w20.04 pag. 18 parr. 13, 14

Hueche peñi, feichi pu che tami quimeteu petu pichicalu eimi, alüñmayafui ñi quimtucual tami tremün. Huelu Jehová cüme quimnieimu ca quimniei chem mu tami pepiluucülen (1 Sam. 16:7). ¿Chem quimürpuafuimi David ñi rupan mu? Mülei tami cüme hueniyeafiel ta Jehová. David raquiduami Chau Jehová ñi com deuman mu ca chem quimeltueyu Chau Jehová mu, femngechi cüme hueniyefi (Sal. 8:3, 4; 139:14; Rom. 1:20). ¿Ca chem femafuimi? Llellipuafimi Chau Jehová tami eluaeteu nehuen. Ayentungelmi tami colegio mu tami testigongen mu, llellipuafuimi ta Chau Jehová tami quelluaeteu ñi nehuencüleal. Cafei entuafuimi cümeque ngülam Biblia meu ca taiñ fillque publicacion ca video mu. Ngüneduamfiel mu chumngechi tami quelluqueteu Chau Jehová, doi maneluucüleaimi fei mu. Cafei caquelu pu che ngüneduamfile tami maneluucülen Chau Jehová mu, doi manelfalngeaimi. w21.03 pag. 3 parr. 7

Tati cümeque hueni nütramcaquei chem ñi mülen tañi piuque mu ca chem tañi raquiduamquen. Ca femngechi felei taiñ hueniyefiel ta Jehová. Biblia mu, Jehová feipiqueiñmu chem tañi raquiduamqueel ca chem tañi ayünieel. Ca femngechi llellipun mu iñchiñ, nütramcaquefiyiñ ta Jehová taiñ raquiduam ca chem ñi mülen taiñ piuque mu. Fente taiñ piuqueyenieteu Jehová, allcütuñmaqueiñmu taiñ ngillatun, huelu ca femngechi huiñoldunguqueiñmu. Quiñeque mu pürüm huiñoldunguqueiñmu. Huelu caquelu rupa, Jehová doi alüñmayafui taiñ huiñoldunguaeteu. Huelu chumngechi femfule rume, quimnieiñ taiñ yochi cüme huiñoldunguaeteu Jehová, ca eluaiñmu taiñ rüf duamnieel. Quiñeque mu, ayülayafuiñ chi chumngechi taiñ huiñoldungueteu. Raquiduamnge tüfa: huesa dungu rupan mu iñchiñ, ngillatuafuiñ ta Jehová taiñ famentuñmayaeteu taiñ huesa rupamequen. Huelu quisu eluafeiñmu quimün ca nehuen taiñ cüme chaftuafiel (1 Cor. 10:13). Rume falintuquefiyiñ taiñ ngillatuquefiel ta Jehová, ¿chumngechi pengelafuiñ? Rumel ngillatuleaiñ chumngechi ñi feipin tati Biblia (1 Tes. 5:17). w20.05 pag. 27, 28 parr. 7, 8

Tati pu lefquelu lelinieai tañi rüpü tañi tran-noal. Trananagle quiñe lefquelu, huiño huitratuai ca amuleai tañi lefcülen. Huiñoquintuquelai rume chem tañi trantueteu, doi mai raquiduamtucuquei ñi huechutripayal müten ti cuden, fei ñi llohual tati cullitun. Taiñ poyefiel ta Jehová, quiñeque mu huelulcayafuiñ taiñ feipin ca taiñ femün mu. Ca femngechi huelulcayafeiñmu ñi femün quiñe peñi cam quiñe lamngen. Huelu felei müten tati dungu. ¿Chumngelu feipiafuiñ? Com iñchiñ huelulcaqueiñ, feimu quiñeque mu yafcahuafuiñ taiñ pu peñi ca pu lamngen iñchiñ. Cafei nüngayelafeiñmu ñi femün taiñ pu peñi ca pu lamngen (Col. 3:13). Feimu quiñeque mu trananagafuiñ reque tati cuden mu. Huelu chumngechi ñi femquen pu lefquelu, huiñoquintulayaiñ chem taiñ trantueteu. Doi mai pürüm müten huiño huitratuaiñ ca amuleaiñ taiñ lefal, femngechi taiñ huechutripayal ti cuden reque ca taiñ llohual tati cullitun. Femnoliyiñ, catrütuafuiñ taiñ pu peñi ca pu lamngen ñi cüme amuleal tüfachi cuden reque ñi poyefiel ta Jehová. w20.04 pag. 26 parr. 1; pag. 27, 28 parr. 8, 9

Daniel nütramcai quiñe fütra estatua deumangelu caquerume chemcün mu. Caque quiñeque chemcün adentulei quiñeque gobierno caiñetuafilu Jehová tañi pu che. Tati namun deumangei fotra pañillhue engu, fei tüfa Gran Bretaña ca Estados Unidos. Tüfa tati quiñelehuechi gobierno ñi caiñetuafiel Jehová tañi pu che. Cüme ngüneduamliyiñ tüfachi profecia, quimürpuafuiñ tüfachi epu gobierno petu ngünenieai apümcangele com pu gobierno. Apostol Juan pengelelngei quiñe huapo huesa culliñ regle lonco nielu. Tüfa adentulei quiñeque gobierno ngüneniealu cheu ñi mülen Ngünechen tañi pu che. Ti huapo huesa culliñ ñi inan lonco adentulei Gran Bretaña ca Estados Unidos. Feimu feipiafuiñ Estados Unidos ca Gran Bretaña petu ngünenieai apümcangele com pu gobierno (Apoc. 13:1, 2; 17:13, 14). w20.05 pag. 14 parr. 11, 12

Chau Jehová eli ta mongen, huelu ñi huirintucuel ta Juan ca pengelqueiñmu Jehová mu ñi cüpan ti piuqueyehun. Jehová rume piuqueyenieiñmu, feimu cüme duamqueiñ ca ayüucülequeiñ. Iñchiñ taiñ cristianongen mu, mülei taiñ piuqueyecheal. Femngechi huercüngeiñ taiñ femal (Mat. 22:37-40). Chau Jehová re nor dungu müten ta femquei, duamnieiñmu ca cümelcaqueiñmu. Feimu cüdautuquelaiñ taiñ piuqueyeafiel. Huelu taiñ pu peñi, taiñ pu lamngen culpanchengeingün. Quiñeque mu müte piuqueyechelayafui, feimu doi cüdaungeafui taiñ piuqueyeafiel. Chau Jehová quimniei tüfa, feimu adniefi quiñeque huentru ñi huirintucual Biblia mu chumngelu fente falin-ngei taiñ piuqueyecheal ca chumngechi femürpuafuiñ. Quiñe tüfachi pu huentru fei ti apostol Juan (1 Juan 3:11, 12). w21.01 pag. 8 parr. 1, 2

Pichin tripantu rume serfiniefiliyiñ ta Jehová cam alün tripantu rume, ramtuhuafuiñ: “¿Famentuquepefiñ mai Huecüfü ñi huesa raquiduam ñi huelulcanoaeteu?”. Pefiliyiñ internet mu cam television mu quiñe dungu taiñ huesa raquiduamelaeteu, ¿chumafuiñ? “Tüfa pornografia no tati” piafuiñ, huelu cuñiutucuhuaiñ. Feitachi dungu mu taiñ peel tati Huecüfü hueluraquiduamelafeiñmu, fei epu rume piuque taiñ nieal. Tüfa trürümngeafui ñi chumquen ti cuña. Pu huentru pünequefi ti cuña ñi triracayafiel ti mamüll. ¿Chumngechi? Tati yungelechi cuña tucungequei tati mamüll mu, trahuaunacümngequei quiñe combo mu ñi conal, femngechi hudatripaquei ti mamüll. Ca femngechi felei fillque podngechi dungu ñi tripaquen television ca internet mu. Chem dungu no troquingeafui chi. Huelu taiñ ngüneduamnon mu rume, huesa raquiduamelafeiñmu, fei nierpuafuiñ epu rume piuque, fei fütra culpayafuiñ. Feimu chem huesa dungu no rume conquilpe taiñ piuque mu. Eluucüleaiñ mai taiñ nieal quiñe rume piuque, femngechi yamnieafiyiñ Jehová tañi üi. w20.06 pag. 11, 12 parr. 14, 15

Quiñeque peñi ca quiñeque lamngen eluuqueingün ñi huiñotual Jehová mu. Femfule engün rume, amuleaiñ taiñ quelluafiel ca yafültucuafiel (Luc. 15:17-24). Quisu engün huesa duamcülepelaingün tañi huesa rupan mu. Ca quiñe püle tripalelu engün am ti trahunche mu, cüme hueniyelafingün ta Jehová. Feimu quelluafiyiñ engün ñi doi fülmaucüleal Jehová mu. Taiñ loncontucual tüfa, ngüneduamaiñ ca nütram ñi entuel Jesús. Jesús nütramcai quiñe cuidaufisafe rume cüdahui ñi quintuafiel quiñe ufisa ñamquiyaulu. Petufilu tati ufisa nehuencülelai, feimu meñcupüramfi ñi cüpaltuafiel tati quechan mu (Luc. 15:4, 5). Eluhuaiñ taiñ quelluafiel pu quiñe püle tripalu ti trahunche mu ñi cüme hueniyetuafiel ta Jehová. Taiñ femürpual, Jehová eluqueiñmu tañi nehuen, tati Biblia ca fentren quimeltun. Quiñeque mu, pu loncolelu feipiafeiñmu taiñ quimeltulelafiel Biblia quiñeque peñi cam lamngen, fei ayühunquechi femaiñ. w20.06 pag. 28 parr. 14, 15

Iñchiñ taiñ rüf cristianongen, mülei taiñ hueluconquechi piuqueyehual, huelu ca femngechi mülei taiñ nieal fentren quimün ca taiñ doi adümal Ngünechen ñi cüme dungu (Filip. 1:9). Femnoliyiñ, huelulcayafeiñmu pu apostata ca fillque coilaque quimeltun (Efes. 4:14). Mülepalu Jesús Mapu mu, fentren che elcünutueyu. Huelu Pedro feipieyu: “Eimi tami dungun ta rumel mongen dungun” (Juan 6:67, 68). Pedro cüme adümquelafui com ñi feipin ta Jesús, huelu quimniefui tañi Cristo ngen, feimu elcünutulafi. Ca femngechi iñchiñ maneluucüleliyiñ Biblia mu, doi feyentuleaiñ Jehová mu huesaque dungu rume rupafuliyiñ ca quelluafiyiñ ta che ñi ca femngechi femal (2 Juan 1, 2). w20.07 pag. 8 parr. 2; pag. 13 parr. 18

Taiñ quelluafiel taiñ pu peñi, pu lamngen ñi müleal ti rüf dungu mu, mülei taiñ cutranpiuqueyeafiel engün (1 Juan 3:10, 11, 16, 17). Huelucontu piuqueyehuaiñ, doyelchi mai huesaque dungu rupafule. Quiñeque taiñ pu peñi, lamngen, layeluhui chi, feimu duamniei tañi quellungeal ca yafültucungeal. Caquelu taiñ pu peñi, pu lamngen com ñamümingün tañi nieel quiñe nüyün mu, lüfconrucan mu, cürüftucu mahun mu, feimu duamnieingün tañi deumangetual tañi ruca ca tañi Trahunhue Ruca. Re huenche taiñ hun meu müten cutranpiuqueyelayafiyiñ taiñ pu peñi ca pu lamngen, doi mai taiñ femün meu. Hueluconquechi piuqueyeuliyiñ, inayentuafiyiñ ta Jehová (1 Juan 4:7, 8). Rüf piuqueyeuliyiñ, hueluconquechi perdonahuaiñ (Col. 3:13). w20.07 pag. 24 parr. 14, 15

Feitachi pu che huiñomongetulu, ¿huichuque enseñalngepeai mai Biblia caque quiñeque tati pu che? Tati pu huiñomongetulu, ¿elungepeai mai ñi enseñayafiel tati pu inangechi huiñomongetulu? ¿Pepicangepeaingün mai trahunche mu ñi femal feitachi cüdau? Petu quimlaiñ. Huelu quimnieiñ afle ti huaranca tripantu ñi ngünenieal ta Jesús, “tati Mapu apoleai Jehová ñi quimün meu” (Is. 11:9). ¡Müna falinque cüdau nieaiñ acule feichi huaranca tripantu! Acule feichi huaranca tripantu, com pu poyequefilu ta Jehová cüdaucüleai ñi doi cüme femal Chau Dios tañi ayüqueel, feimu cutranpiuqueyeafiyiñ tati pu huiñomongetulu. Quisu engün tañi pu culpafe chengen mu ca cüdautuaingün ñi femal Jehová tañi ayüqueel (1 Ped. 3:8). Feitachi pu che huiñomongetulu peafi ñi ñom piuquengen Chau Dios tañi pu che ca tañi eluuquen ñi ayühulafiel ta Jehová, fei ca ayürpuafuingün tañi poyeafiel (Filip. 2:12, TNM). w20.08 pag. 16 parr. 6, 7

Inaliyiñ apostol Pablo ñi ngülam, inaduamuhuaiñ taiñ femqueelchi dungu, fei quimtucuafuiñ taiñ nieel quiñeque pepiluhun ñi nienoel taiñ pu peñi ca pu lamngen. Raquiduamnge tüfa, quiñe loncolelu nehue cüme hueupituquelai, huelu rume cüme amuldunguchequei. Cangelu loncolelu müte cüme adcünuquelafi quiñeque cüdau ti trahunche mu, huelu rume fürenechequei ca rume piuqueyechefengei, feimu pu peñi ca pu lamngen fülcontueyu tañi ngülamtungeal (Heb. 13:2, 16). ¿Chem raquiduamelqueiñmu com tüfa? Inaduamuuliyiñ taiñ pepiluhun, quimtucuaiñ taiñ falin-ngen ti trahunche mu. Cafei ütrirlayafiyiñ pu peñi ca pu lamngen tañi pepiluhun mu. Chem cüdau rume nieliyiñ Jehová tañi troquiñche mu, com iñchiñ mülei taiñ doi cüme cüdahuelafiel ta Jehová ca mülei taiñ doi cüme quimeltuchefengeal. w20.08 pag. 23, 24 parr. 16-18

1935 tripantu mu taiñ peñi Joseph Rutherford huli quiñe hueupin “Ti fütra troquiñche” pingelu. Cuifi mu cüme quimngequelafui ñi ineingen tati fütra troquiñche, gran muchedumbre ca pingelu (Apoc. 7:9). Feipingequefui ti fütra troquiñche com piuque mu poyelafingün ta Jehová, “feimu amuaingün rume ta huenu, ngünenielayaingün ta Jesús engün” pingequefui. Huelu tañi hueupin mu taiñ peñi Rutherford quimeltui ñi feingenon tüfa. Doi mai taiñ peñi Rutherford quimeltui tüfachi fütra troquiñche fei ti caquelu ufisa ürque, mongetripayaingün “ti fütra cutrancahun meu”, fei ñi rumel mongeleal tüfachi Mapu mu. Tüfa engün com piuque mu poyequefingün ta Jehová (Mat. 25:31-33, 46; Apoc. 7:14). Jesús feipicünui: ‘Ca femngechi nien ti caquelu ufisa mülenolu tüfachi corral meu, fei quisu engün ca mülei tañi cüpalafiel. Quisu engün ca allcütuaeneu, fei müleai quiñe quechan müten ca quiñe camañ müten’ (Juan 10:16). w21.01 pag. 14 parr. 1, 2

Cüdahuaiñ taiñ femal taiñ cüdau, femngechi nehuencüleafuiñ ca huechulenturpuafuiñ taiñ amuldungun cüdau (Mat. 28:19, 20). Iñchiñ taiñ pu chengen, quiñeque mu müte ayüquelaiñ taiñ femal cüdaungechi dungu. Huelu tati doi falinque dungu cüdaungei llemai. Feimu duamfali taiñ quim ngünehual taiñ femal feichi falinque dungu. Taiñ quim ngünehual, duamnieiñ Jehová tañi nehuen, femngechi müten femürpuafuiñ tati doi falinque dungu (Gál. 5:22, 23, TNM). Apostol Pablo cüdautuquefui ñi femal tañi cüdau, feimu feipi ñi cutrancaquefiel reque tañi cuerpo ñi femal Jehová tañi ayüqueel (1 Cor. 9:25-27). Pablo  ngülamtufi pu cristiano ñi cüdahual, fei ñi femal itrocom dungu “nor dungu meu ca yamün meu” (1 Cor. 14:40). Ca femngechi iñchiñ cüme cüdahuaiñ taiñ quimeltucheal ca taiñ femal fillque dungu taiñ poyenieafiel ta Jehová (Hech. 2:46). w20.09 pag. 6, 7 parr. 15-17

Famülque mu, fentren mapu mu catrütungequelaiñ taiñ amuldungual. Femngechi felele dungu taiñ mapu mu, ramtuhuafuiñ: “¿Cümelcamequepen mai tañi tüngcülen mu?”. Feitachi pichilehuechi antü mu, Jehová tañi pu chengen rume amuldunguchequeiñ. Turpu fente femngequelafui. Mülei fentren cüdau taiñ femal Jehová tañi troquiñche mu. Petu taiñ inantucungenon, ¿chumafuiñ? (2 Tim. 4:2). Ramtuhuafuiñ chumngechi taiñ doi amuldungucheal iñchiñ cam quiñe taiñ pu che. Raquiduamafuiñ chi taiñ huneleal amuldungun mu cam caquelu dungu taiñ femal. Huelu eluulayaiñ taiñ ricungerpual. Acule am tati fütra cutrancahun, ti plata ca ti falinque fillem falihuelayai turpu (Prov. 11:4; Mat. 6:31-33; 1 Juan 2:15-17). Fentren taiñ pu peñi ca pu lamngen quimürpuingün quiñe hue quehun dungu tañi doi amuldungucheal. Jehová tañi troquiñche entui quimeltun doi 1.000 quehun dungu mu, femngechi ñi doi amuldungungeal che. w20.09 pag. 16 parr. 9-11

Pu cümeque hueichafe nor piuquengei, chumquei rume ñi incañpeafiel tañi piuqueyenieel ca falintuqueel. Pablo feipifi ta Timoteo ñi rume piuqueyeafiel ta Chau Ngünechen (1 Tim. 4:7, TNM). Doi piuqueyefiliyiñ ta Chau Jehová, doi falintuafiyiñ ti rüf dungu (1 Tim. 4:8-10; 6:6). Pu hueichafe ayüle ñi pepicaucüleal ti hueichan mu, mülei tañi quim ngüneniehual. Ca femngechi Timoteo quim ngünenieuquefui, femngechi inanielai tañi huesa illutuqueel, cüme piuquengerpui ca eluhui ñi müleal caquelu cristiano engün (2 Tim. 2:22). Ca femngechi iñchiñ quim ngüneniehuaiñ taiñ inanoal taiñ huesaque illutun ca taiñ doi cüme piuquengerpual (Rom. 7:21-25; Efes. 4:22, 24). Cafei cansalen mu iñchiñ, ngüneniehuaiñ taiñ trahuluhual müten (Heb. 10:24, 25). w20.09 pag. 28 parr. 9-11

Nieaiñ paciencia taiñ quelluafiel tati estudiaquelu ñi hultucual ñi mongen Jehová mu ca ñi fautizahual. Huelu ca femngechi mülei taiñ ngüneduamal ñi rüf ayülepen mai ti che ñi poyeafiel ta Jehová. Ramtuhuaiñ: “Ti estudiaquelu, ¿rüf eluuquepei mai ñi inayal Jesús tañi ngülam? Cam, ¿re ayüniei müten ñi estudiayal tati Biblia?”. Mülei taiñ ngüneduamnieafiel chumngechi ñi amulen ti estudiaquelu ñi hueniyerpufiel ta Jehová, feimu ramtuhuafuiñ: “Tañi feipin mu, ¿pengelquepei mai ñi piuqueyeniefiel ta Jehová? ¿Llellipuquepefi mai ta Jehová?” (Sal. 116:1, 2). “¿Ayüquepei mai ñi papeltual Biblia?” (Sal. 119:97). “¿Amuquepei mai trahun mu?” (Sal. 22:22). “¿Petu norümcünupei mai tañi mongen? ¿Nütramcaquepefi mai tañi pu che ca tañi pu hueni chem tañi quimürpuel?” (Sal. 9:1). “¿Rüf ayüquepei mai ñi conal Jehová tañi troquiñche mu?” (Sal. 40:8). Tati estudiamequelu femnole tüfachi dungu, ngüneduamaiñ chemu tañi femnon. Cüme nütramcayafiyiñ rüf piuque mu taiñ quelluafiel. w20.10 pag. 18 parr. 14, 15

Jehová cümeque dungu femi ñi quelluafiel tañi Fotüm Jesús. Ca femngechi José ca María cümeque dungu femingu ñi cüme tremümafiel ta Jesús. Huelu doi tremlu ta Jesús, quisu mülefui ñi dullial chem tañi chumal (Gál. 6:5, TNM). Jesús obligangequelai ñi femal tañi Chau ñi ayüqueel. Ca huentrungefule ta Jesús, dulliafui ñi quisutu duamuhual, fei ñi femnoal Chau Ngünechen tañi ayüqueel. Huelu Jesús ayüniefui ñi hueniyeafiel tañi Chau, feimu cümeque dungu femi. Jesús quimlu chem ayüniei Jehová quisu tañi femal, pürüm müten eluhui ñi quelluntucual (Juan 6:38). Jesús quimniefui ñi üdeaeteu fentren che. Pilafui tañi femngeal, huelu femi müten chem ñi ayüqueel ta Jehová. Feichi fautizaulu 29 tripantu mu, Jesús doyümniefui ñi femal Jehová tañi ayüqueel (Heb. 10:5-7). Epe lalelu ti orcon mamüll mu, Jesús amulei ñi femal Jehová tañi feipieteu (Juan 19:30). w20.10 pag. 29 parr. 12; pag. 30 parr. 15

Taiñ trahunche mu, huesa rupamequepelai quiñeque taiñ pu peñi, quiñeque taiñ pu lamngen. Quiñeque cutrancüleingün chi, layeluhuingün chi. Ngüneduamliyiñ ñi duamnieel quellu quiñe peñi cam quiñe lamngen, llellipuafuiñ ta Jehová taiñ quelluaeteu. Femngechi taiñ feipin ca taiñ femün mu, quelluafuiñ tati pu duamnielu (1 Ped. 4:10). Quimnieiñ Jehová ñi mülen ta iñchiñ mu, feimu yafüluuqueiñ. Jehová adniefi ta Jesús ca pu cümeque püllü taiñ quelluaeteu. Cafei ñi femürpual tañi ayüqueel, Jehová adniefi pu autoridadcülelu taiñ quelluaeteu. Cafei tañi nehuen mu, Jehová adniefi pu peñi ca pu lamngen taiñ quelluaeteu. Com iñchiñ, cüme quimniepelaiñ tüfa. Feimu apostol Pablo reque, maneluhun mu feipiafuiñ: “Ngünechen quelluqueneu ta iñche, feimeu llicalayan. ¿Chem chumaeneu anta che?” (Heb. 13:6). w20.11 pag. 17 parr. 19, 20

Pu apostol cüme quimnieingün Jehová tañi quelluqueteu engün. Jehová elueyu nehuen ñi femal afmatun dungu (Hech. 5:12-16; 6:8). Famülque mu Jehová eluquelaeiñmu taiñ femngechi femal. Huelu Biblia mu Jehová feipiqueiñmu cutrancangeliyiñ taiñ serfiquefiel mu, ayühulafiyiñ ca eluaiñmu tañi nehuen (1 Ped. 3:14). Biblia feipi: ‘Eimün ayühun nieimün, chem che rume huesa pielmünmeu Cristo tañi duam. Ayühun nieimün Ngünechen tañi nehuen am rumel mülequelu eimün meu’ (1 Ped. 4:14). Feimu rume raquiduamlayaiñ taiñ chumafel inantucungeliyiñ cüpalechi antü mu. Doi mai eluhuaiñ taiñ doi maneluhual Jehová mu taiñ quelluaeteu ca taiñ montulaeteu. Iñchiñ maneluhuaiñ Jesús tañi feipin mu. Feipicünui: “Iñche ta eluhuayiñ fentren quimün chumngechi tamün dungual, femngechi ta quiñe rume tami pu caiñe notucadungulayaimünmeu ca chem pilayaimünmeu rume”. Jesús ca feipicünueiñmu: ‘¡Fentecünuquilnge tami maneluucüleal iñche meu, femngechi ta peaimün montun!’ (Luc. 21:12-19). Ca loncontucuaiñ, lan mu tañi pu poyequeteu Jehová acordaniei ñi chumngequefel fei ñi huiñomongeltuafiel. w21.01 pag. 4 parr. 12

Pablo maneluhui ñi huiñomongetual ta che, huelu fütra cuifi, Job ca nütramyei tüfachi maneluhun dungu. Job rüf maneluucülefui Chau Dios ñi acordanieteu, fei ñi huiñomongeltuaeteu (Job 14:7-10, 12-15). Com pu rüf cristiano maneluucüleiñ ti pu la ñi huiñomongetual. Tüfa coneltulei taiñ “hune quimeltungeelchi dungu” mu (Heb. 6:1, 2). Hunen Corintio capitulo 15 mu, Pablo cüme quimeltui ti huiñomongetun mu. Ñi huirintucuel ta Pablo rüf yafültucupelafi pu cristiano feichi antü mu. Fentren tripantu rupayafui rume taiñ maneluucülen ti huiñomongetun mu, ñi feipiel ta Pablo quelluaiñmu taiñ doi maneluhual ñi felerpual. Layeluuliyiñ, Jesús ñi huiñomongetun doi yafültucuafeiñmu. Feita pengelqueiñmu ñi rüf huiñomongetual ta che. Pablo amuldungulelfi pu corintoche ñi huiñomongetun ta Jesús (1 Cor. 15:1, 2). Pablo feipi feichi pu che feyentunole Jesús ñi huiñomongetun mu, “chem falilai rume” ñi feyentun Jehová mu (1 Cor. 15:17). w20.12 pag. 2, 3 parr. 2-4

¿Chem quellueyu ta Pedro? Loncontucuniepelai Jesús tañi feipieteu: ‘Iñche ta llellipupefiñ ta Ngünechen eimi meu, femngechi tañi afnoal tami feyentun iñche meu’. Fei Jehová femi ñi chem llellipueteu ta Jesús. Fei hula deu huiñomongetulu Jesús, peufaluufi ta Pedro ñi yafültucuafiel peno (Luc. 22:32; 24:33, 34; 1 Cor. 15:5). Ca antü deu ñi challhuamequen com quiñe pun pu apostol, peufaluhueyu ta Jesús. Feichi meu, Jesús elufi ta Pedro ñi feipiaeteu ñi piuqueyeteu. Cafei Jesús elufi doi fentren cüdau tañi saquin hueni Pedro, femngechi pengelelfi ñi perdonafiel (Juan 21:15-17). Jesús ñi cüme femfiel mu ta Pedro quimfali ñi cutranpiuqueyechequen Jehová reque. Feimu culparumeliyiñ, “Jehová turpu perdonalayaeneu” pilayaiñ. Huecüfü mai raquiduamelchequei taiñ perdonanoaeteu Jehová. Loncontucunieaiñ: Jehová müna piuqueyenieiñmu. Quimniei taiñ culpafe chengen, feimu eluucülei taiñ perdonayaeteu. Ca femngechi mülei taiñ inayentuafiel ta Jehová quiñeque che huesalcaeliyiñmu (Sal. 103:13, 14). w20.12 pag. 20, 21 parr. 17-19

Ngüneduamliyiñ ñi chumlerpun pu maneluunolu Jehová mu, falinque quimeltun enturpuafuiñ. Ngüneduamfiliyiñ ñi huesaque femün engün, quelluaiñmu taiñ inayentunoafiel engün. Peafiyiñ quiñe cuifi rupan dungu. Asá reyngerpulu, quintuquefui ta Jehová ñi quelluaeteu rupan mu ta huesaque dungu. Huelu rupachi antü mu, maneluulai Jehová mu tañi quelluaeteu. Doi mai quisu tañi raquiduam müten inafi (2 Crón. 16:1-3, 12). Feimu cullifi pu sirio ñi quelluaeteu ti hueichan mu. Cüme tripayalu ñi dungu troquiupelai ta Asá, huelu cüme triparpulai llemai. Quiñe profeta feipieyu ta Asá: “Maneluhuimi Siria ñi lonco ülmen mu ca maneluulaimi tami Chau Ngünechen Jehová mu, feimu tati pu hueichafe ñi nieel Siria ñi lonco ülmen lefmahuingün eimi mu” (2 Crón. 16:7). Ca femngechi iñchiñ rupaliyiñ huesaque dungu mu, quisu maneluulayaiñ. Doi mai quintuaiñ Jehová tañi ngülam Biblia mu. Quiñeque mu mülei taiñ pürüm müten dullial taiñ chem chumal, huelu ca femngechi tüngcüleaiñ ca maneluucüleaiñ Jehová mu. Femngechi cüme dulliaiñ. w21.01 pag. 6 parr. 13-15

Famülque mu quiñeque peñi, lamngen ngüñüutulei. Nielaingün plata ñi ngillayam iyael. Cañpüle mülei ta hueichan, feimu fillalequeingün. Caquelu peñi, lamngen presuntucungeingün ñi serfifiel mu ta Jehová. Huelu ti fütra troquiñche rume ayüucüleingün. Quimnieingün ti hue Mapu mu müleai fentren iyael ca fentren quimeltun Jehová meu cüpalu. Ca femngechi apümcangele Huecüfü ñi ngünenieel, Jehová incanieafi tati fütra troquiñche. Feimu Apocalipsis feipi “are rume ta huesalcalayaeyu engün”. Deu rupale ti fütra cutrancahun, fei hula Jesús adcünuafi tati fütra troquiñche cheu ñi pütocoal “fentren co tati hulquelu rumel mongen” (Apoc. 7:17). Raquiduamnge, ti fütra troquiñche müten mongetripayai ti fütra cutrancahun mu, fei chumcaunorume lalayafuingün. ¡Müna cüme maneluhun llemai! (Juan 11:26). Ti pu caquelu ufisa rume mañumniefingün ta Jehová ca Jesús ñi elueteu maneluhun. w21.01 pag. 16, 17 parr. 11, 12

Pichilehuelu ñi layal ta Jesús, raquiduamquefui tañi huesaque dungu tañi rupayafel tañi pu inanieteu. Fente tañi piuqueyefiel engün, feipifi ta Jehová tañi cuñiutucuafiel femngechi ñi famentunoaeteu tati Huecüfü (Juan 17:14, 15, TNM). Jesús quimniefui huiñotule ta huenu mu, Huecüfü caiñetunieafi pu poyequefilu ta Jehová. ¡Felei llemai! Jehová ñi pu che duamnieafui tañi cuñiutucungeal. Famülque mu doi duamnieiñ taiñ cuñiutucuaeteu Jehová, ¿chumngelu? Huecüfü quechanacümngepai Mapu mu, feimu rume lladcülei (Apoc. 12:12). Quiñeque che taiñ inacaqueteu raquiduamqueingün tañi femün mu engün poyequefingün ta Chau Ngünechen. ¿Chumngelu femngechi raquiduamqueingün? Huecüfü raquiduameleyu tüfa (Juan 16:2). Caquelu che inacaqueiñmu taiñ inanofiel mu quisu engün tañi raquiduam. Chem mu rume inacangeliyiñ, llicalayaiñ. ¿Chumngelu? Taiñ peelchi texto fachantü niei ti huiñoldungun. w21.03 pag. 26 parr. 1, 3

Jehová com dungu ta femquei piuqueyen mu. Fente taiñ piuqueyeteu Jehová eluqueiñmu com taiñ duamnieel. Cafei Jehová huli tañi Fotüm. Ca Jesús eluhui ñi lapayal iñchiñ taiñ duam mu, fente taiñ piuqueyenieteu (Juan 3:16; 15:13). Chem no rume catrütulayafui Jehová ca Jesús taiñ piuqueyenieteu (Juan 13:1; Rom. 8:35, 38, 39). Ca femngechi pu ngen familia com dungu mülei ñi femal piuqueyen mu. ¿Chumngelu rume falin-ngei tüfa? Ti apostol Juan feipi: “Quiñe che piuqueyenole ñi peñi [ca tañi pu che] tañi penieel, fei ¿chumngechi am piuqueyeafui ta Ngünechen, fei ñi pequenoel rume?” (1 Juan 4:11, 20). Feimu quiñe huentru piuqueyefile tañi pu che ca cüpa inayentufile ta Jehová ca Jesús, quelluafi tañi pu che ñi hueniyeafiel ta Jehová. Cüme duamelafi engün ca eluafi com ñi duamnieel tañi mongeluhuam (1 Tim. 5:8). Cafei cüme tremümafi tañi pu fotüm ca ñahue ca norümafi engün. Cafei cüme dulliai chem tañi chumal, femngechi ñi ayühulafiel ta Jehová ca tañi pu che. w21.02 pag. 5 parr. 12, 13

Taiñ cüme Chau Jehová quimniei chem taiñ rupaquen ca taiñ huesa duamelqueteu. Ngüneduamnoliyiñ rume chem cümeque dungu taiñ femquen iñchiñ, Jehová com peniei (1 Juan 3:19, 20). Quiñe che yafüluuquei tañi elcünutual tañi huesa femquen. Huelu ca huiño huelulcaule tüfachi dungu mu, ca huiño huesa duameltuafeyu. Com iñchiñ huesa duamelqueiñmu taiñ culpan (2 Cor. 7:10). Huelu ngelai taiñ quisu condenahual. Ca feipiquelayaiñ “turpu falin-ngelan, Jehová perdonalayaeneu” piquelayaiñ. Feichi raquiduam feingelai tati, püntünentuafeiñmu Jehová mu. Doi mai huelulcauliyiñ, llellipuafiyiñ ta Jehová. “Perdonaen” piafiyiñ, femngechi cümelcautuaiñ quisu mu (Is. 1:18). Jehová ngüneduamle taiñ rüf repentiucülen ca taiñ eluucülen taiñ femhuenoal, perdonayaiñmu llemai. Ca feipiafiyiñ pu loncolelu taiñ quelluaeteu, fei engün piuqueyenquechi quelluaiñmu taiñ fülcületual Jehová mu (Sant. 5:14, 15). w20.12 pag. 23 parr. 5, 6

Jesús respetaquefi pu domo. Pu fariseo doicülelu pu domo mu troquiuquefuingün, feimu dunguquelafingün caquelu che tañi adquiñ meu ca turpu enseñaquelafingün Chau Dios tañi dungu. Huelu Jesús femngechi femquelafui, doi mai trür enseñaquefui pu huentru, pu domo falinque dungu Chau Dios mu (Luc. 10:38, 39, 42). Cafei Jesús elufi quiñeque domo ñi compañaeteu petu amuldunguyaulu fillque huaria püle (Luc. 8:1-3). Huiñomongetulu Jesús huercüfi quiñeque domo ñi feipiafiel ñi pu apostol, femngechi pengeli ñi falintuniefiel pu domo (Juan 20:16-18). Pablo cüme ngülamfi ta Timoteo ñi yamnieafiel pu domo. Pablo quimniefui Timoteo hunelu mu ñi quellueteu tañi ñuque ca tañi chuchu (2 Tim. 1:5; 3:14, 15). Pablo huirintuculelfilu ñi carta tati pu romano üitufi quiñeque lamngen. Falintuquefi com ñi femquen feitachi pu lamngen, feimu saquifi engün (Rom. 16:1-4, 6, 12; Filip. 4:3). w21.02 pag. 15 parr. 5, 6