Abril

Taiñ cristianongen mu, rupamequeiñ huesaque dungu mu. Quiñeque peñi, lamngen huesa duameleiñmu chi (Sant. 3:2). Taiñ compañ colegio mu cam cüdau mu ayentuqueiñmu chi taiñ testigongen mu (1 Ped. 4:3, 4). Cam quiñeque mu taiñ familia cüpa catrütuqueiñmu taiñ amuldungual ca amual trahun mu (Mat. 10:35, 36). Fente taiñ huesa rupan, raquiduamafuiñ chi taiñ poyehuenoafiel ta Jehová. Huelu chem huesa dungu rupafuliyiñ rume, maneluhuaiñ Jehová taiñ quelluaeteu. Eluaiñmu quimün taiñ cüme chumal ca quelluaiñmu taiñ nehuencüleal. Jehová huirintucucünui Biblia meu chumngechi tañi pu poyequeteu chaftufingün huesaque dungu. ¿Chumngelu femi tüfa? “Iñchiñ taiñ quimeltungeal”, feipi ti apostol Pablo Jehová ñi duam mu. Biblia meu, papeltufiel mu ñi rupan quiñeque che, yafültucuqueiñmu ca quelluqueiñmu taiñ doi maneluhual Chau Dios mu. Huelu ngelai taiñ re papeltual müten. Cafei eluhuaiñ taiñ cüme elcünutual taiñ raquiduam, fei taiñ piuquentucual taiñ papeltuel. w21.03 pag. 14 parr. 1, 2

¿Raquiduamquepeimi mai ñi fülangcülen reque tati ngan ñi cosechangeal? Amuldungulelfilmi tati pu che, ¿raquiduamqueimi mai ñi eluucülen engün ñi inayafiel ta Jesús? Femngechi raquiduamülmi, cüla cüme dungu femürpuaimi: 1) Doi eluucüleaimi tami amuldungucheal. Tati cosecha antü pichiñmaquei, feimu tati pu che pürüm müten eluuquei tañi cüdahual. 2) Ayüucüleaimi tami cüme allcütueteu tati pu che. Tati Biblia feipi pu che ayüuquei cosecha antü mu (Is. 9:3). Ca 3) raquiduamaimi tati pu che ñi inanierpuafiel ta Jesús, feimu nütramcayafimi pu che chem tañi duamnieel engün. Quiñeque che inaquefilu ta Jesús raquiduamquefui chi: “Pu samariache turpu allcütulayai Jesús ñi quimeltuel”. Huelu Jesús raquiduamquefui tati pu samariache ñi inanieaeteu. Iñchiñ ca femngechi raquiduamaiñ com tati pu che mu. Cümeafui taiñ inayentuafiel ñi femün ta Pablo. Pablo quimniefui chem ñi feyentuqueel pu che. Inaduamquefui chem ñi ayüqueel engün. Ca raquiduamquefui tati pu che ñi inanierpuafiel ta Jesús. w20.04 pag. 8, 9 parr. 3, 4

Pürüm huesa raquiduamalayafiyiñ taiñ pu peñi ca pu lamngen, doi mai inaduamafiyiñ ñi chum duamcülen engün. Jehová müten rüf cüme quimnieiñmu ca cutranpiuqueyenieiñmu. Feimu ngillatuafiyiñ ta Jehová taiñ doi cüme quimafiel taiñ pu peñi ca pu lamngen, femngechi taiñ doi cutranpiuqueyeafiel engün. Dullintulayaiñ inei taiñ cutranpiuqueyeafiel. Fentren taiñ pu peñi ca pu lamngen rupaqueingün huesaque dungu mu chumngechi ñi rupan ta Jonás, Elías, Agar ca Lot. Quiñeque mu taiñ pu peñi ca pu lamngen cutrancauqueingün quisu engün tañi femün mu. Huelu quiñeque mu, iñchiñ ca femngechi femqueiñ chi. Feimu Jehová feipiqueiñmu com iñchiñ taiñ hueluconquechi cutranpiuqueyehual (1 Ped. 3:8). Femliyiñ, quiñeucüleaiñ com iñchiñ taiñ poyequefiel ta Jehová. Feimu llemai cüme allcütuafiyiñ taiñ pu peñi ca pu lamngen, doi cüme quimafiyiñ engün ca cutranpiuqueyeafiyiñ. w20.04 pag. 19 parr. 15-17

Jesús femi com ñi feipieteu tañi Chau. Feimu taiñ femal taiñ feipieteu ta Jehová, mülei taiñ inayentuafiel ta Jesús (Juan 8:29). Ayüliyiñ taiñ amuleal ti rüf dungu mu, mülei taiñ maneluhual ñi rüf dunguquen ta Jehová. Feimu com tañi feipicünuel Biblia mu rüfngei. Ca femngechi mülei taiñ rüf maneluhual Jesús tañi Mesías ngen. Fachantü pütrünque che feyentuquelai Jesús ñi reycülen Chau Dios tañi Gobierno mu. Juan ca feipi ñi müleal “pütrün ngünencachefe” ñi huelulcayafiel pu nehuencülenolu ti rüf dungu mu (2 Juan 7-11). Juan feipi: “¿Inei am tati coilangelu? Fei tüfa tati feipiquelu Jesús tañi Cristo ngenon” (1 Juan 2:22). Taiñ ngünencangenoal, mülefui taiñ papeltuafiel Biblia. Femliyiñ müten, quimürpuafiyiñ ta Jehová ca Jesús (Juan 17:3). Fei cüme quimaiñ taiñ mülen ti rüf dungu mu. w20.07 pag. 21 parr. 4, 5

Tati cuden mu quiñe lefquelu müten hueuquei, feimu pu lefquelu quisutu duamuuquei müten tañi huehual. Huelu taiñ cuden mu reque ñi poyefiel ta Jehová, quiñe che müten hueuquelai. Feimu quisutu duamuuquelaiñ, doi mai quelluquefiyiñ pu che ñi huehual tüfachi cuden reque, fei ñi llohual tati rumel mongen (Gál. 5:26; 6:4). Feimu inaquefiyiñ Pablo ñi ngülam. Quisu feipi: “Inei no rume ayüquilpe quisu müten tañi cüme feleal, huelu mai ca femngechi caquelu tañi ayülngeal ñi cüme feleal engün” (Filip. 2:4). Feimu llemai doyümaiñ ñi cümelcaleal taiñ pu peñi ca pu lamngen, fei “femngepe iñche tañi feipin müten” pilayaiñ. Femngechi catrütulayafiyiñ taiñ pu peñi ca pu lamngen ñi cüme cuden nieal reque (Rom. 14:13, 19-21; 1 Cor. 8:9, 13). Fente taiñ piuqueyenieteu Jehová, feipicünueiñmu taiñ eluaeteu rumel mongen, quiñeque che ñi müleal huenu mu, caquelu che Mapu meu. Huelu com iñchiñ mülei taiñ huechutripayal tati cuden, taiñ llohual taiñ feipicünueteu Jehová. w20.04 pag. 28 parr. 10; pag. 29 parr. 12

Fentren cristiano mongetripayaingün ti fütra cutrancahun meu, femngechi huehuafingün reque tati lan dungu. Feitachi pu cristiano peafingün fentren che ñi huiñomongetun, femngechi ca peaingün ñi hueungen ti lan dungu. ¡Müna ayühun-ngeai feichi antü! (Hech. 24:15). Ca rupale huaranca tripantu, pu poyeniefilu ta Jehová huehuafingün tati lan dungu ñi llohuel Adán mu, rumel mongeleaingün. Felei llemai, Pablo ñi huirintuculelfiel pu corintoche rume yafültucuqueiñmu, feimu rume mañumcüleiñ. Fei inayafiyiñ Pablo tañi ngülam, cüdahuelafiyiñ ta Jehová com taiñ nehuen mu (1 Cor. 15:58). Fill antü cüme femliyiñ feitachi cüdau, ayühun mongen nieaiñ cüpalechi antü. Iñchiñ raquiduamlayafuiñ fente ñi cümen feichi mongen taiñ nierpual. Rüf quimürpuaiñ taiñ refalta cüdauquenon Chau Dios tañi dungu meu. w20.12 pag. 13 parr. 16, 17 

Quiñeque dungu ñi feipiel Ezequiel, Daniel ca Apocalipsis quiñeucülepelai, feimu feipiafuiñ chem rupayai chi cüpalechi antü mu (Ezeq. 38:10-23; Dan. 2:43-45; 11:44–12:1; Apoc. 16:13-16, 21). Biblia feipi “Gog tuulu Magog mapu mu” caiñetuafi pu poyequefilu ta Jehová (Ezeq. 38:2). Gog fei tati com pu gobierno ñi quiñehual engün (Apoc. 16:13, 14). Acule ti fütra cutrancahun, quisu engün caiñetuafi com pu poyequefilu ta Jehová, fei ñi apümcayafiel engün. Juan pengelelngei chem ñi rupayal feichi antü mu. Quisu pei ñi nagpan fütraque pire (llai), fei ñi cutrancayafiel Chau Dios tañi pu caiñe. Feichi fütraque pire adentulepelai tati huercün dungu taiñ feipial, feichi mu feipiafuiñ tati pu che ñi condenaeteu Chau Dios. Tüfachi huercün dungu mu peno Gog eluhuai ñi apümcayafiel com pu poyequefilu ta Jehová (Apoc. 16:21). w20.05 pag. 15 parr. 13, 14

Quiñe falin dungu taiñ elueteu Jehová, fei tañi nehuen. Raquiduamaiñ com ñi femquen Jehová tañi nehuen mu, femngechi doi falintuafiyiñ feitachi nehuen. Petu tañi amutunon mu ta huenu, Jesús feipicünufi tañi pu discipulo: ‘Acule Chau Dios ñi nehuen eimün meu, llohuaimün nehuen ca tripayaimün tamün nütramyemuafiel ta iñche [...] tuntepu ñi mülen ta mapu’ (Hech. 1:8). Jehová tañi nehuen mu, huall Mapu püle doi 8 millon che poyerpufi ta Jehová. Ca femngechi iñchiñ llohun mu Ngünechen tañi nehuen, piuqueyechefengeiñ, ayüucüleiñ, tüngcüleiñ, ñochi duampiuquengeiñ, fürenechequeiñ, cüme chengeiñ, feyentuqueiñ Ngünechen mu, ñom duamngeiñ ca quim ngünenieuqueiñ. Feimu quiñeucüleiñ com iñchiñ Ngünechen tañi pu chengen (Gál. 5:22, 23, TNM). ¡Rume ayühulqueiñmu mai Jehová taiñ elueteu ñi nehuen! w20.05 pag. 28 parr. 10; pag. 29 parr. 13

Fillque dungu mu feipiafuiñ tati pu huiñomongetulu quimtuaeyu tañi pu che. Inaduamliyiñ tati huiñomongetulu nütramcalu ta Biblia, raquiduamafuiñ tati pu che huiñomongetuai chumngechi ad ñi niequefel, tañi chumngechi dunguquefel ca chem raquiduam ñi niequefel petu tañi lanon. ¿Chemu feipiafuiñ? Jesús feipi tati layechi che umaucülelu reque felequeingün. Feimu huiñomongetule ta che, nepelngeaingün reque (Mat. 9:18, 24; Juan 11:11-13). Umaucülechi che nepen mu, ca femngechi raquiduam niequei müten, caletuquelai tañi ad ca tañi dungun no rume. Raquiduamaiñ ñi rupan ta Lázaro. Meli antü lalefui ca nümühuefui tañi cuerpo. Huelu huiñomongetulu Lázaro, tañi epu lamngen quimfemtueyu. Quisu ca femngechi quimfemtufi engu (Juan 11:38-44; 12:1, 2). w20.08 pag. 14 parr. 3; pag. 16 parr. 8

Pu dullin cristiano ca pu caquelu ufisa caque rume maneluhun niefuingün rume, trüringün fillque dungu mu. Chau Jehová huli tañi saquin Fotüm ñi lapayal pu dullin cristiano ca pu caquelu ufisa mu, femngechi pengeli ñi trür piuqueyeniefiel ca falintuniefiel com engün. Tüfachi epu troquiñche mülei ñi nor piuqueyeafiel ta Jehová ca Jesús, fei ñi llohual tañi feipicünueteu (Sal. 31:23). Ca acordanienge: chem maneluhun rume nieliyiñ, Jehová eluqueiñmu tañi nehuen tunte taiñ duamnieel. Chau Jehová elufi müna cüme maneluhun tati pu dullin cristiano ca tati pu caquelu ufisa (Jer. 29:11). Jehová ca Jesús fütra cullingu reque taiñ nierpual ta rumel mongen. Feimu amuliyiñ ti trahun Jesús tañi lan ñi acordangeal, pengelafuiñ taiñ mañumniefiel engu. Tüfachi trahun doi falin-ngei caquelu trahun mu. w21.01 pag. 18 parr. 16; pag. 19 parr. 19

Femngelu ti trahun Jesús tañi lan ñi acordangeal, epe com pu trahuluuquelu maneluuquei ñi mongeleal Mapu mu. Amuqueingün ti trahun mu ñi piuqueyefiel mu ta Jesús ca tati pu dullin cristiano. Trürümngeafui mafün mu reque. Pu hueni amuquei ñi piuqueyefiel mu, ñi falintufiel mu ti hue curehuen. Fei, ¿amunoafulu cai pu caquelu ufisa ñi acordayal Jesús tañi lan? Huelu fei ca müten no. Cafei trahuluuqueingün fente ñi mañumniefiel Jesús tañi lan mu, fei ta eluafeyu ñi rumel mongelerpual. Cafei pu caquelu ufisa amuquei ti trahun Jesús tañi lan ñi acordangeal ñi inayafiel Jesús tañi huercün dungu. Fei feipifi tañi pu apostol: ‘Femqueaimün tüfa iñche tamün acordamuafiel’ (1 Cor. 11:23-26). Feimu petu mülehuele dullin cristiano Mapu mu, pu caquelu ufisa amuaingün feichi falin trahun mu. w21.01 pag. 17 parr. 13, 14

Taiñ rüf piuqueyecheal, pengelaiñ taiñ femquen mu (ca ngüneduamafuimi Santiago 2:17, 26). Raquiduamnge tüfa, Jehová piuqueyenieiñmu (1 Juan 4:19). Feimu Biblia mu feipiqueiñmu taiñ piuqueyeteu (Sal. 25:10; Rom. 8:38, 39). Doyelchi mai tañi femün mu pengelqueiñmu taiñ piuqueyenieteu. Jehová hultucui ñi saquin Fotüm ñi cutrancahual ca tañi layal iñchiñ meu (Juan 3:16). Feimu rüf quimnieiñ taiñ piuqueyenieteu Jehová. Femliyiñ com ñi feipin Jehová ca Jesús, femngechi pengelaiñ taiñ piuqueyefiel (Juan 14:15; 1 Juan 5:3). Jesús huercüeiñmu taiñ hueluquentu piuqueyehual (Juan 13:34, 35). Feimu feipiafiyiñ taiñ pu peñi, pu lamngen taiñ piuqueyefiel. Huelu ca pengelaiñ taiñ femquen mu (1 Juan 3:18). w21.01 pag. 9 parr. 6; pag. 10 parr. 8

Tati pu dullinque cristiano ngünenieaingün Jesús engün huenu mapu. Tati pu dullin cristiano rumel quiñeucüleaingün Jesús engün, fei peafingün ca nütramcayafingün ca trür cüdahuaingün (Juan 14:2, 3). ¿Caquelu pu che cai ñi rumel müleal Mapu mu? Quisu engün ca femngechi ngüneduamaingün fente ñi piuqueyenieteu ca hueniyeteu ta Jesús, ca rumel ayüucüleaingün chumngechi ñi adcünuel ta Jehová ca Jesús. Tüfachi pu che pelayafingün ta Jesús, huelu rumel amuleaingün ñi cüme hueniyeafiel ta Jesús (Is. 9:6, 7). Hueniyefiliyiñ ta Jesús, doi cümelcaletuaiñ. ¿Chumngechi am? Famülque mu, Jesús piuqueyenieiñmu ca quelluqueiñmu. Cafei maneluucüleiñ taiñ rumel mongeleal. Taiñ hueniyefiel ta Jesús, tüfa quelluqueiñmu taiñ hueniyerpuafiel ta Jehová. Quisu tati doi cüme hueni taiñ nierpuafel. ¡Müna cüme dungu ürque taiñ hueniyerpufiel ta Jesús! w20.04 pag. 25 parr. 15, 16

Ti apostol Pablo huirintuculelfi tüfachi carta tati pu cristiano mülelu ta Corinto. Tüfa engün coneltulei tati pu dullin cristiano ñi amual ta huenu. Com tüfachi pu dullin cristiano ‘lif mongen nierpui Cristo Jesús meu ca dullingeingün ñi coneltual Cristo ñi troquiñche meu’. Pablo ca nütramyei tati pu dullin cristiano “feyentulen layelu ta Cristo meu” (1 Cor. 1:2; 15:18; 2 Cor. 5:17). Cangelu carta mu, Pablo ca feipi: “Rüf quiñeuliyiñ ta Cristo iñchiñ quisu tañi lan meu, ca femngechi quiñehuayiñ ta quisu iñchiñ quisu tañi huiñomongetun meu” (Rom. 6:3-5). Jesús huiñomongetulu, quiñe püllüngetui ca amutui huenu. Ca femngechi mongen nietuaingün com pu dullin cristiano huiñomongetule ta huenu. Pablo feipi Jesús “ta felei tati hune cosechaelchi fün quetran reque ta hualüng meu. Hunencülei ñi huiñomongetun meu” (1 Cor. 15:20). Caquerumei Jesús tañi huiñomongetun, püllüngetui ca llohui afnoachi mongen huenu mu. w20.12 pag. 6 parr. 15, 16

Lan mu pu dullin cristiano famülque mu, esperaquelai ñi huiñomongetual huenu mu. Feimu ti apostol Pablo tañi carta mu feipi pu dullin cristiano pürüm müten ñi nietual cangelu cuerpo huenu mu (1 Cor. 15:51, 52). Famülque mu huechutriparpumequei tüfa. Huiñomongetule pu dullin cristiano rume ayüucüleaingün. Tati Biblia ca quimeleiñmu chem cüdau ñi femal pu dullin cristiano huiñomongetule huenu mu. Jesús feipi: ‘Eluafiñ ta autoridad com troquiñ mapu meu, chumngechi tañi Chau elueneu autoridad ta iñche. Ngünenieafi engün ta fütraque troquiñ mapu quiñe pañillhue reque felechi retrü meu, fei trafoafi engün tati rag challa reque’ (Apoc. 2:26-28). w20.12 pag. 12 parr. 14, 15

Jesús tati hunen fün quetran reque felei. Pablo ñi feipin pengelqueiñmu ñi ca huiñomongetual caquelu che huenu mu. Quiñeque tüfachi pu che fei tati pu apostol ca caquelu discipulo (1 Cor. 15:18). Feichi Pablo huirintucufilu ti carta tati pu corintoche, petu puulafui ñi huiñomongetual huenu mu pu dullin cristiano. Pablo feipi ñi rupayal tüfachi dungu cüpalechi antü mu. Feipi ñi huiñomongetual che “caque quiñeque chumngechi ñi adcünueteu ta Ngünechen”. Ca feipi “Cristo tati hune huiñomongetulu”, fei hula ngünenierpule ta Cristo huenu mu, “tañi montulelchi pu che ca huiñomongetuai” pi ta Pablo (1 Cor. 15:23; 1 Tes. 4:15, 16). Famülque mu Jesús ngüneniei huenu mu. Feimu lalu pu apostol ca caquelu discipulo, pürüm huiñomongetulaingün. Doi mai puulu hula ñi ngünenieal ta Jesús huenu mu, huiñomongetuingün huenu mu ca ‘quiñehuingün Jesús engün quisu tañi huiñomongetun meu’ (Rom. 6:5). w20.12 pag. 5 parr. 12; pag. 6 parr. 16, 17

Pablo nütramyelafi feichi pu che huiñomongetulu Mapu mu. Doi mai nütramyefi pu huiñomongetualu huenu mu (1 Cor. 15:43, 44). Mülepalu Jesús Mapu mu, niequefui mapu tuuchi cuerpo, huelu huiñomongetulu püllüngetui ca müleputui huenu mu. Ca femngechi pu dullin cristiano huiñomongetule, püllüngetuaingün ñi mülepual huenu mu. Pablo feipi: ‘Chumngechi adentuleiñ ti huentru meu tati deumangelu trufür meu, ca femngechi adentuleaiñ tüyechi huentru meu tati huenu mapu tuulu’ (1 Cor. 15:45-49). Huiñomongetulu ta Jesús, nierpulai mapu tuuchi cuerpo. ¿Chumngelu am? Pablo ta feipi: “Tüfei engün nielu ta cuerpo pepi conlayai Ngünechen tañi lonco ülmen mülehue meu” (1 Cor. 15:50). Huiñomongetun mu pu apostol ca pu dullin cristiano, nierpulayafui ta cuerpo huesañmauquelu. w20.12 pag. 11 parr. 10-12

Chau Dios adcünufi quiñeque discipulo ñi huirintucual ñi chumngeal ti huiñomongetun huenu mu. Apostol Juan feipi: “Chau Dios tañi fotüm ca ñahuengetuiñ. Petu quimlaiñ ñi chumletual taiñ mongen. Huelu quimnieiñ peufaluule ta Chau Dios, quisu reque femngeaiñ” (1 Juan 3:2, TNM). Pu dullin cristiano quimlaingün ñi chumlerpual ñi mongen huiñomongetule huenu mu. Puule engün huenu mu, peafingün ta Chau Jehová. Biblia feipilaeiñmu com dungu ti huiñomongetun mu huenu, huelu Pablo quimeltueiñmu quiñeque dungu. Pu dullin cristiano quiñeucüleai Jesús engün tañi apümcayafiel “itrocom tati ñidolcüleyelu, ca ti pu autoridadcülelu ca ti nieyelu ta pepiluhun”. Cafei Jesús engün apümcayafingün “ti quiñelehuechi caiñe, tati lan dungu”. Fei Jesús ca tati pu dullin che eluhuaingün ñi ngünenieaeteu Chau Jehová ca eluafingün ñi ngünenieal itrocom dungu (1 Cor. 15:24-28). ¡Rume ayühun-ngeai feichi antü! w20.12 pag. 8 parr. 2

Pu cristiano dullingenolu ñi amual ta huenu ca maneluuquei ñi huiñomongetual. Biblia feipi apostol Pablo ca caquelu cristiano huiñomongetuingün huenu mu, feimu coneltuingün “tati hune huiñomongetun meu” (Apoc. 20:6). Tüfa pengeleiñmu ñi müleal cangelu huiñomongetun. Tüfa nüucülei ta Job ñi maneluhun mu. Fei ca maneluucülefui tañi huiñomongetual (Job 14:15). Jesús apümcafile com pu gobierno, com pu dullin cristiano quiñeucüleaingün Jesús engün huenu mu. “Fei ti quiñelehuechi caiñe, tati lan dungu ca femngechi hueungeai”. Com pu huiñomongetulu huenu mu, chumcaunorume lahuelayaingün (1 Cor. 15:23-26). ¿Chumleai pu maneluucülelu ñi müleal Mapu mu engün? Nieingün ti maneluhun Pablo ñi feipiel taiñ peelchi texto fachantü. Pu norngenochi che conpulayafui ta huenu, feimu Pablo ñi feipin pengeli ñi müleal huiñomongetun Mapu mu. w20.12 pag. 7 parr. 18, 19 

Ramtuhuafuiñ: “¿Chumngelu maneluucüleafun Jehová ñi eluucülen tañi perdonayaeteu?”. Femngechi ramtuhulmi, quimfali tami arrepentiucülen, feimu Jehová perdonayafeimu llemai. Cuifi mu, Ti Huerquen feipi: “Fentren rupa, re femngechi culpalerpuafuiñ ca cüdautuafuiñ taiñ elcünual quiñe huesa huimtun taiñ niequefel petu taiñ quimnofiel ta Jehová. Chumcaunorume raquiduamquilnge tami perdonanoaeteu ta Jehová. Huecüfü mu llemai cüpai feichi huesa raquiduam. Huesa duamcülelmi tami huelulcan mu, tüfa pengelquei tami cüme chengen ca tami perdonayafeteu Jehová. Amulepe tami ñom piuquengen. Llellipuniefinge ta Jehová tami perdonayaeteu, tami lif raquiduam nieal ca tami huelulcaumequenoal”. Ti apostol Pablo, petu ñi cristianongenon, femi rume fentren huesaque dungu. Pablo quimniefui chem huesaque dungu ñi femün (1 Tim. 1:12-15). Huelu feyentuquefui Jehová ñi perdonaeteu tañi culpan Jesús ñi lan mu (Gál. 2:20, TNM). Femngechi Pablo culpatuucülehuelai, doi mai eluhui ñi cüme cüdahuelafiel ta Jehová. w20.11 pag. 27 parr. 14; pag. 29 parr. 17

Fillque huesaque dungu mu, Huecüfü ayüquei taiñ huesa raquiduamelaeteu. Quiñeque cristiano raquiduamafui: “Femfuli tüfachi huesa dungu, huemünentungelayan ti trahunche mu, feimu müte huesalcalayafun” piafui. Huelu cümelayafui taiñ femngechi raquiduamal. Feimu doi cümeafui taiñ ramtuhual: “¿Huecüfü mai famtucuniepapeneu tüfachi huesa raquiduam, fei ñi nieal epu rume piuque? Inafuli tañi huesaque raquiduam, ¿huesa dunguyengepeafui mai ta Jehová iñche tañi duam mu? ¿Doi fülconafun Jehová mu? Cam, ¿doi famtripayafun?”. Raquiduamaiñ tüfachi dungu mu, ngillatuafiyiñ ta Jehová taiñ ngüneduamuhual rüf piuque mu (Sant. 1:5). Femngechi quisutu ngünencaulayaiñ, fei famentuafiyiñ chem huesa dungu rume. Jesús reque feipiaiñ: “Quiñe püle tripange Huecüfü” (Mat. 4:10). Epu rume piuquengeliyiñ, huesa tripayafuiñ. w20.06 pag. 12, 13 parr. 16, 17

Jehová müten quimniei chumngechi taiñ cümelcaleal. Feimu ñom piuque mu, inaquefiyiñ tañi ngülam (Efes. 4:22-24). Ñom piuquengeliyiñ, doyümafiyiñ Jehová ñi ayüqueel taiñ mongen mu. Ca doicülelu troquiafiyiñ caquelu che. Feimu cüme yeucüleaiñ Jehová mu, ca taiñ pu peñi ca lamngen mu (Filip. 2:3). Cuñiutucuunoliyiñ, inayenturpuafuiñ pu mallma piuquengelu. Femngechi femingün chi quiñeque cristiano cuifi mu. Feimu Pablo ngülamtueyu: “Itrocom eimün feipihuayiñ tamün quisutu mallmaucülenoal tamün raquiduam meu. Tamün femafel, felei tamün nieal cüme raquiduam cüme tüngduam meu”. Cümei taiñ falintuhual, huelu chumngechi feipi Pablo, mülei taiñ ñom piuquengeal, mallmaunoal. w20.07 pag. 2 parr. 1, 2

Asá ñi antü mu, acui antü ñi huiño hueichangetual engün. Fentren etiope hueichafe hueichapafingün ta Asá. Doi quiñe millon hueichafengefuingün. Ti loncolechi soltau Zérah pingelu, raquiduamquefui ñi huehuafiel tati pu israelche. Huelu Asá maneluucülei Jehová mu, feimu feipifi: “Quellumuiñ, ahuem taiñ Chau Ngünechen Jehová, eimi meu maneluucüleiñ, ca tami üi mu chaftupapefiyiñ tüfachi pu che” (2 Crón. 14:11). Pu etiope hueichafe doi alün-ngeingün, Asá ñi pu hueichafe müte ngelafui. Huelu Asá maneluucülefui Jehová ñi nehuen mu, fei tañi montulaeteu engün. Jehová quisucünulafi ta Asá ca tañi pu hueichafe. Feimu pu etiope hueungeingün (2 Crón. 14:8-13). Inchiñ cüme quimlaiñ taiñ chumlerpual quisuque iñchiñ cüpalechi antü mu, huelu cüme quimnieiñ mai taiñ inantucungeal. Jesús feipi afaelchi antü mu rume tañi üdeñmangeal tañi pu inanieteu (Mat. 24:9). w20.09 pag. 17, 18 parr. 14-16

Inei no rume ayüquelai tañi huesa pingeal. Huelu rume loncontucunieliyiñ taiñ huesa pingeel, huesa duamnagafuiñ (Prov. 24:10). Feimu, ¿huesa pingeliyiñ cai? ¿Chem mülefui taiñ femal? Pablo reque ayüucüleafuiñ huesa pingen mu. ¿Chumngelu am? Taiñ huesa pingequen ca taiñ caiñetungequen pengelquei taiñ rüf cristianongen (1 Ped. 4:14). Jesús feipi ñi caiñetungeal tañi pu inanieteu (Juan 15:18-20). Tati pu hunenque cristiano femngechi dungu rupai. Feichi antü mu, fentren che inaquefui pu griego ñi quimeltun. Tüfa engün nehue quimnolu troquifingün tati pu cristiano ca illamcafingün. Tati pu judio ca femngechi illamcaquefingün tati pu cristiano. Quiñe rupa, feipifi Pedro ca Juan ñi nehue quim papeltunon engu (Hech. 4:13). Tati pu cristiano conquelafui politica dungu mu ca tati pu militar mu, feimu nehuencülenolu troquifingün ca illamcafingün. Caiñetungelu tati pu hunenque cristiano, ¿fentecünupeingün mai ñi serfiniefiel ta Jehová? Femlai llemai. w20.07 pag. 15 parr. 3, 4

Apostol Juan rume duamniefui com tañi pu peñi ca pu lamngen, femngechi ñi cüme hueniyeafiel ta Jehová. Feimu cüme ngülamtufi engün tañi cüla carta mu. Pu dullingelu ñi ngüneniepual Jesús engün, rume duamnieaiñmu ca piuqueyenieaiñmu Juan reque. Rume ayühulqueiñmu taiñ quimfiel tüfa (1 Juan 2:27, TNM). Chem rume femliyiñ, inayaiñ com taiñ feipiqueteu Jehová, femngechi amuleaiñ ti rüf dungu mu. Ngüneduamafiyiñ ta Biblia ca maneluhuaiñ fei mu. Rüf maneluhuaiñ Jesús mu. Famentuafiyiñ pu che ñi huesaque raquiduam ca famentuafiyiñ ñi quimeltuqueel pu apostata. Epu rume mongen yenielayaiñ ca femlayaiñ Jehová ñi üdequeel. Inayaiñ Jehová ñi feipin taiñ lif mongen yenieal. Ca perdonayafiyiñ taiñ pu peñi ca pu lamngen ca quelluafiyiñ tati pu duamnielu, femngechi quelluafiyiñ engün ñi amuleal ti rüf dungu mu. Femngechi chem huesa dungu rume rupafuliyiñ, amuleaiñ ti rüf dungu mu. w20.07 pag. 24, 25 parr. 15-17

Chau Jehová piuqueyenquechi elueiñmu taiñ coneltuleal tañi troquiñche mu. Com iñchiñ caquerume dungu femqueiñ ti trahunche mu, huelu com iñchiñ falin-ngeiñ ca hueluconquechi duamniehuiyiñ. Ti apostol Pablo feipi ngelai taiñ feipiafiel taiñ pu peñi ca pu lamngen: “Iñche ta duamtulaeyu” (1 Cor. 12:21). Feimu hueluconquechi falintuhuaiñ ca quiñeucülen cüdahuaiñ, femngechi tüngcüleai ti trahunche (Efes. 4:16). Quiñeucülen mu ti trahunche, pu peñi ca pu lamngen doi cüme duamquei ca doi faliluuquei. Com pu loncolelu Jehová tañi nehuen mu elfalcünungeingün ñi femal feichi cüdau, huelu caquerumei tañi adümuhun engün (1 Cor. 12:17). Quiñeque loncolelu fentren tripantu yeniei feichi cüdau mu, feimu rume cüme adümuuqueingün. Huelu caquelu peñi hue loncolerpuingün, feimu müte pepicaucülelayafuingün chi. Caquelu loncolelu tañi füchan mu cam cutrancülen mu, pepi femquelaingün tunte tañi ayüquefel. Huelu felefule rume, com pu loncolelu hueluconquechi falintuuquei, femngechi inaquefi Pablo ñi ngülam mülelu ti lifru Romanos (Rom. 12:10). w20.08 pag. 26 parr. 1, 2; pag. 27 parr. 4

Jehová adniequeiñmu tañi troquiñche mu. Quiñeque mu, Chau Dios tañi troquiñche doi cüme elcünuquei chumngechi taiñ adümquefiel quiñeque quimeltun ca ngülamtuqueiñmu chumngechi taiñ lif mongen yenieal. Quiñeque mu doi cüdautuafuiñ chi taiñ inayafiel taiñ feipieteu Chau Dios tañi troquiñche. Fendengele ti Trahunhue Ruca cheu tami amuquefel, nehue ayülayafuimi chi. Loncontucunieaiñ taiñ cüdahuelmequefiel ta Jehová ca quisu ñi adniefiel tañi troquiñche, femngechi rumel ayüucüleaiñ (Col. 3:23). Ti rey David huli plata ñi deumangeal ti ngillatuhue ruca, feimu inayentufali. Feipi: “¿Inei am ta iñche ca tañi pu che taiñ eluucüleal ñi hulal taiñ yehun ayühun mu? Itrocom am ta eimi mu cüpalu, fei tami hulqueel, iñchiñ ta huiño eluutuiñ” (1 Crón. 29:14). Iñchiñ ca femngechi hul-liyiñ plata, huiñoleltuquefiyiñ reque ta Jehová taiñ elueteu. Iñchiñ femün mu rume, Jehová rume ayüuquei taiñ elufiel mu taiñ tiempo, taiñ plata ca taiñ nehuen taiñ cüdahuelfiel mu (2 Cor. 9:7). w20.11 pag. 22, 23 parr. 14-16

Taiñ cüme amuldunguchefe pingeal, ngüneduamngequelaiñ tunten che taiñ quelluquefiel ñi conal Jehová tañi troquiñche mu (Luc. 8:11-15). Fentecünunoliyiñ taiñ quimeltuchequen, femaiñ taiñ huercüeteu Jehová ca Jesús. Feimu cüme cüdaufe piaiñmu Jehová (Mar. 13:10; Hech. 5:28, 29). Iñchiñ quimnieiñ pichilehuei tañi afal com huesaque dungu, feimu doi falin-ngei feula taiñ amuldungual, fei ñi montuluhual ta che. ¡Alüñmaquilnge! Chem rume rupale tami mongen mu, eluucülenge müten tami conal feichi falin cüdau mu. Doi eluhuaimi tami amuldungucheal, doi quimafimi ta Biblia, doi nehuen piuquecünuhuaimi ca doi quim ngünehuaimi. Quiñentrür cüdaucülepange iñchiñ mu. Doi 8 millon che femqueiñ feitachi amuldungun cüdau huall Mapu püle. Femülmi, Jehová rume ayühulaeimu (Neh. 8:10; Luc. 5:10). Chumaimi rume tami amuldungucheal, “fentepuupe” pile hula ta Jehová. w20.09 pag. 7 parr. 18-20

Doyümlayaiñ taiñ nieal plata ca falinque fillem. Rume cüpa ricungeliyiñ, piuqueyehuelayafuiñ ta Jehová, falintuhuelayafuiñ tati Biblia ca ayühuelayafuiñ taiñ quimeltucheal (Mat. 13:22). Iñchiñ falintufiliyiñ taiñ eluqueteu Jehová, pepicahuaiñ taiñ pürüm famentuafiel chem dungu rume taiñ huesalcayafeteu. Pefiel mu iñchiñ internet, pelicula ca television, triparumeafui ñi quimeltuqueel pu apostata, podngechi dungu ca quehuan dungu. Petu ñi rupanon tüfa, cüme raquiduamaiñ chem femafuiñ femngechi dungu rupafule. Cüme pepicauliyiñ, müchai müten famentuafiyiñ chem huesa dungu rume taiñ huesalcayafeteu, femngechi cüme hueniyenieafiyiñ ta Jehová ca lif chengeaiñ quisu tañi adquiñ mu (Sal. 101:3; 1 Tim. 4:12). Chau Jehová elueiñmu tati rüf dungu Biblia mu mülelu ca elueiñmu taiñ quimeltucheal, feimu rume falintuafiyiñ feichi falinque dungu. Femngechi femliyiñ, lif raquiduam nieaiñ, quiñe cüme falin mongen nieaiñ ca ayühulaiñmu quelluafiel pu che ñi quimafiel ta Jehová. w20.09 pag. 29, 30 parr. 16-19

Fautizahun mu iñchiñ, pengelqueiñ taiñ maneluucülen Jehová mu ca taiñ cüpa serfiquefiel tañi troquiñche mu. Jehová ñi adniequefiel tañi troquiñche pengelqueiñmu ñi chumngen, chem ayüniei tañi femürpual ca tañi huercün dungu. Raquiduamnge cüla dungu. Quiñe, Jehová dullintuchequelai (Hech. 10:34). Fente tañi piuqueyechen Jehová, huli tañi Fotüm “ñi montulafiel ta itrocom che” (1 Tim. 2:6; Juan 3:16). Jehová adniequefi tañi troquiñche ñi amuldungulelafiel itrocom che, femngechi pu cüme piuquengelu ñi feyentual Jesús mu, fei tañi montual. Epu, Chau Jehová tüngün-ngei ca ayüquelai ti huelulcalechi dungu (1 Cor. 14:33, 40). Feimu Jehová ayüniei tañi pu che ñi adcünuleal ca ñi tüngcüleal engün. Cüla, Jehová rume cüme quimeltufengei (Is. 30:21). Feimu Jehová tañi troquiñche quimeltuqueiñmu iñchiñ Biblia mu ca quimeltuquefi tati pu che amuldungun mu. w20.10 pag. 20 parr. 1-3