Mayo

Pichicalu ta Jesús, eluhui ñi allcütuafiel tañi chau ca tañi ñuque. Jesús turpu raquiduamlai “iñche doi quimün tañi pu chau mu, feimu inalayan tañi feipieteu”. Jesús hunen fotümngefui, feimu mülefui ñi femal quiñeque cüdau, huelu eluupelai tañi cüme femürpual. Jesús rume cüdaupelai José engu ñi quimürpual carpinteria, femngechi quelluntucupelai eluafiel ñi duamnieel tañi pu che. José ca María feipipelafingu ta Jesús ñi choyüngen afmatun dungu mu ca ñi chem pin quiñeque che Jehová ñi adnieteu (Luc. 2:8-19, 25-38). Huelu Jesús ca femngechi quisu eluhui ñi ngüneduamal Chau Dios ñi Dungu. ¿Chemu feipiafuiñ? Pichi huentrungelu ta Jesús, nütramcafi tati pu quimeltuchefe mülelu Jerusalén mu, fei “rume afmatulehuei engün ñi rume quimün meu ca quisu ñi fente cüme lloudungun meu” (Luc. 2:46, 47). Jesús 12 tripantu niefui müten, huelu fente ñi cüme estudiafiel Chau Dios ñi Dungu, cüme quimniefui tañi Chau ta Jehová ngei (Luc. 2:42, 43, 49). w20.10 pag. 29, 30 parr. 13, 14

Jesús ñi huiñomongetun pengeli ñi ca femngechi huiñomongetual caquelu che. Pablo nütramcalu ti huiñomongetun mu, feipi cüla falin dungu: 1) Cristo lai ‘iñchiñ taiñ culpan ñi duam mu’. 2) Jesús rüngalngei. 3) Jesús huiñomongetui cüla antü meu, chumngechi ñi feipilen ti Biblia (1 Cor. 15:3, 4). ¿Chem pengelqueiñmu Jesús ñi lan, ñi rüngalngen ca ñi huiñomongetun? Isaías feipicünui ñi langümngeal tati Mesías ca elungeai ñi rüngaltucungeal tati pu huesaque che engün. Isaías ca feipicünui ti Mesías ñi yetual pu che ñi culpan. Jesús femi tüfa hul-lu ñi mongen ñi montulafiel pu che ñi culpan mu (Is. 53:8, 9, 12; Mat. 20:28; Rom. 5:8). Feimu ñi lan ta Jesús, ñi rüngalngen ca ñi huiñomongetun eluqueiñmu maneluhun. Pengelqueiñmu ñi ngehuenoal ta culpan ca lan dungu, ca ñi huiñomongetual taiñ pu piuqueyen che. w20.12 pag. 3 parr. 4-6; pag. 5 parr. 11

Tati apostol Pablo amuldunguquefui pu judio tañi sinagoga mu, quiñe sinagoga mülefui Tesalónica huaria mu. Üyeu sabado antü mu, Pablo cüla semana mu nütramcalelquefi tati pu judio. “Nütramcalei tati Huirin Chillca dungu meu” (Hech. 17:1, 2). Pichicalu Pablo, quimeltulelngei pu judio tañi huimtun. Feimu cüme duamquepelafui tati sinagoga mu (Hech. 26:4, 5). Pablo quimniefui chem mongen ñi niequefel pu judio, feimu quimniefui chumngechi ñi amuldungulelafiel engün (Filip. 3:5). Rupachi antü mu, Pablo puhui ta Atenas huaria mu. Üye mu, ca femngechi nütramcaquefui sinagoga meu tati pu judio engün, ca ti caquelu che engün feyentuquelu Ngünechen meu (Hech. 17:17). Fei hula, amui ñi amuldungulelafiel tati pu che mercado mu, huelu quisu engün ca feyentun nierquefuingün. Mülerquei quiñeque fütraque quim huentru ca quiñeque judio tuhun-ngenolu, feimu “hue quimeltun” troquifingün Pablo ñi amuldunguyahun. Fei feipifingün: “Fütra calechi dungu ta feipimuqueiñ ta eimi” (Hech. 17:18-20). w20.04 pag. 9 parr. 5, 6

Cüdautuliyiñ taiñ cüme femal, quisu condenaulayaiñ. Loncontucunieaiñ com iñchiñ ta culpaqueiñ. Feimu Jehová ñi cutranpiuqueyechen mu, huli tañi Fotüm taiñ perdonayaeteu (Efes. 1:7; 1 Juan 4:10). Taiñ pu peñi ca taiñ pu lamngen ca quelluafeiñmu taiñ huesa duamcülenoal. Ayüliyiñ taiñ nütramcayal chem ñi mülen taiñ piuque mu, taiñ pu peñi ca taiñ pu lamngen allcütuafeiñmu ca yafültucuafeiñmu (Prov. 12:25; 1 Tes. 5:14). Quiñe lamngen Nigeria mapu mu huesa duamquei quiñeque mu, feipi: “¿Chumleafulu chi ta iñche quellunoelimu tañi pu lamngen? Tañi yafültucueteu mu tañi pu lamngen, quimfalcülei tañi allcütuqueteu tañi llellipun ta Jehová. Ca quimürpun ñi ca femngechi yafültucuafiel pu huesa duamcülelu” pi taiñ lamngen. Huelu loncontucunieaiñ, quiñeque mu taiñ pu peñi, taiñ pu lamngen ngüneduamlayafui taiñ huesa duamcülen. Feimu lle iñchiñ mülei taiñ fülcontuafiel taiñ pu peñi, taiñ pu lamngen cüme hueniyefilu ta Jehová, fei “quelluen” piafuiñ. w20.12 pag. 23, 24 parr. 7, 8

Tañi doi hueniyehual epu che, mülei tañi cüme nütramcahual, femngechi tañi doi cüme quimuhual engu. Huelu doi cüdaungeafui hueniyeafiel ta Jesús. ¿Chumngelu am? Famülque mu, iñchiñ pequelafiyiñ ta Jesús, feimu cüdautuafuiñ taiñ hueniyeafiel. Fütra cuifi mu, fentren hunenque cristiano ca femngechi turpu pelafingün ta Jesús. Feimu Pedro feipi: ‘Eimün piuqueyefimün ta Jesucristo, pequelafimün rume. Feyentuleimün ta quisu meu fei tamün pequenofiel rume’ (1 Ped. 1:8). ¿Chem quimeltuqueiñmu tüfa? Penofiliyiñ rume ta Jesús, hueniyerpuafuiñ. Cafei nütramcauquelaiñ Jesús iñchiñ, feimu cüdaungeafui taiñ hueniyeafiel. Llellipun mu iñchiñ, üituquefiyiñ ta Jesús, huelu nütramcaquefiyiñ ta Jehová. Jehová müten felei tañi püramyengeal, feimu Jesús pilai taiñ ngillatuafiel (Mat. 4:10). Felefule rume, pengelafuiñ ta Jesús fente taiñ piuqueyeniefiel. w20.04 pag. 20 parr. 1-3

Cuifi mu, tati pu lefquelu pepicangequei tañi cüme lefal cüdaungefule rume. Huelu tati cuden mu, nielafui inei no rume tañi quelluaeteu. Famülque mu, iñchiñ ca pepicangequeiñ taiñ cüme lefal tüfachi cuden meu reque. Huelu quisulelaiñ tati. Jehová ta quelluqueiñmu, eluqueiñmu ñi nehuen taiñ huechutripayal tüfachi cuden reque. Huelu duamnieiñ taiñ maneluhual quisu meu. Tati apostol Pablo contupaeyu fentren huesaque dungu. Quisu lucatungei ca caiñetungei. Cafei quiñeque mu nehuen-ngehuelafui ca niequefui “quiñe huayun [chacai] reque tañi cuerpo meu” (2 Cor. 12:7, TNM). Rupalu rume fentren huesaque dungu, Pablo fentecünulai ñi poyefiel ta Jehová, doi mai eluhui ñi doi maneluhual quisu meu. (2 Cor. 12:9, 10, TNM). Pablo cüme raquiduami rupalu huesaque dungu mu, feimu Jehová rumel quelluqueyu. w20.04 pag. 29 parr. 13, 14

Quiñe falin dungu nieiñ, quiñentrür cüdauqueiñ Jehová, Jesús ca pu cümeque püllü iñchiñ (2 Cor. 6:1, TNM). Quisu engün quelluqueiñmu amuldungun mu iñchiñ. Feimu Pablo feipi quisu ca caquelu amuldunguquelu chaf cüdauqueingün Chau Ngünechen engün (1 Cor. 3:9, TNM). Ca femngechi amuldungun mu, chaf cüdauqueiñ Jesús iñchiñ. Jesús deu feipifilu tañi pu inanieteu ñi quintuafiel ta che ñi discipulongerpual, ca feipifi engün: “Iñche rumel mülean ta eimün meu” (Mat. 28:19, 20). ¿Tati pu cümeque püllü cai? ¿Chumngechi quelluqueiñmu? Quisu engün adniequeiñmu amuldungulu iñchiñ ti cümeque dungu cüpalu Chau Dios mu (Apoc. 14:6). Felei llemai, rume quellungequeiñ amuldungun mu. Taiñ amuldungun fün quetran reque felei. Conle cüme piuque mu, tremai reque (Mat. 13:18, 23). ¿Inei ñi duam mu tremquei feitachi fün pu che tañi piuque mu? Jesús quimfalcünui tüfa taiñ peelchi texto fachantü. w20.05 pag. 30 parr. 14, 15

Fentren matrimonio lladcünquechi hudaqueingün. Quiñeque familia trahulequeingün, huelu cüme yeucülequelaingün, müte piuqueyeuquelaingün rume. Feipingequei tati pu chau, pu ñuque, pu pichiqueche epe nütramcauquelaingün. Rupaqueingün chi antü computador mu, tablet mu, celular mu, videojuego mu. ¡Quimuuquelaingün rume! Feichi pu che quimnofilu ta Jehová piuqueyechequelaingün, feimu inayentulayafiyiñ femngechi pu che. Doi mai, quim piuqueyeafiyiñ taiñ pu che ca taiñ pu peñi ca pu lamngen (Rom. 12:10). Chumngechi taiñ piuqueyefiel taiñ familia, ca femngechi piuqueyeafiyiñ taiñ pu peñi ca lamngen. Femngechi piuqueyefiliyiñ, ayühun mu quiñentrür poyeafiyiñ ta Jehová (Miq. 2:12). w21.01 pag. 20 parr. 1, 2

Quiñe equipo de futbol quiñeucülenole, hueupeafuingün. Huelu quiñeucülele, huehuaingün llemai. Tami piuque feitachi equipo de futbol reque feleafui. Huecüfü ayüniefui ñi quiñeucülenoal taiñ piuque. Quisu ayüfui taiñ chumal rume, fei taiñ inanoal Jehová tañi feipin. Taiñ cüme miyahual, poyeafiyiñ ta Jehová com taiñ chengen mu, com taiñ piuque mu, com taiñ raquiduam mu (Mat. 22:36-38). ¡Eluucüleaiñ mai quiñe rume piuque taiñ nieal! Inalayafiyiñ tati Huecüfü. David reque, ngillatuafiyiñ ta Jehová: “Eluen quiñe rume piuque”. Ngillatulayaiñ müten, eluucüleaiñ llemai quiñe rume piuque taiñ nieal. Com taiñ femün mu, pichiquen dungu mu rume, alüquen dungu mu rume, yamnieafiyiñ Jehová tañi üi. Femngechi femliyiñ, cüme acordangeai Jehová tañi üi (Prov. 27:11). Miqueas reque feipiaiñ: “Iñchiñ rumel miyahuaiñ taiñ Chau Ngünechen Jehová ñi üi mu” (Miq. 4:5). w20.06 pag. 13 parr. 17, 18

Tati rey del norte ca tati caquelu gobierno lefcontufile Ngünechen ñi pu che, quisu rume illcupürayai, fei acuai ta Armagedón (Apoc. 16:14, 16). Feichi mu tati rey del norte ca com pu gobierno apümcangeai engün ca “quellungelayai rume” (Dan. 11:45). Daniel amulcünui chumngechi ñi apümcangeal pu gobierno ca chumngechi taiñ montulngeal (Dan. 12:1). ¿Inei am ta Miguel? Quisu ta Jesús lonco ülmencülelu. 1914 tripantu mu Jesús lonco ülmencülerpui huenu mu, fei eluhui ñi quelluafiel Jehová tañi pu che. Acule ta Armagedón, Jesús apümcayafi tañi pu caiñe, femngechi huitrapürayai reque. Armagedón mu, huechurpuai feichi fütra cutrancahun ñi feipiel Daniel (Apoc. 6:2; 7:14). w20.05 pag. 15, 16 parr. 15-17

Feichi cüdahuelfilu ta Potifar ca presulelu, José pepi dullilafui ñi doi cümelcaletual. ¿Chem chumi ñi cüme raquiduam nieal? José raquiduamcülehuelai tañi pepi femhuenon, huelu com chi cüdau ñi elungen cüme entufi. Rume falintuquefi tañi ayühulafiel ta Jehová. Feimu lle, Jehová cümelcafi ta José com tañi femün mu (Gén. 39:21-23). José ñi rupan mu pengeleleiñmu famülque mu huesalcayafeiñmu ta che. Quiñeque peñi cam lamngen huesalcayafeiñmu chi. Huelu maneluuliyiñ Jehová mu, rume huesa duamlayaiñ ca cüdahuelnieafiyiñ ta Jehová (Sal. 62:6, 7; 1 Ped. 5:10). José niefui 17 tripantu müten, Jehová elueyu ti epu peuma. Tüfa pengeli Jehová ñi maneluucülen pu huechequeche mu. Famülque mu mülei fentren pu hueche José reque, rume maneluucüleingün Jehová mu, quiñeque presuleingün cütu ñi feyentufiel mu ta Jehová (Sal. 110:3). w20.12 pag. 16 parr. 3; pag. 17 parr. 5, 7

Apostol Pedro ca Juan caiñetungeingu tañi inaniefiel ta Jesús ca tañi quimeltuchen, feimu ayüucülefuingu (Hech. 4:18-21; 5:27-29, 41, 42). Tati pu cristiano yehuentucuulaingün tañi cristianongen mu. Feitachi pu cristiano huesa troquingefulu engün rume, huelu quisu engün rume cüdahui ñi quelluafiel tati pu che. Quiñeque tüfachi pu cristiano ñi huirintucuel ta Biblia mu rume quellufi pütrünque che cuifi mu, ca femngechi famülque mu. Feitachi pu cristiano amuldunguquefui Chau Dios tañi Gobierno mu. Feitachi Gobierno ngüneniei huenu ca pichiñma mu ngünenieafi com ti Mapu (Mat. 24:14). Huelu tati pu romano ñi caiñetuquefiel pu hunenque cristiano fachantü ngehuetulai. Feula tüfachi pu cristiano ngüneniequeingün huenu mu, huelu com tati che ñi caiñetuquefeteu com laingün. Huiñomongetufule engün, ngünenietuaeyu Chau Dios tañi Gobierno (Apoc. 5:10). w20.07 pag. 15 parr. 4  

Abrahán müna maneluucülequefui Jehová tañi feipicünueteu mu, feimu pequefui reque tati dullingelu ñi loncoleal Chau Dios tañi Gobierno mu. Feimu Jesús feipifi tati pu judio: “Eimün tamün cuifi tuhun em Abrahán pingelu, ayühui allcütulu tati feipicünuelchi dungu iñche meu, feimeu rume ayühui, fei Abrahán quimeteu am ñi ineingen ta iñche” (Juan 8:56). Abrahán quimniefui Jehová ñi feipicünuel, feimu üngümniequefui ñi femtriparpual. Abrahán, ¿chumngechi pengeli ñi üngümniefiel Chau Dios tañi Gobierno? Abrahán chem huaria mu no rume alüñmaquelafui, feimu coneltuquelafui ti gobierno mu ca quelluntuculafi rume. Ca femngechi Abrahán ayülafui rume quisu ñi gobernantengerpual, doi mai rume maneluufui Jehová mu. w20.08 pag. 3 parr. 4, 5

Jehová feipicünui ti hue Mapu mu, “inei no rume feipilayai: ‘Iñche cutrancülen’” (Is. 33:24). Feimu huiñomongetule ta che, Jehová eluafi quiñe tremol cuerpo, huelu petu culpanchengeaingün. Culpanchengehuenofule ta che tañi huiñomongetun mu, ca ad niepelayafui, feimu quimhuetulayafuiñ. Ngünenietule Cristo huaranca tripantu, ñochiquechi ngehuelayai ta culpan. Rupale feitachi huaranca tripantu, Jesús huiñoleltuafi tañi Chau ñi ngünenietual com tati mülelu. Femngechi Jesús tañi Gobierno femürpuai com ñi ayüqueel ta Jehová, ngehuelayai ta culpan (1 Cor. 15:24-28; Apoc. 20:1-3). Amupe tami raquiduam hue Mapu mu. Huiñomongetule tami pu che, ¿chumafuimi chi? Müna ayüucülepelayafuimi. Ngümatripayafuimi chi fente tami ayühun. Ca ülcantulelafuimi chi ta Jehová tami mañumtuafiel. Puule feichi antü, doi piuqueyeafiyiñ taiñ Huenu Chau ca tañi Fotüm Jesús ñi huiñomongeltuchen mu. w20.08 pag. 16, 17 parr. 9, 10

Apostol Pablo ngülamtufi pu cristiano ñi raquiduamal ñi curengenoal cam fütangenoal, fei ñi doi serfiafiel ta Jehová (1 Cor. 7:8, 9). Pablo illamcaquelafui pu curengenolu ca fütangenolu, feimu dullifi ta Timoteo. Tüfa curengelafui, huelu elufi falinque cüdau (Filip. 2:19-22). Feimu feipilayafuiñ tunte ñi pepicaucülen quiñe peñi tañi curengen mu cam curengenon mu (1 Cor. 7:32-35, 38). Jesús ca Pablo feipilaingu pu cristiano mülei ñi curengeal cam ñi fütangeal. Ca femngechi feipilai tañi femnoal engün. ¿Famülque mu cai? ¿Chem piafuiñ? Cuifi tüfachi revista feipi: “Nieal afcadi fei ta quiñe regalo reque mülei Jehová meu cüpalu. Ca femngechi curengenoal cam fütangenoal quiñe regalo reque mülei Jehová mu cüpalu. [...] Jehová ñi adquiñ mu yehuen-ngelai ca hueñancün-ngelai curengenoal cam fütangenoal” pi tati revista (La Atalaya tripalu 1 conchi octubre 2012 tripantu). Feimu llemai falintuafiyiñ taiñ pu peñi curengenolu cam taiñ pu lamngen fütangenolu. w20.08 pag. 28 parr. 8, 9

Quiñeque mapu mu, tati pu che ayühunquechi allcütuquefi tati cümeque dungu. Huelu caque mapu mu, ti che müte duamquelafi Chau Dios ca tati Biblia. ¿Tami mapu mu cai? ¿Chumngechi allcütuquei tati pu che? Ti che allcütule rume cam femnofule rume, Jehová ayüniei taiñ amuldungucheal müten, “fentepuupe” pile hula ta Jehová. Jehová quimniei chem antü fentepuai taiñ amuldungun cüdau. Acule feichi antü, apümcangeai com huesaque dungu. Huelu petu acunole, fentecünulayaiñ taiñ cüdaumequen (Mat. 24:14). Jesús feipifi tañi pu inanieteu ñi chumngeal tati pu che ca chem rupayal epe puule Jehová tañi antü. Jesús quimniefui, tüfachi dungu mu quiñeque tañi pu inanieteu doyümniehuelayafui ti amuldungun. Feimu Jesús feipifi tañi pu inanieteu ñi nepeluucüleal (Mat. 24:42). Cuifi mu, fillque dungu catrütufi pu che ñi allcütunoal Noé tañi feipin. Ca femngechi famülque mu, fillque dungu catrütuafeiñmu taiñ inanoal Jesús tañi feipin (Mat. 24:37-39; 2 Ped. 2:5). Feimu eluhuaiñ taiñ doyümafiel ti amuldungun cüdau taiñ elueteu Jehová. w20.09 pag. 8 parr. 1, 2; pag. 9 parr. 4

Tati Huecüfü am rume fütra lladcülelu, feimu turpu moll-layaiñmeu (Apoc. 12:12). Pichiñma mu, com iñchiñ inantucungeaiñ taiñ famentuafiel ta Jehová. Müleai “rume fütra cutrancahun. Chumcaunorume mülequelai femngechi cutrancahun ca turpu mülehuelayai rume” pi ta Jesús (Mat. 24:21). Feichi mu taiñ pu familia caiñetuafeiñmu ca tati autoridad catrütuafeiñmu taiñ amuldunguhuenoal (Mat. 10:35, 36). ¿Inayentupeafiyiñ mai tati rey Asá? ¿Maneluupeaiñ mai Jehová taiñ quelluaeteu? (2 Crón. 14:11). Jehová pepicaniequeiñmu taiñ doi maneluucüleal ta fei mu acurumefule huesaque dungu. Chau Jehová adniefi ti “quim manelfal cona”, esclavo fiel y prudente pingelu, taiñ quimeltuaeteu puuchi antü mu, femngechi taiñ doi maneluucüleal Jehová mu (Mat. 24:45, TNM). Huelu quisuque iñchiñ mülei taiñ rume cüdauconcüleal taiñ cüme maneluucüleal Jehová mu (Heb. 10:38, 39). w20.09 pag. 18 parr. 16-18

Quiñeque mu Jehová tañi nehuen mu adniequefi pu autoridadcülelu ñi femal chem tañi ayüqueel. Tati pu che hutrul amulafui ti co cheu rume tañi ayünieel. Ca femngechi quiñeque mu Jehová tañi nehuen mu adniefi tati pu che ñi femal chem rume tañi ayünieel, feimu quiñe huitrunco reque feleingün Jehová tañi cuhu meu. Jehová femün mu tüfa, pu autoridadcülelu eluuquei ñi cümelcayafiel Chau Dios tañi pu che (ca ngüneduamafuimi Esdras 7:21, 25, 26). ¿Chumafuiñ cai? Quiñeque mu pu autoridadcülelu mülei ñi dullial falinque dungu. Tañi feipin mu engün elungeafuiñ taiñ cüme poyenieafiel ta Jehová cam catrütungeafuiñ taiñ femal. Feimu femngechi dungu rupale, llellipuafuiñ ta Jehová tañi cüme dullial engün (Neh. 1:11; 1 Tim. 2:1, 2). Cafei pu hunenque cristiano reque, llellipuquefiyiñ ta Jehová ñi quelluafiel pu peñi ca pu lamngen presulelu (Hech. 12:5; Heb. 13:3). w20.11 pag. 15 parr. 13, 14

Eimi enseñalfilmi Biblia feitichi che tañi fautizahun, doi ayüucülepelayafuimi (1 Tes. 2:19, 20). Ñi fautizahun quiñe che pengelquei fente ñi cüdahun com ti trahunche ñi quelluaeteu, fei ñi hueniyerpuafiel ta Jehová. Feimu pu hue fautizaulu taiñ trahunche mu quiñe ‘carta reque feleingün taiñ dunguñpenieteu’ (2 Cor. 3:1-3). Rupalechi tripantu, fill cüyen quiñe 10 millon che peno eluhui tañi enseñalelngeal Biblia. Fill tripantu 280.000 feichi pu estudiaquelu Biblia fautizahurpuquei. ¿Chumngechi quelluntucuafuiñ com pu estudiamequelu Biblia tañi fautizahurpual? Jehová eluquefi tiempo tati pu che tañi quimaeteu, feimu quelluntucuafiyiñ engün tañi alüñmanoal tañi fautizahual. ¡Pichilehuei ta antü! (1 Cor. 7:29a; 1 Ped. 4:7). w20.10 pag. 6 parr. 1, 2

Ti rey Saúl femlai ñi chem pieteu Jehová. Ca antü Samuel feipieyu ñi huesa femün, huelu quisu “huesa femürquen tati” pilai rume. Doi mai Saúl feipi ñi fente huesalcanon, “pu che mai ngeñicaeneu ñi femal” (1 Sam. 15:13-24). Cuifi mu ca femngechi femfui (1 Sam. 13:10-14). Saúl mülefui ñi cüme elcünutual tañi raquiduam, huelu femlai. Mallma piuquengerpui, fei Jehová quiñepüle entueyu. Iñchiñ ayülaiñ taiñ femngeal Saúl reque, feimu cümeafui taiñ ramtuhual: “Papeltun mu Biblia iñche, ¿nehue duamfalngenolu troquiquen iñche ñi inayafiel feichi ngülam? ¿Raquiduamquepen mai ñi fente huesalcalenon? ¿Culpatuquepefiñ mai caquelu che iñche ñi femün mu?”. Rüfngele chuchi rume tüfachi ramtun, iñchiñ mülei taiñ cüme elcünutual taiñ raquiduam. Femnoliyiñ, taiñ piuque rume mallmahuafui, fei Chau Dios hueni pihuelayafeiñmu. w20.11 pag. 20 parr. 4, 5

Hueche, dullinge inei tami serfiafiel. Mülei tami cüme quimal ineingen ta Jehová, chem ayüquei tañi femal ca chumngechi quelluntucuafuimi. Femngechi femülmi, eluhuafuimi tami serfiafiel ta Jehová. Tüfa tati doi falin dungu tami femafel (Rom. 12:2). Biblia feipi: “Huelu mai, cümenolu troquifilmün tamün poyefiel ta Jehová, dullimün fachantü inei tamün poyeafiel, tati pu dios ñi poyequefel tamün cuifique che yem ñi mülen nometu Lafquen meu, cam ti pu amorreo ñi pu dios, quisu engün tañi mapu tamün mülepan meu. Huelu iñche ca tañi pu che poyeafiyiñ ta Jehová” (Jos. 24:15). Fill antü papeltufilmi ta Biblia ca cüme estudiafilmi, maneluhuaimi Jehová mu ca piuqueyerpuafimi. Doyümniefinge Jehová tañi ayüqueel. Pu poyequenofilu ta Jehová raquiduamelqueimu: “Quisutu cümelcahulmi müten tami adümuhun mu, ayüucüleaimi”. Huelu, ¡feingelai tati! Pu ayünielu ñi nieal itrofillem “conquei cutrancahun meu” (1 Tim. 6:9, 10). Huelu allcütufilmi ta Jehová ca doyümniefilmi Jehová tañi ayüqueel, ayühun mongen nieaimi ca “quimchengerpuaimi” (Jos. 1:8). w20.10 pag. 30, 31 parr. 17, 18

Pu hunenque cristiano tañi antü mu, ñi amuldunguqueel ta Jesús elufi maneluhun com tati pu che. Jesús feipifi tañi pu inanieteu ñi amuleal feitachi cüdau mu, fei ñi amuldungual engün tuntepu ñi mülen ta Mapu (Hech. 1:8). Tati pu hunenque cristiano quisu tañi nehuen mu müten femürpulayafuingün feitachi cüdau. Jesús feipicünueyu Chau Dios ñi eluaeteu tañi nehuen, femngechi müten femürpuafuingün tañi amuldungun cüdau (Zac. 4:6; Juan 14:26). Feichi Pentecostés 33 tripantu mu, pu hunenque cristiano llohuingün Jehová tañi nehuen. Feimu eluhuingün tañi amuldungucheal. Pichi rupalu müten, fentren che feyentuingün tati cümeque dungu, fei fautizahuingün (Hech. 2:41; 4:4). Inantucungelu feitachi pu hunenque cristiano, llicalaingün ca fentecünulaingün tañi amuldungual. Doi mai llellipufingün ta Jehová tañi quelluaeteu. Feipifingün: ‘Quellufinge tami pu poyequeteu ñi quimeltual engün tami dungu ngeno llican meu’. Feimu Chau Dios elueyu ñi nehuen tañi amuldunguleal ngeno llican meu (Hech. 4:18-20, 29, 31). w20.10 pag. 21 parr. 4, 5

Peafiyiñ chumngelu quimnieiñ ñi rüf huiñomongetun ta Jesús. Fentren che pefi ta Jesús deu huiñomongetulu (1 Cor. 15:5-7). Ti apostol Pablo feipi Pedro ñi pefiel ta Jesús deu huiñomongetulu, quiñeque discipulo ca feipingün tüfa (Luc. 24:33, 34). Pu 12 apostol ca pefingün ta Jesús deu huiñomongetulu. Cafei feichi falin trahun mu peno femngelu ta Galilea, Jesús “peufaluutufi ta doi quechu pataca pu peñi” (Mat. 28:16-20). Jesús “ca femngechi peufaluutufi ta Santiago”, tüfa Jesús ñi ñuque peñi peno. Ellaca mu feyentuquelafui Jesús tañi Mesías ngen (Juan 7:5). Huelu Santiago pefilu ta Jesús deu huiñomongetulu, feyentui hula tañi Mesías ngen. 55 tripantu mu, Pablo huirintuculelfi tüfachi carta tati pu corintoche. Feichi mu petu mülequefui che pefilu ta Jesús deu ñi huiñomongetun. Feimu inei rume müte feyentunole ñi huiñomongetun ta Jesús, ramtumeafeyu engün. w20.12 pag. 3 parr. 5, 7, 8

Cüme duamcülenoliyiñ ca alüñma cutrancüleliyiñ, cüdautuafuiñ taiñ ayüucüleal. Feimu eluhuaiñ taiñ quelluaeteu Chau Jehová. Jehová tremoltulayafeiñmu famülque mu, huelu yafültucuafeiñmu ca quelluafeiñmu taiñ nehuentuleal (Sal. 94:19). Quiñeque mu, Jehová adcünuafui quiñeque peñi, lamngen ñi femal quiñeque cüdau taiñ ruca mu. Ca adcünuafui engün ñi quiñentrür llellipual iñchiñ mu. Ca femngechi Chau Jehová raquiduamelafeiñmu cümeque dungu mülelu Biblia mu, fei raquiduamtucuafuiñ ti hue Mapu mu ngehuelayai ta cutran (Rom. 15:4). Pepi amuldungunoliyiñ tunte taiñ ayüquefel, huesa duamafuiñ. Estados Unidos mapu mu, quiñe lamngen Laurel pingelu huesa cutrani. Pepi quisu neyühuelai, feimu tucungei quiñe maquina mu tañi pepi neyüal. 37 tripantu tranaconcülei tati maquina mu. Taiñ lamngen ca nierquei ta cancer, fentren rupa operangerquei ca allfüi tañi trahua. Huelu elcünulai tañi amuldungun. Feimu amuldungulelfi pu enfermero ca caquelu che cüpalu tañi ruca mu ca quellufi 17 che ñi serfiafiel ta Jehová. w20.12 pag. 24 parr. 9; pag. 25 parr. 12

Pablo duamniefui tañi quellungeal. 56 tripantu peno Pablo huingüdentungei ti ngillatuhue ruca mu, pu che ayüfui ñi langümaeteu. Quiñe antü rupalu, yengei tati Sanedrin mu, tañi pu caiñe ayüfui tañi allfülcayaeteu müten (Hech. 21:30-32; 22:30; 23:6-10). Feimu Pablo ramtuuquefui chi: “¿Tuntepu mu am afai tañi huesa rupamequen?”. ¿Chumngechi quellungei ta Pablo? Feichi pun presungelu ta Pablo, peufaluhui ta Jesús ca feipieyu: “Yafüluunge, Pablo. Chumngechi nütramyeen ta iñche fau Jerusalén meu, ca femngechi felei tami femal ta Roma huaria meu” (Hech. 23:11). Rume yafüluupelai Pablo allcütulu tüfa. Jesús saquifi ta Pablo tañi cüme amuldungun Jerusalén huaria mu. Ca feipifi ñi cüme puhual ta Roma meu, fei ñi ca huldungupual üye mu. Feimu rume cüme duamcülepelafui ta Pablo, quiñe pichi huentru reque ñi afcadinieteu tañi chau. w20.11 pag. 12 parr. 1; pag. 13 parr. 3, 4

Rume falin-ngei taiñ maneluucüleal Chau Jehová tañi feipicünuel mu. Feita quelluqueiñmu taiñ tüngcüleal rupaliyiñ rume huesaque dungu mu ca fill raquiduamcüleliyiñ rume. Raquiduamtucuaiñ com taiñ feipicünueteu ta Jehová. Cüpalechi antü mu, fill raquiduamcülelayaiñ chem dungu meu no rume (Is. 65:17). Amupe taiñ raquiduam feichi mu, chem huesa dungu no rume ngehuelayai (Miq. 4:4). Ca femngechi nütramcayafiyiñ ta caquelu che taiñ maneluhun mu, femngechi doi foliluhuai iñchiñ mu. Chumaiñ rume taiñ amuldunguafiel ta che ca quelluafiel engün ñi discipulongerpual. Femliyiñ, cüme foliluucüleai taiñ maneluhun (Heb. 6:11). Fülcülepai ñi afal Huecüfü ñi ngünenieel. Feimu doi müleai huesaque dungu taiñ raquiduamelaeteu. Maneluucüleaiñ Jehová mu, femngechi tüngcüleaiñ rupaliyiñ rume huesaque dungu mu. Pengelaiñ taiñ maneluucülen Jehová mu. Fei ta feipicünueiñmu: “Tüngcülelmün ca maneluucülelmün ta iñche meu nehuentuleaimün” (Is. 30:15). w21.01 pag. 7 parr. 17, 18

Santiago feipi ñi cutranduamyechequen ta Jehová (Éx. 34:6). Biblia pengeli pu cutranduamyechequelu perdonachequei ca quelluquefi ta che rupan mu huesaque dungu mu. Feimu Jehová ñi cutranduamyechequen mu, perdonaqueiñmu taiñ culpan ca quelluqueiñmu rupan mu iñchiñ ta huesaque dungu (Sal. 37:39; 51:1; 1 Cor. 10:13). Quiñe ñuque piuqueyenquechi quelluquefi tañi pu püñeñ, huelu Jehová doi piuqueyenieiñmu, feimu doi eluucülei taiñ quelluaeteu (Is. 49:15). ¿Iñchiñ cai? ¿Chumngechi inayentuafuiñ ta Jehová? Perdonayafiyiñ taiñ pu peñi, pu lamngen ca lladcütunielayafiyiñ engün (Efes. 4:32). Ca femngechi quelluafuiñ pu peñi, pu lamngen rupale huesaque dungu mu. Femngechi inayentuafuiñ Jehová ñi fütra piuqueyechen (Efes. 5:1, TNM). w21.01 pag. 21 parr. 5

Rume cüdaufule pu ngen familia, quellulayafui tañi pu che ñi hueniyeafiel ta Jehová ca cüme duamcülelayafui engün. Tüfa cümelayafui. Feimu mülei ñi cuñiutucuhual. Piuqueyenquechi adniequefi tañi pu che. Jehová enseñalqueiñmu ca norümqueiñmu iñchiñ taiñ cümelcaleal (Heb. 12:7-9). Jehová reque, Jesús piuqueyenquechi quimeltuquefi tañi pu inanieteu (Juan 15:14, 15). Jesús ngüneulai ñi cüme ngülamtucheal, huelu piuqueyenquechi femquefui (Mat. 20:24-28). Quimniei taiñ culpafe chengen, feimu taiñ huelulcauquen (Mat. 26:41). Jehová ca Jesús reque, pu ngen familia mülei ñi loncontucual ñi culpafe chengen tañi pu che. Cafei huesa illcutuquelafi tañi domo, tañi fotüm, tañi ñahue no rume (Efes. 4:31; Col. 3:19). Doi mai loncontucuniei quisu tañi ca culpafe chengen, feimu “fentren piuqueyen meu” norümquefi engün (Gál. 6:1). Jesús reque, quimniei ñi doi cüme quimeltucheal mülei ñi inayentufalngeal. w21.02 pag. 6, 7 parr. 16-18

Jehová huli tañi Fotüm ñi lapayal com tati pu che mu, femngechi Jehová ngillafi reque tañi troquiñche (Mar. 10:45; Hech. 20:28; 1 Cor. 15:21, 22). Feimu, rume cümei Jehová ñi loncocünufiel ta Jesús. Tañi loncolen mu ta Jesús feipiafui pu che, pu familia, pu trahunche chem tañi chumal engün. Ca adniequefi ñi inaniengeal tañi feipin (Gál. 6:2). Huelu Jesús re feipiquelaeiñmu chem taiñ chumal, doi mai piuqueyenieiñmu ca cuidaniequeiñmu (Efes. 5:29). Pu lamngen eluucülei ñi adnieaeteu pu loncolelu, femngechi pengelquei ñi yamniefiel ta Jesucristo. Pu peñi quimtucuniefile Jehová ñi chumngechi adniefiel tañi troquiñche, yamnieafingün com pu lamngen. Com tati trahunche yamniefile Jehová ñi chumngechi adnieteu engün, tüngcüleai tati trahunche. Ca doyelchi mai, püramyengeai taiñ Huenu Fütra Chau Jehová. w21.02 pag. 19 parr. 14-17

Feichi lefmauquiyaulu David tañi pu hueichafe engün, amuingün quiñe hueichan mu fei quisucünufingün tañi familia. Petu mülelu engün ta hueichan mu, David ca tañi pu hueichafe rucacontuñmangeingün ca yeñmangetuingün tañi pu familia. David cüme hueichafengefui, feimu “pürüm müten montulmeafiñ ñi pu che” piafui. Huelu femlai, doi mai eluhui ñi adnieaeteu Chau Jehová. Ramtufi ta Chau Jehová: ‘¿Cümepeafui mai ñi inantucuafiel feitachi pu caiñe?’ pifi. ‘Amunge müten, fei montulnieafimi tami pu familia’ pieyu Jehová (1 Sam. 30:7-10). Hueche, ¿chem quimeltueiñmu David ñi rupan? Petu tami dullinon chem chumal, eluhuaimi tami ngülamaeteu caque che. Nütramcahuafuimi tami chau ca tami ñuque engu. Ca nütramcayafuimi pu loncolelu tami ngülamaeteu. Jehová dullifi pu loncolelu ca manelniefi, fei eimi ca femngechi maneluhuafuimi fei engün meu. Jehová eli tüfachi pu huentru ñi cümelcayafiel ti trahunche (Efes. 4:8, TNM). w21.03 pag. 4 parr. 10, 11

Inanoliyiñ taiñ quimürpuel Biblia meu, feleafuiñ quiñe huentru reque deumalu tañi ruca huente cuyüm meu pi Jesús. Feiti huentru ngünam cüdaumequei. ¿Chumngelu? Fütra cürüftucu mahunle, ti ruca tranarupayai (Mat. 7:24-27). Ca femngechi iñchiñ inanoliyiñ taiñ quimürpuel, re ngünam femaiñ müten. Feimu rupaliyiñ huesaque dungu cam inacangeliyiñ, müte maneluulayafuiñ Jehová mu, fei poyehuelayafuiñ. Huelu inafiliyiñ taiñ quimürpuel, quimaiñ chem chumal, tüngcüleaiñ ca doi maneluhuaiñ Chau Jehová mu (Is. 48:17, 18). Huesa rupaliyiñ, ngüneduamaiñ ta Biblia ca llellipunieafiyiñ ta Jehová, femngechi fentecünulayaiñ taiñ serfifiel ta Jehová. Doyelchi mai, loncontucunieaiñ ñi doi falin-ngen ñi poyeniengeal ta Jehová. Com iñchiñ rüf maneluuqueiñ taiñ quisucünunoaeteu Jehová. Ngelai chem no rume taiñ püntünentuaeteu Chau Jehová ñi piuqueyen mu (Heb. 13:5, 6). w21.03 pag. 15 parr. 6; pag. 18 parr. 20