Junio

Mülei taiñ duamnieafiel tati pu estudiaquelu Biblia, pichiñma mu ca conürpuafuingün Jehová tañi troquiñche mu. Pu estudiaquelu Biblia mülei ñi elcünual tañi pu cuifique hueni ca mülei ñi fill dungu meu ñi norümtual tañi mongen. Cümeafui pu quimeltuchequelu ñi quelluafiel tati estudiaquelu ñi quimafiel caquelu peñi ca lamngen ti trahunche mu. Jehová tañi troquiñche rume quelluafui tati estudiaquelu ñi hueniyeafiel ta Jehová ca yafültucungeafui rupafule huesaque dungu mu. Quelluafiyiñ pu estudiaquelu ñi cüme duamcüleal ti trahunche mu. Pengelelafiyiñ taiñ falintuquefiel ca duamniefiel engün, ca ñi nieel fentren peñi ca lamngen ñi piuqueyenieteu ti trahunche mu. Femngechi müte cüdautulayai ñi elcünutual tañi pu huesaque hueni (Prov. 13:20). Ca quisucünuelieyeu tañi pu cuifique hueni, tati estudiaquelu quimai ñi nien cümeque hueni ti trahunche mu (Mar. 10:29, 30; 1 Ped. 4:4). w20.10 pag. 17 parr. 10, 11

Mülefui taiñ cüme hueniyeafiel ta Jesús, femngechi taiñ cüme hueniyeafiel ta Jehová. ¿Chumngelu feipiafuiñ tüfa? Jesús feipifi tañi pu inanieteu Chau Ngünechen “piuqueyeimünmeu eimün am piuqueyemuquefiel ta iñche” (Juan 16:27). Jesús ca feipi: “Iñche meu müten feyentulu amuai ta Chau meu” (Juan 14:6). Raquiduamnge tüfachi dungu, conpulayafuimi quiñe ufisa corral mu, nienolmi cheu tami conpual. Ca femngechi puulayafuimi Ngünechen mu quellunoelmu ta Jesús (Juan 10:7). Feimu doi cüme hueniyefiliyiñ ta Jesús, doi cüme hueniyerpuafuiñ ta Jehová. Cafei ngüneduamliyiñ ñi chumün ta Jesús, doi cüme quimürpuafuiñ ta Jehová ca doi piuqueyeafuiñ. Jesús cüme inayentufi ñi chumngen tañi Chau, feimu feipifi tañi pu inanieteu: “Tañi pequeteu ta iñche, pequefi ta Chau” (Juan 14:9). w20.04 pag. 21 parr. 5, 6

Famülque mu, quiñeque taiñ pu peñi ca lamngen tranalehuei cahuitu mu ñi cutrancülen, feimu pepi huitrahuelai. Caquelu engün miyauquei silla de ruedas mu. Ca quiñeque peñi ca lamngen pepi trecalquelaeyu reque ñi lucu ca müte pelohuequelaingün. Tüfachi pu fütaqueche, cusele engün rume, cutrancülele rume, huitrahuenole ñi cahuitu mu rume, ¿ca femngechi mai cudelepeafui? ¡Femai llemai! Huelu duamnieingün Jehová tañi nehuentucuaeteu. Quiñeque engün pepi amuquelaingün trahun mu, huelu allcütuquefingün telefono mu cam pequefingün internet ca video mu. Caquelu engün pepi tripaquelaingün tañi amuldungual, huelu amuldungulelquefingün tañi pu che, tañi pu doctor ca tañi pu cuidaqueteu. Quiñeque cristiano cutrancülelu huesa duamcüleafuingün, fei “fantepun müten tañi cüdahual” piafuingün. Huelu famentuafiyiñ feichi huesa raquiduam. Cutrancüleliyiñ rume, amuleaiñ taiñ cüdahuelquefiel ta Jehová. Jehová ngüneduamquei fente taiñ maneluuquen quisu mu ca fente taiñ cüdahuelfiel, feimu piuqueyenieiñmu. Cutrancülen mu iñchiñ, doi duamnieiñ taiñ quelluaeteu Jehová, feimu quisucünulayaiñmu (Sal. 9:10). w20.04 pag. 29 parr. 16, 17

Feichi pu che nielu tañi religion, ¿chem nütramcalelafuimi? Raquiduamnge chem dungu ñi feyentuqueel tati che quiñeucülei Biblia tañi quimeltuqueel mu. Tati pu che feyentuafui ñi quiñelen ta Chau Dios, feyentuafui Jesús tañi montulchefengen ca feyentuafui pichiñma mu ñi afal com huesaque dungu. Deu quimülmi chem ñi feyentuqueel tati che, amuldungulelfinge chem tañi ayüqueel. Quiñeque che feyentuquelaingün com ñi feipingeel tañi religion mu. Feimu deu quimülmi chem religion ñi inaqueel quiñe che, ca mülefui tami ngüneduamafiel chem ñi rüf feyentuqueel tati che. Quiñe peñi hunelequelu amuldungun mu, feipi: “Quiñeque che feipiquei ñi feyentuqueel tati Trinidad pingechi quimeltun mu, huelu huenche feyentuqueingün müten. Tañi quimfiel tüfa, quelluqueneu ñi doi cüme quimal chem ñi nütramcayafiel ti che” piquei. Feimu eluunge tami quimal chem rüf feyentuquei ti che. Femngechi inayentuafuimi Pablo ñi femün, quisu cüme dulliquei chem ñi nütramcayafiel caque quiñeque pu che, femngechi tañi conal tañi piuque mu (1 Cor. 9:19-22). w20.04 pag. 10 parr. 9, 10

Daniel ca Juan feipi Jehová ca Jesús ñi montulafiel tañi pu poyequeteu ti fütra cutrancahun mu, feimu tüngcüleafuiñ. ¿Inei engün müten ta montuai? Daniel feipi feichi pu huiriconcülelu ñi üi Jehová tañi lifru mu. ¿Chumafuiñ ñi huirintucungeal taiñ üi feichi lifru mu? Taiñ femün mu pengelaiñ taiñ feyentuquen Jesús taiñ montulqueteu (Juan 1:29). Eluhuaiñ taiñ poyeafiel ta Chau Dios com taiñ mongen mu, fei fautizahuaiñ (1 Ped. 3:21). Ca quimeltulelafiyiñ pu che ineingen ta Jehová, femngechi quelluntucuafiyiñ quisu tañi Gobierno. Feula llemai com piuque mu maneluhuaiñ Jehová mu ca tañi troquiñche mu. Feula llemai quelluntucuafiyiñ Jehová tañi Gobierno. Femngechi apümcangele tati rey del norte ca tati rey del sur, iñchiñ montutripayaiñ llemai. w20.05 pag. 16 parr. 18, 19

Adán Eva engu quimniefui Chau Dios Jehová pingei. Quisu engu quimniefui Chau Dios ta eleyu quiñe cüme Mapu mu ca elueyu tañi cüme curehuen-ngeal (Gén. 1:26-28; 2:18). Huelu, ¿raquiduamniepeingu mai com tañi elueteu Jehová? ¿Eluupeingu mai tañi doi piuqueyeafiel ca mañumtuafiel ta Jehová? Taiñ huiñoldungual, ngüneduamaiñ chem ñi rupan peufaluulu tati Huecüfü. Jehová elueyu pütrüquen anümca Adán Eva engu ñi iyafiel. Quiñe anümca müten “ilayaimu” pifi. Huelu quiñe filu mu tati Huecüfü feipifi ta Eva: “¿Fei chem pieimumeu anta Ngünechen? ¿Feipi tamu inoafiel quiñe anümca ñi fün no rume mülelu ti anümcahue meu?” (Gén. 2:9, 16, 17; 3:1). Feitachi ramtun mu tati Huecüfü hueluraquiduamelfi ta Eva. Feimu Eva ramtuupelai: “¿Catrütuniepeneu mai Chau Dios tañi doi cümelcaleal?”. w20.06 pag. 3 parr. 8, 9

Quiñeque mu huesa duamelafeiñmu ca huesalcayafeiñmu ñi femün quiñeque pu peñi ca quiñeque taiñ pu lamngen. Femngechi rupale, mülefui taiñ perdonayafiel. Inanoliyiñ tüfachi ngülam, illcutunieafuiñ feichi peñi ca lamngen, fei quiñe püle tripayafuiñ Jehová mu. Quiñe peñi Pablo pingelu coila dalluntucungei, quisu chumlafui rume, huelu feyentungelai. Feimu müntuñmangei tañi cüdau ti trahunche mu. Taiñ peñi fente tañi illculehuen, ñochiquechi quiñe püle triparpui ti trahunche mu. Quiñeque peñi ca lamngen huesa culpai cuifi mu, huelu perdonangelu engün rume, huesa duamcülequeingün. Feimu “Jehová piuqueyehuepeafeneu iñche” piqueingün, “falilan tañi coneltuleal Jehová tañi pu che mu” piafuingün. Pefiel mu eimi pu peñi ca pu lamngen femngechi huesa rupamequelu, ¿chumquei tami piuque? w20.06 pag. 19 parr. 6, 7

Iñchiñ mülei taiñ raquiduamal chem taiñ huesalcayafeteu ca famentuafiel (Heb. 5:14). Mülei taiñ cüme dullial chem taiñ peal television mu, internet mu, chem taiñ allcütual ca chem taiñ papeltual. Television ca pelicula mu pengelngequei podngechi dungu ca pu che ñi huesa yeniequeel tañi mongen. Tati pu femngechi yenielu tañi mongen quisutu huesalcauqueingün ca huesalcaquefi ta caquelu che. Chau Jehová üdequei fillque podngechi dungu. Adquintufiliyiñ, ñochiquechi piuqueyehuelayafuiñ ta Jehová, feimu iñchiñ famentuquefiyiñ (Efes. 5:5, 6). Iñchiñ mülei taiñ quimal fente ñi cuñihun-ngen ñi quimeltuqueel pu apostata. Tati pu apostata feipiafui coilaque dungu taiñ pu peñi ca taiñ pu lamngen mu ca raquiduamelafeiñmu ñi manelfalnon Jehová tañi troquiñche (1 Tim. 4:1, 7; 2 Tim. 2:16). Feichi coilaque dungu famentuafeiñmu Jehová mu, feimu feyentulayafiyiñ, tüfachi pu apostata “huelulcaucülelu am ñi raquiduam meu ca quimlafi tati rüf dungu”. Re ayüniei ñi yafcahuelafiel ta che (1 Tim. 6:4, 5). Tüfachi pu apostata ayüniei taiñ feyentual ñi coilatun engün ca taiñ huesa raquiduamayafiel taiñ pu peñi ca lamngen. w20.09 pag. 28 parr. 13; pag. 29 parr. 15

Tati curehuen mülefui tañi piuqueyehual ca yamuhual engu (Efes. 5:33). Biblia enseñalqueiñmu doi falin-ngei taiñ hulal taiñ llohuafel mu (Hech. 20:35). Ti epu curehuen, ¿chem quelluafeyu ñi piuqueyehual ca ñi yamuhual engu? Mülefui ñi ñom piuquengeal engu. Pütrünque curehuen poyequefilu ta Jehová ñi ñom piuquengen mu doi ayüucülequeingün. Peaiñ chem pi ti peñi Esteban: “Tati epu curehuen mülefui epuñpüle ñi quelluhual. Doi rupafule huesaque dungu mu engu, doi mülefui tañi quelluhual. Tati epu curehuen raquiduamlayai quisutu ñi cüme feleal müten, doi mai mülei ñi raquiduamal ñi mür cüme feleal engu”. Tañi domo Estefani pingelu, feipi: “Inei rume ayüquelai ñi fillpipiaeteu tañi füta. Quiñeque mu quiñeucülelayu tañi füta iñchiu, huelu quintuqueyu chemu tayu femquen. Femngechi dungu mu ta rupan mu, ngillatuquefiyu ta Jehová, quintuqueyu Jehová tañi cümeque ngülam ca nütramcaqueyu tañi doi quiñehual tayu raquiduam. Femngechi femün mu yafcauquelayu” pi. Tati pu curehuen ñom piuquengele, doi ayüucüleai. w20.07 pag. 4 parr. 5, 6

Pablo quimeltuquefeyu quiñe fütra quimeltufe, feimu rume quim huentrungefui (Hech. 5:34; 22:3). Pablo müna falin huentrungerpui pu judio mu (Hech. 26:4). Ca huentrungefule ta Pablo, quisutu mallmahuafui ca quisutu maneluhuafui. Huelu tañi cristianongerpun mu, femlai. ¿Chem quimeltuqueiñmu tañi femün ta Pablo? Iñchiñ serfifiel mu ta Jehová, maneluulayaiñ quisu taiñ quimün mu ca quisu taiñ nehuen mu. Pablo ayühunquechi elfi tañi falin huentrungequefel ta pu judio mu (Filip. 3:8). Pablo cristianongerpulu, müna huesa dungu rupafui. Pablo üdeeyu tati pu judio (Hech. 23:12-14). Ca femngechi tati pu romache hulelcaeyu ca carceltucueyu (Hech. 16:19-24, 37). Pablo cüdautuquefui ñi femal Chau Dios tañi ayüqueel tañi culpafengen mu (Rom. 7:21-25). Fentren huesaque dungu rupafulu rume, Pablo fentecünulai ñi inayafiel ta Cristo. Doi mai pequefi reque chumngechi tañi quelluqueteu ta Jehová, feimu feipi: “Ayühulqueneu ñi ngañhuadcülen” (2 Cor. 4:7, TNM; 12:10, TNM). w20.07 pag. 16 parr. 7, 8

Famülque mu, duamfali taiñ doyümafiel amuldungual Chau Dios tañi cümeque dungu. Jesús feipi ñi amuleal ti amuldungun cüdau tunte lafule rume. Feipi tañi pu inanieteu amuldungulelafingün doi fentren che ca doi alü camapu. Deu huiñomongetulu, Jesús quellufi quiñeque tañi pu inaniequeteu ñi entual rume fentren challhua. Huelu ca feipifi ñi doi falin-ngen tañi amuldungucheal engün (Juan 21:15-17). Epe püratulu ta huenu, Jesús feipifi tañi pu inanieteu ti amuldungun cüdau ñi puhual tuntepu ñi mülen ta Mapu (Hech. 1:6-8). Mufü rupachi tripantu, Jesús pengelelfi ta Juan chem ñi rupayal “Ñidol tañi antü mu”. Feimu Juan pei quiñe cüme püllü adcünufi ñi amuldungungeal “itrocom troquiñque mapu, ca tripanche, dungun ca troquiñche” (Apoc. 1:10; 14:6). Quimfali llemai, Jehová ayüniei taiñ huechunenturpual ti amuldungun cüdau. w20.09 pag. 9 parr. 5

Abrahán tañi familia mu ca rupaquefui huesaque dungu mu. Tañi domo Sara pepi niepüñeñquelafui. Feimu Abrahán ca Sara müna hueñancülequefuingu. Rupachi antü mu, Sara elufi ta Abrahán ñi nieafiel ta Agar, fei ñi nierpual ta püñeñ. Agar niepüñeñcülelu, illamcafi ta Sara. Fente tañi huesa yeucülen engu, Agar lefmahui Sara mu (Gén. 16:1-6). Agar choyüfilu ñi püñeñ, Ismael pintucungei. Rupachi tripantu mu, Sara niepüñeñi, Isaac pintucungei. Abrahán mür piuqueyeniefui tañi epu fotüm, Ismael ca Isaac. Huelu Ismael cüme troquilafi ta Isaac, feimu Abrahán feipieyu tañi amutual Agar engu (Gén. 21:9-14). Rupachi tripantu mu, Jehová feipifi ta Abrahán ñi chalintucuafiel ta Isaac (Gén. 22:1, 2; Heb. 11:17-19). Feichi quechanentufilu ta Ismael ca eluulu ñi chalintucuafiel ta Isaac, Abrahán quimlafui ñi chumlerpual tañi pu fotüm. Huelu maneluuquefui mai Jehová mu ñi huechurpual tañi feipicünuel tañi epu fotüm mu. w20.08 pag. 4 parr. 9, 10

Rume ayühuai tati pu huiñomongetulu elungele ñi cüme elcünutuafiel ñi mongen, fei ñi ayühulafiel ta Chau Ngünechen. Feitachi pu che elungeai ta rumel mongen, huelu tati che pinole ñi serfiafiel ta Chau Dios apümcangeai (Is. 65:20; Juan 5:28, 29). Biblia feipi: “Jehová tañi cümelcan feita riculchequei, ca cutrancachequelai ñi elufiel mu” (Prov. 10:22). Jehová tañi Gobierno mu, felerpuai ñi feipin feichi versiculo. Jehová tañi nehuen mu, com pu poyequefilu ta Jehová doi cüme inayenturpuafi ta Jesús ca ñochiquechi culpan niehuetulayai, femngechi Jehová riculaeyu reque (Juan 13:15-17; Efes. 4:23). Caque antü doi tremoletuai ca doi cüme chengetuai. ¡Ayüucületuai! (Job 33:25). w20.08 pag. 17 parr. 11, 12

Mülei taiñ loncontucual quiñeque peñi ca quiñeque lamngen quisu dulliquei tañi curengenoal cam fütangenoal. Caquelu cristiano petu pelaingün inei engu tañi niehual. Caquelu lantuingün. Turpu ramtulayafiyiñ engün: “¿Chemu am petu curengelaimi? ¿Chemu am petu fütangelaimi?”. Ca ngelai taiñ feipiafiel: “Iñche quintulelafeyu quiñe afcadi”. “Quelluafen ñi peñmual quiñe cüme afcadi” pingenoliyiñ, ¿cümepeafui mai taiñ quintulelafiel engün? ¿Chem pimi? Raquiduamlayaiñ ñi cuñifallcülen pu curengenolu ca pu fütangenolu. Falintuqueafiyiñ engün tañi cüme piuquengen mu ca tañi cüme serfiquefiel mu ta Jehová engün, femngechi taiñ pu peñi ca pu lamngen turpu raquiduamlayaingün taiñ falintuquenofiel engün (1 Cor. 12:21). Doi mai quimaingün taiñ respetaquefiel ca ayühunquechi müleaingün taiñ trahunche mu engün. w20.08 pag. 29 parr. 10; pag. 30 parr. 14

Rupachi antü mu, Jesús peufaluufi tati apostol Pablo (1 Cor. 15:8). Pablo petu ñi Saulo pingen, amui ta Damasco, fei allcüi Jesús ñi dungun deu huiñomongetulu. Fei Saulo pei afmatun dungu, pefi reque ta Jesús ñi mülen huenu mu (Hech. 9:3-5). Ñi pen ta Pablo rüf pengeleyu ñi huiñomongetun ta Jesús (Hech. 26:12-15). Cuifi, Pablo inantucuquefui pu cristiano. Huelu peufaluhueyu ta Jesús, fei cristianongerpui. Feimu quiñeque che rume ayüquepelafui ñi allcütual Pablo ñi rupan. Pablo cüme quimtucui hula Jesús ñi huiñomongetun, fei rume yafüluhui ñi quimeltulelafiel ta caquelu che. Petu ñi quimeltuchemequen cüpafcangei, carceltucungei ca epe ürfifui (1 Cor. 15:9-11; 2 Cor. 11:23-27). Pablo fente ñi feyentulen Jesús ñi huiñomongetun, amulei ñi amuldungual larpufule rume. Taiñ ngüneduampeel pengelqueiñmu ñi rüf huiñomongetun ta Jesús ca quelluqueiñmu taiñ doi maneluhual ñi müleal huiñomongetun. w20.12 pag. 3 parr. 8-10

Ramtuhuafuiñ: “¿Amuquepen mai fillque trahun mu?”. Trahun mu iñchiñ, Jehová nehuentucuqueiñmu taiñ poyenieafiel ca yafültucuqueiñmu taiñ pu peñi ca lamngen (Mat. 11:28). Ca cümeafui taiñ ramtuhual: “¿Estudiaquepen mai ta Biblia? Fill semana, ¿estudiaquepen mai Biblia taiñ pu che iñchiñ? Nienoli familia, ¿elantücünuquepen mai ñi cüme ngüneduamal Biblia fill semana? Com tañi nehuen mu, ¿eluuquepen mai ñi quimeltucheal ca amuldungucheal?”. ¿Chumngelu mülefui taiñ ramtuhual tüfachi dungu? Jehová ngüneduamüñmaqueiñmu taiñ raquiduam ca taiñ piuque. Feimu ca femngechi mülei taiñ ngüneduamuhual iñchiñ (1 Crón. 28:9). Duamfalngele taiñ cüme elcünutuafiel chem taiñ ayüqueel ca chem taiñ raquiduamqueel, llellipuafiyiñ ta Jehová taiñ quelluaeteu. Feula llemai mülei taiñ pepicahual acurumele huesaque dungu. w20.09 pag. 18, 19 parr. 19, 20

Quiñe antü Jesús feipi chem mülei ñi femal ta quiñe che ayüle tañi inayaeteu. Tañi quimeltual tüfa, Jesús feipi quiñe huentru ayüfule ñi deumayal quiñe fütra ruca, hunelu meu mülei ñi anücünuhual tañi nentucuentayal. Ca femngechi quiñe rey cüpa amufule hueichan mu, hunelu meu ca mülei ñi nentucuentayal ñi pepi hueutripayafel ta hueichan mu (Luc. 14:27-32). Jesús ca feipi inei rume ayüle tañi discipulongerpual, mülei tañi cüme raquiduamal ñi chem chumal tañi inayaeteu. Taiñ quelluafiel pu estudiaquelu Biblia ñi femngechi femal, mülei taiñ enseñayafiel fill semana. Mülei tami cüme pepicahual tami enseñayafiel tati estudiaquelu Biblia. Raquiduamnge chumngechi tami doi cüme enseñayafiel, femngechi cüme adümai ti quimeltun ca inayafi tañi mongen mu (Neh. 8:8; Prov. 15:28a). w20.10 pag. 7 parr. 5; pag. 8 parr. 7

Jesús huercüeiñmu taiñ quimeltuafiel ta che tañi huercün dungu, huelu loncontucunieafiyiñ quiñe falin dungu. Jesús feipilai taiñ quimeltucheal müten, doi mai ‘quimeltuafimün tañi inayal engün com iñche tamün huercüuquefiel ta eimün’ pi. Feimu mülei taiñ enseñayafiel pu estudiaquelu Biblia chem mülei tañi femal engün ca chumngechi tañi femürpual (Hech. 8:31). Enseñalfiliyiñ Biblia ta che, enseñalquefiyiñ Chau Dios tañi huercün dungu. Huelu ca femngechi mülei taiñ enseñayafiel pu estudiaquelu ñi inayal chem tañi quimürpun (Juan 14:15; 1 Juan 2:3). Taiñ femquen mu pengelelafiyiñ pu estudiante chumngechi ñi inayal Biblia tañi ngülam cüdau mu, colegio mu ca chem dungu mu rume. Tati estudio mu llellipuafiyiñ ta Jehová ñi adnieafiel tati estudiaquelu ca ñi eluafiel ñi nehuen (Juan 16:13). w20.11 pag. 2, 3 parr. 3-5

Pu hunenque cristiano ñi antü mu rume cüdaungefui tañi amuldungual. Rume pichilequefui tati huirin dungu nielu Chau Dios tañi dungu. Ca nielafuingün rume lifru tañi quelluaeteu ñi adümafiel ta Biblia. Cafei mülefui ñi amuldungulelafiel engün caque rume dungun pu che. Tunte cüdaungefulu rume ti amuldungun cüdau feichi antü mu, tati pu hunenque cristiano amuldungurpuingün “itrofill püle ca com mapu meu” (Col. 1:6, 23). Famülque mu, Jehová adniefi tañi troquiñche ca nehuentucuniefi ñi femal engün tañi ayüqueel. Chau Jehová tañi nehuen mu huirintucungei tati Biblia, femngechi doi adniequefi tañi troquiñche. Biblia mu nütramcangei Jesús tañi amuldungun cüdau ca pengeli taiñ huercüeteu taiñ ca femngechi amuldungucheal (Mat. 28:19, 20). Chau Jehová dullintuchequelai, feimu feipicünui ñi amuldungungeal “itrocom troquiñque mapu, ca tripanche, dungun ca troquiñche” (Apoc. 14:6, 7). Jehová ayüniei com che tañi allcütual tati cümeque dungu. w20.10 pag. 21 parr. 6-8

Ti rey David piuqueyefi “Jehová ñi ley dungu” (Sal. 1:1-3). David quimniefui Jehová ñi montulquefiel ñom piuquengelu, huelu ayüquelafi tati pu mallmangelu. Feimu David eluhui ñi inayal Jehová tañi ley dungu, fei ñi cüme elcünutual tañi raquiduam. David feipi: “Püramyeafiñ ta Jehová, quisu eluqueneu ta ngülam. Pun meu cütu, tañi doi ellcalechi raquiduam norümqueneu” (Sal. 16:7). Ñom piuquengeliyiñ, eluhuaiñ taiñ quelluaeteu Chau Dios tañi ngülam. Femngechi norümaiñ chem huesa raquiduam rume petu taiñ huesa femnon. Femngechi tati Biblia feipinieaiñmu reque: “Tüfa tati rüpü. Amumün tüfa püle”. Biblia adcünuqueiñmu huelulcaumequeliyiñ (Is. 30:21). Cümei ta iñchiñ mu taiñ allcütuafiel ta Jehová (Is. 48:17). Quiñe ejemplo, ca che ngülamtueliyiñmu, yehuelcahuafuiñ. Huelu inafiliyiñ Biblia ñi ngülam, müte rupalayaiñ femngechi yehuen dungu mu. Ca quimaiñ Jehová taiñ cuidanieteu quiñe Chau reque taiñ piuqueyenieteu, feimu doi fülmaucüleaiñ taiñ Huenu Chau meu (Heb. 12:7). w20.11 pag. 20 parr. 6, 7

Corinto huaria mu, quiñeque cristiano huelulefui ñi raquiduam engün ti huiñomongetun mu (1 Cor. 15:12). Caquelu che raquiduamquefuingün ta che ñi lalen reque ñi culpan mu, huelu ñi cristianongerpun mu huiñomongeletuingün reque. Huelu, ¡feingelai tati! Tüfachi pu cristiano feyentunole ñi huiñomongetun ta Jesús, falilai ñi feyentun ta Jehová mu. ¿Chumngelu feipiafuiñ tüfa? Chau Dios huiñomongeltunofule tañi Fotüm, Jesús montul-layafui ta pu che ñi culpan mu. Feichi pu feyentuquenolu ñi müleal ta huiñomongetun, nielaingün chem maneluhun rume (1 Cor. 15:13-19; Heb. 9:12, 14). Apostol Pablo cüme quimniefui “Cristo tañi huiñomongetun”. Cuifi mu, ca huiñomongetufui quiñeque che, huelu ca huiño latuingün. Feimu lle Jesús tañi huiñomongetun doicülei. Pablo feipi Jesús “ta felei tati hune cosechaelchi fün quetran reque ta hualüng meu. Hunencülei ñi huiñomongetun meu” (1 Cor. 15:20; Hech. 26:23). ¿Chumngelu feipiafuiñ ñi hunencülen Jesús? Huiñomongetulu, quiñe püllüngetui huenu mu. Inei no rume turpu femngechi femngequelafui, feimu Jesús ñi huiñomongetun hunencülei (1 Ped. 3:18, TNM; 3:22). w20.12 pag. 5 parr. 11, 12

Pu hunenque cristiano tañi antü mu, pu peñi loncolequefulu Jehová tañi troquiñche mu trür cüdahuingün ñi quiñeucüleal ca tüngcüleal Jehová tañi pu che (Hech. 2:42). 49 tripantu püle, quimngequelafui ñi duamfalngepen mai ñi circuncidangeal tati pu cristiano. Feimu Jehová tañi nehuen mu adniefi pu loncolelu ñi ngüneduamal tüfa. Duamfalngefui ñi quimal chem tañi chumal engün, femngechi ñi quiñeucüleal ca tañi cüme amuldungual engün. Pu loncolelu judio tuhun-ngelu rume, eluulaingün ñi inayal pu judio tañi quimeltun. Doi mai eluhuingün ñi ngüneduamal Chau Dios tañi dungu ca llellipufingün ñi eluaeteu tañi nehuen, femngechi ñi cüme dullial engün (Hech. 15:1, 2, 5-20, 28). ¿Chum tripai tañi femün? Jehová cümelcaeyu engün. Tati trahunche quiñeucületui ca doi cüme feletui ca amuleingün ñi quimeltuchequen (Hech. 15:30, 31; 16:4, 5). Famülque mu, Jehová tañi troquiñche quelluqueiñmu taiñ cüme adcünuleal ca tüngcüleal. w20.10 pag. 22, 23 parr. 11, 12

Fillque dungu mu elungelayafuiñ quiñeque falin cüdau Jehová tañi troquiñche mu, taiñ cutrancülen mu, taiñ füchalen mu chi cam caquelu dungu mu chi. Femngechi dungu mu rupaliyiñ, ti rey David ñi rupan rume quelluafeiñmu. David rume ayüniefui ñi femal Chau Dios tañi ngillatuhue ruca, huelu Jehová dullifi cangelu huentru tañi deumayafiel. David quelluntucufi ti huentru Jehová ñi dulliel. Huli fentren oro ca plata ñi deumangeam ti ngillatuhue ruca. ¡David rume inayentufali! (2 Sam. 7:12, 13; 1 Crón. 29:3-5). Quiñe peñi Francia mapu mu tañi cutrancülen mu loncolehuelai trahunche mu. Tañi ruca mu pichique cüdau rume pepi femhuelafui. Taiñ peñi feipi: “Ellaca mu, rume huesa duamün, falinolu troquihun. Pepi femnolu rume fentren dungu, raquiduamün ñi fente huesa duamcülehuenoal. Fei hula ayüucületun ñi cüdahuelafiel ta Jehová pichin ngeafui rume. Inayentuquefiñ ta Gedeón ca ti 300 hueichafe. Ürcülefuingün, huelu amuleingün tañi hueichan. Iñche ca femngechi amulean tañi cüdahual” (Juec. 8:4). w20.12 pag. 25 parr. 14, 15

Tañi Evangelio mu, ti apostol Juan fentren rupa nütramcai ti piuqueyehun mu. Ñi huirintucuel ta Juan enseñalqueiñmu mülei taiñ piuqueyenquechi femal itrocom dungu (1 Juan 4:10, 11). Juan alüñmai ñi adümal feitachi quimeltun. Juan petu huechengelu, quiñeque mu müte piuqueyechequelafui. Quiñe rupa Juan ca caquelu discipulo compañquiyahulfi Jesús, fei rumeingün ta Samaria huaria mu. Huelu feichi huaria mu quiñeque che pilafui ñi llohuaeteu engün. Fei Juan feipifi ta Jesús nagpayafel cütral huenu mu ñi apümcayafiel engün (Luc. 9:52-56). Ca quiñechi Juan Santiago engu ayülefui chi ñi quiñeñtrür müleal Jesús engün huenu mu. Feimu feipipelafingu tañi ñuque ñi feipimeafiel ta Jesús: “Quiñe tañi epu püñeñ anüpupe eimi tami man ad püle, fei cangelu ñi püñeñ, tami huele ad püle”. Pu caquelu apostol quimlu tüfachi dungu, rume illcuingün (Mat. 20:20, 21, 24). Fente huelulcaulu rume ta Juan, Jesús piuqueyenieyu (Juan 21:7). w21.01 pag. 8, 9 parr. 3, 4

Jehová quisutu duamuuquelai, doi mai cüme dulliquei chem ñi chumal, femngechi ñi cümelcaleal com tañi familia. Por ejemplo, eli ta mongen iñchiñ taiñ ayüucüleal. Inei no rume obligaquelafi ta Chau Jehová ñi hulal tañi Fotüm iñchiñ taiñ duam mu, quisu ayüniefui ñi femal taiñ quelluaeteu. Ca femngechi Jesús quisutu duamuulai. Quiñe rupa fente cansalefulu rume, quimeltufi fentren che (Mar. 6:31-34). Pu ngen familia quimniei ñi rume falin-ngen cüme dullial, femngechi ñi cümelcaleal tañi pu che. Huelu rume cüdaungeafui tüfa. Petu tañi dullinon, eluulai ñi ngünenieaeteu tañi chum duamcülen ca tañi ayüqueel. Doi mai, eluucülei Jehová tañi adnieaeteu, femngechi tañi cüme dullial (Prov. 2:6, 7). Femngechi doyümquei ñi cümelcaleal caquelu che, quisutu duamuuquelai (Filip. 2:4). Fei pu füta cüme inayentufile Jehová ca Jesús tañi femün, cüme loncoleai tañi familia mu. w21.02 pag. 7 parr. 19-21

Huechengelu ta Asá ñom piuquengefui ca nehuen piuquengefui. ¿Chumngelu feipiafuiñ? Lalu tañi chau, Asá reyngerpui. Fei eluhui ñi apümcayafiel com tati coilaque religion. Cafei, feipifi ta Judá ñi quintuafiel ta Jehová ca ñi inayal ti Ley ca tati huercün dungu (2 Crón. 14:1-7). Rupachi antü mu, Asá hueichapaeyu quiñe fütra troquiñ hueichafe, quiñe millon ngerquefuingün. Fei eluhui ñi quelluaeteu Chau Jehová, llellipufi: “Ahuem Jehová, eimi duamniequelafimi ñi alün-ngen ca ñi nehuen-ngehuenon tati che tami quelluquefiel. Quellumuiñ, ahuem taiñ Chau Ngünechen Jehová, eimi meu maneluucüleiñ” pifi. Fei llemai, Asá fütra maneluuquefui Jehová tañi montulaeteu com engün. Fei Jehová hueufi tañi pu caiñe (2 Crón. 14:8-12). w21.03 pag. 5 parr. 12, 13

Biblia pengeli quiñeque cümeque huenihuen ñi fütra piuqueyehun. Peafiyiñ ñi rupan David Jonatán engu. Petu ñi reycülen ta Saúl, Jehová dullifi ta David ñi reyngeal. Feimu Saúl rume ütrirfi ta David ca cüpa langümfi. Saúl ñi fotüm ngefui rume, Jonatán quelluntuculafi tañi chau ñi langümafiel ta David. Doi mai, Biblia pengeli “Jonatán David engu quiñeucülerpuingu ñi cüme hueniyehun mu, ca Jonatán eluhui ñi piuqueyeafiel chumngechi quisutu piuqueyehui” (1 Sam. 18:1). Chem dungu rume rupafule, feipicünuhuingu ñi hueniyehual, fei “rumel quelluhuayu” pihuingu (1 Sam. 20:42). Jonatán 30 tripantu peno hunen-ngefui ta David mu. “David rume hueche huentrungei, ¿chumngechi am hueniyeafun?” pilai ta Jonatán. Doi mai müna yamniefi ta David. Com tüfachi dungu catrütulaeyu Jonatán David engu ñi hueniyehual. Feimu afmatufali fente ñi hueniyehun engu. w21.01 pag. 21, 22 parr. 6, 7

Jesús feipicünufi ñi pu inanieteu ñi rüf ayüucüleal engün, huelu ca ñi rupayal huesaque dungu mu (Mat. 10:22, 23; Luc. 6:20-23). Iñchiñ ayühun nieiñ taiñ inaniefiel mu ta Jesús. Huelu quiñeque mu, rupayafuiñ huesaque dungu. Taiñ pu che catrütuafeiñmu taiñ poyeafiel ta Jehová. Pu gobierno caiñetuafeiñmu. Ca taiñ pu compañ colegio mu ca cüdau mu ngüchaltucuafeiñmu taiñ huesa femal. Rume raquiduamliyiñ taiñ rupayafel feitachi dungu mu, huesa duamelafeiñmu. “Caiñetungen mu pu che ayüucülelayafui” raquiduamquei fentren pu che. Huelu Biblia feipiqueiñmu taiñ ayüucüleal rupaliyiñ rume huesaque dungu. Santiago feipi nienolu quellu troquiulayaiñ, doi mai mülei taiñ ayüucüleal (Sant. 1:2, 12). Jesús ca feipieiñmu taiñ ayüucüleal inacangeliyiñ rume (Mat. 5:11). Jehová adcünufi Santiago ñi huirintucual quiñe carta. Feichi carta mu, huli fentren cümeque ngülam taiñ quelluaeteu ñi ayüucüleal rupaliyiñ rume huesaque dungu. w21.02 pag. 26 parr. 1, 2; pag. 27 parr. 5

Timoteo ñi antü mu, quiñeque cristiano falintulaingün ñi chaf cüdaucülen Chau Ngünechen engu. Quiñeque tüfachi cristiano fei ta Demas, Figelo, Hermógenes, Himeneo, Alejandro ca Fileto (1 Tim. 1:18-20; 2 Tim. 1:15; 2:16-18; 4:10). Com tüfachi pu cristiano piuqueyequefuingün ta Jehová, huelu falintuhuelafingün tañi elueteu. Huecüfü, ¿chumquei taiñ falintuhuenoafiel taiñ eluqueteu Jehová? Huecüfü pengelquei huesaque dungu internet mu, television mu, lifru ca caquelu dungu taiñ piuqueyehuenoafiel ta Jehová ca tañi huercün dungu. Cafei pu che taiñ huesa pieteu mu ca taiñ inantucungen mu, Huecüfü cüpa llicalcaqueiñmu taiñ amuldunguhuenoal. Ca femngechi Huecüfü famtuculelqueiñmu ñi quimeltun pu apostata, femngechi taiñ elcünutuafiel ti rüf dungu. Cuñiutucunoliyiñ, ñochiquechi elcünutuafuiñ ti rüf dungu (1 Tim. 6:21). w20.09 pag. 27 parr. 6-8

Quiñe hueni cam quiñe taiñ pu che, ¿huesa duamelpeiñmu mai? Femngechi dungu rupaliyiñ, müna quelluaiñmu ngüneduamal ñi rupan tati rey David. Tañi fotüm Absalón furi ngünencaeyu (2 Sam. 15:5-14, 31; 18:6-14). Loncontucuaiñ David ñi rupan, fei llellipuafiyiñ ta Jehová ca feipiafiyiñ taiñ chum duamcülen taiñ huesa femngen mu (Sal. 6:6-8). Raquiduamaiñ chum duamcülefui David. David piuqueyeniefui tañi fotüm Absalón ca maneluuquefui tañi hueni Ahitofel mu. Huelu fei engu furi ngünencaeyu, huesa duameleyu ca cüpa langümeyu. Ca chengefule ta David, maneluuhuelayafui com tañi pu hueni meu, “ca furi ngünencayaeneu” piafui. Cafei re quisutu duamuhuafui ca quisulen lefmahuafui. Cafei rume hueñancüleafui. Huelu David femngechi femlai. Doi mai cüme dulli chem tañi chumal, llellipufi ta Jehová tañi quelluaeteu ca femngechi eluhui ñi quelluaeteu tañi pu hueni. Pürüm femi tañi dulliel. David maneluhui Jehová mu ca tañi pu hueni mu. w21.03 pag. 15 parr. 7, 8; pag. 17 parr. 10, 11