Julio

Mülei taiñ hueniyeafiel ta Jesús, femngechi taiñ allcütuñmangeal taiñ ngillatun. Ngillatun mu iñchiñ, quimnieiñ taiñ feipial “Jesús tañi üi mu” taiñ fentepual. Huelu re feipilayaiñ müten, doi mai ca piuquentucuaiñ Jesús tañi duam mu allcütuqueiñmu Jehová. Jesús feipifi tañi pu inanieteu: “Com tamün ngillatuel ta eimün iñche ñi üi meu [...], iñche ta feman” (Juan 14:13). Jehová müten dulliquei chumngechi taiñ huiñoldunguaeteu taiñ llellipufiel, huelu elfalcünufi ta Jesús ñi femürpual. Feimu petu taiñ huiñoldungunoeteu Jehová taiñ ngillatun, hune ngüneduamai taiñ inaniequefiel Jesús tañi feipin. Raquiduamnge tüfachi dungu, Jesús feipi: ‘Eimün ta huiñoduamatufilmün ta caquelu tamün huesaque femqueteu, tamün Chau ta huenu mapu mülelu ca femngechi huiñoduamatuaimünmeu ta eimün. Huelu huiñoduamanofilmün ta caquelu che, ca femngechi huiñoduamalayaimünmeu tamün Chau eimün tamün culpan meu’ (Mat. 6:14, 15). Duamfali llemai taiñ perdonacheal chumngechi taiñ perdonaqueteu Jehová ca Jesús. w20.04 pag. 21 parr. 6

Tati apostol Pablo ngüneduamquefui chem ñi ayüqueel tati pu che, fei amuldungulelquefui feichi dungu mu. Ngüneduamnge chem ñi rupan Listra pingechi huaria mu. Quiñeque che mülelu feichi huaria mu quimquelafui tati Huirin Chillca, caquelu che ella quimquefui müten. Fei, ¿chumi cai Pablo? Feipifi feichi pu che Chau Dios ñi elel ta cüme quetran, ñi ayüucüleal tati pu che. Femngechi Pablo nütramcafi fei engün ñi quimnieelchi dungu meu, fei ñi pürüm adümal engün tañi feipin. Feimu amuldungun mu, cüme ngüneduamnge chem ñi ayüqueel tati pu che, fei nütramcayafimi chem ñi duamtunieel engün. ¿Chumngechi femafuimi tüfa? Epe puucülelmi quiñe che tañi ruca mu, cüme ngüneduamnge tañi chummequen. Quiñeque che cüdaumequei tañi huerta mu, cüme elcünumequei tañi ruca ca tañi auto, ca mequei fillque duam mu. Cümefule, entuafuimi nütramcan tati pu che ñi femmequen mu (Juan 4:7). Chumngechi ñi tucutuucülen tati che, quiñeque mu pengelafeiñmu cheu tañi tuhun, ñi chumquen ca chem deporte tañi ayüqueel. w20.04 pag. 10, 11 parr. 11, 12

Quiñeque taiñ pu peñi ca pu lamngen cümelehuequelai tañi raquiduam fillque huesaque dungu mu rupan, feimu rume cüdautuqueingün ñi femal quiñeque dungu tañi mongen mu. Tüfachi pu peñi ca pu lamngen cüme duamcülequelai mülen mu fentren che, huelu amuqueingün müten trahun mu ca fütraque trahun mu. Rume cüdautuqueingün ñi nütramcayal quimnoelchi che, huelu tripaqueingün müten tañi amuldungual. Femngechi dungu rupalmi, quisulelaimi. Fentren che ca femngechi rupaquei. Jehová rume falintuquefi tami femquen. Jehová quelluqueimu ca nehuentucuqueimu, feimu amuleimi tami poyequefiel huesa rupamequelmi rume (Filip. 4:6, 7). Fentren taiñ pu peñi ca pu lamngen huesa rupaqueingün tañi cutrancülen mu, huelu amuleingün tañi poyequefiel ta Jehová, feimu rume ayühulquefingün. ¡Eimi ca femngechi femqueimi llemai! Iñchiñ taiñ cuden mu, cüme amuleafuiñ cutrancüleliyiñ rume (2 Cor. 4:16). Jehová tañi quellun mu, com iñchiñ huechutripayafuiñ tati cuden reque. w20.04 pag. 31 parr. 20, 21

Jehová rume cüme deumafi ti Mapu, femngechi quimelqueiñmu fentre ñi quimün-ngen (Heb. 3:4). Taiñ Mapu mu müten mülei com taiñ duamnieel taiñ mongeluhuam. Mapu mu mülei fentren che ca fentrenque culliñ, fei ti Mapu hulquei com taiñ duamnieel. Tüfa eluqueiñmu oxigeno, co ca iyael. Turpu afquelai. Jehová deumafi ti Mapu ñi rumel lifcüleal. Feimu mülefule rume pod Mapu meu, apolequelai, ¿chumngelu am? Com tüfachi pod huiño pünengequetui. w20.05 pag. 20 parr. 3; pag. 22 parr. 4

Tati Huecüfü feipintucufi ta Jehová ñi coilatufengen, femngechi ñi huesa acordangeal Jehová tañi üi. Femngechi tati Huecüfü huesa dalluntucufi ta Jehová. Tati Huecüfü ngünencafi ta Eva, feimu feyentueyu (1 Tim. 2:14). Eva doi maneluhui tati Huecüfü mu, feimu ifi tati fün ñi inoafel. Femngechi famentufi ñi feipieteu ta Jehová. Fei Eva ca elufi ti fün ta Adán. ¡Müna huesalcaingu! (Gén. 3:6). Eva allcütulu ñi huesa piel tati Huecüfü, feipirqueafui: “¿Inei troquihuimi am tami huesa dunguyeafiel tañi Fütra Chau? Jehová elueiñmu com tañi duamnieel tañi füta iñchiu, feimu piuqueyeniefiñ ca maneluuquen quisu mu. ¡Quiñe püle tripange, Jehová tañi caiñe ta eimi!”. Huelu femngechi feipilai Eva. Feipifule, rume ayüumapelayafui ta Jehová (Prov. 27:11). Huelu Eva, Adán no rume rüf piuqueyelafi ta Jehová, feimu chumlaingu rume ñi yamniengeal Jehová tañi fütra üi. w20.06 pag. 4 parr. 10, 11

Saquifali taiñ pu lamngen com ñi femquen mu. Deumaqueingün ca cüme adniequefingün fillque ruca cheu tañi poyengeal ta Jehová, amuldunguqueingün caque quehun dungu mu, quelluntucuqueingün Betel mu, ca rupan mu fütra huesaque dungu ca quelluntucuquefingün tañi pu lamngen. Quiñeque lamngen rulpadunguqueingün taiñ publicaciones caquelu quehun dungu mu, hunelequeingün amuldungun mu, ca misionerangeingün. Cafei taiñ pu lamngen fütangelu quelluntucuquefingün tañi füta. Quellunoelieyeu tañi domo, tüfachi pu peñi fente cüme cüdaulayafui Jehová tañi troquiñche mu (Efes. 4:8, TNM). Quiñe fütra troquiñ hueichafe reque, taiñ pu lamngen fentren-ngeingün, eluucüleingün tañi cüdahual ca rume adümuuqueingün tañi amuldungucheal engün. Tati pu loncolelu quimniei pu cuseque lamngen tañi rume cüme quelluntucuafiel ti pu üllchaque lamngen fillque dungu mu (Tito 2:3-5). Felei llemai, piuqueyefali ca falintufali taiñ pu lamngen. w20.09 pag. 23 parr. 13, 14

Quiñe püle tripaquelu rume quiñeque peñi ca lamngen, Jehová ngoimaquelaeyu engün. Rume falintuquefi com tañi femquefel engün (Heb. 6:10). Isaías adentucünui chumngechi ñi duamniefiel Jehová tañi pu che. Quisu feipi: “Ngünechen inaduamafi tañi pu ufisa quiñe cuidaufisaquelu reque. Trapümafi tañi pu ufisa ca metayahulafi” (Is. 40:11). Jehová pefiel mu ñi quiñe püle tripan quiñeque tañi pu poyequeteu ufisa reque felelu, ¿chumquei tañi piuque? Hueñancüquei. Feimu Jesús feipifi tañi pu inanieteu: ‘¿Cümelu troquifimün cai? Quiñe huentru niele pataca ufisa, fei ñamfule quiñe tüfa engün, ¿elcünulayafui chi am tati pu ailla mari ailla lelfün meu, ñi amual ñi quintumeafiel tati ñamlu? Fei petufile, rume ayühuafui tañi petuelchi ufisa meu, tati ailla mari ailla meu ñamnolu engün am’ (Mat. 18:12, 13). w20.06 pag. 19, 20 parr. 8, 9 

Iñchiñ müna falintuquefiyiñ ñi serfiafiel ta Jehová (Sal. 27:4; 84:10). Pu peñi doi ayünielu ñi cüdahuelafiel ta Jehová, saquifali. Huelu elungele quiñe falin cüdau, ngelai tañi mallmahual (Luc. 17:7-10). Doi mai ñom piuque mu mülei tañi serfiafiel tañi pu peñi ca pu lamngen (2 Cor. 12:15). Biblia feipi cuifi mu quiñeque che mallma piuquengefui. Peafiyiñ Diótrefes ñi femün. Quisu mallmauquefui ca ‘ngencauquefui ñi hunencüleal’ (3 Juan 9). Ca femngechi Uzías mallma piuquengefui ca ayüfui ñi femal quiñe cüdau tañi femnoafel (2 Crón. 26:16-21). Absalón tañi mallma piuquengen meu tutequefui ti pu che, femngechi tañi quelluntucuaeteu reyngerpual (2 Sam. 15:2-6). Jehová ayüquelafi ñi femün tüfachi cüla huentru. Ca femngechi famülque mu, Jehová ayüquelafi pu mallma piuquengelu (Prov. 25:27). Pu mallma piuquengelu rumel huesa tripaquei (Prov. 16:18). w20.07 pag. 4 parr. 7, 8

Quiñeque familia huiñamtuuqueingün ca mapu ca quehun dungu nielu, tañi cüdaumeal ca ñi doi cüme feleal. Feitachi hue quehun dungu dungungequei cüdau mu, colegio mu ca trahunche mu, feimu mülei tañi adümürpuafiel engün. Huelu quiñeque mu ca mülequei trahunche quisu engün ñi quehun dungu mu. Feimu ti ngen familia mülei ñi dullial chem trahunche mu tañi amual engün. Ti chau mülei ñi dullial chem trahunche mu ñi amual tañi pu che. Huelu poyenofile ta Jehová, ti ñuque mai ta mülei ñi dullial. Fei ti chau cam ñuque mülei ñi raquiduamal chumngechi ñi doi cümelcaleal tañi pu che. Quisuque pu ngen familia mülei ñi dullial tañi chem chumal, feimu mülei taiñ yamafiel tañi chem pin. Chem trahunche mu rume mülepufule engün, yamafiyiñ ñi dulliel ca piuqueyenquechi llohuafiyiñ engün (Rom. 15:7). w20.08 pag. 30 parr. 17, 18

Taiñ llohual Jehová tañi nehuen, loncontucuaiñ Jehová ngüneduamquelai tunte taiñ nehuen-ngen, tunte taiñ quimün-ngen, tunten plata taiñ nieel ca taiñ tuhun no rume. Epe com iñchiñ taiñ poyequefiel ta Jehová fütraque quimün nielaiñ, ülmen tuhun nielaiñ, feimu illamcangequeiñ (1 Cor. 1:26). Feimu pofrengeliyiñ rume ca fentren educacion nienoliyiñ rume, serfiafuiñ ta Jehová. Femngechi doi cüme peafuiñ chumngechi taiñ quelluqueteu Jehová. Pu che huesa piñmaeliyiñmu taiñ feyentuqueel, llicayafuiñ chi. Feimu ngillatuafiyiñ ta Jehová taiñ eluaeteu ta nehuen, femngechi incañpeafiyiñ taiñ feyentuqueel (Efes. 6:19, 20). Huesa cutran nieliyiñ, cutrancahuafuiñ. Feimu ngillatuafuiñ ta Jehová taiñ eluaeteu ta nehuen, femngechi taiñ doi cüme serfinieafiel. Doi pefiliyiñ taiñ quellueteu ta Jehová, doi maneluhuaiñ quisu mu, fei doi nehuentucuaiñmu. w20.07 pag. 17 parr. 9

Ayüliyiñ taiñ doyümafiel Chau Dios tañi Gobierno, quiñeque mu famentuafuiñ taiñ ayüqueel Abrahán reque (Mar. 10:28-30; Heb. 11:8-10). Raquiduamlayaiñ taiñ rupanoal huesaque dungu mu. Abrahán ñi rupan quimeltuqueiñmu poyefiliyiñ rume ta Jehová ca contuafeiñmu huesaque dungu (Sant. 1:2; 1 Ped. 5:9). Quimfali ñi pichilehuen tañi afal com huesaque dungu, feimu doi mülefui taiñ piuquentucunieal com taiñ feipicünueteu Jehová. Pichin mu, Chau Dios ñi Gobierno ngünenietuafi com ti Mapu. Huiñomongetuai taiñ piuqueyenieelchi pu che. Feichi mu Jehová huiñomongeltuafi ta Abrahán ca tañi pu che Mapu mu, femngechi cümelcayafi tañi maneluhun mu. ¿Eimi cai? ¿Müleaimi chi am fei mu? Taiñ femngechi femal, inayentuafiyiñ ta Abrahán. Famentuafiyiñ taiñ ayüqueel taiñ serfiafiel ta Jehová. Chem huesa dungu rume rupafuliyiñ, maneluucüleaiñ Jehová mu. Ayühunquechi esperanieafiyiñ ñi femtripayal Jehová tañi feipicünuel (Miq. 7:7). w20.08 pag. 5, 6 parr. 13, 14; pag. 7 parr. 17

Quimnieiñ langümngefuliyiñ rume, Jehová huiñomongeltuafeiñmu. Feimu tunte aneltungeliyiñ rume, llicaquelafiyiñ tati lan. Chumllefule rume taiñ pu caiñe, turpu püntünentulayafeiñmu Jehová mu (Rom. 8:35-39). Taiñ quimfiel ñi huiñomongeltucheal Jehová, nehuen piuquequeiñmu, llicaquelaiñ taiñ layal. Feimu feipiafuiñ tati huiñomongetun pengeli fente ñi quimün-ngen ta Jehová. “Langümayu” pieliyiñmu taiñ pu caiñe, ¿maneluupeafuiñ mai Jehová taiñ huiñomongeltuaeteu? Taiñ quimal tunte taiñ maneluuquen Jehová mu, ramtuhuafuiñ: “Tati pichiquen dungu ñi femqueel fill antü, ¿pengelquepei mai tañi maneluuquen Jehová mu?” (Luc. 16:10). “Chau Dios feipicünui ñi eluaeteu com tañi duamnieel doyümfili tañi Gobierno, ¿rüf maneluuquepen mai feitachi dungu mu? Com ñi chumquen tañi mongen mu, ¿pengelquepen mai ñi maneluhun Jehová tañi feipicünuel mu?” (Mat. 6:31-33). Rüf maneluuliyiñ Jehová mu, chaftuafuiñ chem huesa dungu rume rupafuliyiñ (Prov. 3:5, 6). w20.08 pag. 17, 18 parr. 15, 16

Iñchiñ mülei taiñ cüme adümafiel tati Biblia. Trahun mu iñchiñ quellungequeiñ taiñ femal tüfa. Huelu cüpa quimeltufiliyiñ ta che fente ñi falin-ngen ti Biblia, iñchiñ mülei taiñ fill antü ngüneduamnieafiel. Femngechi femliyiñ, cüme feyentuleaiñ ñi rüfngen com ñi feipin tati Biblia. Huelu re papeltulayaiñ müten tati Biblia, ca femngechi mülei taiñ raquiduamal taiñ papeltuqueel mu, ca mülei taiñ ngüneduamal ñi chem pin taiñ fillque papel ca lifru. Femliyiñ, doi cüme quimafiyiñ ta Biblia ca doi cüme quimeltucheaiñ (1 Tim. 4:13-15). Taiñ cüme quimeltucheal, re feipilayafiyiñ müten ta che quiñe texto Biblia mu. Doi mai quelluafiyiñ ñi cüme adümafiel Biblia ñi ngülam ca chumngechi cümelcayafeyu tañi mongen mu. Cüme estudianiefiliyiñ ta Biblia, doi cüme quimeltucheaiñ Biblia mu (2 Tim. 3:16, 17). w20.09 pag. 28 parr. 12

Raquiduamnieaiñ chumngechi taiñ quelluqueteu Jehová, femngechi doyümnieafiyiñ ti amuldungun cüdau. Jehová fillque dungu eluqueiñmu taiñ quimeltuaeteu. Nieiñ ta fillque papel ca lifru, nieiñ ta quimeltun taiñ electronico chemcün mu. Nieiñ audio, video ca nieiñ ta broadcasting. Taiñ pagina internet mu, mülei quimeltun doi 1.000 quehun dungu mu (Mat. 24:45-47, TNM). ¿Ca chem quelluafeiñmu taiñ doyümafiel ti amuldungun cüdau? Inayentuafiel Jesús tañi femün. Jesús doyümniefi ti amuldungun cüdau, feimu eluulai chem no rume ñi catrütuaeteu (Juan 18:37). Jesús pilai tati Huecüfü ñi eluaeteu com gobierno mülelu Mapu mu, ca pilai ñi reycünuaeteu tati pu che (Mat. 4:8, 9; Juan 6:15). Jesús cüdaulai ñi ricu chengerpual. Ca caiñetungefulu rume, amulei müten ñi amuldungumequen (Luc. 9:58; Juan 8:59). Feimu huesa dungu mu rupafuliyiñ, inayentuafiyiñ ta Jesús, chumngechi ñi feipin ta Pablo taiñ peelchi texto fachantü. w20.09 pag. 10 parr. 6, 7

Rume ayüucüleiñ ñi mülen taiñ pu lamngen trahunche mu. Nehuentu cüdauqueingün, amuldunguchequeingün ca coneltuqueingün taiñ trahun mu. Quelluntucuqueingün ñi cümelcaleal ti Trahunhue Ruca ca cümelcamequequefingün com tañi pu lamngen. Huelu ca chaftuquefingün cüdaungechi dungu. Quiñeque lamngen cuidaqueingün tañi pu fütaqueche. Caquelu lamngen rume caiñetuqueyu tañi pu che. Ca quiñeque lamngen quisu tremümqueingün tañi pu püñeñ, feimu nehuentu cüdauqueingün ñi eluafiel com tañi duamnieel. ¿Chemu duamfali taiñ yafültucuafiel taiñ pu lamngen? Famülque mu, müte falintungequelai pu domo. Cafei Biblia feipieiñmu taiñ quelluntucuafiel pu domo. Inaduamnge, Pablo feipifi quiñe trahunche ñi llohuafiel ta Febe pingechi lamngen, ca “quellufimün itrocom tañi duamtuel meu” pifi (Rom. 16:1, 2). Petu ñi cristianongenon, Pablo fariseongefui. Tüfachi pu fariseo illamcaquefuingün pu domo, feimu Pablo ca inaye femquepelafui. Huelu cristianongerpulu, inayentufi ta Jesús, feimu yamdomotui ca fürenequetufi ti pu domo. w20.09 pag. 20 parr. 1, 2

Quelluafiyiñ pu estudiaquelu Biblia ñi amuldungucheal. ¿Chumngechi doi cüme quelluafuiñ che ñi femürpual tüfa? Ramtuafuiñ tati estudiante: “Inafilu eimi Biblia tañi ngülam, ¿chumngechi doi cümelcaletui tami mongen? ¿Cümepeafui mai caquelu che ñi ca allcütual feitachi cümeque dungu? ¿Chem pimi? ¿Chumngechi quelluafuimi engün?” (Prov. 3:27; Mat. 9:37, 38). Loncontucuaiñ, Jesús ta feipieiñmu: ‘Quimeltuafimün ta che tañi inayal engün com iñche tamün huercüuquefiel ta eimün’. Feichi dungu mu ñi huercüel ta Jesús ca coneltulei taiñ piuqueyeafiel ta Chau Ngünechen ca taiñ pu chafche (Mat. 22:37-39). Tati estudiaquelu doi piuqueyefile ta Chau Dios ca tati pu che, doi eluhuai tañi amuldungucheal. Quiñeque estudiaquelu llicayafui chi tañi amuldungucheal, huelu feipiafiyiñ Jehová ñi quelluaeteu, femngechi llicahuelayafi tati pu che (Sal. 18:1-3; Prov. 29:25). w20.11 pag. 3 parr. 6-8

Petu tami pepicahun, llellipuafuimi ta Jehová ñi quelluafiel tati estudiaquelu Biblia. Ca femngechi “quelluen” piafuimi ta Jehová tami puhual ti che tañi piuque mu. Loncontucunieaimi, ayünieimi tami quelluafiel tati che ñi fautizahual. Ti che ca femngechi mülei ñi quisu allcütuafiel ca nütramcayafiel ta Jehová fill antü. ¿Chumngechi pepi allcütungeafui ta Jehová? Mülei fill antü papeltuafiel ta Biblia (Jos. 1:8; Sal. 1:1-3). Ca femngechi ti estudiaquelu Biblia mülei ñi nütramcayafiel ta Jehová. ¿Chumngechi femafui tüfa? Mülei tañi fill antü llellipuafiel. Pemefiliyiñ ti estudiaquelu Biblia, cümeafui hunelu mu taiñ quiñeucülen llellipuafiel Jehová com piuque mu. Ca femngechi deumanentuliyiñ ti estudio, ca llellipuaiñ. Feipiafiyiñ ta Jehová ñi quelluafiel tati estudiaquelu. Fei ti estudiaquelu allcütule tami llellipun, quimai chumngechi ñi nütramcayafiel ta Jehová com ñi mülen tañi piuque mu ca quimai ñi llellipual Jesús tañi üi mu (Mat. 6:9; Juan 15:16). Tati estudiaquelu fill antü allcütufile ta Jehová Biblia mu ca nütramcafile llellipun mu, doi cüme hueniyerpuafi (Sant. 4:8). w20.10 pag. 8 parr. 8; pag. 9 parr. 10, 11

Pu hunenque cristiano ñi antü mu, pu trahunche cüme adcülequei ca tüngcülequefui engün. Famülque mu, Jehová tañi troquiñche rume cüdauquei taiñ ca femngechi feleal iñchiñ (Hech. 16:4, 5). Cañpüle amulmi trahun mu, fei ngüneduamngele Ti Huerquen, quimaimi chumngechi ñi adcünungeal ti chillcatun ca chem tañi ngüneduamngeal, ¡rume cüme duamcüleaimi! Jehová tañi nehuen mu müten fente quiñeucülei tañi pu che (Sof. 3:9). ¿Chumafuiñ iñchiñ? Ramtuhuaiñ: “¿Quelluntucuquepen mai ñi quiñeucüleal ca tüngcüleal ti trahunche? ¿Inaniequepen mai ñi chem pin pu adniequelu ti trahunche?”. Ca ramtuhuafuiñ: “¿Manelfalngepen mai?”. Nielmi falinque cüdau ti trahunche mu, doi mülefui tami ramtuhual feichi dungu. Ca ramtuhuafuiñ: “¿Tarde puuquen cam temprano puuquen cheu tañi puhuafel? ¿Eluuquepen mai tañi quellucheal?” (Sant. 3:17). Ngüneduamuuliyiñ taiñ müte cüme femnon quiñeque tüfachi dungu, llellipuafiyiñ ta Jehová, “eluen tami nehuen” piafiyiñ. Eluuliyiñ taiñ quelluaeteu Jehová tañi nehuen, doi cüme cüdaucüleaiñ ti trahunche mu. Fei pu peñi ca pu lamngen doi piuqueyenieaiñmu ca falintunieaiñmu. w20.10 pag. 23 parr. 12, 13

Biblia quiñe espejo reque felei iñchiñ mu (Sant. 1:23-25). Fill antü taiñ tripayal ruca mu, adquintuuqueiñ ta espejo mu, femngechi ngüneduamuuqueiñ taiñ cüme adcülen. Chem rume huesalcalele iñchiñ mu, cüme adcünuafiyiñ. Ca femngechi fill antü papeltufiliyiñ ta Biblia, ngüneduamaiñ chumngechi cüme adcünutual taiñ raquiduam. Fentren peñi ca lamngen papeltuquefi ti texto diario fill antü pulihuentu. Femngechi chemu rume ñi femquen, raquiduamquei chumngechi ñi femal tañi papeltuel. Iñchiñ ca mülei taiñ estudiayal ca raquiduamal fill antü ti Biblia. Tüfa rume falin-ngei taiñ amuleal Chau Jehová tañi cüme rüpü mu. Femngechi nierpuafuiñ afnoachi mongen. Huelu mülei taiñ ñom piuquengeal taiñ inayal ñi feipin ti Biblia ca pu peñi taiñ adnieteu. w20.11 pag. 20 parr. 3, 8 

Tati pu hunenque cristiano inantucungefuingün, huelu quiñeque mu tüngcülen poyequefingün ta Jehová engün. Inantucungenolu engün, com tañi nehuen mu eluhuingün ñi amuldungucheal. Jehová cümelcaeyu engün tañi cüdau mu, feimu doi alün-ngerpuingün (Hech. 9:26-31). Pu hunenque cristiano doi eluhuingün ñi amuldungucheal. Pablo ngüneduami ñi amuldunguafiel pütrüquen che Éfeso huaria mu, feimu mülenagi tañi femal (1 Cor. 16:8, 9). Pu trahunche eluhuingün ñi doi amuldungucheal (Hech. 15:30-35). Taiñ peelchi texto fachantü pengeli ñi cüme tripan tañi amuldungun engün. w20.09 pag. 16 parr. 6-8

Feichi Adán culpalu, quisu condenahui reque tañi layal, ca femngechi condenafi com tañi pu cüpanche. Fantepu mu, amulei taiñ cutrancahun Adán tañi culpan mu. Huelu Jesús ñi huiñomongetun mu, huiñomongetuai pu layelu. Feimu ti apostol Pablo feipi: “Quiñe huentru ñi duam mülei ñi huiñomongetual tati pu layelu”. “Fei chumngechi ta Adán meu itrocom che laquei, fei ca femngechi ta Cristo meu itrocom che huiñomongetuai” (1 Cor. 15:22). Pablo feipi: “Adán meu itrocom che laquei” (Rom. 5:12). ¿Chem pifel tüfa? Pablo nütramyefi com pu che. Adán tañi duam mu culpanchengetuingün, feimu laqueingün. Adán culpafengelafui, huelu huesa dulli ñi allcütunoafiel ta Jehová. Feimu huiñomongetulayai, montulayai Jesús tañi lan mu. Ca femngechi capüra felechi pu che apümcangeai, turpu huiñomongetulayai (Mat. 25:31-33, 46, TNM; Heb. 5:9). w20.12 pag. 5 parr. 13, 14

Elungenoliyiñ quiñe falin cüdau Jehová ñi troquiñche mu, raquiduamafuiñ pu cümeque püllü ñi femün mu. Quiñe rupa, Jehová ramtufi ti pu cümeque püllü chumngechi ñi ngünencayafiel ti rey Acab. Fentren cümeque püllü lloudunguingün, huelu Jehová dullifi quiñe cüme püllü müten ñi feipiel, fei “cüme tripayaimi” pifi (1 Rey. 22:19-22). ¿Huesa duampeingün mai pu caquelu cümeque püllü? “Ngünam huiñoldungufiñ ta Jehová”, ¿pipeingün mai? ¡Femlaingün llemai! Pu cümeque püllü rume ñom piuquengeingün, ayünieingün Jehová müten ñi püramyengeal (Juec. 13:16-18; Apoc. 19:10). Doi falintunieafiyiñ yenieal Jehová tañi üi ca amuldungucheal tañi cümeque dungu. Jehová rüf falintuqueiñmu taiñ ñom piuquengen mu, niefuliyiñ rume quiñe falin cüdau trahunche mu cam femnofuliyiñ rume. Feimu llellipuafiyiñ ta Jehová taiñ amuleal taiñ ñom piuquengen. Raquiduamnieafiyiñ ñi femün pu ñom che nütramcangelu Biblia mu. Cüme duamquechi quelluafiyiñ taiñ pu peñi, pu lamngen chem dungu mu rume (1 Ped. 5:5). w20.12 pag. 26 parr. 16, 17

Tati casco adentulei ti maneluhun taiñ elueteu Chau Jehová. Maneluuqueiñ Chau Jehová cümelcayafi tañi pu nor piuqueyeteu. Cafei lafuliyiñ rume, huiñomongeltuaiñmu (1 Tes. 5:8; 1 Tim. 4:10; Tito 1:1, 2). Ti maneluhun taiñ elueteu Chau Jehová cuñiutucuqueiñmu taiñ raquiduam. Quelluqueiñmu taiñ loncontucunieal Jehová tañi feipicünuel. Ca quelluqueiñmu taiñ rume raquiduamnoal taiñ huesa rupan mu. ¿Chumafuiñ taiñ yenieal reque feitachi casco? Eluhuaiñ taiñ raquiduamal Jehová reque. Por ejemplo, maneluuquelaiñ tati falinque fillem mu, doi mai maneluuqueiñ Jehová mu (Sal. 26:2; 104:34; 1 Tim. 6:17). Tati fütra cuchillo adentulei tati Biblia. Tüfa quelluqueiñmu taiñ ngünencangenoal ca taiñ famentual coilaque quimeltun ca huesaque huimtun (2 Cor. 10:4, 5; 2 Tim. 3:16, 17; Heb. 4:12). Jehová tañi troquiñche eluqueiñmu fillque dungu taiñ cüme adümafiel Biblia, huelu cafei caque quiñeque iñchiñ mülei taiñ cüme estudiayafiel (2 Tim. 2:15). w21.03 pag. 27 parr. 4; pag. 29 parr. 10, 11

Ti apostol Juan presulefui rume, pengeli ñi piuqueyechefengen. ¿Chumngelu feipiafuiñ? Juan huirintucufi ti lifru Apocalipsis ca huercülelfi tati pu trahunche, fei ñi quimal engün chem dungu ñi rupayal (Apoc. 1:1). Fei hula peno lifreletulu huirintucufi ti lifru yenielu quisu ñi üi. Cafei huirintucui cüla carta ñi yafültucuafiel tañi pu peñi ca pu lamngen. ¿Chumngechi inayentuafuiñ ñi femün ta Juan? Huecüfü ñi ngünenieelchi pu che ayülefuingün taiñ femal quisu taiñ duam müten, taiñ ngülümal fentren plata, falin chengeal. Huelu cüme dulliliyiñ chem chumal taiñ mongen mu, pengelafuiñ taiñ piuqueyefiel tati pu che. Feimu huall Mapu püle, Jehová tañi pu che doyümquei ñi amuldungual ca quelluafiel che tañi quimafiel ta Jehová. w21.01 pag. 10 parr. 9, 10

Jonatán, Saúl ñi fotümngefui. Feimu “David reyngelayafui, huelu iñche reyngeafun” piafui. Huelu femlai (1 Sam. 20:31). Jonatán nor piuquengefui ca nor piuqueyefi ta Jehová, feimu ütrirlafi ta David. Quimniefui Jehová ñi reycünufiel ta David, feimu quelluntucufi. Lladcüafui rume ta Saúl, Jonatán elcünutulafi ta David (1 Sam. 20:32-34). Jonatán piuqueyefi ta David, feimu ütrircalafi. Jonatán llicachequelafui ca pepiluhun hueichafengefui. Feipingequefui Saúl Jonatán engu doi matun-ngefui aguila mu ca doi nehuen-ngefui leon mu (2 Sam. 1:22, 23). Feimu Jonatán checahuafui com tañi femün. Huelu femlai. Hunencaulai David mu ca ütrircalafi rume ta David com tañi femün. Doi mai Jonatán falintuquefi David ñi llicaquenon ca ñi piuqueyefiel Jehová. Jonatán ütrirlafi ta David langümfilu ta Goliat, doi mai cüme hueniyeutuingu. w21.01 pag. 21 parr. 6; pag. 22 parr. 8, 9

Com pu cristiano mu loncolei ta Jesús, fei turpu huelulcaquelai. Huelu fütangen mu quiñe domo, tañi füta loncolei quisu mu. Tañi füta huelulcaquei. Feimu cüdaungeafui quiñeque mu. Quiñe lamngen deu peniele ñi ayün, ramtuhuafui: “¿Chem pengeleneu ñi cüme loncolerpual iñche mu? ¿Doi falintuquepefi mai ñi cüdahuelafiel ta Jehová? Femnole, ¿rüf quellupeafeneu mai ñi cüme hueniyenieafiel ta Jehová deu nieuliyu?”. Ca femngechi ti lamngen mülefui ñi ngüneduamuhual ñi chumngen, fei ramtuhuafui: “¿Chem mu quelluntucuafun ñi cümelcaleal tayu curehuen-ngen? ¿Niequepen mai ta paciencia? ¿Duamchefengepen mai? ¿Eluucülepen mai ñi fürenecheal? ¿Cüme hueniyeupen mai Jehová mu?” (Ecl. 4:9, 12). Cüme dullile petu ñi fütangenon, cüme triparpuai ñi curehuen-ngen. Millonque pu lamngen eluuquei ñi adnieaeteu tañi füta. Feimu inayentufali ca saquifalingün. w21.02 pag. 8 parr. 1, 2

Famülque mu fentren peñi ca lamngen eluuqueingün ñi quimal caque quehun dungu tañi doi amuldungucheal engün. Feimu elcünuqueingün tañi trahunche, fei mülenagpuqueingün ca trahunche mu (Hech. 16:9). Caque quiñeque engün dullingün femal tüfa ñi doi cüme cüdahuelafiel ta Jehová. Fentren tripantu rupayafui ñi adümürpuafiel ti hue quehun dungu, huelu rume quelluquefingün ti trahunche. Tañi cüme piuquengen mu ca tañi cümeque ngülam mu, yafültucuquefingün pu peñi ca pu lamngen. ¡Rume falintufali engün! Quiñe peñi müte quimnole ti hue quehun dungu, pu loncolelu raquiduamlayafui ñi pepicaucülenon tañi loncolerpual cam siervo ministerialngerpual. Doi mai ngüneduamaingün Biblia ñi chem pilen, femngechi quimaingün ñi pepicaucülen cam ñi pepicaucülenon. Ngelai ñi ngüneduamngeal tunte ñi quimürpufiel ti hue quehun dungu (1 Tim. 3:1-10, 12, 13; Tito 1:5-9). w20.08 pag. 30 parr. 15, 16

Fentren che raquiduamquei: “Fentren plata nieli, cüme feleli ca ayüucülele tañi pu che, fei müten ayüucüleafun” piquei. Huelu Santiago ñi feipielchi ayühun Chau Jehová mu cüpai. Feimu chem dungu rume rupafule taiñ mongen mu, ayüucüleafuiñ (Gál. 5:22, TNM). Feimu ayühulfiliyiñ ta Jehová ca inaniefiliyiñ ta Jesús, rüf ayüucüleafuiñ (Luc. 6:22, 23; Col. 1:10-12). Taiñ ayühun trürümngeafui ta quiñe alofcülechi fela mülelu quiñe farol mu, feimu ti mahun ca ti cürüf no rume chongümlayafeyu. Fei ca femngechi chem dungu no rume catrütulayafeiñmu ta iñchiñ taiñ ayüucüleal. Cutrancüleafuiñ, nielayafuiñ plata, illamcangeafuiñ, caiñetuafeiñmu taiñ pu che cam caquelu pu che. Rupafule rume com tüfa, ayüucüleaiñ. Fei doi caiñetungeliyiñ, doi ayüucüleaiñ. Com feichi huesaque dungu taiñ chaftufiel quimfalcülei taiñ rüf cristianongen (Mat. 10:22; 24:9; Juan 15:20). Feimu Santiago feipi taiñ peelchi texto fachantü. w21.02 pag. 28 parr. 6

Papeltufiel mu iñchiñ ta Biblia, pequeiñ quiñeque texto taiñ tüngduameleteu ca quelluqueteu maneluhual Jehová mu, fei loncontucunieafiyiñ. ¿Chem quelluafeiñmu taiñ loncontucunieafiel? Nehuentu dungun mu papeltuafuiñ feichi versiculo ca huirintucuafuiñ taiñ huiño papeltuafiel. Josué feipingei ñi papeltuafiel ti ley dungu ñochi dungun mu, fei ñi quim chengerpual. Feitachi ley dungu ca quellueyu ñi llicanoal, fei ñi cüme adnieafiel tati pu israelita (Jos. 1:8, 9). Biblia ñi feipin quelluafeiñmu taiñ tüngcüleal rupaliyiñ rume huesaque dungu mu (Sal. 27:1-3; Prov. 3:25, 26). Trahun mu iñchiñ quelluqueiñmu fillque hueupin, pu trahulelu ñi huiñoldungun ca taiñ nütramcahun pu peñi ca pu lamngen iñchiñ (Heb. 10:24, 25). Cafei nütramcayafuiñ taiñ pu hueni chem taiñ raquiduamelnieteu, femngechi yafülduamngequeiñ. w21.01 pag. 6 parr. 15, 16

Fautizangelu eimi, pengelimi fente tami maneluuquen Jehová mu, fei ayühun-ngechi llohueimu Jehová tañi familia mu. Feula maneluucüleaimi Jehová mu. Fütraque dungu dullin mu eimi, doi eluucüleafuimi chi tami maneluhual Jehová mu. Huelu dullilmi chem dungu rume tami femal, maneluhuaimi Chau Jehová meu. Por ejemplo, dullilmi chem cüdau tami nieal, chumngechi tami cüme rupaleal ca chem chumal tami mongen mu, maneluhuaimi Chau Jehová mu. Maneluuquilnge tami quisu quimün müten. Doi mai quintuaimi ngülam Biblia meu, fei inayafimi (Prov. 3:5, 6). Femülmi tüfa, ayühulafimi Jehová ca yamniengeaimi trahunche mu. Com iñchiñ reque, eimi ca culpanchengeimi, feimu huelulcayaimi quiñeque mu. Huelu tüfa catrütulayaimu tami cüdahuelafiel ta Jehová com tami nehuen mu. w21.03 pag. 5, 6 parr. 14, 15

Quiñeque ta iñchiñ, taiñ familia cüpa catrütuqueiñmu taiñ poyenoafiel ta Jehová. Cam ti pais mu cheu taiñ mülen, müte elungequelaiñ taiñ amuldungual cam catrütungequeiñ cütu. Femngechi dungu rupaliyiñ, müna yafültucuaiñmu ngüneduamal quiñeque dungu ñi huirintucuel ti apostol Pablo petu carcelconcülelu (2 Tim. 1:12-16; 4:6-11, 17-22). Petu taiñ papeltunofiel Pablo ñi feipin, llellipun mu feipiafuiñ ta Jehová taiñ huesa rupamequen ca taiñ chum duamcülen. Cafei llellipuafuiñ taiñ quelluaeteu peal cümeque ngülam, femngechi taiñ quimal chem chumal. Cuifi mu, Jehová feipicünufi ta Pablo ñi inacangeal tañi cristianongen mu (Hech. 21:11-13). Huelu Jehová, ¿chumngechi quellufi ta Pablo? Jehová nehuentucufi ca fillque dungu femi ñi pengelelafiel ta Pablo ñi allcütufiel tañi llellipun. Jehová feipifi ta Pablo ñi cullingeal reque fente ñi cüdahun mu. Ca femngechi Jehová adcünufi Pablo ñi pu hueni ñi quelluafiel ta Pablo. w21.03 pag. 17 parr. 14; pag. 18 parr. 15, 19