Agosto

Mülei taiñ hueniyeafiel ta Jesús, femngechi taiñ montulngeal. Jesús feipi “tañi hulal quisu ñi mongen cütu ñi hueni meu” (Juan 15:13). Fütra cuifi mu, petu ñi cüpanon Jesús, quiñeque che poyequefingün ta Jehová, huelu quimürpulafingün ta Jesús. Com engün huiñomongetuaingün, fei mülei tañi quimürpual ta Jesús ca hueniyeafiel, femngechi tañi elungeal ti rumel mongen (Juan 17:3; Hech. 24:15; Heb. 11:8-12, 24-26, 31). Amuldunguchequeiñ Chau Ngünechen tañi cümeque dungu, femngechi chaf cüdauqueiñ reque Jesús iñchiñ. Feimu ayüucüleiñ. Jesús mülepalu Mapu mu, quimeltufi tati pu che. Mülepui huenu mapu mu, fei loncolerpui Ngünechen tañi troquiñche mu. Feimu adniefi ti amuldungun cüdau. Jesús falintuquefi taiñ nehuentu cüdaumequen ñi quimeltucheal. Huelu taiñ femürpual tüfachi cüdau, duamnieiñ taiñ quelluaeteu Jehová ca Jesús (Juan 15:4). w20.04 pag. 22 parr. 7, 8

Cuifi mu, mülequefui quiñe lonco ülmen norte püle Israel mu, fei tati rey del norte ngequefui. Ca mülequefui quiñe lonco ülmen sur püle Israel mu, fei tati rey del sur ngequefui (Dan. 10:14). Cuifi mu, pu israelche Jehová ñi troquiñchengefui. Huelu 33 tripantu mu, Jesús ñi pu discipulo Jehová tañi troquiñchengerpuingün. Feimu epe com chi dungu ñi feipiel Daniel capitulo 11, huechurpui Jesús tañi pu discipulo meu (Hech. 2:1-4; Rom. 9:6-8; Gál. 6:15, 16). Amulerpulu chi tripantu, fillque lonco ülmen tati rey del norte ca tati rey del sur ngerpuingün. Com tüfachi pu lonco ülmen trüringün quiñeque dungu meu, ¿chem dungu meu chi? 1) Tüfachi pu gobierno cutrancafi Jehová tañi pu che ca ngüneniequei cheu ñi mülen engün. 2) Tüfachi pu gobierno ñi cutrancafiel Jehová tañi pu che pengelingün ñi üdequefiel ta Jehová. 3) Tüfachi pu lonco ülmen hueluquentu notucauqueingün ñi hunencüleal. w20.05 pag. 3 parr. 3, 4

Jehová chumquei rume ñi femürpual tañi ayüqueel. Jehová ca femngechi adniequefi tañi pu che ñi femal chem rume, femngechi ñi femürpual tañi ayüqueel (Is. 64:8). Inei rume catrütulayafi Jehová ñi femal tañi ayüqueel (Is. 46:10, 11). Raquiduamaiñ com ñi femqueel ta Jehová ca com taiñ femürpun quisu tañi quellun mu, femngechi doi yamnieafiyiñ taiñ Fütra Chau Jehová. Raquiduamliyiñ com tañi deumael ta Jehová, afmatulehuequeiñ (Sal. 8:3, 4). Ca femngechi raquiduamliyiñ chumngechi taiñ quellueteu Jehová ñi femal tañi ayüqueel, doi yamnieafiyiñ. Jehová tañi üi yamfali llemai. Feitachi üi pengelqueiñmu ñi chumngen ta Jehová, com tañi femün, com tañi femürpual (Sal. 89:7, 8). w20.06 pag. 9, 10 parr. 6, 7

Iñchiñ ca tati pu culliñ duamnieiñ oxigeno taiñ mongeleal. Neyün mu iñchiñ, conquei oxigeno taiñ cuerpo mu, fei tripaquei dioxido de carbono. Cafei Jehová deumai fillque anümca, tüfa mu conquei dioxido de carbono ca tripaquei oxigeno. Femngechi turpu afquelai tati oxigeno ca taiñ Mapu apolequelai dioxido de carbono mu. Feimu rüfngei ñi feipin taiñ peelchi texto fachantü. ¿Chumafuiñ taiñ doi mañumtuafiel ta Jehová? Raquiduamaiñ itrocom ñi deumael, femngechi fill antü mañumafiyiñ ta Jehová com taiñ eluqueteu. Cafei cüme adelcanieafiyiñ ti mapu cheu taiñ mülen, femngechi pengelaiñ taiñ mañumtuquefiel ta Jehová. w20.05 pag. 22 parr. 5, 7

Huecüfü dalluntucufilu rume ta Jehová, Jehová pengelquei tañi quimün-ngen, ñi ñom piuquengen, ca ñi norngen, ca pengelquei fente ñi nehuen-ngen caquerume dungu mu. Doyelchi mai com tañi femqueel mu, Jehová pengelquei ñi rüf piuqueyechefengen (1 Juan 4:8). Jehová afquentu cüdauquei ñi yamniengeal tañi fütra üi. Huecüfü amulerpui ñi caiñetunierpufiel ta Jehová. Huecüfü huesa raquiduamelquefi ta che Jehová tañi quimün-ngenon, tañi nehuen-ngenon, tañi norngenon ca tañi piuqueyechequenon. Huecüfü raquiduamelquefi pu che taiñ deumanoeteu Jehová. Ca femngechi Huecüfü hueluraquiduamelquefi pu che feyentuquefulu rume Chau Dios mu, femngechi ñi raquiduamal engün Jehová tañi ngülam ñi rume cüdaungen ca tañi cümenon. Huecüfü ca quimelelquefi pu che Chau Dios ñi cutranpiuqueyechequenon ca lüpümcaquefi ta che quiñe cütral mu. Tati pu che feyentulu feitachi coilaque dungu mu eluuquelai ñi ngünenieaeteu Jehová. Petu ñi apümcangenon ta Huecüfü, chumai rume taiñ püntünentuaeteu Jehová mu, ¿cüme tripayai chi am? w20.06 pag. 5, 6 parr. 13-15

Fentren peñi ca lamngen eluuquei tañi adümürpual quiñe hue quehun dungu. Quiñeque engün cüdautuqueingün ñi adümürpuafiel. Huelu ngüneduammequelayafiyiñ müten tunte ñi cüdautuquefiel ti hue quehun. Doi mai ngüneduamafiyiñ tunte ñi piuqueyefiel ta Jehová engün ca tañi cüpa serfiquefiel. Femngechi com taiñ piuque mu falintuafiyiñ ca piuqueyeafiyiñ engün. Tunte quimnofule rume iñchiñ taiñ quehun dungu, turpu raquiduamlayaiñ ñi falin-ngenon cam ñi duamfalngenon engün (1 Cor. 12:21). Chau Jehová eluqueiñmu com caque quiñeque iñchiñ falinque cüdau ti trahunche mu, feimu müna mañumniefiyiñ. Huentrungeliyiñ, domongeliyiñ rume, curengeliyiñ cam fütangeliyiñ cam femnofuliyiñ rume, tremchengeliyiñ cam huechengeliyiñ rume, cam tunte adümnierpufiliyiñ quiñe quehun dungu, com iñchiñ falintuqueiñmu Jehová ca com iñchiñ falintuqueiñmu taiñ pu peñi ca taiñ pu lamngen (Rom. 12:4, 5; Col. 3:10). Eluhuaiñ taiñ doi cüme yafültucuafiel taiñ pu peñi ca pu lamngen. Cafei doi piuqueyeafiyiñ ca doi falintuafiyiñ engün. w20.08 pag. 31 parr. 20-22

Tati pu atenasche poyequefui coilaque dios, yeniequefui podngechi mongen ca inaquefui coilaque quimeltun. Cafei quiñeque engün lucatufingün ta Pablo, huelu quisu fentecünulai ñi amuldungulelafiel engün. ¿Chumngelu am? Petu ñi cristianongenon Pablo, cüme mongen yenielafui, feimu feipi: “Iñche rume huesa caiñetuquefuiñ ta Cristo ñi cüme dungu, inantucucaiñetuquefuiñ ca huesa lucatuquefuiñ” (1 Tim. 1:13). Pablo ayüquelafui rume Cristo ñi cüme dungu, huelu Jesús raquiduami ñi inayaeteu. Ca femngechi Pablo raquiduami tati pu atenasche ñi inanierpuafiel ta Jesús. ¡Felerquei mai! Rupachi antü mu, quiñeque atenasche cristianongerpuingün (Hech. 9:13-15). Pablo ñi antü mu, fentren pu che inaquefui ta Jesús, huesa mongen niequefule rume. Pablo feipi quiñeque cristiano mülelu Corinto huaria mu hueñefengefuingün cuifi ca rume podngechi mongen yeniequefuingün, huelu ca feipifi: “Femngechi chengequefuimün quiñequentu eimün ta cuifi meu, huelu feula deu liftungetuimün reque” (1 Cor. 6:9-11). Mülefulmi Pablo ñi antü meu, ¿raquiduampeafuimi mai feichi pu che ñi cristianongerpual? w20.04 pag. 12 parr. 15, 16

Famülque mu, quiñeque taiñ pu peñi ca pu lamngen raquiduamafui ñi ngünam serfimequefiel ta Jehová. Femngechi rupale, pu loncolelu ngelai ñi condenayafiel engün, doi mai ngüneduamquei chumngelu tañi femngechi raquiduamquen engün. Femngechi müten yafültucuafeyu Biblia mu. Raquiduamnge ñi rupan ta Elías. Quisu lefmahui Jezabel mu tañi langümnoaeteu (1 Rey. 19:1-3). Elías re ngünam cüdaulu troquihui. Müna huesa duamcülefui, feimu ayüfui tañi layal müten (1 Rey. 19:10). Jehová condenalafi ta Elías, doi mai “quisulelaimi” pifi. Cafei pengelelfi ta Elías tañi nieel fütra nehuen. Jehová allcütufi chem ñi mülen Elías tañi piuque mu ca doi cüdau elufi (1 Rey. 19:11-16, 18). Com iñchiñ, doyelchi mai pu loncolelu, mülei taiñ cutranpiuqueyeafiel taiñ pu peñi ca pu lamngen. Quiñeque taiñ pu peñi ca pu lamngen huesa duamcülequei ca “perdonapeafeneu Jehová” piquei. Entule chem mülen tañi piuque mu, pu loncolelu allcütuaeyu, fei pengelelafuingün fente ñi piuqueyenieteu Jehová. w20.06 pag. 22 parr. 13, 14

Jehová ayüquei taiñ cüme rupaleal taiñ pu hueni iñchiñ ca taiñ pu familia iñchiñ (Sal. 133:1). Jesús niequefui cümeque hueni (Juan 15:15). Biblia feipi cümei taiñ nieal cümeque hueni (Prov. 17:17; 18:24). Biblia ca feipieiñmu taiñ huichunentuunoal (Prov. 18:1). Fentren che feipiquei tati redes sociales quelluqueyu ñi alüque nieal ta hueni, femngechi tañi quisulelu troquiunoal. Huelu adümfiliyiñ tati redes sociales, cuñiutucuhuaiñ. Pu che tucuquei redes sociales mu tañi doi cümeque foto, pengelquei fente ñi cüme rupan tañi pu hueni engün ca cheu tañi miyahun engün, ca caquelu falinque dungu ñi rupan tañi mongen mu. Pu che rume adquintufile feitachi adentun, “iñche ñi mongen mu ngelai ayühun” piafui, fei quisulelu troquihuafui ca huesa duamnagafui. w20.07 pag. 6 parr. 12, 13

Cuifi ti revista La Atalaya feipi: “Pu loncolelu quimniei Cristo raquiduamelafui chem loncolelu rume quiñe ngülam Biblia mu tripalu, femngechi quimafuingün chem tañi femal engün (Hech. 15:7-15). Chau Dios tañi nehuen quelluquelafi quiñe loncolelu müten, com quelluquefi engün” (La Atalaya tripalu 1 conchi octubre 1988 tripantu). Trahun mu pu loncolelu, ¿chumngechi pengelafui tañi hueluconque falintuuquen? Pu loncolelu ngelai tañi quimcahual ñi nütramal quisu ñi raquiduam müten. Ca “iñche ñi feipin müten femngepe” piquelai tañi raquiduam mu. Pu loncolelu ñom piuque mu feipiquei tañi raquiduam ca cüme allcütuquefi caquelu tañi pu chaf loncolelu. Ca femngechi pu loncolelu doi mülei ñi inayal Biblia ñi ngülam ca ñi feipin ti “quim manelfal cona”, esclavo fiel y prudente pingelu (Mat. 24:45-47, TNM). Pu loncolelu falintuule ca yamuule, Chau Dios ñi nehuen quelluaeyu tañi cüme dullial tañi chem chumal engün (Sant. 3:17, 18). w20.08 pag. 27 parr. 5, 6

Ti apostol Pablo caiñetueyu rume falinque che. Quisu engün fentren rupa hulelcafingün ca carceltucufingün ta Pablo. Pablo caiñetueyu quiñeque che tañi femnoafeteu, quenü quiñeque peñi ca lamngen caiñetueyu (2 Cor. 12:11; Filip. 3:18). Caiñetungelu rume, Pablo amulerpui ñi amuldungumequen. Huesa duamelngelu rume, Pablo piuqueyeniefi tañi pu peñi ca tañi pu lamngen. Doyelchi mai Pablo serfiniefi ta Jehová tunte puulu tañi mongen (2 Tim. 4:8). ¿Chem quellueyu tañi femngechi femal? Maneluulai quisu tañi nehuen mu, doi mai maneluhui Jehová mu tañi nehuentucuaeteu. ¿Eimi cai? ¿Caiñetuquepeimu mai pu che? Caiñetueliyiñmu pu che, huesalcalayafiyiñ. Doi mai quelluafiyiñ engün ñi quimafiel ta Jehová ca tati Biblia. ¿Chumngechi femürpuafuiñ? Pengelelafuiñ Biblia ta che taiñ huiñoldunguafiel engün. Pu che caiñetueliyiñmu rume, pengelelafiyiñ taiñ piuqueyeniefiel ca yamniefiel. Chumeliyiñmu rume tati pu che, com cümelcayafiyiñ engün (Mat. 5:44; 1 Ped. 3:15-17). w20.07 pag. 17, 18 parr. 14, 15

Jehová ñom piuquengei, feimu David feipi: “Tami ñom piuquengen meu falin chengetun” (Sal. 18:35). David huirintuculu tüfa, raquiduampelafui feichi antü Samuel ñi pemefiel tañi chau ñi dulliafiel tati hue rey. David inalefui tañi regle peñi mu, huelu Jehová dullifi ta quisu ñi reyngerpual (1 Sam. 16:1, 10-13). Ti Salmo 113 feipi Jehová “pochongnagquei ñi adquintual tati huenu ca tati mapu, femngechi quelluquefi pu ñom che trañmalelu reque trufür mapu mu” (Sal. 113:6-8). Jehová falintuquei taiñ serfiniequefiel culpafechengeliyiñ rume ca hueniyequeiñmu. Femngechi pengelquei tañi ñom piuquengen (Sal. 25:14). Jehová huli tañi saquin Fotüm taiñ perdonayaeteu taiñ culpan, femngechi taiñ hueniyeaeteu. ¡Jehová rume cutranpiuqueyechequei! w20.08 pag. 8 parr. 1-3

Chau Jehová raquinieuyei chem antü apümafi com ñi ngünenieel tati Huecüfü (Mat. 24:36). Jehová rume ayüniei ñi huiñomongeltuafiel pu layelu. Huelu petu acunole ñi dullielchi antü, ayühunquechi esperanieai (Job 14:14, 15; Juan 5:28). Chau Jehová müna niei paciencia, elueiñmu iñchiñ ca fentren che ñi conal tañi troquiñche mu. Feimu rume mañumquefiyiñ. Chau Jehová ayüquei com che ñi nieal ta rumel mongen. Feimu quintuafiyiñ “com pu eluulu ñi rumel mongeleal” ca quelluafiyiñ ñi piuqueyerpuafiel ta Jehová. Femliyiñ, mañumtuafiyiñ Jehová tañi nien ta paciencia (Hech. 13:48, TNM). Feitachi pu che ca montuluhuafuingün Jehová tañi paciencia mu. w20.08 pag. 18 parr. 17 

Tunte ñi quimürpuqueel ti pu estudiaquelu Biblia mülei ñi puhual tañi piuque mu, femngechi inayafi tañi mongen mu. Jesús ñi antü mu, ca femquefui che. Tañi piuque mu engün puhui ñi chem enseñaleteu ta Jesús, feimu inanierpufingün (Luc. 24:15, 27, 32). Ti estudiaquelu Biblia mülei ñi ngüneduamal rüf tañi duamnieteu Jehová, feimu hueniyerpuafui ca cüme Chau troquiafi engün (Sal. 25:4, 5). Petu enseñalfiliyiñ ta che, quelluafiyiñ ñi ngüneduamal ñi chumngen ta Jehová, ñi piuqueyechequen, ñi fürenechequen ca ñi cutrantupiuqueyechequen (Éx. 34:5, 6; 1 Ped. 5:6, 7). Jesús feipi “tati hunen huercün dungu ca doi falilu com huercün dungu meu”, fei taiñ piuqueyeafiel ta Jehová com taiñ piuque meu (Mat. 22:37, 38). Feimu quelluafiyiñ tati estudiaquelu Biblia ñi piuqueyerpuafiel ta Chau Jehová. w20.10 pag. 9 parr. 12

Jesús yamniequefui com pu domo (Juan 4:27). Doi falintuquefui pu domo femlu tañi Chau ñi ayüqueel, ñi lamngen ca müten troquiquefi engün. Jesús trür femngechi falintuniequefui pu huentru ca pu domo femquelu Jehová tañi ayüqueel (Mat. 12:50). Jesús mülequefui pu lamngen engün ca rüf hueniyequefi engün. Raquiduamaiñ fente ñi hueniyefiel Jesús Marta ca María, tüfachi epu domo fütangelafuingu chi (Luc. 10:38-42). Tañi feipin mu ca tañi femün mu, Jesús cüme duamelquefui Marta ca María. Ngeno llican mu María anücünuhui ñi allcütuafiel ta Jesús. Ca femngechi Marta ngeno llican mu feipifi ta Jesús chem tañi raquiduamcülen. Feichi mu Jesús quimeltulelfi engu falinque dungu. Ca femngechi Jesús fentrenque rupa pemequefi tüfachi epu domo ca tañi huentru lamngen Lázaro pingelu, femngechi pengeli fente ñi duamniefiel engün (Juan 12:1-3). Feimu cutranlu Lázaro, Marta ca María huercüingu tañi feipimengeal ta Jesús tañi quellupayaeteu engün (Juan 11:3). w20.09 pag. 20 parr. 3; pag. 21 parr. 6

Jesús tañi pu inanieteu ayüniefuingün ñi pürüm lifrenentuaeteu Chau Dios tañi Gobierno, fei ñi ngünenienoaeteu pu romano. Iñchiñ rume ayünieiñ ñi acual Chau Dios tañi Gobierno, fei ñi apümafiel com huesaque dungu, fei re cümeque che mületuai (2 Ped. 3:13). Huelu petu acunole Jehová ñi dullielchi antü, mülei taiñ nieal ta paciencia taiñ esperayal. Jehová quimeltueiñmu chumngechi taiñ nieal ta paciencia. Jehová elufi tiempo ta Noé ñi deumayal ti fütra huampo ruca ca ñi amuldungucheal (1 Ped. 3:20; 2 Ped. 2:5). Rupachi fentren tripantu, Jehová raquiduamcülei ñi apümcayafiel ti huesaque huaria Sodoma ca Gomorra. Huelu Abrahán ramtucamequefi ta Jehová ñi cümepen mai ñi femngechi femal, feimu Jehová ñochi allcütueyu (Gén. 18:20-33). Fentren tripantu, Jehová perdonafi tati pu israelche, femngechi pengeli ñi nien ta paciencia (Neh. 9:30, 31). ¿Famülque mu cai? Jehová eluquefi tiempo tati pu che ñi norümtual tañi mongen, fei ñi hueniyeaeteu (Juan 6:44; 1 Tim. 2:3, 4; 2 Ped. 3:9). Ca femngechi iñchiñ Jehová reque, mülei taiñ nieal ta paciencia amuldungun mu. w20.09 pag. 10 parr. 8, 9

Huiñomongetule ta che, Jehová elutuaeyu chem tañi raquiduam niequefel ca tañi chumngechi chengequefel petu tañi lanon. ¿Chem quimeltuqueiñmu tüfa? Jehová ngüneduamquei ca loncontucuquei com taiñ raquiduamqueel, com taiñ feipiqueel ca com taiñ femqueel. Feimu lafuliyiñ, Jehová huiñomongeltuafeiñmu. Fei cüdautulayafui taiñ elutuaeteu taiñ chumngechi chengequefel. David quimniefui fente taiñ quimnieteu Jehová caque quiñeque iñchiñ (Sal. 139:1-4). Inaduamün mu tami cüme quimnieteu Jehová, ¿chumquei tami piuque? Felei llemai, Jehová rume cüme quimnieiñmu caque quiñeque iñchiñ. Huelu raquinieñmaquelaiñmu com taiñ huesa femqueel. Huelu mai, Jehová müna piuqueyenieiñmu caque quiñeque iñchiñ ca falintuqueiñmu chumngefuliyiñ rume. Jehová quimniei com taiñ rupan taiñ mongen, feimu quimniei taiñ femngen. Taiñ quimfiel tüfa, rume cüme duamelqueiñmu. Chumcaunorume quisulelu troquiulayaiñ. Jehová fill antü afcadinieiñmu ca quintuyahulquei reque chumngechi taiñ quelluaeteu (2 Crón. 16:9). w20.08 pag. 17 parr. 13, 14

Jehová rume ayüniei ñi quimeltuafiel tañi pu che (Sal. 32:8). Ayüniei tañi pu che ñi quimaeteu ca piuqueyeaeteu ca ñi rumel mongeleal engün, feimu quimeltulelquefi (Juan 17:3). Cuifi mu, Jehová elcünui tati hunen trahunche ñi enseñayafiel tañi pu che (Col. 1:9, 10). Chau Jehová tañi nehuen quellufi feitachi pu hunenque cristiano chumngechi ñi feipicünuel Jesús (Juan 14:16, 17). Chau Dios ñi nehuen quellufi tati pu hunenque cristiano ñi adümal Chau Dios ñi dungu ca acordalelfi ñi feipin ca ñi femün ta Jesús. Feimu tüfachi pu cristiano doi piuqueyerpufingün ta Jehová ca Jesús, doi maneluhurpuingün ca hueluconquechi doi piuqueyehurpuingün. Jehová feipicünui pichilehuechi antü mu fentren che ñi puhual tañi fütra huincul mu. Tüfa feipilei fentren che ñi conpual tañi troquiñche meu (Is. 2:2, 3). w20.10 pag. 24 parr. 14, 15

Quiñeque che tañi mallmangen mu lloulai ñi ngülamtueteu tañi pu cümeque hueni. Ti pu mallmangelu ayüquei ñi allcütual quisu tañi ayüel müten, tüfa engün ‘quiñepülecünufi tati rüf dungu’ (2 Tim. 4:3, 4). Pu mallmangelu quimcauqueingün, feimu duamnolu ñi ngülamngeal troquiuqueingün. Huelu ti apostol Pablo huirintucui: “Inei rume quimcahunchengele, huelu rüf feingenole ñi felen, quisutu ta ngünencaucülei” (Gál. 6:3). Salomón cüme quimeltui tüfachi dungu, feipi: “Quiñe pofre pichi huentru quimchengelu doi cüme felei ta quiñe füchalechi rey huedhuedngelu, pinolu cai ñi ngülamtungeal” (Ecl. 4:13). Raquiduamnge chum duami Pedro ngülamtungelu (Gál. 2:11-14). Pablo nehuentu ngülamtufi ta Pedro rangi trahunche mu, feimu Pedro illcupeafui mai. Huelu Pedro quimchengefui, feimu illcutunielafi ta Pablo ca cüme llohui ti ngülam. Rupachi antü mu, “iñchiñ taiñ saquin peñi” pifi ta Pablo (2 Ped. 3:15). w20.11 pag. 21 parr. 9, 11, 12

Pu estudiaquelu rume quelluaeyu ñi amual taiñ trahun mu, fei doi nieai quimün, doi maneluhuai Jehová mu ca doi piuqueyerpuafi (Hech. 15:30-32). Cafei quiñe peñi cam lamngen feipiafeyu ñi rume piuqueyerpufiel ta Jehová, feimu eluhui ñi inayafiel Jehová ñi ngülam (2 Cor. 7:1). Pu estudiaquelu Biblia ngüneduamfiel mu ñi cüme femquen pu peñi ca pu lamngen, doi quimürpuquei chumngechi ñi piuqueyeafiel ta Chau Dios ca tati pu che (Juan 13:35; 1 Tim. 4:12). Cafei pu estudiaquelu Biblia rume cümelcayafeyu ñi quimafiel pu peñi ca pu lamngen ca femngechi dungu meu rupalu. Feimu “iñche ca femngechi femafun ñi poyeafiel ta Jehová” piafuingün (Deut. 30:11). Caque quiñeque iñchiñ quelluafuiñ pu estudiaquelu Biblia ñi doi hueniyerpuafiel ta Jehová (Mat. 5:16). w20.11 pag. 5 parr. 10-12

Feipilu tüfa ti apostol Pablo, raquiduampelafui feichi pu judio tañi caiñetuqueteu cam caquelu che mu tañi huesa femeteu (Hech. 19:26-34; 1 Cor. 16:9). Ñi feipin Pablo ca rulpadungungeafui: “Quehuaquefun aucan culliñ Éfeso meu”. Feimu Pablo cüpa feipifui chi tañi rüf hueichaquefiel auca culliñ (2 Cor. 1:8; 4:10; 11:23). Chumngepe rume, rüf quimnieiñ Pablo ñi chaftufiel fütraque dungu, huelu maneluucülefui ñi cüme mongen nieal cüpalechi antü mu (1 Cor. 15:30, 31; 2 Cor. 4:16-18). Famülque mu, müleiñ cuñihun-ngechi antü mu. Quiñeque taiñ pu peñi ca pu lamngen huesaque dungu femngei. Quiñeque peñi, lamngen cheu ñi mülen engün mülei hueichan, fei rume llicalequeigün. Caquelu pais mu catrütungequei taiñ amuldungual. Huelu taiñ pu peñi, pu lamngen femqueingün müten carceltucungeafui rume cam langümngeafui rume. Com feitachi pu peñi ca pu lamngen taiñ nütramcapeel, amuleingün ñi poyefiel ta Jehová, feimu inayentufalingün. Com engün maneluuquei latripafule engün, Chau Jehová huiñomongeltuafeyu engün cüpalechi antü mu. w20.12 pag. 9 parr. 3, 4

Amuldungun mu cüme llounoeliyiñmu pu che cam müte ngenole tañi ruca mu, huesa duamafuiñ. Huelu, ¿chumafuiñ taiñ yafüluucüleal ca doi ayüucüleal? Cüme raquiduamnieafiyiñ taiñ amuldungun. ¿Chumafuiñ? Loncontucuaiñ taiñ amuldunguquen ñi quimngeal Chau Jehová tañi üi ca tañi Gobierno. Jesús cüme feipi pichin che müten tañi inayaeteu (Mat. 7:13, 14). Amuldunguliyiñ, Chau Jehová mülei ta iñchiñ mu ca Jesús ca tati pu cümeque püllü (Mat. 28:19, 20; Apoc. 14:6, 7). Jehová quintuniei che tañi cüpa serfieteu (Juan 6:44). Quiñeque che pilayafui taiñ allcütuaeteu quiñe rupa, huelu ca rupa hula allcütuafui. Quiñe lamngen, Débora pingelu, feipi: “Ti Huecüfü allmalltuquei taiñ huesa duamcülen mu, fei taiñ püntünentuaeteu Jehová mu”. Huelu Chau Jehová doi nehuen-ngei ta Huecüfü mu. w20.12 pag. 26 parr. 18, 19; pag. 27 parr. 21

Fentren peñi ca pu lamngen rume cüdauqueingün ñi eluafiel com tañi duamnieel tañi familia, huelu fillque dungu mu quelluntucuqueingün Jehová tañi cüdau. Quiñeque quelluconqueingün rupayüm nüyün, mangiñ, lüfcon ca fillque dungu. Caquelu cüdauquei deumarucan mu. Ca com iñchiñ quelluntucuafuiñ plata mu. Tüfachi pu peñi ca pu lamngen femqueingün tañi piuqueyefiel mu ta Jehová ca tati pu che. Fillque semana amuqueiñ trahun mu ca huiñoldunguqueiñ tüfa mu. Femngechi pengelqueiñ taiñ piuqueyefiel taiñ pu peñi ca pu lamngen. Cansaleiñ rume, amuqueiñ ta trahun mu. Müllmüllcüleiñ rume, huiñoldunguqueiñ. Rupamequeiñ rume huesaque dungu mu, yafüluuqueiñ puhuiyüm trahun mu. Ca yafüluuqueiñ afiyüm taiñ trahun (Heb. 10:24, 25). Rume mañumcüleiñ tañi cüme cüdauquen taiñ pu peñi ca pu lamngen. w21.01 pag. 10 parr. 11

Pu mallma piuquengelu cüdautuquei ñi saquiafiel ta caquelu che, ayünieingün quisu müten ñi saquingeal. Quisu engün trürümuuquei caquelu che mu ca ayünieingün ñi huneleal. Pu mallma piuquengelu, quisu müten cüme femalu ti cüdau troquiuqueingün. Feimu eluquelafingün cüdau ta caquelu che ca quimeltuquelafingün rume chumngechi tañi femal. Cafei quisutu mallmauqueingün ca ütrirchefengeingün. Inaduamuuliyiñ taiñ mallmangen, pürüm ngillatuafiyiñ ta Jehová taiñ foliluunoal feitachi huesaque raquiduam taiñ piuque mu (Rom. 12:2). Rume mañumquefiyiñ ta Jehová tañi ñom piuquengen mu (Sal. 18:35). Jehová pengelquei ñom piuquengen chumngechi tañi troquiquefiel tañi pu hueni. Iñchiñ ayüqueiñ taiñ inayentuafiel. Cafei cüpa inayentuquefiyiñ tati pu ñom che serfiquefilu ta Jehová cuifi. Fampüramnieafiyiñ ta Jehová, quisu müten mülefui taiñ femafiel (Apoc. 4:11). w20.08 pag. 13 parr. 19, 20

Chau Jehová eli pu curehuen ñi ayüucüleal, huelu ti huentru ca ti domo mür huelulcaqueingu tañi culpanchengen mu (1 Juan 1:8). Feimu Biblia feipifi pu curehuen ñi rupayal cüdaungechi dungu mu. Ti huentru mülei ñi cüme duamelafiel tañi pu che, eluafiel com tañi duamnieel ca mülei ñi quelluafiel engün ñi fülcüleal ta Jehová mu (1 Tim. 5:8). Huelu taiñ pu lamngen mülei ñi püntülal antü ñi papeltuafiel Biblia ca raquiduamnieafiel ca ñi llellipuafiel ta Jehová com piuque mu. Tüfa cüdaungeafui. Taiñ pu lamngen niei fentren cüdau. Huelu Chau Jehová ayüniei caque quiñeque iñchiñ taiñ cüme hueniyeafiel. Feimu cüdaungefule rume, taiñ pu lamngen ca mülei ñi femal (Hech. 17:27). Rüfngei, taiñ pu lamngen mülei ñi yamafiel tañi füta ca eluhual tañi adnieaeteu. Huelu quiñeque mu cüdaungeafui. ¿Chem quelluafeyu? Mülei ñi quimtucunieal ca piuquentucunieal chumngelu Chau Dios elcünui pu huentru ñi loncoleal tañi domo mu. w21.02 pag. 8 parr. 3; pag. 9 parr. 6, 7

Fillque huesaque dungu taiñ rupamequen trürümngeafui tati cütral cofilquefilu quiñe pañillhue espada, fei fircüle hula doi nehuen-ngeai ti espada. Ca femngechi iñchiñ rupan mu huesaque dungu, doi maneluhuaiñ Jehová mu. Feimu Santiago feipi: “Fentecünuquilmün tamün nehuencülen, femngechi cüme pepicaucüleaimün. Com dungu meu cümelcaleaimün” (Sant. 1:4, TNM). Ngüneduamfiel mu tüfa, ayühunquechi chaftuquefiyiñ ti huesaque dungu. Santiago ca huirintucui chem dungu catrütuafeiñmu taiñ ayüucüleal. Quiñe dungu: Quimnon mu taiñ chem chumal. Rupan mu huesaque dungu, ayünieiñ taiñ cüme dullial chem taiñ chumal. Femngechi taiñ ayühulafiel ta Jehová ca taiñ yafültucuafiel taiñ pu peñi ca pu lamngen. Cafei ayünieiñ taiñ cüme dullial, fei taiñ nor piuqueyeafiel ta Jehová (Jer. 10:23). Caiñetungeliyiñ duamnieaiñ ta quimün, femngechi taiñ quimal chem chumal ca chem feipial. Quimnoliyiñ chem taiñ chumal, quisulelu troquihuafuiñ ca pürüm müten ayüucülelayafuiñ. w21.02 pag. 28 parr. 7-9

Chau Jehová enseñalqueiñmu chumngechi taiñ femal. Feita fütra piuqueyenieiñmu. Famtripanoliyiñ quisu mu, fentecünulayai taiñ piuqueyeteu (Rom. 8:38, 39). Ti versiculo feipi taiñ piuqueyehual com taiñ nehuen meu. Tüfa pengeli taiñ rume cüdahual taiñ femal. Quiñeque mu taiñ pu peñi, pu lamngen huesa duamelafeiñmu, feimu cüdaungeafui taiñ piuqueyeafiel. Femngechi dungu mu rupaliyiñ, mülei taiñ hueluconque nieluhual paciencia, femngechi quelluntucuaiñ taiñ quiñeucüleal ca tüngcüleal (Efes. 4:1-3). Ngüneduamnielayafiyiñ tañi huelulcan pu peñi ca pu lamngen. Doi mai falintuafiyiñ engün chumngechi ñi femquen ta Jehová (1 Sam. 16:7; Sal. 130:3). Quiñeque mu, nüngayelafeiñmu ñi feipin ca ñi femün quiñeque peñi, quiñeque lamngen, feimu cüdautuafuiñ taiñ rüf piuqueyeafiel engün. Ti pu hunenque cristiano femngechi dungu mu rupai. Evodia ca Síntique quellufingu ta Pablo ñi amuldungual ti cümeque dungu, huelu quisu engu müte tuteuquelafuingu. Feimu ti apostol Pablo ngülamtueyu tañi cümelcautual engu (Filip. 4:2, 3). w21.01 pag. 22 parr. 10, 11

Pu peñi ca pu lamngen falintuquefi pu huecheque peñi. Ayüuqueingün ñi poyeafiel ta Jehová “quiñeucülen mu” (Sof. 3:9). Eimi hueche, com tami nehuen mu femqueimi tami elfalngeel, feimu falintungeimi tami trahunche mu. Felei llemai, manelfalngeimi ca yamniengeimi. Eimün pu huecheque peñi, Jehová piuqueyenieimu ca maneluucülei eimün meu. Jehová feipicünui ñi müleal fentren huechequeche ñi cüdahuelaeteu epe afchi antü meu (Sal. 110:1-3). Jehová quimniei tami piuqueyeniefiel ca tami cüpa cüdahuelfiel com tami nehuen mu. Fei, ¿chem quelluafeimu cai? Quisutu nieluhuaimi paciencia ca femaimi caquelu che mu. Huelulcahulmi, inaniefinge tami ngülamtueteu, Jehová mu cüpachi ngülam troquiafimi (Heb. 12:6). Elfalcünungelmi chem cüdau rume, eluunge tami cüme cüdahual. Doyelchi mai, com tami mongen mu ayühulafimi tami Chau Jehová (Prov. 27:11). w21.03 pag. 7 parr. 17, 18

Fentren dungu huesa duamelqueiñmu. Fentren rupa huelulcaqueiñ, pepi femquelaiñ com taiñ ayüquefel cam cutrancüleiñ chi, feimu huesa duamcüleafuiñ. Ca huesa duamafuiñ llounoliyiñ quiñeque elfal cüdau trahunche mu ca cüme lloungenoliyiñ taiñ amuldungun. Taiñ chengen mu huesa duamqueiñ taiñ huelulcaquen mu. Cafei raquiduamafuiñ: “Tañi huelulcaquen mu, Jehová elulayaeneu müleal ti hue Mapu mu” piafuiñ. Tüfachi raquiduam cuñihun-ngei. Doi cümeafui taiñ loncontucunieal Biblia feipi ‘itrocom che ta culpai’ (Rom. 3:23). Jehová ngüneduamniequelai taiñ culpan müten, ca “turpu huelulcaquilmün” piquelaeiñmu rume. Doi mai taiñ cüme Chau Jehová rume piuqueyeiñmu ca ayülei taiñ quelluaeteu, cafei paciencia nieiñmu. Jehová quimniei taiñ cüdautuquen taiñ cüme femal ca taiñ huesa duamelqueteu tüfa, feimu eluucülei taiñ quelluaeteu (Rom. 7:18, 19). w20.12 pag. 22 parr. 1-3

Com iñchiñ rume cüdauqueiñ taiñ poyeafiel ta Jehová, femngechi taiñ müleal ti cüme mülehue mu taiñ eluaeteu. Fill antü eluuqueiñ taiñ amual tüfachi rüpü mu taiñ eluaeteu ta rumel mongen. Huelu Jesús ta feipi tüfachi rüpü pichi rupai ca müna cüdaungei ñi inangeal (Mat. 7:13, 14). Com iñchiñ culpafe chengeiñ, feimu cüdaungelai taiñ elcünutual tüfachi cüme rüpü (Gál. 6:1). Taiñ amuleal ti cüme rüpü mu, mülei taiñ cüme elcünutual taiñ raquiduam, chem taiñ ayüqueel ca chem taiñ femquen. Pablo feipieiñmu: “Eluucülemün tamün adniengeal ti cüme rüpü mu”. Taiñ piuque ngünencachefengei. Feimu quiñeque mu müte pepilfal-lai taiñ ngüneduamal taiñ raquiduam ca taiñ piuque (Jer. 17:9). Ca quiñeque mu quimlaiñ chem rüpü mu taiñ yeaeteu taiñ piuque. Cüdaungelai quisu taiñ ngünencahual (Sant. 1:22). Feimu mülei taiñ ngüneduamal ti Biblia, femngechi quimaiñ chem ñi mülen taiñ piuque mu ca taiñ raquiduam mu (Heb. 4:12, 13). w20.11 pag. 18 parr. 1, 2; pag. 20 parr. 3

Ñom piuquengeliyiñ ca quimnieliyiñ chem taiñ chumafel ca taiñ chumnoafel, doi ayüucüleaiñ. ¿Chumngelu am? Raquiduamnieliyiñ taiñ duamnieel ta quellu, mañumtuafiyiñ taiñ pu quelluqueteu. Raquiduamnge chem ñi rupan ta Jesús tremoltufilu mari huentru lepra cutran nielu. Quiñe huentru müten huiñoi ñi mañumtuafiel ta Jesús. Tüfachi huentru tañi ñom piuquengen mu, quimniefui tañi quisutu tremoluunoal, feimu mañumtufi ta Jesús ca püramyefi ta Chau Dios (Luc. 17:11-19). Pu ñom piuquengelu cüme yeucülequei caquelu che engün ca cümeque hueni nieingün. ¿Chemu am? Pu ñom piuquengelu quimnieingün caquelu che ñi cüme chengen, feimu maneluuqueingün quisu engün mu. Pu ñom piuquengelu ayüucülequei pefiel mu caquelu peñi ca lamngen ñi llohun falinque cüdau. Ca femngechi ayüucülequei pefiel mu ñi cüme femürpuquen tañi cüdau engün, feimu ayühunquechi saquiquefi. w20.08 pag. 12 parr. 17, 18