Septiembre

Pedro ca huiño feipi Joel ñi feipiel, huelu doi cüme quimfalcünufi (Hech. 2:16, 17). Joel huirintucui Chau Ngünechen ñi feipiel: “Fei hula, eluafiñ tañi nehuen ta com che”. Huelu Pedro huirintucui: ‘Quiñe mufülehuechi antü meu, hulan tañi nehuen com che meu’. Feichi “mufülehuechi antü” pengeli ñi fülcülepan ñi apümcangeal ta Jerusalén. Feimu quimnieiñ ñi rupan fentren tripantu tañi huechurpual ñi feipicünuel Joel. Feichi Pentecostés 33 tripantu meu, Jehová elufi ñi nehuen tati pu hunenque cristiano, feimu alü camapu puhuingün tañi amuldungual. Pablo pefilu tüfa, feipi tati amuldungun puhui fentren troquiñque mapu mu feichi antü mu (Col. 1:23). Famülque mu Jehová tañi nehuen meu, tati amuldungun cüdau puuquei “tuntepu ñi mülen ta mapu” (Hech. 13:47). w20.04 pag. 6, 7 parr. 15, 16

Jehová caque quiñeque iñchiñ piuqueyenieiñmu, quenü tati pu quiñe püle tripalu quisu mu (Mat. 18:12-14). Chau Dios feipicünui ñi quintuafiel tañi ñamquiyauchi ufisa ca quelluafi tañi cüme hueniyeutual engün (Ezeq. 34:12-16). Jehová feipi ñi quelluafiel tañi ufisa quiñe cuidaufisaquelu reque, ¿chumngechi? Hunelu mu, tati cuidaufisafe quintuafui tañi pu ufisa cüdaungefule rume. Petufile, cüpaltuafi tañi pu quechan ufisa mu. Tati ufisa allfülele, ngüñülele, tati cuidaufisafe ütalafi, lahuentuñmayafi tañi allfeñ ca metayetuafi. Feichi cuidaufisaquelu reque, Jehová quelluquefi tañi pu ufisa. Ca femngechi pu loncolelu cuidaquefi Ngünechen tañi pu che ufisa reque felelu (1 Ped. 5:2, 3). Feimu quintuquefi pu quiñe püle tripalu ti trahunche mu, quelluquefi ñi huiñotual engün ca quelluquefi ñi hueniyetuafiel engün ta Jehová. w20.06 pag. 20 parr. 10

Jesús feipi: “Adquintumün tati lelfün, tati ngan deu lingarcülei, puhui ñi cosechangeal”. Huelu Jesús raquiduamquelafui com pu che tañi inayaeteu. Tati Biblia deu feipilefui fentren che ñi allcütunoafiel ta Jesús (Juan 12:37, 38). Cafei Jesús cüme quimniefui chem ñi raquiduamcülen tati pu che, feimu quimafui inei tañi allcütunoaeteu (Mat. 9:4). Huelu Jesús ayühunquechi amuldungulelfi itrocom pu che, femngechi ñi peafiel pu cüme piuquengelu. Famülque mu, iñchiñ quimnielaiñ chem ñi raquiduamcülen tati pu che, feimu doyelchi mai mülei taiñ amuldungulelafiel itrocom pu che. Cafei mülei taiñ raquiduamal com che eluhuafui ñi cristianongerpual. Loncontucuaiñ, Jesús feipi fentren che eluucülei tañi inayaeteu. Feimu tati pu che cüme elcünutuafui tañi raquiduam, fei ñi inayafiel ta Jesús. Jehová maneluuquei ñi quimaeteu tüfachi pu che, feimu rume falintuquefi engün (Ageo 2:7). Felei llemai, Jehová ca Jesús cüme raquiduamquei tati pu che mu, feimu ca femngechi femaiñ iñchiñ. Eluhuaiñ taiñ quimal chem ñi rüf ayüqueel tati pu che. Amuldungulelfiliyiñ tati pu che, “tüfa engün ca piuqueyerpuafui ta Jehová” piafuiñ taiñ raquiduam mu. w20.04 pag. 13 parr. 18, 19

Biblia quimeltuqueiñmu taiñ piuqueyeafiel ta Jesús, femngechi taiñ ayühulafiel ta Jehová. ¿Chumafuiñ taiñ hueniyeafiel ta Jesús? Doi cüme quimafiyiñ ta Jesús. ¿Chumngechi femürpuafuiñ tüfa? Chillcatuafiyiñ ti lifru Mateo, Marcos, Lucas ca Juan. Papeltuliyiñ feichi lifru, ngüneduamaiñ Jesús ñi cutranpiuqueyechen, femngechi doi yamnieafuiñ ca doi piuqueyerpuafuiñ. Jesús falin huentrungefui, huelu ngencaulai tañi pu inanieteu mu. Doi mai, Jesús cüme hueni troquiyefi tañi pu inanieteu. Feimu feipifi chem tañi raquiduamcülen ca chem ñi mülen tañi piuque mu. Jesús pefiel mu tañi pu inanieteu ñi huesa duamcülen ca ñi ngümamequen, quisu ca inaye ngümai (Juan 11:32-36). Quimfalngefui Jesús ñi hueniyefiel tañi pu cüme allcütueteu, tañi pu caiñe cütu ngüneduamingün tüfa (Mat. 11:19). Ca femngechi iñchiñ Jesús reque, cüme troquituafiyiñ pu che. Femngechi doi cüme yeucüleafuiñ, doi ayüucüleafuiñ ca doi fütra piuqueyeafuiñ ta Jesús. w20.04 pag. 22 parr. 9, 10

Conlu 1870 tripantu, Gran Bretaña ngünenierpui doi fentren troquiñ Mapu ca doi alün-ngerpui tañi troquiñ hueichafe. Daniel feipicünui quiñe pichi müta ñi huehuafiel cüla müta. Tati pichi müta adentulei Gran Bretaña ca tati cüla müta adentufi Francia, España ca Países Bajos (Dan. 7:7, 8). Feimu epe aflu ti Primera Guerra Mundial, Gran Bretaña tati rey del sur ngequefui. Feichi püle Estados Unidos doi riculerpui com caquelu troquiñque Mapu meu, fei eluhui ñi trür cüdahual Gran Bretaña engu. Conlu ti Primera Guerra Mundial, Estados Unidos ca Gran Bretaña quiñehuingu tañi quehuayal, feimu rume fütra nehuen nierpuingu, chem gobierno no rume trürlaeyu. Tüfachi pu gobierno rume fütra hueichafe nierpuingu chumngechi ñi feipicünun Daniel. Fantepu mu, Gran Bretaña ca Estados Unidos quiñeucülen mu tati rey del sur ngerpuingu. w20.05 pag. 4 parr. 7, 8

Jehová müte alü nentucünuquelafi ti Mapu ti Antü meu, feimu mülei co taiñ Mapu mu. Tati Mapu doi püllelefule ti Antü mu, rume arengeafui, fei ngelayafui ta co ca ngelayafui ta mongen. Ca femngechi ti Mapu doi alü tripalefule ti Antü mu, ngelayafui co, re pire müten müleafui, fei ngelayafui ta mongen. Felei llemai, Jehová rume cüme deumacünufi ti Mapu, feimu mülei co, fei ñi müleal ta mongen. Fente tañi arengen ti Antü, tromü reque püraquei huenu ti co. Petu tañi hutrunagnon Mapu mu, tati co mülenagquei mari antü tati tromü meu. Hutrunagi chi co, huiñoquetui leufü ca lafquen mu. Fei ca huiño tromücünuquetui ca huiño hutrunagquetui Mapu mu. Afquelai tañi femngechi femquen. Jehová femngechi deumacünufi ti Mapu ñi turpu afnoal tañi co, femngechi quimfali fente ñi quimün-ngen ca nehuen-ngen ta Jehová (Job 36:27, 28; Ecl. 1:7). w20.05 pag. 22 parr. 6

Jesús feipieiñmu taiñ ngillatunieafiel ta Jehová taiñ eluaeteu ñi nehuen (Luc. 11:9, 13). Jehová tañi nehuen mu quelluqueiñmu ca yafültucuqueiñmu (2 Cor. 4:7). Femngechi chaftuafuiñ chem huesa dungu rume rupaliyiñ. Jehová tañi nehuen ca quelluafeiñmu taiñ femal com ti cüdau taiñ elueteu Jehová. Feimu quelluafeiñmu taiñ doi pepiluhual. Jehová tañi nehuen mu müten femürpuafuiñ taiñ cüdau Jehová tañi troquiñche mu. ¿Chumngechi pengelafuiñ taiñ falintuquefiel Jehová tañi nehuen? Llellipufiliyiñ ta Jehová, “quelluen” piafuiñ taiñ ngüneduamuhual chem huesa raquiduam rume niefuliyiñ taiñ piuque mu (Sal. 139:23, 24). Femngechi llellipuliyiñ, Jehová tañi nehuen mu quelluafeiñmu taiñ quimal taiñ nieel huesa raquiduam. Inaduamliyiñ taiñ nieel huesa raquiduam, llellipuafiyiñ ta Jehová taiñ eluaeteu ñi nehuen, femngechi taiñ entual feichi huesa raquiduam taiñ piuque mu. Femngechi pengelelafiyiñ ta Jehová taiñ cüpa femnon chem huesa dungu no rume, fei Jehová quellunierpuaiñmu llemai tañi nehuen mu (Efes. 4:30). w20.05 pag. 28, 29 parr. 10-12

Jesús ca incaquefi Jehová tañi üi, ¿chumngechi? Jesús üituquefi ta Jehová ca quimeltuquefi pu che tañi ineingen tañi Chau, femngechi incaquefi Jehová tañi üi. Pu fariseo feipiquefui Jehová ñi piuqueyechefengenon, ñi tutefalngenon ca ñi cutranpiuqueyechequenon, huelu Jesús feipieyu ñi re coilatumequen engün. Jesús quimeltufi pu che Jehová tañi cüme Chau ngen, ñi piuqueyechefengen ca ñi perdonachequen. Jesús rume cüme inayentufi ñi chumngen ta Jehová com tañi mongen mu, femngechi pengelelfi tati pu che ñi chumngen tañi Chau (Juan 14:9). ¿Chumngechi inayentuafuiñ ta Jesús? Quimeltulelafiyiñ pu che fente ñi cüme Chau ngen ca piuqueyechefengen ta Jehová. Ca quelluafiyiñ pu che ñi yamnieafiel Jehová tañi üi, femngechi incayafiyiñ. Com taiñ feipin mu, com taiñ femün mu quimeltucheaiñ ñi rüf chumngen ta Jehová. Femngechi quelluntucuaiñ ñi yamniengetual Jehová tañi üi. w20.06 pag. 6, 7 parr. 17, 18

Cüme pünelleafuiñ mai tati redes sociales taiñ nütramcayal taiñ pu hueni iñchiñ ca taiñ pu familia iñchiñ. Huelu pütrüquen che tucuquei foto ca video tañi redes sociales mu re tañi saquingeal müten. Feitachi pu che ayüquei tañi puuquintuniengeal müten. Quiñeque tüfachi pu che re huesaque dungu huirintucuqueingün tañi foto mu ca tañi pu hueni tañi foto mu. Iñchiñ taiñ cristianongen, ngelai taiñ femal feitachi dungu. Doi mai mülei taiñ ñom piuquengeal ca taiñ piuqueyechefengeal (1 Ped. 3:8). Adümfiel mu tati redes sociales, ramtuhuaiñ: “Tañi huirintucuel redes sociales mu ca tañi foto ca tañi video, ¿chem pi iñche mu? ¿Mallmangei pingeafun? ¿Iñche tañi duam mu mai ütrirpeafeneu ta che?”. Iñchiñ taiñ cristianongen checauquelaiñ, doi mai inaquefiyiñ ti ngülam mülelu taiñ peelchi texto fachantü. Ñom piuquengeliyiñ, checahun-ngelayaiñ (1 Juan 2:16). w20.07 pag. 6 parr. 14, 15

Petu ñi cristianongerpunon Pablo, Saulo pingequefui. Che troquichequelafui ca caiñetuquefui tati pu cristiano (Hech. 7:58). Jesús dungurumefi ta Saulo, feipifi ñi caiñetunoafiel tati pu cristiano, fei traumalfi. Tañi pelotual, Saulo quintufi ñi quelluaeteu feichi che tañi caiñetuquefiel. Saulo ñom piuque mu eluhui ñi quelluaeteu quiñe cristiano Ananías pingelu, feimu pelotui (Hech. 9:3-9, 17, 18). Rupachi antü mu, Pablo loncolerpui trahunche mu. Huelu femfulu rume, amulerpui ñi ñom piuquengen ca eluuquefui ñi quelluaeteu tañi pu peñi ca pu lamngen. Pablo feipi ñi rume quellueteu ca yafültucueteu engün (Col. 4:10, 11). w20.07 pag. 18, 19 parr. 16, 17

Jehová itrocom niei nehuen, huelu ca eluquefi cüdau ta caquelu. Feimu Reycünufi ta Jesús tañi Gobierno mu. Ca femngechi elufi pu 144.000 dullin cristiano ñi ngünenieal Jesús engu. Jehová re loncocünulafi ca re sacerdotecünulafi ta Jesús, ca femngechi pepicafi ñi femürpual tüfachi cüdau (Heb. 5:8, 9). Ca femngechi Jehová pepicaquefi tati pu dullin cristiano. Huelu mülepule engün ta huenu, inayahul-layafi ñi chumngechi femürpual ti cüdau. Doi mai Jehová maneluuquei pu dullin cristiano mu ñi femal tañi ayüqueel (Apoc. 5:10). Taiñ Fütra Chau eluquefi cüdau ta caquelu, ¿femnoafulu am iñchiñ? Feimu pu ngen familia ca pu loncolelu mülei ñi inayentuafiel ta Jehová. Tüfa engün eluquefi cüdau ta caquelu che, huelu inayahul-layafi ñi femal feichi cüdau. Femngechi femle engün, cüme tripayai ti cüdau ca quelluafingün ta caquelu peñi tañi doi pepicaucüleal (Is. 41:10). w20.08 pag. 9, 10 parr. 5, 6

Jesús tañi femün mu, quimeltuqueiñmu chumngechi mülei taiñ troquiafiel pu quiñe püle tripalu ti trahunche mu. Jesús quimniefui Jehová ñi falintuquefiel com tañi pu ufisa. Feimu mülepalu Mapu mu, eluhui ñi quelluafiel pu che quiñe püle tripalelu ñi huiñotual Chau Dios mu (Mat. 15:24). Quiñe cüme cuidaufisafe reque, Jesús ca femngechi cuidafi Jehová tañi pu ufisa, femngechi tañi ñamümnoafiel (Juan 6:39). Pablo ngülamtufi pu loncolelu ñi inayentuafiel ta Jesús. Feipifi ñi quelluafiel tati pu duamtulu ca ñi inayal Jesús tañi feipin “doi cümei ta hulal ta llohun meu” (Hech. 20:17, 35). Ca femngechi famülque mu, pu loncolelu mülei ñi cuidayafiel Ngünechen tañi pu che. Quiñe loncolelu Salvador pingelu, feipi: “Raquiduamün mu fente ñi piuqueyefiel Jehová tañi pu ufisa ñamquiyaulu, chumquen rume tañi quelluafiel engün. Loncolelu am iñche, Jehová ayüniei ñi cuidayafiel tañi ufisa”. w20.06 pag. 23 parr. 15, 16

Rupale tati huaranca tripantu, ngehuelayai ta culpan. Huelu petu acunole feichi antü, Jehová ayühunquechi esperaniei ca perdonaqueiñmu taiñ culpan, femngechi pengelai ñi nien ta paciencia. Inayentuafiyiñ ta Jehová. Ngüneduamaiñ ñi cüme femquen taiñ pu peñi ca pu lamngen ca perdonayafiyiñ engün, femngechi pengelaiñ taiñ nien ta paciencia. Jesús ca tati pu cümeque püllü ayühuingün deumangelu ti Mapu. Ca femngechi rume ayühuaingün cüpalechi antü mu. Mapu mu ngehuelayai ta culpan, apoleai re cümeque che mu, ayühunquechi serfiafingün ta Jehová. Tati pu ngünenietualu huenu, rume ayüucülepelayaingün pefile ñi cüme feletun com tati che mülelu Mapu mu (Apoc. 4:4, 9-11; 5:9, 10). Raquiduamaiñ ñi com cüme feletual tati pu che. Ngehuelayai ta cutran, ngüman ca lan no rume. Re ayühun müten mületuai. Petu acunole feichi antü, inayentunieafiyiñ Jehová ñi piuqueyechequen, ñi quimün-ngen ca tañi nien ta paciencia. Femliyiñ, ayüucüleaiñ chem huesa dungu rume rupafuliyiñ (Sant. 1:2-4). Rume mañumcüleiñ Jehová taiñ feipicünueteu ñi huiñomongetual ta che (Hech. 24:15). w20.08 pag. 19 parr. 18, 19

Jehová elueiñmu ti Biblia fente taiñ piuqueyenieteu. Tati pu che ramtuuquei: “¿Cheu chi ta tuhurqueiñ? ¿Chemu am deumaeiñmu ta Chau Dios? ¿Taiñ sufrial? ¿Chumlerputuai taiñ mongen cüpalechi antü mu?”. Tati Biblia mu, Jehová quimeltuqueiñmu feitachi falinque dungu. Jehová ayüniei com pu che ñi quimürpual chem ñi quimeltuqueel tati Biblia, feimu adcünui ñi rulpadungungeal fentren quehun dungu mu. Famülque mu, com tati Biblia ca quiñeque troquiñ mülei doi 3.000 quehun dungu mu. Ca femngechi rume fentren che niei quiñe Biblia. Chem lifru mu no rume chaflai tati Biblia. ¿Chumngechi mañumtuafuiñ ta Jehová taiñ elueteu Biblia? Fill antü papeltuafiyiñ tati Biblia, raquiduamaiñ taiñ papeltuqueel ca inayaiñ tañi ngülam, femngechi pengelaiñ taiñ falintuquefiel. Cafei com taiñ nehuen mu, quimeltulelafiyiñ pu che chem ñi quimeltuqueel tati Biblia (Sal. 1:1-3; Mat. 28:19, 20). w20.05 pag. 24, 25 parr. 15, 16

Jeremías adcünungei ñi amuldungual, huelu caiñetungequefui ca ayentungequefui. Quiñe rupa fente ñi huesa duamün, Jeremías pihuelafui tañi amuldungual. Huelu fentecünulai tañi amuldungual. ¿Chumngelu? Jehová tañi dungu cütral reque coni tañi piuque mu, fei pepi ngünelafi (Jer. 20:9). Ca femngechi iñchiñ fill antü papeltuafiyiñ Biblia ca raquiduamaiñ taiñ papeltuqueel mu. Femngechi femliyiñ, doi ayüucüleaiñ taiñ amuldungun mu ca doi fentren che allcütuafeiñmu (Jer. 15:16). Feimu chem dungu rume mu huesa duamcüleliyiñ, “quelluen” piafiyiñ ta Chau Dios. Jehová llemai quelluaiñmu huelulcauliyiñ rume quiñeque mu. Cutrancüleliyiñ, yafültucuaiñmu. Jehová ca quelluaiñmu taiñ cüme raquiduamnieafiel fillque falinque cüdau ti trahunche mu. Ca quelluaiñmu taiñ ayüucüleal amuldungun mu. Feimu llellipuafiyiñ ta Jehová ca feipiafiyiñ taiñ chum duamcülen. Jehová tañi quellun mu, yafüluucületuaiñ llemai. w20.12 pag. 27 parr. 20, 21

Quiñeque lamngen trahun mu müten müleafui tañi pu lamngen engün. Feimu trahun mu cüme llouqueafiyiñ engün, nütramcaqueafiyiñ ca pengelelafiyiñ taiñ duamniefiel. Jesús reque eluhuaiñ taiñ müleal taiñ pu lamngen engün, mangelafuiñ taiñ trür iyal ca taiñ cüme rupaleal (Luc. 10:38-42). Müleliyiñ taiñ pu lamngen engün, mülei taiñ yafültucuafiel engün taiñ dungun mu (Rom. 1:11, 12). Pu loncolelu mülei ñi inayentuafiel Jesús tañi raquiduamqueel. Jesús quimniefui ñi huesa duamcüleafel pu nienolu afcadi. Huelu Jesús feipilai pu nielu familia, pu nielu afcadi müten tañi pepi ayüucüleal (Luc. 11:27, 28). Doi mai feipi com pu doyümquefilu ñi poyeafiel ta Chau Ngünechen rüf ayüucüleafui (Mat. 19:12). Pu loncolelu, ñuque reque ca deya reque mülei ñi troquiafiel tañi pu lamngen trahunche mu. Feimu cümeafui pu loncolelu ñi nütramcayal pu lamngen engün petu ñi con-non ti trahun ca deumanentun mu taiñ trahun. w20.09 pag. 21, 22 parr. 7-9

Cuifi Israel mapu mu, tati cüdauquelu ti mapu nganquefui ñi fün octubre cüyen mu, fei cosechaquefui abril cüyen mu. Cayu cüyen mülefui tañi esperayal engün, feimu mülefui ñi nieal ta paciencia (Mar. 4:28). Feichi pu huentru reque, iñchiñ ca femngechi mülei taiñ nieal ta paciencia. Huelu quiñeque mu cüdaungeafui. Iñchiñ taiñ chengen, ayüniefuiñ pürüm müten ñi cüme tripayal taiñ cüdau. Quiñe che niele huerta, mülei ñi cüme cüdahual ca mülei ñi nieal ta paciencia. Mülei ñi tucual, mülei ñi ngedunentual tati huesaque cachu ca mülei ñi hutrucoal, femngechi ñi entuñmual ta fün. Ca femngechi iñchiñ taiñ quelluafiel ti che ñi discipulongerpual, mülei taiñ rume cüdahual ca mülei taiñ nieal ta paciencia. Allcütunoeliyiñmu ti pu che, tati paciencia quelluaiñmu taiñ huesa duamnagnoal. Doi mai quintuafiyiñ ta che ayünielu ñi allcütual. Ca femngechi cüme allcütueliyiñmu ta che, ca mülei taiñ nieal ta paciencia. ¿Chemu am? Obligalayafuiñ tati pu che ñi maneluhual Jehová mu. Jesús tañi antü mu, quiñeque tañi pu inanieteu alüñmaingün ñi adümal quiñeque quimeltun (Juan 14:9). Pu chillcatuquelu Biblia ca alüñmayafui ñi entual huesaque raquiduam tañi piuque mu. Loncontucuaiñ, iñchiñ tucuqueiñ ca hutrucoqueiñ reque, huelu Ngünechen mai eluquei ñi tremal reque ti rüf dungu ti che ñi piuque mu (1 Cor. 3:6). w20.09 pag. 11 parr. 10, 11

Com iñchiñ ayünieiñ ñi fautizahual feitichi che taiñ enseñalmequefiel Biblia. Taiñ quelluafiel, feipiafiyiñ taiñ quiñentrür trahuluhual. Pu estudiaquelu Biblia amule taiñ trahun mu, doi matu pepicaucüleaingün ñi fautizahual. Quiñeque peñi ca lamngen feipiquefingün tati pu estudiaquelu Biblia: “Tami doi cüme adümafiel Biblia, mülei tami amual taiñ trahun mu”. Cümeafui tami papeltulelafiel pu estudiaquelu Biblia Hebreos 10:24, 25, femngechi pengelelafimi fente ñi cümen taiñ trahuluhual. Ayühunquechi feipiafuimi quiñe hue dungu tami quimürpuel trahun mu. Pu estudiaquelu Biblia pefiel mu fente tami falintuquefiel ti trahun, ca ayücayafui chi tañi trahuluhual. Tati estudiaquelu Biblia amule taiñ trahun mu, raquiduamafui “rume cümei tamün trahun, iñche turpu amuquelafun femngechi trahun mu caquelu religion mu” (1 Cor. 14:24, 25). Trahun mu, quimmeafui caquelu peñi ca lamngen tañi inayentuafiel, fei tüfa engün quelluafeyu ñi pepicaucüleal tañi fautizahual. w20.10 pag. 10, 11 parr. 14, 15

Jehová tañi nehuen quelluaiñmu taiñ inayal chem taiñ quimürpun Biblia mu. Tati salmista reque llellipuafiyiñ ta Jehová: “Ahuem Jehová, quimeltuen tami rüpü. Iñche amulean tami rüf dungu mu. Eluen quiñe rume piuque, femngechi ñi yamnieafiel tami üi” (Sal. 86:11). Cafei estudianieafiyiñ ta Biblia ca fillque publicaciones ñi entuel Jehová tañi troquiñche. Huelu re nielayaiñ müten ta quimün, doi mai ca piuquentucuafiyiñ ti rüf dungu ca inayafiyiñ taiñ mongen mu. Jehová tañi nehuen quelluafeiñmu taiñ femngechi femal. Ca femngechi yafültucuafiyiñ taiñ pu peñi ca pu lamngen, quisu engün taiñ familia reque felei (Heb. 10:24, 25). Llellipuafiyiñ ta Jehová taiñ piuque mu ñi tripayal taiñ huiñoldungun trahun mu. Ca femngechi nieliyiñ hueupin, nütramcan cam chem rume ti trahun mu, ca llellipuafuiñ ta Jehová taiñ cüme enturpual. Com femliyiñ ta tüfa, pengelelafiyiñ ta Jehová ca Jesús taiñ piuqueyefiel tañi pu che ufisa reque felelu (Juan 21:15-17). Jehová rume cüme quimeltufengei, feimu eluhuaiñ taiñ cüme quimeltuaeteu. w20.10 pag. 24, 25 parr. 15-17

¿Jesús cai? ¿Famentupefi mai tañi pu discipulo? Femlai tati. Feimu huiñomongetulu, feipifi epu domo tañi inanieteu: ‘Llicaquilmu. Feipimeafimu tañi pu peñi’ ñi huiñomongetun (Mat. 28:10). Jesús quiñepülecünulafi tañi pu apostol. Quisucünueyu engün, huelu “tañi pu peñi” piniefi. Jehová reque, Jesús cutranpiuqueyechequei ca perdonachequei (2 Rey. 13:23). Iñchiñ ca femngechi rume duamniefiyiñ ca piuqueyeniefiyiñ taiñ pu peñi ca pu lamngen amuldunguhuenolu. Pu amuldunguhuenolu rume cüdahuingün Chau Jehová mu, fentren tripantu mu chi, feimu rume falintuquefiyiñ engün (Heb. 6:10). Rume echamenoquefiyiñ engün (Luc. 15:4-7). Feimu trahumequenole pu amuldunguhuenolu, mangelafiyiñ ñi trahual iñchiñ mu. Ca femngechi cüpale quiñe amuldunguhuenolu trahun mu, eluhuaiñ taiñ dunguafiel, femngechi taiñ cüme duamelafiel. w20.11 pag. 6 parr. 14-17

Quiñe antü, Santiago, Juan ca tañi ñuque fülcontupufi ca feipipufi Jesús ñi elcünuafiel man püle ca huele püle huenu mu. Jesús raquiduamlai rume, fei feipifi ‘iñche chumconpalan feitachi dungu mu. Tañi Chau müten mülei tañi feipial’ (Mat. 20:20-23). Femngechi Jesús pengeli ñi quimnieel chem tañi chumafel ca chem tañi chumnoafel. Jesús femquefui tañi huercüeteu müten tañi Chau (Juan 12:49). ¿Chumngechi inayentuafuiñ Jesús tañi cüme femün? Inafiliyiñ ñi feipin taiñ peelchi texto fachantü, inayentuafiyiñ ta Jesús. Quiñe che ramtueliyiñmu tañi chem chumal, cüme raquiduamaiñ taiñ chem pial ca feipilayafiyiñ ñi inayal iñchiñ taiñ raquiduamqueel. Huelu mai, quimeltuafiyiñ chem pin ta Biblia ca taiñ fillque papel taiñ nieel, femngechi pengelaiñ taiñ maneluuquenon quisu taiñ quimün mu. Doi mai ñom piuquengeliyiñ, maneluucüleaiñ Jehová ñi doi quimün-ngen iñchiñ mu (Apoc. 15:3, 4). w20.08 pag. 11 parr. 14, 15

Eimi cüpa ngülamtufilmi quiñe hueni, ¿chem mülei tami ngüneduamnieal? Petu tami nütramcanofiel tami hueni, ramtuunge: “¿Rume norngelu troquiupen mai?”. Pu femngechi chengelu quisu ñi duam mu juzgachequei, huelu Chau Dios ñi huercün dungu mu no. Ca fentren rupa, tañi juzgachen mu cutranpiuqueyechequelaingün. Cüme raquiduamülmi ti dungu, fei rüf duamnielu ñi ngülamngeal troquifilmi tami hueni, nütramcayafimi. Feipifinge tami hueni chem tañi femün, fei cümeque ramtun entuaimi tami raquiduamelafiel, femngechi quisu ngüneduamai tañi huelulcahun. Huelu loncontucunge, eimi coneltulelaimi tami juzgayafiel tami hueni, doi mai raquiduamelafimi chum duamquei Jehová tañi femün mu (Rom. 14:10). Biblia mu entunge ti ngülam tami eluafiel tami hueni. Ca inayentuñmafinge ñi cutranpiuqueyechen ta Jesús tami ngülamtuafiel (Prov. 3:5; Mat. 12:20). ¿Chumngelu am? Cutranpiuqueyecheliyiñ, ca cutranpiuqueyeaiñmu Jehová. Huelu femnoliyiñ, ca femlayaiñmu Jehová (Sant. 2:13). w20.11 pag. 21 parr. 13

Juzgangefulmi tami ad mu müten, ¿ayüupeafuimi mai? ¡Femlayafuimi llemai! Huelu Jehová ngüneduamquelai taiñ ad taiñ juzgayaeteu. ¿Chumngelu feipiafuiñ tüfa? Loncontucuaiñ chem ñi rupan Samuel ñi antü mu. Jehová feipifi ta Samuel quiñe tañi pu fotüm ta Jesé ñi loncoleal Israel mapu meu. Samuel pefilu Jesé tañi hunen fotüm, ngüneduami tañi rume cüme adngen, feimu pürüm müten feipi: “Tüfa peno tañi dulliel ta Jehová”. Huelu Jehová feipifi ta Samuel: “Ngüneduamquilnge tañi ad ca tañi alüpüralen, tüfa ta famentufiñ. Chumngechi huentru ñi pequeel trürlai Chau Ngünechen ñi pequeel mu, ti huentru pequei chem ñi pengelcülen tañi adquiñ mu müten, huelu Jehová puuquintuquei ponhuitu piuque mu” (1 Sam. 16:1, 6, 7). Taiñ trahunche mu cümeafui taiñ inayentuafiel Jehová tañi cüme femquen. w20.04 pag. 14 parr. 1; pag. 15 parr. 3

Jesús miyauquefui feichi lelfün cheu ñi ngan-ngeel, fei petu choyümequefui tati cahuella peno (Juan 4:3-6). Tüfachi ngan rupayafui meli cüyen tañi cosechangerpual. Huelu Jesús feipi: “Eimün ta feipimün: ‘Petu mülei meli cüyen ñi puhual ta cosecha antü’. Huelu iñche ta feipihuiyiñ: adquintumün tati lelfün, tati ngan deu lingarcülei, puhui ñi cosechangeal” (Juan 4:35, 36). Pu allcütulu cangentupelaingün Jesús tañi feipin. ¿Chem cüpa feipi chi? Tüfachi cosechan dungu mu, Jesús trürümpelafi ñi quintungeal tati pu cümeque che. Raquiduamnge chem ñi rupan feichi antü. Jesús amuldungulelfi quiñe samaria domo, fei ti domo fente cüme allcütueyu. Feimu tati domo amui ñi nütramcayafiel caquelu samariache ñi quimeltuleteu Jesús, fei quisu engün ca cüpaingün ñi allcütuafiel ta Jesús. Feimu quisu feipifi tañi pu inanieteu: “Tati ngan deu lingarcülei, puhui ñi cosechangeal” (Juan 4:9, 39-42). Feichi pu che rume ayüniefuingün ñi allcütuafiel ta Jesús, feimu felefuingün tati lelfün reque fülangcülelu tañi cosechangeal. w20.04 pag. 8 parr. 1, 2

Taiñ trahun quelluqueiñmu taiñ doi cüme quimeltucheal. Enseñangequeiñ taiñ cüme adümafiel fillque quellu taiñ quimeltucheal, feimu cüme estudiayaiñ chem ñi ngüneduamngeal trahun mu. Cüme allcütuafiyiñ chem ñi feipingequen trahun mu ca inayafiyiñ taiñ quimürpuel. Femliyiñ com tüfa cüme hueichafe reque feleaiñ (2 Tim. 2:3). Rume fentren cümeque püllü ca quelluqueiñmu. Cüme quimnieiñ ñi femün quiñe cüme püllü müten (Is. 37:36). Feula raquiduamaiñ fente ñi nehuen-ngen fentren cümeque püllü. Chem che no rume ca huesa püllü no rume hueulayafui Jehová ñi pu hueichafe. Jehová com nehuen niei feimu mülele iñchiñ mu, doi nehuen nieaiñ taiñ pu caiñe mu, tunten ngepe rume engün (Juec. 6:16). Huesa duameleliyiñmu quiñe compañ cüdau mu, colegio mu cam quiñeque taiñ pu che poyequenofilu ta Jehová, raquiduamaiñ fente taiñ quelluafeteu Jehová, pu cümeque püllü cam taiñ pu peñi, pu lamngen. Loncontucunieaiñ taiñ quisu hueichamequenon, inanieiñ Jehová tañi ngülam feimu quimnieiñ taiñ quelluqueteu. w21.03 pag. 29 parr. 13, 14

Ti apostol Pablo entupelai ñi feipin ti lifru Isaías mu (Is. 22:13). Feita pengeli ñi raquiduamquefel tati pu israelche. Duamtuquefuingün ñi cüme rupaleal müten, eluulaingün ñi doi piuqueyeafiel ta Jehová. Pu israelita raquiduamquefuingün chem antü rume ñi layafel engün. Feimu “fill antü mülei tañi cüme rupaleal” piquefuingün ñi raquiduam mu. Ca femngechi raquiduamquei fentren che famülque mu. Pu peñi ca pu lamngen mülelu Corinto mu mülefui ñi hueniyenoafiel feichi pu che feyentuquenolu ti huiñomongetun mu. Ca femngechi iñchiñ quimfiel mu ñi huiñomongetual pu layelu, ca mülei taiñ cüme dulliafiel taiñ pu hueni. Feichi pu che raquiduamquelu ñi cüme rupaleal müten famülque mu, cümelayafui taiñ hueniyeafiel. Hueniyefiliyiñ engün, ñochiquechi inayentuafuiñ ñi huesaque raquiduam ca famtucuafeiñmu taiñ femal Chau Dios tañi üdequeel. Feimu Pablo cüme ngülamtui tüfa: ‘Eimün felei tamün huiño nietual cüme raquiduam, ca doi culpahuelayaimün’ (1 Cor. 15:33, 34). w20.12 pag. 9 parr. 3, 5, 6

Tüfachi versiculo pengeli chumngechi adniefi Jehová com pu mülelu huenu mu ca nag Mapu mu. Chau Jehová ta loncolei itrocom dungu mu, feimu com autoridad niei. Chau Jehová ca elufi ñi loncoleal ta quiñeque che, huelu ramtucadunguafi engün tañi chumngechi adniefiel ta che ñi loncolen mu (Rom. 14:10; Efes. 3:14, 15, TNM). Chau Jehová elufi ta Jesús ñi loncoleal tañi troquiñche mu, huelu niei ta responsabilidad Jehová tañi adquiñ mu, fei ñi cüme adnieafiel engün (1 Cor. 15:27). Ca femngechi Chau Jehová elufi pu huentru ñi loncoleal tañi familia mu. Jehová elufi pu ngen familia ñi loncoleal tañi pu che mu, feimu ayüquei ñi cüme femal engün tüfachi cüdau (Luc. 12:48). w21.02 pag. 2 parr. 1, 3

Cümeafui taiñ inayentuafiel ta Jehová. Iñchiñ fill antü huelulcaqueiñ, huelu cüme raquiduamtuliyiñ, Jehová perdonaqueiñmu (Sal. 25:7; 130:3, 4). Jehová ayüniei taiñ ca femngechi femal iñchiñ. Feimu huesalcangeliyiñ, perdonayafiyiñ taiñ huesa femeteu (Mat. 6:14; Luc. 17:3, 4). Mañumtufiliyiñ ta Jehová taiñ elueteu taiñ lonco, cüdahuelafiyiñ com taiñ raquiduam mu. Quiñeque che inaquei quisu tañi raquiduam tañi dullial chem tañi cümen ca chem tañi cümenon. Huelu Jehová deumaeiñmu iñchiñ, feimu quisu müten quimniei chem rüpü doi cümei taiñ inayal (Rom. 12:1, 2). Inafiliyiñ Jehová tañi feipin, cüme amuleai taiñ mongen (Is. 48:18). Ca quimaiñ chem mülei taiñ femal, poyeafiel ta Jehová ca ayühulmayafiel ñi piuque (Prov. 27:11). w20.05 pag. 23, 24 parr. 13, 14

¿Chumngechi doi piuqueyeafuiñ taiñ pu peñi ca pu lamngen? Doi cüme quimafiyiñ taiñ pu peñi ca pu lamngen, femngechi doi cutranpiuqueyeafuiñ engün. Femliyiñ, doi piuqueyeafiyiñ engün. Hueniyeafuiñ com taiñ pu peñi ca pu lamngen tunten tripantu niele rume ca chem tuhun-ngele rume. Acordanienge, Jonatán 30 tripantu peno hunen-ngefui ta David mu, huelu rume cüme huenihuen-ngeingu. ¿Eimi cai? ¿Hueniyepeafuimi mai quiñe doi füchalu cam doi huechengelu eimi mu? Tami femün mu, pengelqueimi tami piuqueyefiel com pu peñi, pu lamngen (1 Ped. 2:17). Piuqueyefiyiñ rume com taiñ pu peñi ca lamngen, com trür femngechi hueniyelayafuiñ engün. Feichi peñi, lamngen doi quiñeucülelu ñi raquiduam iñchiñ mu, doi fülmanieafiyiñ. Jesús ca femngechi femfui. Com tañi pu apostol hueniyefui, huelu Juan doi piuqueyefi (Juan 13:23; 15:15; 20:2). Fei, ¿Juan müten pemai doi cümelcafi? ¡Femlai llemai! Com trür femngechi cümelcafi tañi pu apostol (Mar. 10:35-40). w21.01 pag. 23 parr. 12, 13

Tati apostol Pablo chumngechi ñi dungufiel tati sinagoga che, femngechi dungulafi tati pu Atenas che. Atenas huaria mu, Pablo cüme ngüneduami ñi chumlen tati huaria ca chem huimtun ca feyentun ñi niequefel tati pu che (Hech. 17:23). Quiñeque dungu ñi feyentuquefel feichi pu che quiñeucülei Biblia tañi quimeltuqueel mu, feimu Pablo hune nütramcai feichi dungu mu. Pablo feipi ñi amuldunguyahun quisu engün ñi quimnoelchi Ngünechen meu. Tüfachi pu che mülelu Atenas huaria mu quimquelafuingün tati Huirin Chillca, huelu Pablo raquiduamlai ñi allcütunoaeteu engün. Doi mai raquiduami tüfachi pu che eluucülefui chi ñi inayafiel ta Jesús. Pablo reque, inaduamaimi chem ñi feyentuqueel tati pu che. Tami quimal tüfachi dungu, ngüneduamnge chumngechi cünuquei tati pu che tañi ruca ca tañi auto. Cafei inaduamafuimi ñi inei pingen tati che, chumngechi ñi tucutuucülen ca chumngechi ñi dunguquen, femngechi quimürpuafuimi chem feyentuquei tati che. w20.04 pag. 9, 10 parr. 7, 8