Octubre

Cüme quimürpufiliyiñ Jesús, inayentuafiyiñ tañi femün ca tañi raquiduam. Femngechi doi cüme hueniyeafuiñ. Inaduamaiñ quiñe dungu ñi femün ta Jesús. Quisu quisutu duamuulai, doi mai eluucülefui ñi quelluafiel ta che (Mat. 20:28; Rom. 15:1-3). Feimu huesa dunguyengelu rume, Jesús illcufemquelai, doi mai huiñoduamtuquefui ta che (Juan 1:46, 47). Ca femngechi huesa raquiduamquelafui pu che ñi huelulcan engün (1 Tim. 1:12-14). Feimu, ¿chumngechi inayentuafuiñ ta Jesús? Quisu feipi: “Hueluconquechi piuqueyehulmün, com mapu meu mülechi pu che quimaingün iñche tañi discipulongen ta eimün” (Juan 13:35). Cümeafui taiñ ramtuhual: “Jesús reque, ¿eluucülepen mai tañi cüme yeucüleal com tañi pu peñi ca pu lamngen iñchiñ?”. w20.04 pag. 24 parr. 11

Feipiafiyiñ tati pu che fente ñi cüme Chau ngen ta Jehová, ñi norngen ca tañi piuqueyechefengen. Ca quimeltulelafiyiñ pu che fente tañi norngen chumngechi ñi ngüneniequeel ta Jehová ca quisu tañi duam mu müten cümelcaletuai com pu che Mapu mu. Femngechi femliyiñ, pengelaiñ taiñ eluucülen taiñ ngünenieaeteu Jehová (Sal. 37:9, 37; 146:5, 6, 10). Quimeltufiel mu Biblia tati pu che, feipiquefiyiñ Jehová müten mülei ñi ngünenieafiel com tati mülelu. Falin-ngefui rume taiñ femngechi femal, doi falin-ngei taiñ quelluafiel pu che ñi piuqueyeafiel ta Jehová ca ñi püntütripanoal quisu mu (Is. 63:7). Feimu nütramcayafiyiñ ta che fente ñi cüme Chau ngen ta Jehová. Femngechi femliyiñ, tati pu che piuqueyerpuafi ta Jehová, fei eluhuaingün ñi femal quisu ñi ayüqueel. w20.06 pag. 6 parr. 16; pag. 7 parr. 19

Afmatufali fente ñi cüme deumangen taiñ lonco. Petu taiñ choyüngenon, taiñ lonco tremcülerpui chumngechi ñi adcünuel Chau Dios. Fei müchaique mülerpui rume fentren celula ponhuitu taiñ lonco mu, fei taiñ nieal ta müllo. Tati pu cientifico feipiquei tati pu che niei pütrüquen neurona pingechi celula tañi lonco mu. Tati pu che ñi müllo 1 kilo y medio fanei. Taiñ lonco elueiñmu taiñ dungual. Dungun mu iñchiñ, taiñ lonco adniequefi doi 100 musculo taiñ cuerpo mu. Quiñeque tüfa mülei taiñ hun, quehun ca taiñ pel mu. Com feitachi musculo mülei ñi quiñeucüleal, fei ñi cüme tripayal taiñ dungun. Tati pu cientifico ngüneduami tati pu hue pichiche adümafui caque quiñeque palabra ñi feipingeel. Feimu feipiafuiñ choyüngelu müten ta che, quimürpuafui quiñe quehun dungu. Felei llemai, taiñ dunguquen Jehová mu cüpai. w20.05 pag. 22, 23 parr. 8, 9

Abrahán com elcünui tañi niequefel Ur pingechi huaria mu. ¿Chemu femi? Quisu maneluucülefui “tati doi cüme deumaelchi huaria meu” (Heb. 11:8-10). Feitachi huaria mu ñi maneluucülen ta Abrahán fei ta Chau Dios tañi Gobierno. Jesús loncolei feitachi Gobierno mu, ca 144.000 dullin cristiano quelluaeyu ñi ngünenieal. Feitachi Gobierno “tati huenu mapu mülechi Jerusalén” pifi Pablo (Heb. 12:22; Apoc. 5:8-10; 14:1). Jesús feipifi tañi pu inanieteu ñi ngillatual engün ñi cüpayal Chau Dios tañi Gobierno, femngechi ñi femngeal Jehová tañi ayüqueel huenu mu ca nag Mapu mu (Mat. 6:10). Abrahán cüme quimquelafui ñi chumlerpual Chau Dios tañi Gobierno. Fentren tripantu mu, quiñe “quimngequenofelchi cüme dungu” reque felefui (Efes. 1:8-10; Col. 1:26, 27). Huelu mai Abrahán quimniequefui quiñeque tañi pu cüpanche tañi reyngerpual, Jehová am feipicünueteu (Gén. 17:1, 2, 6). w20.08 pag. 2, 3 parr. 2-4

Mülei taiñ famentuafiel ñi quimeltuqueel pu apostata. Tati Huecüfü afquentu eluuquei ñi huelulcayafiel pu cristiano, feimu duamfali taiñ ngüneduamal chem ñi rüfngen ca chem ñi rüfngenon. Taiñ pu caiñe huirintucuquei coilaque dungu internet mu, femngechi taiñ püntünentuaeteu Jehová mu ca taiñ pu peñi ca taiñ pu lamngen mu. Huecüfü mu llemai cüpai feitachi coilaque dungu, feimu famentuafiyiñ (1 Juan 4:1, 6; Apoc. 12:9). Taiñ huelulcanoaeteu Huecüfü, mülefui taiñ maneluhual Jesús mu ca ñi femqueel Jesús ñi huechurpual tañi Chau ñi ayüqueel. Ca femngechi mülei taiñ maneluhual ti “quim manelfal cona” mu, esclavo fiel y prudente pingei huinca dungun mu. Quisu engün müten adniequeyu Jehová ñi adcünuafiel tañi troquiñche (Mat. 24:45-47, TNM). Taiñ femngechi maneluhual, mülei taiñ fill antü papeltuafiel ta Biblia. Femngechi fente taiñ maneluuquen ti rüf dungu mu, quiñe fütra anümca reque felerpuaiñ cüme foliluucülelu. Ti apostol Pablo ca femngechi dungu huirintuculelfi quiñeque cristiano, chumngechi ngüneduampeiñ taiñ peelchi texto fachantü. w20.07 pag. 23, 24 parr. 11, 12

Huelulcauquelu am iñchiñ, feimu pefiel mu müten ñi ad ti che, juzgaquefiyiñ (Juan 7:24, TNM). Huelu re ngüneduamfiliyiñ müten ti che, rüf quimlayafuiñ ñi chumngen. Raquiduamnge tüfa, quiñe doctor quim chengefule rume, tañi pefiel mu müten ti che, quimlafi tañi chumlen. Tati doctor cüme allcütuafi tati che tañi quimal chem cutran tañi nieel. Quiñeque doctor ñi doi cüme quimafiel chem cutran tañi nieel, feipiafi ñi entual quiñe radiografia. Femnofule, cümecünulayafui, quimlayafui chem cutran tañi nieel. Ca femngechi iñchiñ re pefiliyiñ müten taiñ pu peñi ca pu lamngen, rüf quimlayafuiñ ñi chumngen. Feimu cüdautuliyiñ rume, yafüluhuaiñ taiñ ngüneduamal ñi rüf chumngen taiñ pu peñi ca pu lamngen. Iñchiñ Chau Dios reque, peñmaquelafiyiñ ñi piuque tati pu che. Huelu inayentuafuiñ ñi cüme femquen, femngechi taiñ cüme quimafiel pu peñi ca pu lamngen. Jehová allcütuquefi tañi pu poyequeteu, cüme quimniefi chem tañi rupan engün ca cutranpiuqueyequefi. w20.04 pag. 14, 15 parr. 1-3

Pu mallma piuquengelu cüme raquiduam nielaingün, yafcauqueingün inei mu rume ca checauqueingün. Ca tañi raquiduam mu ca tañi femquen mu quisutu huesalcauqueingün ca huesalcaquefi caquelu che. Pu mallma piuquengelu cüme elcünutunofile tañi raquiduam, Huecüfü huelulcayafeyu engün (2 Cor. 4:4; 11:3). Huelu pu ñom piuquengelu cüme raquiduam nieingün, checauquelaingün ca doicülelu troquiquefi ta caquelu che (Filip. 2:3). Quisu engün quimniei ‘Ngünechen catrütuquefi tati pu mallmahun-ngelu, huelu fürenequefi tati pu ñom piuquengelu’ (1 Ped. 5:5). Iñchiñ ayünieiñ taiñ füreneaeteu Jehová, feimu ñom piuquengeaiñ. Ayüliyiñ taiñ ñom piuquengeal, famtripayaiñ taiñ cuifique huesa mongen mu ca nietuaiñ cümeque mongen. Mülei taiñ cüme quimafiel Jesús ñi femün ca inayentuafiel (Col. 3:9, 10; 1 Ped. 2:21). w20.07 pag. 7 parr. 16, 17

Müna falintuquefiyiñ taiñ concülen Jehová tañi troquiñche mu. Quiñentrür serfiquefiyiñ ta Jehová taiñ pu peñi ca pu lamngen iñchiñ, feimu ayüucülequeiñ ca tüngcülequeiñ. Huelu caque quiñeque iñchiñ, ¿chemu falin-ngeiñ ti trahunche mu? Ti apostol Pablo trürümfi ti trahunche ta quiñe cuerpo mu. Ca feipi com pu coneltulelu ti trahunche mu trürümngei tati troi mülelu ti cuerpo mu. Feita quimeltuqueiñmu com taiñ falin-ngen trahunche mu (Rom. 12:4-8; 1 Cor. 12:12-27; Efes. 4:16). Pablo ñi pengelün dungu enseñalqueiñmu caque quiñeque iñchiñ falin-ngeiñ Jehová tañi troquiñche mu. Quisu feipi: “Chumngechi quiñe cuerpo meu mülei ta fentren pichique troi cuerpo, fei itrocom troi mülelu cuerpo meu caquerume cüdau niei. Ca femngechi ta iñchiñ, tunte alün-ngefuiñ rume, quiñe cuerpo reque ta feleiñ ta Cristo meu ca quiñeucüleiñ quiñe cuerpo meu reque felelu” (Rom. 12:4, 5). ¿Chem enseñaleiñmu Pablo? Caque quiñeque iñchiñ caquerumen cüdau nieiñ, huelu com iñchiñ falin-ngeiñ. w20.08 pag. 20 parr. 1, 2; pag 21 parr. 4

Ngen familiangelmi, ¿chumngechi inayentuafuimi Jehová ñi ñom piuquengen? Cümefule, ramtuafuimi tami pu yall ca püñeñ chumngechi ñi femngeal quiñeque cüdau ruca mu. Cümelu troquifilmi, inayafuimi tañi chem pin engün. Chau Jehová lladcütufemquelai. Femngechi ca pengelquei ñi ñom piuquengen. ¿Chumngelu feipiafuiñ? Cuifi quiñeque poyequefilu ta Jehová, “¿cümepei mai ñi femal ta Jehová?” piquefuingün ñi raquiduam mu. Feimu ramtucafingün, huelu Jehová lladcütulaeyu engün. Acordayaiñ chem ñi rupan ta Abrahán. Jehová feipilu ñi apümcayafiel ta Sodoma ca Gomorra, Abrahán cümelu troquilafi, feimu ramtucafi ta Jehová. Huelu Jehová ñom piuque mu allcütueyu (Gén. 18:22-33). Ca acordayaiñ ñi rupan ta Sara. Jehová feipieyu ñi nieal quiñe püñeñ. Huelu Sara cusefui, feimu ayecahui. Huelu Jehová illcutulaeyu. Doi mai yamquechi dungueyu (Gén. 18:10-14). Pu chau ca pu loncolelu, ¿chumngechi inayentuafui ta Jehová? Caquelu che ñi raquiduam quiñeucülenole tami raquiduam mu, pürüm feipifemlayafimi tañi huelulcalen, doi mülei tami allcütuafiel. Femngechi femle pu chau, rume cümelcayai tañi pu che. Ca femngechi femle pu loncolelu, rume cümelcaleai com ti trahunche. w20.08 pag. 10 parr. 7-9

Hue quimfilu iñchiñ tati rüf dungu, quimniefuiñ taiñ müte quimnon, feimu ayühunquechi eluuquefuiñ taiñ quellungeal (1 Cor. 3:1, 2). Huelu fentren tripantu yenieliyiñ taiñ poyequefiel ta Jehová, fentren quimün nieafuiñ chi. Feimu eluulayafuiñ taiñ quellungeal, doyelchi mai ngülamtueliyiñmu quiñe peñi cam lamngen pichin tripantu yenielu. Huelu Jehová adniequefi taiñ pu peñi ca pu lamngen taiñ quelluaeteu (Rom. 1:11, 12). Feimu ayüliyiñ taiñ quelluaeteu Jehová, eluhuaiñ taiñ quelluaeteu pu peñi, pu lamngen. Taiñ cüme tripayal taiñ mongen mu ngelai taiñ maneluhual quisu taiñ quimün mu, quisu taiñ nehuen mu, ca taiñ nieelchi plata mu. Doi mai mülefui taiñ ñom chengeal ca maneluhual Jehová mu. Feimu llemai maneluhuaiñ Jehová mu. Ngüneduamaiñ ñi femün pu poyequefilu ta Jehová cuifi. Ca eluucüleaiñ taiñ quellungeal. Femngechi nehuencülenoliyiñ rume, Jehová nehuentucuaiñmu llemai. w20.07 pag. 14 parr. 2; pag. 19 parr. 18, 19

Amuldungulelfiliyiñ taiñ pu che poyequenofilu ta Jehová, cüdaungeafui taiñ nieal ta paciencia. Biblia feipieiñmu mülei “quiñe antü ñi ñücüfcüleal ca quiñe antü ñi dungual” (Ecl. 3:7). Inafiel mu feichi ngülam, rume cümelcayafeiñmu. Cümelcamequeliyiñ, amuldungulelafuiñ reque taiñ pu che. Ca femngechi cüme pepicaucüleaiñ taiñ dunguafiel engün Jehová tañi cümeque dungu (1 Ped. 3:1, 2). Rume ayüleiñ taiñ amuldungulelafiel itrocom che, huelu mülei taiñ nieal ta paciencia, doi mai nielelafiyiñ paciencia taiñ pu che. ¿Chem am quelluafeiñmu taiñ doi nieal paciencia? Ngüneduamafuiñ ñi femquen pu poyequefilu ta Jehová cuifi mu ca famülque mu. Habacuc rume ayülefui ñi afal com huesaque dungu fei ñi antü mu, huelu maneluucülen feipi: “Iñche huitralean cheu tañi llihuatulequen” (Hab. 2:1). Pablo com piuque mu ayüniefui ñi ‘huechunentual ñi cüdau’, huelu amulerpui “tañi quimelal Ngünechen tañi piuqueyechen”, femngechi pengeli ñi nien ta paciencia (Hech. 20:24). w20.09 pag. 11, 12 parr. 12-14

Jesús rume nehuen-ngei, Jehová müten hunelei quisu mu. Huelu Jesús mallma piuquengelai, feimu noquelcaulai tañi Chau mu. Famülque mu fentren pu peñi ca lamngen ñom piuquengeingün Jesús reque. Feimu ayühunquechi trür serfiquefiyiñ ta Jehová. Ñom piuquengeliyiñ, hueluconquechi piuqueyehuaiñ, femngechi pengelaiñ taiñ rüf poyequefiel ta Jehová (Luc. 9:48; Juan 13:35). Quiñeque mu ruparumeafui huesaque dungu taiñ trahunche mu, fei “pu loncolelu chumlai rume” piafuiñ taiñ raquiduam mu. Femngechi rupale, ¿chumafuiñ? Tromtromquiyaulayaiñ, doi mai ñom piuquengeaiñ ca quelluntucuafiyiñ ti pu loncolelu (Heb. 13:17). Feimu ramtuhuaiñ: “¿Rüf rupamequepei mai feitachi huesaque dungu trahunche mu? ¿Cam iñche müten femngentufiñ? Rüf mülele cai tüfachi huesa dungu, ¿cümepeafui mai ñi cüme elcünungetual feula? ¿Cümepeafui mai iñche tañi conal feitachi dungu mu? ¿Rüf ayüniepefun mai ñi quiñeucüleal tati trahunche? ¿Cam ayüquen ñi saquingeal müten?”. Tunte pepiluuliyiñ rume, Jehová doi falintuñmaqueiñmu taiñ ñom piuquengeal. Jehová ayüquei taiñ cüme cüdaufe ngeal, huelu doi ayüquei taiñ quiñeucüleal. Feimu ñom piuquengeaiñ, femngechi quiñeucüleaiñ taiñ trahunche mu (Efes. 4:2, 3). w20.07 pag. 4, 5 parr. 9-11

Jesús rume falintuquefui pu “domo tañi quelluqueteu ñi nieelchi chemcün meu” (Luc. 8:1-3). Cafei Jesús elufi engün falinque quimeltun Jehová mu cüpalu. Jesús feipifi ‘iñche ta layan’ pifi ta quiñeque domo, ca ‘huiñomongetuan cüla antü rupale’ pifi (Luc. 24:5-8). Chumngechi pepicafi Jesús quiñeque tañi pu apostol, ca femngechi pepicafi tüfachi pu domo ñi chaftual huesaque dungu ñi cüpalen (Mar. 9:30-32; 10:32-34). Feichi presuntucungelu ta Jesús, tañi pu discipulo quisucünueyu engün. Huelu epe lalu Jesús, pu domo quisucünulaeyu engün (Mat. 26:56; Mar. 15:40, 41). Deu huiñomongetulu ta Jesús, hunelu peeyu quiñeque domo ca huercüfi tüfachi pu domo ñi feipilelmeafiel tañi pu apostol ñi huiñomongetun (Mat. 28:5, 9, 10; Luc. 24:9, 10). Ca feichi Pentecostés 33 tripantu mu, quiñeque domo ca lloupelaingün Ngünechen tañi nehuen, fei amuldungupelaingün caque quehun dungu mu (Hech. 1:14; 2:2-4, 11). w20.09 pag. 23 parr. 11, 12

Jesús feipieiñmu taiñ quelluafiel ta che ñi discipulongerpual, fei ñi fautizahual engün (Mat. 28:19, 20). Ti che ayünielu tañi montuluhual mülei tañi fautizahual, feimu rume falin-ngei tañi femngechi femal. Pedro feipi “ti fautizahun tamün montulnieteu Jesucristo tañi huiñomongetun meu” (1 Ped. 3:21, TNM). Feimu pu cüpa fautizaulu quimniei tañi montuluhual, mülei ñi feyentual Jesús tañi lan mu ca ñi huiñomongetun mu. Fautizahun mu ta che, maneluhurpuafui ñi rumel mongeleal, feimu rume falin-ngei quelluafiel ta che ñi fautizahual. Taiñ quelluafiel ta che ñi discipulongerpual, mülei taiñ rume cüme quimeltucheal (2 Tim. 4:1, 2). Jesús feipi taiñ quimeltuafiel ta che ñi discipulongerpual, feimu rume falin-ngei taiñ cüme quimeltucheal. Pablo ca feipi taiñ cüme amuleal taiñ quimeltuchen meu, femngechi taiñ quisu montuluhual iñchiñ ca taiñ pu allcütuqueteu. w20.10 pag. 14 parr. 1, 2

Ti apostol Pedro rume ayürpufi ñi amuldungucheal. Jehová tañi quellun mu, Pedro rume cüme femürpui feichi cüdau (Hech. 2:14, 41). Iñchiñ amuldunguchequeiñ fente taiñ piuqueyefiel taiñ Chau Jehová. Quiñeque mu pepilnoalu troquihuafuiñ, huelu fente taiñ piuqueyefiel mu ta Jehová amuldunguchelelquefiyiñ. Inaduamnge ñi rupan ta Pedro. Jesús quellueyu ñi entual fentren challhua ti lafquen meu, fei feipieyu: “Llicaquilnge, tami challhuafe ngefel, huelu tüfa quintuafimi ta che tami cüpalafiel iñche meu” (Luc. 5:8-11). Pedro llicaquelafui ñi chumlerpual inaniefile ta Jesús. Doi mai pefilu ti afmatun dungu ñi femün ta Jesús, pepilnoafilu ti cüdau troquihui, feimu llicarumei. Ca femngechi eimi ngüneduamülmi com ñi chumquen pu inaquefilu ta Jesús, llicayafuimi chi, Pedro reque. Llicalefulmi, eluunge tami doi piuqueyeafiel ta Jehová, Jesús ca tati pu che. Femngechi eluhuaimi tami amuldungucheal (Mat. 22:37, 39; Juan 14:15). w20.09 pag. 3 parr. 4, 5

Ayühunquechi hulqueiñ taiñ nehuen, tiempo ca taiñ plata taiñ peal “com pu eluulu ñi rumel mongeleal” (Hech. 13:48, TNM). ¿Chemu femqueiñ tüfa? Femngechi inayentuquefiyiñ ta Jesús. Quisu feipi: “Iñche tañi iyael reque felei tañi femal ñi Chau ñi huercüeteuchi dungu” (Juan 4:34; 17:4). Iñchiñ ca femngechi com piuque mu ayünieiñ taiñ femal Chau Jehová taiñ huercüeteuchi dungu (Juan 20:21). Ca ayünieiñ pu amuldunguhuenolu ca caquelu che ñi conal tüfachi falin cüdau mu (Mat. 24:13). Cüdaungei femal Jesús tañi huercün dungu, huelu quisulelaiñ tati. Jesús feipicünui ñi müleal iñchiñ mu. Quellufiel mu ta che ñi discipulongerpual, “chaf cüdauqueiñ Chau Ngünechen engu” ca “quiñeucüleiñ ta Cristo meu” (1 Cor. 3:9, TNM; 2 Cor. 2:17). Feimu Jehová ca Jesús quelluaiñmu taiñ femal tüfachi cüdau. Feimu huechunenturpuaiñ llemai. Rume ayühun-ngei femal tüfachi cüdau ca rume ayühun-ngei quelluafiel caquelu che ñi ca femürpual (2 Cor. 4:7). w20.11 pag. 7 parr. 19, 20

Pu chau, pu ñuque cüme dullinole tañi chumal, rume huesalcayafui tañi pu pichiqueche. Huelu cüme dullile engün tañi chumal, quelluafi tañi pu yall, tañi pu püñeñ ñi ayüucüleal. Huelu tüfa engün ca mülei tañi cüme dullial. Tati doi cüme dungu ñi dulliafel quiñe che, fei ñi poyeafiel taiñ cüme Chau Jehová (Sal. 73:28). José María engu ayüniefui com tañi pu pichiqueche ñi poyeafiel ta Jehová. Feimu tañi mongen mu engu, doyümniequefui ñi cüdahuelafiel ta Jehová (Luc. 2:40, 41, 52). Jesús cüme dulli tañi chumal, femngechi femi Jehová tañi ayüqueel (Mat. 4:1-10). Jesús fürenechequei, nor piuquengei ca nehuen piuquengei. Com pu chau, com pu ñuque poyequefilu ta Jehová ayüniei tañi femngechi chengeal tañi pu yall, tañi pu püñeñ. w20.10 pag. 26 parr. 1, 2

Raquiduamnge tüfachi cüla ejemplo mu. Quiñe putrem lamngen raquiduamquefui ñi femün mu petu ñi üllchangen. Feula rume cüdaungei ñi mongen, huelu amulei ñi cüdahuelafiel Jehová com tañi nehuen mu (1 Cor. 15:58). Fill antü peyeniequefi ti hue Mapu mu cheu ñi müleal com tañi pu che ca tañi pu hueni engün. Cangelu lamngen acordai ñi huesa femeteu quiñe lamngen trahunche mu, feimu huesa duameleyu. Huelu quisu dulli ñi raquiduamyenienoafiel feichi dungu (Col. 3:13). Quiñe peñi quimtucuniefui ñi huesa femquefel, huelu eluuquei ñi femal Jehová tañi ayüqueel müten (Sal. 51:10). Ti peñi ca ti epu lamngen raquiduamyenielaingün ñi fillque rupan mu. Doi mai adquintuniefingün reque cüpalechi antü. Quiñe che huiño quintumequelu cüme amulayafui ñi trecan, ca femngechi rupayafuiñ iñchiñ Jehová tañi pu chengen. Rume raquiduamyeniefiliyiñ taiñ rupan mu, pepi cüme cüdahuel-layafuiñ ta Jehová com taiñ nehuen mu. Feimu rume falin-ngei taiñ adquintunieafiel reque cüpalechi antü (Luc. 9:62). w20.11 pag. 24 parr. 1-3

Goliat doi alüfui ta David mu ca doi pepicaucülefui tañi hueichayal. Huelu David hueche huentrungefui ca müte pepicaucülelafui ti hueichan mu. David nehuen-ngenolu quechilefui, huelu maneluucülefui Jehová tañi nehuen mu. Feimu quisu nehuentucueyu, fei hueufi ta Goliat (1 Sam. 17:41-45, 50). Rupachi antü mu, David ca dungu chaftufi. Quisu cüdahuelquefui ta Saúl, Jehová ñi elcünuelchi rey. Ellaca mu, Saúl yamquefui ta David. Huelu rupachi antü mu, ütrirfi ta David. Feimu caiñeturpufi ca epe langümfui (1 Sam. 18:6-9, 29; 19:9-11). David quimniefui Jehová ñi reycünufiel ta Saúl. Feimu chumeteu rume ta Saúl, David yamquefui (1 Sam. 24:6). David maneluhui Jehová mu tañi quelluaeteu ñi chaftual feitachi huesa dungu (Sal. 18:1, ca huenuntu meu ti versiculo 1). w20.07 pag. 17 parr. 11-13

Daniel capitulo 11, Jehová feipicünui ñi müleal quiñe rey del norte ca quiñe rey del sur. Quiñeque dungu ñi feipiel femtripai, feimu quimnieiñ ñi com femtripayal. Fei ñi cüme adümafiel Daniel capitulo 11, mülei taiñ loncontucual quiñe falin dungu. Feichi capitulo mu, üitungei tati pu gobierno caiñetufilu Ngünechen tañi pu che ca ngüneniefilu cheu tañi mülen engün. Pichingefule rume Ngünechen tañi pu che, tüfachi pu fütraque gobierno caiñetueyu engün. ¿Chumngelu am? Huecüfü ca tañi pu inanieteu ayünieingün ñi apümafiel Ngünechen tañi pu che (Gén. 3:15; Apoc. 11:7; 12:17). Ñi feipiel Daniel capitulo 11 mülei ñi nüucüleal caquelu dungu ñi feipiel tati Biblia, feimu mülei taiñ ngüneduamafiel caquelu lifru mülelu Biblia meu, femngechi müten quimafuiñ ñi feipiel Daniel capitulo 11. w20.05 pag. 2 parr. 1, 2

Famülque mu tati pu che caquerume dungu feipiquei ñi chumlequetun pu layelu, feimu cümei taiñ ngüneduamal ñi chem pin ta Biblia tüfachi dungu mu. Lan mu ta che, funaquei tañi cuerpo. Huelu Chau Dios deumafi tati pu che, niei nehuen ñi huiñomongeltuafiel ta che ca elutuafiel quiñe cuerpo (Gén. 1:1; 2:7). Huelu huiñomongetule ta che huenu mu, elulayafi ti cuerpo ñi niequefel petu tañi lanon. Tañi quimeltual tüfa, apostol Pablo entui quiñe pengelün dungu (1 Cor. 15:36-38). Tucungen mu quiñe fün, tremquei, hue anümcangetuquei. Ñi chumngetun tati anümca trürlai tañi chumngen ti fün. ¿Chem quimeltuqueiñmu tüfa ñi feipin Pablo? Chau Dios eluafui pu huiñomongetulu chem cuerpo rume tañi ayüniefel. Pablo ca feipi ñi trürnon ñi chumngen tati mülelu huenu mu ca nag Mapu mu. Mapu mu iñchiñ ta cuerpo nieiñ, huelu huenu mu mülei ta püllü (1 Cor. 15:36-41). w20.12 pag. 10 parr. 7-9

Com iñchiñ ayünieiñ taiñ cüme duamcüleal taiñ mongen mu. Inei no rume ayüquelai ñi fill raquiduamcüleal, huelu quiñeque mu fillque dungu rume raquiduamelafeiñmu. Quiñeque mu, fente taiñ huesa duamcülen mu raquiduamafuiñ David reque taiñ peelchi texto fachantü. Fill dungu rume raquiduamelafeiñmu. Quiñeque feichi dungu rupaquei müten, catrütulayafuiñ. Fill tripantu doi falilerpui nieal ruca, iyael ca fillque chemcün. Iñchiñ catrütulayafuiñ ñi doi falilerpual. Ca femngechi raquiduamelafeiñmu ñi chumquen taiñ pu compañ cüdau mu ca colegio mu. Quiñeque mu ngüchaltucuafeiñmu engün taiñ femal norngenochi dungu ca podngechi dungu. Iñchiñ catrütulayafuiñ taiñ ngüchaltucunoaeteu engün. Cafei catrütulayafuiñ pu che ñi femal huesaque dungu taiñ lof mu. Fentren che yamquelafi Biblia ñi ngülam, feimu rupaquei tüfachi huesaque dungu. Ca tüfachi Mapu ngünenieyu tati Huecüfü. Fei quimniei quiñeque che ñi poyenoafiel ta Jehová fente tañi fill raquiduamcülen mu (Mat. 13:22; 1 Juan 5:19). Feimu lle mülei fentren huesaque dungu, fill raquiduamcülei che. w21.01 pag. 2 parr. 1, 3

Tati apostol Juan ngülamtueiñmu taiñ üdenoafiel taiñ pu peñi ca pu lamngen. Inanoliyiñ tüfachi ngülam, Huecüfü catrüconafui (1 Juan 2:11). Tüfa rupai pu hunenque cristiano ñi antü mu. Huecüfü eluucülefui ñi üdehual pu cristiano, fei ñi hudamcayafiel engün. Feichi Juan huirintuculu tañi carta, conpuingün quiñeque huentru trahunche mu ca ayüfuingün ñi hudamcayafiel tati trahunche. Quiñe tüfa Diótrefes pingefui. Ca yamquelafi pu loncolelu huitrancontupaquelu tati trahunche. Ca ayüfui ñi quechanentuafiel ti trahunche mu pu lloufilu tati pu huitran. ¡Huesa piuquengefui ta Diótrefes! (3 Juan 9, 10). Fantepu mu, Huecüfü chumquei rume ñi hudamcayafiel tati trahunche. Chumcaunorume ngelai taiñ üdeafiel taiñ pu peñi, pu lamngen, doi mai taiñ quelluafiel. w21.01 pag. 11 parr. 14

Tati Primera Guerra Mundial mu, Ngünechen tañi pu che eluulai ñi hueichayal. Feimu Alemania ca Gran Bretaña rume cutrancaeyu. Ca femngechi Estados Unidos carceltucufi pu adniequefilu Ngünechen tañi troquiñche, femngechi huechurpui ñi feipin Apocalipsis (Apoc. 11:7-10). Rupalu 1933 tripantu, Alemania tati rey del norte ngequefui, tüfa rume caiñetufi Ngünechen tañi pu che. Ca puulu ti Segunda Guerra Mundial, Hitler ca tañi pu inanieteu catrütufingün ti amuldungun cüdau. Tüfa engün langümfingün fentren pu peñi ca pu lamngen. Caquelu carceltucungei ñi cüdahual engün. Hitler ca feipi ñi langümafiel com pu poyequefilu ta Chau Jehová Alemania mapu meu. Daniel feipicünui tati rey del norte ‘yamlayafi tati ngillatuhue ruca’, tüfa femtripai caiñetungelu Jehová tañi pu che. Daniel ca feipicünui tati rey del norte ‘müntuñmayafi ti chalintucuhun hulngequelu fill antü’, tüfa femtripai catrütungelu ti amuldungun cüdau (Dan. 11:30b, 31a). w20.05 pag. 5, 6 parr. 12, 13

Rüf piuqueyeuliyiñ, femlayaiñ chem no rume taiñ hunencahual pu peñi ca pu lamngen trahunche mu. Inayentuafiyiñ ta Jonatán. Fei ütrirlafi ta David, doi mai quelluntucufi tañi reyngeal (1 Sam. 20:42). Iñchiñ ca femngechi ütrirlayafiyiñ taiñ pu peñi, taiñ pu lamngen adümuhun-ngele. Doi mai ñom piuque mu mülei taiñ doi cümelu troquiafiel engün (Filip. 2:3). Acordanienge caque quiñeque taiñ quelluconcüleal trahunche mu. Ñom piuque chengeliyiñ, ngüneduamaiñ ñi cüme femquen taiñ pu peñi, pu lamngen, femngechi inayentuafiyiñ (1 Cor. 12:21-25). Hueluquentu piuqueyeuliyiñ, fentren cümeque dungu huechulürpuaiñ. Yafültucuquefiyiñ pu peñi, pu lamngen rupayüm huesaque dungu mu. Quelluntucuqueiñ ñi quiñeucüleal ti trahunche. Pengelqueiñ taiñ inaquefiel ta Jesús, femngechi ñomngechi che ca fülconai Chau Jehová mu. Doi falin-ngei mai, rüf piuqueyeuliyiñ, püramyeafiyiñ taiñ Chau Jehová, “taiñ rumel cutranpiuqueyenieteu ca taiñ yafülqueteu” (2 Cor. 1:3). w21.01 pag. 24 parr. 14; pag. 25 parr. 16

Fachantü iñchiñ Jehová tañi pu chengen, ayentungequeiñ, illamcangequeiñ, ca müte quimnolu troquingequeiñ. ¿Chemu am ta femqueiñmu pu che? Iñchiñ trürlaiñ tati pu che mu. Iñchiñ yafüluuqueiñ taiñ ñom chengeal ca inayal taiñ feipieteu Chau Ngünechen, feimu üdengequeiñ. Huelu doi falintungequei pu mallma chengelu ca pu quisu ngüneuquelu. Ca femngechi iñchiñ taiñ pu cristianongen, conquelaiñ politica dungu mu ca pu militar mu. Iñchiñ am femquenolu quisu engün tañi femquen, feimu illamcaqueiñmu (Rom. 12:2). Iñchiñ illamcangeliyiñ rume, Jehová tañi duam mu femürpuqueiñ fütraque dungu. Jehová tañi duam mu amuldungungequei huall Mapu püle. Chumcaunorume fente femngequelafui. Jehová tañi troquiñche entuquei revista fentren quehun dungu mu, huall Mapu püle hulngequei. Enseñalquefiyiñ tati pu che chem pin ta Biblia, femngechi ñi doi cüme mongen nietual. Fei illamcangeliyiñ rume, Jehová adniequeiñmu taiñ femürpual fütraque dungu. w20.07 pag. 15 parr. 5, 6

Jesús eluucülequei ñi adnieaeteu tañi Chau tañi piuqueyefiel mu. Feipilayafuiñ Jesús ñi quim chengenon, doi mai müna pepiluhun-ngei. ¿Chumngelu feipiafuiñ? Quiñe pepiluhun-ngelu müten quimeltuafui chumngechi ñi femün Jesús (Juan 7:45, 46). Jehová quimniefui ñi rume adümuhun-ngen ta Jesús, feimu eluhui ñi quelluntucuaeteu deumalu com tati mülelu (Prov. 8:30; Heb. 1:2-4). Jehová deu huiñomongeltufilu ta Jesús, elufi com autoridad huenu mu ca Mapu mu (Mat. 28:18). Jesús rume quimün niefui rume, huelu maneluucülei tañi Chau mu. Pu füta mülei ñi quimtucual ta Chau Jehová elcünui ti huentru ñi loncoleal tañi domo mu. Huelu tüfa feipilai Jehová ñi doi falintuquefiel pu huentru. Jehová dullifi huentru ca domo ñi ngünenieal Jesús engün, femngechi pengeli ñi trür falintuniefiel (Gál. 3:26-29). Fente tañi maneluucülen Jesús mu, Jehová elufi autoridad. Ca femngechi quim füta fente tañi maneluucülen tañi domo mu, eluafi autoridad tañi quelluntucuaeteu. w21.02 pag. 10, 11 parr. 13, 14

Tati Biblia quiñe espejo reque felei. Quelluqueiñmu taiñ quimal chem dungu doi cüme elcünutuafuiñ ca chumngechi femafuiñ (Sant. 1:23-25). Petu taiñ papeltumequen Biblia, ngüneduamafuiñ taiñ illcufemquen. Huelu Jehová quelluafeiñmu taiñ ñom piuquengeal nüngayelngeliyiñ rume. Ñom piuquengeliyiñ, doi cüme dulliaiñ chem taiñ chumal rupan mu huesaque dungu (Sant. 3:13). Felei llemai, rume falin-ngei taiñ cüme estudiayal ta Biblia. Huelulcauliyiñ iñchiñ, doi quim chengeafuiñ chi, huelu rume cutrancahuafuiñ ca. Doi cümei ngüneduamal caquelu pu che ñi cümeque femquen ca ñi huesaque femün, femngechi taiñ nieal ta quimün. Feimu Santiago ngülamtueiñmu taiñ ngüneduamal Abrahán, Rahab, Job ca Elías ñi femün (Sant. 2:21-26; 5:10, 11, 17, 18). Huesaque dungu rupalu engün rume, ayüucülequefuingün. Ca femngechi iñchiñ ayüucüleafuiñ Jehová tañi quellun mu. w21.02 pag. 29, 30 parr. 12, 13

Tati peñi cam lamngen enseñalfilu Biblia quiñe che, mülei ñi quelluafiel tañi adümafiel Biblia ñi feipin. Feimu mangelngelmi tami compañafiel, mülei tami quelluafiel ñi cüme quimeltucheal (Ecl. 4:9, 10). Fei ¿chumngechi femafuimi tüfa? Cüme pepicaucülenge. Ramtuafuimi tami mangeleteu: “¿Inei am enseñalmeafiyu Biblia? ¿Chumngei ti estudiaquelu? ¿Chem dungu ngüneduammequeimu? ¿Chem ayünieimi ñi piuquentucual ti che fachantü? ¿Mülepei mai quiñeque dungu iñche tañi feipial cam feipinoal? Ca, ¿mülepei mai quiñeque dungu iñche tañi femal cam femnoal? ¿Chumngechi yafültucuafun tati estudiaquelu ñi doi cüme hueniyeafiel Jehová?”. Quiñe misionera, Joy pingelu, feipi: “Tayu nütramcahun mu, tañi compañ doi eluucülei ñi quelluafiel ti estudiaquelu ca cüme quimniei chem feipial” pi taiñ lamngen. Chem dungu rume nütramelngelu ti compañ, quelluafeyu ñi cüme quimeltuafiel tati estudiaquelu. Huelu tati quimeltuchefe ngelai ñi com feipiafiel tañi compañ tañi nütramcaeteu tati estudiaquelu Biblia. w21.03 pag. 9 parr. 5, 6

Quiñeque mu, üdengequeiñ taiñ inaniefiel mu Jehová tañi ngülam. Chau Jehová feipi chem ñi cümen ca chem ñi cümenon. Huelu pu che ñi raquiduam rume calei. Famülque mu, fentren che cümelu troquiquefi fillque pecan cudumuhun dungu. Huelu Chau Jehová apümcafi tati pu che femquelu feichi podngechi dungu Sodoma ca Gomorra huaria mu (2 Ped. 2:6; Jud. 7). Taiñ inaniefiel mu Jehová tañi ngülam, famentuquefiyiñ feichi podngechi huimtun, feimu ayentungequeiñ ca feipingequeiñ taiñ cüme raquiduam nienon (1 Ped. 4:3, 4). ¿Chem quelluaiñmu taiñ nehuencüleal üdengeliyiñ cam lucatungeliyiñ rume? Com piuque meu maneluucüleaiñ Jehová taiñ quelluaeteu. Taiñ maneluhun quiñe escudo reque felei, feimu ‘chongümafiyiñ tati üicülechi flecha cüpalu Huecüfü meu’ (Efes. 6:16, TNM). Duamnieiñ taiñ piuqueyechefengeal. ¿Chumngelu? Tati piuqueyechequelu “lladcüfemquelai”. Cafei “yafüluuquei chem dungu rupale rume”, “ca chem no rume afelquelaeyu” (1 Cor. 13:4-7, 13, TNM). Piuqueyefiliyiñ ta Jehová, taiñ pu peñi, pu lamngen ca taiñ pu caiñe cütu, nehuencüleaiñ üdengeliyiñ rume. w21.03 pag. 21 parr. 3, 4

Quiñeque mu taiñ pengelal taiñ piuqueyefiel pu peñi, pu lamngen, ngüneuqueiñ taiñ femnoal quiñeque dungu. Feimu pürüm lladcüfemquelaiñ ñi feipin mu engün. Quiñe rupa petu mülepalu Jesús Mapu mu, feipifi tañi pu inanieteu ñi iñmayaeteu ñi cuerpo ca putuñmayaeteu ñi mollfüñ, fei ñi nieal engün ta rumel mongen (Juan 6:53-57). Fentren che inaquefilu ta Jesús nüngaituingün ñi feipin, feimu elcünutufingün. Huelu femngechi femlaingün Jesús tañi pu cümeque hueni. Tüfa engün ca adümlaingün Jesús tañi feipin, feimu ca femngechi afmatulehuepelaingün. Tüfa engün huelulcaucülelu troquilafingün ta Jesús ca illculaingün rume. Quimniefuingün Jesús ñi rüf dungu piquen, feimu maneluhuingün müten (Juan 6:60, 66-69). Rume falin-ngei taiñ pürüm lladcüfemnoal taiñ pu hueni ñi feipin mu. Doi mai cüme adümnofiliyiñ tañi feipin engün, eluafiyiñ taiñ feipiaeteu chem ñi rüf cüpa pifel (Prov. 18:13). w21.01 pag. 11 parr. 13