Marzo

Tati pu ufisa ñi nütramcael ta Jesús Mateo 25:31-36 mu, ¿inei mu am ta adentulei? Tüfa com pu nor che mülelu famülque mu ca rumel mülealu Mapu mu. Tüfa ca caquelu ufisa pingequei. Fei engün quelluntucuquefi pu dullinque cristiano ñi amuldungucheal ca ñi quellucheal ñi discipulongerpual (Mat. 24:14; 28:19, 20). Pu caquelu ufisa, ¿chumngechi quelluntucuquefi pu dullinque cristiano? Pichi faltalu ñi acordangeal Jesús ñi lan, com iñchiñ coneltuqueiñ ñi mangelafiel pu che ñi amual tüfachi falin trahun mu. Iñchiñ quelluntucufiel mu pu dullinque cristiano, quelluquefiyiñ reque ta Jesús (Mat. 25:37-40). Feimu ayühunquechi quelluntucuqueiñ. w22.01 pag. 22 parr. 11, 12

Jesús cutranpiuqueyechequefui. ¿Chumngechi? Tremoltufi quiñe leproso ca quiñe domo mollfüñ cutran niefulu. Cafei cutranpiuqueyefi tati pu layeluuchi che. Jesús reque cutranpiuqueyecheliyiñ, ca inayentuafiyiñ ta Jehová (Mar. 1:40, 41; 5:25-34; Juan 11:33-35). Fei doi inayentufiliyiñ ta Jehová, doi cüme hueniyeafiyiñ. Inayentufiliyiñ ta Jesús, püntütripalayaiñ Jehová mu. Biblia pengeli Jesús miyaupalu Mapu mu, hueufi reque tati huesaque dungu (Juan 16:33). ¿Chem pifel tüfa? Jesús eluulai ñi hueluraquiduamelaeteu tati pu che ca inalafi tañi huesaque femün engün. Huercüngelu ta Mapu mu, Jesús doyümfi ñi püramyengeal ta Chau Jehová. ¿Iñchiñ cai? ¿Chem mülei taiñ femal? Famülque mu, fentren huesaque dungu mülei taiñ huelulcayafeteu, huelu doyümfiliyiñ taiñ püramyenieafiel ta Chau Jehová, huehuafiyiñ com ti huesaque dungu (1 Juan 5:5). w21.04 pag. 3, 4 parr. 7, 8

Apostol Pablo quimtucuniefui Jesús tañi feipin: “Com tati feyentulu quisu meu chumcaunorume ñi lanoal, huelu mai ñi nieal ta rumel mongen” (Juan 3:16; Rom. 6:23). Pablo maneluucülefui Jehová perdonaquei pu culpalu repentiucületule (Sal. 86:5). Pablo ca quimniefui Jehová ñi huercüel tañi Fotüm ñi lapayal com iñchiñ mu. Feimu apostol Pablo maneluucülei Jehová tañi piuqueyeteu. Ngüneduamaiñ chem pilen ti lifru Gálatas 2:20 mu. Feipi: “Rüfcünu llemai, tañi feyentufiel mu ta Ngünechen ñi Fotüm ta mongelen, quisu ta piuqueyeneu ca huli ñi mongen iñche ñi duam mu”. Pablo raquiduamquelafui rume “tañi huesa chengefel cuifi, Chau Dios piuqueyelaeneu” pilai. Ca feipilai: “Chau Dios caquelu che müten piuqueyefi, iñche piuqueyelaeneu” pilai. Doi mai Pablo feipi pu romano: ‘Feichi petu culpafengelu ta iñchiñ, Cristo lai iñchiñ taiñ duam’ (Rom. 5:8). Pablo cüme quimniefui fente ñi piuqueyechequen ta Chau Dios. Ca quimniefui Jehová ñi rume nielfiel paciencia tati pu israelita. w21.04 pag. 22, 23 parr. 8-10

Enseñalfiliyiñ Biblia quiñe che, quelluafiyiñ ñi piuqueyerpuafiel ta Jehová. ¿Chumngechi femafuiñ? Nütramcayafiyiñ taiñ estudiante chumngechi chengen ta Jehová. Cafei raquiduamelafuiñ taiñ estudiante Chau Jehová ñi ayühun-ngechi Diosngen ca ñi rumel mülequen tañi pu che mu (1 Tim. 1:11; Heb. 11:6). Cafei feipiafiyiñ taiñ estudiante inale Chau Jehová ñi ngülam, cüme yahuai ñi mongen mu, tüfa pengeli Chau Dios ñi piuqueyenieteu (Is. 48:17, 18). Femngechi quellufiliyiñ taiñ estudiante, doi piuqueyerpuafi ta Jehová ca eluucüleai ñi cüme elcünutual ñi mongen. Ñi fautizahurpual quiñe estudiante, mülefui ñi femal cüdaungechi dungu ca rupayai huesaque dungu mu. Quiñeque estudiante elcünupelayafui falinque chemcün ñi nieel, fei ñi fautizahual. Caquelu che estudiaquelu Biblia, mülefui chi ñi hueniyehuenoafiel tati pu poyequenofilu ta Jehová. Caquelu estudiante quisucünueyu ñi familia, ¿chumngelu? Fei engün ayüquelafingün pu testigo. Jesús feipicünui quiñe che cüpa inanielieyu, rupayai cüdaungechi dungu mu, huelu rume cümelcangeai. Quiñe cüme familia reque nieaingün Jehová ñi troquiñche mu (Mar. 10:29, 30). w21.06 pag. 4, 5 parr. 8, 9

Pablo trürümfi taiñ amuldungun cüdau taiñ chumngechi anümcaquen. Femngechi pengeli duamfalngelai taiñ re anümcayal müten, huelu mai taiñ ca hutrucoafiel. Feimu Pablo feipifi tati pu corintio: “Iñche ta quiñe nganlu reque, fei Apolos ta hutrucolu reque. Fei eimün ta Ngünechen ñi petu cüdahuelchi lelfün reque feleimün” (1 Cor. 3:6-9). ¿Chem quimeltueiñmu tüfa? Iñchiñ cüdaufe reque feleiñ Chau Dios ñi lelfün meu. Fei amuldungufiliyiñ tati pu che, nganqueiñ reque. Ca enseñaniefiliyiñ engün, hutrucoqueiñ reque. Huelu quimnieiñ Chau Jehová tremümquefi tati planta. Felei llemai, Jehová müten cüpalquefi tati pu che quisu meu. ¡Rume falin-ngei taiñ amuldungucheal ca enseñacheal Biblia ñi rüf dungu! Rüf ayühulqueiñmu llemai. Ti apostol Pablo quellufi fentren che Tesalónica mu mülelu ñi discipulongerpual, fei feipi: “Huiñotule taiñ Ñidol Jesús, ¿inei am taiñ maneluhun, taiñ ayühun ca ti cullitu taiñ ayühuelqueteu fei ñi adquiñ meu? ¡Eimün tati! Felei llemai, eimün mu saquiuqueiñ ca ayüuqueiñ” (1 Tes. 2:19, 20; Hech. 17:1-4). w21.07 pag. 3 parr. 5; pag. 7 parr. 17

Itrocom iñchiñ Chau Jehová cüpaleiñmu quisu mu (Juan 6:44). Raquiduamnge tüfa: fentren che mülelu rume, Chau Jehová ngüneduameimu eimi tami cüme piuquengen ca tami cüpa poyequefiel. Jehová mu, tüfa doi fali (1 Crón. 28:9). Jehová quimnieimu, entendequeimu ca piuqueyenieimu. Tüfa, ¡müna yafüluhun-ngei! Chau Jehová caque quiñeque iñchiñ piuqueyenieiñmu. Fei Jesús trürümfi ta Jehová quiñe cuidaufisaquelu mu. Ñamümle quiñe tañi ufisa, ti cuidaufisaquelu elcünuafi tati quechan ufisa fei quintumeafi tati ñamquiyaulu. Petufile, illcutulayafi. Huelu mai, ayüucüleai. ¿Chem quimeleiñmu tüfa? Iñchiñ ufisa reque felelu, caque quiñeque iñchiñ falintunieiñmu Jehová. Fei Jesús feipi Chau Jehová “ayülelai tañi ñamal quiñe no rume” tañi pu poyequeteu (Mat. 18:12-14). w21.06 pag. 20 parr. 1, 2

Rüf maneluucüleiñ Jehová taiñ piuqueyenieteu. Raquiduamün mu tüfachi dungu mu, doi piuqueyequefiyiñ ta Jehová ca doi quiñeucülequeiñ quisu mu (Rom. 8:38, 39). Femngechi doi cüme inayentuafiyiñ Jesús ñi femün (1 Ped. 2:21). Quiñe semana faltalu taiñ trahuluhual, fill antü Biblia mu papeltuquefiyiñ chem ñi rupan ta Jesús petu ñi lanon, tañi lan mu ca tañi huiñomongetun. Fei hula, trahun mu iñchiñ taiñ acordayal Jesús ñi lan, ti hueupin acordalqueiñmu chumte taiñ piuqueyenieteu Jesús (Efes. 5:2; 1 Juan 3:16). Papeltufiel mu com tañi femqueel Jesús iñchiñ mu ca raquiduamliyiñ feichi dungu mu, femngechi inayentuafuiñ ñi femün ta Jesús (1 Juan 2:6). Doi eluucülequeiñ taiñ hueniyenieafiel Jehová (Jud. 20, 21). ¿Chumngechi cüme hueniyenierpuafuiñ ta Jehová? Femliyiñ com taiñ feipieteu Jehová, yamniefiliyiñ tañi üi ca ayühulfiliyiñ ñi piuque, hueniyenierpuafiyiñ (Prov. 27:11; Mat. 6:9; 1 Juan 5:3). Trahuluhun mu taiñ acordayafiel Jesús ñi lan, doi eluucülequeiñ taiñ hueniyenieafiel Jehová. w22.01 pag. 23 parr. 17; pag. 25 parr. 18, 19

Chau Jehová elueiñmu taiñ quisutu dullial. Feimu dulliafuiñ chem femal taiñ mongen mu. Dullin mu iñchiñ taiñ poyeafiel ta Jehová, quisu ayüuquei (Sal. 84:11; Prov. 27:11). Jehová am elueteu quisu taiñ dullial, cüme püneafiyiñ taiñ femal cümeque dungu. Jesús reque, iñchiñ mu müten raquiduamuulayaiñ, huelu mai raquiduamaiñ caquelu che mu. Quiñe rupa Jesús ca tañi pu discipulo rume cansalefuingün, fei amuingün cheu tañi cansatual engün. Huelu pepi cansatulaingün, fentren che peeyu engün fei ayüfuingün ñi quimeltuaeteu ta Jesús. Huelu Jesús illculai, doi mai cutranpiuqueyefi engün. Fei ¿chumi Jesús? “Eluhui tañi quimeltuafiel fentren dungu” (Mar. 6:30-34). Jesús reque femliyiñ, fei elcünuliyiñ taiñ tiempo ca taiñ nehuen taiñ quelluafiel ta caquelu che, fampüramyeafiyiñ ta Jehová (Mat. 5:14-16). w21.08 pag. 3 parr. 7, 8

Chau Jehová ayüquelai iñchiñ taiñ com femngeal. ¿Chumngelu quimiyiñ? Jehová deumafi caquerume culliñ, anümca ca caquerumechi che. Iñchiñ femngelaiñ caquelu che reque, feimu Jehová turpu trürümlayaiñmu caquelu che mu. Chau Dios cüme quimniei taiñ chumngen ta iñchiñ (1 Sam. 16:7). Ca quimniei chem taiñ femafel ca chem taiñ femnoafel. Ca quimniei chumngechi tremümngeiñ, feimu feipiquelaeiñmu taiñ femal taiñ pepilnoel. Duamnieiñ taiñ inayentuafiel Jehová chumngechi taiñ pequeteu iñchiñ. Femliyiñ, cüme raquiduam nieaiñ fei checahun-ngelayaiñ, huelu ca falinolu troquiulayaiñ (Rom. 12:3). Iñchiñ inayentuafuiñ pu peñi, pu lamngen cüme amuldunguquelu, femngechi taiñ doi cüme amuldungual (Heb. 13:7; Filip. 3:17). Huelu cuñiutucuhuaiñ. Cümelai taiñ trürümuhual fei engün mu. w21.07 pag. 20 parr. 1, 2

Eimi cüme ngüneduamfilmi tati pu culliñ, ti anümca ca pu huangülen, doi nehuentuleaimi tami feyentulen Chau Dios mu (Sal. 19:1). Doi estudiafilmi, doi maneluhuaimi Jehová taiñ deumaeteu. Ngüneduamfilmi com ñi deumael ta Jehová, raquiduamnge chem quimeltuafeimu Jehová ñi chumngen mu (Rom. 1:20). Por ejemplo, tati antü cüdetuqueiñmu ca eñumalqueiñmu feimu mülei ta mongen ta Mapu meu. Huelu tati antü meu ca tripaquei rayos ultravioleta. Tüfa huesalcayafeiñmu. Cuñihun-ngefule rume, huelu cuñiutucungequeiñ. ¿Chumngechi? Tati Mapu hualloñmanieyu tati capa de ozono, tüfa quiñe escudo reque felei. Feimu tati rayos ultravioleta doi alün-ngerpule, ca femngechi tati gas ozono pingelu doi alün-ngerpuquei, femngechi taiñ cuñiutucuaeteu. ¡Afmatufali! Fei ¿chem pimi cai? ¿Mülepei mai quiñe Ngünechen taiñ deumaeteu müna piuqueyechefengelu ca fütra quimün nielu? w21.08 pag. 17 parr. 9, 10

Fautizaule quiñe che, amuleaiñ taiñ piuqueyenierpuafiel ca taiñ respetanierpuafiel (1 Juan 4:20). ¿Chumngechi femafuiñ? Feichi che huesa duameleliyiñmu, huesa raquiduamtuculayaiñ quisu mu. Huelu mai pengelaiñ taiñ falintuniefiel, fei doicülelu troquiulayaiñ quisu mu (Rom. 12:10; Filip. 2:3). Cutranpiuqueyeafiyiñ com pu che. Ayüliyiñ taiñ rumel coneltual Jehová tañi fütra familia mu, inayafiyiñ Biblia tañi ngülam taiñ mongen mu. Jesús enseñaeiñmu taiñ cutranpiuqueyeafiel com pu che, taiñ pu caiñetuqueteu cütu (Luc. 6:32-36). Huelu quiñeque mu cüdaungeafui taiñ femal, fei ¿chem quelluafeiñmu? Eluhuaiñ taiñ raquiduamal Jesús reque ca inayentuafiyiñ tañi cüme femün. Inafiliyiñ Jehová tañi feipin ca inayentufiliyiñ ta Jesús, pengelcünuaiñ taiñ rumel müleal Jehová tañi familia mu. w21.08 pag. 6 parr. 14, 15

Maneluhuaimi ta Jehová mu. Jehová feipieiñmu maneluuliyiñ quisu mu ca com piuque mu cüdahuelfiliyiñ, eluaiñmu alünque cümeque dungu. Biblia quimeltuquei fentren che ñi nehuentun ñi serfifiel ta Jehová. Fei engün pengelingün ñi maneluucülen ta Jehová mu, fei Jehová elueyu cümelcan. Peafiyiñ cüla ejemplo. Quiñe: Abrahán. Quimlafui rume cheu ñi huercüeteu Jehová. Huelu elcünui ñi ruca, fei hula Jehová cümelcaeyu (Heb. 11:8). Epu: Jacob. Deu ñi quehuatun quiñe püllü mu, fei hula cümelcaeyu Jehová (Gén. 32:24-30). Cüla: ¿acordaimi feichi pu israelche epe concülepulu ti Feipicünuelchi Mapu mu? Pu sacerdote pünoconpulu hula ti leufü mu, fei hula Jehová eluñmaeyu ñi nopual engün (Jos. 3:14-16). Famülque mu ca mülei fentren peñi ca fentren lamngen pengelqueingün tañi maneluucülen Jehová mu. w21.08 pag. 29, 30 parr. 12-14

Eimün pu peñi ca lamngen füchalelu, cuifi mu femquefuimün chi fentren cüdau, huelu fachantü caletui ñi femngequefel, fei eimün eluhuimün tamün inafemafiel. Cam eimi füchalu fautizahulmi, ca rume quelluntucuafuimi. Pu huechequeche rume ayühuaingün tami allcütuaeteu. Eimi huimtulelmi tami nütramcayafiel ta caquelu che com tami quimürpuel tami mongen mu, Jehová rume cümelcayaimu (Luc. 6:38). Eimün pu füchaqueche doi fülmaucülelmün tati pu huechequeche mu, trür quelluhuafuimün (Rom. 1:12). Pu fütaqueche nieingün fentren quimün ca tati pu huechequeche nieingün ta nehuen. Feimu trür cüdaucülelmün, püramyeafimün taiñ Huenu Chau. Ca femngechi ti trahunche cümelcaleai. w21.09 pag. 8 parr. 3; pag. 13 parr. 17, 18

¿Chemu huelulcaingün tati pu judio? Cuifi mu, culpachi che clafantungequefui quiñe orcon mamüll mu. Fei langümngelu Jesús quiñe orcon mamüll mu, culpafe troquieyu quiñeque judio. Feimu Jesús famentungei (Deut. 21:22, 23). Tati pu judio famentufilu Jesús cüme inaduamlaingün ñi culpafe chengenon, ñi coila dalluntucungen ca ñi huesa juzgangen ta Jesús. Tati pu jueces aporiauquechi trahufemingün ñi juzgayafiel ta Jesús ca inalafingün ñi feipin tati ley (Luc. 22:54; Juan 18:24). Cafei pu sacerdote quintucaingün chumngechi ñi coila dalluntucungeal ta Jesús, fei ñi langümngeal (Mat. 26:59; Mar. 14:55-64). Fei, ¿ca chem chumingün feitachi huesaque jueces? Huiñomongetulu ta Jesús, “fentren plata elufi engün tati pu soltau” cuidaniefilu cheu ñi elcünungen ta Jesús. Femngechi feitachi soltau com püle feipingün ñi hueñentungetun ñi cuerpo ta Jesús (Mat. 28:11-15). w21.05 pag. 11 parr. 12, 13

Jehová pifule, pürüm apümafui ti huesaque dungu ñi ruparupangen Mapu mu. Huelu ñi nehuentulen mu ta Jehová müna quelluqueiñmu. Iñchiñ choyüngelu müten culpafechengeiñ. Felefuliyiñ rume, Jehová rume piuqueyenieiñmu ca cuidaniequeiñmu. Cafei, feipicünui ñi apümcayafiel com huesaque dungu ñi rupaquen Mapu mu (1 Juan 4:19). Chau Jehová llemai apümcayafui com taiñ cutrancahun ca elcünui quiñe antü tañi femal. Feimu, Chau Jehová fente taiñ piuqueyenieteu aguantalei. ¿Ca aguantalenoafulu am iñchiñ? Jehová inayentufali tañi nehuentulen mu. Fei Jesús mülelu Mapu mu, aguantai Jehová reque. Iñchiñ taiñ duam mu huesa pingequefui, illamcangequefui ca langümngei cütu quiñe orcon mamüll mu (Heb. 12:2, Heb. 12:3). Jehová ñi femün quellufi ta Jesús. Fei ca femngechi iñchiñ quelluafeiñmu. w21.07 pag. 12, 13 parr. 15-17

Jehová fill antü perdonaqueiñmu (Sal. 103:10-14). Jesús ñi pu discipulo culpafe chengefuingün, huelu Jesús piuqueyeniefi ca perdonaquefui. Ca femngechi eluhui ñi hulal tañi mongen ta iñchiñ taiñ perdonayaeteu ta Jehová taiñ culpan mu (1 Juan 2:1, 2). Taiñ perdonahun mu hueluconque, doi piuqueyeuqueiñ (Efes. 4:32). Huelu perdonayal caquelu cüdaungeafui, huelu nehuentuliyiñ femürpuafuiñ. Quiñe lamngen papeltufi Ti Huerquen fente falin-ngei ñi perdonangeal ta caquelu. Tüfa rume quellueyu. Feipi taiñ lamngen: “Tüfachi quimeltun ñi papeltufiel, quimeltueneu perdonafili ta caquelu, fei iñche ayüucülean. Ti troquiñ quimeltueneu, perdonafili quiñe che feipilan tañi huesa femnon. Ñi perdonafiel mu ti che, fei illcutuniehuelafiñ femngechi doi cüme duamcületun” pi taiñ lamngen. Taiñ perdonafiel mu taiñ pu peñi ca taiñ lamngen com piuque mu, femngechi pengelqueiñ taiñ piuqueyeniefiel engün ca inayentuquefiyiñ ta Jehová. w21.09 pag. 24 parr. 15, 16

Jesús com tañi mongen mu pengelcünui ñi falintuquefiel ti rüf dungu Chau Dios mu, ca ñi chumal cüpalechi antü mu. Fei ca quimelelfi tüfa tati pu che (Juan 18:37). Fei tati pu rüfngechi cristiano ca femngechi falintuquefingün feitachi rüf dungu (Juan 4:23). Ti apostol Pedro feipi pu rüfngechi cristiano quimeltuqueingün tati rüf dungu (2 Ped. 2:2). Cuifi mu, pu hunenque cristiano fente ñi falintuquefiel ti rüf dungu, famentuquefuingün coilaque quimeltun, huesaque raquiduam ca huesaque huimtun (Col. 2:8). Famülque mu, ca femngechi pu rüfngechi cristiano ñi quimeltun Biblia meu tripai, ca eluucüleingün ñi inayafiel Biblia ñi feipin tañi mongen mu (3 Juan 3, 4). Famülque mu, iñchiñ pu testigo feipiquelaiñ taiñ com adümfiel ñi huiriconcülen Biblia meu. Quiñeque mu huelulcauqueiñ chumngechi taiñ adümquefiel quiñeque dungu ñi feipin ta Biblia. Ca huelulcauqueiñ chumngechi ñi cüme yeniengeal ti trahunche. Doi cüme quimfalngele quiñe dungu, fei cacünutuqueiñ taiñ raquiduam. w21.10 pag. 21, 22 parr. 11, 12

Cuifi mu, deumangequefui fütraque malal ñi cuñiutucungeam ta che tañi pu caiñe mu. Feitachi fütraque malal reque, Jehová fente taiñ piuqueyeteu mu cuñiutucuqueiñmu. Femngechi chem rume catrütulayafeiñmu taiñ cüme hueniyeafiel Jehová. Cafei Jehová fente taiñ piuqueyeteu mu, fültucupaqueiñmu quisu mu (Jer. 31:3). Ti rey David ca quimfalcünui chumngechi taiñ cuñiutucuqueteu Jehová. David feipi: “Chau Dios tañi ellcaupeyüm, fei pengelqueneu tañi nor piuqueyenieteu [...]. Chau Dios tañi nor piuqueyenieteu ca tañi incañpeteu. Tañi ellcaupeyüm ca tañi montulqueteu. Chau Dios tañi escudo ca tañi chelcomtuhue reque felei” (Sal. 59:17; 144:2). ¿Chumngelu feipi David? Cheu rume müleliyiñ, Jehová cuñiutucuaiñmu taiñ cüme hueniyeafiel Jehová. w21.11 pag. 6 parr. 14, 15

Jesús feipifi tañi pu discipulo mülei ñi doi maneluhual Chau Jehová mu. ¿Chumngelu? (Mat. 8:23-26). Jesús ca tañi pu discipulo amulelu quiñe farcu meu, mahuntucu cürüfrumei. Fente tañi mahunün, ti co huitruconpui farcu meu. Jesús conumaucülefui. Fente tañi llicalen engün, trepelfingün ta Jesús tañi montulaeteu. Fei Jesús feipieyu engün: ‘¿Chumngelu am ta fente llicaimün? ¡Nehue feyentulelaimün!’. ¿Rupaquefuimi chi quiñe huesa dungu mu? ¿Quiñe cürüftucu mahun mu chi cam quiñe fütra nüyün? Cam, ¿cutrancüleimi chi? Femngechi dungu mu rupalmi, huesa duamcüleafuimi chi, quimlayafuimi tami chumal. Huelu fentecünuquilnge tami maneluhual Jehová mu. Ngillatufinge Jehová com tami piuque mu. Raquiduamaimi Jehová chumngechi tami quelluqueteu cuifi, fei nehuentucuaimu (Sal. 77:11). Loncontucunge: Jehová turpu quisucünulayaimu. w21.11 pag. 22 parr. 7, 10

Cuifi mu, quiñe israelita feipiafui: “Iñche turpu nüquelan quiñe chemcün ca che ngelu, feimu inaquefiñ feitachi huercün dungu” piafui. Huelu hueñefe ca pingeafui, ¿chumngelu? Quiñe comerciante arreglacünuafui tañi pesa ñi encañayafiel tati pu che ngillacamequelu, femngechi ca hueñeafui. Levítico 19:13 feipi: “Ngünencachelayaimi”. Feimu quiñe che norngenole tañi negocian mu, feita hueñefengei. Tati ley feipiquefui ñi hueñenoal tati pu israelita, huelu ñi feipin Levítico quelluqueiñmu taiñ doi cüme inayal feitachi ley, fei taiñ nor chengeal com dungu meu. Jehová ayüquelai iñchiñ taiñ hueñeal ca taiñ norngenoal negocian dungu mu. Adümfiliyiñ Jehová tañi raquiduam tüfachi dungu meu, quelluaiñmu taiñ ngüneduamuhual. Fei ramtuhuafuiñ: “¿Norngepen mai tañi negocian mu?”. w21.12 pag. 9, 10 parr. 6-8

Chem dungu mu rume huelulcauliyiñ, llellipuafiyiñ ta Jehová ca “perdonaen Chau” piafiyiñ. Huelu fütra culpaliyiñ, ca mülefui taiñ feipiafiel pu loncolelu taiñ quelluaeteu. Tüfa engün cüme allcütuaiñmu ca Biblia mu cüme ngülamtuaiñmu. Cafei quiñentrür llellipuai iñchiñ mu taiñ perdonangeal, femngechi Jesús tañi duam mu cüme hueniyeutuafuiñ Jehová engu (Sant. 5:14-16). Raquiduamaiñ fente ñi cutrancahun ta Jesús. Doi raquiduamliyiñ fente ñi cutrancahun ta Jesús, doi piuqueyeafiyiñ ca doi piuqueyeafiyiñ ta Jehová. Fill tripantu acordayafiyiñ Jesús tañi lan ca feipiafiyiñ tati pu che ñi femal. Chau Jehová elfalcünueiñmu taiñ enseñacheal Jesús mu, ¡rume falin cüdau tati! w21.04 pag. 18, 19 pag. 13-16

Raquiduamnge tañi rupan ta Jesús. Quiñe pun Jesús ngillatufi ta Jehová, rupan ngillatulu amui quiñe huincul mu. Fentren che mülepurquei fei mu, ca müleyerquei quiñeque cutran che ca pofre. Rume cansalepelafui Jesús. ¿Chumi ta Jesús? Pefilu cutranpiuqueyefi engün. Re tremoltulafi müten, ca yafültucufi quiñe hueupin mu. Tüfachi hueupin Sermón del Monte pingequei (Luc. 6:12-20). Cafei Jesús ayüfulu rume ñi quisuleal, eluhui ñi quelluafiel ta che. Langümngelu tañi cüme hueni, Juan ti Fautizachefe, müna hueñancülepelafui ta Jesús. Fei ti Biblia feipi Jesús quimlu ñi lan Juan ti Fautizachefe, farcu mu amui ca mapu ñi quisuleal (Mat. 14:10-13). Huelu fentren che puhurquefui cheu tañi puhuam ta Jesús (Mar. 6:31-33). Jesús inaduami pu che ñi duamnien ñi allcütual Chau Jehová ñi dungu, femngechi quellufi engün (Luc. 9:10, 11). w22.02 pag. 21 parr. 4, 6

Huesa duamelfiliyiñ quiñe peñi cam quiñe lamngen, ¿chem mülefui taiñ femal? Mülei ñi llellipuafiel ta Jehová taiñ quelluaeteu, femngechi taiñ cümelcautual ti peñi cam ti lamngen iñchiñ. Cafei, mülei taiñ ngüneduamuhual. Ramtuhuafuiñ: “¿Ñom piuque mu eluucülen tañi feipial: ‘Huesa femfun. ¿Cümelcautuafuyu? Perdonayafen’? Fei iñche hunecünuli tañi cümelcautual tañi peñi cam lamngen iñchiu, ¿chum duamafui Jehová ca Jesús?”. Tüfachi dungu quelluaiñmu taiñ allcütuafiel Jesús ñi dungu ca taiñ ñom piuque mu cümelcautual pu peñi ca pu lamngen iñchiñ. Iñchiñ ayüliyiñ taiñ cümelcautual quiñe peñi cam quiñe lamngen iñchiñ, ñom piuque mu nütramcayafiyiñ (Efes. 4:2, 3). Mülei taiñ fülmayafiel ca cüme nütramcayafiel, femngechi taiñ huiño cümelcaucületual. Loncontucuaiñ: falilai ñi quimngeal inei ñi huesalcan. Doi falin-ngei taiñ cümelcautual taiñ pu peñi ca pu lamngen iñchiñ (1 Cor. 6:7). w21.12 pag. 25, 26 parr. 13-16

¿Chumngelu ngümai Jesús? Jesús quimniefui ñi allcütunoafiel Jehová ñi ngülam alünque pu judio. Femngechi Jerusalén ñi teifücangeal, ca pu mongetripayalu ñi esclavongeal (Luc. 21:20-24). Rupachi antü mu, Jesús ñi feipin femtripai. Fentren che feyentulaeyu. Eimi tami lof mu, ¿chumngechi llouquei pu che ti amuldungun cüdau? Cüme llounole pu che, ¿chem quimeltuafeimu eimi Jesús tañi ngüman mu? Jehová duamtuniefi pu che. Biblia feipi ta Jehová ayünielai inei no rume ñi apümcangeal. Ayüniei ta com pu che ñi nor raquiduamtual (2 Ped. 3:9). Fachantü iñchiñ, rume nehuentun mu amuldungulelquefiyiñ taiñ pu chafche, femngechi pengelquefiyiñ taiñ duamtuniefiel (Mat. 22:39). w22.01 pag. 16, 17 parr. 10-12

Raquiduamaiñ chumngechi Jehová quelluquefi tañi pu che famülque mu ca chumngechi quelluqueiñmu quisuque iñchiñ. Femngechi doi maneluhuaiñ quisu meu. Huelu doyelchi mai, doi piuqueyerpuafiyiñ Jehová. Tüfa müna cümelcaqueiñmu. ¿Chumngelu? Piuqueyefiliyiñ Jehová inayafiyiñ tañi feipin, eluhuaiñ taiñ femal re cümeque dungu taiñ ayühulafiel ca nehuencüleaiñ taiñ chaftuafiel rupale huesaque dungu (Mat. 22:37-39; 1 Cor. 13:4, 7; 1 Juan 5:3). Rume falintufali taiñ hueniyenieafiel taiñ piuqueyen Chau Jehová (Sal. 63:1-7). Loncontucunieaiñ: llellipuliyiñ, papeltuliyiñ Biblia ca raquiduamliyiñ taiñ papeltun, femngechi poyequefiyiñ ta Jehová. Femaiñ Jesús reque. Quintuaiñ cheu taiñ tüngcüleal taiñ llellipuafiel Jehová ca taiñ papeltual. Petu papeltuliyiñ Biblia ca müleliyiñ trahun mu, chem no rume catrütulayaiñmu. Cafei, pediafiyiñ Jehová taiñ quelluaeteu. Ngünamcanoliyiñ taiñ tiempo, Jehová cümelcayaiñmu ca eluaiñmu afnoachi mongen (Mar. 4:24). w22.01 pag. 30, 31 parr. 18-20

Jesús pengeli fente falin-ngen tüfa. Quisu feipi taiñ famentuafiel huesaque raquiduam, femngechi taiñ fütra culpanoal (Mat. 5:21, 22, 28, 29). Com iñchiñ ayüqueiñ taiñ ayühulafiel ta Jehová, ¿felelai? Feimu rume falin-ngei taiñ famentufemafiel chem huesaque raquiduam rume nierumeliyiñ. Jesús feipi tati tripaqueel hun mu, piuque mu tuhui (Mat. 15:18). Felei, taiñ dunguqueel pengelquei taiñ nieel ta piuque mu. Feimu ramtuhuafuiñ: “¿Rumel rüf dunguquen, quiñeque mu cümelcanoelimu rume? Curengeli, ¿daquelcantuquefiñ caquelu pu domo? Fütangeli, ¿daquelcantuquefiñ caquelu pu huentru? ¿Com famentuquefiñ podngechi nütram? Huesa pielimu quiñe che, ¿ñom piuque mu lloudunguquefiñ?”. Com tüfachi ramtun raquiduamtucuaimi. Ayülmi tami elcünual tami cuifi huesa mongen, huesa pilayafimi tati pu che, coila dungulayaimi ca podngechi dungu nütramcalayaimi. w22.03 pag. 5 parr. 12-14

Biblia feipiqueiñmu taiñ quintual ngülam. Proverbios 13:10 feipi: “Tati quim chengelu quintuyahulquei ngülam”. Tüfa rume rüfngei. Tati pu quintuyahulquelu ñi ngülamtungeal doi quim chengequei tati pu quintuquenolu mu. Feimu iñchiñ quintuaiñ taiñ elungeal ngülam. ¿Chumül feipiafuiñ quiñe peñi cam quiñe lamngen taiñ ngülamtuaeteu? Raquiduamnge tüfa. 1) Quiñe lamngen ayüle tañi doi cüme quimeltuchefengerpual, feipiafui ta cangelu lamngen tañi compañaeteu ñi enseñalmeafiel quiñe che. Deule ti chillcatun, feipiafui ti lamngen tañi ngülamtuaeteu. 2) Quiñe üllcha lamngen pefile quiñe tacuhun ca ayüle ñi ngillayafiel, feipiafui ta cangelu quim lamngen ñi ngülamtuaeteu. Femngechi femle, cüme dulliafui chem tañi ngillayal. 3) Quiñe peñi feipingele ñi hueupial trahunche mu, feipiafui ta cangelu peñi cüme hueupiquelu ñi allcütuaeteu ñi hueupin. Fei deule ti hueupin, ti peñi feipiafeyu chem dungu mu ñi cüdahual. Quiñe peñi alün tripantu yeniele rume tañi hueupifengen ca feipiafui quiñeque peñi cüme hueupiquelu ñi ngülamtuaeteu (Prov. 19:20). w22.02 pag. 13 parr. 15-17

Jehová duamtunieiñmu ta iñchiñ chumngechi ñi duamtuniefiel ta Jesús mülepalu Mapu mu (Juan 5:20). Jehová quellufi ta Jesús ñi nieal nehuen-ngechi maneluhun ca elufi nehuen ngañhuadcülelu. Ca elufi com chem tañi duamnieel tañi mongeleam. Ca femngechi feipifi ta Jesús ñi poyeniefiel (Mat. 3:16, 17). Jesús quimniefui tañi Chau engu tañi mülen, feimu turpu quisulelu troquiulai. Jesús reque, iñchiñ ca pequefiyiñ chumngechi Jehová taiñ piuqueyenieteu. Raquiduamnge tüfa mu: Jehová quimeltueiñmu taiñ hueniyeafiel. Ca femngechi Jehová elueiñmu taiñ pu peñi ca pu lamngen taiñ piuqueyeaeteu ca taiñ quelluaeteu huesaque dungu mu rupaliyiñ (Juan 6:44). Ca quelluqueiñmu taiñ doi maneluhual quisu mu. Ca femngechi eluqueiñmu com taiñ duamnieel taiñ mongeleam (Mat. 6:31, 32). Taiñ raquiduamün mu chumngechi Jehová taiñ rumel poyenieteu, ca femngechi iñchiñ doi piuqueyequefiyiñ. w21.09 pag. 22 parr. 8, 9

Petu tami papeltunofiel Biblia, ¿chem mongen yeniequefuimi? Femquefuimi chi huesaque dungu ca inaquefuimi chi huesaque che tañi raquiduam. Quimquelafuimi ta Chau Dios ca niequelafuimi ta maneluhun (Efes. 2:12). Huelu chillcatulu am eimi Biblia cacünutui tami mongen. Petu chillcatufilu Biblia ta eimi, ¿chem dungu quimürpuimi? Quimürpuimi ta Huenu Chau rume piuqueyeimu. Ca quimürpuimi cüme elcünutufulmi tami mongen ca tami raquiduam, femngechi müten ayühulafuimi ta Jehová ca conafuimi quisu tañi troquiñche mu. Ca quimürpuimi tami femal Jehová ñi ayüqueel ca tami famentuafiel Jehová ñi ayüquenoel (Efes. 5:3-5). Jehová deumaeiñmu, feimu quisu müten feipiafeiñmu chem taiñ femal. Fei quisu feipieiñmu, petu taiñ fautizaunon, mülei taiñ famentuafiel taiñ cuifi huesa mongen ca taiñ femquefelchi dungu. w22.03 pag. 2 parr. 1-3

Ti caquelu ufisa ayüucüleingün tañi trahual ñi acordangeal Jesús ñi lan, coneltunofule rume ñi iyafiel ti cofque ca putuafiel ti pulcu. Cafei raquiduamqueingün feichi maneluhun ñi nieel engün. Quisu engün ayüqueingün ñi allcütuafiel ti hueupin. ¿Chumngelu? Feichi hueupin raquiduameleyu engün ñi chumal Jesús ca ti 144.000 dullinque cristiano. Ngüneniefile engün ti Mapu, cüme elcünutuafingün ca quelluafingün pu che ñi culpanchengehuenoal. Cafei ti allcütufilu ti hueupin, raquiduamcüleingün ñi femtripayal fillque profecia mülelu Biblia mu. Tüfa müna ayühun-ngelleai mai (Is. 35:5, 6; 65:21-23; Apoc. 21:3, 4). Ti caquelu ufisa raquiduamcülen mu engün ñi mülepual ti hue Mapu mu, doi maneluuqueingün ñi femtripayal Jehová tañi feipicünueteu. Cafei doi eluucülequeingün ñi serfinieafiel Jehová (Mat. 24:13; Gál. 6:9). w22.01 pag. 21 parr. 5-7

Hulün mu tañi mongen ta Jesús, huiñoleltufi tati pu che ñi rumel mongeletual (1 Cor. 15:22). ¿Chumngelu duamniefuiñ? Cuifi mu Jehová tañi ley feipiquefui langümngele quiñe che, mülefui ñi cullingeal reque cangelu che ñi mongen mu (Éx. 21:23, 24). Culpalu Adán, ñamümi tañi cüme mongen ñi niequefel. Feimu ñi cullingeal tüfa, Jesús hulpai ñi culpan-ngenochi mongen, femngechi inai chem pilen Jehová ñi huercün dungu (Rom. 5:17). Femlu tüfa, Jesús “Rumel Mülechi Chau” pingetui (Is. 9:6; Rom. 3:23, 24). Jesús com ñi mongen mu nor piuqueyefi ta Jehová ca femi com ñi huercüeteu. Cafei huli ñi mongen iñchiñ mu. ¿Chumngelu? Fente ñi piuqueyefiel mu tañi Chau ca taiñ piuqueyenieteu iñchiñ (Juan 14:31; 15:13). Jesús ñi duam mu, pu che maneluutuafui ñi rumel mongeleal Mapu mu, tüfa ñi ayüquefel ta Jehová. w21.04 pag. 14 parr. 2, 3