Abril

Jesús pengeleleiñmu taiñ piuqueyenieteu tañi ayühunquechi hulün mu tañi mongen com iñchiñ mu (Juan 15:13). Iñchiñ turpu cullilayafuiñ Jehová ca Jesús tañi femün mu engu. Huelu femliyiñ Jehová tañi ayüqueel, mañumtuafuiñ (Col. 3:15). Jesús tañi lapan mu, pu dullinque cristiano lifngeingün Jehová ñi adquiñ mu, ca fotüm reque troquieyu Jehová. Feimu rume mañumtuquefingün Jesús ñi lapan (Mat. 20:28; Rom. 5:1; 8:15-17, 23). ¿Ti pu caque ufisa cai? Ca femngechi Jesús tañi lapan mu hueniyeafuingün Jehová ca montuafuingün ti “fütra cutrancahun” mu (Apoc. 7:13-15). Feimu rume falintuquefingün Jesús tañi lapan. Pu dullinque cristiano ca ti caquelu ufisa trahuluulu engün ñi acordayafiel Jesús tañi lan, mañumtuquefingün tañi montuleteu. w22.01 pag. 23 parr. 14, 15

Jesús huesa duameleyeu ñi dallucangen coila dungu mu. ¿Chumngelu? Jesús feipingei ñi yamnienofiel ta Chau Dios (Mat. 26:64-66). Jesús rume piuqueyefui tañi Chau, feimu rume hueñancülquefeyeu tüfa. Fei ngillatufi ta Jehová ñi rupanoal feichi huesa dungu mu (Mat. 26:38, 39, 42). Pu israelche culpafe chengefuingün Adán ñi duam mu ca feipicünuingün ñi inayal Jehová ñi ley dungu, huelu femlaingün. Feichi epu dungu mu, mülefui ñi layal engün. Feimu duamniefuingün ñi layal ta Jesús, fei tañi nieal ta maneluhun (Rom. 5:12). Jehová ñi ley feipi chem che rume fütra culpafule, mülefui ñi layal. Fei quiñeque mu, deu ñi lan pültrücünungefui quiñe orcon mamüll mu (Deut. 21:22, 23; 27:26). Feimu, lalu Jesús ti orcon mamüll mu, pu israelche malisiangehuelaingün, fei maneluutuafuingün ñi rumel mongeleal (Gál. 3:10). Pu israelche famentufilu rume ta Jesús, ñi lan rume quelluafeyeu engün. w21.04 pag. 16 parr. 5, 6

Raquiduamnge ñi rupan ta Jesús feichi antü epe puulu ñi layal. Pu soltau hulelcayeu engün (Mat. 26:52-54; Juan 18:3; 19:1). Fei huimacangei quiñe latigo mu, rume allfülcangei. Fei hula, Jesús obligangei ñi meñcuyeafiel tati orcon mamüll cheu ñi clafantucungeal. Fei pichi rupalu, Jesús yafüngehuelai, fei pepi meñcuyehuelafi tati orcon mamüll. Fei cangelu huentru obligangei ñi femal tüfa (Mat. 27:32). Fei puulu üyeu, Jesús clafantucungei ti orcon mamüll mu. Pültrülelu, müna cutrantupelafui tañi allfeñ. Cafei Jesús tañi ñuque ca tañi pu hueni rume ngümacaumequefuingün. Huelu pu loncolechi religioso ayentuniefigün ta Jesús (Luc. 23:32-38; Juan 19:25). Fentreñma mu Jesús rume sufrii. Ñi chumcünungen tañi cuerpo petu pültrülelu, rume cüdautui ñi neyüal ta Jesús. Jesús quimniefui ñi femmequen Jehová tañi ayüqueel, feimu com piuque mu llellipufi ta Jehová. Fei hula, mültrongnacümcünuhui ñi lonco, fei lai (Mar. 15:37; Luc. 23:46; Juan 10:18; 19:30). Fei llemai, petu ñi lanon Jesús rume illamcangei ca cutrancangei. w21.04 pag. 16 parr. 4

Jesús nütramcafi tañi mari quiñe apostol tati hue pacto mu ca tati pacto del Reino pingelu (Luc. 22:20, 28-30). Feichi epu pacto ñi duam mu, tati 11 apostol ca caquelu cristiano reyngerpuafui ca sacerdotengerpuafui huenu mu (Apoc. 5:10; 14:1). Tati pu dullinque cristiano mülehuelu Mapu mu ca coneltulei feichi epu pacto mu. Feimu trahun mu engün ñi acordayal Jesús tañi lan, iquefingün ti cofque ca putuquefingün ti pulcu. Fei engün maneluucülei ñi rumel mongeleal ta huenu mu ñi ngünenieal Jesús engün ca femngechi ñi pülleleal ca ñi peafiel ta Chau Jehová (1 Cor. 15:51-53; 1 Juan 3:2). Feitachi dullinque cristiano quimnieingün mülefui ñi püntütripanoal Jehová mu femngechi ñi amual ta huenu mu (2 Tim. 4:7, 8). w22.01 pag. 21 parr. 4, 5

Feichi clafantucungeel Jesús orcon mamüll mu, caque quiñeque püle elelngei quiñeque huentru (Luc. 23:40, 41). Huelu quiñe pefi ta Jesús ca feipifi: ‘Acordayaen ta iñche, lonco ülmencületulmi’ (Lucas 23:42). Jesús quimniefui tañi Chau tañi cutranpiuqueyechefengen feimu elufi ti rüfngechi maneluhun tati huentru (Sal. 103:8; Heb. 1:3). Chau Jehová eluucülei taiñ perdonayaeteu ca cutranpiuqueyeaeteu. Huelu, ¿chem mülefui taiñ femal iñchiñ? Rüf repentihuaiñ, elcünuaiñ huesaque femün ca maneluhuaiñ Jesús ñi hulün ñi mongen iñchiñ mu (1 Juan 1:7). Quiñeque iñchiñ cuifi mu huesaque dungu femquefuiñ, fei quiñeque mu acordarumequefiyiñ. “¿Iñche perdonapeafeneu mai Jehová?” piafuiñ. Femngechi duamcüleliyiñ, cümeafui taiñ raquiduamal ñi rupan feichi huesa huentru. Epu puulu ñi layal, feyenturpui Jesús mu. Femfulu rume, Jesús cutranpiuqueyeyu. Feimu, Jehová doyelchi mai cutranpiuqueyeaiñmu (Sal. 51:1; 1 Juan 2:1, 2). w21.04 pag. 9 parr. 5, 6

¿Chumngelu fente cümei ñi femün Jesús petu ñi lanon? 1) Femngechi pengeli ñi coilatufengen ta Huecüfü. ¿Chumngechi? Ñi femün ta Jesús pengeli quiñe che nienole culpan, nor piuqueyeafui ta Jehová chumelieyu rume ta Huecüfü. 2) Jesús hultucui ñi mongen iñchiñ mu, fei Jesús ñi duam mu com iñchiñ cüme hueniyeafuiñ ta Jehová ca rumel mongeleafuiñ. Ca 3) Jesús pengeli Jehová müten felei ñi ngünenieafiel pu che ca quelluntucui ñi cüme acordangeal Jehová ñi üi. Fill antü chumaiñ rume taiñ nor piuqueyeafiel ta Jehová, quelluntucuaiñ ñi cüme acordangeal Jehová ñi üi, pengelaiñ Huecüfü ñi coilatufengen ca Jehová müten felei ngünenieafiel pu che. Fei larumeliyiñ, Jehová loncontucunieai taiñ cüme femquen. w21.04 pag. 12 parr. 13, 14

Jesús coila dalluntucungei ca culpai pingei fei ñi chumnon rume. Jesús tañi pu caiñe ayentueyu, cutrancaeyu ca clafantucueyu quiñe orcon mamüll mu. Fei Jesús catangei tañi namun ca tañi cuhu, fei epe neyühuelai ca dunguhuelai rume fente ñi cutrancaumequen mu. Felelu rume, falinque dungu feipi ¿Chem quimürpuiñ Jesús ñi feypin mu? Mülei taiñ perdonacheal ca maneluhual Jehová taiñ perdonayaeteu. Nieiñ quiñe fütra familia reque. Taiñ pu peñi, pu lamngen eluucülei taiñ quelluaeteu. Fei duamnieliyiñ taiñ quellungeal, feipiafiyiñ müten. Jehová quelluaiñmu taiñ nehuencüleal chem huesa dungu rupafuliyiñ rume. ¿Mongelepeafuiñ mai hule? Quimlaiñ. Fei fill antü eluhuaiñ taiñ nor piuqueyeafiel Jehová. Cafei rüf maneluuqueiñ Jehová taiñ huiñomongeltuaeteu. w21.04 pag. 8 parr. 1; pag. 13 parr. 17

Inafiliyiñ Jesús tañi femün, aflayai taiñ mongen. Quiñe rupa quiñe hueche huentru ramtufi ta Jesús: “Quimeltufe, ¿chem cüme dungu am feman tañi nieal rumel mongen?”. Fei Jesús feipieyu: “Cüpange ca inaen” (Mat. 19:16-21). Cangelu rupa Jesús feipifi ta quiñeque feyentulenochi judio: ‘Iñche ñi pu ufisa inaqueneu. Iñche ta eluafiñ rumel mongen’ (Juan 10:24-29). Iñchiñ, ¿chumngechi pengelafuiñ taiñ feyentulen Jesús meu? Mülei taiñ inayafiel ñi quimeltuel ca ñi femel ta Jesús. Femliyiñ, turpu aflayai taiñ mongen (Mat. 7:14). Petu taiñ inanon Jesús tañi femün, mülei taiñ cüme quimafiel. Fill antü mülei taiñ doi quimafiel tañi chumngechi chengen, tañi ayüqueel, tañi ayüquenoel ca tañi huercüel. Tunten tripantu yenieliyiñ rume Jehová ñi rüpü mu, eluucüleaiñ taiñ doi quimafiel ta Jehová ca Jesús. w21.04 pag. 4 parr. 9, 10

Pablo huesa duamcülequefui chi tañi huesa femün cuifi (1 Tim. 1:15). Petu ñi quimnon ta Jehová, Pablo inantucufi pu hunenque cristiano fillque huaria mu. Presuntucufi quiñeque engün ca quelluntucufi tañi langümngeal. Feimu quimfilu ta Jehová, com pu culpafe meu “iñche ta hunelen” pi ta Pablo (Hech. 26:10, 11). Pablo quimürpupelafi tañi pu fotüm feichi pu cristiano langümngelu. Feimu pefilu, huesa duampelafui. Pablo huesa duamcülequefui ñi huesa femün cuifi mu, huelu raquiduamcülequelafui feichi dungu meu müten. Pablo feyentulequefui Jesús tañi lan com iñchiñ mu. Feimu feipi: ‘Iñche llohun tüfachi cüdau Ngünechen tañi cüme cutranpiuqueyeteu meu’ (1 Cor. 15:3, 10). ¿Chem am quimeltueiñmu? Mülei taiñ feyentual Jesús lai quisuque iñchiñ mu, femngechi fültucunieiñmu Chau Jehová mu (Hech. 3:19). Taiñ femal fachantü ca cüpalechi antü, Jehová ngüneduamniequei. Jehová ngüneduamquelai taiñ cuifique culpan (Is. 1:18). w21.04 pag. 23 parr. 11

Jesús tañi antü mu, fentren Judio raquiduamquelafui ta Jesús tañi layal. Huelu feipicünungefui Jesús ñi langümngeal quiñe culpanche reque, fei taiñ perdonangeal iñchiñ taiñ culpan (Is. 53:12). Femngechi langümngefulu rume ta Jesús, pu Judio feipilayafui chem dungu no rume ñi famentuafiel. Famülque mu, taiñ maneluucüleal Jesús mu, mülei taiñ cüme ngüneduamal ñi rüfngepen mai ñi feipingequen pu testigo mu. Jesús feipicünui ñi üyautungeal “fill coila dungu meu” tañi pu inanieteu (Mat. 5:11). Fei, ¿chumngelu falin-ngei taiñ famentuafiel com feichi coilaque dungu? Com tüfachi coila dungu Huecüfü mu cüpai. Ti Huecüfü adniequefi taiñ pu caiñe ñi coilaque dungu feipial iñchiñ mu (Apoc. 12:9, 10). Feimu famentufiliyiñ, llicalcalayaiñmu taiñ poyeafiel ta Chau Jehová. w21.05 pag. 12 parr. 14, 16

Quelluafiyiñ ti estudiaquelu Biblia ñi maneluhual Jehová mu. Jesús feipifi tañi pu discipulo Jehová tañi quelluaeteu ca tañi piuqueyeteu mu (Mat. 10:19, 20, 29, 30). Feipiafiyiñ tati estudiante Jehová tañi quelluaeteu. ¿Chumngechi quelluafuiñ taiñ estudiante ñi maneluhual Jehová mu? Quiñentrür ngillatuaiñ ta Jehová ñi quelluafiel ñi femürpual cümeque dungu. Quiñe peñi Polonia mu mülelu feipi: “Tañi quimeltuqueteu ta Biblia llellipuquefui iñche meu. Femngechi Jehová ñi quelluaeteu ñi femal cümeque dungu. Inaduamün chumngechi Jehová allcütuñmafi tañi llellipun tañi maestro. Feimu fill antü llellipurpufiñ ta Jehová. Hue conlu cüdau mu iñche, pedin permiso ñi amual trahun mu ca fütra trahun mu, fei elufemngen. Feimu inaduamün Jehová tañi quellueteu” pi taiñ peñi. Fachantü, ¿niepeimi mai quiñeque che tami enseñalelquefiel ta Biblia? Femnolmi, ¿chumngechi quelluafuimi caquelu pu estudiante ñi fautizahurpual? Compañafuimi caquelu pu peñi ca pu lamngen ñi enseñalmeafiel ti che. Quimfali llemai Jehová ñi falintuniefiel pu estudiaquelu Biblia. Ca iñchiñ falintuqueiñmu taiñ quelluquefiel mu tati pu che. Feimu rume piuqueyequeiñmu (Is. 52:7). w21.06 pag. 7 parr. 17, 18

Fill antü papeltufiliyiñ Biblia, pengelaiñ fente taiñ falintufiel. Mülei taiñ adcünual taiñ tiempo taiñ papeltuafiel ca estudiayafiel Biblia. “Nieli tiempo müten papeltuafiñ” pilayaiñ. Fentecünunoliyiñ taiñ papeltuafiel Biblia, nehuentu feyentuleaiñ Jehová mu. Iñchiñ trürcülelaiñ tati “pu mallmangelu ca quimcahun-ngelu” (Mat. 11:25, 26). Doi mai, iñchiñ nieiñ ta feyentun Jehová mu, Biblia ñi quellun meu. Biblia quimeltuqueiñmu chumngelu am fente ñi huesalcalen ti dungu Mapu mu ca quimeltuqueiñmu chem ñi femal ta Jehová cüpalechi antü meu. Feimu eluucüleaiñ taiñ nehuentu feyentuleal Jehová mu. Ca femngechi quelluafiyiñ fentrenque che ñi feyentulerpual Jehová taiñ deumaeteu mu (1 Tim. 2:3, 4). Raquiduamcüleaiñ com ti cümeque dungu ñi rupayal cüpalechi antü meu. Com pu che mülealu Mapu mu püramyeafingün ta Jehová ca feipiafingün: ‘¡Felei tami llohual com cüme püramyen, eimi am deumafilu ta com tati mülelu!’ (Apoc. 4:11). w21.08 pag. 19 parr. 18-20

Tati pu loncolelu mülefui tañi ngülamtucheal. Quisu engün mülei ñi cüme ngülamtucheal, femngechi ñi yafültucuafiel ca puhual ti che ñi piuque mu (Prov. 27:9). Tati pu loncolelu rume piuqueyequefingün tañi pu peñi ca pu lamngen. Feimu quiñeque mu ngülamtuquefingün inaduamfilu ñi huelulcaumequen engün (Gál. 6:1). Quiñe loncolelu petu tañi ngülamtunofiel quiñe peñi cam quiñe lamngen, mülefui ñi acordayal chem pin tati apostol Pablo. Pablo feipi tati piuqueyechequelu ñom chengei ca cüme piuquengei, chem rupale rume afeluuquelai. Com feyentuquei, rumel maneluucülequei, com dungu meu nehuentulequei (1 Cor. 13:4, 7). Tati pu loncolelu raquiduamün mu chem pin ta Pablo, quelluafeyu tañi ngülamtucheal tañi rüf piuqueyefiel mu. Quiñe che piuqueyenquechi ngülamtungele, doi cüme llohuafui ti ngülam. w22.02 pag. 14 parr. 3; pag. 15 parr. 5

Jehová cüme deumafi tati pu püllü ca tati pu che, niequelaingün ta culpan. Huelu Satanás famentufi ta Jehová. Fei ca femngechi hueluraquiduamelfi ta Adán engu Eva. Rupai chi antü fei caquelu püllü ca caquelu che ca famentufingün ta Jehová (Jud. 6). Traicionangelu troquiupelai ta Jehová. Felefulu rume, Chau Jehová nehuentulei. Fei acuai chi antü ñi apümcayafiel com tañi pu famentuqueteu. Fei ngehuenole engün, Jehová ca tañi pu poyequeteu rume ayüucüleaingün. Job ñi antü meu, Huecüfü feipi com tati pu che serfiquefi ta Jehová re tañi cümelcayaeteu müten (Job 1:8-11; 2:3-5). Fachantü, Huecüfü amulei ñi coilatulen (Apoc. 12:10). Iñchiñ cai, ¿chumngechi quimfalcünuafuiñ Huecüfü ñi coilatulen? Rupaliyiñ huesaque dungu mu, nehuencüleaiñ fei fentecünulayaiñ taiñ poyefiel Jehová. Jehová cümelcafi ta Job tañi aguantan mu. w21.07 pag. 9 parr. 7, 8

Ti apostol Pablo feipi taiñ cuifi huesa mongen taiñ niequefel mülei taiñ clafantucuafiel reque orcon mamüll mu (Rom. 6:6). ¿Chem cüpa feipifui ta Pablo? Mülei taiñ inayentuafiel ñi femün ta Jesús. Jesús eluucülefui ñi clafantucungeal orcon mamüll mu, femngechi tañi ayühulafiel ñi Chau. Ca femngechi iñchiñ eluucüleaiñ taiñ famentuafiel Jehová tañi üdequeel, femngechi ayühulafiyiñ ta Jehová. Femngechi müten femliyiñ, cüme raquiduam nieaiñ ca maneluhuafuiñ taiñ rumel mongeleal (Juan 17:3; 1 Ped. 3:21). Jehová cambiacünulayai tañi huercün dungu iñchiñ taiñ duam mu. Doi mai, iñchiñ mülei taiñ cambiatual taiñ chumngechi chengen, femngechi taiñ inayafiel ñi huercün dungu (Is. 1:17, 18; 55:9). Petu tami fautizaunon, chaftuquefimi huesaque raquiduam. Huelu ca chaftunieafimi fautizahulmi hula. Llellipuafimi Jehová tami quelluaeteu ca maneluunge quisu ñi nehuen mu, eimi tami nehuen mu no (Gál. 5:22; Filip. 4:6). Cüdahuaiñ taiñ famentuafiel taiñ cuifi huesa mongen ca cüdahuaiñ taiñ niehuetunoafiel feichi huesa mongen. w22.03 pag. 5, 6 parr. 15-17

Doyümfiliyiñ taiñ cüdahuelquefiel ta Jehová, quisu cuidanieaiñmu ca eluaiñmu com taiñ duamnieel (Mat. 6:33). Maneluuliyiñ Jehová taiñ cuidayaeteu, maneluulayaiñ ti plata mu ca raquiduamlayaiñ rume taiñ rüf ayühulafeteu. Iñchiñ quimnieiñ cüdahuelfiliyiñ ta Jehová, rüf ayüucüleaiñ (Filip. 4:6, 7). Quiñeque iñchiñ nieiñ chi ta plata, fei ngillayafuiñ fillque chemcün. Huelu ramtuhuafuiñ: “¿Rume niepefiñ mai piuque mu feitachi chemcün?”. Cafei petu taiñ ngillanofiel quiñe chemcün, ramtuhuafuiñ: “¿Rüf niepen mai ta tiempo tañi püneafiel?”. Acordayaiñ Jehová taiñ elueteu quiñe falin cüdau quisu ñi trahunche mu. Feimu eluhuaiñ chem no rume taiñ catrütunoaeteu taiñ femal tüfachi cüdau. Inayentulayafiyiñ ñi femün ti ricu huentru ñi nütramcael Biblia. Fei rume falintufi tañi nieel feimu inalafi ta Jesús. Tañi femün mu, coneltulai Jehová tañi fütra familia mu. ¡Müna huesa! (Mar. 10:17-22). w21.08 pag. 6 parr. 17

Chillcatufilmi ta Biblia quimürpuaimi Jehová ñi chumngen. Tüfa quelluaimu tami quimal ñi rüf mülen ta Chau Dios (Éx. 34:6, 7; Sal. 145:8, 9). Doi quimürpufilmi ta Jehová, doi feyentuleaimi ta quisu meu, doi piuqueyerpuafimi ca doi cüme hueniyerpuafimi. Nütramcayafimi ta caquelu pu che tami quimürpuel Biblia mu. Huelu quiñe che feipiafeimu: “Iñche feyentuquelan Chau Dios mu”, fei quimlayafuimi chi chumngechi tami lloudunguafiel. Fei ¿chumafuimi? Cüme pepicahuaimi, fei inaduamafuimi ñi chem pin taiñ fillque publicacion. Ca quintuafuimi caquelu peñi cam lamngen tami quelluaeteu, fei hula nütramcayafuimi tati che. Cüme allcütunoelmu rume tati che, eimi doi cüme pepicaucülerpuaimi. Cafei doi feyentuleaimi Jehová mu. w21.08 pag. 18 parr. 14, 15

Eluunge tami doi cüdahuelafiel Jehová. Duamfal-lai taiñ com elcünual taiñ serfiafiel Jehová (Ecl. 5:19, 20). Huelu nieafuiñ chi quiñeque chemcün catrütuqueiñmu taiñ doi serfiafiel Jehová, huelu cüpa elcünulafiyiñ. Femngechi raquiduam nieliyiñ, felerpuafuiñ feiti ricu huentru reque ñi nütramcael ta Jesús: taiñ cüme mongen nieal müten, huelu duamtulayafuiñ ta Jehová (Luc. 12:16-21). Rupaliyiñ huesaque dungu mu iñchiñ, ngillatuquefiyiñ ta Jehová taiñ quelluaeteu ca cüme raquiduamqueiñ chem taiñ femal (Prov. 3:21). Jehová eluqueiñmu fill cümelcan. ¿Chumngechi pengelafuiñ taiñ mañumquefiel? Chem rume femaiñ taiñ püramyeafiel Jehová (Heb. 13:15). Quiñe dungu taiñ femafel, fei taiñ doi cüdahuelafiel Jehová. Deu femliyiñ, Jehová eluaiñmu fentren cümelcan. Iñchiñ fill antü peafuiñ Jehová ñi cüme piuquengen ca ñi cüme Chau Dios ngen (Sal. 34:8). Femliyiñ, Jesús reque feleaiñ, quisu feipi: “Iñche tañi iyael reque felei tañi femal ñi Chau ñi huercüeteuchi dungu” (Juan 4:34). w21.08 pag. 30, 31 parr. 16-19

Huecüfü ayüquei taiñ mallmahurpual. Huecüfü quimniefui mallmahurpuliyiñ, quisu reque felerpuaiñ ca afnoachi mongen nielayaiñ. Feimu Pablo feipi mallmahurpuliyiñ, condenangeaiñ Huecüfü reque (1 Tim. 3:6, 7). Chumten tripantu yenieliyiñ rume taiñ testigongen, mallmahurpuafuiñ. Rupaliyiñ huesaque dungu mu, Huecüfü ayüquei taiñ raquiduamal iñchiñ mu müten ca taiñ maneluunoal Jehová mu. Quiñeque mu, ¿coila dungu mu dalluntucungequeiñ cam huesaque dungu femngequeiñ? Femngechi dungu rupaliyiñ, Huecüfü ayüquei taiñ culpatuafiel ta Jehová ca taiñ pu peñi, pu lamngen. Cafei Huecüfü ayüquelai taiñ inayafiel Jehová tañi ngülam, femngechi taiñ norümtual feiti huesa dungu. Huelu mai raquiduamelqueiñmu taiñ quisutu maneluhual müten (Ecl. 7:16, 20). w21.06 pag. 15 parr. 4, 5

Pu judio rume fentren tripantu mu mülepuquefui Babilonia mu. Feichi tripantu mu, 537 mu, huiñotuingün Jerusalén mu. Ageo ca huiñopetulai. Quiñeque cüyen rupalu, pu judio deumatufingün ti ngillatuhue ruca (Esd. 3:8, 10). Huelu tati pu che inafülcüleyelu caiñetueyu, feimu tati pu judio fentecünuingün tañi cüdau engün (Esd. 4:4; Ageo 1:1, 2). Fei 520 tripantu mu, Jehová feipifi ta Ageo ñi yafültucuafiel pu judio tañi deumanentuafiel ti ngillatuhue ruca (Esd. 6:14, 15). Ageo huercüngei ñi quelluafiel pu judio, fei ñi doi maneluhual Jehová mu engün. Pu judio allcütulu Jehová tañi ñidolcülen pu hueichafe mu, tüngduampelaingün. ¿Chumngelu? Jehová loncolei com tati pu cümeque püllü mu. Feimu ñi cüme amuleal tati pu judio, mülefui ñi maneluhual Jehová mu. w21.09 pag. 15 parr. 4, 5

Famülque mu pu testigo huall Mapu mu, hueluconque piuqueyeuqueingün ca quiñeucülequeingün. Iñchiñ trürümngelayafuiñ caquelu religion mu. Caque tuhun niefuliyiñ rume, quiñe familia reque feleiñ. Taiñ trahun mu ca fütraque trahun mu, quimfali taiñ rüf piuqueyeuquen. Tüfa pengeli taiñ poyequefiel ta Jehová chumngechi ñi ayüqueel (Juan 13:34). Tati Biblia feipieiñmu taiñ hueluconque piuqueyehual (1 Ped. 4:8). Hueluconque perdonauliyiñ ca rulpacünufiliyiñ ñi huelulcan taiñ pu peñi ca pu lamngen, femngechi pengelaiñ taiñ rüf piuqueyehun. Cafei eluucüleiñ taiñ füreneafiel com taiñ pu peñi ca taiñ pu lamngen. Taiñ pu huesa duameleteu cütu ta ca fürenequefiyiñ. Femngechi piuqueyeuliyiñ, pengelaiñ taiñ rüf cristianongen (Col. 3:12-14). w21.10 pag. 22 parr. 13, 14

Huemünentungele quiñe che, ¿rüf quellupeafeyu mai ñi norümtual tañi raquiduam? Femafui llemai. Quiñeque peñi ca quiñeque lamngen huemünentungequefulu cuifi mu, feipingün ñi cümecünungen tañi huemünentungen trahunche mu. ¿Chumngelu? Femngechi inaduamuhuingün fente tañi huesa femün, repentiuhuingün, cüme elcünutuingün tañi mongen ca huiñotuingün Jehová mu (Heb. 12:5, 6). Raquiduamnge tüfa: quiñe cuidaufisaquelu inaduami quiñe tañi pu ufisa ñi nien quiñe tul cutran. Feimu huichucünufi caquelu pu ufisa mu. Huelu ti ufisa tüngcülelai, ayüniei tañi müleal ti quechan ufisa mu. ¿Huesa che troquiafuiñ tati cuidaufisaquelu ñi huichucünufiel mu ti cutran ufisa? Femlai llemai. Ti cuidaufisaquelu quimniei feiti cutran ufisa mülele ti quechan ufisa mu, tulelafui tañi cutran, feimu huichucünufi ñi cuñiutucuafiel tati quechan ufisa. w21.10 pag. 10 parr. 9, 10

Rume mañumcüleiñ taiñ nien ta pu peñi ca lamngen huall Mapu mu. Com poyeuqueingün hueluconque. Ayünieiñ fentren che tañi quiñeucüleal ta iñchiñ mu taiñ püramyeafiel ta Jehová. Feimu huesa dungu femquelayaiñ taiñ huesa raquiduamelnoafiel ta caquelu Jehová mu ca tañi troquiñche mu. Doi mai mülei taiñ femal cümeque dungu feimu caquelu pu che ayüaingün ñi quimafiel ta Jehová ca ñi serfiafiel. Taiñ püramyequefiel mu ta Jehová, quiñeque che huesa feipiafeiñmu ca inantuafeiñmu. ¿Chem mülei taiñ femal llicaleliyiñ ñi quimeltuafiel Biblia mu ta quiñe che? Maneluucüleaiñ Jehová ca Jesús taiñ quelluaeteu. Jesús feipicünufi tañi pu discipulo ñi llicalenoal engün chumngechi ñi dungual ca ñi chem pial engün. ¿Chumngelu? Jesús feipi: ‘Puule tamün dungual, Ngünechen ta eluaimünmeu chumngechi tamün dungual. Eimün no tati quisutu pepicayalu ñi dungual, huelu mai tamün Chau ñi nehuen quelluaimünmeu tamün chem pial (Mat. 10:19, 20). w21.09 pag. 24 parr. 17, 18

Moisés ca huirintucui Jehová quiñe ellcaupeyüm (Sal. 90:1). Cafei epe puulu ñi layal ta Moisés, quisu feipi: “Chau Dios quiñe ellcaupeyüm tati, cuifi mu ca famülque mu. Tañi lipang recülqueimu” (Deut. 33:27). ¿Chem pi chi am Jehová tañi lipang recülqueiñmu? Maneluuliyiñ Jehová taiñ cuñiutucuaeteu, cüme duamaiñ. Huelu quiñeque mu, rume huesa duamafuiñ ca pepi huitrapüraquelaiñ reque. Fei, ¿chumngechi quelluaiñmu Jehová? (Sal. 136:23). Miñche mu tuculelaiñmu reque tañi lipang, fei ñochiquechi huitrañpüramaiñmu (Sal. 28:9; 94:18). ¿Chumngechi quelluqueiñmu taiñ cuñiutucuqueteu Jehová? Epu dungu mu. Quiñe, maneluucülequeiñ cheu rume müleliyiñ iñchiñ, Chau Jehová cuñiutucuaiñmu. Ca epu, quimnieiñ Chau Jehová taiñ rüf duamtunieteu. w21.11 pag. 6 parr. 15, 16

Jesús quimniefui tañi pu discipulo femngefule huesaque dungu, duamnieafuingün ñi doi maneluhual Chau Jehová mu. Tañi quelluafiel engün nütramelfi quiñe lantu domo meu. Feichi lantu domo femngelu huesa dungu, amuquefui quiñe huesa juez mu tañi quelluaeteu, huelu ti huesa juez allcütulaeyu. Feitachi lantu domo feipipelai: “Mollquechi pemefili tati juez, quelluaeneu tati” pipelai. Fei femngechi tripai. ¿Chem quimeltueiñmu tüfa? Jehová rüf quelluquefi tañi pu rumel ngillatuqueteu (Luc. 18:1-8). Fei Jesús feipi: ‘Feichi cüpatuale ti Huentrucünuupalu, ¿pepapeai mai che femngechi feyentulelu?’. Huesa femngeliyiñ, inayentuafiyiñ ñi femün feichi lantu domo, fei cüme pengelcünuaiñ taiñ maneluucülen Jehová mu. Femngechi femliyiñ, ca maneluhuafuiñ Jehová taiñ rumel quelluaeteu. Cafei duamnieiñ taiñ ngillatuleal, tüfa müna quelluafeiñmu. w21.11 pag. 23 parr. 12, 14

Eimi hueche, raquiduamqueimi chi Jehová tañi ngülam catrütuqueimu tami femal quiñeque dungu. Femngechi ayüquei Huecüfü tami raquiduamal. Quisu ayüquei tami ngüneduamafiel ñi cüme rupaquen tati pu che miyauquelu tüfachi alü rupachi rüpü mu. Eimi peafuimi tami pu compañ colegio mu cam tati pu che tripalu internet mu, fei “rume ayüucüleingün” piafuimi. Huecüfü ayüquei tami raquiduamal tami müte cüme rupaquenon fei engün reque. Cafei Huecüfü cüpa raquiduameleimu inafilmi Chau Dios ñi ngülam, rüf ayüucülelayaimi. Huelu loncontucunge, pu che inaniefilu ti alü rupachi rüpü mu, apümcangeai. Huecüfü ayüquelai pu che ñi quimal tüfa (Mat. 7:13, 14). Huelu Jehová femngechi femquelai. Quisu quimeltueimu inaniefilmi ti pichi rupachi rüpü, rumel mongeleaimi ca rüf ayüucüleaimi (Sal. 37:29; Is. 35:5, 6; 65:21-23). w21.12 pag. 23 parr. 6, 7

Iñchiñ quimnieiñ mülei taiñ perdonacheal. Huelu quiñeque mu, cüdaungeafui taiñ femal. Ti apostol Pedro ca cüdautupelafui ñi perdonacheal (Mat. 18:21, 22). ¿Iñchiñ cai? ¿Chem quelluafeiñmu taiñ perdonacheal? Ngüneduamaiñ cüla dungu. Quiñe, raquiduamaiñ ta Jehová fentrenque rupa ta perdonaqueiñmu (Mat. 18:32, 33). ¿Inei ürque anta iñchiñ taiñ perdonayaeteu Jehová? Huelu ca femngechi perdonaqueiñmu (Sal. 103:8-10). Cafei ti Biblia mandaqueiñmu taiñ “hueluconquechi piuqueyehual”. Ngelai taiñ raquiduamal taiñ perdonayafiel chi cam perdonanoafiel taiñ pu peñi ca pu lamngen. Rumel mülei taiñ femal (1 Juan 4:11). Epu, raquiduamaiñ chumngelu fente cümei taiñ perdonacheal. Perdonacheliyiñ, quelluafiyiñ taiñ huesa femeteu ca quelluntucuaiñ ñi quiñeucüleal ti trahunche. Cafei cuidanieafiyiñ taiñ hueniyeniefiel Jehová ca doi cüme duamcüleaiñ (2 Cor. 2:7; Col. 3:14). Cüla, llellipunieafiyiñ ta Jehová. Duamnieiñ ñi quellun ñi quiñeucüleal ti trahunche. Fei llellipuliyiñ, eluñmalayafiyiñ ta Huecüfü taiñ püntünentuaeteu taiñ pu peñi, pu lamngen mu (Efes. 4:26, 27). w21.06 pag. 22 parr. 11; pag. 23 parr. 14

David lefmahui Saúl mu. Tüfachi huesa huentru ngünenielu Israel mapu mu ayüfui ñi langümafiel ta David. Petu lefmaucülelu ta David duamniefui iyael, feimu amui ta Nob huaria mu. Fei mu pedifi quiñe huentru tañi eluaeteu quechu cofque (1 Sam. 21:1, 3). Rupai chi antü, fei David ca tañi pu compañeteu ellcahuingün quiñe cueva mu (1 Sam. 22:1). Rume huesa dungu ta rupai David, ¿chumngelu am? Saúl rume ütrirfi ta David, ¿chumngelu? David hueufi alün quehuan, feimu tati pu che rume saquieyu. Saúl ca quimniefui Jehová tañi famentueteu tañi feyentunon mu, fei reyngehuelayafui Israel mu. Cafei quimniefui Jehová ñi dullifiel ta David tañi reyngerpual (1 Sam. 23:16, 17). Famentungelu rume ta Saúl, petu reyngefui. Ca niequefui alün soltau ca fentren che tañi quelluaeteu, feimu David mülefui ñi lefmahual. Raquiduamnge, Chau Jehová feipicünui David tañi reyngeal. ¿Rüf raquiduampefui mai Saúl tañi catrütuafiel Jehová ñi feipicünuel? (Is. 55:11). Quimngelai, Biblia feipiquelai tüfa. Huelu quiñe dungu cüme quimnieiñ: pu caiñetuquefilu ta Jehová hueuquelaingün. w22.01 pag. 2 parr. 1, 2

Jesús rume fentrenque rupa amuldungulelfi tati pu che. Femngechi ñi femün mu Jesús, pengeli ñi piuqueyeniefiel pu che (Luc. 19:47, 48). ¿Chumngelu femquefui? Ñi cutranpiuqueyefiel mu pu che femquefui. Quiñeque mu rume fentren che cüpa allcütuquefui, feimu Jesús ca tañi pu discipulo pepi iquelafuingün rume (Mar. 3:20). Ca quiñe rupa, quiñe huentru ayüfui ñi nütramcayafiel Jesús pun mu. Fei Jesús elcünui tiempo tañi allcütuafiel. Alünque che allcütufilu ta Jesús, huelu com discipulongerpulaingün. Femngechi ñi rupan mu rume, huelu Jesús com cüme quimeltufingün. Iñchiñ fachantü ca femngechi ayüleiñ com pu che tañi allcütual (Hech. 10:42). Taiñ femal, mülei taiñ adcünual taiñ tiempo. Ngelai taiñ amuldungulelafiel pu che chem hora taiñ ayüqueel, mülei taiñ amuldungual chem hora mu taiñ allcütuafeteu tati pu che. Femngechi femliyiñ, Jehová rume ayüucüleai. w22.01 pag. 17 parr. 13, 14

Famülque mu pütrüquen che maneluuquelai tati pu gobierno mu. Tati pu gobierno ca tañi ley cümelcaquefi pu ricu müten, pu pofre femquelafi. Ca femngechi famülque mu, pu loncolechi religioso huesaque dungu femqueingün. Feimu tati pu che pefiel mu tüfa, maneluuhuequelai Dios mu. Feimu enseñalfiliyiñ Biblia quiñe che, mülei taiñ quelluafiel ñi maneluhual Jehová mu ca pu loncolelu trahunche mu. Huelu pu chillcatuquelu müten ngelai ñi maneluhual Jehová ca tañi troquiñche mu, iñchiñ ca femngechi femaiñ. Chumten tripantu yeniefuliyiñ rume taiñ serfifiel Jehová, mülei taiñ loncontucual Jehová tañi cüme femquen rumel cüme tripaquei. Huelu quiñeque mu, cüdautuafuiñ taiñ loncontucual tüfa. w22.02 pag. 2 parr. 1, 2