Mayo

Jehová quelluqueiñmu taiñ doi quimafiel ta Jesús. ¿Chumngechi? Biblia meu elcünui meli lifru: Mateo, Marcos, Lucas ca Juan. Tüfa evangelio ca pingequei. Feitachi meli lifru mu, peafuiñ Jesús ñi fempan ca ñi amuldungupan Mapu mu. Ca quimafuiñ ñi quimeltuel ca chem raquiduam tañi niequefel. Cüme estudiafiliyiñ tati meli evangelio, doi cüme quimafuiñ ta Jesús ca inayafuiñ ñi femel. Re papeltulayaiñ müten tüfachi meli lifru. Doi mai cüme estudiayafiyiñ ca raquiduamaiñ taiñ papeltuel mu (ca ngüneduamafuimi Josué 1:8, quimal dungu). Peniecayafimi reque chem ñi rupan. Petu papeltulmi quiñe che ñi rupan, imaginayaimi ti che tañi pen, ñi allcüel ca tañi chum duamcülen. Ca quintuafuimi inei ngen ti che ca cheu ñi miyauquefel. Tami femal tüfa, cüme ngüneduamafuimi taiñ fillque publicacion. w21.04 pag. 4, 5 parr. 11-13

Fentren tripantu petu ñi cüpanon Jesús mapu mu, huiriconcülefui Jesús ñi traicionangeal 30 moneda plata mu (Zac. 11:12, 13). ¿Inei am tañi traicionayaeteu? Quiñe tañi pu hueni (Sal. 41:9). Cafei ti profeta Zacarías feipicünui: langümafiñ tati camañ fei tati pu ufisa com püd tripayaingün (Zac. 13:7). Tati che pefilu ñi rupan com tüfa mülefui doi maneluhual Jesús mu, huelu femlaingün famentufingün. ¿Ca femngechi dungu rupaquei fachantü? Femllei mai. Famülque mu, quiñeque testigo doi quimniengelu cütu famtripaquei Jehová mu. Fei engün coilaque dungu feipiquei pu testigo mu ca ayüquei caquelu che ñi famtripayal Jehová mu. Radio mu, television mu, diario ca internet mu feipiqueingün coilaque dungu pu testigo mu. Huelu pu cüme piuquengelu quimniei femngechi dungu ñi rupayal, feimu huelulcauquelai coilaque dungu mu (Mat. 24:24; 2 Ped. 2:18-22). w21.05 pag. 11 parr. 12; pag. 13 parr. 18, 19

Biblia feipi Chau Jehová ñi pu che ñochiquechi doi cüme adümürpuquefi Biblia ñi rüf dungu (Col. 1:9, 10). Feimu iñchiñ maneluucülequeiñ taiñ quelluaeteu Jehová taiñ doi cüme adümal ti rüf dungu. Tati Cuerpo Gobernante inaduamle taiñ huelulcaucülen chumngechi taiñ adümfiel Biblia ñi feipin, fei cüme elcünufemquetui. Famülque mu, fentren iglesia cambiacünuquei tañi enseñaqueel re tañi ayühulafiel müten tati pu che. Huelu iñchiñ pu testigo doi cüme quimfalcünuquefiyiñ taiñ quimeltun taiñ doi fülconal Chau Jehová mu, ca taiñ poyeafiel chumngechi ñi ayüqueel (Sant. 4:4). Iñchiñ cambiaquelaiñ taiñ quimeltun taiñ inayafiel pu che ñi raquiduam. Huelu mai, iñchiñ doi cüme adümürpuquefiyiñ Biblia ñi feipin, feimu cambiaqueiñ taiñ quimeltun. Felei llemai, iñchiñ rume falintuquefiyiñ ti rüf dungu (1 Tes. 2:3, 4). w21.10 pag. 22 parr. 12

Quisulelu troquiuliyiñ, ¿chumafuiñ? Raquiduamaiñ chumngechi taiñ quellunieteu Jehová (Sal. 55:22). Tüfa quelluaiñmu taiñ quisulenon troquiucüleal. Ca raquiduamaiñ chumngechi ñi quelluniefiel Jehová taiñ pu peñi, pu lamngen rupamequelu huesaque dungu mu (1 Ped. 5:9, 10). Taiñ peñi Hiroshi, fei tati quiñen testigo tañi familia mu. Feipi: “Com iñchiñ fill huesaque dungu mu rupaqueiñ. Huelu fentecünuquelaiñ taiñ serfiniefiel Jehová. Quimfiel mu tüfa, rume quelluniefi tati pu quiñen testigongelu ñi familia mu ñi afeluunoal engün” pi taiñ peñi. Cafei ngillatuleaiñ, papeltunieafiyiñ Biblia ca faltaquelayaiñ trahun mu. Ngillatuliyiñ com piuque mu, feipiafiyiñ Jehová taiñ chum duamcülen. Fill antü papeltuafiyiñ Biblia. Cafei raquiduamaiñ quiñe troquiñ mu pengelquelu Chau Jehová taiñ piuqueyenieteu. Caquelu peñi, lamngen loncontucuquefingün quiñeque troquiñ Biblia. Por ejemplo tati Salmo 27, versiculo 10 ca Isaías capitulo 41, versiculo 10. Caquelu peñi, lamngen ñi pepicayafiel ti trahun ca tañi papeltuafiel Biblia, allcütuquefingün tati fillque audio grabalelu. Tüfa quellueyu engün ñi quisulelu troquiunoal. w21.06 pag. 9, 10 parr. 5-8

Layeluhulmi quiñe tami piuqueyenieelchi che, ¿chumafuimi? Biblia meu papeltuafuimi ñi huiñomongetun quiñeque che cuifi mu, femngechi tami doi maneluhual Jehová mu. Cam hueñancüleimi chi quiñe tami piuqueyenieelchi che huemünentungelu trahunche mu. Fei ¿chumafuimi? Papeltuafimi taiñ fillque papel, fei quimtucuaimi Jehová norümtufiel mu quiñe che quelluquefi ñi repentiutual. Chem huesaque dungu rume rupafulmi, eluunge tami doi maneluhual Jehová mu. Nülacünulelafimi tami piuque ta Jehová. Feipiafimi com tami huesa raquiduamelnieteu. Famentuulayaimi tami pu peñi pu lamngen mu, fülconcüleaimi quisu engün mu (Prov. 18:1). Huesa duamcülefulmi rume, faltalayaimi trahun mu, amuldunguaimi ca papeltuafimi Biblia. Tüfa quelluaimu tami aguantayal (Sal. 126:5, 6). Raquiduamtucunieafimi com ti cümeque dungu tami eluaeteu Jehová cüpalechi antü meu. Ngüneduamülmi chumngechi tami quellunieteu ta Jehová ta fachantü, doi maneluhuaimi quisu meu. w21.11 pag. 22 parr. 11; pag. 24 parr. 17

Tati pu che doi falintuquefi tati pu ricungelu, tati pu famoso ca feiti doi nielu poder. Huelu epe com Jesús tañi pu discipulo, femngechi chengelaingün. Feimu illamcangequei ca falintungequelaingün, pichiqueche reque felelu troquieyu pu che (1 Cor. 1:26-29). Huelu Jehová femquelai. Falintuquefi tañi pu che. Jesús, ¿chemu nütramcai feitachi pichiqueche reque felelu? Tañi pu inanieteu ramtueyu engün: “¿Inei anta doi saquifali ta Ngünechen tañi ülmen mülehue meu?” (Mat. 18:1). Feichi mu, pu judio ayüquefuingün ñi doi cümelu troquituaeteu caquelu pu che. Quiñe huentru feipi: “Pu judio quintuquefuingün ñi saquiaeteu ca püramyeaeteu caquelu pu che” pi ti huentru. Jesús quimniefui tati pu judio ayüquefuingün ñi doi cümelu troquingeal. Feimu Jesús tañi pu inanieteu mülelafui ñi nieal femngechi raquiduam. w21.06 pag. 20 parr. 2; pag. 21 parr. 6, 8, 9

Ti apostol Pablo cüme ngülamtuchequefui. Por ejemplo, pu peñi ca pu lamngen Tesalónica mu mülelu duamlu engün tañi ngülamtungeal, Pablo piuqueyenquechi ngülamtueyu engün. Pablo re ngülamtulafi müten tañi pu peñi, huelu saquifi tañi cüdahuelfiel mu ta Jehová ca ñi nehuentulen engün rupan mu huesaque dungu mu. Pablo ca feipifi engün ñi inantucungen engün, huelu ñi nehuentulen engün (1 Tes. 1:3; 2 Tes. 1:4). Pablo ca feipifi pu Tesalónica che huall püle nütramyengei ñi feyentufiel ta Jehová engün (1 Tes. 1:8, 9). ¿Müna ayüucülepelafuingün pu Tesalónica che tañi saquieteu mu Pablo? Quimfalngefui Pablo tañi piuqueyefiel tañi pu peñi ca pu lamngen, feimu cüme ngülamtufi tañi pu peñi ca pu lamngen mülelu Tesalónica mu (1 Tes. 4:1, 3-5, 11; 2 Tes. 3:11, 12). w22.02 pag. 15 parr. 6

Huecüfü adniefi pu loncolechi religioso ñi coilatucheal Chau Dios mu. Tüfa tañi feipiqueel engün: “Chau Dios quiñe huesa Diosngei, fei ñi duam mu ta cutrancauqueiñ iñchiñ”. Cafei lan mu quiñe pichiche feipiqueingün: “Chau Dios yetueyu huenu mu, duamniefui quiñe angel” piqueingün. Rume huesa dunguyengei ta Jehová, huelu quimnieiñ ñi coilangen tüfa. Fei ¿chumafuiñ? Contueliyiñmu quiñe huesa cutran cam lale quiñe taiñ hueni cam familia, turpu culpatulayafiyiñ ta Jehová. Huelu mai maneluucüleiñ ñi ngehuenoal ta cutran ca ñi huiñomongetual pu layelu. Fei com che ta quimelelafiyiñ Chau Dios taiñ rüf piuqueyenieteu. Taiñ femün meu, Jehová quimfalcünuafui ñi rüfngenon Huecüfü ñi feipin (Prov. 27:11). Iñchiñ sufriqueiñ fillque dungu mu. Contuafeiñmu quiñe cutran, caiñetuafeiñmu pu che cam taiñ culpanchengen mu rume cutrancauqueiñ. Jehová cutranpiuqueyechequei, fei pefiel taiñ cutrancaumequen hueñancütuqueiñmu (Sal. 22:23, 24). Chau Jehová rume ayüfui ñi apümafiel com taiñ cutrancaqueteu. Huelu re ayünielai tañi apümafiel, femafi tati (ca inaduamnge Éxodo 3:7, 8; Isaías 63:9). w21.07 pag. 10 parr. 9, 10

Pichiñma mu, com pu nor piuqueyefilu ta Jehová rumel ayühunquechi poyenierpuafingün. Jesús com cüme elcünutuai ñi huesa femel Adán Eva engu. Jehová huiñomongeltuafi pu layelu ca eluafi ñi cüme feletual engün, fei chumcaunorume ñi lahuenoal engün (Luc. 23:42, 43). Com tati pu poyequefilu ta Jehová culpafe ngehuenole, elungeaingün “ñi püramyengeal ca ñi saquingeal” chumngechi ñi feipin ta David. Loncontucuaiñ taiñ nieel cüme maneluhun (Apoc. 7:9). Ca loncontucuaiñ Jehová taiñ piuqueyenieteu ca ayüniei taiñ coneltual tañi fütra familia mu. Feimu chumaiñ rume taiñ ayühulafiel ta Jehová. Fill antü piuquentucunieafiyiñ Jehová tañi feipicünuel. Falintuafiyiñ taiñ poyeafiel Jehová fachantü ca cüpalechi antü meu. w21.08 pag. 7 parr. 18, 19

Ti profeta Jeremías doi 40 tripantu mu amuldungufui, allcütungenolu rume ca caiñetungelu rume. Fei fente tañi ayentungen ta Jeremías, huesa duamfui, pihuelafui tañi amuldungual (Jer. 20:8, 9). Huelu Jeremías fentecünulai tañi amuldungual ca ayühulquefeyu tañi amuldungun. ¿Chem quellueyu? Epu dungu mu raquiduamfui. 1) Ti cümeque dungu ñi amuldungulelfiel tati pu che, eluquefui tañi maneluhual engün (Jer. 29:11). Ca 2) Jehová dullifi ta Jeremías ñi dunguafiel tati pu che Jehová tañi üi mu (Jer. 15:16). Ca femngechi iñchiñ amuldunguchequeiñ Jehová ñi üi mu ca quelluquefiyiñ ñi maneluhual engün. Loncontuculiyiñ tüfa, ayüucüleaiñ taiñ amuldungun mu, allcütunoeliyiñmu rume pu che. Iñchiñ quimlaiñ ti che chumül eluhuai tañi fautizahual, fei quimnolu am iñchiñ mülei taiñ nieal ta paciencia (Sant. 5:7, 8). w21.10 pag. 27 parr. 12, 13

Tunten tripantu yenieliyiñ rume taiñ cüdahuelquefiel ta Jehová, com iñchiñ mülei taiñ nehuentu feyentuleal Chau Jehová mu. ¿Chumngelu? Cuñiutucuunoliyiñ, taiñ feyentun nehuen-ngehuelayafui. Iñchiñ fente cüme quimnieiñ ñi mülen ta Chau Dios, feimu feyentuleiñ quisu mu, pengenole rume. Huelu loncontucuaiñ, taiñ pequenofiel pürüm ngoimayafuiñ. Feimu tati apostol Pablo feipi iñchiñ feyentufemhuelayafuiñ Chau Dios mu. Feimu, ¿chem mülei taiñ femal taiñ nehuentu maneluucüleal Jehová mu? (2 Tes. 1:3). Quiñe, müchaique llellipuafiyiñ Jehová taiñ eluaeteu ñi nehuen. ¿Chumngelu? Jehová tañi nehuen quelluaiñmu taiñ doi feyentuleal quisu meu (Gál. 5:22, 23). Nienoliyiñ Jehová tañi nehuen, nehuentu feyentulayafuiñ Dios mu. Fentecünunoliyiñ taiñ llellipufiel, Jehová elunieaiñmu tañi nehuen (Luc. 11:13). Feipiafuiñ ta Jehová: ‘Elumuiñ taiñ doi feyentuleal’ (Luc. 17:5). Epu, fill antü papeltuafiyiñ ca chillcatuafiyiñ Biblia (Sal. 1:2, 3). w21.08 pag. 18, 19 parr. 16-18

Tati pu fütaqueche müte nehuen-ngehuelai chi, huelu nieingün fentren quimün. Feimu Jehová adnieafeyu engün tañi femal falinque cüdau tañi troquiñche mu. ¿Chumngechi quimiyiñ tüfa? Biblia pengeli quiñeque che füchalu engün rume, fentecünulaingün tañi poyeafiel ta Jehová. Moisés epe nielu 80 tripantu, Jehová ñi profetangerpui ca loncolerpui Israel troquiñche mu. Daniel doi 90 tripantu nielu rume, petu profetangefui. Ca tati apostol Juan doi 90 tripantu nielu rume, adnieyu Jehová ñi huirintucual ti lifru Apocalipsis. Biblia mu müte nütramcangequelafui ta Simeón mu, huelu Jehová cüme quimniefeyu. Doi mai elueyu ñi quimafiel ta Jesús pichicalu ca elueyu ñi feipicünual falinque dungu ñi rupayal (Luc. 2:22, 25-35). w21.09 pag. 3, 4 parr. 5-7

Pu chau ngelai ñi trürümafiel tañi pichiqueche caquelu pichiqueche engün. Ca ngelai tañi feipiafiel ñi femal tañi pepilnoel engün. Femfule, huesa duamelafui tañi pu pichiqueche (Efes. 6:4). Quiñe lamngen, Sachiko pingelu feipi: “Tañi ñuque ca ayüquefui re cümeque nota ñi entual. Huelu iñche mu, tüfa rume cüdaungefui. Fentren dungu tañi feipingeel iñche petu pichicalu, müte cümelcaquelaeneu. Fei famülque mu, chumte cüdahuelfili rume ta Jehová, ayüucülenolu troquiquefiñ” pi taiñ lamngen. Ti rey David ayüquelai ñi femürpual “fütraque dungu ca pepilfalnochi dungu”. David ñom piuquengefui, feimu tüngcülefui ca cüme duamcülefui (Sal. 131:2). Pu chau, ¿chem quimürpuafui David ñi feipin mu? Tati pu chau ñom piuquengelu, quimnieingün chem dungu tañi pepilnoel. Feimu ca feipilayafingün tañi pu pichiqueche ñi femal tañi pepilnoel engün. Pu chau, ¿chumngechi quelluafui tañi pu pichiqueche ñi cüme duamcüleal? Raquiduamelafingün chem dungu tañi adümuucülen ca ñi adümuucülenon engün. Femngechi pu pichiqueche quimaingün chem tañi femürpuafel. w21.07 pag. 21 parr. 5, 6

Caque quiñeque iñchiñ Jehová elueiñmu taiñ dullial taiñ serfiafiel cam taiñ serfinoafiel. Quiñeque hueche tañi pu chau cüme quimeltulaeyu chumngechi ñi cüme serfiafiel ta Jehová, huelu quisu eluhuingün ñi serfiafiel. Huelu caquelu pu hueche cüme quimeltueyu engün tañi pu chau, femngechi mu rume eluulaingün ñi serfiafiel ta Jehová. ¿Chem quimeltuqueiñmu tüfa? Quisuque iñchiñ dulliaiñ taiñ serfiafiel ta Jehová cam taiñ serfinoafiel (Jos. 24:15). Feimu eimün pu chau, nielmün quiñe yall serfihuenofilu ta Jehová, culpatuulayaimün. Fentrenque yall respetaquefi ca inayentuquefi ñi femqueel tañi pu chau. Huelu tati pu chau püntütripayafuingün Jehová mu ca elcünuafuingün tañi pu che (Sal. 27:10). Tüfa müna hueñancülafeyu tati pu yall. Pu hueche, quiñeque tamün pu chau huemünentungele trahunche mu, rume hueñancüleiñ eimün meu. Ca Jehová fente cüme quimniei tamün hueñancülen. Eimün fentecünulaimün tamün serfiafiel Jehová, feimu Jehová ayüucülei ca rume piuqueyeimünmu. Tami pu chau eluule ñi serfihuenoafiel ta Jehová, eimi echaculpaulayaimi. w21.09 pag. 27 parr. 5-7

Quiñe cutran ufisa mülele ti quechan ufisa mu, tulelafui tañi cutran. Feichi cutran ufisa trürümngeafui quiñe che huemünentungelu trahunche mu. Feiti che cutrancülei reque, cüme hueniyelafi ta Jehová (Sant. 5:14). Quiñe che cutrancülelu tulafui ñi cutran ta caquelu che. Ca femngechi quiñe che cüme hueniyenofilu ta Jehová, hueluraquiduamelafui ta caquelu che trahunche mu. Feimu mülei ñi quechanentungeal trahunche mu ti huesa culpalu. Ñi huemünentungen mu quiñe che culpalu, Jehová cuñiutucuquefi tati trahunche ca quelluquefi tati culpalu ñi inaduamal tañi huesa femün fei ñi repentiuhual. Huemünentungefule rume quiñe che, trahuluhuafui femngechi ñi llohual Jehová tañi quimeltun fei ñi doi cüme hueniyeafiel. Ca femngechi llohuafui fillque publicacion ñi chillcatual ca peafui JW Broadcasting^®. Pu loncolelu inaduamfile ñi cüme amulen ti che, ngülamtuafeyu chumngechi ñi doi cüme hueniyetuafiel Jehová, femngechi ñi huiñotual trahunche mu. w21.10 pag. 10 parr. 9, 11

Famülque mu, inayentuquefiyiñ pu hunenque cristiano chumngechi ñi poyequefel ta Jehová engün. Por ejemplo, chumngechi ñi adcünungequefel pu cuifique cristiano ca femngechi adcünungequeiñ famülque mu. Mülequei huitran-ngepaquechi loncolelu, loncolelu ca siervo ministerial (Filip. 1:1; Tito 1:5). Cafei fei engün reque, yamquefiyiñ ñi feipin ta Jehová ti cudumuhun dungu mu, ti curehuen mu ca ti mollfüñ mu. Cafei taiñ trahunche mu huemünentungequei tati pu che fütra culpalu ca repentiunolu (Hech. 15:28, 29; 1 Cor. 5:11-13; 6:9, 10; Heb. 13:4). Tati Biblia ca feipi quiñelei müten tati feyentun cam ti religion ñi ayüqueel ta Jehová (Efes. 4:4-6). Rume ayüucüleiñ taiñ coneltulen Jehová tañi pu che mu ca taiñ quimfiel ti rüf dungu quisu meu. Feimu llemai quimtucunieaiñ: iñchiñ nieiñ ti rüf dungu. w21.10 pag. 22, 23 parr. 15-17

Tati rey Jehosafat quimürpui ñi contupayaeteu alün hueichafe (2 Crón. 20:1, 2). Fei, ¿chumi Jehosafat? Maneluhui Jehová mu ca llellipufi tañi quelluaeteu. Jehosafat tañi llellipun mülei 2 Crónicas 20:5-12. Ñi llellipun mu pengelngei fente ñi maneluucülen Jehosafat Chau Jehová mu. Fei Jehová huercüfi quiñe levita ñi feipiafiel ta Jehosafat chem tañi femal. Feipifi chem ñi huiriconcülen taiñ peelchi texto fachantü. Fei, ¿chumi Jehosafat? Maneluhui Jehová mu ca femi tañi feipieteu Jehová. Tripalu engün tañi chaftuafiel tañi pu caiñe, Jehosafat hunelu mu huercülafi tañi doi cümeque hueichafe. Doi mai huercüfi quiñeque huentru nienolu hueichahue, tüfa engün ülcantulen amuingün. Fei chumngechi Jehová ñi feipifiel ta Jehosafat femtripai. Quisu hueufi tañi pu caiñe (2 Crón. 20:18-23). w21.11 pag. 15, 16 parr. 6, 7

Huesaque dungu mu rupaliyiñ rume, quimnieiñ Jehová taiñ cuidayaeteu fei taiñ cüme hueniyeafiel (2 Cor. 4:7-9). Iñchiñ cüme quimnieiñ Jehová taiñ rüf piuqueyenieaeteu. ¿Chumngelu? Biblia feipi: “Jehová ngüneduammequefi tañi pu yamnieteu, tati pu maneluuquelu tañi nor piuqueyeaeteu” (Sal. 33:18-22). Loncontucuaiñ: petu taiñ serfinofiel ta Jehová, quisu piuqueyenieuyequeiñmu. Huelu poyerpufilu iñchiñ, doi piuqueyerpuqueiñmu ca quisucünuquelaeiñmu. Fente taiñ piuqueyeteu mu, cuñiutucuqueiñmu ca com huechurpuai taiñ feipicünueteu. Quisu rumel ayüfui taiñ hueniyeafiel (Sal. 46:1, 2, 7). Feimu llemai, chem huesaque dungu mu rume rupafuliyiñ, Jehová nehuentunieaiñmu taiñ poyenieafiel. w21.11 pag. 6, 7 parr. 17, 18

Eimi quimniepelafimi quiñe che fentren tripantu mu ñi üdequefiel ta cangelu che. Acordayaiñ ñi femün José tañi pu peñi. Fei engün fente tañi üdefiel ta José, huesalcafingün (Gén. 37:2-8, 25-28). Fei, ¿chumi José? Huiñoleltulaeyu tañi huesa femün. Rupalu ta antü, José elungei autoridad fei allmalltuafui tañi huesalcayafiel tañi pu peñi. Huelu femlai, doi mai cutranpiuqueyefi engün. José illcutunielafi tañi pu peñi, doi mai inafi ñi feipin Levítico 19:18 (Gén. 50:19-21). Ayüliyiñ taiñ ayühulafiel ta Jehová, inayentuafiyiñ ñi femün ta José. Feimu illcutunielayafiyiñ taiñ huesa femeteu, doi mai perdonayafiyiñ engün. Jesús ca femngechi dungu quimeltui, feipi taiñ perdonayafiel taiñ huesa femqueteu (Mat. 6:9, 12). Ti apostol Pablo ca ngülamtufi pu cristiano, feipifi: “Saquin pu peñi ca lamngen, eimün quisutu caiñetuquefilmün tamün huesa femeteu” (Rom. 12:19). w21.12 pag. 11 parr. 13, 14

33 tripantu mu, 14 conchi nisán mu, Jesús amui Getsemaní pingechi jardin. Fei mu ngillatufi ta Jehová com ñi piuque mu, nülalelfi ñi piuque reque (Luc. 22:39-44). Feichi mu Jesús epe pulei ñi layal, fei nehuentu dungui ca ngümai cütu ñi llellipufiel ca ñi ngillatufiel ta Chau Ngünechen (Heb. 5:7). ¿Chem dungu mu ngillatui Jesús feichi pun? Ngillatufi Jehová ñi quelluaeteu ñi püntütripanoal quisu mu. Ca ngillatufi ñi fentecünunoal tañi cüdau. Jehová allcütuñmafi ñi ngillatun ta Jesús, fei huercüleleyeu quiñe cüme püllü ñi yafültucuaeteu. Jesús rume falintuquefui ñi püntütripanoal ta Jehová mu ca ñi incañpeafiel Chau Jehová ñi üi. Jehová cüme allcütuñmafi Jesús tañi llellipun, ¿chumngelu? Jesús doi falintuquefui tañi püntütripanoal Jehová mu ca ñi yamnieafiel Jehová tañi üi. Ca femngechi iñchiñ Jesús reque femliyiñ, Jehová allcütuñmayaiñmu taiñ llellipufiel (Sal. 145:18). w22.01 pag. 18 parr. 15-17

Pu che ayüquei iñchiñ pu testigo taiñ votayal, huelu conquelaiñ politico dungu mu, feimu votaquelaiñ. Dulliliyiñ ñi ngünenieal quiñe che, famentuafiyiñ ta Jehová (1 Sam. 8:4-7). Caquelu pu che ayüniefuingün taiñ quelluconal ñi deumangeal pital cam femal caquelu dungu ñi quelluafiel ta che. Iñchiñ doi falintuquefiyiñ taiñ amuldungun cüdau, feimu famentuqueiñmu pu che. ¿Chem quelluaimu tami maneluucüleal Jesús mu? (Mat. 7:21-23). Acordanienge: ti doi falin dungu taiñ femafel fei ta quimeltucheal. Iñchiñ inaquintuquelaiñ chumngechi norümtual huesaque dungu mapu mu. Tüfa, ¿feipipei mai taiñ duamtuchequenon? Femlai llemai. Iñchiñ rume piuqueyequefiyiñ tati pu che ca duamtuquefiyiñ, feimu enseñaquefiyiñ engün Chau Jehová ñi Gobierno mu ca quelluquefiyiñ ñi hueniyeafiel ta Jehová. w21.05 pag. 7 parr. 19, 20

Fentren gobernante feipiquei ñi poyequefiel ta Dios, huelu ayüquelaingün ta Dios tañi ngünenieaeteu. Fachantü pu gobierno caiñetuquefingün Jesús tañi pu inanieteu, femngechi chaftuquefingün ta Jesús (Hech. 4:25-28). ¿Chumquei Jehová? Biblia feipi: “Eimün pu ngünenielu, cüme raquiduamaimün. Cüme llohuaimün tamün norümtungeal, eimün pu juzgaquefilu pu che. Poyefimün ta Jehová yamün meu, ca ayüucülemün yamün mu. Püramyefimün ti fotüm, femnolmün Chau Ngünechen illcurpuai ca layaimün ti rüpü meu, quisu am eluucülelu ñi illcual. Ayühun-ngei com tati pu maneluulu Quisu meu” (Sal. 2:10-12). Chau Jehová piuqueyenquechi eluquefi ta tiempo tati pu che ñi norümtual tañi raquiduam, fei ñi eluhual tañi ngünenieaeteu Chau Dios tañi Gobierno (Is. 61:2; 2). Rume falin-ngei pu che tañi quimafiel ta Jehová, fei ñi poyeafiel. w21.09 pag. 15, 16 parr. 8, 9

Pablo quimeltueiñmu chem rume nieliyiñ, mülei taiñ ayüucüleal taiñ nieel mu (Filip. 4:12). Pablo quimürpui com tüfachi dungu ñi rüfngen. Tati doi falin dungu taiñ nieel iñchiñ tati falinque fillem no, huelu mai Jehová taiñ hueniyeafiel (Hab. 3:17, 18). Raquiduamnge Moisés tañi chem feipifiel tati pu israelche, deu rupalu engün 40 tripantu desierto mu. Feipifi: ‘Com tami femqueel mu, Jehová tami Ngünechen, cümelcaqueimu. Tüfachi 40 tripantu ñi rupan, Jehová tami Ngünechen mülequei eimi mu, fei chem no rume faltalequelaimi’ (Deut. 2:7). Feichi 40 tripantu mu, Jehová elufi mana ñi iyal pu israelche. Ca pu israelche tripalu Egipto mapu mu, tañi ropa huichaflai rume, rupalu rume 40 tripantu (Deut. 8:3, 4). Jehová ayüniei taiñ mañumchefengeal pichin niefuliyiñ rume. Ca ayüniei taiñ peafiel tüfa quiñe regalo reque. Femngechi femliyiñ, ayühulafiyiñ Jehová ñi piuque. w22.01 pag. 5 parr. 10, 11

Eimi füta, com nehuen mu cüdauqueimi tami cuidayafiel tami pu familia. Fei acule huesaque dungu, raquiduamafuimi chi tami quisutu chaftuafiel, fei quisu maneluhuafuimi. Huelu tüfa cümelayafui. ¿Chem cümeafui tami femal? Quisulen mu llellipuafimi Jehová tami quelluaeteu. Ca femngechi llellipuaimi tami domo engu. Ca papeltuafimi Biblia ca taiñ fillque publicacion, fei inayafimi ti ngülam ñi feipingeel. Quiñeque pu che ayülayai chi tami quintual ngülam Biblia mu. Ca feipiafeimu chi: “Ti plata ca falinque fillem quelluaimu tami cuñiutucuafiel tami pu familia”. Huelu raquiduamnge chem ñi rupan tati rey Jehosafat (2 Crón. 20:1-30). Quisu maneluhui Jehová mu ca pengelcünui tañi maneluucülen. Jehová quisucünulafi ta Jehosafat, eimi ca femlayaimu (Sal. 37:28; Heb. 13:5). w21.11 pag. 15 parr. 6; pag. 16 parr. 8

Jehová am deumaeteu iñchiñ quisu reque, feimu ayüqueiñ ñi cüme raquiduamangeal ta che (Gén. 1:26). Quiñeque mu “quimfiyiñ com ñi rupan” piafuiñ, huelu taiñ culpanchengen mu huesa juzgayafuiñ quiñeque che. ¿Acordaimi feichi Jehová ñi perdonafiel pu niniveche? Jonás ayüucülelafui tañi femün mu Jehová. Jonás raquiduamquefui pu niniveche mülefui tañi apümcangeal müten (Jon. 3:10–4:1). Raquiduamaiñ chem rupai Jehová perdonafilu pu niniveche. Doi 120.000 niniveche repentiuhuingün, fei Jehová montuleyu engün. Quimfali Jonás huelulcaufui tañi raquiduam mu. Jehová ngelai ñi feipiafiel tati pu che chemu ñi femquen quiñeque dungu. Quiñeque mu, Jehová eluhui ñi femal quiñe dungu, huelu allcütuñmafi ñi raquiduamcülen tañi pu serfiqueteu (Gén. 18:25; Jon. 4:2, 3). Ca quiñeque mu, Jehová feipifi engün chumngelu ñi femün quiñeque dungu (Jon. 4:10, 11). Huelu Jehová am taiñ deumaeteu, ngelai taiñ ramtuaeteu ñi chumal (Is. 40:13, 14; 55:9). w22.02 pag. 3, 4 parr. 5, 6

Taiñ inayal Jesús tañi feipin, doicülelu troquiafiyiñ caquelu pu che (Filip. 2:3). Femngechi raquiduam nieliyiñ, huesa duamel-layafiyiñ taiñ pu peñi, pu lamngen. Loncontucuaiñ: quiñeque dungu mu, taiñ pu peñi, pu lamngen doi adümuucülequeingün iñchiñ meu. ¿Chem quelluafeiñmu taiñ loncontucual tüfa? Ngüneduamaiñ taiñ pu peñi, pu lamngen ñi cüme chengen. Piuquentucuafiyiñ tüfachi ngülam ñi feipiel Pablo. Feipi: “¿Chumngelu am doi cümelu caquelu meu troquiucüleimün? Com tamün nieel Ngünechen tamün elueteu. Eimün quisutu nielaimün chem rume, fei ¿chumngelu am fente mallmaucüleimün?” (1 Cor. 4:7). Feimu cuñiutucuhuaiñ. Quintulayaiñ taiñ saquiaeteu pu che ca doi cümelu troquiulayaiñ caquelu che mu. Por ejemplo, quiñe peñi cümeque hueupin hulafui trahun mu. Ca femngechi quiñe lamngen fentren che enseñalafui Biblia. Huelu, ¿chem raquiduam mülei ñi nieal? Jehová müten ñi quellueteu. Fei müten mülei ñi püramyengeal. w21.06 pag. 21, 22 parr. 9, 10

Quiñeque huaria mu doi cüdaungetui ñi amuldungual. Fentren edificio ca condominio mülequei, feimu elungequelai ñi conpual quimnoelchi che. Fei rume cüdaungei ñi amuldungungeal feiti che mülelu fei mu. Caquelu lof mu cüdaungei ñi pengeal ta che ruca mu ca quiñeque lof mu mülei pichin che müten. Quiñeque mu, alünque mapu trecaqueiñ taiñ quintuafiel tati pu che. Huelu puhun mu ruca mu, mütrümiyiñ, inei rume tripaquelai. Femngechi dungu rupaliyiñ, ¿chumafuiñ taiñ elcünunoal taiñ amuldungun? Caque hora mu quintuafiyiñ tati pu che. Com antü cüdahuafui rume tati pu che, huelu acuquetui tañi ruca mu. Feimu feichi hora mu ta pemeafiyiñ. Quiñeque taiñ pu peñi ca pu lamngen, tarde mu cam epe dumiñcülelu amuldunguqueingün chem hora ñi acuquetun tati pu che tañi ruca mu. Feichi hora mu tati pu che doi tüngcülepelai, fei doi eluhuafui chi ñi nütramcayal. w21.05 pag. 15 parr. 5, 7

¿Ca femngechi dungu rupaquei fachantü? Femllei mai. Iñchiñ, pu testigo, celebraquelaiñ tati huimtun ñi condenaqueel Biblia. Quiñeque tüfa Navidad ca cumpleaño, feimu pu che illcutueiñmu. Caquelu che mallmauquei tañi tuhun mapu mu, fei celebraquei quiñeque fiesta ñi condenaqueel Biblia. Iñchiñ conquenoel feichi dungu mu, feimu illcutueiñmu pu che. Tüfachi pu che cüme femmequelu troquiuquepelaingün. Huelu elcünunofile ti huesaque huimtun, Jehová cüme lloulayaeyu (Mar. 7:8, 9). ¿Chem quelluaimu tami maneluucüleal Jesús mu? Mülei tami rume falintuafiel Jehová tañi ngülam ca tañi huercün dungu (Sal. 119:97, 113, 163-165). Rüf piuqueyefilmi ta Chau Jehová, famentuafimi chem huesa dungu rume ñi üdequeel. Doi piuqueyeafimi ta Jehová chem dungu meu rume. w21.05 pag. 6 parr. 15, 16

¿Chumngechi inayafuimi ñi feipin ti apostol Pablo? Mülei tami cüme estudiayal Biblia, llellipunieafiel ta Jehová ca amuldunguleal. Femngechi maneluucüleaimi Jesús mu (2 Tim. 4:4). Feimu coilaque dungu feipingele rume pu testigo mu, llicalayaimi fente tami maneluucülen Jesús mu (Is. 28:16). Piuqueyefilmi ta Jehová, tami pu peñi, pu lamngen ca tati Biblia, chem no rume huelulcalayaimu. Mülepalu Jesús mapu mu, fentren che famentueyu. Ca mülequefui quiñeque che cüme lloufilu ta Jesús. Quiñeque tüfa, quiñe huentru coneltulelu tati Sanedrin mu ca fentren sacerdote (Hech. 6:7; Mat. 27:57-60; Mar. 15:43). Ca femngechi fachantü fentren che eluhui ñi inanieafiel ta Jesús. ¿Chumngelu? Fentren che quimürpui tati lloudungun mülelu Biblia mu. Feimu Biblia ta feipi: “Fentren tüngün nieingün tati pu piuqueyequefilu tami ley; ca chem no rume huelulcalayafeyu” (Sal. 119:165). w21.05 pag. 13 parr. 20, 21

Ti apostol Pablo, ¿inei ñi nehuen mu cüdahuelquefui ta Jehová? ¿Quisu tañi nehuen mu pemai? Femlai. Jehová quellueyu llemai. Fentren huesaque dungu mu rupalu rume ta Pablo, Jehová elueyu ñi nehuen ñi fentecünunoal tañi cüdau. Ngüneduamaiñ chumün Timoteo. Compañquefi Pablo ñi quimeltucheal, yafültucuafiel fillque trahunche. Pablo ca huercüfi Timoteo ñi amual yafültucumeafiel pu trahunche (1 Cor. 4:17). Timoteo rume cüdautufui, ¿chumngelu? “Pepi femlan” pipelafui tañi raquiduam mu. Feimu peno Pablo feypieyu: ‘Eluuquilnge tami illamcangeal tami hueche huentrungen meu’ (1 Tim. 4:12). Pablo reque, Timoteo ca cutranchengefui (1 Tim. 5:23). Femngechi rupafule rume Timoteo, quimtucuniefui Jehová tañi quelluaeteu ta quimeltucheal ca yafültucuafiel pu peñi ca pu lamngen (2 Tim. 1:7). w21.05 pag. 21, 22 parr. 6, 7

Ñi feipin Santiago 1:19 quelluafeiñmu ngülamtucheliyiñ. Feipi: “Com eimün, mülei tamün hune allcütual, huelu mülei tamün pürümcaunoal tamün dungual ca lladcüfemnoal chem meu rume”. Cafei Proverbios 18:13 feipi: “Quiñe che lloudungulu petu ñi allcütunon quiñe dungu, fei tüfa huedhuedcan tati ca yehuen-ngei ñi femün”. Quiñe loncolelu com quimlu troquihuafui, huelu ¿feingepei mai? Femlai. Feimu cümeafui ti loncolelu ñi ramtuafiel ti che chem ñi rupamequen. Feimu tati loncolelu hune cüme allcütuñmayafi ñi feipieteu tati che. Hunelu mu, mülefui tañi ramtuafiel tañi chumlen, chem ñi ruparupangen, fei ñi quelluafiel. Tati pu loncolelu rüf quimle chem ñi ruparupangen pu peñi ca pu lamngen, doi cüme quelluafuingün ca yafültucuafuingün. Tati pu loncolelu ngülamtufemlayafi ca papeltufemel-layafi ti Biblia tati pu peñi ca pu lamngen. ¿Ca chem mülei ñi femal pu loncolelu? Pengelelafi engün tañi duamtuniefiel. Ca pengelelafi tañi cüme entendequefiel ñi ruparupangen ca ñi cüpa quelluquefiel. w22.02 pag. 17 parr. 14, 15