Julio

Huemünentungen mu quiñe che trahunche mu, müna quelluafui tati trahunche. Huelu ca müna quelluafui tati culpalu, ¿chumngelu? Femngechi Jehová quelluqueyu ñi norümtual tañi mongen. Huemünentungen mu quiñe che trahunche mu, quiñeque pu peñi ca pu lamngen feipiafuingün: “Cümecünulai ñi femün pu loncolelu”. Huelu feichi pu che feipiquelu feita, feipiquelaingün com ñi chumün tati culpalu. Iñchiñ com quimlaiñ chem ñi rupan. Iñchiñ mülei taiñ maneluhual tati pu loncolelu meu. Tati pu loncolelu inapelafingün Biblia ñi feipin ca “Jehová ñi duam” mu juzgapelafingün ti culpalu (2 Crón. 19:6). Huemünentungele quiñe tami pu piuqueyenieelchi che ca eimi quelluntucufilmi pu loncolelu, quelluafuimi tañi huiñotual ta Jehová mu. Taiñ lamngen Elizabeth feipi: “Iñchiu müna cüdautuyu tayu dunguhuenoafiel tayu püñeñ. Rupalu ta antü, tayu püñeñ huiñotui Jehová mu. Fei quisu feipi: “‘Cümecünungen tañi huemünentungen trahunche mu. Tañi rupan mu, cümeque dungu quimürpun’ pi”. w21.09 pag. 28, 29 parr. 11, 12

Raquiduamaiñ feitachi domo mu. Ayüpelafui ñi doi eluafiel ta Jehová, huelu pepi femlai. Felelu rume, elufi com tañi nieel ta Jehová. Jesús quimniei ta Chau Jehová falintuñmafi ñi hulün tati domo. Tüfa quimeltueiñmu quiñe falin dungu: Chau Jehová falintuquei taiñ serfiafiel com piuque mu (Mat. 22:37; Col. 3:23). Com taiñ nehuen mu amuldunguliyiñ ca amuliyiñ trahun mu, Jehová rume ayühuai. Felei llemai, Jehová falintuquefi com taiñ femqueel taiñ poyeafiel. Deu ngüneduamfiyiñ Jesús ñi feipin tati lantu domo mu. Fei, ¿iñchiñ cai? ¿Chumngechi yafültucucheafuiñ? Raquiduamaiñ inei duamniei ñi yafültucungeal. Mülepelai cusheque papai trahunche mu, cutrancülelu ca yafüngehuenolu. Fei amuldunguhuelaingün chumngechi ñi femquefel cuifi, tüfa rume huesa duamelqueyu. w21.04 pag. 6 parr. 17, 19, 20

Jehová cüme quimniei chem antü mu ñi apümafiel ti huesaque dungu. Petu ñi femnon, fentren che petu quimürpueyu, piuqueyerpueyu ca serfinierpueyu. Com engün mañumcülepelai Jehová tañi aguantalen mu. Pichiñma mu, quimfalcünungeai rume cümei Jehová tañi aguantan. ¿Chumngechi quimfalcünungeai tüfa? Pütrüquen che montulngeai ca rumel mongeleaingün. Huesaque dungu rume femquelu tati Huecüfü, Jehová ayüucülequei (1 Tim. 1:11). Iñchiñ rupaliyiñ rume huesaque dungu mu, ca ayüucüleafuiñ Jehová reque. Feimu ayühunquechi esperanieafuiñ Jehová ñi ngünenieafiel ti Mapu, fei ñi yamniengeal tañi üi ca ñi apümcangeal ti huesaque dungu. Feimu llemai, eluucüleaiñ taiñ aguantayal ca loncontucuaiñ Jehová ñi aguantalen iñchiñ reque. w21.07 pag. 13 parr. 18, 19

Hunen siglo mu fentren pu che famentufi ta Jesús. Jesús tañi pu familia müna pofrengefui. ¿Feimu peno famentueyu pu che? Fei tripai quiñe pichi huaria mu, Nazaret pingelu, nehue falintungequelafui tüfachi huaria. Natanael cütu petu ñi inanofiel ta Jesús feipi: “¿Chem cüme dungu am tripayafui Nazaret huaria mu?”. ¿Chumngelu feipi tüfa? Raquiduamquepelafui ñi chem pin Miqueas capitulo 5, versiculo 2. Feita mu feipi tati Mesías ñi choyüngeal Belén mu, huelu Nazaret mu no. Ti profeta Isaías feipicünui Jesús ñi pu caiñe duamquelafuingün doi quimal cheu ñi cüpan ta Jesús (Is. 53:8). Pu che eluucülefule ñi doi quimafiel ta Jesús, quimtucuafui Jesús ñi choyüngen Belén mu ca David ñi cüpanchengen (Luc. 2:4-7). Feimu rüf tripai ñi feipicünuel Miqueas. Feichi pu che mülefui ñi doi cüme quimafiel ta Jesús, huelu femlaingün. Aporiauquechi juzgafingün ca famentufingün (Miq. 5:2). w21.05 pag. 2, 3 parr. 4-6

Biblia feipi quiñeque che cüme lloufi cümeque ngülam tañi elungeel. Quiñeque engün tüfa, Job. Peafiyiñ ñi femün. Job püramyequefui ta Jehová, huelu quiñeque mu huelulcauquefui. Quiñeque antü, Job rume huesa rupafui, feimu huesa entuquefui ñi feipin. Feimu Elihú ca Jehová ngülamtueyu rüf dungu mu. ¿Chumi Job? Cüme lloufi ti ngülam, fei Job huiño huitrautui com tañi huesa piel mu. Job ñi ñom chengen mu, Jehová elueyu fentren cümelcan (Job 42:3-6, 12-17). Job ñom piuquengefui. Job cüme lloufi ti ngülam ñi elueteu Elihú, doi huechengelu rume (Job 32:6, 7). Ñom piuquengeliyiñ, cüme llohuafiyiñ ti ngülam taiñ elueteu quiñe peñi cam quiñe lamngen doi huechengelu rume. Cafei quiñeque mu raquiduamafuiñ taiñ duamnienofiel quiñe ngülam, huelu ñom piuquengeliyiñ cüme llohuafiyiñ. Com iñchiñ duamnieiñ taiñ cüdahual femngechi taiñ doi cüme cristianongeal. Ca duamnieiñ taiñ doi cüme amuldunguchefengeal ca cüme quimeltuchefengeal. w22.02 pag. 9 parr. 8; pag. 12 parr. 12

Com iñchiñ mülei taiñ femal cümeque dungu, fei ñi quiñeucüleal ti trahunche. Femngechi femliyiñ, inei no rume quisulelu troquiulayai. Taiñ femün mu ca feipin mu, rume yafültucuafuiñ taiñ pu peñi ca pu lamngen. Feimu mülei taiñ quelluafiel taiñ pu peñi, pu lamngen quisu müten testigongelu tañi familia mu, femngechi ñi quimal engün ñi rume piuqueyeteu ti trahunche. ¿Chumngechi quelluafuiñ? Eluhuaiñ taiñ hueniyeafiel com pu mülelu ti trahunche mu. Cüme llohuafiyiñ tati pu hue fautizaulu, tati pu hue estudialu Biblia ca tati pu peñi ca pu lamngen iñchiñ taiñ trahunche mu mületulu (Rom. 15:7). Huelu re chalilayafiyiñ müten. Huenicantuafiyiñ engün, pengelelafiyiñ taiñ duamniefiel. Ramtuafuiñ ñi chumlen engün, femngechi entendeafuiñ ñi rupamequen. Huelu ramtufiliyiñ, yehuelcalayafiyiñ. Quiñeque che yehuequei ñi feipial chem ñi mülen ñi piuque mu. Feimu ramtufiliyiñ, obligalayafiyiñ taiñ feipiaeteu com tañi rupamequen engün. Doi mai, cümeque ramtun entuaiñ taiñ ayühulafiel ca cüme allcütuafiyiñ engün. Por ejemplo, ramtuafuiñ chi chumngechi ñi quimürpufiel ta Jehová. w21.06 pag. 11 parr. 13, 14

Rume mañumniefiyiñ ta Jehová taiñ quiñentrür cüdaucülequen taiñ pu peñi ca pu lamngen iñchiñ. Ti lifru Organizados para hacer la voluntad de Jehová, pagina 165 feipi: “Com iñchiñ mülei taiñ quellual fei ñi quiñeucüleal ti trahunche”. Ca feipi: “Jehová reque, cüme raquiduam mu pefiliyiñ taiñ pu peñi, pu lamngen, cüme yeucüleaiñ”. Jehová pichiqueche reque penieiñmu, feimu falintuqueiñmu. Ca femngechi peafiyiñ taiñ pu peñi, pu lamngen. Chem dungu rume femliyiñ taiñ cuidayafiel ca quelluafiel engün, Jehová rume falintuquefi (Mat. 10:42). Rume piuqueyeniefiyiñ taiñ pu peñi ca pu lamngen. Feimu eluucüleaiñ taiñ huesa duamelnoafiel engün (Rom. 14:13). Raquiduamaiñ tañi doicülen iñchiñ mu, cafei perdonanieafiyiñ com piuque mu. Eluucüleaiñ taiñ huelulcanoaeteu quiñeque mu ñi femquen ca ñi feipiquen taiñ pu peñi, pu lamngen. Feimu femaiñ chem rume taiñ cüme yeucüleal ca taiñ hueluconquechi yafültucuhual (Rom. 14:19). w21.06 pag. 24 parr. 16, 17

Iñchiñ estudialiyiñ ca inafiliyiñ ñi feipin Biblia ca Jehová tañi troquiñche, ñochiquechi inayentuafiyiñ ñi chumngen ta Jesús ca doi quimürpuafiyiñ Jehová. Jesús trürümfi ti cümeque dungu taiñ amuldunguqueel ta quiñe fün quetran mu, tüfa ñochiquechi tremquei ti che ñi piuque mu. Feipi: ‘Tati fün quetran noyüquei ca tremquei, huelu tati nganlu quimlai ta chumngechi ñi tremün tati fün quetran. Fei mapu llemai quisu eluqueyu ñi tremal. Hunelu meu noyüquei quiñe cachu reque, feimeu ta ca eluuquei ñi loncoal, fei hula ca apoquei fün meu tati lonco quetran’ (Mar. 4:27, 28). ¿Chem pi Jesús? Quiñe fün quetran ñochiquechi tremquei. Ca femngechi quiñe che cüme lloule Chau Dios ñi dungu, ñochiquechi cüme elcünutuai ñi mongen mu. Por ejemplo, taiñ estudiante ñochiquechi cüme elcünutule ñi mongen, pengelcünuai tañi cüme fülconcülen Jehová mu (Efes. 4:22-24). Tunte quelluafuiñ rume taiñ estudiante, huelu ngoimalayaiñ: Jehová tremümquefi ti fün ti che ñi piuque mu. w21.08 pag. 8, 9 parr. 4, 5

¿Chumafuiñ taiñ ayüucüleal. Raquiduamcüleaiñ taiñ nieel meu ca taiñ pepi femafel müten, femngechi ayüucüleaiñ. Huelu raquiduamtucuniefiliyiñ taiñ pepi femnoafel, ayüucülelayaiñ. Iñchiñ taiñ chengen mu, quintuyahulmequeiñ taiñ femal hueque dungu. Feimu ¿rüf ayüucülepeafuiñ mai taiñ nieel meu müten? Femafuiñ llemai. Fei ¿chem quelluaiñmu taiñ ayüucüleal? Inaduamaiñ quiñe nütram mülelu Mateo 25:14-30. Tüfa mu, Jesús nütramcai quiñeque esclavo elungelu quiñeque talento. Tüfa raquiduameleiñmu chumngechi ayüucüleafuiñ taiñ nieel meu müten ca chumafuiñ taiñ doi ayüucüleal. w21.08 pag. 21 parr. 5, 6

Jehová duamtuniefi pu huesa duamcülelu. Com iñchiñ yafültucuafuiñ engün, pu loncolelu müten no. ¿Chumafuiñ? Pengelelafiyiñ taiñ duamtuniefiel engün. Jehová ayüquei taiñ pengelelafiel engün Jehová ñi piuqueyenieteu (Col. 3:12). ¿Ca chem chumafuiñ? Ñom piuquengeaiñ ca mallmaulayaiñ taiñ nien mu ta adümuhun. Checahun-ngelayaiñ femngechi taiñ ütrirnoaeteu taiñ pu peñi, pu lamngen. Huelu mai, nieliyiñ adümuhun, püneafiyiñ taiñ hueluquentu quelluhual (1 Ped. 4:10, 11). Jesús quimün huentrungefui, huelu ñom piuquengei ca mallmaulai (Mat. 11:28-30). Enseñafiel mu ta che, tañi quimeltun ca tañi pengelün dungu rume adümfali. Com tañi quimeltuel ta Jesús, puuquei pu ñom che ñi piuque mu (Luc. 10:21). w21.07 pag. 23 parr. 11, 12

Eimi hueche, eluunge tami nütramcayafiel pu füchaqueche. Pu füchaqueche nehue pelohuelai, matu trecahuelai ca nehuentu dunguhuelai. Femfulu rume engün, eluucüleingün tañi quelluntucual ca Jehová rume falintuñmaeyu com ñi femqueel mu engün (Ecl. 7:1). Raquiduamnge chumngelu falin-ngeingün ta Jehová mu, fei eimi ca falintunieafimi engün. Inayentuafimi ñi femün ta Eliseo. Petu ñi yengenon cañpüle ta Elías, Eliseo püntütripalai ta quisu mu. Fei cüla rupa feipifi: “Eimi ta quisucünulayayu” (2 Rey. 2:2, 4, 6). Piuqueyenquechi ramtuafiyiñ quiñeque dungu tati pu fütaqueche (Prov. 1:5; 20:5; 1 Tim. 5:1, 2). ¿Chem dungu? Ramtuafuiñ: “Huechengelu eimi, ¿chumngechi quimimi ñi rüf dungungen Jehová ñi dungu? Tami chaftufiel fill huesaque dungu, ¿chumngechi quellueimu tami doi fülconal ta Jehová mu? ¿Chem quellueimu tami ayühunquechi serfinieafiel Jehová?” (1 Tim. 6:6-8). Ramtufiliyiñ engün, cüme allcütuafiyiñ chem taiñ feipiaeteu. w21.09 pag. 5 parr. 14; pag. 7 parr. 15

Raquiduamnge tüfa. Fente taiñ piuqueyefiel mu ta Jehová fill ruca püle ta amuldunguqueiñ. Ellaca mu cüdautufuiñ chi taiñ amuldungucheal. Hue amuldungulu iñchiñ müllmüllcülepelafuiñ. Cüdautufuiñ rume, huelu femiyiñ. ¿Chumngelu? Quimnieiñ ta Jesús ayüniei taiñ femngechi femal. ¿Famülque mu cai? Müte cüdautuhuequelaiñ chi taiñ amuldungucheal, huelu ca mülei taiñ enseñalelafiel Biblia tati pu che. Raquiduamün mu tüfa, ¿llicalequepeiñ mai? Ngillatufiliyiñ ta Jehová taiñ quelluaeteu taiñ ofrecelafiel estudio tati pu che, quelluaiñmu llemai fei llicalelayaiñ. Com taiñ nehuen mu amuldunguliyiñ ca quimeltuliyiñ, pengelcünuaiñ taiñ piuqueyeniefiel ta Jehová (1 Juan 5:3). w21.07 pag. 3 parr. 7

Cuifi mu pu esclavo marcacünungequefuingün ñi pengelal inei tañi ngen-ngen ta quisu engün meu. Ca femngechi cüpalechi antü meu, pu che marcacünungeai reque ñi pengelal inei tañi quelluntucuquefiel. Tañi raquiduam mu ca femün mu engün, pengelaingün tañi coneltuqueel pu gobierno mu. Tati pu llounolu tati marca rupayaingün huesaque dungu mu. Tati lifru Apocalipsis feipi inei no rume nienolu tati marca ‘pepi ngillacalayai ca pepi fendelayai chem rume’ (Apoc. 13:17). Jehová ñi pu che quimniei Jehová ñi chumafiel fei ti pu che nielu tati marca (Apoc. 14:9, 10). Feimu, ¿lloupeafiyiñ mai tati marca? ¿Quelluntucupeafiyiñ mai pu gobierno? ¡Femlayafuiñ llemai! Doi mai huirintucunieaiñ reque taiñ cuhu meu Jehová tañi ngen-ngen iñchiñ mu (Is. 44:5). Feula mülei taiñ nehuentuleal taiñ püntütripanoal Jehová mu. Femliyiñ, Jehová ayühunquechi feipiaiñmu quisu tañi pu chengen iñchiñ. w21.09 pag. 18 parr. 15, 16

Ñi cüme tripayal taiñ amuldungun cüdau eluhuaiñ taiñ quelluaeteu caquelu che. Ti apostol Pablo enseñalfi ta Timoteo chumngechi ñi quimeltucheal ca ñi amuldungucheal, fei ayüniefui ta Timoteo ñi ca femngechi enseñayafiel tati pu peñi ca pu lamngen trahunche mu (1 Cor. 4:17). Timoteo reque, iñchiñ ca femngechi inayentuafuiñ pu peñi ca pu lamngen cüme quimeltuchequelu. Cafei, llellipunieafiyiñ Jehová taiñ quelluaeteu. Amuldungun mu mülei taiñ ngillatuafiel ta Jehová, ¿chumngelu? Nienoliyiñ Jehová tañi nehuen, chumlayafuiñ rume (Sal. 127:1; Luc. 11:13). Ngillatufiliyiñ ta Jehová, cüme feipiafiyiñ chem taiñ duamtunieel. Por ejemplo, llellipunieafiyiñ ta Jehová taiñ peal doi cüpa quimlu ta Jehová mu. Eluucüleaiñ taiñ quisu papeltuafiel Biblia. Tati Biblia feipieiñmu iñchiñ mülefui taiñ doi cüme quimafiel ta Chau Jehová (Rom. 12:2). ¿Chumngechi femafuiñ? Doi cüme estudiayaiñ Biblia. Femliyiñ, doi maneluucüleaiñ Jehová mu. Femngechi, nütramcafiliyiñ pu che Jehová mu, quimfalcünuaiñ taiñ maneluucülen quisu mu. w21.05 pag. 18 parr. 14-16

Raquiduamnge tüfa: eimi enseñalquepelafimi chi Biblia quiñe che, rume pepicauquepelaimi tami cüme enseñayafiel. Ca ngillatuqueimi tañi cüme amuleal ti estudio. Huelu ti che inaquelai ñi feipin ta Biblia. ¿Chem mülefui tami femal? Mülei tami fentecünual tami enseñayafiel. Ca raquiduamnge tüfa: quiñe no rume chi tami enseñalelquefiel Biblia fautizaulai. Femngechi dungu rupalmi, fei ¿“quim enseñachelan” piafuimi? Cam ¿“Jehová ayüquelai chumngechi tañi enseñachequen” troquiafuimi? Huelu Jehová ñi adquiñ mu cüme tripaquei taiñ amuldungun. ¿Chumngelu feipiafuiñ tüfa? Jehová cüme ngüneduamquei chumngechi taiñ cüdauquen ca taiñ fentecünuquenon taiñ amuldungun cüdau. Fente taiñ piuqueyefiel mu ta Jehová, ayühunquechi amuldunguqueiñ allcütungenoliyiñ rume. Feimu Jehová falintuñmaqueiñmu taiñ cüdau. Pablo feipi: ‘Ngünechen norngei, ca ngüyünentulayai eimün tamün femelchi dungu ca ti piuqueyehun tamün pengelelfiel femngechi tamün quellufiel meu tati feyentulechi pu peñi ca lamngen. Fei petu amulei tamün femngechi femal’ (Heb. 6:10). Feimu llemai, yenofiliyiñ rume quiñe che ñi fautizahual, Jehová falintuñmaqueiñmu taiñ cüdau. Feimu rüfngefui ñi feipin ta Pablo. w21.10 pag. 25 parr. 4-6

Jesús pengelelfi tañi pu discipulo tañi piuqueyefiel engün. Quisu quimniefui caquerumei ñi mongen ca ñi adümuhun engün. Feimu com femngechi cüdau ta elungelayafuingün. Femfule rume, Jesús doi falintufi tañi cüdahual engün com piuque mu. Peaiñ quiñe pengelün dungu ñi entuel ta Jesús. Tüfa feipi ta quiñe huentru elufi cüdau ta quiñeque cüdaufe, “caque quiñeque chumngechi tañi adümuhun engün”. Epu cüdaufe cüme entuingu tañi cüdau, huelu quiñe doi plata huehui. Huelu ti huentru mür engu ta saquifi (Mat. 25:14-23). Tüfachi nütram mu, Jesús pengeli ñi falintufiel caque quiñeque tañi pu discipulo ñi cüdau.Jesús ca pengelquei taiñ piuqueyenieteu. Cüme quimniei caquerumei taiñ adümuhun ca taiñ rupamequen mongen meu. Feimu Jesús doi falintuquei caque quiñeque iñchiñ taiñ cüdauquen com piuque mu. Iñchiñ mülefui taiñ inayentuafiel ta Jesús. w21.07 pag. 23 parr. 12-14

Quiñeque mu, ti rey David cutranpiuqueyechequelafui. Quiñe rupa, Nabal huesa pifi ta David ca elulafi iyael ta David ca tañi pu hueichafe. Feimu David ayüfui ñi langümafiel ta Nabal ca tañi pu che. Quimlu tüfa Abigaíl, Nabal tañi domo, eluhui tañi catrütuafiel ta David ca elufi iyael. Ñi femün mu ta Abigaíl, David langümlafi ta Nabal (1 Sam. 25:9-22, 32-35). David fente ñi illculen ayüfui ñi langümafiel ta Nabal. Cafei allcülu ñi nütrameleteu ta Natán, feipi ñi langümngeal ti ricu huentru. Huelu David cüme piuquengefui, ¿chemu cutranpiuqueyelafi tati huentru? Raquiduamaiñ ñi chum duamcülen ta David feichi mu. David huesa duamquefui tañi huesa femquefel cuifi, cümelcalelafui tañi raquiduam. Feimu peno cutranpiuqueyelafi ti ricu huentru. ¿Chem quimeltueiñmu tüfa? Quiñe che femngechi juzgafile ta caquelu, quimngeafui tañi cüme hueniyenofiel Jehová. w21.10 pag. 12 parr. 17, 18; pag. 13 parr. 20

¿Chem quimeltueiñmu taiñ peelchi texto fachantü? Iñchiñ inayentuafuiñ ta Jehová, doicülelu tañi lifngen mu. Huelu iñchiñ feipiafuiñ: “Culpanchengen iñche, ¿chumngechi am lif mongen nieafun Jehová reque?”. Huelu culpanchengeliyiñ rume, lif chengeafuiñ, mülei ñi femal. Pedro huelulcaufui rume quiñeque mu, huelu lif mongen nierpui. Femngechi pengeleiñmu ca femngechi femafuiñ iñchiñ. Fentren pu che raquiduamquei tati che lifngelu ayequelai, culpaquelai rume. Cafei ñi lingar ropatulen engün piquei fentren che. Huelu tüfa feingelai, tati lifngelu femngelai. Chau Dios lifngei, huelu Biblia feipilei ñi nieel ayühun (1 Tim. 1:11). Ca femngechi tañi pu poyequeteu nieingün ayühun (Sal. 144:15). Cafei Jesús condenafi tati pu fariseo, fei engün yeniequefuingün fütraque tacun ca cümeque dungu femfaluuquefuingün ñi afmatuaeteu pu che (Mat. 6:1; Mar. 12:38). Iñchiñ pu cristiano, Biblia mu quimürpuiñ Jehová tañi lifngen, fei iñchiñ taiñ ca femngechi chengeal. Iñchiñ quimnieiñ taiñ piuqueyen Chau feipilayafeiñmu ñi femal taiñ pepi femquenoel. w21.12 pag. 2 parr. 1, 3

Jehová elueiñmu quiñe rume falin dungu: elueiñmu taiñ poyeafiel. ¿Chumngechi pengelafuiñ taiñ cüpa serfifiel ta Jehová? Inayaiñ taiñ chem pieteu ta Jehová, femngechi ca pengelaiñ taiñ piuqueyefiel (1 Juan 5:3). ¿Chem feipieiñmu Jehová taiñ femal? Enseñayafiel tati pu che Jehová ñi dungu ca quelluafiel ñi fautizahual engün (Mat. 28:19). Ca feipieiñmu taiñ huelucontu piuqueyehual (Juan 13:35). Iñchiñ inafiliyiñ taiñ chem pieteu Jehová, eluaiñmu taiñ rumel müleal quisu tañi fütra familia mu (Sal. 15:1, 2). Piuqueyecheaiñ. Chau Dios doi quimfalngequei tañi piuqueyechen mu (1 Juan 4:8). Petu taiñ quimnofiel mu, Chau Jehová piuqueyenieuyequeiñmu (1 Juan 4:9, 10). ¿Chumngechi inayentuafuiñ ta Jehová? Piuqueyeafiyiñ ta caquelu pu che (Efes. 5:1). Quellufiliyiñ pu che ñi quimafiel ta Jehová, pengelaiñ taiñ piuqueyechefengen. Femngechi quellufiliyiñ pu che, quisu engün ca coneltulerpuafuingün Jehová ñi fütra familia mu (Mat. 9:36-38). w21.08 pag. 5, 6 parr. 13, 14

Jesús fente ñi piuqueyefiel mu ta Jehová, femi com tañi feipieteu (Juan 14:31). Mülepalu Mapu mu, Jesús pengeli tañi piuqueyechefengen. Caiñetufeteu rume tati pu che, huelu Jesús com che cutranpiuqueyefi. Jesús ca enseñalfi tati pu che Chau Dios ñi ngünenietual ta Mapu, femngechi pengeli tañi piuqueyefiel engün (Luc. 4:43, 44). Fente tañi piuqueyefiel ta Jehová ca taiñ piuqueyenieteu iñchiñ, Jesús cutrancaulu rume, hultucui tañi mongen com iñchiñ mu. Tañi femün mu ta Jesús, iñchiñ afnoachi mongen nieafuiñ. Iñchiñ fente taiñ piuqueyefiel mu Jehová fautizauqueiñ. Cafei, chumngechi taiñ piuqueyefiel tati pu che pengelqueiñ taiñ piuqueyefiel ta Jehová, Jesús reque. Ngüneduamnge chem pin Biblia: “Quiñe che piuqueyenole ñi peñi tañi penieel, fei ¿chumngechi am piuqueyeafui ta Ngünechen, fei ñi pequenoel rume?” (1 Juan 4:20). w22.03 pag. 10 parr. 8, 9

Iñchiñ ayüqueiñ taiñ rupayal ta tiempo Jehová iñchiñ, huelu quiñeque mu cüdaungeafui chi taiñ femal. ¿Chemu? Fentren duam nielu am iñchiñ taiñ cüdau mu, taiñ pu familia mu ca caquelu dungu mu, feimu cüdautuafuiñ taiñ elcünual tiempo taiñ llellipuafiel Jehová, papeltuafiel ta Biblia ca raquiduamal Jehová mu. Huelu, ¿chem dungu mu cuñiutucuhuafuiñ? Müna falin-ngefui taiñ cansatual ca taiñ cüme rupaleal caquelu che iñchiñ. Huesa dungu no fel fei. Huelu fill semana femmequeliyiñ feichi dungu ca cuñiutucuunoliyiñ, nielayafuiñ tiempo taiñ poyeafiel ta Jehová. Loncontucuaiñ: cümefui taiñ cüme rupayal, huelu taiñ serfiafiel ta Jehová fei ta doi falin-ngefui (Prov. 25:27; 1 Tim. 4:8). w22.01 pag. 26 parr. 2, 3

Jehová feipifi pu israelita ñi piuqueyeafiel tañi pu chafche. Huelu pu israelita piuqueyenoafilu tañi pu chaf mollfüñche müten, pu catripanche ca mülefui tañi piuqueyeafiel engün. Feita ñi feipin Levítico 19:33, 34. Feimu tati pu israelita, tati pu catripanche chaf mollfüñche reque mülefui ñi troquitunieafiel. Ca mülefui ñi piuqueyeafiel engün. Pu israelita cosechalu tañi fün quetran mülefui ñi elcünual tati sofratripalelu, femngechi ñi üñüftual tati pu pofre ca tati pu catripanche (Lev. 19:9, 10). Iñchiñ pu cristianongen, ca femngechi ñi piuqueyeafiel pu catripanche (Luc. 10:30-37). Famülque mu, huall Mapu mu fentren che elcünuquei tañi pais, cañpüle amuquei. Feichi che fülcüleafui iñchiñ taiñ ruca mu. Rume falin-ngei taiñ yamnieafiel pu huentru, domo, pichiqueche catripanchengeafui rume. w21.12 pag. 12 parr. 16

Maneluucüleliyiñ fachantü Jehová mu, cüpalechi antü meu doi maneluucülerpuaiñ taiñ quelluaeteu. Por ejemplo, eimi mülei tami maneluucüleal Jehová mu tami feipiafiel tami jefe: “¿Eluafen permiso tañi amual quiñe fütra trahun mu? ¿Arreglacünulelafen tañi horario tañi amual fill trahun mu ca tañi doi amuldungual?”. “Femlayan” pielmu tami jefe ca quechanentungelmi tami cüdau mu, ¿chumaimi? ¿Maneluupeaimi mai Jehová mu tami quisucünunoaeteu ca tami eluaeteu com tami duamnieel? (Heb. 13:5). Fentren precursor feipiafeiñmu chumngechi Jehová quelluqueyu ca eluqueyu com tañi duamnieel. Felei llemai, Jehová turpu quisucünuquelafi tañi pu che. Jehová mülei iñchiñ mu, feimu chem rupale rume llicalayaiñ. Doyümfiliyiñ taiñ poyeafiel Jehová taiñ mongen mu, turpu quisucünulayaiñmu. w22.01 pag. 7 parr. 16, 17

¿Chem dungu mu cüdautuafuiñ maneluhual pu loncolelu mu? Huemünentungele quiñe taiñ hueni cam quiñe taiñ familia, ramtuhuafuiñ chi: “¿Cüme ngüneduampeingün mai pu loncolelu com tañi rupan? ¿Cüme juzgapeingün mai chumngechi ñi juzgachequen ta Jehová?” piafuiñ. ¿Chem quelluafeiñmu taiñ cüme raquiduamal tañi femquen mu tati pu loncolelu? Loncontucuaiñ: Jehová mai feipiquei fütra culpale quiñe che, mülei ñi huemünentungeal trahunche mu. Femngechi cuñiutucungequei tati trahunche ca quellungequei tati culpalu. Raquiduamnge tüfa: quiñe che fütra culpale, huemünentungenole, elcünungei tañi müleal ta trahunche mu, feipiafui ta caquelu ca ñi huesa femal (Gál. 5:9). Cafei feiti fütra culpalu, “müte huesa dungu no tañi femün” piafui. Ca femngechi, ti culpachi che müte eluucülelayafui tañi cüme raquiduamtual ca tañi femhuenoal feiti huesa dungu (Ecl. 8:11). Pu loncolelu huemünentufile quiñe che trahunche mu, Jehová ñi duam mu cüme ngüneduamfingün com ti dungu. w22.02 pag. 5, 6 parr. 13, 14

Quiñe loncolelu ngülamtufile quiñe peñi cam quiñe lamngen huelu cüme llounofile ti ngülam, ti loncolelu lladcüfemlayai. Ngülamtuchelu pu loncolelu, cümeafui ñi inayentuafiel Jesús ñi cutranpiuqueyechen. Feimu quiñe loncolelu ngülamtufile quiñe che, llellipuafi Jehová ñi quelluafiel ti che ñi inayal ti ngülam. Ti che pürüm cüme entendelayafui ti ngülam, feimu duamniei tiempo ñi cüme raquiduamal ti ngülam mu. Tati loncolelu cüme dungufile ca piuqueyenquechi ngülamtufile ti che, doi eluucüleai tañi inayal ti ngülam. Huelu loncontucuaimi, com tati ngülam ñi hulngeel tripape Biblia mu. Mülei tami cüme ngülamtuafiel tati pu peñi ca pu lamngen, huelu ca femngechi ayühulmayafimi quisu engün tañi piuque (Prov. 27:9). w22.02 pag. 18 parr. 17; pag. 19 parr. 19

Rupaliyiñ quiñe huesa dungu mu, pediafuiñ ta Jehová taiñ eluaeteu nehuen. Cam ayüliyiñ taiñ elcünual quiñe huesa huimtun, pediafuiñ ta Jehová taiñ quelluaeteu. Huelu quiñeque mu Chau Jehová huiñoldungufemlaeiñmu, ¿chumngelu? Chau Jehová quimniei taiñ fente cüme maneluucülen quisu mu (Heb. 11:6). Huelu Jehová ca ayüniei taiñ femal ñi feipicünufiel (1 Juan 3:22). Feimu ngillatufiliyiñ Jehová taiñ quelluaeteu elcünual quiñe huesa huimtun, ¿chumafuiñ? Nieaiñ ta paciencia ca nehuentuleaiñ taiñ elcünual feichi huesa huimtun. Jesús quimeltueiñmu quiñeque mu pürüm huiñoldungungelayai taiñ ngillatuel, quisu feipi: “Ngillatulemün, fei Ngünechen eluaimünmeu. Quintuaimün, fei peaimün. Mütrümaimün ta hulngiñ meu, fei nülalngeaimün. Tati ngillatulelu am, llouquei. Tati quintulu, pequei. Ca tati mütrümlu hulngiñ meu, fei ta nülalngequei” (Mat. 7:7, 8). w21.08 pag. 8 parr. 1; pag. 10 parr. 9, 10

Mülei tami papeltunierpuafiel Biblia, femngechi tami doi feyentuleal Jehová mu (Jos. 1:8). Feimu estudiamequefilmi ta Biblia, ¿chumafuimi? Raquiduamnge chumngechi ta Biblia mu cüme huirintucucünungei com ñi rupan fütra cuifi mu. Ca raquiduamnge com ñi feipicünungeel Biblia mu huechutriparpui. Ca inaduamafuimi com pu huirintuculu ta Biblia quiñeucülefuingün tañi feipin mu. Femülmi com tüfa, doi maneluhuaimi Jehová mu ca doi feyentuleaimi Biblia ñi cüpan Chau Dios mu (2 Tim. 3:14; 2 Ped. 1:21). Papeltufiel mu ta Biblia, inaduamnge fente falin-ngei tañi cümeque ngülam. Por ejemplo, fütra cuifi meu Biblia feipi iñchiñ diñmatufiliyiñ ta plata, müna cutrancayafeiñmu (1 Tim. 6:9, 10; Prov. 28:20; Mat. 6:24). Biblia tañi ngülam cümei llemai. Eimi ca raquiduamafuimi caquelu cümeque ngülam Biblia tami quellueteu. Doi falintufiliyiñ Biblia tañi ngülam, doi maneluhuaiñ Jehová tañi fütra quimün meu (Sant. 1:5). Ca femngechi doi ayüucüleaiñ (Is. 48:17, 18). w21.08 pag. 17, 18 parr. 12, 13

Eimi füchalmi rume, Jehová petu falintuñmaeimu com tami femqueel tami mongen mu. ¿Chem dungu? Tami ayühunquechi amuldunguquen mu. Huesaque dungu rupaqueimi chi, huelu cüme chaftufimi. Cafei feyentuqueimi ca incañpequefimi chem pin ta Biblia. Cüme entuqueimi fillque cüdau tami elfalcünungeel ca adümelfimi ta caquelu. Cafei calerumetun mu quiñe dungu Jehová ñi troquiñche mu, inafemquefimi. Eimi ca quelluquefimi ca yafültucufimi tati pu hunelequelu amuldungun mu. Eimi com tami mongen mu püntütripaquelaimi ta Jehová mu, feimu Jehová rume piuqueyeimu ca turpu elcünulayaimu (Sal. 37:28). Eimi feipieimu Chau Dios: ‘Füchalmi rume, iñche fentecünulayan tañi yafültucuquefiel’ (Is. 46:4). Huelu eimi füchalmi, falinolu troquihuafuimi trahunche mu. Huelu feingelai. Rume falin-ngei tami femqueel ti trahunche mu. w21.09 pag. 3 parr. 4

Jehová fente tañi quimün-ngen mu cutranpiuqueyechequei. Jehová chem rume femquei taiñ cüme feleal. Tati Biblia feipi ti che nielu ‘huenu meu cüpachi quimün, cutranpiuqueyechequei ca cümeque dungu femquei’ (Sant. 3:17). Quiñe cüme chau reque, Jehová cüme quimniei tañi cutranpiuqueyefiel mu tañi pu che, cümelcayafi engün (Is. 49:15). Jehová ñi cutranpiuqueyefiel mu tañi pu che, maneluucüleingün ñi rumel mongeleal culpafengelu engün rume. Huelu Jehová re ngünam cutranpiuqueyechequelai. Doi mai peñmaqueiñmu taiñ cüme piuquengen, feimu cutrantupiuqueyequeiñmu. Huelu Jehová cutranpiuqueyechefengelu rume, tüfa feipilai ñi cümelu troquifiel ñi huesa femün quiñe che. ¿Chumngelu feipiafuiñ? Raquiduamnge tüfa: quiñe peñi cam quiñe lamngen quisu tañi ayün mu conle huesaque cudumuhun mu, ¿chem mülei taiñ femal? Pablo feipi taiñ trahuluuhuenoal feichi che iñchiñ (1 Cor. 5:11). Feimu quiñe che fütra culpale, repentiunole, huemünentungeai trahunche mu. Femngechi cuñiutucungeai tati trahunche ca quimfalcünungeai Jehová tañi pu che lif mongen yeniequei. w21.10 pag. 9, 10 parr. 7, 8

Hulün mu iñchiñ plata, poyequefiyiñ Jehová. Pu israelche amulu tañi cüla fiesta mu, mülefui ñi yelelafiel regalo ta Jehová (Deut. 16:16). Pu israelche hulquefuingün tañi pepi hulqueel müten, femngechi mañumtuquefuingün ta Jehová com tañi elueteu mu. ¿Iñchiñ cai? ¿Chumngechi pengelafuiñ taiñ piuqueyefiel ca mañumniefiel ta Jehová? Plata mu quelluntucuafuiñ taiñ trahunche ca Jehová tañi troquiñche huall Mapu mu. Ti apostol Pablo feipi ti che hul-lu tañi nieel com piuque mu, ayühulquefi ta Jehová. Fei Jehová ayüquei ti che ñi hulal chem tañi nieel, feipiquelafi ñi hulal chem tañi nienon (2 Cor. 8:4, 12). Jehová rume falintuquefi taiñ hulqueel com piuque mu, pichin hul-liyiñ rume (Mar. 12:42-44). w22.03 pag. 24 parr. 13

Pu loncolelu com famentulayafui ti huesaque dungu taiñ rupaquen, huelu Jehová ayüquei tati pu loncolelu ñi yafültucuafiel ca cuidayafiel Jehová tañi pu che. Tati pu loncolelu rume cüdau niefule rume, ¿chumngechi nentuafui tiempo tañi quellucheal? Inayentuafui ñi femün Pablo. Quisu rumel saquiquefi ca yafültucuquefi tañi pu peñi ca pu lamngen. Famülque mu, pu loncolelu mülei ñi inayentuafiel ñi femün ta Pablo (1 Tes. 2:7). Cafei, Pablo feipifi tañi pu peñi ca pu lamngen ñi rume piuqueyefiel. Ca feipifi Jehová ñi rume piuqueyeteu engün (2 Cor. 2:4; Efes. 2:4, 5). Pablo hueni troquiquefi tañi pu peñi ca pu lamngen ca trahuluuquefui fei engün mu. Cafei, Pablo feipiquefi tañi pu peñi ca pu lamngen chem ñi fill raquiduamelnieteu ca tañi huelulcauquen, femngechi pengelelfi tañi maneluucülen fei engün mu (2 Cor. 7:5; 1 Tim. 1:15). Pablo raquiduamquelafui quisu tañi huesaque dungu mu müten, huelu mai eluucülequefui tañi quelluafiel tañi pu peñi ca pu lamngen. w22.03 pag. 28 parr. 9, 10