Agosto

¿Inei engün mu chi am llellipui ta Jesús? Llellipui pu Roma soltau meu peno. Tüfa engün clafantucueyu. Fente huesalcangelu rume Jesús, chem huesa pilafi rume tañi huesalcaeteu (1 Ped. 2:23). Eluucüleaiñ taiñ perdonacheal Jesús reque (Col. 3:13). Quiñeque mu tati pu che, taiñ familia cütu, catrütuafeiñmu taiñ poyeafiel ta Jehová. Ayüquelaingün taiñ religion ca chumngechi yequeiñ taiñ mongen. Huesa dunguyeafeiñmu engün, illamcayafeiñmu, huicürcayafeiñmu taiñ publicacion ca hulelcayafeiñmu cütu. Fei, ¿chumaiñ iñchiñ? Perdonayafiyiñ engün ca feipiafuiñ ta Jehová: “Chau, quelluafimi engün. Conpe ñi piuque meu engün ti rüf dungu” piafuiñ (Mat. 5:44, 45). Huesa femngeliyiñ, cüdautuafuiñ taiñ perdonayafiel. Huelu femnoliyiñ, iñchiñ müten huesa tripayafuiñ (Sal. 37:8). Huesa femngeliyiñ huelu eluucüleliyiñ taiñ perdonacheal, cüme duamcüleaiñ (Efes. 4:31, 32). w21.04 pag. 8, 9 parr. 3, 4

Quiñe familia mu quiñe che huemünentungele trahunche mu, pu ngen familia rume fentren hueñancün nieafuingün. Raquiduamnge chumngechi ñi fente huesa duamün ta Jehová elcünuelumu tañi pu püllü. Müna hueñancüpelafui (Jud. 6). Ca raquiduamün-ngei müna cutrantupelafui ta Jehová fentrenque rupa tañi feyentunoeteu mu pu israelita (Sal. 78:41). Feimu eimi reque, Jehová ca müna hueñancüquei huemünentungen mu quiñe che trahunche mu. Feimu Jehová eluaimu yafüluhun ca quelluaimu. Pu yall elcünufiel mu ta Jehová, fentrenque chau ramtuuquei: “¿Ca chem mülefui tañi femal tañi elcünunoafiel Jehová engün?”.Quiñe peñi feipi: “‘Iñche ñi culpan mu’ piquefun. Cüme umautuquelafun. Quiñe lamngen feipi: “Iñche ramtuuquefun ‘¿chemu huesa femün?’. Ca raquiduamquefun com cüme dungu ñi quimeltunofiel tañi püñeñ” pi taiñ lamngen. w21.09 pag. 26 parr. 1, 2; pag. 27 parr. 4

Quiñeque che feipiquei iñchiñ adümuucülelaiñ taiñ quimeltucheal Biblia. Huelu mülei ñi cüme ngüneduamal ñi rüfngepen mai tañi feipingeel. Tüfa ñi femün ta Lucas. Petu ñi huirintucunon tañi lifru, fei ‘inaramtui chumngechi ñi rupan com tüfachi dungu’. ¿Chumngelu femi tüfa? Lucas ayüfui ñi manelfalngeal chem tañi huirintucual (Luc. 1:1-4). Ca femngechi femingün pu cristiano Berea huaria mu mülelu engün. Hue allcülu engün Jesús mu, hune ngüneduamingün ñi rüfngepen mai chem ñi feipingeel (Hech. 17:11). Eimi ca femngechi mülei tami femal. Cüme ngüneduamaimi ñi rüfngepen mai tami feipingeel. Trürümafimi ñi feipin Biblia ca tami quimeltueteu pu testigo. Ca ngüneduamafuimi ñi femqueel pu testigo famülque mu. Cüme ngüneduamfilmi com ti dungu, aporiauquechi juzgalayaimi ca ngünencangelayaimi. w21.05 pag. 3 parr. 7, 8

Cümeafui raquiduamal inei am taiñ trahunche mu mangelafuiñ taiñ cüme rupayal. Quiñeque mu, taiñ pu peñi, pu lamngen rume duamniefui taiñ fülmanieafiel. Raquiduamnge tüfa: quiñeque peñi, lamngen ñi familia testigongelai. Fei celebramequele engün quiñe fiesta, taiñ peñi, lamngen huesa duamafui ñi müleal fei mu. Cafei quiñeque taiñ pu peñi, pu lamngen rume hueñancüleafui rupale quiñe tripantu ñi lan quiñe tañi pu che. Elcünuliyiñ antü taiñ müleal fei engün mu, pengelelafiyiñ taiñ piuqueyefiel (Filip. 2:20). Quiñeque mu, quisulelu troquihuafuiñ. Huelu loncontucuaiñ, Jehová quimniei taiñ rupamequen. Fentren rupa Jehová adniequefi taiñ pu peñi, pu lamngen taiñ quelluaeteu (Mat. 12:48-50). ¿Chumngechi pengelafuiñ taiñ mañumcülen? Com nehuen mu quelluafiyiñ taiñ pu peñi ca pu lamngen. Feimu llemai huesa duamcüleliyiñ rume, quisulelaiñ. Jehová fülmanieaiñmu tati. w21.06 pag. 13 parr. 18-20

Jesús fentecünulai tañi amuldungun allcütunoeteu rume tati pu che. ¿Chemu fentecünulai? Jesús quimniefui tati pu che duamniei ñi quimal ti rüf dungu, feimu ayüniequefui com che tañi amuldungulelafiel. Cafei Jesús quimniefui ellaca mu quiñeque che allcütulayafeyu, huelu rupachi antü mu ñi feyenturpual engün. Raquiduamnge tüfa: mülepalu Jesús Mapu mu, quiñe tañi pu peñi no rume inaquelafeyu (Juan 7:5). Huelu huiñomongetulu Jesús, cristianogerpuingün (Hech. 1:14). Iñchiñ quimlaiñ inei ñi poyerpuafiel ta Jehová. Quiñeque che doi cüdautuquei ñi adümafiel Biblia ñi rüf dungu, ca quiñeque che pilai taiñ allcütuaeteu. Huelu iñchiñ ayühunquechi amuldunguliyiñ, fei peeliyiñmu taiñ cüme femün ti che, eluhuafuingün chi ñi serfiafiel ta Jehová. w21.05 pag. 18, 19 parr. 17, 18

Jesús mülepalu Mapu mu, huercüfi tañi pu discipulo ñi femal epu dungu. Hunelu mu, mülefui tañi amuldungual Jehová tañi Gobierno mu. Quisu feipifi ñi chumngechi femal engün (Luc. 8:1). Feipifi ñi chumal engün cüme lloungele cam cüme lloungenole engün (Luc. 9:2-5). Ca feipifi ñi chumte puhual ñi amuldungun engün (Mat. 24:14; Hech. 1:8). ¿Ca chem mülefui ñi femal Jesús tañi pu discipulo? Mülefui tañi enseñayafiel ta che com tañi mandaeteu ta Jesús. Jesús feipi ñi ca femngechi femngeal feitachi falin cüdau iñchiñ taiñ antü mu (Mat. 28:18-20). Cafei chumngechi ñi pengelelfiel ta Juan, Jesús ayüniei com tañi pu discipulo ñi quelluafiel caquelu che ñi quimafiel ta Jehová (Apoc. 22:17). w21.07 pag. 3 parr. 3, 4

Fachantü tati pu che notücauquei fei doi cümelu troquiuquei caquelu che mu. Fei ñi doicülelu troquingeal, huesalcachequei cütu. Por ejemplo, quiñe huentru negociaquelu, rume ayüafui ñi nieal doi plata, fei tañi femal huesalcayafui rume ta caquelu che. Cam quiñe pelotatuquelu chumafui rume tañi allfülafiel tati ca aucantupelu femngechi ñi huehual. Quiñe estudiante copiañmayafui tañi compañ ñi prueba fei ñi conal quiñe fütra universidad mu. Com tüfa ñi femqueel tati pu che inaquefilu ñi huesaque ayüqueel (Gál. 5:19-21). Feimu iñchiñ taiñ cristianongen mu femquelaiñ. Huelu quiñeque taiñ pu peñi, pu lamngen inaduamuulayafuingün rume chi ñi doicülelu troquiucülequen ta caquelu meu. Fei raquiduamtuculelafui ta caquelu che ñi ca femngechi femal. Rume falin-ngei taiñ cuñiutucuucüleal. Ayüliyiñ taiñ doicülelu troquingeal, ti trahunche quiñeucülehuelayai. Feimu, cümeafui taiñ peal ñi femün quiñeque poyequefilu ta Jehová cuifi mu, fei engün doicülelu troquiulaingün. w21.07 pag. 14 parr. 1, 2

Fülmanieafiyiñ taiñ pu peñi ca pu lamngen hueñancülelu. Famülque mu, taiñ pu peñi ca taiñ pu lamngen pengelqueingün tañi nor piuqueyeniefiel tañi pu peñi ca pu lamngen. Fülmaniefingün ca quelluquefingün tati pu hueñancülelu (Prov. 12:25; 24:10). Fei engün inaquefingün Pablo tañi ngülam, quisu feipi: ‘Yafültucuafimün tati ngañhuadcülelu, quelluafimün tati yafüduamcülenolu ca nieaimün paciencia itrocom che meu’ (1 Tes. 5:14). ¿Chumngechi quelluafuiñ taiñ pu peñi ca pu lamngen hueñancülelu? Cüme allcütuafiyiñ engün ca feipiafiyiñ taiñ rume piuqueyeniefiel. Jehová falintuquei taiñ quelluquefiel taiñ pu peñi ca pu lamngen. Proverbios 19:17 feipi: “Tati fürenequefilu pu ñom che arelelquefi ta Jehová, ca Quisu culliñmayayu tañi femquen”. w21.11 pag. 10 parr. 11, 12

¿Chumafuiñ taiñ pepicaucüleal chem ñi rupayal cüpalechi antü mu? Ayüucüleaiñ taiñ nieel mu ca taiñ hueniyefiel Jehová. Doi cüme hueniyefiliyiñ Jehová famülque mu, doi maneluucüleaiñ taiñ incañpeaeteu cüpalechi antü meu. ¿Chem pengeli ñi feipin David mülelu taiñ peelchi texto fachantü? David maneluucülequefui Jehová mu, ca Jehová turpu quisucünuquelaeyu. Por ejemplo, David huechengelu chaftufi ta Goliat. Feipifi: “Fachantü Jehová quelluaeneu, feimu huehuayu” (1 Sam. 17:46). Rupalu ta antü, ti rey Saúl fentren rupa ayüfui ñi langümafiel ta David, huelu Jehová turpu quisucünulafi ta David (1 Sam. 18:12). David deu quimniefui Jehová ñi quelluqueteu cuifi, feimu maneluuquefui ñi quellunierpuaeteu. David reque femliyiñ, iñchiñ ca maneluucüleaiñ Jehová taiñ quelluaeteu rupaliyiñ huesaque dungu mu. w22.01 pag. 6 parr. 14, 15

Chau Jehová hunelu mu cüme raquiduamquei chem tañi femal ca ñochiquechi ta femquei. ¿Chumngelu am? Tañi püramyeafiel tañi üi ca tañi quelluafiel ta caquelu. Ngüneduamaiñ chumngechi Jehová ñochiquechi deumafi ti Mapu ca chem quimeltueiñmu tüfa. Biblia feipi ñi fente cüme deumafiel ta Mapu ta Jehová (Job 38:5, 6). Ca elcünui antü tañi cüme ngüneduamafiel (Gén. 1:10, 12). Pu cümeque püllü afmatulehuepelai tañi pefiel mu ñi deumael ta Jehová, feimu eluhuingün tañi püramyeafiel. ¿Chem pengeli tüfa? Jehová fentren tripantu mu deumafi ti Mapu, pu huangülen ca com ñi mülen, ñochiquechi deumafi. Femlu rume, pefilu tañi deumael “rume tutelcalei” pi (Gén. 1:31). w21.08 pag. 9 parr. 6, 7

Jesús tañi nütram mu, quiñe huentru petu ñi amunon ca mapu mütrümfi tañi pu cüdaufe, fei elfalcünulelfi quiñeque talento. Tüfachi huentru cüme quimniefui tañi pu cüdaufe caquerumei ñi adümuhun engün. Feimu quiñe esclavo elufi quechu talento, cangelu esclavo elufi epu, cangelu cai elufi quiñe talento müten. Tati lloulu quechu talento ca tati lloulu epu talento, rume cüdahuingu fei doi plata huehuingu. Huelu tati lloulu quiñe talento müten cüdaulai, fei quechanentungei. Ti cüdaufe lloulu quechu talento ca ti lloulu epu talento cüme quimniefuingu fente ñi falin-ngen ti cüdau ñi elfalcünungeel, fei eluhuingu ñi cüme huechunentuafiel. ¿Chum tripai tañi cüdau engu? Doi plata huehuingu. Tañi cüme femün mu engu, tañi ñidol saquieyu ca doi cüdau elfalcünueyu engu. w21.08 pag. 21 parr. 7; pag. 22 parr. 9, 10

Jehová fentren paciencia nielqueiñmu, quisu am ayünolu inei no rume ñi layal (2 Ped. 3:9). Jehová eluquefi ta tiempo tati pu che ñi cüme raquiduamtual. Huelu Jehová rumel paciencia nielayai. Com tati pu inaquenofilu ta Jehová, chumngechi ñi rupan ta Faraon ca femngechi femngeai. Jehová feipifi ta Faraon: “Iñche ayüfuli, deu langümafeyu quiñe huesa cutran meu. Fantepu meu, eimi ca tati pu egiptoche deu ngehuelayafuimün. Huelu elunieyu tami mongeleal tüfachi dungu mu: tami peal iñche tañi pepiluhun ca femngechi com pu che tañi quimal iñche tañi ineingen” (Éx. 9:15, 16). Puhuai chi antü, fei com pu che quimai Jehová tañi rüf Ngünechen-ngen (Ezeq. 38:23). Ñi feipin ti texto fachantü com pu pinolu ñi ngünenieaeteu Chau Dios, Faraon reque apümngeaingün. w21.09 pag. 18 parr. 17, 18

¿Eimi hueñancüpelaimi chi ñi huemünentungen mu quiñe tami pu che trahunche mu? Huelu quiñeque tami pu peñi ca pu lamngen huesa duamelelmu tañi feipin mu, ¿chumafuimi? Esperalayaimi ñi huelulcaunoal engün tañi dungun meu (Sant. 3:2). Com huelulcauqueiñ, feimu afmatulayaimi quiñe che quimnole chem tami feipiaeteu. Ca afmatulayaimi huesa pirumeelmu quiñe peñi cam quiñe lamngen. Loncontucuaimi ñi feipin ta Pablo: “Hueluconquechi ngenoafelniehuaimün, ca huiñoduamahuaimün quiñeque femle huesa dungu ñi lladcülcayafiel ta cangelu” (Col. 3:13). Turpu quisucünulayafiyiñ taiñ pu peñi ca pu lamngen huemünentuñmangelu quiñe familia trahunche mu. Quisu engün duamniefuingün ñi yafültucungeal engün (Heb. 10:24, 25). Quiñeque mu taiñ pu peñi ca pu lamngen huemünentuñmangelu quiñe familia trahunche mu, nehue dunguhuelaeyu tati trahunche, feimu ca huemünentungelu troquiuqueingün. ¡Turpu huesa duamel-layafiyiñ taiñ pu peñi ca pu lamngen! Ca yafültucuafiyiñ pu huechequeche nielu pu chau poyehuenofilu ta Jehová. w21.09 pag. 29 parr. 13, 14; pag. 30 parr. 16

Quiñe fütache ca quiñe hueche nütramcale, huelucontu yafültucuhuafuingu (Rom. 1:12). Femngechi dungu rupale, ti hueche quimtucuai ta Chau Jehová cuñiutucuquefi tañi pu che. Tati fütache inaduamai tañi piuqueyeniengeel, femngechi ayühunquechi nütramcayafi chumngechi tañi cuidaqueteu ta Jehová. Pu püntütripaquenolu Jehová mu doi falin-ngetuingün rupan mu rume ta tripantu (1 Tes. 1:2, 3). ¿Chemu feipiafuiñ? Com ñi mongen mu eluuqueingün ñi adnieaeteu ta Jehová ca ñi quelluaeteu ñi doi cüme chengeal engün. Doi quimfiliyiñ tati pu fütaqueche, doi falintuafiyiñ engün. Pu huechequeche ca pu fütaqueche mülei ñi hueluquentu falintuhual, femngechi cümelcaleai ti trahunche. w21.09 pag. 7 parr. 15-18

Eluucüleaiñ taiñ juzgachenoal, huelu mai taiñ cutranpiuqueyecheal Jehová reque (Efes. 2:4). Huelu iñchiñ re cutranpiuqueyechelayaiñ. Huelu mai eluucüleaiñ taiñ quelluafiel tati pu che. Com iñchiñ quelluafuiñ taiñ familia, taiñ trahunche mu ca taiñ lof mu. Ramtuhuaiñ: ¿Mülepei mai quiñe che duamnielu tañi yafültucungeal? Duamniele quiñe che, ¿ngillalelafuiñ chemcün, deumalelafuiñ iyael cam quelluafuiñ caquelu dungu mu? Cam quiñe peñi cam quiñe lamngen huiñotulu Jehová mu, ¿yafültucupeafuiñ mai? ¿Quimelelpeafuiñ mai caquelu che Jehová ñi dungu? Fente taiñ cutranpiuqueyefiel mu tati pu che, amuldungulelquefiyiñ (Job 29:12, 13; Rom. 10:14, 15; Sant. 1:27). Inaduamliyiñ quiñe che duamnielu ñi quellungeal cam ñi yafültucungeal, eluhuaiñ taiñ cutranpiuqueyeafiel ca quelluafiyiñ. Femliyiñ, ayühulmayafiyiñ Jehová ñi piuque, tati Dios cutranpiuqueyechequelu. w21.10 pag. 13 parr. 20-22

Salmo 23 mu, David nütramcai chumngechi Jehová cümelcaeyu lloufilu am quisu tañi Camañfe reque. Jehová yequeyu nor rüpü meu, quisu turpu quisucünulaeyu. David elueteu rume ta Jehová “tañi tranaleal carü cachu mu”, huelu quimniefui tañi rupayal huesaque dungu mu. Quiñeque mu, David hueñancülequefui chi ‘miyauquelu fütra dumiñ meu’ reque. Ca feipi tañi caiñetungeal. Huelu quisu am feipilu “Jehová iñche tañi Camañfe”, feimu llicaquelafui. Feimu, ¿chemu faltaquelafui chem cüme dungu no rume ta David? Quisu com niequefui tañi fülmaucüleal Jehová mu. David duamnielafui alün fillem tañi ayüucüleal. Quisu ayüucülequefui Jehová tañi elueteu com ñi duamnieel tañi mongeleal. David mu, doi falin-ngefui llohual Jehová ñi cümelcan ca tañi cuidayaeteu. ¿Chem quimeltueiñmu David ñi feipin? Iñchiñ ayüucüleafuiñ taiñ nieel mu falinque fillem, huelu doyümlayafiyiñ taiñ mongen mu. w22.01 pag. 3, 4 parr. 5-7

Cuifi mu, pütrünque che amuldunguingün, allcütungelaingün. Ca femngechi Noé, 40, 50 tripantu mu amuldungupelafui (2 Ped. 2:5). Noé ayüpelafui ñi allcütuaeteu pu che, huelu Jehová feipilaeyu ñi femngechi rupayal. Jehová feipifilu ta Noé ñi deumayal ti huampo ruca, feipifi quisu ñi conpual, ca tañi domo, pu fotüm ca tañi pu püñmo (Gén. 6:18). Jehová feipifilu ta Noé ñi chumtetuhual ca ñi chumterupayal ti huampo ruca, Noé raquiduampelafui com pu che tañi allcütunoaeteu. Fei Noé “fentren che conpulayafui ti huampo ruca mu” pipelafui (Gén. 6:15). ¿Chum tripai tañi amuldungun ta Noé? Chem che rume allcütulaeyu (Gén. 7:7). ¿Feipipei mai ta Jehová ñi cüme amuldungunon ta Noé? Femlai. Jehová ñi adquiñ mu, Noé cüme amuldungufui. ¿Chumngelu? Noé femi com tañi feipieteu ta Jehová (Gén. 6:22). w21.10 pag. 26 parr. 10, 11

¿Chem raquiduami chi Rut allcülu tüfachi dungu? Raquiduamnge: Rut afquentu quellufi tañi nanüng. Ngümalu Noemí, ca inaye ngümai Rut. Rut yafültucufi Noemí ca compañfi fentren antü amutulu tañi mapu meu. Huelu femfulu rume, Noemí feipi “fei tüfa chem no rume cüpalhuetulan”. Rut fente quellufeyu, huelu falintulafi. Feichi dungu meu, rume cutrantupelai Rut. Huelu quisucünulafi ta Noemí (Rut 1:3-18). Quiñe hueñancülechi lamngen feipiafui quiñeque dungu taiñ cutrantupiuqueleaeteu, tunte yafüluuliyiñ rume taiñ quelluafiel. Huelu iñchiñ mülelai taiñ pürüm illcual. Yafüluhuaiñ taiñ inafülmanieafiel ca llellipuafiyiñ Jehová taiñ quelluaeteu yafültucuafiel (Prov. 17:17). Quiñeque mu, hueñancülechi lamngen lloulayafui chi quellu, huelu taiñ nieel rüf piuqueyehun quisucünulayafiyiñ (Gál. 6:2). w21.11 pag. 11 parr. 17-19

Biblia feipilei quiñe che lifngelu, lif mongen yeniequei. Poyequefi Jehová chumngechi tañi ayüqueel quisu, ca cüme hueniyefi Jehová. Ca femngechi trürquelai caquelu che poyequenofilu Jehová, Jehová müten poyequefi. Iñchiñ femngechi femliyiñ, lif mongen nielu pingeafuiñ. ¡Afmatufali! Jehová fente lifngei, iñchiñ culpanchengeiñ, huelu ayülei taiñ hueniyeaeteu. Jehová lifngei, chem mu rume trürümngelayafui. Feita tañi feipin tati pu cümeque püllü inafülcülelu Jehová ñi ülmen mülehue mu, serafin pingelu. Fei engün feipingün: “Lifngei, lifngei, lifngei ta Jehová Ñidolcülelu pu hueichafe mu” (Is. 6:3). Feitachi pu serafin ca lifngeingün, tañi femngen mu cüme hueniyefingün Jehová. w21.12 pag. 3 parr. 4, 5

Fentren huechequeche ramtuuquei chumal tañi mongen mu. Feipiafeyu chi tañi pu profesor ca pu familia testigongenolu ñi amual ta universidad mu, femngechi ñi nierpual cüme cüdau ca fentren plata. Femfule engün, niehuelayafuingün ta tiempo. Cafei tañi pu chau, tañi pu peñi ca pu lamngen, feipiafeyu tañi serfiafiel ta Jehová com tañi mongen mu. Femngechi dungu mu rupale quiñe hueche, ¿chumafui? ¿Chem quelluafeyu ñi cüme dullial? Papeltuafui Efesios 5:15-17 ca raquiduamafui tañi feipin mu . Ca ramtuhuafui: “¿Chem ayüquei Jehová tañi femal? Iñche, ¿chumafun tañi ngünamcanoal tañi tiempo?”. Acordayaiñ taiñ cuñihun-ngechi antü taiñ mülen. Ca pichilehuefui ti tiempo ñi apümcangeal Huecüfü ñi ngünenieel. w22.01 pag. 27 parr. 5

¿Chumül am Santiago Jesús tañi discipulongerpui? Deu huiñomongetulu ta Jesús. Feichi mu Jesús “peufaluutufi ta Santiago, ca itrocom ti pu apostol” (1 Cor. 15:7). ¿Chem cümeque dungu llohui? Santiago mülerquefui tati pu apostol engün ñi llohual Chau Ngünechen ñi nehuen (Hech. 1:13, 14). Rupachi antü mu Santiago coneltui tati cuerpo gobernante mu (Hech. 15:6, 13-22; Gál. 2:9). Cafei, petu ñi puunon ti 62 tripantu, Jehová adniefi ta Santiago ñi huirintuculelafiel tati pu dullin cristiano. Famülque mu, itrocom iñchiñ quelluqueiñmu Santiago ñi carta (Sant. 1:1). Rupachi antü mu, Santiago lai. Ananías, Anás tañi fotüm, langümfaleyu. Santiago eluulu müten tañi serfiafiel Jehová, turpu püntütripalai quisu mu. w22.01 pag. 8 parr. 3; pag. 9 parr. 5

¿Chem quimeltueiñmu ñi feipin taiñ peelchi texto fachantü? Raquiduamlayaiñ taiñ rupanoal huesaque dungu mu. Doi mai pepicaucüleaiñ taiñ püntütripanoal Jehová mu, langümngeliyiñ rume (Mat. 16:24, 25). Huelu huesa rupaliyiñ, maneluucüleiñ Jehová taiñ quelluaeteu taiñ nehuencüleal (1 Cor. 10:13). ¿Ca chem quimeltueiñmu? Jesús reque rupayafuiñ huesaque dungu mu taiñ chumnon mu rume, ¿chumngelu? (1 Ped. 2:19, 20). Taiñ cristianongen mu coneltuquelaiñ ñi femquen pu poyequenofilu ta Jehová. Cafei huldunguqueiñ Chau Jehová mu, feimu caiñetuafeiñmu pu che (Juan 17:14; 1 Ped. 4:15, 16). Jesús quimtucui chemu Jehová catrütulafi ñi rupayal huesaque dungu mu. Famülque mu, quiñeque peñi, lamngen ca rupaqueingün huesaque dungu mu. Huelu ramtuhuafuingün chi: “¿Chemu am femngechi rupan iñche?” (Hab. 1:3). Pu peñi, pu lamngen maneluufui rume Jehová mu, duamniei ñi yafültucuaeteu. Taiñ Huenu Chau quimniei tüfa, feimu yafültucuqueyeu engün (2 Cor. 1:3, 4). w21.04 pag. 11 parr. 9, 10

Femliyiñ Jehová tañi ayüqueel, yamniefiliyiñ ca piuqueyefiliyiñ, femngechi ayühulafiyiñ. Quimnieiñ taiñ poyeafiel müten ta Jehová. Fente taiñ piuqueyefiel mu, chumaiñ rume taiñ cüme poyeafiel. Llellipufilu iñchiñ Jehová, pengelqueiñ taiñ poyequefiel. Biblia mu trürümngequei taiñ llellipufiel Jehová incienso mu. Ti incienso cüme pepicangequefui femngechi ñi lüpümngeal tolto ruca meu ca ti ngillatuhue ruca mu, feimu Jehová ayüquefui. Ca femngechi llellipufiel mu ta Jehová com taiñ piuque mu, Jehová ca ayüquei (Deut. 33:10; Prov. 15:8). Jehová ayüquei taiñ nütramcayafiel, taiñ feipiafiel chem taiñ raquiduamquen ca chem taiñ hueñancülqueteu. Ca Jehová ayüquei taiñ feipiafiel taiñ piuqueyefiel ca taiñ mañumtufiel. Feimu petu tami llellipunofiel Jehová, raquiduamafuimi chem tami feipiafiel. Femngechi cüme nümün-ngechi incienso reque puhuai Jehová mu. w22.03 pag. 20 parr. 2; pag. 21 parr. 7

Armagedón mu, iñchiñ feipilayaiñ inei tañi apümcangeal ca inei tañi mongetripayal (Mat. 25:34, 41, 46). ¿Maneluupeaiñ mai Jehová ñi cüme juzgayafiel tati pu che? Femngechi maneluhuaiñ ñi cüme juzgacheal cüpalechi antü meu. Jehová rupan juzgafile tati pu che, re cümeque dungu mületuai. Tati coilaque religion ca tati pu huesaque gobierno apümcangeai. Inei rume cutranhuelayai, com cüme feletuaiñ, füchahuelayaiñ ca lahuelayaiñ. Huaranca tripantu mu Satanás ca tati pu huesaque püllü traricünungeaingün, chumlayafingün rume tati pu che. Com tati huesaque dungu apümcangeai (Apoc. 20:2, 3). Maneluucülelu am Jehová mu iñchiñ, müna mañumtuafiyiñ. w22.02 pag. 6, 7 parr. 16, 17

Jesús eluhui ñi cümelcautual caquelu che engün, ca quellufi ta caquelu ca ñi femngechi femal. Jesús quimeltufi engün mülefui tañi cümelcautual pu peñi ca pu lamngen engün, femngechi Jehová cüme llohuafeyu (Mat. 5:23, 24). Jesús mollquechi feipifi tañi pu apostol ñi notucamequeunoal engün inei ta hunencülen quisu engün mu (Luc. 9:46-48; 22:24-27). Cuñiutucuulayaiñ müten taiñ yafcaunoal caquelu che iñchiñ, ca mülei taiñ cümelcautual caquelu che iñchiñ. Ca quelluafiyiñ ta caquelu ñi femal engün (Filip. 4:2, 3; Sant. 3:17, 18). Ramtuhuafuiñ: “¿Rüf eluuquen tañi cümelcautual caquelu che iñchiñ, cüdautufuli rume? Quiñe peñi cam quiñe lamngen huesa duamelelimu, ¿illcutuniequepefiñ mai? Huesa femelimu quiñe che, ¿üngümcülen tañi perdonayaen piaeteu cam iñche nütramcayafiñ tayu cümelcautual?”. w22.03 pag. 10 parr. 10, 11

Biblia feipicünui fentren che eluucüleai tañi inayal Jesús ñi feipin ca ñi serfiafiel Jehová (Sal. 110:3). Tüfa huechutripamequei fachantü. Fill tripantu mu Jehová tañi pu che fentren hora amuldunguqueingün, quisu tañi ayün mu femqueingün tüfachi cüdau. Cafei Jehová tañi pu che huelucontu quelluuqueingün chem tañi duamnieel, yafültucuuqueingün ca quelluuqueingün tañi doi cüme hueniyeafiel Jehová. Cafei tati pu loncolelu ca tati pu quelluquelu, rume pepicauqueingün tañi hulal ñi asignacion trahun mu ca eluuqueingün tañi yafültucuafiel pu peñi ca pu lamngen. ¿Chemu femquei Jehová tañi pu che? Tañi piuqueyefiel mu ta Jehová ca tañi chafche (Mat. 22:37-39). Jesús quisu duamuuquelafui, doi duamtuquefui tati pu che. Iñchiñ cüpa inayentuquefiyiñ ñi femün ta Jesús (Rom. 15:1-3). Iñchiñ Jesús reque duamtufiliyiñ tati pu che, rume cümelcayaiñmu. w22.02 pag. 20 parr. 1, 2

Israel mapu mu, epe com pu che cüdauquefuingün ti mapu. Ca feichi israelche cüdahuelquefilu ta caquelu, cullingequefui aflu ti antü. Huelu quiñe cüdaufe cullingenofule quiñe antü, quisu ca tañi familia nielayafuingün iyael. Jehová feipi feiti cüdaufe rume duamniefui tañi cullingeal, femngechi tañi mongeluhuam (Deut. 24:14, 15; Mat. 20:8). Famülque mu, pu ngen cüdau pichin plata culliquefi tañi pu cüdahueleteu. Doi plata mülefui ñi culliafiel, huelu femquelaingün. Feiti ngen cüdau quimnieingün tañi pu cüdaufe duamnieingün ti cüdau, feimu fentecünulayai tañi cüdahual engün, pichin plata cullingefule rume. Pu ngen cüdau allmalltuqueingün tüfa tañi pichin plata culliafiel. Feitachi ngen cüdau nieñmaquefi reque tañi pu cüdaufe ñi plata. ¡Müna huesa! Quiñe cristiano, ¿chumngechi inayafui ti ngülam mülelu Levítico 19:13 mu? Quiñe cristiano niele che tañi cüdahueleteu, mülei ñi culliafiel tañi plata. w21.12 pag. 10 parr. 9, 10

Jesús rume cutrancahui, feimu huihulequefui. Quiñeque mu, yehuentucuhuafuiñ feipiafiel caquelu che taiñ quelluaeteu. Huelu Jesús feipi müten ñi duamnieel ta quellu. Ca femngechi iñchiñ duamliyiñ taiñ quellungeal, feipiaiñ müten. Por ejemplo, cutrancüleliyiñ cam rume füchaleliyiñ, ¿feipipeafuiñ mai quiñe hueni taiñ yeaeteu doctor mu cam yeaeteu ngillacayal? Cafei quiñeque mu huesa duamcüleafuiñ, yafüngehuelayafuiñ. Fei cümeafui taiñ feipiafiel taiñ chum duamcülen quiñe peñi cam lamngen cüme hueniyequefilu ta Jehová. Femngechi allcütuaiñmu ca yafültucuaiñmu (Prov. 12:25). Acordayaiñ: taiñ pu peñi, pu lamngen müna piuqueyeiñmu ca cüpa quelluqueiñmu (Prov. 17:17). Huelu nütramcanofiliyiñ engün, turpu quimlayafuingün taiñ chum duamcülen. w21.04 pag. 11, 12 parr. 11, 12

Caletun mu taiñ mongen, cüdaungeafui taiñ chaftuafiel taiñ rupamequen. Quiñeque pu peñi ca pu lamngen rume fentren tripantu mu femquefui engün quiñe falin cüdau Jehová ñi troquiñche mu, huelu feula cangelu cüdau elungeingün. Ca quiñeque peñi ca lamngen elcünuquei ñi falin cüdau engün ñi fücharpun tañi mongen mu engün, fei hueñancüafuingün. Femngechi rupaliyiñ, ¿chem quelluaiñmu? Jehová alünque dungu femmequei fachantü, fei iñchiñ quelluntucunieafuiñ (1 Cor. 3:9). Jehová taiñ piuqueyenieteu caletuquelai. Fei raquiduamliyiñ tüfachi dungu mu, quelluaiñmu taiñ chaftuafiel taiñ rupamequen calerumetule taiñ mongen. Calerumetule quiñeque dungu Jehová tañi troquiñche mu ca ayünofilmi, raquiduamcülelayaimi: “¿Chemu am ta femingün tati?”. Raquiduamquilnge: “Cuifi mu doi cüme felequefuiñ” pilayaimi. Doi mai, llellipuafimi Jehová tami quelluaeteu, femngechi cüme raquiduamcüleami müten (Ecl. 7:10). Rume falin-ngei taiñ cüme raquiduamcüleal. Feimu chem dungu rume rupafule taiñ mongen mu, ayüucüleaiñ ca püntütripalayaiñ Jehová mu. w22.03 pag. 17 parr. 11, 12

Chau Jehová rüf piuqueyeniequefi tañi pu serfiqueteu müten. ¿Chumngechi pengeli tüfa? Chau Jehová turpu elcünulayafi tañi pu hueni, eluquefi tañi maneluhual engün ca elcünulayafi tañi piuqueyeafiel. Chau Jehová piuqueyeniefi com pu che. ¿Chumngechi quimiyiñ tüfa? Quiñe rupa Jesús feipifi ta Nicodemo tüfachi dungu: ‘Ngünechen rume piuqueyefi ta com Mapu meu mülechi pu che, feimeu huli ñi quiñen Fotüm femngechi com tati feyentulu quisu meu chumcaunorume ñi lanoal, huelu mai ñi nieal ta rumel mongen’ (Juan 3:1, 16; Mat. 5:44, 45). w21.11 pag. 2 parr. 3; pag. 3 parr. 6, 7

Famülque mu rupaqueiñ huesaque dungu mu. Huelu cüpalechi antü doi huesaque dungu rupapelayaiñ (Mat. 24:21). Maneluucüleiñ ñi acual chi antü ngehuelayai huesaque dungu, fei ngoimanentuafiyiñ com taiñ cutrancaqueteu (Is. 65:16, 17). Feimu rumel nehuencüleaiñ, fentecünulayaiñ. ¿Chumngelu? Jesús feipi afeluunoliyiñ, montuaiñ (Luc. 21:19). Inaduamliyiñ chumngechi ñi aguantan caquelu che, quelluaiñmu taiñ afeluunoal rupaliyiñ huesaque dungu mu. ¿Inei doi inayentufali tañi aguantan mu? Jehová llemai. ¿Chumngelu? Raquiduamnge tüfa. Huecüfü ngüneniei tüfachi Mapu fei com püle mülei huesaque dungu. Jehová pifule, chumül rume apümcayafui huesaque dungu, huelu petu femlai. Jehová elcünui quiñe antü ñi apümcayafiel (Rom. 9:22). Fei petu ñi acunon feichi antü, Chau Jehová afeluulai. w21.07 pag. 8, 9 parr. 2-4