Septiembre

Jesús müna cüme enseñachequefui, huelu tati pu che feipieyu ñi pengelal quiñe afmatun dungu Chau Ngünechen mu cüpalu. Tati pu che mülefui ñi feyentuafiel ta Jesús tañi quimeltuel mu müten. Duamfalngelafui ñi femal afmatun dungu ta Jesús (Mat. 16:4). ¿Chumi Jesús? Pilai ñi femal femngechi dungu, feimu famentueyu pu che ¿Chem quimeltuquei Biblia? Isaías feipicünui Jesús mu: “Huirarlayai ca nehuentudungulayai, tañi dungun allcütuñmangelayai calle mu” (Is. 42:1, 2). Miyaupalu Mapu mu, Jesús ayülafui ñi poyengeal. Jesús deumaquelafui fütraque templo ca yeniequelafui falinque tacuhun. Cafei ayülafui ñi üitungeal chumngechi üitungequefel pu religioso. Petu juzgaeteu Herodes Jesús afmatulafui ñi montulaeteu ñi mongen huelu pilai ñi femal (Luc. 23:8-11). Jesús caque rupa femfui afmatun dungu, huelu doi falintuquefui amuldungucheal. Feimu feipifi tañi pu inanieteu: ‘Feitachi dungu mu cüpan’ (Mar. 1:38). w21.05 pag. 3, 4 parr. 9, 10

Iñchiñ quintuquefiyiñ tati pu che ayülu ñi rumel mongeleal (Hech. 13:48). ¿Chumngechi quelluafuiñ feitachi pu che ñi discipulongerpual? Cüla dungu femaiñ. Quiñe, quelluafiyiñ ñi rüf entendeal chem pin Biblia. Epu, quelluafiyiñ ñi rüf maneluhual engün feita mu. Ca cüla, quelluafiyiñ ñi inayal tañi quimürpuel (Col. 2:6, 7; 1 Tes. 2:13). Com ti trahunche quelluafui tati pu estudiante, ¿chumngechi? Trahun mu pengelelafuiñ taiñ piuqueyeniefiel ca taiñ duamtuniefiel engün (Juan 13:35). Iñchiñ enseñalfiliyiñ Biblia quiñe che, cüdautupelayafuiñ taiñ famentuñmayafiel ñi huesaque huimtun ca ñi huesaque feyentun (2 Cor. 10:4, 5). Quiñe estudiante müna alüñmayafui ñi cüme elcünutual ñi mongen fei ñi fautizahurpual. Huelu fentecünunoliyiñ taiñ quellufiel, ngünam cüdaulayaiñ. w21.07 pag. 3 parr. 6

Iñchiñ pu Dunguquelu Ineingen Jehová mülefui taiñ ramtuhual: “¿Maneluucülepeiñ mai taiñ nieel ti rüf dungu? ¿Maneluucülepeiñ mai taiñ poyefiel ta Jehová chumngechi ñi ayüqueel?”. Ti apostol Pablo cüme quimniefui ñi rüfngen tañi feyentuqueel (1 Tes. 1:5). Tañi feyentuqueel ayühulqueyu ta Pablo, huelu cafei Pablo cüme ngüneduamquefui Chau Dios tañi huirintucuel. Pablo cüme quimniefui ti ‘Huirin Chillca huiringei Chau Dios ñi piel meu’ (2 Tim. 3:16). Tañi estudiafiel mu Chau Dios ñi Huirin Chillca, ¿chem quimürpui Pablo? Pablo quimürpui Jesús ñi rüf Mesías ngen. Huelu pu loncolechi religioso feichi mu, feyentuquelafui tüfa. Fei engün feipiquefuingün ñi enseñachequen Chau Dios ñi dungu, huelu re huesaque dungu ta femquefuingün (Tito 1:16). Tati apostol Pablo inayentulafi tati pu loncolechi religioso. Quisu com feyentuquefui Chau Dios ñi huirintucuel mu, quiñeque dungu müten no. Fei eluucülefui ñi enseñalelafiel tati pu che (Hech. 20:27). w21.10 pag. 18 parr. 1, 2

Iñchiñ amuldunguqueiñ ca quimeltuqueiñ, huelu loncontucuaiñ: Jehová ñi quellun mu müten cüme tripaquei taiñ cüdau (1 Cor. 3:6, 7). Jehová falintuquefi com che. Jehová elueiñmu quiñe falin cüdau, taiñ quiñentrür cüdahual Jesús iñchiñ taiñ cüpalafiel itrocom tati pu che Jehová tañi troquiñche mu (Ageo 2:7). Amuldungun mu montulchequeiñ. Quiñe peñi cam quiñe lamngen rume quellufile caquelu che ñi fautizahual, com ti trahunche mülei ñi quelluntucual. Quimlaiñ chumten che taiñ montulafiel, huelu Jehová caque quiñeque iñchiñ adnieafeiñmu taiñ quelluafiel ta quiñeque che. Taiñ peñi Andrés, Bolivia mapu mu mülelu, feipi: “Quimürpulu quiñe che ti rüf dungu ca fautizaulu, com ti trahunche quelluntucuquei” pi taiñ peñi. Feimu llemai, fentecünunoliyiñ taiñ amuldungual, Jehová cümelcayaiñmu ca rume ayüucüleaiñ iñchiñ. w21.05 pag. 19 parr. 19, 20

Raquiduamnge quiñe cazador mu. Fei ayüquei ñi nüafiel ca ñi langümafiel ti culliñ. Chumquei rume ñi femal ca elcünulelfi fillque trampa (Job 18:8-10). Ti cazador cüme inaduamquei cheu ñi rupaquen ti culliñ, chem ñi ayüqueel ca chumngechi tañi nüafiel. Ca femngechi femquei tati Huecüfü. Fei cüme inaduamquei chem taiñ femqueel ca chem taiñ ayüqueel, fei raquiduamquei chumngechi taiñ ngünencayaeteu. Feimu Biblia feipiqueiñmu taiñ chumal taiñ ngünencanoaeteu Huecüfü. Ca ngünencaeliyiñmu rume tati Huecüfü, Biblia feipiqueiñmu chumngechi taiñ famtripayal. Inchiñ taiñ culpanchengen mu mallmachengerpuafuiñ ca diñmatufengerpuafuiñ, fei Huecüfü allmalltuquei tüfa taiñ ngünencayaeteu. Pütrün tripantu mu ñi femngechi femquen tati Huecüfü cüme tripalerpuquei ñi femqueel. Chumquei rume taiñ nüfantuaeteu (Sal. 91:3). Huelu Jehová feipiqueiñmu chumngechi ñi ngünencachequen tati Huecüfü, feimu eluulayaiñ taiñ encañayaeteu (2 Cor. 2:11). w21.06 pag. 14 parr. 1, 2

Taiñ pu peñi ca pu lamngen füchalelu rume falin-ngeingün. Biblia trürümquefi tañi lingarcülechi lonco quiñe corona reque (Prov. 20:29). Huelu iñchiñ ngüneduamlayafuiñ rume ñi fente falin-ngen engün. Pu huechequeche pengelelfile tati pu füchaqueche ñi falintufiel engün, rume quelluafeyu. Jehová mu rume falin-ngei taiñ pu peñi ca pu lamngen füchalelu. Quisu peñmaquefi tañi piuque engün, feimu falintuquefi tañi chumngen. Pu füchaqueche fentren tripantu yeniepelai tañi cüdahuelfiel Jehová, feimu nieingün fentren quimün. Eluule engün tañi rulpalelafiel tañi quimün tati pu huechequeche, Jehová rume ayühuai (Job 12:12; Prov. 1:1-4). Jehová ca falintuñmaquefi tañi aguantan engün (Mal. 3:16). Quisu engün huesaque dungu mu rupaquefuingün, huelu fentecünulaingün tañi maneluhual Jehová mu. Doi rupayechi tripantu mu, doi maneluucülequeingün Jehová ñi feipicünuel mu. “Füchalele rume engün” fentecünuquelai tañi amuldungual, feimu Jehová rume piuqueyeyu engün (Sal. 92:12-15). w21.09 pag. 2 parr. 2, 3

Quiñeque mu rume cümei taiñ inaduamuhual. Quisutu ramtuhuafuiñ: “Doicülelu caque che mu troquiuli, ¿fei müten mai cümelcaquepeneu? ¿Chumngelu fente cüdauquen trahunche mu? ¿Re tañi doicülelu troquiaeteu pu peñi, pu lamngen? ¿Cam fente ñi piuqueyefiel mu ta Jehová?”. Tati Biblia ngülamtueiñmu cümelai taiñ trürümuhual caquelu che mu. ¿Chumngelu? Doi adümuucülelu caque che mu troquiuliyiñ, mallmahurpuafuiñ. Huelu raquiduamliyiñ caquelu che ñi doi adumuucülequen ta iñchiñ meu, huesa duamafuiñ (Rom. 12:3). Loncontucuaiñ: Chau Jehová ngüneduamquelai taiñ cüme adngen, taiñ cüme amuldunguquen cam taiñ huenicachefengen. Huelu mai ngüneduamquei taiñ cüpa serfiquefiel ca taiñ cüpa inaquefiel ta Jesús, feimu cüpaleiñmu quisu mu (Juan 6:44; 1 Cor. 1:26-31). w21.07 pag. 14, 15 parr. 3, 4

Taiñ nieal hue raquiduam, llellipuafiyiñ ta Jehová, papeltuafiyiñ Biblia ca raquiduamaiñ tañi chem piquen. Fentecünulayaiñ taiñ femal com tüfa. ¿Chumngechi quelluaiñmu? Jehová tañi nehuen quelluaiñmu taiñ trürümuunoal caquelu che iñchiñ. Cafei ngüneduamnoliyiñ taiñ nieel ütriruhun ca mallmahun taiñ piuque mu, Jehová quelluafeiñmu taiñ ngüneduamuhual taiñ entual tüfa (2 Crón. 6:29, 30). ¿Chem quimeltueiñmu tüfachi troquiñ Biblia? Jehová quimüñmaqueiñmu taiñ piuque. Feimu quimniei taiñ nehuentulen ñi femnoal huesaque dungu, culpanchengeliyiñ rume. Pefiel mu tüfa, Jehová doi piuqueyeiñmu. Quiñe ñuque piuqueyequefilu tañi pichiche, femngechi piuqueyequeiñmu Jehová (Is. 49:15). Iñchiñ ca femngechi nehuentuuqueiñ taiñ doi cüme cüdahuelafiel ta Jehová, feimu Jehová müna piuqueyequeiñmu. Quimfiel tüfa, müna ayühulqueiñmu. w21.07 pag. 24, 25 parr. 17-19

Chem cüdau rume elfalcünungeliyiñ trahunche mu, com nehuen mu femürpuaiñ. Femngechi femliyiñ, doi ayüucüleaiñ. ¿Chumafuiñ? Com nehuen mu amuldunguaiñ ca cüme cüdahuaiñ trahunche mu (Hech. 18:5; Heb. 10:24, 25). Cüme pepicayafiyiñ chem ñi inaduamngeal trahun mu femngechi taiñ cüme huiñoldungual. Chem asignacion rume elfalcünungeliyiñ trahun mu, cüme pepicayafiyiñ. Feipingeliyiñ taiñ femal quiñe cüdau trahunche mu, alüñmalayaiñ ca pengelaiñ taiñ manelfalngen. Elungeliyiñ quiñe cüdau, müte falinolu troquilayafiyiñ. Huelu mai eluhuaiñ taiñ doi adümuucüleal taiñ cüdau mu (Prov. 22:29). Loncontucuaiñ: com taiñ nehuen mu cüdauliyiñ, doi cüme hueniyeafiyiñ Jehová ca doi ayüucüleaiñ (Gál. 6:4). Cafei quiñe peñi cam quiñe lamngen elungele quiñe cüdau iñchiñ taiñ ayüniefel, iñchiñ ca ayühuaiñ fei engün mu (Gál. 5:26). w21.08 pag. 23 parr. 11

Famentuafiyiñ taiñ mallma piuquengen ca eluhuaiñ taiñ enseñayaeteu ta Jehová. Raquiduamnge tüfa: nieliyiñ quiñe huesa cutran, huesalcañmayafeiñmu taiñ piuque. Ca femngechi mallma piuquengeliyiñ, müna huesalcayafeiñmu, fei feyentuhuelayafuiñ ta Jehová. Müna quimfalngefui Jesús ta Dios tañi Fotüm ngefel ca tañi elueteu tañi nehuen. Huelu fente tañi mallmangen feitachi loncolechi religioso, feyentulaingün Jesús mu (Juan 12:37-40). Tañi huesa piuquengen mu engün, elungelafuingün tañi rumel mongeleal (Mat. 23:13, 33). Eluucüleaiñ taiñ adnieaeteu Biblia ca Chau Dios tañi nehuen. ¿Taiñ chumal? Taiñ quelluaeteu taiñ cüme chengeal, cüme raquiduam nieal ca taiñ cüme dullial chem femal. Santiago tañi ñom piuquengen mu, eluhui tañi quimeltuaeteu ta Jehová. Huelu ca femngechi tañi ñom piuquengen mu cüme quimeltuchefengerpui. w22.01 pag. 9 parr. 7

Fentecünulayaiñ taiñ rumel ngillatuleal, femngechi maneluucüleaiñ Jehová mu taiñ allcütuaeteu ca taiñ huiñoldunguaeteu (Col. 4:2). Quiñeque mu Jehová pürüm huiñoldungulayai taiñ ngillatuquefiel, huelu femürpuai tati. Quisu quimniei chumül taiñ rüf duamnieel quellu, feimu quelluaiñmu “puule tati medin antü” (1 Ped. 5:6, 7). Feimu turpu culpalayafiyiñ ta Jehová taiñ pürüm huiñoldungunoeteu. Por ejemplo, iñchiñ fentren tripantu mu llellipuqueiñ ñi ngünenietual ta Chau Dios fei ñi apümcayafiel ti huesaque dungu. Jesús quimeltueiñmu taiñ femngechi llellipual (Mat. 6:10). Huelu petu ngünenietulai, “deu mülefui tañi ngünenietual” piafuiñ chi. Femngechi raquiduam nieliyiñ, maneluuhuelayafuiñ Jehová mu. Tüfa cümelayafui (Hab. 2:3; Mat. 24:44). Rume falin-ngei taiñ maneluucüleal Jehová mu taiñ huiñoldunguaeteu. Chau Dios deu elcünui quiñe antü ca quiñe hora ñi ngünenietual ti Mapu, fei ñi apümcayafiel ti huesaque dungu. Yochi cüme acuai ñi Gobierno (Mat. 24:36; 2 Ped. 3:15). w21.08 pag. 10 parr. 10, 11

Pu füchalelu ñom piuquengelu quimnieingün tañi pepi cüdauhuenon chumngechi ñi femquefel ta cuifi. Raquiduamaiñ pu huitran-ngepaquechi loncolelu mu. 70 tripantu nierpulu engün, feipingei ñi elcünual ñi cüdau fei ñi ca cüdau femal. Müna hueñancüpelayafui ñi elcünual tüfachi falin cüdau. Tunte ayüquefilu rume feitachi cüdau, huelu quimnieingün pu doi huechengelu ñi femafel ti cüdau. Cuifi mu femngechi dungu mu rupaingün pu levita. 50 tripantu nielu engün, feipingequefuingün ñi elcünual ñi cüdau ti tolto ruca meu. Feitachi pu levita ayüucülequefuingün chem cüdau rume elungele engün ca eluucülequefuingün ñi quelluafiel pu doi huechengelu ñi femal ñi cüdau (Núm. 8:25, 26). Ca femngechi pu peñi huitrancontuquefulu pu trahunche cuifi, fachantü rume quelluntucuqueingün tañi trahunche mu. w21.09 pag. 8, 9 parr. 3, 4

Lucas 15:11-32 Jesús nütramcai quiñe ñamquiyauchi hueche mu. Feitachi hueche feyentuhuelafi tañi chau, elcünui ñi ruca, fei amui ca mapu. Fei üyeu huedhuedcahurpui. Huelu huesaque dungu rupalu tañi mongen mu, ti hueche raquiduami ñi chau ñi ruca mu ñi cümelcalequefel. Ti hueche cümelcacünutui tañi raquiduam. Fei tañi raquiduamün mu, eluhui ñi huiñotual tañi chau ñi ruca mu, fei ñi feipiafiel tañi perdonayaeteu. Falin-ngefui ñi quimal ti hueche tañi huesa femün. Huelu ca mülefui ñi cümelcacünutual tañi mongen. Ti ñamquiyauchi hueche com piuque meu repentiuhui. Elcünutui com tañi huesaque dungu. Tüfachi rupan dungu re ayühun-ngelai müten, ca müna quelluafui tati pu loncolelu, ¿chumngechi? Pu loncolelu ngüneduamfile tüfachi rupan dungu, quimafui ñi rüf repentiucülepen mai quiñe che huesa culpalu. w21.10 pag. 5 parr. 14, 15

¿Chem nengümcangelayai? Chau Dios tañi Gobierno llemai. Pablo feipi: “Iñchiñ ta elungeaiñ taiñ ngünenieal, fei tüfa nengümcangelayai. Feimu serfinieafiyiñ ta Chau Ngünechen chumngechi ñi ayünieel, fütra yamün meu ca taiñ afmatufiel mu” (Heb. 12:28). Fei llemai, apümcangele com pu caiñetufilu ta Jehová, Chau Dios tañi Gobierno müten mülenagai (Sal. 110:5, 6; Dan. 2:44). Ngünamcalayafiyiñ tati tiempo. Tati pu che mülei ñi cüme dullial chem tañi chumal engün. Quisu engün eluule engün ñi coneltual tüfachi Mapu mu müleyechi dungu, apümcangeaingün. Huelu quisu engün eluule engün ñi poyeafiel ta Jehová, nierpuafuingün afnoachi mongen (Heb. 12:25). Amuldunguleliyiñ, quelluafuiñ pu che ñi cüme dullial engün. Loncontucunieaiñ Jesús tañi feipin. Ti cümeque dungu Chau Dios ñi Gobierno mu “quimelngeai ta com Mapu meu, femngechi com troquiñque mapu ñi quimal engün; fei hula acuai ñi afael ta antü” (Mat. 24:14). w21.09 pag. 19 parr. 18-20

Eimün pu loncolelu, felei tamün yafültucuafiel ca quelluafiel pu peñi ca pu lamngen huemünentuñmangelu quiñe tañi familia trahunche mu (1 Tes. 5:14). Yafültucuafimün petu con-nole ti trahun ca afle ti trahun. Pemeafimün tañi ruca mu ca trür ngillatuaimün. Compañtuafimün tamün amuldungual. Quiñeque mu ca mangelafuimün tamün quiñentrür papeltual Biblia tami familia eimün. Tati pu loncolelu mülei ñi cuidayafiel pu hueñancülelu ca pengelelafingün tañi piuqueyeniefiel engün (1 Tes. 2:7, 8). Chau Jehová ayülafui inei no rume tañi apümcangeal, doi mai tañi huiñoduamtual engün (2 Ped. 3:9). Quiñe che culpafule rume, huelu Jehová falintunieyu. Acordanienge, Jehová huli tañi saquin Fotüm caque quiñeque iñchiñ taiñ duam mu. Jehová piuqueyenquechi quelluquefi tañi pu che püntütripalu quisu mu, femngechi tañi huiñotual engün. Jehová ayüfui tañi huiñotual engün, chumngechi ñi femün tati ñamquiyauchi fotüm ñi feipiel ta Jesús (Luc. 15:11-32). w21.09 pag. 30, 31 parr. 17-19

Tami cutrancülen mu, pepi amuldunguhuelaimi chi chumngechi tami femquefel ta cuifi. Huelu huesa duamquilnge. Eimi ayüucüleafuimi tami petu coneltulen feitachi falin cüdau mu. Inaduamaiñ ñi rupan tati rey David. David ca tañi pu hueichafe engün, hueñeñmaeyu tañi pu familia pu amalequita. Fei David ca tañi pu hueichafe, amuingün ñi hueichayafiel pu amalequita, femngechi ñi yetuafiel tañi pu familia. Quiñeque amuingün, caquelu amulaingün fente tañi cansalen. Fei David ca tañi pu hueichafe, yemetui tañi pu familia ca müntüñmafi pu amalequita fentren falinque chemcün. Feimu huiñotulu engün, David feipi ñi hudamcangeal com tañi yemel engün. Femngechi tati hueichamelu ca tati pu amunolu, com trür llohuingün (1 Sam. 30:21-25). ¿Chem quimeltuqueiñmu tüfa? Feiti hueichafe cansalelu reque, eimi ca fempelaimi. Fente tami cutrancülen, amuldunguhuelaimi chi chumngechi tami femquefel ta cuifi. Huelu fentecünunolmi tami amuldungucheal ca quelluntucufilmi pu peñi ca pu lamngen ñi quimeltucheal, ca ayüucüleafuimi. Chumngechi ñi rupan David tañi pu hueichafe, tati pu hueichamelu ca tati pu amunolu, com llohuingün tañi yemel engün. Ca femngechi fautizaule quiñe che, com ti trahunche ayüucüleafui. Jehová falintuñmaqueiñmu taiñ com piuque mu amuldunguchequen. Cafei enseñalqueiñmu taiñ ayüucüleal taiñ amuldungun mu (Juan 14:12). Feimu llemai, fentecünunoliyiñ taiñ amuldungual, ayühulafiyiñ ta Jehová. w21.10 pag. 27, 28 parr. 15-17

Füchalerpulu quiñe che, chumngechi ñi cüdauquefel Jehová mu cuifi femhuequelai, feimu falinolu troquihuafui. Nehuen-ngehuenole rume ca quelluntuculeafui ti trahunche mu. ¿Chumngechi? Tañi quimchengen mu quelluafui pu huechequeche ñi doi cüdahual Jehová tañi troquiñche mu. Pu fütaqueche mülei ñi ñom piuquengeal femngechi tañi quelluafiel pu huechequeche. ¿Chumquei ti ñom piuquengechi che? Ti ñom piuquengelu caquelu che doicülelu quisu mu troquiquefi (Filip. 2:3, 4). Quiñe fücha ñom piuquengelu feipiyauquelai ñi femngeal ti cüdau chumngechi ñi femquefel ta cuifi mu. Doi mai quimniei caquerumeafui chumngechi ñi femngeal quiñeque cüdau. Fei chaftunofile Biblia ñi ngülam, femngeafui fei cüme tripayai (Ecl. 7:10). Pu füchalelu fentren quimün nieafui rume, huelu quimnieingün rupalechi tripantu mu calerumequei chumngechi ñi femngeal quiñe cüdau. Feimu duamnieafuingün ñi quimal chumngechi ñi femngequen ti cüdau fachantü (1 Cor. 7:31). w21.09 pag. 8 parr. 1, 3

Jehová turpu feipiquelafi tañi pu che ñi femal huesaque dungu. Jehová doicülei tañi lifngen. ¿Chumngechi pengelelfi? Tati loncolechi sacerdote yeniequefui quiñe trarilonco reque, feita mu huiriconcülefui: “Jehová ngen-ngei tañi lifngen” (Éx. 28:36-38). Pu israelita pefile tüfa, cüme quimafuingün Jehová tañi lifngen. Huelu quiñeque israelita püllelequelafui tati pu loncolechi sacerdote mu, feimu pelayafui ñi huirintuculen tañi tol mu. Penofile, ¿turpu quimlayafui ñi lifngen ta Jehová? Femllelai mai. Papeltungen mu Jehová tañi Ley, pu israelita allcüquefuingün Jehová tañi lifngen (Deut. 31:9-12). Tati Ley feipiquefui: “Eimün mülei tamün lifngeal iñche cai, Jehová, lifngen” (Lev. 20:7, 26; 11:44, 45). w21.12 pag. 3 parr. 6, 7

Quiñeque taiñ pu peñi, pu lamngen rume raquiduamcülequei chem tañi iyal, chem tañi tucual, ca ñi nieal quiñe ruca. Quiñeque engün chi tañi pais mu, rume pofrelei ta che ca cüdautuqueingün chi ñi peal cüdau. Quiñeque engün cüdauqueingün, huelu pichin plata cullingequei tañi cüdau mu. Feimu cüdautuqueingün ñi eluafiel tañi pu che ñi duamnieel. Cafei quiñeque familia mu lai chi ti ngen ruca, feimu nielaingün inei tañi eluaeteu ñi duamnieel. Huelu ngelai taiñ fill raquiduamcüleal, doi mai maneluhuaiñ Chau Dios mu. Quisu feipicünui doyümniefiliyiñ taiñ mongen mu, eluaiñmu com taiñ duamnieel (Mat. 6:32, 33). Jehová rumel eluqueiñmu taiñ duamnieel (Deut. 8:4, 15, 16; Sal. 37:25). Jehová cuidaniequefi pu pichique üñüm ca ti rayülechi flor, ¿chemu am cuidanoafeteu iñchiñ? Maneluucüleafuiñ llemai Jehová mu taiñ eluaeteu iyael ca tacun (Mat. 6:26-30; Filip. 4:6, 7). Chumngechi quiñe cüme chau fente tañi piuqueyefiel mu tañi pichiqueche eluquefi tañi duamnieel, ca femngechi taiñ huenu Chau Jehová fente taiñ piuqueyenieteu mu, cuidaqueiñmu. Felei llemai, piuquentucuaiñ Jehová taiñ quisucünunoaeteu. w21.12 pag. 16, 17 parr. 4, 5; pag. 18 parr. 8

¿Quiñechi huesalcaeiñmu quiñe peñi cam quiñe lamngen? Peaiñ ñi rupan ta José. José huesalcaeyu tañi pu peñi. Quisu raquiduamtucui ñi doi cüdahuelafiel Jehová, feimu Jehová cümelcaeyu ñi ñom piuquengen mu ca tañi nehuentulen mu. Rupalu tripantu, José perdonafi tañi pu peñi ca ngüneduami chumngechi ñi cümelcaeteu Jehová (Gén. 45:5). José reque, cüdahuelfiliyiñ Jehová ca maneluuliyiñ quisu ñi norümtual ti dungu, doi cüme duamcüleaiñ (Sal. 7:17; 73:28). Huesalcangeliyiñ, acordayaiñ Jehová ñi fülmaucülen “pu hueñancülelu ñi piuque” mu (Sal. 34:18). Huesalcangeliyiñ rume, iñchiñ nehuentuuqueiñ ca elcünuqueiñ Jehová mu taiñ fill raquiduamqueel, feimu Jehová piuqueyequeiñmu (Sal. 55:22). Jehová pequefi com taiñ rupamequen (1 Ped. 3:12). Felei llemai, quiñeque mu huesaque dungu mu rupayafuiñ ca chumlayafuiñ rume taiñ cüme elcünutuafiel. Fei femngechi dungu mu rupaliyiñ, ¿maneluupeaiñ mai Jehová ñi cüme elcünutual? w21.08 pag. 11 parr. 14; pag. 12 parr. 16

Doi cümeafui taiñ cüme yenieal taiñ mongen taiñ ayühulafiel ta Jehová. Mülei taiñ loncontucual chem tañi doi falin-ngen. Taiñ ngünamcanoal taiñ tiempo, mülei taiñ cüme dullial doi falin-ngechi dungu. Raquiduamnge chem ñi rupan Jesús huitrancontumefilu Marta ca María. Marta rume ayüucülefui tañi pemeteu ta Jesús, feimu deumalelfi quiñe cüme iyael. Huelu María, ¿chumi? María anücünuhui ñi allcütuafiel ta Jesús tañi enseñayaeteu. Tañi femün ta Marta huesacünulai, huelu Jesús feipi ta María dulli tati doi cümelu (Luc. 10:38-42). María ngoimafui chi chem tañi in feichi antü, huelu ngoimalai chem tañi enseñaeteu ta Jesús. María müna falintufui ti tiempo ñi rupan Jesús engu. Iñchiñ ca falintuquefiyiñ ti tiempo taiñ rupaquen Jehová iñchiñ. w22.01 pag. 27 parr. 5, 6

Acab pengelfui rume tañi huesa duamcülen, huelu cüpalechi antü mu pengel-lai tañi rüf repentiucülen. Acab famentulafi ñi poyehuenoafiel ta Baal. Ca femngechi inei rume feipilafi Jehová müten tañi poyengeal. Deu ñi lamum Acab, Jehová pengeli chem ñi raquiduamquefel Acab mu. Jehová tañi profeta, Jehú pingelu, feipi ñi huesa chengen ta Acab (2 Crón. 19:1, 2). Raquiduamnge tüfa: Acab pengel-le tañi rüf repentiucülen, huesa che pilayafeyu ta Jehú. Acab pichin pengelfui rume tañi repentiucülen, huelu com tañi piuque mu rüf repentiulai. Elías feipifilu ta Acab ñi castigangeal quisu ca tañi familia, Acab pengeli tañi hueñancün. Cümei tañi hueñancün, huelu amulniei tañi huesaque femün mu. Femngechi pengeli tañi rüf repentiucülenon. Fei ¿chem quimeltueiñmu tüfa? Taiñ rüf repentiuhual taiñ huesaque femün mu, fentepuulai müten taiñ pengelal hueñancün. w21.10 pag. 3 parr. 4, 5, 7, 8

Isaías tañi domo engu doyümfingu ñi cüdahuelafiel Jehová. Isaías quiñe profetangefui. Tañi domo ca profetisa pingequei Biblia meu (Is. 8:1-4). Pu curehuen, ¿chumngechi inayentuafui ñi femquen Isaías ca tañi domo? Mülei ñi doyümafiel ñi serfiafiel ta Jehová engün. Pu curehuen doi papeltufile engün chumngechi ñi huechurpumequen Jehová ñi feipin mülelu Biblia meu, doi maneluhuaingün Jehová mu (Tito 1:2). Por ejemplo, famülque mu femtripamequei Jesús ñi feipin, huall Mapu mu pu che enseñalngequei Jehová ñi dungu. Fei pu curehuen ramtuhuafuingün chumngechi ñi quelluntucual engün. Doi ngüneduamfile engün ñi femtripamequen Jehová ñi feipin, doi eluhuaingün tañi serfiafiel. w21.11 pag. 16 parr. 9, 10

Jesús ñi ñuque lantu domongepelafui, feimu Jesús ayüniefui ñi cüme atendengeal ca ñi cuidaniengeal tañi ñuque. Jesús elfalcünufi ta Juan ñi quelluafiel. Tüfa pengeli Jesús ñi fente piuqueyefiel tañi ñuque. ¿Chem quimeltueiñmu Jesús ñi feipin? Taiñ familia quisucünuafeiñmu ca cayñetuafeiñmu. Feimu quiñeque iñchiñ doi quiñeucüleiñ taiñ pu peñi, pu lamngen trahunche mu. Feimu Jesús feipi fülmaniefiliyiñ ta Jehová ca tañi troquiñche, doi nierpuaiñ taiñ niequefel. Fentren taiñ pu peñi, pu lamngen taiñ familia reque nierpuafuiñ (Mar. 10:29, 30). Com iñchiñ quiñe fütra familia reque feleiñ, piuqueyeuqueiñ ca quiñeucüleiñ fente taiñ piuqueyefiel Jehová (Col. 3:14; 1 Ped. 2:17). w21.04 pag. 9-11 parr. 7, 8

Eluucüleaiñ taiñ quelluafiel taiñ pu peñi ca pu lamngen. Fillque dungu femaiñ taiñ quelluafiel pu peñi ca pu lamngen. Famülque mu, alün taiñ pu peñi ca pu lamngen pengelelquefingün tañi piuqueyefiel caquelu peñi ca lamngen, quimnofilu rume engün. Por ejemplo, rupan mu quiñe fütra nüyün cam cürüftucu mahun chi, taiñ pu peñi ca pu lamngen pürüm ramtuingün chumngechi tañi quellual. Cam allcülu engün ñi fillaluucülen quiñe peñi cam quiñe lamngen trahunche mu, ca ramtuqueingün chumngechi tañi quelluafiel. Fei engün inayentuquefingün ñi femün tati pu cristiano Macedonia meu mülequefulu. “Quisu engün ayüucülen hulquei tunten tañi pepi hulqueel, ca doi hulquei cütu” (2 Cor. 8:3). Taiñ pu peñi ca pu lamngen eluucüleingün ñi hulal tañi nieel ñi quelluafiel tati pu peñi ca pu lamngen duamnielu quellu. Pu loncolelu yafültucuafingün tati pu peñi ca pu lamngen quelluquefilu ta caquelu trahunche mu. Femngechi femle pu loncolelu, tati pu peñi ca pu lamngen fentecünulayai tañi quellucheal (Is. 32:1, 2). w21.11 pag. 11 parr. 14; pag. 12 parr. 21

Com duamnieiñ taiñ ngülamtungeal. Quiñeque mu pediafuiñ taiñ ngülamtuaeteu quiñeque che taiñ respetaquefiel. Ca quiñeque rupa taiñ quimnon mu rume taiñ huesa femün, quiñe peñi cam quiñe lamngen ngülamtuafeiñmu (Gál. 6:1). Ca femngechi huesaque dungu mu ñi conün mu, ngülamtungequeiñ ca norümngequeiñ. Chem dungu mu rume ngülamtungeliyiñ, mülei taiñ allcütuafiel. Femliyiñ, cümelcayaiñmu ca montulaiñ taiñ mongen (Prov. 6:23). Taiñ peelchi texto fachantü feipieiñmu taiñ “allcütuafiel pu quim che ñi feipin”. Quiñe che rume com quimnielafi ti dungu, huelu mülei quiñeque che doi quimlu iñchiñ mu (Prov. 12:15). Taiñ elungen mu ngülam ca taiñ cüme allcütufiel mu, femngechi pengelqueiñ taiñ ñom chengen. Ca pengelqueiñ taiñ com quimnienofiel ti dungu, feimu duamnieiñ taiñ quellungeal. Feimu Salomón huirintucui fentren ngülamtufe ñi mülen mu, cüme tripaquei com dungu (Prov. 15:22). w22.02 pag. 8 parr. 1, 2

Quiñe che fütra culpale, ngelai ñi re huesa duamal müten tañi culpan mu. Ca mülei ñi nietual cüme raquiduam ca ñi femal cümeque dungu, femngechi ñi pengelcünual tañi rüf repentiucülen. Ngelai tañi femhuenoal huesaque dungu, ca mülei ñi inayafiel Jehová tañi ngülam (Ezeq. 33:14-16). Ñi doi falin-ngen ti culpalu mu, ñi hueniyetuafiel ta Jehová. Iñchiñ quimliyiñ quiñe taiñ hueni ñi fütra culpan mu, ¿chem mülei taiñ femal? Iñchiñ ellcaleñmafiliyiñ ñi huesa femün taiñ hueni, doi huesalcayafiyiñ. Chau Jehová com peniei taiñ femquen (Prov. 5:21, 22). Feipiafiyiñ taiñ hueni pu loncolelu eluucülei ñi quelluaeteu. Taiñ hueni eluunole ñi feipiafiel tati pu loncolelu, iñchiñ mülei taiñ feipiafiel tati pu loncolelu, femngechi quelluafiyiñ taiñ hueni. w21.10 pag. 6, 7 parr. 19-21

Com iñchiñ mülefui taiñ inayentuafiel ta Jesús, fei quiñepülecünuafiyiñ taiñ ayüqueel femngechi taiñ quellucheal. Raquiduamnge tüfa, Jesús elcünui com tañi nierquefel huenu mu, fei quiñe esclavo reque femcünuupai Mapu mu (Filip. 2:7). Quiñe cüme esclavo ayüquei tañi ayühulafiel tañi ñidol. Iñchiñ Jehová tañi esclavo reque feleiñ, feimu ayüqueiñ taiñ ayühulafiel. Ca ayüqueiñ taiñ doi quelluafiel taiñ pu peñi ca pu lamngen. Ramtuhuaiñ: “¿Eluucülefun tañi elcünual tiempo ñi quellucheal? ¿Eluucülefun tañi quelluntucual ñi liftual cheu ñi femngeal ti fütra trahun? Cam, ¿eluucülefun tañi liftual ti Trahunhue Ruca?”. Inaduamuuliyiñ taiñ nehue cüpa quelluchequenon, llellipuafiyiñ Jehová. Com feipiafiyiñ taiñ chum duamcülen. Feipiafiyiñ taiñ nehuentucuaeteu, femngechi taiñ quellucheal (Filip. 2:13). w22.02 pag. 22, 23 parr. 9-11

Jesús, ¿chumngechi pengeli tañi duamtuchequen ñi cüme feleal? Piuqueyenquechi dunguquefi ta caquelu ca eluucülei ñi quellucheal (Mat. 11:29, 30). Quiñe rupa, quiñe domo Fenicia tuhun-ngelu feipieyu ñi tremolmayafiel ñi domo püñeñ. Jesús tremolfemüñmalafi, huelu inaduamfilu ti domo ñi rüf feyentulen piuqueyenquechi tremolmafi ñi püñeñ (Mat. 15:22-28). Jesús, ¿ca chumngechi pengeli ñi duamtufiel pu che ñi cüme feleal? Piuqueyenquechi ngülamtufi pu che tañi piuqueyeniefiel. Quiñe rupa Jesús feipifi tañi pu discipulo quisu tañi langümngeal. Feimu Pedro feipieyu “femngechi dungu mu rupalayaimi”. Fei Jesús, caquelu discipulo ñi adquiñ mu, feipifi ta Pedro ñi femngechi huesa raquiduamcülenoal (Mar. 8:32, 33). Jesús feipilafi tañi yehuelcayafiel ta Pedro, huelu mai ayüfui ñi enseñayafiel ta Pedro ca caquelu pu discipulo ñi quisutu duamuunoal engün. Yehuepelafui ta Pedro tañi feipieteu mu ta Jesús, huelu müna quellueyu. Quiñeque mu ngülamtuafuiñ taiñ piuqueyenieelchi che. Feimu femliyiñ, pengelaiñ taiñ rüf duamtuniefiel ti che ñi cüme feleal. Ngülamtucheliyiñ, Biblia mu tripape taiñ ngülam, chumngechi ñi femün ta Jesús. w22.03 pag. 11 parr. 12, 13

Nütramcafilu iñchiñ tati pu che Jehová mu, pengelqueiñ taiñ poyequefiel (Sal. 34:1). Fente taiñ mañumcülen ta Jehová mu, nütramcaqueiñ quisu mu. Feipiquefiyiñ pu che ñi chumngen ta Jehová ca com ñi deumael. Doi raquiduamliyiñ com ñi femün mu Jehová iñchiñ mu, doi nütramcayafiyiñ ta che quisu mu. Amuldungun mu iñchiñ püramyefiyiñ ta Jehová. Chumngechi cüme pepicauqueiñ chem taiñ feipiafiel ta Jehová petu taiñ llellipunofiel, ca femngechi mülefui taiñ cüme pepicahual petu taiñ amuldungulelnofiel ta che Jehová mu. Ayünieiñ taiñ fampüramyeafiel ta Jehová, feimu ayühunquechi amuldunguchequeiñ. w22.03 pag. 21 parr. 8