Octubre

Com taiñ quimeltun Biblia mu cüpai. Huelu famülque mu tati pu che famentuquei taiñ quimeltuqueel ca piquelai taiñ allcütuaeteu. ¿Chem quelluaimu tami maneluucüleal Jesús mu? Ti apostol Pablo feipi: ‘Fei tati allcütulu Cristo tañi huercün dungu, fei ta feyentuafui’ (Rom. 10:17). Taiñ rüf maneluucüleal Jesús mu, mülei taiñ cüme ngüneduamafiel tati Biblia ca coneltulayaiñ chem fiesta mu no rume coilaque religion mu tuulu. Cafei com taiñ feyentuqueel cüpape Biblia ñi quimün mu. Feyentunoliyiñ Chau Dios mu, turpu tutelayafiyiñ. Biblia feipi: “Pu feyentuquelu Ngünechen mu rüf maneluuquei ñi femtripayal tañi üngümnieel. Ca cüme quimniei chem rüf quimfalcünuquei ñi mülen tati pequenoelchi dungu” (Heb. 11:1; 11:6). Feimu taiñ maneluucüleal Chau Dios mu duamfalngelai taiñ peal afmatun dungu, doi mai cüme estudiayafiyiñ Biblia. w21.05 pag. 4, 5 parr. 11, 12

Ti apostol Pablo fentren huesaque dungu mu rupaquefui. Hulelcangei, curatungei ca presucünungei. Feimu Pablo duamniefui Jehová ñi eluaeteu nehuen (2 Cor. 11:23-25). Cafei quiñeque mu cüdauquefui ñi famentual huesaque raquiduam (Rom. 7:18, 19, 24). Huelu fei ca müten no. Pablo ca contueyu quiñe huesa cutran ñi rumel cutrancanieteu. Fei ayüfui Chau Dios ñi müntuñmayaeteu feichi huesa cutran (2 Cor. 12:7, 8). Huesaque dungu mu rupalu rume ta Pablo, Jehová quellueyu ñi fentecünunoal tañi amuldungun cüdau. Inaduamaiñ ñi femün ta Pablo. Presulelu quiñe ruca mu, Pablo amuldungufi quiñeque loncolechi judio ca amuldungufi pu cüdauquelu gobierno mu peno (Hech. 28:17; Filip. 4:21, 22). Pablo ca amuldungulelfi tañi pu llihuatunieteu ca com pu che ñi pepaqueteu (Hech. 28:30, 31; Filip. 1:13). Huelu fei ca müten no. Petu presulelu ta Pablo, Jehová adnieyu ñi huirintuculelafiel carta tati pu trahunche. w21.05 pag. 21 parr. 4, 5

Ti lonco ülmen Uzías rume adümuucülequefui. Uzías hueuquefui alün fütraque quehuan, deumaquefui fütraque huaria ca cüdauquefui ti mapu. Chau Dios quellueyu ñi cüme tripayal com tañi femquefel (2 Crón. 26:3-7, 10). Huelu rupachi tripantu mu Uzías mallmahurpui, feita mu rume huesalcahui. Fei, ¿chumi Uzías? Femi tañi femnoafel. Eluhui ñi chalintucual incienso ti ngillatuhue ruca mu, tüfa ñi femafel pu sacerdote müten. Uzías eluulai tañi norümtungeal. Feimu Jehová ayülai ñi femün ta Uzías, fei elufi ñi contuaeteu lepra cutran (2 Crón. 26:16-21). Uzías reque, iñchiñ mallmahurpuafuiñ ca culpayafuiñ. Loncontucuaiñ: chumte pepiluufuliyiñ rume cam niefuliyiñ rume falinque cüdau trahunche mu, Jehová ta elueiñmu (1 Cor. 4:7). Mallmangeliyiñ, Jehová elulayaiñmu cüdau trahunche mu. w21.06 pag. 16 parr. 7, 8

Jesús quimniefui, quiñeque mu fente cüme tripalayafui tañi amuldungun tañi pu discipulo. Cafei, feichi che ñi amuldungulelfiel pu discipulo, quimngequelai ñi cristianongerpupen mai. Cümefui pu discipulo ñi ayüucüleal tañi allcütueteu mu pu che. Huelu ca dungu mülefui ñi loncontucual engün: tañi nehuentu amuldungun engün, ayühulquefingün ta Jehová, fei ta doi falin-ngefui. Fentecünunoliyiñ taiñ amuldungun, rumel mongen nierpuaiñ. Com piuque mu amuldunguliyiñ, eluhuaiñ Jehová tañi nehuen mu taiñ adnieaeteu. Fentecünunoliyiñ taiñ amuldungucheal, Jehová eluaiñmu taiñ rumel mongeleal, yenofiliyiñ rume quiñe che ñi fautizahual (Gál. 6:7-9). w21.10 pag. 26 parr. 8, 9

Quiñe rupa, Jesús ca tañi pu inanieteu rume cansalefuingün fente tañi amuldungun engün. Duamniefuingün ñi cansatual. Fei petu ñi puunon cheu tañi cansatual engün, fentren che deu esperaniequeyu engün. Jesús pefilu feitachi pu che cutranpiuqueyefi engün, fei eluhui ñi quimeltulelafiel “fentren dungu”. ¿Chemu femi Jesús? Jesús quimniefui ñi cutrancaucülen engün. Ca duamniefuingün ñi yafültucungeal engün, fei eluhui ñi quelluafiel engün. Famülque mu, tati pu che huenche mu ayüucülelu quechilefuingün, huelu ca rupaqueingün huesaque dungu mu fei duamnieingün ñi yafültucungeal. Quisulechi ufisa quechilefuingün, inei no rume ta adnielaeyu. Ti apostol Pablo feipi feitachi pu che quimlafingün ta Chau Dios ca nielaingün ta maneluhun (Efes. 2:12). Quimfali llemai, tati pu che duamniei ñi quimal Chau Dios mu. Raquiduamliyiñ tüfa, cutranpiuqueyeafiyiñ engün ca eluhuaiñ taiñ quelluafiel. ¿Chumngechi quelluafuiñ engün? Feipiafiyiñ taiñ quiñentrür estudiayal Biblia. w21.07 pag. 5 parr. 8

Quiñe che mallmangelu quisutu raquiduamuuquei müten. Quiñe che ütrirchefengelu ayüquei caquelu tañi nieel. Huelu fei ca müten no, ca ayüfui tañi müntuñmayafiel. Feimu feipiafuiñ tati ütrirchefengelu üdechequei. Tati mallmahun ca tati ütriruhun, termita reque trürümafuiñ. Ti termita conpun mu ruca mu, pürüm com ifemquelafi. Feimu feipiafuiñ: ti ruca pürüm tranlayai, huelu rupachi antü mu trananagai llemai. Ca femngechi quiñe che poyeafui ta Jehová, huelu mallmangele ca ütrirchefengele, rupalu ta antü ti ruca reque trananagai (Prov. 16:18). Felei llemai poyehuelayafi ta Jehová, cafei quisutu huesalcahuai ca huesalcayafi ta caquelu. Taiñ mallmangenoal inayafiyiñ ti apostol Pablo ñi ngülam. Fei feipi: “Chem dungu rume femquilmün ta caiñetuhun meu cam mallmahun meu no rume, huelu mai ta ñom piuque meu, fei caque quiñeque eimün doi cümelu tamün troquiafiel ta caquelu pu che” (Filip. 2:3). w21.07 pag. 15, 16 parr. 6-8

Quiñeque che raquiduamquei chem ramtun rume niele tati pu che, tati rüfngechi religion mülei ñi com huiñoldungual, mülenole rume ti lloudungun Biblia meu. Huelu ti rüfngechi religion, ¿rüf pepi femafui tüfa? Femlai. Peaiñ ñi feipin ti apostol Pablo. Fei feipifi tati pu cristiano ñi cüme inaduamafiel com dungu. Huelu ca feipifi ñi com cüme adümnoafel quiñeque dungu (1 Tes. 5:21). Fei feipi ñi huenche adümquefiel com tati quimün, ca feipi “nehue pelotuquelafiyiñ quiñe espejo meu reque” (1 Cor. 13:9, 12). Pablo cüme adümquelafui com dungu, iñchiñ cafei com cüme adümquelafiyiñ. Huelu Pablo cüme quimniefui ti doi falin-ngechi quimeltun Chau Jehová mu. Pablo cüme adümnofilu rume com dungu, huelu tañi adümqueel quellueyu ñi quimtucual ñi nieel tati rüf dungu. ¿Chumafuiñ taiñ doi maneluhual taiñ nieel ti rüf dungu? Mülepalu Mapu mu, Jesús cüme pengeli chumngechi mülei ñi poyengeal ta Jehová. Iñchiñ trürümfiliyiñ ñi femün ta Jesús tañi femqueel pu Dunguquelu Ineingen Jehová famülque mu, feimu doi maneluhuaiñ taiñ nieel ti rüf dungu. w21.10 pag. 18, 19 parr. 2-4

Eimi füchache, chem cüdau rume nielmi Jehová ñi troquiñche mu, rume quelluafuimi tami pu peñi ca pu lamngen. Feimu llemai, calerumetule tami mongen raquiduamlayaimi tami pepi femnofel, huelu mai tami pepi femafel, femngechi ayüucüleaimi. Ti rey David rume ayüniefui ñi deumayafiel quiñe ruca poyengeam ta Jehová. Huelu Jehová feipifi ta David Salomón ñi deumayafiel feitachi ruca. ¿Chumi David? Illculai, huelu mai ayühunquechi quelluntucufemi ñi deumangeal feitachi ruca (1 Crón. 17:4; 22:5). David feipilai: “Rume huechelei ta Salomón, iñche müten cüme femafun feitachi cüdau” pilai (1 Crón. 29:1). David cüme quimniefui Jehová ñi quellun mu müten cüme tripayafui feitachi cüdau, huechengelu rume ta Salomón. David reque, fachantü pu füchalelu femhuenole rume quiñe falin cüdau Jehová ñi troquiñche mu, fentecünuquelaingün tañi cüdahuelafiel. Ca quimnieingün Jehová ñi quelluquefiel pu doi huechelelu ñi femal tañi cüdau engün. w21.09 pag. 9 parr. 4; pag. 10 parr. 5, 8

Raquiduamliyiñ ca chem dungu femafuiñ taiñ doi cüdahuelafiel ta Jehová, fei eluuliyiñ taiñ huechunentuafiel, ayüucüleaiñ. Huelu mülei taiñ raquiduamal quisu iñchiñ taiñ femafel, raquiduamlayaiñ caquelu che tañi femafel. Trürümuulayaiñ quisu engün mu, femliyiñ huesa duamcüleafuiñ (Luc. 14:28). Com iñchiñ femngelaiñ, ca Jehová tañi troquiñche mu rume falin-ngeiñ. Cuifi mu, Jehová pei taiñ ñom piuquengen ca taiñ cüpa quimfiel quisu, feimu cüpaleiñmu. Quisu cüpal-laeiñmu taiñ adümuhun-ngen mu. Rüf quimnieiñ Jehová ñi ayüucülen taiñ poyefiel mu com taiñ nehuen mu. Iñchiñ fentecünuquelaiñ taiñ cüdahuelfiel Jehová nor piuque mu, fei tüfa pengeli taiñ cüme piuquengen (Luc. 8:15). Feimu llemai, amulenge müten tami cüdahuelafiel Jehová tunte tami pepilel eimi. Femngechi ayüucüleaimi quisu tami femel mu (Gál 6:4). w21.07 pag. 24 parr. 15; pag. 25 parr. 20

Rupale quiñe norngenochi dungu, mülei taiñ nieal paciencia. Por ejemplo, quiñe peñi cam quiñe lamngen fütra culpale, pu loncolelu mülei ñi llellipuafiel ta Jehová tañi eluaeteu quimün, femngechi ñi cüme ngüneduamafiel ti dungu (Sant. 3:17). Pu loncolelu ayüqueingün ñi quelluafiel ti culpalu femngechi norümtual tañi huesa femün (Sant. 5:19, 20). Huelu ca ayüqueingün ñi cuñiutucuafiel ti trahunche ca yafültucuafiel pu huesalcangelu (2 Cor. 1:3, 4). Fütra culpale quiñe peñi cam quiñe lamngen, hunelu mu pu loncolelu mülei ñi quimal chem ñi rupan. Tüfachi dungu pürüm quimngequelai, alün tiempo rupayafui. Fei hula pu loncolelu ngillatufingün Jehová ca Biblia meu piuqueyenquechi ngülamtufingün tati culpalu, huelu doi huesa piquelafingün (Jer. 30:11). Pu loncolelu juzgafemquelafi ta che. Pu loncolelu inalu Jehová ñi ngülam, doi cümelcalequei ti trahunche. w21.08 pag. 10, 11 parr. 12, 13

Cuifi mu, Israel mapu mu, mülerpui ta ngüñün. Tüfa meu mülequefui Noemí ca tañi familia. Feimu mülefui ñi elcünual ti huaria engün, fei ñi amutual Moab mapu mu. Üyeu Noemí tañi füta, lai. Tañi epu püñeñ curengerpuingu, huelu rupalu ta antü, laingu (Rut 1:3-5). Fente tañi hueñancülen mu ta Noemí, raquiduami Jehová tañi huesalcaeteu. Feimu Noemí feipi: ‘Ñidol ta rume huesa cutrancaeneu. Tati com pepiluhun-ngechi Ngünechen hueñancün meu rulpaeneu’ (Rut 1:13, 20, 21). Jehová quimniei quiñe che rupamequelu huesaque dungu, cüme raquiduamlayafui (Ecl. 7:7). Jehová ñi duam mu, Rut eluhui tañi pengelelafiel ta Noemí ñi rüf piuqueyeniefiel. Femngechi Rut quellufi ta Noemí ñi fente huesa duamcülehuenoal ca raquiduamelfi Jehová tañi piuqueyenieteu. w21.11 pag. 9 parr. 9; pag. 10 parr. 10, 13

Famülque mu iñchiñ cüme serfiquefiyiñ ta Jehová. Huelu ¿fei müten femaiñ? Femlai. Com iñchiñ mülei taiñ raquiduamal ca chem dungu femürpuafuiñ Jehová ñi troquiñche mu, femngechi taiñ doi cüme quimeltucheal ca quelluafiel taiñ pu peñi ca pu lamngen. Taiñ femürpual tüfa, quisutu raquiduamuulayaiñ, huelu mai eluhuaiñ taiñ duamtuafiel ta caquelu che (Prov. 11:2; Hech. 20:35). Ngillatufinge ta Jehová tami quimal ca chem dungu femafuimi tami doi cüdahuelafiel (Prov. 16:3). Eimi hunelerpuafuimi amuldungun mu, cüdahuafuimi Betel mu ca quelluntucuafuimi ñi deumangeal Trahunhue Ruca. Ca quimürpuafuimi quiñe hue quehun, cam cañpüle amuafuimi tami amuldungual. w21.08 pag. 23 parr. 14, 15

Jehová rume cüpa pengelqueiñmu taiñ nor piuqueyenieteu (Os. 6:6). Ca feipiqueiñmu taiñ pengelal tüfachi rüf piuqueyen (Miq. 6:8). Huelu hunelu, peaiñ chumquei tati pu che pengelquelu tüfachi rüf piuqueyehun. Tati che nielu tüfachi rüf piuqueyehun, elcünuquelai tañi piuqueyefiel quiñe che, chem rupale rume turpu quisucünulayafi. Chau Jehová doi inayentufali tañi rüf piuqueyechequen mu. Tati rey David feipi: “Ahuem Jehová, tami nor piuqueyechen huenu mu cütu puuquei [...]. Ahuem Chau Dios, rume falin-ngei tami nor piuqueyechen. Pu huentru tañi pu cüpanche ellcauquei ca llaufeñtuquei miñche tami müpü mu” (Sal. 36:5, 7). David reque, ¿falintuquepefiyiñ mai Chau Jehová ñi rüf piuqueyechen? w21.11 pag. 2 parr. 1, 2; pag. 3 parr. 4

Jehová ñi familia mu coneltulei ta Jesús. Ca millonque püllü coneltulei feichi familia mu (Sal. 103:20; Col. 1:15). Jesús mülepalu Mapu meu feipicünui pu che peafuingün ta Chau Dios quisu ñi Chau reque. Jesús nütramcafilu tañi pu discipulo feipifi: ‘Iñche ñi Chau ca eimün tamün Chau’ (Juan 20:17). Fautizaulu iñchiñ, conpuiñ quiñe piuqueyen fütra familia mu (Mar. 10:29, 30). Jehová ta quiñe poyechefe Chau. Jesús ayüquei taiñ peafiel ta Jehová chumngechi fei tañi femquen. Jehová feipiquelaeiñmu müten taiñ femal. Fei ñi poyechefengen mu, tunten rupa rume ayüliyiñ taiñ nütramcayafiel, femafuiñ. Tüfa pengeli Jesús tañi quimeltufiel tañi pu inanieteu ca ñi chumngechi ngillatual engün. Jesús ñi ngillatun feipi: “Taiñ Chau Ngünechen” (Mat. 6:9). Jesús quimeltulafi tañi pu inanieteu ñi feipial: Com Nehuen-ngelu, Com Deumaquelu ca Rumel Loncolelu (Gén. 49:25; Is. 40:28; 1 Tim. 1:17). Doi mai quimeltufi tañi pu discipulo ñi feipial ta Jehová “Chau Dios”. w21.09 pag. 20 parr. 1, 3

Ti rey Manasés eluulai ñi allcütuafiel ta Jehová. Fei Jehová adcünufi quiñeque hueichafe Asiria tuhun-ngelu ñi presuafiel ta Manasés ca ñi yeafiel Babilonia mu. Petu ñi mülen Babilonia mu, Manasés com piuque mu raquiduami com ti huesaque dungu ñi femün mu. Fei ¿chumi Manasés? “Ngünechen ñi adquiñ meu, illamcaumequefui”. Huelu fei müten no. ‘Manasés amulei tañi ngillatuniefiel Jehová’ (2 Crón. 33:10-12). Rupachi antü mu, Jehová allcütuñmafi tañi ngillatun ta Manasés. ¿Chumngelu? Jehová peñmafi ñi piuque ta Manasés ñi norcületun. Jehová cutranpiuqueyefi ta Manasés, fei eluñmafi ñi reyngerputual. Manasés eluhui ñi femal com cümeque dungu ñi pengelal tañi rüf repentiucülen. w21.10 pag. 4 parr. 10, 11

Áquila engu Priscila elcünuingu cheu tañi cüme felequefel engu, fei quintuingu cheu tañi müleal ca tañi cüdahual engu. Áquila engu Priscila amuingu Corinto huaria mu. Fei eluhuingu ñi quelluntucuafiel ti trahunche ca ñi yafültucuafiel. Rupachi antü mu, ca huaria mu amuingu ñi amuldungual (Hech. 18:18-21; Rom. 16:3-5). Áquila engu Priscila rumel eluucülequefuingu ñi cüdahuelafiel ta Jehová, feimu ayüucülequefuingu. Pu curehuen ca inayentuafuingün ñi femün Áquila Priscila engu. ¿Chumngechi? Ngelai ñi famentuafiel ñi cüdahuelafiel ta Jehová. ¿Chem quelluafeyu? Epu che ayüle ñi curehuen-ngerpual, hunelu meu mülei ñi nütramcayal chumngechi tañi serfiafiel ta Jehová. Femngechi femle engu ca eluule ñi cüdahuelafiel Jehová, cüme ngüneduamaingu chumngechi ñi quelluaeteu Jehová (Ecl. 4:12). w21.11 pag. 17 parr. 11, 12

Rume falin-ngei taiñ inayal taiñ feipieteu Jehová, mülei taiñ yamnieafiel taiñ pu chau. Acordayaiñ, Levítico 19:2 feipi: “Mülei tamün lif mongen nieal, iñche ta Jehová tamün Ngünechen, lif mongen nien”. Fei hula Levítico 19:3 mu, feipi ñi respetangeal tati pu chau. Feimu rume falin-ngei taiñ inayal feitachi ngülam. Ngüneduamfiliyiñ feitachi dungu taiñ huercüeteu Jehová ñi respetayafiel taiñ pu chau, ramtuhuafuiñ: “¿Rüf respetaquepefiñ mai tañi pu chau?”. Femnofuliyiñ cuifi, feula eluhuafuiñ taiñ femal. ¿Chumafuiñ? Doi tiempo elcünuafuiñ taiñ doi rupayal taiñ pu chau iñchiñ. Cafei ngillacalelafuiñ chem tañi duamnieel engün, cam quelluafuiñ chi tañi doi cüme hueniyerpuafiel ta Jehová ca ñi serfinieafiel. Cafei doi yafültucuafuiñ. Femngechi femliyiñ, pengelcünuaiñ taiñ inaniefiel ñi feipin Levítico 19:3. w21.12 pag. 4, 5 parr. 10-12

Ti rey David femi huesaque dungu: cudumfi ta Bat-Seba ca langümfalfi tañi füta (2 Sam. 11:2-4, 14, 15, 24). Tañi huesa femün mu ta David, quisutu huesalcahui, ca huesalcafi tañi pu che ca tañi pu domo (2 Sam. 12:10, 11). Ca rupa David raquifalfi tati pu soltau, huelu Jehová feipilaeyu tañi femal. ¿Chum tripai ñi femün ta David? 70 mil israelche peno lai quiñe huesa cutran mu (2 Sam. 24:1-4, 10-15). ¿Feipiafuimi David mu “Jehová ngelai tañi perdonayaeteu”? Femngechi raquiduamlai Jehová. Jehová raquiduami ta David mu tañi serfiqueteu com tañi mongen mu, ca quimniefui David ñi repentiutun. Feimu perdonafi tañi huesa femfel. Jehová ca quimniefui David tañi piuqueyenieteu, ca ñi eluucülequen ñi femal Jehová tañi ayüqueel. Jehová ngüneduamqueiñmu taiñ cüme piuquengen mu ca taiñ cüme femquen mu. ¿Mañumcülenoafulu am iñchiñ? (1 Rey. 9:4; 1 Crón. 29:10, 17). w21.12 pag. 19 parr. 11-13

Jesús cutranpiuqueyequefi tati pu encañngechi che. Biblia feipi ta Jesús tremoltufi tati pu trauma, ti pu cüntro, tati pu che nielu lepra cutran, tati pu pilungelu, ca femngechi huiñomongeltufi tati pu la. Tati pu che pefilu ta Jesús ñi femün feitachi afmatun dungu, “püramyefingün ta Ngünechen” (Luc. 7:20-22). Iñchiñ pu rüf cristianongen inayentuquefiyiñ ta Jesús, fei cutranpiuqueyequefiyiñ pu encañngechi che. Famülque mu, Jehová eluquelaeiñmu nehuen taiñ femal afmatun dungu Jesús reque, huelu feipiafuiñ tati pu traumalelu ñi fülcülepan ñi tremotual engün. Cafei tati pu che quimnofilu Jehová traumaleingün reque. Quimeltuafuiñ Chau Dios ñi dungu fei eluafuiñ ñi maneluhual engün. Com engün hueniyerpuafingün ta Chau Dios, ngünenietule ti Mapu (Luc. 4:18). Tati pu che allcütulu feitachi cümeque dungu, eluuqueingün ñi poyeafiel Jehová. w21.12 pag. 9 parr. 5

Santiago tañi quimeltuel Chau Dios ñi huirintucuel mu tuhui. Fei raquiduamelfi tati pu che rupan mu huesaque dungu mu, püntütripanole engün Jehová mu, quisu cümelcayaeyu Job reque. Tañi quimeltuel ta Santiago adümfalngefui, femngechi tañi püramyenoaeteu tati pu che, doi mai Jehová tañi püramyengeal. ¿Chem quimeltun entuafuiñ? Enseñacheliyiñ, quimfalngepe taiñ feipifiel ca Biblia mu tripape taiñ quimeltufiel. Quimeltucheliyiñ, pengel-layafiyiñ pu che fente taiñ quimün-ngen, doi mai pengelcünuaiñ Jehová tañi quimün-ngen ca fente taiñ duamnieteu (Rom. 11:33). Taiñ femal tüfa, com taiñ quimeltuchequen tripape Biblia mu. Por ejemplo, quiñe taiñ estudiante huesaque dungu rupafule, ramtuafeiñmu: “Eimi cai, ¿chumafuimi?”. Iñchiñ feipilayafiyiñ iñchiñ taiñ femafel, doi mai pengelcünuafuiñ ñi femün quiñeque che mülelu Biblia mu. Ca feipiafuiñ tañi chem raquiduamquen ta Jehová ca tañi chum duamquen. Femngechi femliyiñ, ti estudiante cüme raquiduamai ñi chumal, femngechi taiñ ayühulmanoaeteu iñchiñ taiñ piuque, doi mai ñi ayühulafiel ñi piuque ta Jehová. w22.01 pag. 10, 11 parr. 9, 10

Jehová re feipiquelaeiñmu müten taiñ huesalcanoafiel ta caquelu pu che. Doi mai, Jehová feipieiñmu: “Piuqueyefinge tami chafche chumngechi piuqueyeniehuimi ta eimi”. Quiñe cristiano cüpa ayühulfile Jehová, mülei ñi inayal feitachi ngülam. Jesús pengeli rume falin-ngei ti huercün dungu mülelu Levítico 19:18. Quiñe rupa, quiñe fariseo ramtufi ta Jesús: ‘Com tati ley dungu meu, ¿chuchi huercün dungu am doi falin-ngei?’. Jesús feipieyu mülei taiñ piuqueyeafiel taiñ Chau Ngünechen Jehová com taiñ piuque, com taiñ mongen ca com taiñ raquiduam meu, “tüfa tati hunen huercün dungu ca doi falilu”. Fei hula, Jesús feipi chem ñi huiriconcülen Levítico 19:18 mu. Feipi: “Fei tati inalechi huercün dungu ca tüfa famngechi feipilei: ‘Piuqueyefinge tami chafche chumngechi piuqueyeniehuimi ta eimi’” (Mat. 22:35-40). ¿Chumngechi pengelafuiñ taiñ piuqueyeniefiel caquelu pu che? Taiñ piuqueyeafiel ta caquelu pu che, inayafuiñ ñi feipin Levítico 19:18. Tüfa feipi: “Caiñetuquefilnge ca üdequefilnge tami chafche”. w21.12 pag. 10, 11 parr. 11-13

Jesús nüñmafi ñi cuhu ta Pedro ca montulfi. Loncontucuaiñ: Pedro puquintuniefilu ta Jesús, amulefui ta huente co meu. Huelu puquintuniefilu ti cürüftucu mahun, llicai, quimlafui tañi chumal. Fei ñamnagi co meu (Mat. 14:24-31). ¿Chem quimeltueiñmu ñi rupan ta Pedro? Ellaca mu Pedro tripalu ti farcu meu, raquiduamlafui rume tañi llicalcayaeteu ti cürüftucu mahun. Trecalefui müten huente co meu, ayüquefui ñi puhual ta Jesús meu. Huelu, ¿chumi Pedro? Leliniehuelafi ta Jesús. Re raquiduamcülequefui tañi huesa rupayal ti cürüftucu mahun mu. Pedro duamniefui ñi maneluhual Jesús mu ñi trecayal huente co meu. Famülque mu, iñchiñ miyaulayaiñ huente co meu, huelu ca duamnieiñ taiñ maneluhual Jehová mu taiñ chaftuafiel chem huesaque dungu rume. Huelu re raquiduamcüleliyiñ müten taiñ huesa rupan mu ca famentufiliyiñ ta Jehová ca taiñ feipicünueteu, maneluuhuelayafuiñ quisu meu. Loncontucuaiñ: chem huesaque dungu rume rupafuliyiñ, raquiduamcüleaiñ Jehová taiñ quelluaeteu. w21.12 pag. 17, 18 parr. 6, 7

Taiñ ngillatun, taiñ papeltufiel Biblia ca taiñ raquiduamün taiñ papeltuel mu, femngechi pengelquefiyiñ Jehová taiñ poyefiel. Ngillatun mu nütramcaquefiyiñ Jehová. Papeltufiliyiñ Biblia, iñchiñ llouqueiñ Jehová tañi quimün (Prov. 2:1-5). Ca raquiduamlu iñchiñ taiñ papeltufiel, quimürpuiñ Jehová tañi chumngechi chengen. Ca quimürpuiñ Jehová ayüquei ñi cümeque dungu femal com pu che mu. Femliyiñ com tüfa, ngünamcalayaiñ taiñ tiempo. Feimu, ¿chem quelluafeiñmu taiñ cüme llellipual, cüme chillcatual ca cüme raquiduamal taiñ papeltuel mu? Quintuaiñ cheu taiñ tüngcüleal. Raquiduamaiñ chumngechi ñi femün ta Jesús. Amuldungupalu Mapu mu, 40 antü mülepui desierto mu (Luc. 4:1, 2). Feiti mu mülepulu, llellipufi Jehová ca raquiduami Jehová ñi ayüqueelchi dungu mu. Tüfa quellueyu ñi chaftuafiel chem huesaque dungu rume. w22.01 pag. 27, 28 parr. 7, 8

Quiñe loncolelu cam quiñe peñi fentren quimün nielu feipiafeiñmu taiñ huelulcaucülen quiñeque dungu mu, fei ngülamtuafeiñmu taiñ norümtual taiñ femmequen. Taiñ ngülamtueteu Biblia mu, pengeli taiñ piuqueyenieteu. Feimu cüdahuaiñ taiñ inayafiel ñi ngülam. Ngülamtueliyiñmu quiñe che, cüdautuafuiñ tañi cüme llohuafiel, illcuafuiñ cütu. ¿Chumngelu? Iñchiñ quimnieiñ taiñ huelulcauquen, huelu cangelu che feipieliyiñmu taiñ huelulcauquen, cüdautuafuiñ taiñ cüme llohuafiel ti ngülam (Ecl. 7:9). Ngülamtungeliyiñ, quisutu incañpehuafuiñ. “¿Chumngelu ngülamtueneu ti che?” piafuiñ. Cam illcuafuiñ chumngechi taiñ ngülamtueteu. Cam huesa piafuiñ: “¿Inei am tüfa tañi ngülamtuaeteu? Fei ca huelulcauquei”. Fei llemai, ayünoliyiñ ti ngülam taiñ elungeel, feyentulayafiyiñ. Fei quintuafuiñ cangelu che taiñ eluaeteu ti ngülam taiñ ayüquefiel. w22.02 pag. 8, 9 parr. 2-4

Mongelen rumeliyiñ ti fütra cutrancahun mu, rupapelayaiñ cüdaungechi dungu mu. Fei, ¿maneluupeaiñ mai Jehová mu? Raquiduamnge tüfa: tati pu israelche tripalu Egipto mapu mu, müna echamenofui tati iyael tañi niequefel Egipto mapu mu. Doi mai, illamtufingün tati mana tañi elueteu Jehová (Núm. 11:4-6; 21:5). Afle ti fütra cutrancahun, ¿ca femngechi raquiduam mai niepeaiñ tati pu israelche reque? Apümcangele com ti huesaque dungu, rume fentren cüdau nieaiñ. Müleafui taiñ liftuafiel ti Mapu ñi adcületual, fei ñi cüme mülehuengerpual. Müna cüdaungeai llemai. Fentren cüdau niealu am iñchiñ, ¿“chemu am fentren cüdau ta elumuqueiñ” piafiyiñ ta Jehová? ¿Illamüñmapeafiyiñ mai ta Jehová taiñ eluaeteu? Loncontucuaiñ: mañumtufiliyiñ ta Jehová fachantü, ca mañumafiyiñ cüpalechi antü meu. w22.02 pag. 7 parr. 18, 19

Ti profecia mülelu Zacarías 8: 23 mu feipilu “quiñe judio” adentulei pu dullin cristiano (Rom. 2:28, 29). Tati “mari huentru fillque quehun dungu nielu” adentulei ti caquelu ufisa. Fei engün nünieñmafi reque ti judio ñi tacun. ¿Chem adentulei tüfa? Ti caquelu ufisa püntütripaquelai ti pu dullin cristiano mu ca quiñeucülen mu poyequefingün ta Jehová. Ca femngechi nütramcai Ezequiel 37:15-19, 24, 25. Tüfachi profecia nütramcai epu mamüll mu. “Judá tañi mamüll”, ¿chem adentulei? Cuifi mu Judá meu, dullingequefui pu rey. Feimu tüfachi mamüll adentulei pu dullin cristiano amualu huenu mu ñi ngünenieal. ¿“Efraín ñi mamüll” cai? ¿Chem adentulei? Ti pu mülealu Mapu mu. Jehová trapümfi feichi epu mamüll ñi quiñecünutuafiel. ¿Chumngechi huechutriparpui ñi feipicünuel ta Jehová? Jehová trapümfi pu dullin cristiano ca ti caquelu ufisa ñi quiñentrür poyeaeteu engün (Juan 10:16). w22.01 pag. 22 parr. 9, 10

Cuifi mu quiñeque che quellufiel mu pu pofre, ayüquefui caquelu che tañi penieaeteu chumngechi ñi quelluchequen engün. Cümeque dungu femfulu rume engün, Jehová mu falilafui tañi femqueel engün (Mat. 6:2-4). Rüf cüme chengeafuiñ cüme piuque mu femliyiñ cümeque dungu, taiñ afmatunoaeteu pu che. Ramtuhuafuiñ: “Quimfiñ mu ñi cümen quiñe dungu, ¿femquepefiñ mai? ¿Chem nengümelqueneu tañi femal cümeque dungu?”. Jehová cansatuquelai, fentecünuquelai ñi cüdahual, ca femngechi femquelai tañi nehuen (Gén. 1:2). Doi cüdaucüleliyiñ taiñ inayentuafiel ñi chumngechi chengen ta Jehová, doi quelluaiñmu Jehová tañi nehuen. Santiago feipi taiñ feyentun Chau Dios mu lalequei reque femnoliyiñ cümeque dungu (Sant. 2:26). Feimu rume falin-ngefui taiñ cüdaucüleal. w22.03 pag. 11, 12 parr. 14-16

Iñchiñ poyequefiyiñ Jehová ca cümeque dungu femqueiñ caquelu pu che mu. Huelu ti apostol Pedro ca feipieiñmu taiñ femal quiñe falin cüdau. Pedro petu taiñ ngülamtunoeteu ñi lif chengeal, hune feipieiñmu taiñ pepicaucüleal ñi cüdahual (1 Ped. 1:13). ¿Chem cüdau am feipi Pedro? Pedro feipi Chau Ngünechen ñi pu dullinche ñi huldungual huall püle Chau Ngünechen ñi cüme piuquengen (1 Ped. 2:9). Famülque mu, iñchiñ pu rüf cristianongen ca coneltuleiñ feitachi falin cüdau mu. Tüfa rume quelluchequei. Rume falintuquefiyiñ taiñ ayühunquechi amuldungucheal (Mar. 13:10). Femngechi femliyiñ, pengelafiyiñ taiñ piuqueyefiel Jehová ca taiñ chafche. Ca pengelaiñ taiñ lif chengen com taiñ femquen mu. w21.12 pag. 13 parr. 18

Ti apostol Pablo rumel cüme raquiduamquefui tañi pu peñi ca pu lamngen mu. Quimniefui quiñe peñi cam quiñe lamngen huelulcaufule rume, tüfa pengelquelai ñi huesa piuquengen. Pablo piuqueyequefi tañi pu peñi ca pu lamngen, ca re raquiduamquefui müten tañi cüme piuquengen engün. Pablo pefilu quiñe peñi cam quiñe lamngen ñi cüdautuquen ñi femal cümeque dungu, quisu raquiduamquefui: “Tüfachi peñi cam lamngen cüme piuquengei, ayüniefui ñi femal cümeque dungu, duamniei ñi quellungeal müten”. Raquiduamaiñ chumngechi Pablo quellufi epu lamngen Filipos trahunche mu (Filip. 4:1-3). Evodia ca Síntique yafcahuingu, fei huenihuen-ngehuelaingu. Pablo illcutulafi engu, doi mai raquiduamtucui ñi cüme piuquengen engu. Tüfachi epu lamngen alün tripantu cüdahuelquefi Jehová. Ca Pablo quimniefui Jehová tañi piuqueyenieteu engu. Pablo cüme raquiduamquefui tüfachi epu lamngen mu, feimu yafültucufi ñi cümelcautual engu. Pablo cüme raquiduamlu am tañi pu peñi ca pu lamngen mu, feimu ayüucülequefui ca hueniyefi tati pu peñi ca pu lamngen Filipos trahunche mu. w22.03 pag. 30 parr. 16-18

Llouliyiñ Jehová ñi tüngün, femngechi tüngcüleai taiñ piuque ca cüme raquiduamaiñ. Peaiñ chem ñi rupan quiñe lamngen, Luz pingelu, fei feipi: “Fentrenque rupa quisulelu troquiuquen. ‘¿Rüf piuqueyequepeneu mai Jehová?’ ramtuuquen. Femngechi raquiduamün mu, llellipufemquefiñ ta Jehová, feipiquefiñ tañi chum duamcülen. Femün mu, doi cümelcaletuquen” feipi taiñ lamngen. Luz tañi feipin mu, ngillatuliyiñ rüf quelluafeiñmu (Filip. 4:6, 7). Quimnieiñ Jehová ca Jesús quelluaiñmu layeluuliyiñ. Cafei Jehová ca Jesús reque, amuldungucheliyiñ ca quimeltucheliyiñ, duamtuafiyiñ. Cafei Jehová ca Jesús quimnieingu taiñ chum duamcülen ca quelluaiñmu taiñ aguantaleal. Tüfa eluqueiñmu fentrenque nehuen. Epechi aculniefiyiñ ti antü Jehová liftuñmayaiñmu taiñ cülleñu (Apoc. 21:4). w22.01 pag. 16 parr. 7; pag. 19 parr. 19, 20

Jesús feipi ñi mülen epu puerta. Caque quiñeque puerta niei quiñe rüpü: tati alü rupachi rüpü ca ti pichi rupachi rüpü (Mat. 7:14). Ngehuelai chem rüpü no rume, feitachi epu rüpü müten. Iñchiñ mülei taiñ dullial chem rüpü taiñ inayal. Quiñe cüme rüpü müten mülefui, feimu cüme dulliliyiñ afnoachi mongen nieafuiñ. Ti alü rupachi rüpü mu fentren che miyauquei, cüdaungelai ñi inangeal. Fentren che miyauquelu am, caquelu che inayentuqueyu feimu famentuuquelai tüfachi huesa rüpü mu. Huelu ngüneduamquelaingün rume Satanás tañi raquiduameleteu ñi inayal tüfachi rüpü. Tüfachi rüpü yequefi ta che tañi apümcangeal engün (1 Cor. 6:9, 10; 1 Juan 5:19). Ti pichi rupachi rüpü mu, pichin che conpuquei. ¿Chumngelu? Jesús feipi mülei fentren coila quimeltufe (Mat. 7:15). w21.12 pag. 22, 23 parr. 3-5