Abril

Cuifi mu, quiñeque serfiquefilu Jehová rupaingün huesaque dungu tañi raquiduamquenofel rume. Raquiduamaiñ ñi rupan ta Jacob. Tañi chau feipieyu ñi amual ta Labán mu, quiñe pariente serfiquefilu Jehová, fei ñi nieafiel Labán ñi ñahue. Tañi chau feipieyu Jehová tañi cümelcayaeteu (Gén. 28:1-4). Jacob elcünui tañi ruca, fei amui ta Labán mu, nierquefui epu ñahue, Lea ca Raquel. Jacob ayüfi Labán tañi inan ñahue. Tañi nieafiel feitachi domo, mülefui ñi cüdahuelafiel Labán regle tripantu (Gén. 29:18). Huelu femtripalai Jacob ñi raquiduamfel. Labán ngünencaeyu fei elueyu tañi hunen ñahue, Lea. Quiñe semana rupalu, Labán elueyu ñi nieafiel ta Raquel, huelu mülefui tañi cüdahual ca regle tripantu (Gén. 29:26, 27). Fei müten no, Labán ca encañaeyu negocian dungu mu. 20 tripantu Labán allmalltui tañi huesa femafiel ta Jacob (Gén. 31:41, 42). w23.04 pag. 15 parr. 5

¿Inei am llellipuafuiñ taiñ yafültucuaeteu ca taiñ cüme ngülamtuaeteu? Jehová llemai. Jehová ayüquei taiñ rumel llellipunieafiel. Feimu Biblia feipiquei: “Llellipulequeaimün” (1 Tes. 5:17). Llellipunieafiyiñ müten ta Jehová taiñ cüme adnieaeteu taiñ cüme femal (Prov. 3:5, 6). Tunten rupa mu rume llellipufiliyiñ ta Jehová, fei allcütunieaiñmu. Jehová rume falintuquei taiñ llellipun. Jesús cüme quimniefui tüfa, ¿chumngelu am? Petu ñi cüpanon mapu mu, Jesús quimniequefui Jehová chumngechi ñi allcütuñmaquefiel ñi llellipun tañi pu poyequeteu. ¿Inei engün am? Ana, David, Elías ca caquelu che (1 Sam. 1:10, 11, 20; 1 Rey. 19:4-6; Sal. 32:5). Feimu mülepalu mapu mu, Jesús quimeltufi tañi pu discipulo ñi llellipunieafiel ta Jehová (Mat. 7:7-11). w23.05 pag. 2 parr. 1, 3

Ti hunen lonco sacerdote Jehoiadá yamniequefui ta Jehová. Jehoiadá ñi antü mu, Jezabel ñi püñeñ, Atalía pingelu, langümfalfi com pu reyngeafulu, quenü tañi pu nieto langümfalfi. Femngechi ñi reinacünungeal Judá mapu mu. Feitachi domo müna huesa chengefui (2 Crón. 22:10, 11). Huelu Jehoiadá ca tañi domo montulfingu quiñe pichiche reyngeafulu, Jehoás pingequefui. Ellcafingu ca tremümfingu, femngechi David quiñe tañi pu cüpanche ñi reyngerpual. Jehoiadá eluhui ñi femal Jehová ñi ayüqueel, feimu huitracünuulai, Atalía llicafalfulu rume. Jehoás regle tripantu nielu, Jehoiadá ca cüme dungu femi. Cüme tripafule, reycünungeafui ta Jehoás, David tañi cüpanche. Huelu cüme tripanofule, langümngeafui. Huelu Jehová ñi quellun mu, com cüme tripai. w23.06 pag. 17 parr. 12, 13

Tañi feipieteu Daniel, fei Nabucodonosor raquiduamafui chi tañi caiñetumequeteu, fei langümngepe Daniel piafui. Huelu Daniel nehuen piuquecünuhui, fei dungui müten. ¿Chem quellueyu ta Daniel ñi nehuen piuquecünuhual com tañi mongen mu? Huechengelu quimtucupelafui ñi chumün tañi pu chau (Deut. 6:6-9). Daniel quimniefui chem pin tati mari huerquen dungu. Huelu ca cüme quimniefui caquelu dungu ñi feipin ti ley, por ejemplo, chem felefui ñi iyal ca inoafiel pu Israel che (Lev. 11:4-8; Dan. 1:8, 11-13). Cafei cüme quimniefui chem ñi rupan cuifi Chau Dios ñi pu che, ca ñi huesa tripan engün tañi inanofiel mu Jehová ñi ngülam (Dan. 9:10, 11). Com ñi rupan Daniel tañi mongen mu quellueyu ñi quimtucual Chau Jehová ca tañi cümeque püllü eluucülei tañi quellueteu (Dan. 2:19-24; 10:12, 18, 19). w23.08 pag. 3 parr. 5, 6

Rebeca quim domongequefui, nehuen piuquengequefui, ca quimquefui tañi chumal (Gén. 24:58; 27:5-17). Cafei Rebeca yamchequefui ca eluucülefui ñi inayal tañi huercüngeel (Gén. 24:17, 18, 65). Eimi üllcha domo, Rebeca reque femülmi, ñom piuquengelmi ca inafilmi ñi feipin pu nielu autoridad, inayentufalngeaimi tami familia mu ca ti trahunche mu. Inei rume ayüle ñi cüme cristianongerpual mülei ñi ñom piuquengeal. Ester ñom piuquengefui. Reinacünungelu, mallmaulai. Quisu allcütuquefui ca inaquefui ti ngülam ñi elueteu tañi primo Mardoqueo pingelu (Est. 2:10, 20, 22). Eimi üllcha domo, Ester reque femaimi, fei eluhuaimi tami ngülamtuaeteu caquelu che ca cüme allcütuafimi (Tito 2:3-5). Ester, ¿ca chumngechi pengeli tañi ñom piuquengen? Quisu elangechi domo fel. Femfulu rume, ngüneltumuchi iñche ta doi cüme adngen piquelafui (Est. 2:7, 15). w23.12 pag. 19, 20 parr. 6-8

Rume culpatuulayaiñ, Jehová ayüquelai taiñ fill antü culpatuucüleal. Deu feipiliyiñ taiñ culpan, repentiuliyiñ ca eluuliyiñ taiñ huesa femhuenoal, maneluhuafuiñ Jehová taiñ perdonayaeteu (Hech. 3:19). Femliyiñ, Jehová ayüquelai taiñ culpatuuhuenoal. Re culpatuucüleliyiñ müten taiñ raquiduam, huesalcayafeiñmu (Sal. 31:10). Ngañhuadcüleliyiñ fente taiñ culpatuucülen, fei elcünuafuiñ ti cuden (2 Cor. 2:7). Rume culpatuuliyiñ, raquiduamtucuaiñ chumngechi taiñ rüf perdonaeteu ta Jehová (Sal. 130:4). Culpaliyiñ huelu rüf repentiuliyiñ, fei Jehová ‘acordahuelayai taiñ culpan’ (Jer. 31:34). Taiñ huesa femün mu niehuenoliyiñ quiñeque cüdau Jehová ñi trahunche mu, ngelai taiñ huesa duamcüleal. Jehová raquiduamhuelai taiñ huesa femün mu, iñchiñ ca femhuelayaiñ. w23.08 pag. 30 parr. 14, 15

Aculu ti pandemia COVID-19, fentren coilaque dungu ta feipingequefui. Pu che allcütuquefilu tüfachi dungu huesa duamcülequefuingün, huelu pu testigo allcütuquefilu ñi chem pin Jehová ñi troquiñche tüngcülequefuingün (Mat. 24:45). Eluucüleaiñ taiñ femal “tati doi falin-ngelu” (Filip. 1:9, 10). Huelulcaeliyiñmu Huecüfü, nielayaiñ tiempo ca nehuen taiñ femal doi falinque dungu. Doi falintufiliyiñ taiñ cüdau, taiñ iyal, putual cam taiñ cüme rupaleal, huelulcahuafuiñ (Luc. 21:34, 35). Fachantü allcütuqueiñ müten tati protesta cam ñi feipin pu politico, eluulayaiñ feitachi dungu taiñ huelulcayaeteu. Cuñiutucuunoliyiñ, tüfachi dungu conafui taiñ piuque mu ca taiñ raquiduam mu. Fillque dungu femquei ta Huecüfü, femngechi taiñ feyentunoafiel Jehová. w23.07 pag. 16, 17 parr. 12, 13

Ti Trahun Jesús tañi lan ñi acordangeal rume falin-ngei Jehová tañi troquiñche mu. Tüfa tati doi falin antü tripantu meu. Fei müten Jesús feipicünui taiñ femal fill tripantu (Luc. 22:19, 20). Ti Trahun Jesús tañi lan ñi acordangeal raquiduameleiñmu chumngechi taiñ mañumafiel (2 Cor. 5:14, 15). Ca quelluqueiñmu taiñ hueluquentu yafültucuhual taiñ pu peñi, pu lamngen iñchiñ (Rom. 1:12). Cafei fentren pu che ayüfilu ñi peel ca ñi allcütuel trahun mu, fei eluhuingün ñi quimeltungeal Biblia. Feitachi trahun mu, ca quiñeucüleiñ com taiñ pu peñi pu lamngen huall mapu meu. Feimu rume falin-ngei feitachi trahun iñchiñ mu. w24.01 pag. 8 parr. 1-3

Doi raquiduamtuculiyiñ ñi femün Jehová ca tañi Fotüm Jesús, doi maneluhuaiñ taiñ piuqueyenieteu (Gál. 2:20). Jehová hul-lu tañi Fotüm, pengeli fente tañi piuqueyechen. Chalintucui tañi doi poyen Fotüm, eluñmai ñi cutrancahual ca ñi layal iñchiñ mu, femngechi taiñ montulaeteu. Jehová piuqueyeiñmu, ca pengelquei fente taiñ piuqueyenieteu (Jer. 31:3). Feimu cüpaleiñmu quisu mu (ca ngüneduamnge Deuteronomio 7:7, 8). Inei no rume ca chem no rume catrütulayafui Chau Ngünechen taiñ piuqueyenieteu (Rom. 8:38, 39). Raquiduamülmi tüfa mu, ¿chem piquei tami piuque? w24.01 pag. 28 parr. 10, 11

Pu dullin che rume falintuquefingün tañi maneluhun ñi amual huenu mu. Peafiyiñ ñi feipin peñi Frederick Franz 1991 tripantu mu. Feipi: “Chem taiñ maneluucülen rüf femtripayai. Com pu 144.000 dullin che llohuai tañi cümelcan. Ancapuulayai rume chem taiñ raquiduamün”. Ca feipi taiñ peñi: ‘Falintuniefiyiñ chem taiñ maneluucülen. Rupan mu ta tripantu, doi mañumquefiyiñ taiñ maneluucülen. Eluucüleiñ taiñ üngümcüleal. Feula doi piuquentucunien tañi maneluhun’. Tati pu llohualu rumel mongen huenu meu ca ti mapu meu, com iñchiñ ayühuelqueiñmu taiñ maneluhun. Rupalechi tripantu mu, amuleafui taiñ doi maneluucüleal. w23.12 pag. 10 parr. 6, 8

Huecuntu ti ngillatuhue tolto ruca mülefui quiñe altar cobrengelu. Tüfa mu chalintuculelngequefui culliñ ta Jehová (Éx. 27:1, 2; 40:29). Huelu feichi culliñ chalintucungelu com liftuñmalayafui tati pu che ñi culpan (Heb. 10:1-3). Feichi chalintucun rumel hulngequelu adentulefui quiñe doi falichi chalintucun, fei tüfa com liftuñmayafi tati pu che ñi culpan. Jehová huercüi tañi Fotüm ñi hulal tañi mongen com pu che ñi duam mu. Jesús quimniefui tüfachi dungu (Mat. 20:28). Feimu fautizaulu Jesús, chalintucuhui reque Chau Jehová ñi adquiñ mu, femngechi ñi femal tañi ayüqueel (Juan 6:38; Gál. 1:4). Jesús chalintucui tañi mongen “quiñe rupa müten”, femngechi com liftuñmayafiel tañi culpan com pu che ñi feyentueteu (Heb. 10:5-7, 10). w23.10 pag. 26 parr. 10, 11

Iñchiñ taiñ duam mu, montul-layafuiñ culpan ca lan dungu meu (Sal. 49:7, 8). Feimu Jehová huli tañi saquin Fotüm taiñ montulaeteu. Femün mu tüfa, rume cutrancahuingu. Doi raquiduamliyiñ ñi femün Jehová ca tañi Fotüm Jesús, doi falintuafiyiñ taiñ montuleteu. Ti hunen huentru Adán allcütunofilu ta Jehová, müntuñmangei tañi rumel mongeleal quisu ca com tañi cüpanche. Feimu Jesús huli tañi culpan-ngenochi mongen, femngechi huiño nietuafuiñ com ñi ñamümel ta Adán. Jesús com tañi mongen mu “turpu culpalai, ngünencan dungulai rume” (1 Ped. 2:22). Lalu Jesús culpan chengelafui, femngechi mongen niequefui ta Adán ellaca mu. Feimu Jesús tañi lan mu culli reque tañi mongen ñi niequefel ta Adán (1 Cor. 15:45; 1 Tim. 2:6). w24.01 pag. 10 parr. 5, 6

Huiñomongetulu Jesús, conpui tati Doi Yamfal Mülehue Chau Dios tañi adcünuelchi ruca mu. Jehová adcünui chumngechi ñi poyengeal fachantü, feimu hulcünui tañi Fotüm chalintucun reque. Cafei elcünufi ñi hunen lonco sacerdotengeal. Feimu llemai, tüfa ta doicülei chumngechi pu judio poyequefuingün ta Chau Dios. Cuifi, ti hunen lonco sacerdote conpui ti Doi Yamfal Mülehue pu huentru ñi deumael ca yeniequefui pu culliñ ñi mollfüñ. Huelu Jesús “huenu mu conpui” tati doi yamfal mülehue mu: tañi Chau ñi adquiñ mu. Femngechi chalintucui quisu tañi culpan-ngenochi mongen Jehová ñi adquiñ mu, femngechi “ñi apümcayafiel ti culpan dungu” (Heb. 9:24-26). Com iñchiñ püramyeafuiñ ta Chau Jehová tañi adcünuelchi ruca mu: tuchi llohualu mongen huenu meu cam ti mapu meu. w23.10 pag. 28 parr. 13, 14

Raquiduamaiñ Jesús chem dungu femquei iñchiñ mu tañi reyngen ca hunen lonco sacerdotengen. Jesús ñi duam mu iñchiñ fülconpuafuiñ Jehová llellipun mu, femngechi pediafuiñ taiñ cutranpiuqueyeaeteu ca taiñ quelluaeteu (Heb. 4:14, 15). Jehová ca Jesús fentren cümeque dungu femquei iñchiñ mu, feichi dungu fill antü acordanieafiyiñ. Fente taiñ piuqueyenieteu eluucüleafuiñ taiñ serfinieafiel Jehová com taiñ nehuen mu (2 Cor. 5:14, 15). ¿Chumngechi pengelelafuiñ taiñ mañumtuniefiel? Quelluafiyiñ pu che ñi testigongerpual ca ñi inanierpuafiel ta Jesús (Mat. 28:19, 20). Ti apostol Pablo femngechi femi. Quisu quimniefui Jehová “ayüniei itrofill che ñi montual ca ñi cüme quimürpuafiel ti rüf dungu” (1 Tim. 2:3, 4). w23.10 pag. 22, 23 parr. 13, 14

Amuldungulu iñchiñ, papeltulelquefiyiñ pu che ñi chumletual tañi mongen hue mapu mu. ¿Chumngechi quelluafuiñ pu che ñi rüf femtripayal ñi feipin Apocalipsis 21:3, 4? ¿Chumngechi doi maneluhuafuiñ Jehová mu ca tañi feipicünuel? Chau Jehová elueiñmu tüfachi cümeque dungu taiñ yafüluucüleal ca pengeleiñmu chumngelu mülei taiñ maneluhual tañi feipicünun mu. Ñi feipin Apocalipsis pengeli Chau Jehová ñi rüf femtripayal tañi feipin ti ayüfal mapu mu. Tüfa mu, feipi: “Tati anülelu ülmen huancu mu feipi: ‘Huecünumequetufiñ com dungu’. Ca feipi: ‘Tüfachi dungun manelfali ca rüfngei, feimu huirintucufinge’. Ca feipieneu: ‘¡Deu femtripai tati! Iñche tati Alfa ca tati Omega, tati ellaca mu mülelu ca ti af mu mülelu’” (Apoc. 21:5, 6a). w23.11 pag. 3 parr. 3-5

Quiñe hueche pengelafui ñi raquiduamquen Jehová reque chumngechi ñi tucutuuquen ca peinetuuquen. Epe com pu deumaquelu tacun ca tati hulquelu propaganda yamquelafingün ta Jehová, ca pod mongen yeniequeingün, feimu fentren tacun pichi rupaquei ca domo tacun reque felequei. Fei quiñe hueche, ¿chumngechi cüme dulliafui tañi tucutuhual ca cupiluhual? Raquiduamai chem ñi ayüqueel ta Jehová, ca inayafi ñi femqueel quimque peñi. Ca ramtuhuafui: “Chumngechi ñi tucutuuquen ca cupiluuquen, ¿pengelquepen mai ñi nien cüme raquiduam? ¿Respetaquepefiñ mai caquelu che ñi raquiduam feitachi dungu mu? ¿Pengelquepen mai tañi poyequefiel ta Chau Jehová?” (1 Cor. 10:31-33). Cüme raquiduamülmi, pu peñi ca pu lamngen yamnieaimu ca Chau Jehová falintuaimu. w23.12 pag. 26 parr. 7

Cuifi mu, “ti lonco ülmen ngünenielu sur mapu mu” inantucufi Jehová ñi pu che (Dan. 11:40). ¿Chem dungu rupaingün? Feichi epu fütraque hueichan fentren pu peñi ca pu lamngen carceltucungei tañi coneltunon hueichan mu. Ca pu pichiqueche huemünentungei colegio mu tañi poyenofiel ti bandera. Famülque mu, cheu ñi ngünenieel ti lonco ülmen sur mapu mu, Jehová ñi pu che cüdautufuingün tañi quelluntucual Chau Ngünechen ñi Gobierno. Raquiduamnge tüfa: dullingele quiñe che cam quiñe politico troquiñche ñi ngünenieal, quiñe cristiano ayüafui chi ñi coneltual tüfachi dungu mu. Votanole rume, huelu tañi lonco mu ca piuque mu ayüafui chi feichi che ñi huehual. Feimu rüf taiñ coneltunoal mapu müleyechi dungu mu, re cuñiutucuulayaiñ chem taiñ femquen, huelu cafei chem ñi mülen taiñ piuque mu ca lonco mu (Juan 15:18, 19). w23.08 pag. 12 parr. 17

Biblia feipieiñmu taiñ lefcüleal taiñ huehual ti cuden, femngechi taiñ llohual rumel mongen (1 Cor. 9:24). Jesús ca ngülamtueiñmu taiñ “fill raquiduamnoal icahun dungu mu, putucahun ca mapu mülechi fillque duam” (Luc. 21:34). Biblia ñi ngülam quelluaiñmu taiñ cüme inaduamuhual, femngechi elcünuafiyiñ ti fanechi dungu taiñ cüme lefcüleal ti cuden mu. Jehová eluaiñmu nehuen, femngechi taiñ huehuafiel ti cuden ca taiñ nierpual afnoachi mongen (Is. 40:29-31). Feimu ti apostol Pablo reque, com tami nehuen mu lefcüleaimi tami huehual ti cuden (Filip. 3:13, 14). Inei no rume leflayafui eimi mu, huelu Jehová quelluaimu tami huehuafiel ti cuden. Tami lefcülen mu cüdautuafuimi chi tami femal quiñeque dungu, huelu Jehová quelluaimu. Cafei quiñepülecünuafimi quiñeque dungu tami fanetuniefiel. Feimu llemai, Jehová ñi quellun mu lefcüleaiñ ca huehuaiñ ti cuden. w23.08 pag. 31 parr. 16, 17

Jesús nielu mari epu tripantu, fei ca tañi pu che amuingün Jerusalén huaria ñi conal ti fiesta Pascua mu (Luc. 2:46-52). Aflu tati fiesta, fei petu huiñotulu tañi ruca mu engün, José engu María ngüneduamlaingu ñi mülenon ta Jesús. Fei engu mülefui ñi quimal cheu ñi miyahun tañi pichi huentru. Huelu petufilu, María culpatufi ta Jesús. ¿Chumngelu iñche ta culpatuen ñuque? feipilai ta Jesús, doi mai yamün mu cüme huiñoldungueyu engu. Huelu “José ca María quimlaingu ñi chem pieteu Jesús”. Femlu rume, huelu Jesús “amulefui ñi feyentuniefiel engu”. Hueche, huelulcaule tami pu chau cam pepilnoelmu, cüdautuafuimi tami feyentuafiel. ¿Chem quelluafeimu? Raquiduamnge chum duamquei Jehová. Biblia feipi feyentuafimi tami pu chau, “tüfachi dungu ayüquei ta Ñidol” (Col. 3:20). Jehová quimniei quiñeque mu tami pu chau entendelayaimu, ca feipiafeimu ñi femal tami ayüquenoel. Huelu femfule rume, feyentufilmi müten, ayühuai ta Chau Jehová. w23.10 pag. 7 parr. 5, 6

Raquiduamnge tüfa, quiñe compañ colegio mu feipiafeimu: “Cümelai ñi raquiduamquen pu testigo pu homosexual mu”. Feimu feipiafuiñ iñchiñ pu testigo com pu che yamquefiyiñ (1 Ped. 2:17). Feipifiliyiñ, tati che eluucüleafui taiñ allcütuaeteu, femngechi feipiafuiñ chumngechi quelluqueiñmu ñi feipin ta Biblia. Quiñe che feyentunole taiñ feipifiel, iñche quimnien ñi raquiduamcülen pilayaiñ. Raquiduamnge tüfa, quiñe compañ colegio mu feipile: “Pu huedhuedcülelu müten feyentuquei Chau Dios mu”. ¿Pürüm feipiafuimi tañi fentren quimün evolucion mu ti che? Femlai, femngechi feipiafui chi tañi allcütuel mu müten. Fei mandalelafuiñ informacion jw.org mu ñi quimal Chau Dios ñi deumael. Fei pefile, eluhuafui taiñ nütramcayaeteu. Pengelfiliyiñ taiñ yamniefiel, doi eluhuafui ñi quimal Biblia ñi dungu mu. w23.09 pag. 17 parr. 12, 13

Huelulcauliyiñ rume, huelu norümuuliyiñ ca eluuliyiñ Jehová taiñ quelluaeteu, Jehová quellunieaiñmu taiñ femal quisu tañi ayüqueel ca cümelcayaiñmu (Prov. 28:13). Tüfachi troquiñ mu peiñ afmatufalchi dungu ñi femün ta Sansón. Quisu culpan chengefui ca huelulcahui. Huelu fentecünulai ñi serfiniefiel Jehová, huelu Jehová famentulaeyu. Quelluniefi ñi femürpual quisu tañi ayüqueel ca elutufi tañi nehuen tañi niequefel. Jehová cüme troquiniefi ta Sansón tañi feyentulen mu. Fei huirintucucünui tañi üi caquelu huentru ca domo feyentulelu Hebreos capitulo 11 mu. Jehová feipicünui taiñ nehuentucuaeteu, doi mai rupaliyiñ cüdaungechi dungu mu. Tüfa rume yafültucuqueiñmu. Feimu Sansón reque, llellipunieafiyiñ ta Jehová taiñ nehuentucuaeteu (Juec. 16:28). w23.09 pag. 7 parr. 18, 19

Fülcülepalu am Jehová tañi antü eluucüleaiñ taiñ amuldungucheal, femngechi ñi quimal caquelu Jehová ñi cümeque dungu. Huelu quiñeque mu llicaleafuiñ, feimu cüdautuafuiñ taiñ amuldungucheal. Pedro ca llicalefui, feimu feichi pun ta juzgangelu ta Jesús, cüla rupa feipi ñi quimnofiel (Mat. 26:69-75). Huelu rupachi antü mu, Pedro llicahuelai. Feimu feipi: “Ngelai tamün llicanieafiel chem ñi llicalcaeteu caquelu che, fill raquiduamquelayaimün” (1 Ped. 3:14). Pedro reque, iñchiñ ca llicahuelayaiñ. ¿Chem quelluaiñmu taiñ llicanoafiel pu che? Pedro feipi: “Tañi Ñidol ngen ta Cristo, piuque mu yamqueafimün” (1 Ped. 3:15). Feimu llicaleliyiñ, mülei taiñ raquiduamtucunieafiel Jesús taiñ Ñidol ngen ca fente ñi nehuen-ngen. w23.09 pag. 27 parr. 6-8

Iñchiñ mülei taiñ cuñiutucuhual, femngechi connoal “falinochi dungu nüucülelu ta dumiñ meu” (Efes. 5:11). Rüfngei llemai, quiñe che allcütule, adquintuniele cam nütramcafile pod cudumuhun mu, cüdautulayafui tañi conal femngechi dungu mu (Gén. 3:6; Sant. 1:14, 15). Huecüfü afquentu ayüquefui taiñ huelulcayaeteu, femngechi taiñ quimnoal chem ñi cümen ca chem ñi cümenon (Is. 5:20; 2 Cor. 4:4). Fachantü ca felei dungu. Pu poyequenofilu ta Jehová cümelu troquiquefi ti pod cudumuhun, fei ayüquei iñchiñ taiñ ca femngechi raquiduamelaeteu (2 Ped. 2:19). Feimu lle fentren dungu ñi tripaqueel television, internet ca pelicula mu famtuculelqueiñmu Jehová tañi üdequeel. Huecüfü ca ayüfui taiñ raquiduamelaeteu pu pod mongen yenielu ñi huesa tripaquenon ñi mongen mu engün (Efes. 5:6). w24.03 pag. 22 parr. 8-10

Cuifi mu, pu Israel che trahuquefuingün ti ngillatuhue tolto ruca mu, femngechi tañi poyeafiel Jehová ca chalintuculelafiel culliñ (Éx. 29:43-46). Feitachi ngillatuhue tolto ruca pu Israel che miyahulquefuingün cheu rume tañi amun engün huellin mapu mu (Éx. 25:8, 9; Núm. 9:22). Huelu feitachi ngillatuhue tolto ruca, ¿chem adentulefui? Ti ngillatuhue tolto ruca ñi elcünuel Moisés adentulei Jehová ñi adcünuelchi ruca. ¿Chumngelu feipiafuiñ tüfa? Ti apostol Pablo feipi feitachi ngillatuhue tolto ruca “adentulei ca pengelquei huenu mu müleyechi dungu”. Ca “adentulei fantepu müleyechi dungu” (Heb. 9:9). Feimu Pablo huirintuculu tüfa, deu amulcünungei Jehová ñi adcünuelchi ruca. ¿Chumül elcünungei? Feichi 29 tripantu fautizaulu Jesús. ¿Chumngelu feipiyiñ? Feichi mu Jesús ‘hunen lonco sacerdotengerpui’ Jehová ñi adcünuelchi ruca mu (Heb. 4:14; Hech. 10:37, 38). w23.10 pag. 25, 26 parr. 6, 7

Rupaliyiñ cüdaungechi dungu mu, tunte nengümcafeliyiñmu rume, tranrumelayaiñ. ¿Chem quelluaiñmu? Por ejemplo, calerumetule taiñ mongen, iñchiñ eluhuaiñ taiñ cüme chaftuafiel chem dungu rume. Ca respetayafiyiñ chem ñi raquiduamquen ca ñi femquen taiñ pu peñi ca pu lamngen. Iñchiñ taiñ testigongen ayüqueiñ taiñ ngünefalngeal. Ca ayüqueiñ taiñ ñom piuquengeal ca taiñ duamtuafiel caquelu pu che. Biblia feipi Jehová mu ti “Fütra Cura”, rumel nehuentulequei (Deut. 32:4). Nehuencülefulu rume, huelu caletun mu quiñeque dungu, Jehová eluuquei ñi cüme chaftuafiel femngechi ñi femtripayal ñi ayünieel. Cafei quisu huli cümeque ngülam Biblia mu, femngechi taiñ cüme femal. Jehová am ta deumaeteu iñchiñ, feimu ca chaftuafuiñ calerumetule taiñ mongen. w23.07 pag. 20 parr. 1-3

Biblia mu Chau Jehová trürümuuquei quiñe poyen-ngechi ñuque reque (Is. 66:12, 13). Raquiduamnge quiñe ñuque metaniefi tañi pichiche, ñochi dungulelquefi. Ngümale ti pichiche, dapiquefi. Ca femngechi iñchiñ cutrancaucüleliyiñ, maneluhuafuiñ Chau Jehová taiñ cutranpiuqueyenieteu. Huelulcaulu rume iñchiñ, Chau Jehová fentecünuquelai taiñ piuqueyenieteu (Sal. 103:8). Pu Israel che fentren rupa lladcütufi ta Chau Jehová, fei huiño raquiduamtulu engün ca elcünulu tañi huesa femün, ¿chumi Jehová? Quimfalcünulelquefi tañi rumel piuqueyenieafiel. Feipifi engün: “Eimi falin-ngelu cai iñche tañi adquiñ mu, yamfalngeimi, ca iñche piuqueyeyu” (Is. 43:4, 5). Fantepu mu, ca femngechi piuqueyequeiñmeu ta Chau Jehová. Fütra huelulcauliyiñ rume, huiño raquiduamtulu iñchiñ, fei huiñotulu Chau Jehová mu, ngüneduamaiñ taiñ piuqueyenieteu. Fei feipicünui taiñ huiñoduamatuaeteu (Is. 55:7). Biblia feipi taiñ perdonaeteu Chau Jehová füshcüñmaqueiñmeu taiñ piuque (Hech. 3:19). w24.01 pag. 27 parr. 4, 5

Jehová quelluafeiñmu rupaliyiñ cüdaungechi dungu. ¿Chumngechi peafuiñ taiñ rüf quellunieteu Jehová? Nütramcafiliyiñ taiñ ngen cüdau taiñ eluaeteu permiso ñi amual fütra trahun mu cam taiñ trahuluhual fill semana. Femngechi femliyiñ, peaiñ Jehová taiñ rüf quelluqueteu. Afmatuafuiñ ñi doi cüme feletun taiñ dungu. Femngechi doi maneluhuafuiñ Jehová mu. Esdras ñom piuque mu llellipufi ta Chau Jehová tañi quelluaeteu. Cüme duamcülenolu ñi fillque cüdau tañi nieel, llellipufi ta Jehová (Esd. 8:21-23; 9:3-5). Esdras maneluhui Jehová mu. Feimu caquelu judio quellueyu ca inayentuñmaeyu ñi femün (Esd. 10:1-4). Quiñeque mu, fill raquiduamcüleafuiñ taiñ eluafiel taiñ familia chem tañi duamnieel ca tañi cümelcaleal engün, fei ¿chumaiñ? Llellipuqueafiyiñ ta Jehová, fei maneluuqueaiñ taiñ quelluaeteu. w23.11 pag. 18 parr. 15-17

Taiñ nor chengeal Jehová tañi adquiñ mu, ¿mülei taiñ femal com ñi femün ta Abrahán? Feingelai, mülei caquelu cümeque dungu taiñ femal. Cüme llohuafuiñ com pu che amulu taiñ trahun mu, quelluafiyiñ pu peñi, pu lamngen chem ñi duamnieel, ca füreneafiyiñ taiñ pu che. Femliyiñ, Jehová ayüucüleai iñchiñ mu ca cümelcayaiñmu (Rom. 15:7; 1 Tim. 5:4, 8; 1 Juan 3:18). Cafei pengelqueiñ taiñ feyentun amuldungun mu, tüfa rume falin-ngei (1 Tim. 4:16). Com iñchiñ taiñ femquen mu pengelaiñ taiñ feyentulen Chau Jehová mu, ca ñi maneluucülen com ñi feipicünuel Chau Jehová. Femngechi femliyiñ, Jehová nor che piaiñmu ca hueni piaiñmu. w23.12 pag. 2 parr. 3; pag. 6 parr. 15

Ti apostol Pablo feipifi pu Corinto che chem ñi feipin ti texto taiñ ngüneduamal fachantü. Com tati pu huentru cristianongelu inayafi feitachi ngülam, ¿chumngechi femafuingün? Mülei ñi inayafiel engün Chau Dios ñi huercün dungu, ca ñi inayal Biblia ñi ngülam tañi mongen mu (Luc. 2:52). Feimu eimün huecheque peñi, ¿chumngelu fente falin-ngei tamün cüme cristianongeal? Taiñ pu peñi nieingün fentren cüdau tañi familia mu ca ti trahunche mu. Eimi hueche peñi, ¿raquiduampelafuimi tami femürpual falinque cüdau cüpalechi antü mu? Precursorngeafuimi, siervo ministerialngeafuimi cam loncolerpuafuimi trahunche mu. Ca raquiduamafuimi chi tami nieal domo ca nierpual pichiqueche (Efes. 6:4; 1 Tim. 3:1). Cüme cristianongelmi, diturpuafuimi com feitachi dungu. w23.12 pag. 24 parr. 1, 2

Jehová elcünufi tati pu loncolelu ñi cuidayafiel tañi pu che. Tati pu loncolelu falintuniefingün ti cüdau ñi elueteu ta Jehová ñi cuidayafiel tañi pu peñi, pu lamngen. Ca nehuencünuuqueingün tañi cüme cuidayafiel Jehová tañi pu ufisa (Jer. 23:4; 1 Ped. 5:2). Mañumniefiyiñ taiñ pu peñi fente tañi cüme cüdauquen trahunche mu. Pu loncolelu inayentuafui ñi femün ta Gedeón (Heb. 6:12). Gedeón cuñiutucuquefui ca cuidaquefui Jehová ñi troquiñche cuifi mu (Juec. 2:16; 1 Crón. 17:6). Famülque mu ruparupangen mu huesaque dungu, pu loncolelu elfalcünungei ñi cuidayafiel Jehová ñi pu che (Hech. 20:28; 2 Tim. 3:1). Feimu tüfachi troquiñ peafiyiñ ñi femün ta Gedeón. Fei ñom piuquengefui ca inaquefui com tañi feipieteu ta Jehová. Cafei aguantai ñi rupan mu rume huesaque dungu mu. Loncoleliyiñ cam loncolenoliyiñ rume, com iñchiñ mülei taiñ falintuafiel ti cüdau ñi femquen pu loncolelu (Heb. 13:17). w23.06 pag. 2 parr. 1, 3