KUNJAMSA UÑISISIÑAR ATIPJASISPA

1 | Janiw yaqhachasirïñamäkiti

Bibliajj akham siwa:

“Diosajj janiw khitirus yaqhachkiti. Jan ukasti khitinakatï taqe markanakan jupar ajjsartʼapki, kunatï cheqapäki ukarjam lurapki ukanakarojj Diosajj katoqewa” (HECHOS 10:34, 35).

¿Kamsañsa muni?

Jehováa Diosajj janiw yaqha markankirïtasata, yaqha color jañchinïtasata, yaqha costumbrenïtasata juchañchkistuti. Jan ukasti kunjamätansa ukwa uñjistu. Cheqansa “mä jaqejj kuntï nayrapajj uñjki ukakwa uñji, ukampis Jehová Diosajj kunatï chuyman utjki ukwa uñji” (1 Samuel 16:7).

Akwa lurasma:

Janis maynin chuymap uñjkstanjja, Diosat yateqassnawa, jan yaqhachasas yaqhanakar uñjaraksnawa. Mä grupojj kunjamasa uk uñjañat sipansa, sapa maynejj kunjamasa uk uñjañatakiw chʼamachasiñasa. Juman chuymamantï yaqha kasta jañchininakaru, yaqha markankirinakaru yaqhachañajj utjchi ukhajja, uk apsuñatakejj Diosaruw orasiñama (Salmo 139:23, 24). Jehová Diosar yanaptʼa mayisïta ukhajja, jupajj yanaptʼätamwa (1 Pedro 3:12).

a Diosajj Jehová satawa (Salmo 83:18).

“Janipuniw janqʼo jañchini jaqenakampejj ukham sum apasirïkti [...]. Jichhajj oraqpachankir mayachtʼat mä familia taypinkjjtwa” (TITUS).

Experiencia (TITUS)

Janiw uñisirëjjänti

Titus chachajja, yaqha kasta jañchininakaru yaqhachasin leyinak apsupkäna uka contra saytʼiri mä jan wali pandillankänwa. Jupajj akham siwa: “Chʼiyar jañchininakajja, hotelanakana, umañ utanakan janiw suma katoqatäpkänti, ukatwa aleqat ukanakarojj nuwasiñatak sarapjjerïta” sasa. Titus chacharojj uñisiñaw ukanak lurayäna, jupajj akham saskakiwa: “Mä chachampi jan ukajj mä warmimpi toqesirïta ukhajja, nayaw nayraqat nuwantirïta” sasa.

Jehová Diosan Testigonakapampi Bibliat yatjjatañ qalltjjäna ukhaw Titus chachajj cambiañ qalltäna. Bibliat liyiñaw juparojj cambiañapatak wal yanaptʼäna. Jutïrinjja “janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti” siski uka promesaw jukʼampis chuymapar purtʼäna (Apocalipsis 21:3, 4).

Titus chachajj chuymapan uñisiña jan utj-jjañapatakiw chʼamachasïna. Jupajj akham siwa: “Kuntï amuykayäta, kuntï lurkayäta ukanak cambiañajj wali chʼamänwa” sasa. Ukampis Hechos 10:34, 35 texton Diosajj jan yaqhachasirïtap qhanañchki ukaw cambiañatak yanaptʼäna.

¿Qhepat kunas pasäna? Titus chachajj akham siwa: “Jehová Diosan Testigonakapajj kuna kasta jañchinïskpansa, munasiñampiw uñjasipjje, ukaw Diosan cheqpach servirinakapätap amuyañatak yanaptʼawayitu. Janïr bautisatäkayäta ukhaw janqʼo jañchini mä Testigojj manqtʼasiñataki utapar invittʼitäna. Janipuniw janqʼo jañchini jaqenakampejj ukham sum apasirïkti, yamas jupanakampejj janipuniw manqʼerïkti, ukajj janiw creyiñjamäkänti. Jichhajj oraqpachankir mayachtʼat mä familia taypinkjjtwa” sasa.