Зәбур

145 Сәни уҹалдарам, еј Аллаһым, Падшаһым,

Әбәдијјән адына алгыш едәрәм!

 2 Ҝеҹә-ҝүндүз Сәни мәдһ едәрәм,

Әбәдијјән адына алгыш едәрәм!

 3 Јеһова бөјүкдүр, ән ҝөзәл тәрифләрә лајигдир,

Бөјүклүјү ағласығмаздыр.

 4 Нәсилдән-нәслә әмәлләрин тәриф едиләр,

Гүдрәтли ишләрин бәјан едиләр.

 5 Еһтишамындан, әзәмәтиндән данышырлар.

Мән дә харигәли ишләрин үзәриндә дүшүнәрәм.

 6 Һејрәтли ишләриндән* данышырлар,

Мән дә бөјүклүјүнү бәјан едәрәм.

 7 Бол кәрамәтиндән данышанда сөзләри гуртармаз,

Әдаләтиндән өтрү севинҹләри ашыб-дашар.

 8 Јеһова шәфгәтлидир, мәрһәмәтлидир,

Чох сәбирлидир, мәһәббәти бөјүкдүр.

 9 Јеһова һамыја гаршы кәрамәтлидир,

Бүтүн ишләриндә мәрһәмәти ҝөрүнүр.

10 Бүтүн ишләрин Сәни уҹалдар, еј Јеһова,

Садиг бәндәләрин Сәни мәдһ едәр.

11 Падшаһлығынын ҹалалындан данышар,

Гүдрәтин һаггында сөз ачарлар,

ל [Ламед]

12 Инсанлара гүдрәтли ишләрини,

Падшаһлығынын ҹаһ-ҹалалыны танытмаг үчүн.

13 Падшаһлығын әбәди падшаһлыгдыр,

Һакимијјәтин нәсилдән-нәслә давам едәр.

14 Јеһова јыхыланлара дајаг олур,

Гәдди әјиләнләри ајаға галдырыр.

15 Һамысы үмидлә Сәнә бахыр,

Рузиләрини вахтында верирсән.

16 Әлини ачырсан,

Һәр бир мәхлугу истәјинә чатдырырсан.

17 Јеһова бүтүн јолларында әдаләтлидир,

Һәр ишиндә сәдагәтлидир.

18 Јеһова Ону чағыранлара,

Ону сәмими-гәлбдән* чағыранлара јахындыр.

19 Ондан горханлары мурадына чатдырар,

Фәрјадларыны ешидәр, онлары гуртарар.

20 Јеһова Ону севән һәр кәси һифз едир,

Лакин писләрин һамысыны јох едәр.

21 Дилим Јеһованы мәдһ едәр.

Гој бүтүн мәхлугат әбәдијјән Онун мүгәддәс адына алгыш десин!