Ләјагәтли давранышынла Јеһоваја шәрәф ҝәтир
«[Јеһованын] әмәлләриндә иззәти, әзәмәти ҝөрүнүр» (МӘЗ. 111:3).
1, 2. а) «Ләјагәт» сөзүнү неҹә изаһ едәрдиниз? б) Бу мәгаләдә һансы суаллары мүзакирә едәҹәјик?
МҮГӘДДӘС Китаб Аллаһын ләјагәтини уҹалдараг дејир: «Ја Рәбб Аллаһым, Сән нә гәдәр бөјүксән, еһтишамы, әзәмәти ҝејинмисән!» (Мәз. 104:1). Һәвари Павелин сөзләри ҝөстәрир ки, инсанлар да ләјагәтли тәрздә даврана биләрләр. Мәсиһчи гадынларын хариҹи ҝөрүнүшү илә бағлы о дејирди: «Гадынлар да утанҹаглыг вә мөтәдилликлә, әдәбли гијафәтлә өзләрини бәзәсинләр. Сачларыны һөрмәклә, гызыл, мирвари јахуд баһалы палтарла дејил» (1 Тим. 2:9). Анҹаг Јеһованын ‘әзәмәтини вә иззәтини’ уҹалтмаг үчүн ләјагәтли хариҹи ҝөрүнүшдән даһа чох шеј тәләб олунур (Мәз. 111:3).
2 Мүгәддәс Китабда «ләјагәт» мәнасыны верән ибрани сөзү һәм дә «әзәмәт», «еһтишам», «иззәт» вә «шәрәф» кими дә тәрҹүмә олуна биләр. Бир лүғәтә әсасән, «ләјагәт» «шәрәф вә һөрмәт саһиби олмаг вә ја бу кејфијјәтләрин мәҹмусу» демәкдир. Јеһовадан башга һеч ким ән бөјүк шәрәфә вә һөрмәтә лајиг дејил. Буна ҝөрә дә, биз Аллаһын һәср олунмуш хидмәтчиләри кими, ләјагәтли данышығымыз вә давранышымызла Она шәрәф ҝәтирмәлијик. Бәс нә үчүн инсанларын ләјагәтлә давранмасы мүмкүндүр? Јеһованын ләјагәти вә әзәмәти өзүнү неҹә бүрузә верир? Аллаһын әзәмәти бизә неҹә тәсир ҝөстәрмәлидир? Бу кејфијјәти тәзаһүр етдирмәкдә Иса Мәсиһдән нә өјрәнә биләрик? Аллаһа мәгбул ләјагәти неҹә тәзаһүр етдирә биләрик?
Ләјагәтлә давранмаг нә үчүн мүмкүндүр?
3, 4. а) Ләјагәтимизә ҝөстәрилән һөрмәтә неҹә ҹаваб вермәлијик? б) Мәзмур 8:5-9 ајәләриндә кимин һаггында пејғәмбәрлик едилмишдир? (Һашијәјә бах.) в) Јеһова кечмишдә кимләри шәрәфләндирмишдир?
3 Аллаһын сурәтиндә јарадылдыглары үчүн, бүтүн инсанлар ләјагәтлә давранмаг игтидарындадырлар. Јеһова илк инсана јерин гајғысына галмағы тапшырмагла ону шәрәфләндирди (Јар. 1:26, 27). Һәтта инсан камиллијини итирдикдән сонра да, Јеһова онун јерлә бағлы мәсулијјәт дашыдығыны јенидән билдирди. Беләликлә, Аллаһ һәлә дә һөрмәт вә иззәт ‘таҹыны’ инсанларын башына гојур. (Мәзмур 8:5-9 ајәләрини оху.)a Ләјагәтимизә ҝөстәрилән һөрмәт ләјагәтли ҹаваб — Јеһованын әзәмәтли адына һөрмәт вә еһтирамла һәмд етмәји тәләб едир.
4 Јеһова хүсусилә дә Она мүгәддәс хидмәти иҹра едәнләри шәрәфләндирир. Аллаһ Габилин гурбаныны рәдд едиб, Һабилинкини исә гәбул етмәклә ону шәрәфләндирди (Јар. 4:4, 5). Мусаја өзүндән сонра Исраилин рәһбәри олаҹаг Јешуанын ‘үзәринә өз шәрәфиндән гојмағы’ тапшырды (Сај. 27:20). Давудун оғлу Сүлејман һаггында Мүгәддәс Китабда дејилир: «Рәбб Сүлејманы бүтүн Исраиллиләрин ҝөзүндә чох уҹалтды вә өзүндән әввәл Исраилдә һеч бир падшаһын малик олмадығы падшаһлыг әзәмәтини она верди» (1 Салн. 29:25). Аллаһ Онун «Падшаһлығынын... әзәмәтини» сәдагәтлә бәјан етмиш дирилән мәсһ олунмушлары хүсуси шәрәфә лајиг ҝөрәҹәк (Мәз. 145:11-13). Исанын ҝет-ҝедә артан ‘башга гојунлары’ да Јеһованы бу ҹүр уҹалтмагла хејир-дуаја вә шәрәфә лајиг ҝөрүлмүшләр (Јәһ. 10:16).
Јеһованын әзәмәти вә еһтишамы ачыгҹа ҝөрүнүр
5. Јеһова нә дәрәҹәдә әзәмәтлидир?
5 Аллаһын бөјүклүјү илә инсанын кичиклији арасындакы тәзады ҝөстәрән илаһисиндә мәзмурчу Давуд охујурду: «Еј Худавәндимиз Рәбб, исмин бүтүн јер үзәриндә нә гәдәр әзәмәтлидир! Еһтишамын ҝөјләрә галхыр!» (Мәз. 8:1). ‘Ҝөјләр вә јер’ јаранмамышдан Аллаһын јери ҹәннәтә чевирмәк вә бәшәр аиләсини камиллијә јетирмәк нијјәтинин һәјата кечмәсинә гәдәр, јәни әзәлдән әбәдијјәтә гәдәр Јеһова Аллаһ каинатда ән әзәмәтли вә уҹа Шәхсијјәт олараг галмагдадыр (Јар. 1:1; 1 Кор. 15:24-28; Вәһј 21:1-5).
6. Мәзмурчу нәјә ҝөрә Јеһованын әзәмәти ҝејиндијини сөјләмишдир?
6 Сајрышан «ҹәваһирләрин» сәпәләндији улдузлу ҝеҹәләрин сәссиз-сәмирсиз әзәмәтини сејр етмәк Аллаһдан горхан мәзмурчунун үрәјини неҹә дә риггәтә ҝәтирмишди! Аллаһын ҝөјләри чадыр тәк ачмасындан һејрәтә ҝәлән мәзмурчу Јеһованы мөһтәшәм јарадыҹылыг баҹарығына ҝөрә ‘әзәмәти ҝејинмиш’ кими тәсвир едир. (Мәзмур 104:1, 2 ајәләрини оху.) Ҝөзәҝөрүнмәз Күлли-Ихтијар Јараданын әзәмәти вә еһтишамы ҝөрүнән ишләриндә өзүнү ачыгҹа бүрузә верир.
7, 8. Јеһованын әзәмәт вә еһтишамы ҝөјләрдә неҹә тәзаһүр олунур?
7 Мәсәлән, ҝөтүрәк Сүд Јолу галактикасыны. Улдузлардан, планетләрдән, ҝүнәш системләриндән ибарәт бу нәһәнҝ океанда Јер күрәси өлчүсүнә ҝөрә уҹсуз-буҹагсыз саһилдәки бир гум дәнәси гәдәр кичик ҝөрүнүр. Тәсәввүр ет, тәкҹә бу галактикада 100 милјарддан чох улдуз вар! Әҝәр сән 24 саат әрзиндә дајанмадан санијәдә бир улдуз саја билсәјдин, 100 милјарда гәдәр сајмаг үчүн 3 000 илдән чох вахт тәләб олунарды.
8 Әҝәр тәкҹә Сүд Јолу галактикасында 100 милјард улдуз варса, бәс онда уҹсуз-буҹагсыз каинат һаггында нә демәк олар? Астрономларын зәннинҹә, Сүд Јолу галактикасы, сајы 50 милјарддан 125 милјарда гәдәр олан галактикалардан јалныз биридир. Бәс бу сонсуз каинатда нә гәдәр улдуз вар? Сөзсүз ки, ҹаваб ағласығмаздыр. Анҹаг Јеһова «улдузларын сајыны һесаблар, һәр бирини өз ады илә чағырар» (Мәз. 147:4). Јеһованын белә әзәмәт вә еһтишамы ҝејиндијини ҝөрмәк Онун бөјүк адыны уҹалтмаға сәни тәшвиг етмирми?
9, 10. Чөрәк Јараданын мүдриклијини неҹә уҹалдыр?
9 Инди исә ҝәлин мөһтәшәм сәмадан диггәтимизи ади чөрәјә јөнәлдәк. Јеһова јалныз «ҝөјләри, јери... јарадан» јох, һәмчинин ‘аҹлары азугә илә дојдуран’ Аллаһдыр (Мәз. 146:6, 7). Аллаһын ‘иззәти вә әзәмәти’, чөрәјин һазырландығы биткиләри јетирмәк дә дахил олмагла, Онун бөјүк ишләриндә әкс олунур. (Мәзмур 111:1-5 ајәләрини оху.) Иса давамчыларына белә дуа етмәји өјрәдирди: «Ҝүндәлик чөрәјимизи бизә бу ҝүн вер» (Мат. 6:11). Исраиллиләр дә дахил олмагла, бир чох гәдим халгларын сүфрәсиндә чөрәк әсас гида мәһсулу иди. Чөрәк ади гида мәһсулу һесаб олунса да, онун тәркибиндәкиләри дадлы чөрәјә чевирән кимјәви просеси һеч дә ади адландырмаг олмаз.
10 Мүгәддәс Китабын јазылдығы дөврләрдә исраиллиләр чөрәк биширмәк үчүн буғда вә ја арпа унундан вә судан истифадә едирдиләр. Һәрдән хәмирә маја да гатырдылар. Бу садә маддәләр бирләшәрәк бир-бирилә фәал сурәтдә әлагәдә олан һејрәтамиз сајда кимјәви бирләшмәләр әмәлә ҝәтирир. Бу бирләшмәләр арасындакы дәгиг әлагә ахырадәк баша дүшүлмүр. Үстәлик, чөрәјин организмдә һәзм олунмасы башга бир һејрәтамиз мүрәккәб просесдир. Тәәҹҹүблү дејил ки, мәзмурчу охујурду: «Ја Рәбб, әмәлләрин чохдур! Һәр бирини мүдрикликлә етмисән»! (Мәз. 104:24). Сән дә Јеһоваја һәмд етмәјә тәшвиг олунурсанмы?
Аллаһын әзәмәти вә еһтишамы сәнә неҹә тәсир ҝөстәрир?
11, 12. Аллаһын јарадыҹы ишләри үзәриндә дүшүнмәк бизә неҹә тәсир едә биләр?
11 Ҝеҹә улдузлу сәмаја мәфтун олмаг үчүн астроном, јахуд чөрәкдән һәзз алмаг үчүн кимјачы олмаг ҝәрәк дејил. Анҹаг Јараданын еһтишамыны баша дүшмәк үчүн Онун әл ишләри үзәриндә дүшүнмәјә вахт ајырмаг лазымдыр. Белә дүшүнмәјин сајәсиндә нә әлдә едә биләрик? Јеһованын башга ишләри үзәриндә дүшүнмәк бизә неҹә тәсир едирсә, бу ишләри үзәриндә дүшүнмәк дә ејни ҹүр тәсир едир.
12 Јеһованын Өз халгы үчүн етдији бөјүк ишләринә даир Давуд охујурду: «Әзәмәтиндән, иззәтиндән, шәрәфиндән дејиләҹәк, харигәли ишләрини дәриндән дүшүнәҹәјәм» (Мәз. 145:5). Биз Мүгәддәс Китабы өјрәнмәклә вә охудугларымызын үзәриндә дүшүнмәјә вахт ајырмагла һәмин ишләрлә марагландығымызы ҝөстәририк. Белә дүшүнмәк бизә неҹә тәсир ҝөстәрир? Аллаһын әзәмәтини вә еһтишамыны даһа дәриндән баша дүшүрүк. Сөзсүз ки, белә олан һалда биз дә Давуда гошулараг Јеһоваја шәрәф ҝәтирир вә дејирик: «Сәнин әзәмәтини елан едәҹәјәм» (Мәз. 145:6). Аллаһын мөһтәшәм ишләри үзәриндә дүшүнмәк Јеһова илә мүнасибәтләримизи мөһкәмләндирмәли вә Онун һаггында башгаларына һәвәслә вә гәтијјәтлә данышмаға бизи тәшвиг етмәлидир. Сән дә сәјлә хош хәбәри тәблиғ едир вә инсанлара Јеһова Аллаһын әзәмәтини, еһтишамыны вә иззәтини дәрк етмәјә көмәк едирсәнми?
Иса Аллаһын әзәмәтини мүкәммәл сурәтдә әкс етдирир
13. а) Даниел 7:13, 14 ајәләринә әсасән, Јеһова Өз Оғлуна нә бәхш едиб? б) Иса бир Падшаһ кими тәбәәләри илә неҹә рәфтар едир?
13 Аллаһын Оғлу Иса Мәсиһ хош хәбәри сәјлә тәблиғ едир, әзәмәтли вә еһтишамлы сәмави Атасына шәрәф ҝәтирирди. Јеһова Өз ваһид Оғлуна ‘һакимијјәт вә падшаһлығы’ вермәклә ону хүсуси шәрәфә лајиг ҝөрмүшдүр. (Даниел 7:13, 14 ајәләрини оху.) Бунунла белә, Иса ловға вә ја өзүндән разы дејил. Әксинә, о, тәбәәләринин имканларынын мәһдуд олдуғуну баша дүшән вә онларын ләјагәтинә һөрмәт едән мәрһәмәтли Рәһбәрдир. Тәјин олунмуш Падшаһ кими Исанын гаршылашдығы инсанларла, хүсусилә дә башгалары тәрәфиндән рәдд едилән вә севилмәјән кәсләрлә неҹә рәфтар етдијинә даир бир нүмунәјә бахаг.
14. Гәдим Исраилдә ҹүзамлылара неҹә јанашырдылар?
14 Гәдимдә ҹүзама тутулмуш инсанлар чох вахт јаваш-јаваш, әзабла өлүрдүләр. Тәдриҹән хәстәлик бүтүн бәдәнә јајылырды. Ҹүзамы сағалтмаг, өлүнү дирилтмәк кими гејри-мүмкүн бир шеј һесаб едилирди (Сај. 12:12; 2 Пад. 5:7, 14). Ҹүзама тутулмуш адамлар натәмиз елан олунур, ҹәмијјәт ичиндән говулурду, һамы онлара һәгарәтлә јанашырды. Адамлара јахынлашанда онлар: «Мурдарам! Мурдарам!» — дејә гышгырмалы идиләр (Лев. 13:43-46). Ҹүзамлы адам өлүјә бәрабәр һесаб едилирди. Раввин јазыларына әсасән, ҹүзамлы адамын башгасына јалныз тәхминән 1,7 метрә гәдәр јахынлашмасына изин верилирди. Дејиләнә ҝөрә, ҹүзамлы адам, һәтта узагдан ҝөрүнәндә дә, бир дин рәһбәри она даш атырмыш ки, јахына ҝәлмәсин.
15. Иса ҹүзамлы илә неҹә рәфтар етди?
15 Анҹаг Исанын она јахынлашан вә сағалдылмасыны хаһиш едән ҹүзамлыја мүнасибәти диггәтәлајигдир. (Марк 1:40-42 ајәләрини оху.) Иса ҹүзамлыны јанындан говмады, әксинә, һамы тәрәфиндән рәдд едилән бу адамла мәрһәмәтлә вә һөрмәтлә рәфтар етди. Исанын ҝөзүндә о, имдад диләјән јазыг бир адам иди. Шәфгәт һисси, үрәји риггәтә ҝәлән Исаны дәрһал көмәк етмәјә тәшвиг етди. О, әлини узадыб ҹүзамлыја тохунду вә ону сағалтды.
16. Исанын инсанларла рәфтарындан нә өјрәнирик?
16 Биз мәсиһчиләр Исанын өз Атасынын әзәмәтини әкс етдирмәсини неҹә тәглид едә биләрик? Мөвгејиндән, сағламлығындан вә ја јашындан асылы олмајараг, һамынын һөрмәт вә еһтирама лајиг олдуғуну гәбул етмәк лазымдыр (1 Пет. 2:17). Хүсусилә дә мәсулијјәт дашыјанлар, мәсәлән, әрләр, валидејнләр вә мәсиһчи ағсаггаллар гајғыларына галдыглары адамларын ләјагәтинә һөрмәт етмәли вә онларын өзүнәһөрмәт һиссини горумаларына көмәк етмәлидирләр. Бунун бүтүн мәсиһчиләр үчүн тәләб олдуғуну вурғулајараг Мүгәддәс Китаб дејир: «Гардашлыг севҝиси илә бир-биринизи шәфгәтлә севин; бир-биринизи һөрмәтдә габаглајын» (Ром. 12:10).
Ибадәт едәркән ләјагәтли давраныш
17. Јеһоваја ибадәт едәркән ләјагәтли давранмаг һаггында Мүгәддәс Јазылардан нә өјрәнә биләрик?
17 Ләјагәтли давранмаг хүсусилә дә Јеһоваја ибадәт едәркән ваҹибдир. Ваиз 5:1 ајәсиндә дејилир: «Аллаһын евинә ҝетдијин заман һәрәкәтләринә диггәт ет». Һәм Мусаја, һәм дә Јешуаја мүгәддәс јердә дајанаркән чарыгларыны чыхармаг әмр олунмушду (Чых. 3:5; Јешуа 5:15). Онлар буну һөрмәт вә еһтирам әламәти олараг етмәли идиләр. Исраил каһинләри ‘лүт бәдәнләрини өртмәк’ үчүн кәтан алт палтары ҝејинмәли идиләр (Чых. 28:42, 43). Бунун сајәсиндә, онлар гурбанҝаһда хидмәт едәркән ајыб јерләри ҝөрүнмүрдү. Каһинин аиләсинин һәр бир үзвү Аллаһын ләјагәтлә бағлы нормаларына риајәт етмәли иди.
18. Јеһоваја хидмәтдә ләјагәтли давраныш өзүнү нәдә бүрузә верир?
18 Ибадәт едәркән ләјагәтли давраныша һөрмәт вә еһтирам да дахилдир. Һөрмәт вә еһтирама лајиг олмаг үчүн өзүмүз һөрмәтҹил давранмалыјыг. Ләјагәтли давраныш ријакарҹасына вә ја сүни олмамалыдыр. Ләјагәтли давраныш заһири дејил, Аллаһын ҝөрдүјү үрәкдән ҝәлән бир шеј олмалыдыр (1 Шам. 16:7; Сүл. мәс. 21:2). Ләјагәт бизим бир һиссәмиз олмалы, давранышымыза, әһвал-руһијјәмизә, башгалары илә мүнасибәтимизә, һәтта өзүмүзә олан бахышымыза вә фикирләримизә тәсир етмәлидир. Доғрудан да, ләјагәт һәр заман, һәр сөзүмүздә вә әмәлимиздә өзүнү бүрузә вермәлидир. Давраныша, өзүнү апарма гајдасына, ҝејимә вә косметикаја ҝәлдикдә, биз һәвари Павелин сөзләринә ҹидди јанашырыг: «Һеч бир шәкилдә кимсәнин бүдрәмәсинә сәбәб олмадыг ки, хидмәтимиз етибардан дүшмәсин. Лакин һәр шејдә өзүмүзү Аллаһын хидмәткарлары кими тәгдим едирик» (2 Кор. 6:3, 4). Биз ‘һәр ҹәһәтҹә Хиласкарымыз Аллаһын тәлимини ҹазибәли едирик’ (Тит. 2:10).
Ләјагәтли давранышынла Аллаһы разы сал
19, 20. а) Инсанларын ләјагәтинә һөрмәт етмәјин ән јахшы үсулу һансыдыр? б) Биз нәјә гәти гәрарлы олмалыјыг?
19 ‘Мәсиһин сәфирләри’ олан мәсһ олунмуш мәсиһчиләр ләјагәтлә давранырлар (2 Кор. 5:20). Онлара сәдагәтлә көмәк едән ‘башга гојунлар’ Аллаһын Падшаһлығынын нүмајәндәләри олмаг шәрәфинә лајиг ҝөрүлүрләр. Һәм сәфир, һәм дә нүмајәндә өз дөвләтинин хејринә ҹәсарәт вә ләјагәтлә данышыр. Буна ҝөрә дә биз ләјагәтлә вә ҹәсарәтлә Аллаһын Падшаһлығынын леһинә данышмалыјыг (Ефес. 6:19, 20). Мәҝәр инсанлара «хош мүждә» ҝәтирәндә онларла ләјагәтлә давранмыш олмуругму? (Јешаја 52:7).
20 Биз Аллаһын әзәмәтинә лајиг давранараг Она иззәт ҝәтирмәјә гәти гәрарлы олмалыјыг (1 Пет. 2:12). Ҝәлин һәмишә Јеһоваја, ибадәтимизә, һәмчинин һәмиманлыларымыза дәрин һөрмәтлә јанашаг. Гој әзәмәти вә еһтишамы ҝејинән Јеһова ләјагәтли тәрздә иҹра етдијимиз ибадәтдән разы галсын.
[Һашијә]
a Давудун 8-ҹи мәзмурда јаздыглары һәм дә камил инсан Иса Мәсиһ һаггында пејғәмбәрлик иди (Ибр. 2:5-9).
Неҹә ҹаваб верәрдиниз?
• Јеһованын әзәмәтинин еһтишамыны баша дүшмәк бизә неҹә тәсир етмәлидир?
• Исанын ҹүзамлыја мүнасибәтиндән башгаларынын ләјагәтинә һөрмәт етмәк барәдә нә өјрәнә биләрик?
• Јеһоваја ләјагәтли тәрздә неҹә шәрәф ҝәтирә биләрик?
[12-ҹи сәһифәдәки шәкил]
Јеһова Һабили неҹә шәрәфләндирди?
[14-ҹү сәһифәдәки шәкил]
Јеһованын бөјүк ишләри һәтта чөрәкдә дә тәзаһүр олунур
[15-ҹи сәһифәдәки шәкил]
Исанын ҹүзамлы илә рәфтарындан башгаларынын ләјагәтинә һөрмәт етмәк барәдә нә өјрәндиниз?
[16-ҹы сәһифәдәки шәкил]
Ләјагәтлә ибадәт етмәк Јеһоваја шәрәф ҝәтирмәји өзүнә дахил едир