“О... сизә јахынлашар”

“[Аллаһ] һеч биримиздән узаг дејил” (ҺӘВАРИЛӘРИН ИШЛӘРИ 17:27).

1, 2. а) Улдузлу сәманы сејр етдикдә Јарадан һаггында биздә һансы суал јарана биләр? б) Мүгәддәс Китаб, Јеһованын ҝөзүндә инсанларын әһәмијјәтсиз олмадығына бизи неҹә әмин едир?

АЈДЫН ҝеҹәдә улдузлу сәманы һеч сејр етмисәнми? Бу мәнзәрә сәни валеһ едибми? Сајсыз-һесабсыз улдузлар вә космик фәзанын әнҝинлији инсанда еһтирам һисси ојадыр. Бу бөјүк Каинатда Јер күрәси кичик бир нөгтәни тәшкил едир. Бу, “јер үзәриндә һәр шејдән Уҹа олан” Јараданын инсанлар үчүн әлчатмаз вә ағласығмаз дәрәҹәдә јүксәк олдуғунуму билдирир? (Мәзмур 83:18).

² Мүгәддәс Китаб бизи әмин едир ки, Јеһованын ҝөзүндә инсанлар һеч дә әһәмијјәтсиз дејилләр. Бундан әлавә, Аллаһын Кәламы “О, һеч биримиздән узаг дејил” дејә, бизи Аллаһы ахтармаға тәшвиг едир (Һәвариләрин ишләри 17:27; 1 Тарихләр 28:9). Бәли, әҝәр биз Аллаһа јахынлашмаг үчүн аддымлар атырыгса, О да бизә доғру аддым атаҹагдыр. Неҹә? Бу суала севиндириҹи ҹавабы 2003-ҹү илин иллик ајәсиндә тапырыг: “О... сизә јахынлашар” (Јагуб 4:8). Ҝәлин, Јеһованын Она јахын олан кәсләрә вердији ҝөзәл хејир-дуаларын бир нечәсини мүзакирә едәк.

Јеһованын хүсуси бәхшиши

3. Јеһова Она јахынлашан кәсләрә һансы бәхшиши верир?

³ Биринҹиси, Јеһованын хидмәтчиләри Онун өз халгы үчүн нәзәрдә тутдуғу хүсуси бәхшишә саһибдирләр. Дүнјада мөвҹуд олан һәр һансы бир һакимијјәт, вар-дөвләт вә тәһсил васитәсилә бу бәхшишә наил олмаг гејри-мүмкүндүр. Бу, хүсуси бәхшишдир вә Јеһова буну, анҹаг Она јахын олан кәсләрә верир. Бу бәхшиш нәдир? Аллаһын Кәламы ҹаваб верир: “Әҝәр... анлајыша сәсини јүксәлдәрсәнсә; әҝәр ҝүмүш ахтарар кими ону ахтарар вә хәзинәләр [“ҝизләдилмиш хәзинәләр”, ЈД] арашдырар кими ону арашдырарсанса; Рәбб горхусуну о заман анлајаҹагсан вә Аллаһ билијини тапаҹагсан. Чүнки Рәбб һикмәт верир” (Сүлејманын мәсәлләри 2:3-6). Тәсәввүр един: гејри-камил инсанлар “Аллаһ билијини” тапа биләрләр! Бу бәхшиш, јә’ни Аллаһын Кәламындакы билик “ҝизләдилмиш хәзинәләр” илә мүгајисә едилир. Нәјә ҝөрә?

4, 5. “Аллаһ билији” нәјә ҝөрә “ҝизләдилмиш хәзинәләр” илә мүгајисә едилир? Нүмунә ҝәтирин.

⁴ Илк нөвбәдә, Аллаһ һаггындакы билик олдугҹа дәјәрлидир. Онун ҝәтирдији ән бөјүк хејир-дуалардан бири, әбәди һәјата олан үмиддир (Јәһ­ја 17:3). Лакин бу билик һәјатымызы артыг индидән зәнҝинләшдирир. Мәсәлән, Аллаһын Кәламыны диггәтлә тәдгиг етмәјин сајәсиндә биз бу ваҹиб суалларын ҹавабыны тапмышыг: Аллаһын ады нәдир? (Мәзмур 83:18, ЈД). Өләнләр әслиндә һансы вәзијјәтдәдирләр? (Ваиз 9:5, 10). Аллаһын Јер үзүнә вә бәшәријјәтә аид олан нијјәти нәдән ибарәтдир? (Ишаја 45:18). Бундан башга, биз һәјатда Мүгәддәс Китабын мәсләһәтләринә риајәт етмәк кими ән ҝөзәл јолу тапмышыг (Ишаја 30:20, 21; 48:17, 18). Беләликлә, ҝүндәлик гајғыларын өһдәсиндән ҝәлмәк үчүн, һәмчинин һәгиги хошбәхтлик вә мәмнунлуг ҝәтирән һәјат тәрзи сүрмәк үчүн бизә көмәк едән е’тибарлы рәһбәрлијимиз вар. Ән башлыҹасы исә, Аллаһын Кәламыны өјрәнмәк бизә Јеһованын ҝөзәл хүсусијјәтләри илә таныш олмаға вә Она јахынлашмаға көмәк етмишдир. Ахы “Аллаһ билији” әсасында Јеһова илә јаранан сых мүнасибәтдән дәјәрли нә ола биләр?

⁵ Аллаһ һаггындакы билији “ҝизләдилмиш хәзинәләр” илә мүгајисә етмәк үчүн даһа бир сәбәбимиз вар. Бу хәзинәләр дүнјадакы башга хәзинәләр кими надирдир. Јер үзүндә јашајан алты милјард сакиндән ҹәми алты милјона јахын инсан Јеһоваја ибадәт едир, јә’ни тәхминән мин нәфәрдән бири “Аллаһ билијини” тапмышдыр. Бу хәзинәнин, јә’ни Аллаһын Кәламындакы һәгигәт билијинин надирлијини тәсвир етмәк үчүн Мүгәддәс Китабдан ҹәми бир суалы ҝөтүрәк: Инсан өләндә нә баш верир? Мүгәддәс Јазылардан билирик ки, ҹан өлүр вә өлүләр шүурсуз вәзијјәтдәдирләр (Һезекиел 18:4). Дүнјанын әксәр динләри исә белә бир јалан тәсәввүрә маликдирләр ки, ҝуја өлүмдән сонра инсанын дахилиндә нә исә јашамаға давам едир. Бу, Христиан дүнјасына мәнсуб олан динләрин әсас тә’лимләриндән биридир. Бу тә’лим һәмчинин буддизм, ҹајнизм, даосизм, һиндуизм, ислам, сигһизм, синтоизм вә јәһуди дининдә дә үстүнлүк тәшкил едир. Бир анлыға тәсәввүрүнүзә ҝәтирин: бу јалан тә’лимлә милјардларла инсанлар алдадылыб!

6, 7. а) “Аллаһ билијини” јалныз кимләр тапа биләр? б) Һансы нүмунәдән ҝөрмәк олар ки, бир чох ‘мүдрикләрин вә ағыллыларын’ нәзәриндән јајынан һәгигәтләри анламагда Јеһова бизә хејир-дуа верир?

⁶ “Аллаһ билијини” нә үчүн бу гәдәр аз адам тапыб? Чүнки Аллаһын көмәји олмадан Онун Кәламынын мә’насыны там дәрк етмәк мүмкүн дејил. Унутмајаг ки, бу билик бәхшишдир. Јеһова бу бәхшиши јалныз Онун Кәламыны виҹданла вә тәвазөкарлыгла тәдгиг етмәјә һазыр олан кәсләрә верир. Бу инсанлар “ҹисмани нөгтеји-нәзәрдән мүдрик” олмаја биләрләр (1 Коринфлиләрә 1:26). Онларын әксәријјәти бу дүнјанын нөгтеји-нәзәриндән, һәтта “охумамыш, авам адамлар” сајыла биләр (Һәвариләрин ишләри 4:13). Лакин бу һеч бир әһәмијјәт кәсб етмир. Үрәјимиздә ҝөрдүјү хүсусијјәтләрә ҝөрә Јеһова бизи “Аллаһ билији” илә мүкафатландырыр.

⁷ Белә бир нүмунәни ҝөтүрәк. Христиан дүн­ја­сы­нын бир чох илаһијјатчылары Мүгәддәс Китаба даир ҝениш шәрһләр тәртиб етмишләр. Бу арајыш ишләриндә Мүгәддәс Китаб һадисәләринин тарихи шәраити һаггында бәһс едилир, гәдим ибрани вә јунан сөзләринин мә’насы изаһ олунур вә саирә. Бәс һәмин илаһијјатчылар бүтүн бу мә’луматлары әлдә едәрәк “Аллаһ билијини” тапмышлармы? Онлар Мүгәддәс Китабын әсас мөвзусуну — Јеһованын өз һакимијјәтинә сәмави Падшаһлығын васитәсилә бәраәт газандыраҹағыны ајдын шәкилдә баша дүшүрләрми? Онлар Јеһова Аллаһын Үч үгнумун бир һиссәси олмадығыны билирләрми? Биз исә бу суалларын дәгиг анлајышына саһибик. Һарадан? Бир чох ‘мүдрикләрин вә ағыллыларын’ нәзәриндән јајынан руһани һәгигәтләри анламагда бизә Јеһова көмәк едир (Матта 11:25). Јеһова Она јахын олан кәсләрә неҹә дә хејир-дуа верир!

“Рәбб Ону севәнләрин һамысыны горујар”

8, 9. а) Давуд Јеһоваја јахын олан кәсләрин фајдаландығы башга бир хејир-дуаны неҹә тәсвир едир? б) Нәјә ҝөрә мәсиһчиләр Аллаһын мүдафиәсинә мөһтаҹдырлар?

⁸ Јеһоваја јахын олан кәсләр даһа бир хејир-дуадан — Онун мүдафиәсиндән фајдаланырлар. Башы бир чох бәлалар чәкмиш мәзмурчу Давуд јазырды: “Рәбб ону чағыранларын һамысына јахындыр, онлар ки, ону һәгигәтлә чағырырлар. Ондан горханларын диләјини јеринә јетирәр; вә фәрјадларыны ешидәр вә онлары гуртарар. Рәбб Ону севәнләрин һамысыны горујар” (Мәзмур 145:18-20). Бәли, Јеһова Ону севәнләрә јахындыр, буна ҝөрә дә онларын көмәк үчүн етдикләри мүраҹиәтләрә дәрһал һај верә билир.

⁹ Биз нә үчүн Аллаһын мүдафиәсинә мөһтаҹыг? Мәсиһчиләр “ахыр ҝүнләрдә чәтин анлар”ын тә’сирини һисс етмәклә бәрабәр, Јеһованын илк дүшмәни Шејтан Иблис үчүн әсас һәдәфдирләр (2 Тимотејә 3:1). Бу мәкрли дүшмән бизи “ашырмаг үчүн” вар гүввәси илә чалышыр (1 Петер 5:8). Шејтан бизи тә’гиб едир, сынаға чәкир вә бизә тәзјиг ҝөстәрир. О, һәмчинин дүшүнҹә тәрзимиздә вә үрәјимиздә елә бир әһвал-руһијјә ахтарыр ки, ондан истифадә едә билсин. Онун мәгсәди — иманымызы зәифләтмәк вә бизи руһани ҹәһәтдән мәһв етмәкдир (Вәһј 12:12, 17). Белә бир ҝүҹлү дүшмәнлә мүбаризә апармалы олдуғумуз үчүн, мәҝәр ‘Рәббин Ону севәнләрин һамысыны горудуғуну’ билмәк бизә тәсәлли вермирми?

10. а) Јеһова өз халгыны неҹә горујур? б) Һансы мүдафиә даһа ваҹиб һесаб едилир вә нәјә ҝөрә?

¹⁰ Јеһова өз халгыны неҹә горујур? Онун бизи мүдафиә едәҹәјинә даир вердији вә’д, бизим бу дүнјада проблемсиз јашајаҹағымыза зәманәт вермир вә бизим хәтримизә мө’ҹүзәләр ҝөстәрмәји дә Онун өһдәсинә гојмур. Бунунла белә, Јеһова үмуми олараг өз халгынын физики мүдафиәсини тә’мин едир. Нә олурса-олсун, Иблисә имкан верилмәјәҹәк ки, Аллаһын һәгиги ибадәтчиләрини јер үзүндән силсин! (2 Петер 2:9). Ән ваҹиби исә одур ки, Јеһова бизи руһани ҹәһәтдән мүдафиә едир. Сынаглара таб ҝәтириб, Онунла олан мүнасибәтләримизи горумаг үчүн О, бизи лазым олан һәр шејлә тә’мин едир. Нәтиҹәдә, руһани мүдафиә даһа ваҹиб мүдафиә олур. Нәјә ҝөрә? Нә гәдәр ки, Јеһова илә мүнасибәтимиз вар, һеч нә, һәтта өлүм белә бизә сағалмаз јара вура билмәјәҹәкдир (Матта 10:28).

11. Јеһова халгынын руһани мүдафиәси үчүн нә едир?

¹¹ Јеһова Она јахын олан кәсләрин руһани мүдафиәси үчүн чох шеј едир. Мүхтәлиф сынагларын өһдәсиндән ҝәлмәјимиз үчүн, Өз Кәламынын, Мүгәддәс Китабын васитәсилә бизә лазым олан мүдриклији верир (Јагуб 1:2-5). Мүгәддәс Јазыларын практики мәсләһәтләринә риајәт етмәк артыг мүдафиә кими хидмәт едир. Үстәлик, Јеһова “Ондан диләјәнләрә мүгәддәс руһу” пај верир (Лука 11:13). Каинатда ән гүдрәтли гүввә олан бу руһ, шүбһәсиз ки, һәр ҹүр сынаг вә тәзјигләрин өһдәсиндән мүвәффәгијјәтлә ҝәлә билмәјимиз үчүн бизи тәҹһиз едә биләр. Јеһова Мәсиһин васитәсилә “инсанлар тимсалында һәдијјәләр” верир (Ефеслиләрә 4:8, ЈД). Руһән тәҹһиз едилмиш бу кишиләр һәмиманлыларына көмәк едәрәк, Јеһованын бөјүк шәфгәтини әкс етдирмәјә чалышырлар (Јагуб 5:14, 15).

12, 13. а) Јеһова бизи руһани гида илә вахтлы-вахтында неҹә тә’мин едир? б) Руһани рифаһымыз үчүн Јеһованын вердикләринә неҹә јанашырсан?

¹² Бизим мүдафиәмиз үчүн Јеһова даһа бир тәдбир ҝөрүб. О, бизә вахтлы-вахтында руһани гида верир (Матта 24:45). Чап олунмуш нәшрләрин, о ҹүмләдән “Ҝөзәтчи Гүлләси” вә “Ојанын!” журналларынын, һәмчинин јығынҹаг вә конгрес ҝөрүшләринин васитәсилә Јеһова бизә еһтијаҹ дујдуғумуз шејләри лазым олан вахтда верир. Мәсиһчи ҝөрүшләриндә вә ја конгресләрдә ешитдикләринин үрәјинә јатдығы, сәни мөһкәмләндирдији, јахуд тәсәлли вердији һаллар олубму? Бәс журналларымыздан бириндә охудуғун һансыса мәгалә һаггында “бу мәһз мәним үчүн јазылыб” дејә, дүшүндүјүн һаллар неҹә, олубму?

¹³ Шејтанын ән тә’сирли силаһларындан бири мә’јуслугдур вә һеч биримиз бу тә’сирдән мүһафизә олунмамышыг. Шејтана јахшы мә’лумдур ки, узун мүддәт давам едән руһ дүшкүнлүјү бизи ҝүҹдән сала, һәтта зәифләдә биләр (Сүлејманын мәсәлләри 24:10). Шејтан мәнфи емосијаларымызла ојнамаға чалышдығы үчүн бизим көмәјә еһтијаҹымыз вар. “Ҝөзәтчи Гүлләси” вә “Ојанын!” журналларында вахташыры бизә мә’јуслуғу арадан галдырмагда көмәк едән мәгаләләр дәрҹ олунур. Бу ҹүр мәгаләләрдән бири һаггында бир мәсиһчи баҹымыз јазыр: “Мән бу мәгаләни, демәк олар ки, һәр ҝүн охујурам вә һәр дәфә дә ҝөзләрим јашарыр. Журналы һәмишә чарпајымын јанына гојурам ки, өзүмү пис һисс едәндә јенидән охуја билим. Бу ҹүр мәгаләләри охудугда елә тәәссүрат јараныр ки, тәсәлли вермәк үчүн Јеһова мәни санки гуҹаглајыр”a. Вахтлы-вахтында тәгдим етдији руһани гидаја ҝөрә Јеһоваја миннәтдар дејиликми? Унутма ки, Аллаһын бизим руһани рифаһымыз үчүн вердији һәр шеј Онун бизә јахын олдуғуна вә бизи гајғыкешликлә мүдафиә етдијинә шәһадәтдир.

“Дуаны ешидән” Кәсә мүраҹиәт етмәк имканы

14, 15. а) Јеһова Она јахын олан кәсләрә һансы хејир-дуаны бәхш едир? б) Истәнилән вахт Јеһоваја дуада мүраҹиәт етмәк имканы нәјә ҝөрә олдугҹа гијмәтлидир?

¹⁴ Инсан јүксәк вәзифәјә, јахуд һакимијјәтә чатанда, табечилијиндә олан адамларын она јахынлашмасынын даһа аз мүмкүн олдуғуна һеч диггәт јетирмисәнми? Бәс Јеһова Аллаһ һаггында нә демәк олар? О, биздән о гәдәрми узагдыр ки, дуада мүраҹиәт етдијимиз хаһишләрә е’тинасыз јанашсын? Хејр! Әксинә, бәхшиш сајылан дуа Јеһованын Она јахын олан кәсләрә бәхш етдији даһа бир хејир-дуадыр. “Дуаны ешидән” Кәсә истәнилән вахт мүраҹиәт етмәк имканы олдугҹа гијмәтлидир (Мәзмур 65:2). Нәјә ҝөрә?

¹⁵ Мисал үчүн, бөјүк корпорасија рәһбәри бир чох мәс’улијјәтә саһибдир. Өзүнүн нә илә мәшғул олаҹағыны вә башгаларына нәји һәвалә едәҹәјини гәрарлашдырыр. Каинатын Али Һөкмдары да Өзүнә һансы ишләри сахлајаҹағыны вә башгаларына нәји һәвалә едәҹәјини өзү гәрарлашдырыр. Ҝөр Јеһова севимли Оғлу Исаја нә гәдәр тапшырыг һәвалә едиб! Оғула “һөкм етмәк сәлаһијјәти” верилиб (Јәһја 5:27). “Мәләкләр... Она” табедирләр (1 Петер 3:22). Јеһованын гүдрәтли мүгәддәс руһу Исанын сәрәнҹамындадыр вә онун көмәји илә Иса јер үзүндә јашајан шаҝирдләринә рәһбәрлик едир (Јәһја 15:26; 16:7). Буна ҝөрә дә Иса белә дејә билмишдир: “Ҝөјдә вә јер үзүндә бүтүн һакимијјәт Мәнә верилмишдир” (Матта 28:18). О ки, галды бизим дуаларымыза, Јеһова онлары шәхсән Өзү динләмәји гәрара алыб. Елә бу сәбәбдән Мүгәддәс Китабда дејилир ки, дуаларымызы Исанын ады наминә јалныз Јеһоваја јөнәлтмәлијик (Мәзмур 69:13; Јәһја 14:6, 13).

16. Нәјә ҝөрә әмин ола биләрик ки, Јеһова һәгигәтән дә дуаларымызы ешидир?

¹⁶ Һәгигәтәнми Јеһова дуаларымызы ешидир? Әҝәр Јеһова дуаларымыза е’тинасыз јанашсајды, бизи ‘дуада мәтанәтли олмаға’ вә бүтүн гајғыларымызы Онун үзәринә гојмаға тәшвиг етмәзди (Ромалылара 12:12; Мәзмур 55:22; 1 Петер 5:7). Мүгәддәс Китабын јазылдығы дөврләрдә Јеһованын садиг хидмәтчиләри Онун дуалары динләдијинә зәррә гәдәр дә шүбһә етмирдиләр (1 Јәһ­ја 5:14). Буна ҝөрә дә, мәзмурчу Давуд демишдир: “[Јеһова] сәсими ешидәҹәкдир” (Мәзмур 55:17). Јеһованын бизә јахын олдуғуна, һәр фикримизә вә нараһатчылығымыза диггәт јетирдијинә әмин олмаг үчүн бизим дә бүтүн әсасымыз вар.

Јеһова өз хидмәтчиләрини мүкафатландырыр

17, 18. а) Јеһова јаратдығы дәрракәли варлыгларын сәдагәтли хидмәтинә неҹә јанашыр? б) Изаһ един, Сүлејманын мәсәлләри 19:17 ајәси неҹә ҝөстәрир ки, әмәлләримиздә ҝөстәрдијимиз шәфгәт Јеһованын ҝөзүндән јајынмыр?

¹⁷ Јеһованын Каинатын Һөкмдары кими тутдуғу мөвге, инсанларын Она табе олмаг истәјиб-истәмәмәкләриндән асылы дејил. Бунунла белә, Јеһова јахшылыг билән Аллаһдыр. О, јаратдығы дәрракәли варлыгларын сәдагәтли хидмәтини гијмәтләндирир (Мәзмур 147:11). Бәли, Јеһоваја јахын олан кәсләр даһа бир хејир-дуаја саһиб олурлар: О, хидмәтчиләрини мүкафатландырыр (Ибраниләрә 11:6).

¹⁸ Мүгәддәс Китабын ајдын сурәтдә ҝөстәрдији кими, Јеһова ибадәтчиләринин ҝөрдүкләри ишләри гијмәтләндирир. Мисал үчүн, охујуруг: “Касыба сәхавәт ҝөстәрән санки Рәббә борҹ верәр, чүнки онун әвәзи Рәбдән ҝәләр” (Сүлејманын мәсәлләри 19:17, МКШ). Јеһованын касыблара ҝөстәрдији шәфгәт Мусанын ганунунда өз әксини тапмышдыр (Левилиләр 14:21; 19:15). Биз Јеһованы тәглид едәрәк касыблара шәфгәт ҝөстәрдикдә О һансы һиссләри кечирир? Әвәзиндә һеч нә ҝөзләмәдән касыблара нә исә вердикдә, Јеһова елә һесаб едир ки, биз шәхсән Она борҹ веририк. О, һәмин борҹу өз рәғбәти вә хејир-дуасы илә гајтараҹағыны сөз верир (Сүлејманын мәсәлләри 10:22; Матта 6:3, 4; Лука 14:12-14). Бәли, биз еһтијаҹы олан һәмиманлымыза шәфгәт ҝөстәрдикдә, бу, Јеһоваја дәрин тә’сир бағышлајыр. Әмәлләримиздә ҝөстәрдијимиз шәфгәтин сәмави Атамызын ҝөзүндән јајынмадығыны билмәк биздә неҹә дә миннәтдарлыг һисси доғурур! (Матта 5:7).

19. а) Нәјә ҝөрә әмин ола биләрик ки, тәблиғ вә шаҝирдләр һазырламаг ишиндә етдикләримизи Јеһова гијмәтләндирир? б) Јеһова, Онун Падшаһлығы наминә хидмәтдә етдијимиз ишләри неҹә мүкафатландырыр?

¹⁹ Јеһова, Онун Падшаһлығынын мәнафеји наминә етдијимиз ишләри хүсусилә гијмәтләндирир. Јеһоваја јахынлашанда, биздә Падшаһлыг һаггында тәблиғ вә шаҝирдләр һазырламаг ишиндә даһа чох иштирак едәрәк вахтымызы, гүввәмизи вә мадди имканларымызы һәср етмәк үчүн тәбии истәк јараныр (Матта 28:19, 20). Һәрдән бизә елә ҝәлә биләр ки, биз чох аз иш ҝөрүрүк. Гејри-камил үрәк, Јеһованын бизим ҹәһдимиздән мәмнун галыб-галмадығына даир, һәтта шүбһә дә ојада биләр (1 Јәһја 3:19, 20). Лакин Јеһова үчүн, нә гәдәр кичик олмасындан асылы олмајараг, мәһәббәтлә үрәкдән вердијимиз һәр бир һәдијјә гијмәтлидир (Марк 12:41-44). Мүгәддәс Китаб бизи әмин едир: “Аллаһ һагсыз дејилдир ки, сизин ишинизи... вә Онун ады наминә ҝөстәрдијиниз мәһәббәти унутсун” (Ибраниләрә 6:10). Бәли, Јеһова, һәтта кичик дә олса Онун Падшаһлығы наминә етдијимиз хидмәтдә һәр бир иши јадда сахлајыр вә гијмәтләндирир. Инди алдығымыз руһани бол-бол хејир-дуаларла бәрабәр, Јеһованын өз әлини сәхавәтлә ачыб вә Она јахын олан кәсләрин дүзҝүн арзуларыны тә’мин едәҹәји јени дүнјанын севинҹини да дада биләрик! (Мәзмур 145:16; 2 Петер 3:13).

20. Иллик ајәмиздәки сөзләри 2003-ҹү ил әрзиндә јадымызда сахламаға нә көмәк едәҹәкдир вә бу һансы сәмәрәләри ҝәтирәҹәкдир?

²⁰ Ҝәлин, 2003-ҹү ил әрзиндә өзүмүзә суал верәк: Сәмави Атамыза јахынлашмаг үчүн даим ҹәһд ҝөстәририкми? Әҝәр ҝөстәририксә, сөз вердији кими, О да бизә доғру аддым атаҹагдыр. Ахы Јеһова “јалан данышмајан” Аллаһдыр (Титуса 1:2). Әҝәр Она јахынлашырыгса, О да бизә јахынлашаҹагдыр (Јагуб 4:8). Бу һансы сәмәрәләри ҝәтирәҹәкдир? Һал-һазырда бол-бол хејир-дуалар, әбәдијјәт бојунҹа исә Јеһоваја даима јахынлашмаг имканы!

[Һашијә]

Јадыныздадырмы?

• Јеһова Она јахынлашан кәсләрә һансы бәхшиши верир?

• Јеһова халгынын руһани мүдафиәси үчүн нә едир?

• Нәјә ҝөрә дуада Јеһоваја јахынлашмаг үчүн бизә бәхш едилән имкан бу гәдәр гијмәтлидир?

• Мүгәддәс Китабда неҹә ҝөстәрилир ки, Јеһова јаратдығы дәрракәли варлыгларын сәдагәтли хидмәтини гијмәтләндирир?

[15-ҹи сәһифәдәки шәкил]

Руһани һәгигәтләри анламагла Јеһова бизә хејир-дуа вериб.

[16 вә 17-ҹи сәһифәләрдәки шәкилләр]

Јеһова руһани мүдафиәни тә’мин едир.