Фәсил 2
Јеһованы — ваһид һәгиги Аллаһы уҹалдын
1. Ваһид һәгиги Аллаһ кимдир?
ИНСАНЛАР чохсајлы танрылара ибадәт етсәләр дә, Мүгәддәс Китабда «бизим тәк бир Ата Аллаһымыз» олдуғу дејилир (1 Коринфлиләрә 8:5, 6). ‘Тәк бир Аллаһ’ һәр шејин Јараданы Јеһовадыр (Ганунун тәкрары 6:4; Вәһј 4:11). Иса Мәсиһ Јеһова һаггында ‘мәним Аллаһым вә сизин Аллаһыныз’ демишди (Јәһја 20:17). Онун дедикләри гәдимдә јашамыш Мусанын «јалныз Рәбб [“Јеһова”, ЈД] Аллаһдыр, башгасы јохдур» сөзләринә мүвафигдир (Ганунун тәкрары 4:35). Јеһова Аллаһ инсанларын ибадәт етдији һәр шејдән вә һәр кәсдән — бүтләрдән, илаһиләшдирилмиш инсанлардан, һәмчинин Онун дүшмәни, «бу әсрин танрысы» Шејтан Иблисдән үстүндүр (2 Коринфлиләрә 4:3, 4). Инсанларын кимә вә нәјә ибадәт етмәләриндән асылы олмајараг, Исанын дедији кими, ‘ваһид һәгиги Аллаһ’ Јеһовадыр (Јәһја 17:3).
2. Аллаһ һаггында өјрәндикләримиз һәјатымызда неҹә әкс олунмалыдыр?
2 Миннәтдар инсанлар Јеһованын валеһедиҹи хүсусијјәтләри, Онун бәшәријјәт үчүн етдикләри вә ҝәләҹәкдә едәҹәји ишләр һаггында өјрәндикҹә Она јахынлашырлар. Аллаһа мәһәббәтләри артдыгҹа, Ону уҹалтмаг истәкләри даһа да ҝүҹләнир. Бәс Аллаһы неҹә уҹалтмаг олар? Мисал үчүн, Јеһова һаггында башгаларына данышмагла. Ромалылара 10:10 ајәсиндә дејилир: ‘Инсан иманыны ағзы илә играр едәрәк хилас олунур’. Диҝәр үсул, сөздә вә әмәлдә Аллаһы тәглид етмәкдир. Ефеслиләрә 5:1 ајәсиндә јазылыб: «Севимли өвладлар кими, Аллаһы тәглид един». Бунун үчүн Јеһованы јахындан танымаг лазымдыр.
3. Аллаһын әсас хүсусијјәтләри һансылардыр?
3 Мүгәддәс Китаб Аллаһын ҝөзәл хүсусијјәтләриндән чох бәһс едир. Онлардан дөрдү — һикмәт, әдаләт, гүввә вә мәһәббәт әсас хүсусијјәтләрдир. «Һикмәт... Аллаһдандыр» (Әјјуб 12:13). «Бүтүн јоллары һагдыр» (Ганунун тәкрары 32:4). ‘Гүввәси болдур’ (Јешаја 40:26). «Аллаһ мәһәббәтдир» (1 Јәһја 4:8). Бәс бу дөрд әсас хүсусијјәтдән ән ҝөркәмлиси вә Аллаһы даһа јахшы тәсвир едәни һансыдыр?
«Аллаһ мәһәббәтдир»
4. Каинаты вә бүтүн ҹанлылары јаратмаға Аллаһы һансы хүсусијјәти сөвг етмишдир?
4 Сәнҹә каинаты, шүурлу руһани варлыглары вә инсанлары јаратмаға Јеһованы һансы хүсусијјәти тәшвиг етмишдир? Һикмәт јохса гүввә? Аллаһ јараданда шүбһәсиз, бу хүсусијјәтләриндән истифадә етмишдир, лакин онлар тәшвигедиҹи рол ојнамамышлар. Бәлкә әдаләт? Хејр, чүнки Јеһова кимәсә һәјат әнамыны бәхш етмәјә борҹлу дејилди. Һәјатдан һәзз алаҹаг шүурлу варлыглары јаратмаға Аллаһы сөвг едән хүсусијјәт Онун бөјүк мәһәббәти олмушдур. Мәһз мәһәббәтдән ирәли ҝәләрәк, О, итаәткар инсанларын Ҹәннәтдә әбәди јашамасыны истәмишди (Јарадылыш 1:28; 2:15). Адәмин ҝүнаһы уҹбатындан мәһкумијјәтә дүчар олмуш бәшәријјәти азад етмәк үчүн тәдбир ҝөрмәјә дә Ону мәһәббәт тәшвиг етмишдир.
5. Мүгәддәс Китаба әсасән Јеһова һансы хүсусијјәтин тәҹәссүмүдүр? Изаһ един.
5 Беләликлә мәһәббәт Аллаһын ән ҝөркәмли хүсусијјәтидир. Аллаһ Өзү мәһәббәтдир. Диҝәр әсас үч хүсусијјәти ваҹиб олса да, Мүгәддәс Китабын һеч бир јериндә Јеһованын һикмәт, әдаләт вә ја гүввә олдуғу дејилмир. Мүгәддәс Јазылар Аллаһын мәһәббәт олдуғуну ачыглајыр. Бәли, Јеһова мәһәббәтин — һиссләрә дејил, принсипләрә әсасланмыш мәһәббәтин тәҹәссүмүдүр. Аллаһ һәгигәт вә салеһлик принсипләрини әлдә рәһбәр тутараг, мәһәббәтини тәзаһүр етдирир. Бу, мәһәббәтин ән уҹа формасыдыр вә онун ән парлаг нүмунәси Јеһова Аллаһын Өзүдүр. Белә мәһәббәт тамамилә тәмәннасыздыр вә һәмишә әмәлләрдән ҝөрүнүр.
6. Јеһованын биздән гат-гат үстүн олмасына бахмајараг, биз нәјин сајәсиндә Ону тәглид едә биләрик?
6 Аллаһын бу ҝөзәл хүсусијјәти сајәсиндә, биз Ону тәглид едә биләрик. Ола билсин, аҹиз вә сәһвләрә мејлли гејри-камил инсан олдуғумуздан биз фикирләширик ки, буна ҝүҹүмүз чатмаз. Лакин бу һалда да Јеһованын бөјүк мәһәббәти өзүнү бүрузә верир. О, имканларымызын мәһдудлуғуну баша дүшүр вә биздән камиллик тәләб етмир. Аллаһ бизим камилликдән чох-чох узаг олдуғумузу билир (Мәзмур 51:5). Буна ҝөрә дә, Мәзмур 130:3, 4 ајәләриндә дејилир: «Ја Рәбб, бизим тәгсирләримизи сијаһыја алсајдын, еј Худавәнд, ким бунун гаршысында дајана биләр? Амма Сән бағышлајансан». Бәли, Јеһова ‘рәһмли вә лүтфкар, һәдсиз сәбирли, бол мәһәббәтли’ Аллаһдыр (Чыхыш 34:6). «Сән, еј Худавәнд, хејирхаһсан, бағышлајан Сәнсән» (Мәзмур 86:5). Буну билмәјимиз бизә неҹә дә тәсәлли верир! Белә еҹазкар Аллаһа хидмәт етмәк, Онун мәһәббәтли вә мәрһәмәтли гајғысыны дујмаг неҹә дә хошдур!
7. Јеһованын мәһәббәти өзүнү јаратдыгларында неҹә бүрузә верир?
7 Јеһованын мәһәббәти Онун јаратдыгларында да өзүнү бүрузә верир. Һәјатдан зөвг алмағымыз үчүн ҝөр Јеһова нәләр јарадыб! Мәнзәрәли дағлар, мешәләр, ҝөлләр, океанлар... Онун бизә вердији ҹүрбәҹүр гида мәһсуллары һәм ләззәтли, һәм дә хејирлидир. Јеһова, һәмчинин һејрәтамиз һејванлар вә ҝөзәл, әтирли, сајсыз-һесабсыз ҝүл-чичәк јарадыб. Јеһова һәр шеји елә јарадыб ки, инсанлар һәјатдан һәзз алсынлар, һәрчәнд О буну етмәјә дә биләрди. Дүздүр, бу пис дүнја вә гејри-камиллијимиз, Онун јаратдығы шејләрдән там шәкилдә дадмаға имкан вермир (Ромалылара 8:22). Анҹаг Јеһованын бизим үчүн Ҹәннәтдә нәләр едәҹәјини тәсәввүр ет! Мәзмурчу Јеһова һаггында әзмлә демишди: «Әлини ачырсан, бүтүн ҹанлылары дојунҹа једирирсән» (Мәзмур 145:16).
8. Јеһованын бәшәријјәтә мәһәббәтинин ән парлаг нүмунәси нәдир?
8 Јеһованын бәшәријјәтә бәсләдији мәһәббәтин ән парлаг нүмунәси нәдир? Мүгәддәс Китабда дејилир: «Аллаһ дүнјаны елә севди ки, ваһид Оғлуну она верди; буну она ҝөрә етди ки, Она иман едәнләрин һеч бири һәлак олмасын, һамысынын әбәди һәјаты олсун» (Јәһја 3:16). Јеһова буну инсанларын јахшы олдугларына ҝөрәми етди? Ҹаваб Ромалылара 5:8 ајәсиндә верилир: «Аллаһ бизә олан Өз мәһәббәтини бунунла сүбут едир ки, биз һәлә ҝүнаһкар икән Мәсиһ бизим уғрумузда өлдү». Бәли, Аллаһ Өз камил Оғлуну јер үзүнә ҝөндәрди ки, бизи ҝүнаһ вә өлүмүн пәнҹәсиндән хилас етмәк үчүн, һәјатыны фидијә кими гурбан версин (Матта 20:28). Бунун сајәсиндә Аллаһы севән инсанлар үчүн әбәди һәјата јол ачылды. Аллаһ Онун ирадәсини јеринә јетирмәк истәјәнләрин һамысыны севир. Буну билмәјимиз неҹә дә тәсәлли ҝәтирир! Мүгәддәс Китабдан охујуруг: «Аллаһ инсанларын кимлијинә бахмаз. Амма һәр халгдан олуб, Ондан горхан вә һагг иш ҝөрән Она мәгбулдур» (Һәвариләрин ишләри 10:34, 35).
9. Јеһованын Өз Оғлуну уғрумузда гурбан вермәси бизә неҹә тәсир етмәлидир?
9 Јеһова Оғлуну уғрумузда гурбан вермәклә, бизим әбәди јашамағымыза јол ачды. Бәс бу һәјатымыза неҹә тәсир етмәлидир? Һәгиги Аллаһ Јеһоваја мәһәббәтимиз ҝет-ҝедә артмалыдыр. Ејни заманда, биздә Аллаһы тәмсил едән Иса Мәсиһә гулаг асмаг истәји јаранмалыдыр. «Мәсиһ һамы үчүн өлдү ки, јашајанлар артыг өзләри үчүн јох, онлар уғрунда өлән... үчүн јашасынлар» (2 Коринфлиләрә 5:15). Јеһованын мәһәббәтини вә шәфгәтини мүкәммәл сурәтдә әкс етдирән Иса Мәсиһин ардынҹа ҝетмәк неҹә дә хошдур! Бу, Исанын тәвазөкар адамлара мүраҹиәтиндән ајдын ҝөрүнүр: «Еј бүтүн јорғунлар вә јүкләри ағыр оланлар, Мәним јаныма ҝәлин вә Мән сизә раһатлыг верәрәм. Бојундуруғуму үзәринизә ҝөтүрүн вә Мәндән өјрәнин; чүнки Мән һәлим вә гәлбдән тәвазөкарам; вә ҹаныныза раһатлыг тапарсыныз. Чүнки бојундуруғум асан вә јүкүм јүнҝүлдүр» (Матта 11:28-30).
Башгаларына мәһәббәт ҝөстәририк
10. Һәмиманлыларымызы севдијимизи неҹә ҝөстәрә биләрик?
10 Јеһова вә Иса Мәсиһ бизи севдикләри кими, биз дә һәмиманлыларымызы севдијимизи неҹә ҝөстәрә биләрик? Бир сыра јолларла: «Мәһәббәт сәбирли, хејирхаһдыр. Мәһәббәт пахыллыг етмәз. Мәһәббәт ловғаланмаз, гүррәләнмәз. Кобуд давранмаз, өз мәнфәәтини ахтармаз, һирсләнмәз, она едилән писликләрин һесабыны тутмаз, һагсызлыға севинмәз, һәгигәтә исә шадланар; һәр шејә гатлашар, һәр шејә инанар, һәр шејә үмид бәсләјәр, һәр шејә таб ҝәтирәр... мәһәббәт әсла түкәнмәз» (1 Коринфлиләрә 13:4-8; 1 Јәһја 3:14-18; 4:7-12).
11. Даһа кимләри севмәлијик вә буну неҹә едә биләрик?
11 Даһа кимләри севмәлијик вә буну неҹә едә биләрик? Иса демишди: «Беләликлә, ҝедин, бүтүн халглары шаҝирдим един, онлары Ата, Оғул вә Мүгәддәс Руһ наминә вәфтиз един; сизә әмр етдијим һәр шејә риајәт етмәји онлара өјрәдин» (Матта 28:19, 20). Бу тапшырыға, јахынлашан ҹәннәт шәраитли јени дүнја һаггындакы хош хәбәри, һәлә һәгигәтдә олмајан инсанлара тәблиғ етмәк дахилдир. Иса ајдын ҝөстәрди ки, јалныз һәмиманлыларымызы севмәклә кифајәтләнмәмәлијик: «Әҝәр сизи севәнләри севәрсинизсә, сизә нә мүкафат олаҹаг? Верҝијығанлар да белә етмирләрми? Вә јалныз гардашларынызы саламлајырсынызса, хүсуси бир шеј едирсинизми? Бүтпәрәстләр дә елә етмирләрми?» (Матта 5:46, 47; 24:14; Галатијалылара 6:10).
‘Аллаһымыз Јеһованын ады илә ҝедин’
12. «Јеһова» адыны дашымаға нә үчүн јалныз Аллаһын ихтијары вар?
12 Һәгиги Аллаһы уҹалтмағын даһа бир мүһүм јолу, Онун мисилсиз вә јеҝанә адынын Јеһова олдуғуну билмәк, бу ады ишләтмәк вә башгаларына өјрәтмәкдир. Аллаһ Јешаја пејғәмбәр васитәсилә белә демишди: «Мән Јеһовајам, исмим одур; вә иззәтими бир башгасына вә һәмдими ојма бүтләрә вермәјәҹәјәм» (Јешаја 42:8, КМ). «Јеһова» ады «олмасына сәбәб Олан» демәкдир. Јеһова бөјүк нијјәтләр Аллаһыдыр вә Өз нијјәтләрини һәмишә мүвәффәгијјәтлә һәјата кечирир. Бу ады дашымаға јалныз һәгиги Аллаһын ихтијары вар, чүнки һеч бир инсан нијјәтинин баш тутаҹағына зәманәт верә билмәз (Јагуб 4:13, 14). Тәкҹә Јеһова сөјләдији һәр кәлмәнин мүтләг јеринә јетәҹәјини дејә биләр (Јешаја 55:11). Аллаһын адыны илк дәфә Мүгәддәс Китабда ҝөрәндә вә онун мәнасыны өјрәнәндә чохларынын үрәји фәрәһдән риггәтә ҝәлир (Чыхыш 6:3, КМ). Амма бу билик онлара ‘Аллаһымыз Рәббин [«Јеһованын», ЈД] ады илә’ әбәди олараг ҝетдикләри тәгдирдә фајда ҝәтирәҹәк (Микеја 4:5).
13. Јеһованын адыны танымаг вә Онун ‘ады илә ҝетмәк’ нә демәкдир?
13 Аллаһын ады һаггында Мәзмур 9:10 ајәсиндә дејилир: «Исмини таныјанлар Сәнә ҝүвәнир». Бурада садәҹә Аллаһын адыны билмәкдән сөһбәт ҝетмир, чүнки билмәк һәлә ҝүвәнмәк демәк дејил. Аллаһын адыны ‘танымаг’ Јеһованын неҹә Аллаһ олдуғуну дәрк етмәк, Онун һакимијјәтинә һөрмәт етмәк, Она итаәткар олмаг вә һәр заман ҝүвәнмәк демәкдир (Сүлејманын мәсәлләри 3:5, 6). Бунунла јанашы, Јеһованын ады илә ҝетмәк Аллаһа һәср олунмаг вә Онун ирадәсинә мүвафиг јашајараг бир хидмәтчи кими Ону тәмсил етмәји билдирир (Лука 10:27). Сән белә едирсән?
14. Јеһоваја әбәдијјән хидмәт етмәк истәјириксә, биздә һансы һисс олмалыдыр?
14 Әҝәр Јеһоваја әбәдијјән хидмәт етмәк истәјириксә, бизи буна борҹ һиссиндән гат-гат јүксәк бир һисс тәшвиг етмәлидир. Һәвари Павел узун мүддәт Јеһоваја сәдагәтлә хидмәт етмиш Тимотеји ‘Аллаһ јолуна бағлы’ галмаға тәшвиг едирди (1 Тимотејә 6:11). Бағлылыг, үрәкдә кимәсә гаршы дәрин миннәтдарлыг олдугда јараныр. Беләликлә, ‘Аллаһ јолуна бағлылыг’ Јеһоваја гаршы дәрин һөрмәти билдирир. Бу, Јеһоваја вә Онун јолларына гаршы һәдсиз еһтирамдан доған мәһәббәт долу сәдагәтдә өзүнү бүрузә верир. Бағлылыг һисси биздә бүтүн инсанларын Аллаһын адына һөрмәтлә јанашмасы истәјини ојадыр. Әҝәр ваһид һәгиги Аллаһ Јеһованын ады илә ҝетмәк истәјириксә, Она даһа чох бағланмалыјыг (Мәзмур 37:4; 2 Петер 3:11).
15. Аллаһа гаршы хүсуси сәдагәтимизи неҹә нүмајиш етдирә биләрик?
15 Јеһова хидмәтимизи гәбул етсин дејә, биз јалныз Она ибадәт етмәлијик, чүнки О, ‘гысганҹ [«хүсуси сәдагәт тәләб едән», ЈД] Аллаһдыр’ (Чыхыш 20:5). Биз һәм Аллаһы, һәм дә Шејтанын идарә етдији бу пис дүнјаны севә билмәрик (Јагуб 4:4; 1 Јәһја 2:15-17). Јеһова һәр биримизин неҹә инсан олмаға чалышдығымызы чох ҝөзәл билир (Јеремја 17:10). О салеһлији һәгигәтән севдијимизи ҝөрүр вә ҝүндәлик сынагларымыза таб ҝәтирмәкдә бизә дајаг олур. Өз ҝүҹлү мүгәддәс руһу илә дүнјада ҝениш јајылмыш пислијин үзәриндә гәләбә чалмағымыза көмәк едәҹәк (2 Коринфлиләрә 4:7). Һәмчинин биз Аллаһын көмәјилә јерүзү Ҹәннәтдә әбәди јашамаг үмидимизи мөһкәм горујаҹағыг. Бу неҹә дә фүсүнкар үмиддир! Биз ону јүксәк гијмәтләндирмәли вә бу үмиди верән һәгиги Аллаһ Јеһоваја ҹанла-башла хидмәт етмәлијик.
16. Милјонларла инсанла бирҝә сән дә һансы чағырыша һај верә биләрсән?
16 Јер үзүндә јашајан милјонларла инсан мәзмурчунун «ҝәлин мәнимлә бирҝә Рәбби мүгәддәс тутаг, Рәббин исмини бирҝә уҹалдаг» чағырышына севинҹлә һај верир (Мәзмур 34:3). Бүтүн халгларда бу чағырыша һај верәнләрин сајы ҝүнү-ҝүндән артыр. Јеһова сәни дә онларын арасында ҝөрмәк истәјир!
Тәкрар үчүн суаллар
• Јеһова неҹә Аллаһдыр? Онун хүсусијјәтләрини ајдын дәрк етмәјимиз бизә һансы фајданы ҝәтирир?
• Башгаларыны севдијимизи неҹә ҝөстәрә биләрик?
• Јеһованын адыны танымаг вә Онун ады илә ҝетмәк нә демәкдир?
[14-ҹү сәһифәдәки шәкил]
Јеһова бөјүк мәһәббәтлә ‘әлини ачаҹаг, бүтүн ҹанлылары дојунҹа једирәҹәк’