Садә инҝилис дилиндә «Ҝөзәтчи Гүлләси»
СИЗӘ хәбәр вермәјә шадыг ки, «Ҝөзәтчи Гүлләси»нин тәлим нәшринин бу сајындан етибарән бир ил сынаг мүддәти әрзиндә һәр ај ади инҝилис дилиндәки нәшрлә бәрабәр «Ҝөзәтчи Гүлләси» садә инҝилис дилиндә дә чыхаҹаг. Бу нәшрдә өјрәнмә мәгаләләри, еләҹә дә нә гәдәр јерин галмасындан асылы олараг, әлавә мәгаләләр олаҹаг. Үмидварыг ки, бу јенилик сајәсиндә бир чох баҹы-гардашларымыз ваҹиб руһани тәләбатларыны өдәјә биләҹәкләр. Неҹә?
Фиҹи, Гана, Кенија, Либерија, Ниҝерија, Папуа-Јени Гвинеја вә Соломон Адалары кими өлкәләрдә јерли дилләрин олмасына бахмајараг, гардашларымыз јығынҹаг ҝөрүшләриндә, еләҹә дә тәблиғдә, әсас етибарилә, инҝилис дилиндә данышырлар. Лакин нәшрләримиздәки инҝилис дилиндән фәргли олараг, онларын данышдығы инҝилис дили даһа садәдир. Бәзи һәмиманлыларымыз исә инҝилисдилли өлкәләрә көчмүшләр вә бу дили јахшы билмәсәләр дә, ондан истифадә етмәк мәҹбуријјәтиндәдирләр. Үстәлик, бәзиләринин ана дилләриндә јығынҹаг ҝөрүшләриндә иштирак етмәк имканы јохдур.
«Ҝөзәтчи Гүлләси»нин өјрәнилмәсиндә һәр һәфтә мүзакирә олунан мәгаләләр вахтлы-вахтында тәгдим олунан руһани гиданын ән ваҹиб һиссәсидир. Һамынын бу материалдан там фајдаланмасы үчүн «Ҝөзәтчи Гүлләси»нин тәлим нәшринин садә дилдә олан бурахылышына еһтијаҹ јаранды. Бу нәшрдә садә грамматикадан вә садә сөзләрдән истифадә олунаҹаг. Онун үз габығы да фәргләнәҹәк. Өјрәнмә мәгаләләриндәки јарымбашлыглар, абзаслар, тәкрар үчүн суаллар ади нәширдәкинә охшар олаҹаг. Бунун сајәсиндә һәр бир кәс, һансы нәшрдән истифадә етмәсиндән асылы олмајараг, мүзакирәни изләјә вә онда иштирак едә биләҹәк. Ики нәшр арасындакы фәрги ҝөрмәк үчүн ашағыдакы чәрчивәјә бахын. Бу парча бу бурахылышын биринҹи өјрәнмә мәгаләсинин икинҹи абзасындан ҝөтүрүлмүшдүр. Солдакы ади инҝилис дилиндә, сағдакы исә садә инҝилис дилиндә олан мәтндир.
Биз үмид едирик ки, бу јенилик: «Мәнә габилијјәт вер, гој әмрләрини өјрәним», — дејә дуа едән баҹы-гардашларын дуасына Јеһованын ҹавабы олаҹаг (Мәз. 119:73). Биз әминик ки, инҝилис дилини јахшы билмәјән, һәмчинин инҝилисҹә данышан ушаглар «Ҝөзәтчи Гүлләси»нин өјрәнилмәсинә даһа јахшы һазырлаша биләҹәкләр. Үмумдүнја мәсиһчи гардашлығына мәһәббәтиндән ирәли ҝәләрәк «садиг вә ағыллы нөкәр» васитәсилә бизи бол-бол руһани гида илә тәмин едән Јеһова Аллаһа үрәкдән миннәтдарыг (1 Пет. 2:17; Мат. 24:45).
Јеһованын Шаһидләринин Рәһбәрлик Шурасы