Аудиторија гаршысында едилән дуалары јаздырмаг дүзҝүндүрмү?
Бәзи мәсиһчиләр буну етмәмәк гәрарына ҝәлмишләр. Анҹаг Мүгәддәс Китабда дуалары гәләмә алмағын вә ја диҝәр ҹиһазлар васитәсилә јаздырмағын дүзҝүн олмадығы дејилмир (2 Салн. 33:18).
Ким исә јығынҹаг ҝөрүшләринә сонрадан гулаг асмаг вә ја иштирак едә билмәјәнләрлә бөлүшмәк үчүн програмы јаздырмаг гәрарына ҝәлә биләр. Бәзиләри ҝөрүшү биринҹи дуадан сонра јаздырмаға башлајыр, јекун дуадан әввәл дајандырыр.
Ола билсин, онлар дүшүнүрләр ки, дуа, маһијјәт етибарилә, формал тәлим үсулу дејил. Башгаларынын да гулаг асыб, сонда «Амин» демәсинә бахмајараг, дуа онлар үчүн Аллаһа шәхси мүраҹиәтдир. Үстәлик, ҝөрүшү јаздыран инсан билир ки, дуаны јаздырса да, сонрадан она гулаг асыб «Амин» демәјәҹәк, башга сөзлә, һәмин дуаны јенидән Аллаһа үнванланмыш дуа кими гәбул етмәјәҹәк.
Мараглыдыр ки, Мүгәддәс Китабда бир чох дуалар гәләмә алыныб (Јар. 24:10—14; Мат. 26:36—39; Јәһ. 11:41, 42; 17:1—26; Һәв. иш. 4:23—30). Биз онлары охујанда «Амин» демәли олдуғумузу дүшүнмүрүк (Ром. 8:26, 27).
Әлбәттә ки, бу дуалар Мүгәддәс Китабын бир һиссәсидир вә онлар Аллаһын истәји илә Мүгәддәс Китаба дахил олунуб (2 Тим. 3:16). Бәзиләри Мүгәддәс Китабда гәләмә алынмыш дуалардан фәргли олараг, һәр һансы ҹиһаза јаздырылмыш дуалара тамамилә фәргли мүнасибәт ҝөстәрә биләрләр. Буна ҝөрә дә, әҝәр биздән дуаны јаздырмамағы хаһиш етмәјибләрсә, һәр бир мәсиһчи ҝөрүшү јаздыраркән дуаны да јаздырыб-јаздырмамағы өзү гәрара алмалыдыр. Бурада Мүгәддәс Китаба зидд бир шеј јохдур.