Руһани тәләбатларынызы тә’мин един
1 Гаршыдан ҝәлән “Падшаһлығын чалышган тәблиғчиләри” адлы конгрес, руһани тәләбатларымызы тә’мин етмәк үчүн бизә ҝөзәл имкан верир. Конгресдә сағлам физики гидаја бәнзәјән, бизи руһән мөһкәмләндирән “иманын... сөзләри илә” гидалана биләҹәјик (1 Тим. 4:6). Конгресин програмы, Јеһоваја даһа да јахынлашмагда бизә көмәк едәҹәк. Биз, сајәсиндә һәјати чәтинликләрин өһдәсиндән ҝәлә биләҹәјимиз өјүд вә мәсләһәтләр алаҹағыг. Јеһова бизи әмин едир: “Сәни тә’лим едәҹәјәм вә ҝедәҹәјин јолу сәнә өјрәдәҹәјәм; сәнә өјүд верәҹәјәм; ҝөзүм сәнин үзәриндә олаҹагдыр.” (Мәз. 32:8). Јеһованын бизә рәһбәрлик етдији үчүн неҹә дә хошбәхтик! Ҝәлин, конгресин програмындан там фајда әлдә етмәјимизә имкан јарадан бә’зи практики аддымлары нәзәрдән кечирәк.
2 Үрәјинизи һазырлајын. Һәр биримиз, символик үрәјимизи горумаг мәс’улијјәти дашыјырыг (Сүл. мәс. 4:23). Биз ҹидди вә виҹданлы олмалыјыг. Конгрес — Јеһова илә мүнасибәтләримиз үзәриндә дүшүнмәјин, “камил гануна, азадлыг ганунуна диггәтлә бахыб она бағлы” галмағын вахтыдыр. Үрәјимизи, “әкилән кәламы” гәбул етмәјә һазырламаг үчүн Јеһовадан хаһиш етмәлијик ки, бизи сынасын вә пислик јолу”на јөнәлиб јөнәлмәдијимизи мүәјјән едиб, бизи “әбәди” јола истигамәтләндирсин (Јаг. 1:21, 25; Мәз. 139:23, 24).
3 Динләјин вә дүшүнүн. Иса Мәсиһ, она чох диггәтлә гулаг асан Мәрјәми бу сөзләрлә тә’рифләди: “Мәрјәм исә ондан алынмајаҹаг јахшы пајы сечмишдир” (Лука 10:39, 42). Әҝәр буна бәнзәр дүшүнҹә тәрзинә маликиксә, конгрес заманы фикримизи әһәмијјәтсиз шејләрә јајындырмајаҹағыг. Бүтүн програм боју отуруб динләјәҹәјик. Әбәс јерә данышмајаҹаг вә ја бир јердән башга јерә ҝәзмәјәҹәјик, һәмчинин башгаларынын да фикрини ҹиб телефонлары илә, пејҹерләрлә, фотоапаратларла вә камераларла јајындырмајаҹағыг.
4 Мә’рузәни динләдијимиз заман, верилән изаһы изләјә билмәјимизә көмәк олсун дејә гыса гејдләр етмәк фајдалы оларды. Ешитдијимиз фикирләри әввәлләр билдијимиз фикирләрлә әлагәләндирмәк лазымдыр. Бу, материалы баша дүшмәкдә вә јадда сахламагда бизә көмәк едәҹәк. Гејдләримизә нәзәр салараг, билдикләримизи неҹә тәтбиг етмәк үзәриндә дүшүнә биләрик. Һәр бир кәс өзүндән соруша биләр: бу мәним Јеһова илә олан мүнасибәтләримә неҹә тә’сир едир? Һансы саһәдә дәјишилмәлијәм? Бу фикирләри инсанларла мүнасибәтимдә неҹә тәтбиг едә биләрәм? Хидмәтдә буну неҹә тәтбиг едә биләрәм? Хүсусилә хошумуза ҝәлән фикирләри башгалары илә мүзакирә едә биләрик. Бунун сајәсиндә Јеһованын сөзләрини үрәјимизин ичиндә сахлаја биләрик (Сүл. мәс. 4:20, 21).
5 Өјрәндикләринизи тәтбиг един. Вилајәт конгресиндә олдугдан сонра бир гардаш деди: “Програм олдугҹа хүсуси характер дашыјырды. О, лазым олан анларда Мүгәддәс Китаба әсасланан мәсләһәти вермәк вә јардым ҝөстәрмәк үчүн, һәм өз үрәјини, һәм дә аилә үзвләринин үрәјини тәдгиг етмәјә тәшвиг едирди. О мәни, јығынҹагдакы вәзифәмә даһа ҹидди јанашмаға тәшвиг етди”. Еһтимал ки, буна бәнзәр һиссләри чохумуз јашамышыг. Лакин конгресдән сонра садәҹә олараг өзүнү мөһкәм вә тәравәтли һисс етмәк кифајәт дејил. Иса деди: “Әҝәр бу шејләри билирсиниз вә онлара әмәл едирсинизсә, бәхтијарсыныз” (Јәһ. 13:17). Шәхсән бизә аид олан шејләри һәјатымызда чалышганлыгла тәтбиг етмәлијик (Филип. 4:9). Өзүмүзүн руһани тәләбатларымызы јалныз бу јолла тә’мин едә биләрик.
[5 сәһифәдәки чәрчивә]
Ешитдикләринизин үзәриндә дүшүнүн
■ Бу, мәним Јеһова илә олан мүнасибәтләримә неҹә тә’сир едир?
■ Бу, мәним инсанларла олан мүнасибәтләримә неҹә тә’сир едир?
■ Буну һәјатымда вә хидмәтимдә неҹә тәтбиг едә биләрәм?