«Халгы... топла»
1. Вилајәт вә бејнәлхалг конгресләрлә исраиллиләрин бирҝә топлашмасы арасында һансы охшарлыг вар?
1 Мисирдән чыхдыгдан гыса бир мүддәт сонра Јеһова Мусаја Онун сөзүнү ешитмәләри үчүн халгы Сина дағына топламағы тапшырыр. Бунун сајәсиндә халг Аллаһдан горха вә Онун јолуну өвладларына өјрәдә биләрди (Ганун. т. 4:10—13). Неҹә дә әламәтдар вә иманы мөһкәмләндирән һадисә иди! Нөвбәти ајлар әрзиндә Јеһованын мүасир халгы Ондан тәлим алмаг үчүн вилајәт вә бејнәлхалг конгресләрә топлашаҹаг. Бәс бу ҹүр топлантылардан там фајдаланмаг үчүн нә етмәлијик?
2. Конгресә һазыр олмаг үчүн нә етмәлијик?
2 Һазыр ол. Јеһова исраиллиләрә әмр етмишди ки, Сина дағындакы тарихи топлантыја «һазыр олсунлар» (Чых. 19:10, 11). Ејнилә, тәкҹә програмда иштирак едәҹәк кәсләрдән јох, конгресләрә ҝәләҹәк һәр кәсдән јахшыҹа һазырлашмаг тәләб олунур. Мәсәлән, чохлары ишдән иҹазә алмалы олаҹаглар. Ола билсин, сәнин вәзијјәтин Неһемјанынкына охшајыр. О, падшаһ Артахшастанын јанындакы саги ишини гојуб Јерусәлимә гајытмаг вә диварларын бәрпасына көмәк етмәк истәјирди, лакин билирди ки, падшаһ буна иҹазә вермәјә биләр. Неһемја дуа етдикдән сонра ҹәсарәтләнди вә өз хаһишини нәзакәтлә падшаһа билдирди. Падшаһ она ҝетмәјә иҹазә верди, һәтта тикинти лајиһәсини дә дәстәкләди (Неһ. 2:1—9). Мүдирдән иҹазә алмагдан әлавә, неҹә ҝедәҹәјини вә һарада галаҹағыны да дәгигләшдирмәлисән. Ағсаггаллар мәмнунијјәтлә еһтијаҹ дујан кәсләрә көмәк едәҹәкләр. Һәр ҝүн ҝөрүшә тез ҝәлмәји планлашдыр вә ешидәҹәјин фикирләрә «хүсусилә диггәтли [олмаға]» чалыш (Ибр. 2:1).
3. Үрәјимизи конгресә һазырламаға нә көмәк едәҹәк?
3 Һазырлашмалы олдуғумуз диҝәр бир саһә үрәјимизи һазырламагдыр, беләҹә биз динләјә вә өјрәнә биләҹәјик (Езра 7:10). Конгресин програмы jw.org сајтында јерләшдириләҹәк вә вәрәгәдә бүтүн чыхышларын адлары, еләҹә дә һәр биринә аид бир вә ја ики ачар ајә ҝәтириләҹәк. Бу мәлуматын сајәсиндә конгресдән һәфтәләр әввәл аиләви ибадәтдә үрәјимизи конгресә һазырлаја биләрик. Бәзи тәблиғчиләр бу програмы чап едиб конгрес боју гејдләр апармаг үчүн истифадә едирләр.
4. Конгрес васитәсилә валидејнләр ушагларыны неҹә өјрәдә биләрләр?
4 Өвладларыныза өјрәдин. Сина дағында кечирилән топлантынын мәгсәдләриндән бири о иди ки, исраилли валидејнләр өвладларыны өјрәтсинләр (Ганун. т. 4:10). Конгресләр дә буну етмәјә валидејнләрә ҝөзәл имкан јарадыр. Ҝөрүш заманы валидејнләр ушагларыны јанларында әјләшдирмәли вә диггәтләрини ҹәмләмәјә көмәк етмәлидирләр. Һәр ҝүнүн сонунда вә сонрадан кечириләҹәк аиләви ибадәтдә аиләләр програмы бирликдә мүзакирә едә биләрләр.
5. Үзүмүзә ҝәлән конгресдә иштирак етмәклә һансы фајданы әлдә едәҹәјик?
5 Сина дағында кечирилән бу әламәтдар топланты исраиллиләрә Аллаһын халгы олмаг үстүнлүјүнү гијмәтләндирмәјә көмәк етмишди (Ганун. т. 4:7, 8). Үзүмүзә ҝәлән конгрес дә бизә ејни фајданы ҝәтирәҹәк. Үч ҝүн әрзиндә биз Шејтан дүнјасынын сәрт сәһрасындан узаглашаҹаг, руһани ҹәһәтдән тәравәтләнәҹәк вә руһани ҹәннәтимиздә хош үнсијјәтдән севинҹ дујаҹағыг (Јешаја 35:7—9). Јеһованын ҝүнү јахынлашдыгҹа ҝәлин руһланмаг үчүн бирҝә топлашмаг фүрсәтини әлдән вермәјәк (Ибр. 10:24, 25).