Јени брошүраны пајламаг үчүн хүсуси кампанија
1 Бу ҝүн дүнјада һөкм сүрән шәраитләрин уҹбатындан бир чох инсанлар нараһатдырлар, лакин јалныз азсајлы инсанлар дүнјанын нә үчүн белә вәзијјәтдә олдуғуну, габагда бизи нәләр ҝөзләдијини вә ҝәләҹәк һөкмдә сағ галмаг үчүн нә етмәли олдугларыны баша дүшүрләр (Һез. 9:4). Инсанлара бизим зәманәнин мә’насыны баша дүшмәкдә көмәк етмәк үчүн, октјабрын 18-и базар ертәсиндән нојабрын 14-ү базар ҝүнүнәдәк, “Ојаг дурун!” брошүрасынын пајланмасы үзрә хүсуси кампанија кечириләҹәк.
2 Брошүраны евдән-евә тәблиғ едәркән, инсанлара тәкрар баш чәкәрәк, гејри-рәсми сурәтдә вә ишҝүзар әразидә тәблиғ едәркән тәклиф етмәк олар. Лакин ону неҹә ҝәлди пајламаг лазым дејил. Бу брошүраны јалныз Мүгәддәс Китабын дүнја һадисәләринин мә’насы һаггында дедикләринә мараг ҝөстәрән инсанлара вермәк лазымдыр. Чох аз мараг ҝөстәрән инсанлара садәҹә трактат тәклиф етмәк олар.
3 Сән инсанын диггәтини белә сөзләрлә ҹәлб едә биләрсән:
◼ “Бир чох инсанлар бу ҝүн ади һала чеврилмиш ҹидди проблемләрә вә дәһшәтли һадисәләрә ҝөрә нараһатдырлар. [Јашадығыныз јердә мә’лум олан һадисәни даныш.] Бу ҹүр һадисәләрин Мүгәддәс Китабда габагҹадан хәбәр верилдијини билирдинизми? [Ҹаваб вермәсинә изн вер. Сонра данышдығын һадисәјә ујғун олан, мәсәлән, Матта 24:3, 7, 8; Лука 21:7, 10, 11; јахуд 2 Тимотејә 3:1-5 кими ајәләри оху.] Мүгәддәс Китаб бизим һансы зәманәдә јашадығымызы вә бәшәријјәти габагда нә ҝөзләдијини ачыглајыр. Даһа чох мә’лумат әлдә етмәк истәјәрдинизми? [Ҹаваб вермәсинә изн вер. Инсан сәмими мараг ҝөстәрирсә брошүраны тәклиф ет.] Брошүра сатылмыр. Бизим үмумдүнја ишимизә кичик мәбләғдә ианә етмәји арзу едирсинизсә, биз ону гәбул етмәјә чох шад олардыг”.
4 Јахуд бу тәгдимә сәнин үчүн еффектив ола биләр:
◼ “Бир чохлары бу ҝүн дәһшәтли һадисәләрдән вә ҹидди ағыр иткиләрдән изтираб чәкирләр. Бә’зиләри Аллаһын бу ҹүр шејләрин гаршысыны алмаг үчүн нәјә ҝөрә мүдахилә етмәдијинә тәәҹҹүбләнирләр. Мүгәддәс Китаб бизи әмин едир ки, Аллаһ тезликлә бәшәријјәти изтираблардан азад едәҹәк. Аллаһын бәшәријјәтә һансы фајдалары ҝәтирәҹәјинә диггәт јетирин. [Мәзмур 37:10, 11 ајәләрини оху.] Даһа чох мә’лумат әлдә етмәк истәјәрдинизми?” Сөһбәти јухарыда гејд олундуғу кими јекунлашдырмаг олар.
5 Брошүраны ҝөтүрән һәр кәсин адыны вә үнваны алмаға чалыш вә ҝөстәрилән марағы инкишаф етдирмәк үчүн нөвбәти ҝөрүш һаггында даныш. Буну етмәк үсуллары “Бизим Падшаһлыг Хидмәтимиз”ин 2004-ҹү ил нојабр сајында дәрҹ олунаҹаг. Әҝәр илк сөһбәтдә инсан дәрин мараг ҝөстәрирсә, сән “Ојаг дурун!” вә ја башга нәшрләрдән, мәсәлән, “Аллаһ тәләб едир” брошүрасындан истифадә едәрәк дәрһал Мүгәддәс Китаб өјрәнмәсинә башлаја биләрсән.
6 Јени брошүраны бу мәгалә хидмәти ҝөрүшдә мүзакирә олундугдан сонра әлдә етмәк олар. Тәблиғчиләр вә пионерләр кампанијанын илк ҝүнләриндә лазым олдуғу гәдәр брошүра ҝөтүрә биләрләр. Гој Јеһова Ону иззәтләндирәҹәк, тәмиз үрәкли инсанлара исә фајда ҝәтирәҹәк бу хүсуси фәалијјәтә хејир-дуа версин (Мәз. 90:17).