Мәсиһин нүмунәсинә риајәт един
«Мәним сизә етдијим кими сиз дә едәсиниз дејә, сизә бир нүмунә ҝөстәрдим” (ЈӘҺЈА 13:15).
1. Иса нәјә ҝөрә давамчылары үчүн тәглид едилмәли нүмунәдир?
БҮТҮН бәшәр тарихи әрзиндә јалныз бир инсан һеч бир ҝүнаһ етмәдән һәјат сүрмүшдүр. Бу шәхс Иса Мәсиһдир. Ондан башга «ҝүнаһ етмәјән инсан јохдур” (1 Падшаһлар 8:46; Ромалылара 3:23). Бу сәбәбдән, һәгиги давамчылары Исаја тәглид едә биләҹәкләри ән јахшы нүмунә кими бахырлар. Б. е. 33-ҹү илинин 14 нисан ҝүнү, өлүмүндән бир аз әввәл, Иса өзү давамчыларыны ону тәглид етмәјә чағырмышды. О демишди: «Мәним сизә етдијим кими сиз дә едәсиниз дејә, сизә бир нүмунә ҝөстәрдим” (Јәһја 13:15). Иса һәмин о ҝеҹә мәсиһчиләрин ону тәглид етмәјә чалышмалы олдуглары бир нечә саһәни хатырлатмышды. Бу мәгаләдә онлардан бә’зиләрини нәзәрдән кечирәҹәјик.
Тәвазөкар олмағын ваҹиблији
2, 3. Нәјә ҝөрә демәк олар ки, Иса тәвазөкарлығын ән ҝөзәл нүмунәсидир?
2 Иса шаҝирдләрини онун нүмунәсини изләмәјә тәшвиг едәркән, тәвазөкарлығын ваҹиблијини нәзәрдә тутурду. Иса бу кејфијјәтин ваҹиблији һаггында давамчылары илә дәфәләрлә данышмышды. Вә һәмин 14 нисан ҝеҹәси о, һәвариләринин ајагларыны јумагла тәвазөкарлыг ҝөстәрди. Сонра Иса деди: «Мадам ки, Мән Рәбб вә Мүәллим олдуғум һалда ајагларынызы јудум, сиз дә бир-биринизин ајагларыны јумаға борҹлусунуз» (Јәһја 13:14). Сонра о, һәвариләринә онун нүмунәсинә риајәт етмәји бујурду. Иса тәвазөкарлыға даир неҹә дә ҝөзәл нүмунә иди!
3 Һәвари Павел Мәсиһин јерә ҝәлмәздән әввәл «Аллаһын сурәтиндә” (И–93) олдуғу һаггында јазмышды. Бунунла белә, Иса өзүнү һәр шејдән мәһрум едиб, садә бир инсан олду. Бундан әлавә, «О Өз тәвазөкарлығыны ҝөстәрди вә өлүмәдәк, һәтта чармыха чәкилмәклә өлүмәдәк итаәткарлыг етди» (Филипилиләрә 2:6-8). Ҝәлин бир анлыг бу һагда дүшүнәк. Каинатда Јеһовадан сонра икинҹи шәхсијјәт олан Иса, мәләкләрдән ашағы сәвијјәјә дүшмәјә, көмәксиз көрпә кими доғулмаға, гејри-камил валидејнләрин һимајәсиндә бөјүмәјә, ахырда исә мәнфур ҹинајәткар кими өлмәјә разы олду (Колослулара 1:15, 16; Ибраниләрә 2:6, 7). Тәвазөкарлыға бир бах! Онун тәвазөкарлығыны тәглид етмәк вә онун дүшүнҹә тәрзинә бәнзәр дүшүнҹә тәрзини инкишаф етдирмәк мүмкүндүрмү? (Филипилиләрә 2:3-5). Бәли, бу мүмкүндүр, амма асан дејил.
4. Инсанларын ловғаланмасына нәләр сәбәб олур вә ловғалыг нәјә ҝөрә тәһлүкәлидир?
4 Мәғрурлуг исә тәвазөкарлыға әкс олан кејфијјәтдир (Сүлејманын мәсәлләри 6:16-19). Мәғрурлуг Шејтанын јыхылмасына сәбәб олду (1 Тимотејә 3:6). Бу хүсусијјәт инсанларын үрәјиндә асанлыгла көк атыр, ондан јаха гуртармаг исә асан олмур. Инсанлар өлкәләри, иргләри, вар-дөвләтләри, тәһсилләри, ҹәмијјәтдәки мөвгеләри, заһири ҝөрүнүшләри, ишдәки вә идмандакы наилијјәтләри вә диҝәр шејләрлә өјүнүрләр. Лакин бүтүн бунлар Јеһова үчүн ваҹиб дејил (1 Коринфлиләрә 4:7). Әҝәр бунлар үрәјимиздә ловғалыг һиссинин јаранмасына сәбәб олурса, Аллаһла мүнасибәтимиз корлана биләр. «Рәбб уҹаларда олса да, јазыглара [«тәвазөкарлара», КМ] нәзәр салар, амма ловғалары узагдан таныјар» (Мәзмур 138:6; Сүлејманын мәсәлләри 8:13).
Гардашларла мүнасибәтдә тәвазөкарлыг
5. Ағсаггалларын тәвазөкар олмалары нә үчүн ваҹибдир?
5 Һәтта Јеһованын иши үчүн ҝөстәрдијимиз сә’ј вә ја теократик наилијјәтләр, о ҹүмләдән јығынҹагдакы вәзифәләр өјүнмәјә һеч бир әсас вермир (1 Салнамәләр 29:14; 1 Тимотејә 6:17, 18). Әксинә, мәс’улијјәтимиз артдыгҹа, тәвазөкарлығы да бир о гәдәр чох тәзаһүр етдирмәлијик. Һәвари Петер ағсаггаллары Аллаһын сүрүсүнә «гаршы зүлмкар јох, сүрүјә нүмунә» олмаға чағырырды (1 Петер 5:3). Ағсаггаллар һөкмранлыг вә әмр етмәк үчүн дејил, хидмәт едиб, нүмунә ҝөстәрмәк үчүн тә’јин олунурлар (Лука 22:24-26; 2 Коринфлиләрә 1:24).
6. Һәјатын һансы саһәләриндә мәсиһчиләрә тәвазөкарлыг тәләб олунур?
6 Тәвазөкарлыг ҝөстәрмәк јалныз ағсаггаллар үчүн ваҹиб дејил. Јашлыларла мүгајисәдә даһа ити зәкалары вә ҝүҹлү бәдәнләри илә ловғалана билән ҝәнҹләр һаггында Петер јазмышды: «Бир-биринизә табе олараг тәвазөкарлыг палтары ҝејинин. Чүнки Аллаһ мәғрурлара гаршы дурур, тәвазөкарлара исә лүтф верир» (1 Петер 5:5). Беләликлә, Мәсиһин тәвазөкарлығыны тәглид етмәк һамы үчүн ваҹибдир. Хүсусән дә е’тинасызлыг вә әдавәтлә гаршылашдығымыз заман хош хәбәри тәблиғ етмәк үчүн тәвазөкарлыг тәләб олунур. Мәсләһәти гәбул етмәк вә ја хидмәти ҝенишләндирмәк мәгсәдилә һәјатымызы садәләшдирмәк үчүн дә тәвазөкарлыг тәләб олунур. Вә нәһајәт, күтләви информасија васитәләрилә һаггымызда бөһтанлар јајылан заман вә ја һүгуги һүҹумлар, јахуд шиддәтли тә’гибләр заманы ҹәсарәт вә иманла бәрабәр јенә дә тәвазөкарлыг тәләб олунур (1 Петер 5:6).
7, 8. Тәвазөкарлығы инкишаф етдирмәкдә бизә нә көмәк едә биләр?
7 Инсан мәғрурлуғун өһдәсиндән ҝәлиб, тәвазөкарлыгла башгаларыны өзүндән неҹә үстүн саја биләр? (Филипилиләрә 2:3). О инсан өзүнә Јеһованын ҝөзләри илә бахмалыдыр. Инсанын өзүнә олан дүзҝүн мүнасибәтини Иса белә изаһ етмишди: «Сизә әмр олунан һәр шеји јеринә јетирдикдән сонра дејин: “Биз һеч бир гијмәти олмајан гулларыг, чүнки иҹра етмәли олдуғумузу етдик”» (Лука 17:10). Јадда сахламалыјыг ки, наил олдуғумуз һеч бир шеј Исанын етдикләри илә мүгајисә олуна билмәз. Амма Иса тәвазөкар иди.
8 Һәмчинин биз Јеһовадан хаһиш едә биләрик ки, өзүмүзә даир дүзҝүн нөгтеји-нәзәр инкишаф етдирә биләк. Мәзмурчу кими дуа едә биләрик: «Мәнә ағыл, билик өјрәт, чүнки әмрләринә инанырам» (Мәзмур 119:66). Јеһова өзүмүзә мүнасибәтдә ағыллы, таразлы нөгтеји-нәзәр инкишаф етдирмәкдә бизә көмәк едәҹәк вә тәвазөкарлығымыза ҝөрә бизә хејир-дуа верәҹәкдир (Сүлејманын мәсәлләри 18:12). Иса демишдир: «Ким өзүнү јүксәлдирсә, алчалдылаҹаг вә ким өзүнү алчалдырса, јүксәлдиләҹәкдир» (Матта 23:12).
Јахшылыға вә пислијә даир дүзҝүн нөгтеји-нәзәр
9. Иса јахшылыға вә пислијә неҹә јанашырды?
9 Иса 33 ил гејри-камил инсанларын арасында јашаса да, «ҝүнаһдан хариҹ» галмышды (Ибраниләрә 4:15). Үстәлик, Мәсиһ һаггындакы пејғәмбәрликдә дејилир: «Салеһлији севиб пислијә нифрәт едирсән» (Мәзмур 45:7; Ибраниләрә 1:9). Мәсиһчиләр бу саһәдә дә Мәсиһдән нүмунә ҝөтүрмәјә чалышырлар. Онлар писликлә јахшылығын нә олдуғуну билмәкдән әлавә, һәм дә пислијә нифрәт едир, јахшылығы исә севирләр (Амос 5:15). Бу онлара анаданҝәлмә ҝүнаһа олан мејл илә мүбаризә апармаға көмәк едир (Јарадылыш 8:21; Ромалылара 7:21-25).
10. Пислик едән инсан әслиндә Мәсиһә неҹә јанашыр?
10 Иса фәрисеј Накдимона деди: «Һәр пислик едән, нура нифрәт едәр вә әмәлләри ашкара чыхмасын дејә нура доғру ҝетмәз. Чүнки әмәлләри писдир. Һәгигәтә әсасән һәрәкәт едән исә, өз әмәлләринин Аллаһа әсасән ишләнмиш олдуғу бәлли олсун дејә нура ҝәлир» (Јәһја 3:20, 21). Хатырлајаг ки, Јәһја Исаны «һәр инсаны нурландыран һәгиги Нур» адландырмышдыр (Јәһја 1:9, 10). Иса исә демишдир ки, әҝәр биз пислик едириксә, јә’ни дүзҝүн олмајан вә Аллаһа мәгбул олмајан иши ҝөрүрүксә, онда ишыға нифрәт едирик. Неҹә дә ајылдыҹы фикирдир, демәли, төвбә етмәдән ҝүнаһ ишләдәнләр Исаја вә онун нүмунәсинә нифрәт бәсләјирләр! Бәлкә дә онлар белә дүшүнмүрләр, амма Мәсиһ белә һесаб едир.
Јахшылыға вә пислијә неҹә јанашмагда Мәсиһдән нүмунә ҝөтүрүн
11. Јахшылыға вә пислијә Мәсиһ кими јанашмаг үчүн нә етмәк лазымдыр?
11 Бизә Јеһованын нөгтеји-нәзәриндә нәјин јахшылыг, нәјин исә пислик олдуғуну анламаг ҝәрәкдир. Белә бир анлајыша саһиб олмағын јеҝанә үсулу — Аллаһын Кәламы олан Мүгәддәс Китабы өјрәнмәкдир. Мүгәддәс Китабы өјрәнәркән, биз дә мәзмурчу кими дуа етмәлијик: «Ја Рәбб, јолларыны мәнә ҝөстәр, ардынҹа ҝетмәји мәнә өјрәт» (Мәзмур 25:4). Лакин Шејтанын мәкрли олдуғуну унутмаг олмаз (2 Коринфлиләрә 11:14). О, пислији елә шәкилә сала биләр ки, еһтијатсыз мәсиһчи үчүн мәгбул бир шеј кими ҝөрүнсүн. Буна ҝөрә дә, Мүгәддәс Китабдан өјрәндикләримизин үзәриндә дәриндән дүшүнмәк вә «садиг вә ағыллы гулун» мәсләһәтләринә даим риајәт етмәк лазымдыр (Матта 24:45-47). Өјрәнмә, дуа вә өјрәндикләримиз үзәриндә дәриндән дүшүнмә јеткин олмағымыза вә «һиссләри алышдырылараг, хејирлә шәри ајырд етмәк үчүн тәрбијә едилмиш» кәсләр арасында олмағымыза көмәк едәҹәкдир (Ибраниләрә 5:14). О заман үрәјимиз пислијә нифрәт едиб, јахшылығы севмәјә мејлли олаҹагдыр.
12. Мүгәддәс Китабын һансы мәсләһәти бизи ганунсуз давранышдан сахлајыр?
12 Әҝәр пислијә нифрәт едириксә, пис истәкләрин үрәјимиздә көк салмасына јол вермәјәҹәјик. Мәсиһин өлүмүндән чох илләр өтдүкдән сонра һәвари Јәһја јазмышдыр: «Дүнјаны вә дүнјада олан шејләри севмәјин. Ким дүнјаны севәрсә, онда Атанын мәһәббәти јохдур. Чүнки дүнјада олан һәр шеј, јә’ни ҹисмани еһтирас, ҝөзләрин еһтирасы вә һәјатын тәкәббүрү Атадан дејил, дүнјадандыр» (1 Јәһја 2:15, 16).
13, 14. а) Дүнјада олан шејләрә гаршы мәһәббәт нәјә ҝөрә мәсиһчи үчүн тәһлүкәлидир? б) Дүнјада олан шејләрә гаршы мәһәббәтин јаранмасындан неҹә гачына биләрик?
13 Кимсә е’тираз едә биләр ки, дүнјада олан шејләрин һамысы пис дејил. Бәлкә дә бу беләдир, лакин дүнја вә онун ширникдириҹи шејләри бизи Јеһоваја хидмәтдән асанлыгла јајындыра биләр. Дүнјанын тәклиф етдији һеч бир шеј бизи Јеһоваја јахынлашдырмаг мәгсәдини ҝүдмүр. Буна ҝөрә дә, дүнјада олан шејләри, һәтта өз-өзлүјүндә пис олмајан ишләри дә севмәјә башлајарыгса, онда тәһлүкәли јолдајыг (1 Тимотејә 6:9, 10). Бундан әлавә, дүнјада һәгигәтән дә инсаны позмаға гадир олан чох писликләр вар. Әҝәр биз зоракылығы, вар-дөвләтә һәрислији вә ҹинси әхлагсызлығы вурғулајан кинофилмләрә вә ја телевизија верилишләринә бахырыгса, онда пислик бизим үчүн мәгбул, сонра исә, һәтта ширникдириҹи ола биләр. Әҝәр мадди тә’минатлы һәјат сүрмәји вә ја бизнесдә мүвәффәгијјәтә наил олмағы һәјатларында әсас јерә гојан инсанларла үнсијјәтдә олуругса, бу ҹүр шејләр бизим үчүн дә ваҹиб мәсәләјә чеврилә биләр (Матта 6:24; 1 Коринфлиләрә 15:33).
14 Амма әҝәр зөвгү Јеһованын Кәламындан алырыгса, «ҹисмани еһтирас, ҝөзләрин еһтирасы вә һәјатын тәкәббүрү» бизим үчүн өз ҹазибәдарлығыны итирәҹәкдир. Вә әҝәр биз Падшаһлығын марагларыны һәјатларында әсас јерә гојан инсанларла үнсијјәтдә олуругса, онлар кими олаҹағыг: онларын севдикләрини биз дә севәҹәк, онларын нифрәт етдикләри шејләрә биз дә нифрәт едәҹәјик (Мәзмур 15:4; Сүлејманын мәсәлләри 13:20).
15. Салеһлијә мәһәббәт, ганунсузлуға исә нифрәт Исаја неҹә көмәк етмишди вә бизә неҹә көмәк едә биләр?
15 Ганунсузлуға нифрәт, салеһлијә исә мәһәббәт «гаршысына гојулан севинҹи» һәмишә јадда сахламагда Исаја көмәк едирди (Ибраниләрә 12:2). Бу бизә дә көмәк едә биләр. Билирик ки, «дүнја вә онун еһтирасы кечиб ҝедир». Бу дүнјада әлдә олунан һәр ҹүр ләззәт мүвәггәтидир. Лакин «Аллаһын ирадәсини јеринә јетирән әбәди јашајыр» (1 Јәһја 2:17). Иса, Аллаһын ирадәсини јеринә јетирмәклә инсанлар үчүн әбәди һәјата јол ачды (1 Јәһја 5:13). Ҝәлин ону тәглид едәк вә ҝөстәрдији сәдагәтдән фајдаланаг.
Тә’гибләр заманы
16. Нәјә ҝөрә Иса давамчыларыны бир-бирләрини севмәјә тәшвиг етмишди?
16 Иса шаҝирдләринин ону тәглид едә биләҹәји даһа бир саһәјә ишарә етмишди: «Мәним әмрим будур: Бир-биринизи Мән сизи севдијим кими севин» (Јәһја 15:12, 13, 17). Мәсиһчиләрин өз гардашларыны севмәк үчүн сәбәбләри чохдур. Лакин бу һадисәдә Иса башлыҹа олараг дүнјанын онлара гаршы олан нифрәтини нәзәрдә тутурду: «Әҝәр дүнја сизә нифрәт едәрсә, билин ки, сиздән әввәл Мәнә нифрәт етмишдир.... Гул ағасындан үстүн дејилдир. Әҝәр Мәни тә’гиб етдиләрсә, сизи дә тә’гиб едәҹәкләр» (Јәһја 15:18, 20). Бәли, Мәсиһлә олдуғу кими, мәсиһчиләри дә тә’гиб едирләр. Белә бир нифрәтә таб ҝәтирмәк үчүн, онлары бир-бирләринә сых мәһәббәт телләри бағламалыдыр.
17. Нәјә ҝөрә дүнја мәсиһчиләрә нифрәт едир?
17 Бәс нәјә ҝөрә дүнја мәсиһчиләрә нифрәт едир? Чүнки онлар да Иса кими «дүнјадан дејилләр» (Јәһја 17:14, 16). Онлар мүһарибәләрә вә сијасәтә мүдахилә етмир, һәјатын мүгәддәслијини е’тираф едәрәк вә јүксәк әхлаг нормаларына табе олараг Мүгәддәс Китаб принсипләринә риајәт едирләр (Һәвариләрин ишләри 15:28, 29; 1 Коринфлиләрә 6:9-11). Онлар мадди дејил, руһани мәгсәдләр ҝүдүрләр. Онлар бу дүнјада јашасалар да, Павелин јаздығы кими, ондан ‘там истифадә етмирләр’ (1 Коринфлиләрә 7:31). Һәгигәтән дә, бә’зи инсанлар Јеһованын Шаһидләринин јүксәк әхлаглы һәјат тәрзинә һејран галырлар. Лакин Аллаһын хидмәтчиләри башгаларыны һејран етмәк вә ја онларын нүфузуну газанмаг наминә шәхси принсипләриндә ҝүзәштә ҝетмирләр. Нәтиҹә е’тибары илә, бу дүнјада чох инсанлар онлары баша дүшмүр вә онлара нифрәт бәсләјирләр.
18, 19. Мүгавимәтләр вә тә’гибләрлә гаршылашан заман мәсиһчиләр Мәсиһи неҹә тәглид едирләр?
18 Мәсиһин һәвариләри онларын Рәббини һәбс едиб е’дам едән заман дүнјанын кәскин нифрәтинин шаһиди олмушлар. Онлар ејни заманда Исанын да өзүнү неҹә апардығыны ҝөрмүшләр. Исанын дин дүшмәнләри ону һәбс етмәк үчүн Ҝетсамани бағына ҝәлдиләр. Петер гылынҹы илә Исаны мүдафиә етмәјә ҹәһд ҝөстәрди, лакин Иса она деди: «Гылынҹыны јеринә гој, чүнки гылынҹ тутанларын һамысы гылынҹдан һәлак олаҹагдыр» (Матта 26:52; Лука 22:50, 51). Гәдим заманларда исраиллиләр дүшмәнләринә гаршы гылынҹла дөјүшүрдүләр. Амма артыг һәр шеј дәјишмишдир. Аллаһын Падшаһлығы «бу дүнјадан дејилдир» вә онун мүдафиәјә еһтијаҹы олан сәрһәдләри јох иди (Јәһја 18:36). Бир аздан Петер руһани халгын үзвү олмалы вә ҝөјләрдә вәтәндашлыг алмалы иди (Галатијалылара 6:16; Филипилиләрә 3:20, 21). О вахтдан бәри Мәсиһин давамчылары нифрәт вә тә’гибләрлә гаршылашдыглары заман өзләрини Исанын бујурдуғу кими — горхмаз, амма сүлһсевәр инсанлар кими апармалы идиләр. Онлар һәр шејин Јеһованын нәзарәти алтында олдуғуна инанмалы вә Онун көмәјинә үмид бағламалы идиләр (Лука 22:42).
19 Илләр өтдүкдән сонра Петер јазмышдыр: «Мәсиһ дә бизә бир нүмунә гојараг, бизим үчүн изтираб чәкди ки, биз Онун изләри илә ҝедәк. [...] Сөјүләркән, ҹавабында сөјмәди; әзаб чәкәркән, тәһдид етмәди, әксинә әдаләтлә мүһакимә Едәнә Өзүнү тәслим етди» (1 Петер 2:21-23). Исанын хәбәрдарлыг етдији кими, вахт кечдикҹә мәсиһчиләр сәрт тә’гибләрлә гаршылашмаға башладылар. Һәм биринҹи әсрдә, һәм дә бизим ҝүнләрдә онлар Исанын нүмунәсинә риајәт едирләр вә бунун сајәсиндә сүлһсевәр, лакин өз иманларыны гәтијјәтлә мүдафиә едән инсанлар кими танынырлар (Вәһј 2:9, 10). Әҝәр вәзијјәт тәләб едәрсә, ҝәлин биз дә белә давранаг (2 Тимотејә 3:12).
«Рәббимиз Иса Мәсиһи ҝејинин»
20-22. Мәсиһчиләр һансы мә’нада ‘Рәбб Иса Мәсиһи ҝејинирләр’?
20 Павел Ромадакы јығынҹаға јазмышдыр: «Рәббимиз Иса Мәсиһи ҝејинин вә ҹисмани тәбиәтин еһтирасларыны мәмнун етмәји дүшүнмәјин» (Ромалылара 13:14, И–93). Мәсиһчиләр Исаны палтар кими «ҝејинирләр». Онлар Исанын хүсусијјәтләрини вә давранышыны о гәдәр тәглид етмәјә чалышырлар ки, гејри-камил олсалар да, онун шәхсијјәтини әкс етдирирләр (1 Салониклиләрә 1:6).
21 Әҝәр Исанын һәјаты илә јахындан таныш олур вә онун јашадығы кими јашамаға чалышырыгса, онда «Рәббимиз Иса Мәсиһи ҝејинин» мәсләһәтинә риајәт едә биләҹәјик. Биз ону тәвазөкарлыгда, салеһлијә мәһәббәт, ганунсузлуға исә нифрәтдә, гардашлара севҝидә, дүнјанын әмәлләринә мүнасибәтдә вә әзијјәтләр заманы ҝөстәрдији сәбирдә тәглид едирик. Биз «ҹисмани тәбиәтин еһтирасларыны мәмнун етмәји» дүшүнмүрүк, јә’ни дүнјәви ишләрдә јүксәкликләрә чатмаға вә ја ҹисмани еһтираслары тә’мин етмәјә чалышмырыг. Әксинә, гәрар гәбул едәркән вә ја чәтин вәзијјәтдән чыхыш јолу ахтараркән өзүмүздән сорушуруг: «Бу вәзијјәтдә Иса неҹә давранарды? О мәндән нә ҝөзләјәрди?»
22 Вә нәһајәт, биз Рәббимиз кими хош хәбәри фәал сурәтдә тәблиғ едирик (Матта 4:23; 1 Коринфлиләрә 15:58). Мәсиһчиләр тәблиғдә дә Исадан нүмунә ҝөтүрүрләр вә нөвбәти мәгаләдә онларын буну неҹә етдикләри һагда өјрәнәҹәјик.
Изаһ едә биләрсинизми?
• Нәјә ҝөрә мәсиһчинин тәвазөкар олмасы олдугҹа ваҹибдир?
• Јахшылыға вә пислијә дүзҝүн мүнасибәти неҹә инкишаф етдирмәк олар?
• Мүгавимәтләрлә вә тә’гибләрлә гаршылашаркән мәсиһчиләр Исаны неҹә тәглид едирләр?
• ‘Рәбб Иса Мәсиһи ҝејинмәк’ нә демәкдир?
[7-ҹи сәһифәдәки шәкил]
Иса тәвазөкарлыға даир мүкәммәл нүмунә верди.
[8-ҹи сәһифәдәки шәкил]
Тәвазөкарлыг һәјатын бүтүн саһәләриндә, о ҹүмләдән тәблиғдә дә лазымдыр.
[9-ҹу сәһифәдәки шәкил]
Шејтан мәсиһчиләрә елә тәзјиг ҝөстәрмәјә гадирдир ки, јарамаз әјләнҹәләр онлара мәгбул ҝөрүнсүн.
[10-ҹу сәһифәдәки шәкил]
Гардашларымызын мәһәббәти мүгавимәтләрә таб ҝәтирмәкдә бизә көмәк едәр.