Ән үстүн мәһәббәт јолу илә ҝедирсинизми?

«АЛЛАҺ мәһәббәтдир». Һәвари Јәһја бу сөзләрлә Аллаһын ән әсас кејфијјәтини вурғулајыр (1 Јәһ. 4:8). Мәһз Аллаһын бәшәријјәтә олан мәһәббәти сајәсиндә биз Она јахынлаша вә Онунла сых мүнасибәт гура билирик. Аллаһын мәһәббәти бизә даһа неҹә тәсир едир? Бир нәфәр демишдир: «Адәтән, севдијимиз шејләр бизи формалашдырыр». Бу, доғрудан да, беләдир. Лакин ејни заманда, севдикләримиз вә бизи севәнләр дә бизи формалашдырыр. Аллаһын сурәтиндә јарадылдығымыз үчүн Онун мәһәббәтини һәјатымызда әкс етдирмәк габилијјәтинә маликик (Јар. 1:27). Буна ҝөрә дә һәвари Јәһја јазмышды: «Биз Ону севирик, чүнки О бизи биринҹи севмишдир» (1 Јәһ. 4:19).

Мәһәббәти тәсвир етмәк үчүн истифадә олунан дөрд сөз

Һәвари Павел мәһәббәти «әла јол» адландырмышды (1 Кор. 12:31). Нәјә ҝөрә? Павел һансы мәһәббәтдән данышырды? Бу суаллара ҹаваб тапмаг үчүн ҝәлин «мәһәббәт» сөзүнү диггәтлә арашдыраг.

Гәдим јунанлар мәһәббәти тәсвир етмәк үчүн дөрд әсас сөздән мүхтәлиф формаларда истифадә едирдиләр: сторгиʹ éрос, филиʹа вә агáпи. Мәсәлән, агáпи сөзү ‘мәһәббәтин’ тәҹәссүмү олан Аллаһы тәсвир етмәк үчүн истифадә олунурa. Бу мәһәббәтә даир профессор Уилјам Баркли өзүнүн «Әһди-Ҹәдидин сөзләри» адлы китабында дејир: «Агапи инсанын дүшүнҹәси илә бағлыдыр: бу садәҹә үрәкдә гејри-иради јаранан бир һисс дејил; бу, шүурлу шәкилдә һәјатда рәһбәр тутдуғумуз принсипдир. Агапи әсас етибарилә ирадәнин изһар олунмасы илә бағлыдыр». Бу контекстдә агáпи принсипләр әсасында тәзаһүр олунан мәһәббәт нөвүдүр, амма чох вахт ҝүҹлү һиссләрлә дә мүшајиәт олунур. Һәм пис, һәм дә јахшы принсипләр мөвҹуд олдуғундан тамамилә ајдындыр ки, мәсиһчиләр Јеһова Аллаһын Мүгәддәс Китабда јаздырдығы јахшы принсипләри әлдә рәһбәр тутмалыдырлар. Мәһәббәти тәсвир етмәк үчүн Мүгәддәс Китабда истифадә олунан агáпи вә диҝәр сөзләри мүгајисә етдикдә биз тәзаһүр етдирмәли олдуғумуз мәһәббәти даһа јахшы анлајаҹағыг.

Аиләдә мәһәббәт

Меһрибан вә мөһкәм аиләдә јашамаг неҹә дә хошдур! Ссторгиʹ јунан сөзү олуб әсасән бир аиләнин үзвләри арасында мөвҹуд олан тәбии бағлылыг телләринә аиддир. Мәсиһчиләр аилә үзвләринә мәһәббәт ҝөстәрмәјә чалышырлар. Павел пејғәмбәрлик етмишди ки, ахыр ҝүнләрдә үмуми ҝөтүрдүкдә инсанлар «шәфгәтсиз» олаҹаглар, јәни гоһумлар арасында тәбии бағлылыг олмајаҹаг (2 Тим. 3:1, 3).

Әфсуслар олсун ки, аилә үзвләри арасында зәрури олан тәбии бағлылыг јашадығымыз дүнјада чатышмыр. Нәјә ҝөрә бу гәдәр гадын аборт етдирир, бир чох аиләләрдә јашлы валидејнләрә гајғы ҝөстәрилмир вә бошанмаларын сајы ҝүнү-ҝүндән артыр? Ҹаваб инсанлар арасында тәбии бағлылығын олмамасыдыр.

Үстәлик, Мүгәддәс Китаб өјрәдир ки, «инсан үрәји һәр шејдән һијләҝәрдир» (Јер. 17:9). Аилә үзвләримизә бәсләдијимиз мәһәббәт үрәкдән ҝәлән һиссләрлә бағлыдыр. Лакин мараглыдыр ки, Павел әрин арвадына бәсләдији мәһәббәт һаггында бәһс едәркән агáпи сөзүндән истифадә етмишдир. Павел бу мәһәббәти Мәсиһин јығынҹаға ҝөстәрдији мәһәббәтлә мүгајисә етди (Ефес. 5:28, 29). Бу мәһәббәтин әсасыны аилә гурулушунун Баниси олан Јеһова Аллаһын гојдуғу принсипләр тәшкил едир.

Аилә үзвләримизә бәсләдијимиз сәмими мәһәббәт бизи јашлы валидејнләримизин вә ушагларымызын гајғысына галмаға тәшвиг едир. О һәмчинин валидејнләри, лазым ҝәлдикдә, ушагларыны мәһәббәтлә ҹәзаландырмаға вә онларын хәтринә дәјмәмәк үчүн һәр шејә иҹазә верәрәк үрәјијумшаглыгдан гачынмаға тәшвиг едир (Ефес. 6:1-4).

Романтик мәһәббәт вә Мүгәддәс Китаб принсипләри

Никаһда гадынла киши арасындакы мәһәббәт, һәгигәтән дә, Аллаһын әнамыдыр (Сүл. мәс. 5:15-17). Лакин романтик мәһәббәтә шамил едилән éрос сөзү Аллаһдан илһам алмыш Мүгәддәс Китаб јазычылары тәрәфиндән истифадә олунмамышдыр. Нәјә ҝөрә? Бир дәфә «Ҝөзәтчи Гүлләси»ндә изаһ олунмушду: «Ҝөрүнүр, бу ҝүн бүтүн дүнја гәдим јунанларын бурахдығы сәһви тәкрарлајыр. Онлар Еросу аллаһ һесаб едир, онун сәҹдәҝаһы өнүндә баш әјир вә гурбанлар ҝәтирирдиләр. [...] Лакин тарих ҝөстәрир ки, шәһвани мәһәббәт гаршысында баш әјмәк јалныз тәнәззүлә, мәнәвијјатын корланмасына вә әхлагсызлыға ҝәтириб чыхарды. Ола билсин, мәһз бу сәбәбдән Мүгәддәс Китаб јазычылары бу сөздән истифадә етмәмишләр». Кимәсә садәҹә онун заһири ҹазибәдарлығына ҝөрә вурулмамаг үчүн Мүгәддәс Китаб принсипләринин көмәји илә романтик һиссләримизи ҹиловламағы, јәни онлара һаким олмағы баҹармалыјыг. Буна ҝөрә дә өзүнүздән сорушун: «Севдијим адама бәсләдијим романтик һиссләр һәгиги мәһәббәтлә таразлашырмы?»

Ҹинси һиссләрин ҝүҹлү олдуғу ҝәнҹлик дөврүндә Мүгәддәс Китаб принсипләринә бағлы галан ҝәнҹләр әхлаги тәмизлији горујуб сахлаја биләрләр (Колос. 3:5). Биз никаһа Јеһовадан олан мүгәддәс әнам кими јанашырыг. Иса никаһда оланлар һаггында демишди: «Аллаһын бирләшдирдијини инсан ајырмамалыдыр» (Мат. 19:6). Мәсиһчи ҹүтлүкләр јалныз бир-бирини бәјәндикләри мүддәтдә бирҝә галмаг әвәзинә, евлилијин ҹидди мәсулијјәт олдуғуну дәрк едирләр. Проблемләр јарананда онлар асан чыхыш јолу ахтармырлар, әксинә, аиләләринин хошбәхтлији үчүн сәјлә Аллаһа мәгбул кејфијјәтләр тәзаһүр етдирмәјә чалышырлар. Бу ҹүр сәј ҝөстәрмәјин сајәсиндә онларын хошбәхтлији давамлы олаҹаг (Ефес. 5:33; Ибр. 13:4).

Достлар арасында мәһәббәт

Достсуз һәјатын ләззәти олмазды. Мүгәддәс Китабын бир мәсәлиндә дејилир: «Гардашдан даһа јахын дост да вар» (Сүл. мәс. 18:24). Јеһова истәјир ки, бизим әсил достларымыз олсун. Давудла Јонатан арасындакы јахын достлуг чохларымыза јахшы танышдыр (1 Шам. 18:1). Мүгәддәс Китабда һәмчинин Исанын һәвари Јәһјаны ‘севдији’ дејилир (Јәһ. 20:2). Јунан дилиндә «бағлылыг» вә ја «достлугла» әлагәдар филиʹа сөзү ишләнир. Јығынҹагда киминләсә јахын достлуг етмәк тәбиидир. Лакин 2 Петер 1:7 ајәси бизи «гардаш севҝисинә» (филаделфиʹа јунанҹа фиʹлос (дост) вә аделфóс (гардаш) сөзләриндән әмәлә ҝәлән мүрәккәб сөздүр) мәһәббәт (агáпи) әлавә етмәјә сәсләјир. Достлуғумузун мөһкәм олмасы үчүн бу мәсләһәтә әмәл етмәлијик. Јахшы оларды ки, өзүмүздән сорушаг: «Достлуг мәһәббәтим Мүгәддәс Китаб принсипләринә ујғундурму?»

Аллаһын Кәламындакы принсипләр бизә достларымыз арасында ајры-сечкилик салмамаға көмәк едир. Биз һамыја ејни ҝөзлә бахырыг: достларымызла мүлајим, башга инсанларла исә сәрт давранмырыг. Үстәлик, киминләсә достлашмаг үчүн биз она јалтагланмырыг. Ән ваҹиби исә, Мүгәддәс Китаб принсипләрини тәтбиг етмәк бизә дост сечәркән мүдрик олмаға вә ‘јахшы әхлагы позан’ достлугдан узаг дурмаға көмәк едир (1 Кор. 15:33).

Мисилсиз мәһәббәт телләри!

Мәсиһчиләри бирләшдирән телләр, һәгигәтән дә, мисилсиздир! Һәвари Павел јазмышды: «Гој мәһәббәт ријасыз олсун... Гардашлыг севҝиси илә бир-биринизи шәфгәтлә севин» (Ром. 12:9, 10). Бәли, мәсиһчиләр арасында ‘ријасыз мәһәббәт’ (агáпи) һөкм сүрүр. Бу садәҹә үрәкдә јаранан емосијалар јох, Мүгәддәс Китаб принсипләринә әсасланан бир һиссдир. Бунунла белә, Павел һәмчинин ‘гардашлыг севҝисиндән’ (филаделфиʹа) вә ‘шәфгәтдән’ (филóсторгос фиʹлос вә сторгиʹ сөзләриндән әмәлә ҝәлән мүрәккәб сөздүр) сөһбәт ачыр. Бир алимин сөзләринә әсасән, «гардашлыг севҝиси» «зәриф мәһәббәт, шәфгәт, хејирхаһлығын тәзаһүрү вә көмәклик ҝөстәрмәк» мәнасыны дашыјыр. Гардашлыг севҝиси агáпи мәһәббәти илә вәһдәт тәшкил едәрәк Јеһованын хидмәтчиләри арасында достлуг телләри јарадыр (1 Салон. 4:9, 10). «Шәфгәт» кими тәрҹүмә олунан филóсторгос сөзүнә исә Мүгәддәс Китабда јалныз бир дәфә раст ҝәлинир вә адәтән аилә үзвләри арасында һөкм сүрән мүнасибәтләрә бәнзәр јахын мүнасибәтләрин олмасына ишарә едир.

Һәгиги мәсиһчиләри бирләшдирән аилә мәһәббәти вә әсил достлуг телләридир, онларын арасындакы бүтүн мүнасибәтләр исә Мүгәддәс Китаб принсипләринә әсасланан мәһәббәтдән ирәли ҝәлир. Мәсиһчи јығынҹағы инсанларын үнсијјәт етмәк үчүн топлашдыглары јер вә ја дүнјәви тәшкилат дејил, әксинә, Јеһова Аллаһа бирҝә ибадәт едән меһрибан бир аиләдир. Биз һәмиманлыларымызы баҹы вә гардаш дејә чағырыр вә буна мүвафиг мүнасибәт бәсләјирик. Онлар руһани аиләмизин бир гисмидир, биз онлары дост кими севир вә онларла һәмишә Мүгәддәс Китаб принсипләринә әсасән давранырыг. Ҝәлин һәр заман бүтүн мәсиһчиләри бирләшдирән вә мәсиһчи јығынҹағынын сәҹијјәви хүсусијјәти олан мәһәббәт телләринин мөһкәмләнмәсинә өз төһфәмизи верәк (Јәһ. 13:35).

[Һашијә]

[12-ҹи сәһифәдәки шәкил]

Бизи бирләшдирән мәһәббәт телләринин мөһкәмләнмәсинә өз төһфәмизи неҹә веририк?