«Мәһз инди илтифат вахтыдыр!»
«Мәһз инди илтифат вахтыдыр! Инди хилас ҝүнүдүр!» (2 КОР. 6:2).
1. Нәјә ҝөрә биз һансы ишин ән ваҹиб олдуғуну дәрк етмәлијик?
«ҺӘР ШЕЈИН өз вахты вар, ҝөјләр алтында һәр ишин өз вахты вар» (Ваиз 3:1). Сүлејманын сөзләринә ҝөрә, әкин-бичинлә мәшғул олмағымыздан, сәјаһәтә чыхмағымыздан, алыш-вериш етмәјимиздән, һәр һансы мүнасибәтләр гурмағымыздан асылы олмајараг, һәр бир хејирли ишин өз вахты олдуғуну дәрк етмәк ваҹибдир. Бунунла белә, биз истәнилән вахт һансы ишин ән ваҹиб олдуғуну да сезмәлијик. Башга сөзлә, һәјатымызда нәји биринҹи јерә гојдуғумуза диггәт јетирмәлијик.
2. Һарадан мәлумдур ки, Иса тәблиғ едәркән һансы вахтда јашадығыны јахшы баша дүшүрдү?
2 Иса Мәсиһ јер үзүндә оларкән һансы вахтда јашадығыны вә нә етмәли олдуғуну јахшы баша дүшүрдү. О, һәјатда һансы ишин даһа ваҹиб олдуғуну јадда сахлајырды вә билирди ки, чохдан ҝөзләнилән бу вахт — Мәсиһ барәдә бир чох пејғәмбәрликләрин јеринә јетмәк вахты артыг ҝәлиб чатыб (1 Пет. 1:11; Вәһј 19:10). Өзүнүн вәд олунмуш Мәсиһ олдуғуну сүбут етмәк үчүн Иса бәзи ишләри һәјата кечирмәли иди. Онун гаршысында Падшаһлыг һаггында хош хәбәр барәдә әтрафлы шаһидлик вермәк вә ҝәләҹәкдә онун Падшаһлыг шәрикләри олаҹаг инсанлары јығмаг иши дурурду. Бундан әлавә, о, јерин уҹгарларынадәк хош хәбәри тәблиғ едәҹәк вә шаҝирд һазырлајаҹаг мәсиһчи јығынҹағынын әсасыны гојмалы иди (Марк 1:15).
3. Һансы вахтда јашадығыны дәрк етмәси Исанын һәјат тәрзинә неҹә тәсир ҝөстәрирди?
3 Һансы вахтда јашадығыны дәрк етмәси Исанын һәјатына мүсбәт тәсир ҝөстәрир вә Атасынын ирадәсини ҹанла-башла јеринә јетирмәјә тәшвиг едирди. О, шаҝирдләринә демишди: «Доғрудан да, мәһсул болдур, амма бичинчиләр аздыр. Буна ҝөрә дә бичинин Саһибиндән диләјин ки, мәһсулу јығмаға бичинчи ҝөндәрсин» (Лука 10:2; Мал. 4:5, 6). Иса шаҝирдләри арасындан әввәлҹә 12, сонра исә 70 нәфәр сечди вә онлара конкрет ҝөстәришләр вериб: «Сәмави падшаһлыг јахынлашыб», — дејә севиндириҹи хәбәри тәблиғ етмәјә ҝөндәрди. Исаја ҝәлдикдә исә, онун барәсиндә Мүгәддәс Китабдан охујуруг: «[О,] он ики шаҝирдинә ҝөстәриш вериб онлардан ајрылды, тәблиғ етмәк вә Аллаһын сөзүнү өјрәтмәк үчүн башга шәһәрләрә ҝетди» (Мат. 10:5—7; 11:1; Лука 10:1).
4. Павел Исаны нәдә тәглид едирди?
4 Иса садиг олмагда вә һәгиги ибадәтин гејрәтини чәкмәкдә бүтүн давамчылары үчүн ән јахшы нүмунә гојуб. Һәвари Павел һәмиманлыларына нөвбәти сөзләри јазаркән мәһз буну нәзәрдә тутурду: «Мән Мәсиһдән нүмунә ҝөтүрдүјүм кими, сиз дә мәндән нүмунә ҝөтүрүн» (1 Кор. 11:1). Павел Мәсиһи нәдә тәглид едирди? Әсас етибарилә, хош хәбәри вар ҝүҹү илә тәблиғ етмәкдә. Онун јығынҹаглара јаздығы мәктубларда «ишиниздә ләнҝ олмајын», «Јеһоваја ҹанла-башла хидмәт един», «Рәббин ишиндә даима чох чалышын» вә «һәр нә едирсинизсә, ҹанла-башла един, санки... Јеһова үчүн едирсиниз» кими ифадәләрә раст ҝәлмәк олар (Ром. 12:11; 1 Кор. 15:58; Колос. 3:23). Павел Дәмәшгә ҝедәркән Ағамыз Иса Мәсиһлә растлашдығыны вә онун шаҝирд Һананја васитәсилә дедији сөзләри һеч вахт унутмурду: «Бу адам адымы милләтләрә, о ҹүмләдән һөкмдарлара вә Исраил оғулларына билдирмәк үчүн сечдијим аләтдир» (Һәв. иш. 9:15; Ром. 1:1, 5; Галат. 1:16).
«Мәһз инди илтифат вахтыдыр!»
5. Павели ҹанла-башла тәблиғ етмәјә нә тәшвиг едирди?
5 «Һәвариләрин ишләри» китабыны охујаркән Павелин ҹанла-башла вә ҹәсарәтлә тәблиғ етдијини ҝөрмәмәк гејри-мүмкүндүр (Һәв. иш. 13:9, 10; 17:16, 17; 18:5). О, мүһүм дөврдә јашадығыны дәрк едирди. Павел демишди: «Мәһз инди илтифат вахтыдыр! Инди хилас ҝүнүдүр!» (2 Кор. 6:2). Бабилдә сүрҝүндә олан јәһудиләрә мәһз ерамыздан әввәл 537-ҹи ил евләринә гајытмаг үчүн мүнасиб вахт иди (Јешаја 49:8, 9). Бәс Павел бурада нәји нәзәрдә тутурду? Бу суала ҹаваб тапмаг үчүн контекстә нәзәр салаг.
6, 7. Мүасир дөврдә јашајан мәсһ олунмушлара һансы шәрәфли иш һәвалә олунуб вә онлара кимләр көмәк едир?
6 Һәмин мәктубун 5-ҹи фәслиндә Павел она вә диҝәр мәсһ олунмушлара һәвалә олунан бөјүк шәрәф барәдә јазмышды. (2 Коринфлиләрә 5:18—20 ајәләрини оху.) О изаһ етмишди ки, Аллаһ онлары хүсуси бир мәгсәд үчүн чағырыб: онлар «барышыг хидмәтини» иҹра етмәли, ‘Аллаһла барышмалары’ үчүн инсанлара јалвармалы идиләр. Бу, Аллаһла достлуг мүнасибәтләрини бәрпа етмәк вә Онунла сүлһдә олмаг демәк иди.
7 Еден бағында галдырылан үсјандан сонра бүтүн бәшәријјәт Јеһовадан узаглашды (Ром. 3:10, 23). Бәшәријјәт әзаб-әзијјәт вә өлүм ҝәтирән руһани зүлмәтә гәрг олду. Павел јазмышды: «Биз билирик ки, бүтүн хилгәт индијә кими инилдәјиб әзаб чәкир» (Ром. 8:22). Лакин Аллаһ инсанлары ҝери гајытмаға вә ја Онунла барышмаға тәшвиг етмәк, даһа доғрусу, ‘јалвармаг’ үчүн тәдбирләр ҝөрүб. Бу, о вахтлар һәвари Павелә вә диҝәр мәсһ олунмуш мәсиһчиләрә һәвалә олунан хидмәт иди. Бу ‘илтифат вахты’ Исаја иман ҝәтирәнләр үчүн ‘хилас ҝүнү’ ола биләрди. Бу ҝүн дә бүтүн мәсһ олунмуш мәсиһчиләр әмәкдашлары олан ‘башга гојунларла’ бирҝә чијин-чијинә чалышараг инсанлары бу ‘илтифат вахтындан’ фајдаланмаға дәвәт едирләр (Јәһ. 10:16).
8. Аллаһла барышмаг чағырышыны гејри-ади едән нәдир?
8 Еден бағындакы үсјанын нәтиҹәсиндә инсанларла Аллаһ арасында учурумун јаранмасынын сәбәбкары јалныз вә јалныз инсанлар олса да, бу мүнасибәтләри бәрпа етмәк үчүн илк аддымы Јеһова атыб. Јеһованын Онунла барышмаг чағырышыны гејри-ади едән дә мәһз бу амилдир (1 Јәһ. 4:10, 19). О, һансы тәдбири ҝөрдү? Бу суалын ҹавабыны Павелин јаздығы мәктубдан охујуруг: «Аллаһ бәшәријјәтин ҝүнаһларыны үзә вурмадан Мәсиһ васитәсилә дүнјаны Өзү илә барышдырды. Бу барышыг сөзүнү дә бизә һәвалә етди» (2 Кор. 5:19; Јешаја 55:6).
9. Павел Аллаһын мәрһәмәтинә ҝөрә миннәтдарлығыны неҹә ҝөстәрмишди?
9 Фидјә гурбанлығыны тәгдим етмәклә Јеһова бу гурбанлыға иман едәнләрин ҝүнаһларынын бағышланмасыны, Онунла достлуг мүнасибәтләрини бәрпа етмәји вә Онунла сүлһдә олмағы мүмкүн етди. Бундан әлавә, Јеһова Өз елчиләрини дүнјанын һәр бир ҝушәсинә ҝөндәрир ки, инсанлар, нә гәдәр ҝеҹ дејил, Онунла барышсынлар. (1 Тимотејә 2:3—6 ајәләрини оху.) Аллаһын ирадәсинин нәдән ибарәт олдуғуну баша дүшән вә һансы дөврдә јашадығыны дәрк едән Павел јорулмадан «барышыг хидмәтини» иҹра едирди. Јеһованын ирадәси дәјишмәјиб. О, бу ҝүн дә инсанлара барышыг әлини узадыр. Павелин «мәһз инди илтифат вахтыдыр» вә «инди хилас ҝүнүдүр» сөзләри һәлә дә гүввәдәдир. Јеһова неҹә дә мәрһәмәтли вә шәфгәтли Аллаһдыр! (Чых. 34:6, 7).
«Бу лүтф һәдәр ҝетмәсин»
10. ‘Хилас ҝүнү’ кечмишдә јашајан мәсһ олунмуш мәсиһчиләр үчүн һансы мәнаны кәсб едирди вә бу, бизим ҝүнләрдә јашајан мәсһ олунмушлар үчүн һансы мәнаны кәсб едир?
10 ‘Мәсиһлә вәһдәтдә’ оланлар Аллаһын лүтфүндән фајдаланан илк инсанлар иди (2 Кор. 5:17, 18). Онлар үчүн ‘хилас ҝүнү’ ерамызын 33-ҹү илинин Әллинҹи ҝүн бајрамында башламышды. О вахтдан етибарән онлара «барышыг сөзүнү» бәјан етмәк тапшырығы һәвалә олунмушду. Бу ҝүн дә јер үзүндә јашајан мәсһ олунмуш мәсиһчиләр «барышыг хидмәтини» иҹра едирләр. Онлар баша дүшүрләр ки, һәвари Јәһјанын пејғәмбәрлик ҝөрүнтүсүндәки дөрд мәләк ‘јерин дөрд күләјини тутуб сахлајыр ки, јерин үзәринә һеч бир күләк әсмәсин’. Бу сәбәбдән инди дә ‘хилас ҝүнү’ вә «илтифат вахтыдыр» (Вәһј 7:1—3). Буна ҝөрә дә мәсһ олунмушларын јер үзүндә олан һиссәси XX әсрин әввәлиндән та бизим ҝүнләрә гәдәр јерин уҹгарларынадәк «барышыг хидмәтини» вар ҝүҹләри илә иҹра едирләр.
11, 12. XX әсрин әввәлиндә јашајан мәсһ олунмуш мәсиһчиләр һансы вахтда јашадыгларыны дәрк етдикләрини неҹә ҝөстәрирдиләр? (15-ҹи сәһифәдәки шәклә бахын.)
11 Мәсәлән, «Јеһованын Шаһидләри — Аллаһын Падшаһлығынын мүждәчиләри» китабында (рус.) гејд олунур ки, XX әсрин астанасында Чарлз Тејз Рассел вә онун әмәкдашлары там әмин идиләр ки, бичин дөврүндә јашајырлар вә бүтүн инсанлар азадлыг бәхш едән һәгигәти ешитмәлидирләр. Бәс бунун үчүн онлар нә едирдиләр? Бу гардашлар бичин вахтында, јәни ‘илтифат вахтында’ јашадыгларыны дәрк едәрәк инсанлары тәкҹә ибадәт мәрасимләринә дәвәт етмирдиләр. Христиан аләминин руһаниләри узун мүддәт јалныз белә давранырдылар. Онлардан фәргли олараг, мәсһ олунмуш мәсиһчиләр хош хәбәри јајмағын јени практики үсулларыны ахтарырдылар. Үстәлик, онлар ишләринин ирәлиләмәси үчүн ән сон техноложи васитәләрдән истифадә едирдиләр.
12 Чох чалышган инсанлардан ибарәт олан бу кичик груп Падшаһлыг һаггында хош хәбәри јајмаг үчүн трактат, брошүра, журнал вә китаблардан истифадә едирди. Онлар һәмчинин минләрлә гәзетләрә моизә вә мәгаләләр ҝөндәрирдиләр. Милли вә бејнәлхалг радио васитәсилә Мүгәддәс Јазылара әсасланан нитгләр јајымлајырдылар. Кино сәнајеси ҝениш күтлә үчүн сәсли филмләр бурахмаға башламаздан өнҹә, онлар сәслә ејни вахтда нүмајиш етдирилән һәрәкәтли шәкилләр истеһсал вә истифадә едирдиләр. Онларын дурмадан ҹанла-башла чалышмаларынын бәһрәси нә олду? Бу ҝүн «Аллаһла барышын» чағырышына једди милјондан чох инсан һај вериб вә онлар башгаларыны да буну етмәјә дәвәт едирләр. Һәгигәтән дә, Јеһованын о дөврдәки хидмәтчиләри, сајҹа аз вә тәҹрүбәсиз олмаларына бахмајараг, һәгиги ибадәтин гејрәтини чәкмәкдә ҝөзәл нүмунә гојублар.
13. Биз Аллаһын һансы мәгсәдини нәзәрдән гачырмамалыјыг?
13 Павелин «мәһз инди илтифат вахтыдыр» сөзләри һәлә дә гүввәдәдир. Јеһованын лүтфүнү дадан бизләрә барышыг хәбәрини ешидиб ону гәбул етмәк имканы верилдији үчүн Она үрәкдән миннәтдарыг. Гүрурланмаг әвәзинә, биз Павелин нөвбәти сөзләринә ҹидди риајәт етмәлијик: «Биз... һәм дә сизә јалварырыг: Аллаһын лүтфүнү аландан сонра елә јашајын ки, бу лүтф һәдәр ҝетмәсин». Башга сөзлә десәк, Аллаһын бизә лүтф ҝөстәрмәсинин мәгсәдини нәзәрдән гачырмамалыјыг (2 Кор. 6:1). Аллаһын лүтф ҝөстәрмәсинин мәгсәди исә ‘Мәсиһ васитәсилә дүнјаны Өзү илә барышдырмагдыр’ (2 Кор. 5:19).
14. Бир чох өлкә вә әразиләрдә һансы мүсбәт дәјишиклик баш верир?
14 Әксәр инсанлар Шејтан тәрәфиндән кор едилдикләри үчүн һәлә дә Аллаһдан узагдырлар вә Онун нәјә ҝөрә бизә лүтф ҝөстәрмәсиндән бихәбәрдирләр (2 Кор. 4:3, 4; 1 Јәһ. 5:19). Дүнјанын вәзијјәтинин ҝет-ҝедә писләшмәси инсанларын ҝөзү габағындадыр. Буна биҝанә олмајан адамлара бәшәријјәтин үзләшдији бәдбәхтликләрин вә әзаб-әзијјәтләрин көкүндә инсанларын Аллаһдан узаглашмасы дурдуғуну ҝөстәрәндә чохлары хош хәбәрә һај верир. Һәтта инсанларын хош хәбәрә лагејд јанашдығы өлкә вә әразиләрдә белә бир чохлары һәгигәти гәбул едир вә Аллаһла барышмаг үчүн лазыми аддымлар атырлар. Бүтүн бунлары нәзәрә алараг, «Аллаһла барышын» чағырышыны даһа сәјлә бәјан етмәјин инди әсил вахты олдуғуну дәрк едирикми?
15. Инсанларын Аллаһа дөндүкләри тәгдирдә раһатлыг һисс едәҹәкләрини тәблиғ етмәк әвәзинә, биз бүтүн инсанларын нәји билмәләрини истәјирик?
15 Бизим ишимиз садәҹә олараг инсанлара Аллаһа дөндүкләри тәгдирдә бүтүн проблемләринин һәлл олунаҹағыны вә онларын раһатлыг һисс едәҹәкләрини демәкдән ибарәт дејил. Әксәр инсанлар килсә вә диҝәр ибадәт јерләринә мәһз бу мәгсәдлә үз тутурлар. Дин хадимләри дә дәридән-габыгдан чыхырлар ки, онларын бу арзулары «үрәкләриндә галмасын». (2 Тимотејә 4:3, 4 ајәләрини оху.) Биз бу мәгсәдлә хидмәт етмирик. Биз Јеһованын мәһәббәтдән ирәли ҝәләрәк Иса Мәсиһ васитәсилә ҝүнаһлары бағышламаға һазыр олдуғу барәдә тәблиғ едирик. Беләликлә, инсанлар Јеһоваја јахынлаша вә Онунла барыша биләрләр (Ром. 5:10; 8:32). Лакин ‘илтифат вахты’ тезликлә сона чатаҹаг.
«Аллаһын руһу илә ҹошун»
16. Павел нәјин сајәсиндә мәтанәтлә вә ҹәсарәтлә тәблиғ едирди?
16 Һәгиги ибадәт үчүн гејрәт неҹә инкишаф етдирә вә горујуб сахлаја биләрик? Бәзиләри тәбиәтҹә утанҹаг вә ја азданышандырлар вә онлар үчүн һиссләрини ачыг бүрузә вермәк, јахуд инсанларла үнсијјәт гурмаг чәтин ола биләр. Лакин јадда сахламалыјыг ки, гејрәт нә емосијаларын, јахуд севинҹин заһири тәзаһүрүдүр, нә дә ки инсанын хасијјәтиндән асылыдыр. Павел һәмиманлыларыны: «Аллаһын руһу илә ҹошун», — дејә тәшвиг едәркән бу хүсусијјәти инкишаф етдирмәк вә ону горујуб сахламаг үчүн нә тәләб олундуғуну ҝөстәрди (Ром. 12:11). Һәвари Павелин ҹәсарәтлә вә мәтанәтлә тәблиғ етмәсиндә Јеһованын мүгәддәс руһунун бөјүк ролу вар иди. Исанын Павели чағырмасындан онун икинҹи дәфә Ромада зиндана атылыб ишҝәнҹә илә өлдүрүлмәсинәдәк 30 илдән чох вахт кечмәсинә бахмајараг, онун ҝөстәрдији гејрәт аз да олса зәифләмәмишди. Павел һәмишә руһу васитәсилә она лазыми гүввә верән Аллаһа үмид бағлајырды. О демишди: «Мәнә гүввәт верәнин сајәсиндә һәр шејә ҝүҹүм чатыр» (Филип. 4:13). Һәгигәтән дә, Павел бизә чох ҝөзәл нүмунә гојуб!
17. ‘Аллаһын руһу илә ҹошмаг’ үчүн нә етмәлијик?
17 «Ҹошмаг» кими тәрҹүмә олунан сөзүн һәрфи мәнасы «гајнамаг» демәкдир («Падшаһлығын Сәтиралты Тәрҹүмәси», инҝ.). Чајдандакы су гајнар галсын дејә онун алты һәмишә јанмалыдыр. Ејнилә, ‘Аллаһын руһу илә ҹошмаг’ үчүн бу руһ даима үзәримиздә олмалыдыр. Она ҝөрә дә Јеһованын бизи руһән мөһкәмләндирмәк үчүн тәгдим етдији һәр шејдән истифадә етмәлијик. Башга сөзлә, аиләви ибадәтә вә јығынҹаг ҝөрүшләринә ҹидди јанашмалыјыг, јәни мүнтәзәм олараг аиләви вә шәхси өјрәнмә кечирмәли, дуа етмәли вә ҝөрүшләрдә иштирак етмәлијик. Онда бизим даима «гајнар» галмағымыз үчүн «одумуз» олаҹаг, бунун сајәсиндә дә биз һәмишә ‘Аллаһын руһу илә ҹошаҹағыг’. (Һәвариләрин ишләри 4:20; 18:25 ајәләрини оху.)
18. Аллаһа һәср олунмуш мәсиһчиләр олан бизләрин бүтүн диггәти һансы ишдә олмалыдыр?
18 Өзүнү һансыса ишә һәср едән инсанын бүтүн диггәти һәмин ишдә олур. Белә инсаны мәгсәдиндән јајындырмаг вә ја бу ишә олан һәвәсини өлдүрмәк асан дејил. Јеһоваја һәср олунмуш мәсиһчиләр олан бизләрин мәгсәди, Иса кими, Јеһованын истәдији һәр бир иши јеринә јетирмәкдир (Ибр. 10:7). Һал-һазырда Јеһованын ирадәси мүмкүн гәдәр чох инсанын Онунла барышмасындан ибарәтдир. Буна ҝөрә дә ҝәлин Исаны вә Павели тәглид едәрәк бу ваҹиб вә тәҹили иши ҹанла-башла јеринә јетирәк.
Јадыныздадырмы?
• Һәвари Павелә вә диҝәр мәсһ олунмушлара һәвалә олунан ‘барышыг хидмәти’ нәдән ибарәт иди?
• Мәсһ олунмушларын јер үзүндә олан һиссәси ‘илтифат вахтындан’ неҹә фајдаланыр?
• Мәсиһчиләр ‘Аллаһын руһу илә ҹошмаг’ үчүн нә етмәлидирләр?
[12-ҹи сәһифәдәки шәкил]
Павел Ағамыз Иса Мәсиһлә ҝөрүшүнү һеч вахт унутмурду