Јеһованын ајдын хәбәрдарлыгларына диггәт јетирирсәнми?
«Јол будур, ҝедин бу јолла» (ЈЕШАЈА 30:21).
1, 2. Шејтанын мәгсәди нәдир вә Аллаһын Кәламы бизә неҹә көмәк едир?
СӘҺВ истигамәти ҝөстәрән јол ишарәси инсаны аздырмагла јанашы, тәһлүкәли ола биләр. Туталым, јахын достун сәни хәбәрдар едиб ки, бир пис инсан еһтијатсыз сәјјаһлара зәрәр вурмаг мәгсәдилә гәсдән јол ишарәсини дәјишиб. Мәҝәр онун хәбәрдарлығына гулаг асмајаҹагсан?
2 Шејтан һәмин пис инсан кими бизи әбәди һәјата апаран јолдан аздырмаг мәгсәдини ҝүдүр (Вәһј 12:9). Бунун үчүн о, әввәлки мәгаләдә мүзакирә етдијимиз үсуллардан истифадә едир (Мат. 7:13, 14). Амма шүкүрләр олсун ки, Шејтанын тәләсинә дүшмәмәјимиз үчүн хејирхаһ Аллаһымыз Јеһова бизи онун аздырыҹы «јол ишарәләриндән» хәбәрдар едир. Инди исә ҝәлин Шејтанын бизи аздырмаг үчүн истифадә етдији даһа үч үсулу арашдыраг. Аллаһын Кәламы јолумузу азмајаг дејә бизә ҝөстәришләр верир. Ҝәлин һәмин ҝөстәришләри арашдырараг архамыздан: «Јол будур, ҝедин бу јолла», — дејәрәк бизә дүзҝүн јолу ҝөстәрән Јеһованы тәсәввүр етмәјә чалышаг (Јешаја 30:21). Онун ајдын хәбәрдарлыглары үзәриндә дүшүнмәк бу ҝөстәришләрә әмәл етмәк гәтијјәтимизи мөһкәмләндирәҹәк.
«Сахта мүәллимләр»ин ардынҹа ҝетмә
3, 4. а) Нәјә ҝөрә сахта мүәллимләри сују гурумуш гујуја бәнзәтмәк олар? б) Сахта мүәллимләр һарадан пејда олурлар вә онларын мәгсәди нәдир?
3 Тәсәввүр ет ки, јолун сәһрадан кечир вә бәрк сусамысан. Бирдән узагда су гујусу ҝөрүб она тәрәф ҝедирсән. Амма гујуја чатанда ҝөрүрсән ки, ичи бошдур. Мәҝәр мәјус олмајаҹагсан? Сахта мүәллимләри дә сују гурумуш гујуја бәнзәтмәк олар. Һәгигәт сулары үчүн онлара үз тутан инсанлар чох мәјус олаҹаглар. Јеһова һәвари Павел вә Петер васитәсилә бизи белә мүәллимләрдән чәкиндирир. (Һәвариләрин ишләри 20:29, 30; 2 Петер 2:1—3 ајәләрини оху.) Сахта мүәллимләр кимләрдир? Аллаһын илһамландырдығы бу ики китаб бизә онларын кимлијини вә инсанлары неҹә алдатдыгларыны ачыглајыр.
4 Һәвари Павел Ефес јығынҹағынын ағсаггалларына демишди: «Сизин араныздан адамлар пејда олаҹаг вә... һәгигәти тәһриф едәҹәкләр». Петер исә һәмиманлыларына јазмышды: «Сизин аранызда... сахта мүәллимләр пејда олаҹаг». Демәли, сахта мүәллимләр јығынҹағын ичиндән чыхырлар. Онлар дөнүкләрдирa. Онларын мәгсәди нәдир? Дөнүкләр бир заманлар севдикләри тәшкилаты тәрк етмәклә кифајәтләнмирләр. Павел изаһ едир ки, онларын мәгсәди «шаҝирдләри» архаларынҹа апармагдыр. Бурада «шаҝирд» сөзү алтында Мәсиһин давамчылары нәзәрдә тутулур. Ҝедиб өзләринә башга јердә шаҝирд ахтармаг әвәзинә, дөнүкләр Мәсиһин шаҝирдләрини өз тәрәфләринә чәкмәјә чалышырлар. Јыртыҹы ҹанаварлар гојунлары парчаладығы кими, сахта мүәллимләр дә јығынҹаг үзвләринин иманыны мәһв етмәк вә онлары һәгигәтдән дөндәрмәк истәјирләр (Мат. 7:15; 2 Тим. 2:18).
5. Сахта мүәллимләр бизи алдатмаг үчүн һансы үсуллара әл атырлар?
5 Сахта мүәллимләр инсанлары алдатмаг үчүн һијләјә әл атырлар. Гачагмалчылар өлкәјә ҝизлин-ҝизлин мал ҝәтирдији кими, дөнүкләр дә «хәлвәтҹә» зәрәрли тәһриф олунмуш фикирләрини јығынҹаға јеридирләр. Пешәкар ҹинајәткар орижинал сәнәддән фәргләнмәјән сахта сәнәд дүзәлтдији кими, дөнүкләр дә «сахта» сөзләрин вә ја јалан дәлилләрин көмәјилә өз фикирләрини һәгигәт кими гәләмә вермәјә чалышырлар. Онлар Мүгәддәс Јазылары тәһриф едәрәк «јалан тәлимләрини јајырлар» (2 Пет. 2:1, 3, 13; 3:16). Әлбәттә, дөнүкләр буну бизим гејдимизә галдыгларына ҝөрә етмирләр. Әҝәр биз онларын ардынҹа ҝетсәк, әбәди һәјата апаран јолдан дөнмүш олаҹағыг.
6. Сахта мүәллимләрлә әлагәдар Мүгәддәс Китаб бизә һансы мәсләһәти верир?
6 Өзүмүзү сахта мүәллимләрдән неҹә горуја биләрик? Мүгәддәс Китаб буна даир ајдын мәсләһәт верир. (Ромалылара 16:17; 2 Јәһја 9—11 ајәләрини оху.) Орада дејилир: «Онлардан узаг ҝәзин». Башга тәрҹүмәләрдә бу ифадә «онлардан еһтијат един», «онлардан чәкинин» кими верилиб. Ҝөрдүјүмүз кими, Аллаһын Кәламынын вердији мәсләһәт бирмәналыдыр. Туталым, һәким сәнә өлүмҹүл јолухуҹу хәстәлијә тутулан инсандан узаг дурмағы мәсләһәт ҝөрүр. Һәкимин мәсләһәти ајдындыр вә сән онун дедијинә дәгиг әмәл етмәјә чалышаҹагсан. Демәк олар ки, дөнүкләр дә хәстәлијә тутулублар вә башгаларыны сахта тәлимләринә јолухдурмаға чалышырлар (1 Тим. 6:3, 4). Даһи Һәкимимиз олан Јеһова бизә онларла тәмасда олмагдан гачынмағы мәсләһәт ҝөрүр. Онун мәсләһәти ајдындыр. Бәс биз она әмәл етмәјә нә дәрәҹәдә гәрарлыјыг?
7, 8. а) Сахта мүәллимләрдән неҹә узаг ҝәзә биләрик? б) Нәјә ҝөрә сән сахта мүәллимләрә гаршы гәти мөвге тутмаға гәрарлысан?
7 Сахта мүәллимләрдән неҹә узаг ҝәзә биләрик? Биз онларла нә саламлашмалыјыг, нә дә ки евимизә дәвәт етмәлијик. Һәмчинин онларын нәшр етдији китаб вә журналлары охумамалы, телевизијада чыхыш едәндә гулаг асмамалы, онларын Интернет сәһифәләринә дахил олмамалы вә ја орада онларын јаздыгларына өз шәрһләримизи әлавә етмәмәлијик. Нәјә ҝөрә онлара гаршы белә гәти мөвге тутуруг? Ән ваҹиб сәбәб одур ки, биз «һәгигәт Аллаһы» олан Јеһованы севирик. Буна ҝөрә дә Онун һәгигәт Кәламына зидд ҝедән тәһриф олунмуш тәлимләр бизим үчүн мараглы дејил (Мәз. 31:5, «Китабы Мукаддес»; Јәһ. 17:17). Үстәлик, биз Онун тәшкилатыны да севирик. Ахы мәһз бу тәшкилат бизә Аллаһын адыны вә онун мәнасыны, Јер күрәсинә даир нијјәтини, өлүләрин вәзијјәтини вә онларын дириләҹәјини ачыглајыб. Илк дәфә бу вә диҝәр ҝөзәл һәгигәтләр барәдә өјрәнәндә һансы һиссләр кечирмишдин? Белә исә, бу дәјәрли һәгигәтләри сәнә өјрәдән тәшкилата гара јахан инсанлара гулаг асмаға дәјәрми? (Јәһ. 6:66—69).
8 Сахта мүәллимләр нә дејирләр-десинләр, биз онларын архасынҹа ҝедән дејилик! Сусуз гујуја бәнзәјән инсанлара гулаг асмағын нә фајдасы вар? Ахы онлара инананлар алданыр вә мәјус олурлар. Буна ҝөрә дә ҝәлин Јеһоваја вә узун илләрдир ки, саф вә сәрин һәгигәт сулары илә руһани сусузлуғумузу јатыран тәшкилата садиг галмаға гәти гәрарлы олаг! (Јешаја 55:1—3; Мат. 24:45—47).
«Ујдурма рәвајәтләрә» мәһәл гојма
9, 10. Ујдурма рәвајәтләрлә әлагәдар Павел Тимотејә һансы мәсләһәти вермишди вә бу ифадә алтында о, нәји нәзәрдә тутурду? (Һашијәјә бах.)
9 Киминсә јол ишарәсини сәһв истигамәтә дәјишдирдијини сезмәк бәзән асан, бәзән дә чәтин олур. Шејтанын бизи аздырмаг үчүн истифадә етдији үсуллар барәдә дә ејни шеји демәк олар. Һәвари Павел онун истифадә етдији ҝизли үсулларын бири барәдә бизи хәбәрдар едир. Сөһбәт ујдурма рәвајәтләрдән ҝедир. (1 Тимотејә 1:3, 4 ајәләрини оху.) Бәс ујдурма рәвајәтләр нәдир? Онлара мәһәл гојмамаг үчүн нә едә биләрик? Әбәди һәјата апаран јолдан дөнмәмәк үчүн биз бу суалларын ҹавабыны тапмалыјыг.
10 Павелин ујдурма рәвајәтләр һаггында хәбәрдарлығы ағсаггал кими хидмәт едән Тимотејә үнванладығы биринҹи мәктубда јазылыб. Тимотеј јығынҹағын руһани тәмизлијини горумалы вә һәмиманлыларына Јеһоваја садиг галмаға көмәк етмәли иди (1 Тим. 1:18, 19). Павелин бурада истифадә етдији јунан сөзүнүн алтында әфсанә, јалан нәзәрдә тутулур. «Бејнәлхалг стандарт Мүгәддәс Китаб енсиклопедијасы»нда да изаһ олунур ки, ујдурма рәвајәтләр «реаллыгла һеч бир әлагәси олмајан (дини) рәвајәтләрдир» («The International Standard Bible Encyclopaedia»). Ола билсин, Павел сенсасијалы мәлуматлар вә ја ујдурулмуш әфсанәләр әсасында јаранан дини јаланлары нәзәрдә тутурдуb. Белә рәвајәтләр јалныз «бош јерә вахт апаран», башга сөзлә, сонсуз арашдырмалара сәбәб олан мәнасыз «суаллар доғурур». Ујдурма рәвајәтләр јаланын атасы олан Шејтанын фәндләриндән биридир. О, јалан дини тәлимләрдән вә әфсанәләрдән истифадә едәрәк еһтијатсызлары аздырмаға чалышыр. Павелин мәсләһәти тамамилә ајдындыр: ујдурма рәвајәтләрә мәһәл гојма!
11. Инсанлары алдатмаг мәгсәдилә Шејтан јалан диндән неҹә истифадә едир вә онун тәләсинә дүшмәмәк үчүн Аллаһын һансы хәбәрдарлығына диггәт јетирмәлијик?
11 Әҝәр еһтијатлы олмасаг, һансы ујдурма рәвајәтләр бизи аздыра биләр? «Ујдурма рәвајәтләр» дедикдә, маһијјәт етибарилә, бизи һәгиги ибадәтдән узаглашдыран истәнилән јалан дини тәлимләр вә әфсанәләр нәзәрдә тутулур (2 Тим. 4:3, 4). Шејтан јалан диндән истифадә едәрәк инсанлары алдадыр. Буна ҝөрә дә Мүгәддәс Китабда дејилир ки, о, «нур мәләји ҹилдинә ҝирир» (2 Кор. 11:14). Мәсәлән, өзүнү Мәсиһин давамчысы адландыран Христиан аләми Үч үгнум, ҹәһәннәм вә өлмәз руһ кими јалан тәлимләр вә әфсанәләр јајыр. Онлар һәмчинин иддиа едирләр ки, Милад вә Пасха бајрамлары Аллаһа мәгбулдур, амма бу бајрамлар заманы иҹра етдикләри адәт-әнәнәләрин көкү, әслиндә, бүтпәрәстлијә вә гәдим әфсанәләрә ҝедиб чыхыр. Јеһованын јалан диндән узаг дурмаг вә «мурдар шејләрә» тохунмамаг ҝөстәришинә әмәл етсәк, ујдурма рәвајәтләрә алданмајаҹағыг (2 Кор. 6:14—17).
12, 13. а) Шејтан һансы фикирләрлә бизи алдатмаға чалышыр, амма һәгигәт нәдән ибарәтдир? б) Шејтанын ујдурулмуш рәвајәтләринә алданмамаг үчүн нә етмәлијик?
12 Лакин Шејтанын јајдығы башга јаланлар да вар ки, әҝәр еһтијаты әлдән версәк, алданаҹағыг. Онлардан бәзиләрини нәзәрдән кечирәк. Сән истәдијини едә биләрсән; нәјин јахшы, нәјин пис олдуғуну өзүн гәрарлашдырырсан. Бу фикри күтләви информасија васитәләриндә, телевизорда вә филмләрдә тез-тез ешитмәк олар. Аллаһын нормаларына даир тәһриф олунмуш бу ҹүр нөгтеји-нәзәр бизи Аллаһын әхлаг нормаларыны тамамилә унудуб истәдијимиз кими давранмаға тәһрик едир. Амма һәгигәт бундан ибарәтдир ки, әхлаг мәсәләләриндә Аллаһын рәһбәрлијинә еһтијаҹымыз вар вә белә рәһбәрлији бизә јалныз О верә биләр (Јер. 10:23). Аллаһ бәшәријјәтин ишләринә һеч вахт мүдахилә етмәјәҹәк. Инсанлар сабаһы дүшүнмәдән јашајырлар. Әҝәр биздә дә белә дүшүнҹә тәрзи олса, «фәалијјәтсиз вә бәһрәсиз олаҹағыг» (2 Пет. 1:8). Һәгигәт ондан ибарәтдир ки, Јеһованын ҝүнү сүрәтлә јахынлашыр вә һәјат тәрзимиз о ҝүнү һәсрәтлә ҝөзләдијимизи ҝөстәрмәлидир (Мат. 24:44). Аллаһ сәнин гајғына галмыр. Шејтан истәјир ки, биз бу јалана инанаг вә һеч вахт Аллаһы разы сала билмәјәҹәјимизи дүшүнәрәк руһдан дүшәк. Һәгигәт ондан ибарәтдир ки, Јеһова һәр бир хидмәтчисини севир вә һәр бири Онун үчүн әзиздир (Мат. 10:29—31).
13 Биз ајыг-сајыг олмалыјыг ки, Шејтан дүнјасынын дүшүнҹә тәрзи бизә тәсир етмәсин, чүнки бу, илк бахышдан инандырыҹы ҝөрүнә биләр. Унутма ки, Шејтан чох маһир јаланчыдыр. Јалныз Аллаһын Кәламындакы мәсләһәтләрә риајәт етдијимиз вә хәбәрдарлыглара диггәт јетирдијимиз тәгдирдә биз «мәһарәтлә ујдурулмуш рәвајәтләрә» вә ја «һијләҝәрҹәсинә ујдурулмуш нағыллара [«Инҹил», 1996]» ујмајаҹағыг (2 Пет. 1:16).
«Шејтанын далынҹа» ҝетмә
14. Павел бәзи ҹаван дул гадынлара һансы хәбәрдарлығы вермишди вә нәјә ҝөрә биз һамымыз онун сөзләринә ҹидди јанашмалыјыг?
14 Тәсәввүр ет ки, јол ишарәсинин үзәриндә: «Бу јол Шејтана апарыр», — јазылыб. Әлбәттә, һеч бир мәсиһчи бу јолла ҝетмәк истәмәзди. Амма һәтта мәсиһчиләр белә јолларыны азыб Шејтанын ардынҹа ҝедә биләрләр. Бу, неҹә ола биләр? Павел буну изаһ едир. (1 Тимотејә 5:11—15 ајәләрини оху.) Павел онун ҝүнләриндәки бәзи ҹаван дул гадынлар һагда јазса да, онун сөзләри һәр биримизә аиддир. Биринҹи әсрдә јашајан бу мәсиһчи дул гадынлар Шејтанын далынҹа ҝетдикләрини һеч ағылларына белә ҝәтирмирдиләр, анҹаг онларын һәрәкәтләри буна дәлаләт едирди. Бәс биз Шејтанын ардынҹа билмәдән ҝетмәкдән өзүмүзү неҹә горуја биләрик? Ҝәлин Павелин гејбәт һаггында дедикләринә нәзәр салаг.
15. Шејтанын мәгсәди нәдир вә һәвари Павел онун үсулларыны бизә неҹә ачыглајыр?
15 Шејтан бизи сусдурмаға чалышыр ки, хош хәбәри башгалары илә бөлүшмәјәк (Вәһј 12:17). О истәјир ки, биз вахтымызы бош вә Аллаһын халгы арасында нифаг салан шејләрә сәрф едәк. Шејтанын бу мәгсәдә наил олмаг үчүн һансы фәндләрә әл атдығыны Павел изаһ едир. О демишди ки, онун ҝүнләриндәки бәзи дул гадынлар «гапы-гапы ҝәзиб тәнбәллијә алышырлар». Биз еһтијатлы олмалыјыг ки, онлар кими давранмајаг. Мәсәлән, достларымызла ҝөрүшүб вә ја зәнҝләшиб мәнасыз, һәрдән исә һәгигәтә ујғун олмајан шејләр һаггында данышмагла, бу барәдә СМС-ләшмәклә вә е-маил ҝөндәриб ҹавабыны охумагла һәм өзүмүзүн, һәм дә башгаларынын вахтыны ала биләрик. Павел һәмчинин јазмышды ки, бу дул гадынлар «деди-году илә мәшғул олурлар». Деди-году вә ја гејбәт чох вахт мүнагишәләрә сәбәб олан бөһтана чеврилә биләр (Сүл. мәс. 26:20). Бөһтанчылар буну дәрк етсәләр дә, етмәсәләр дә, Шејтаны тәглид едирләрc. Сонра Павел әлавә етмишди ки, онлар «ҹамаатын ишинә гарышырлар». Бизим башгаларынын ишинә мүдахилә едәрәк неҹә давранмалы олдугларыны демәјә ихтијарымыз јохдур. Бикарчылыгдан ирәли ҝәлән вә башгаларынын нараһатчылығына сәбәб олан бу ҹүр һәрәкәтләр Аллаһын бизә һәвалә етдији ишдән — тәблиғ ишиндән јајындырыр. Әҝәр хидмәтдә фәал шәкилдә иштирак етмәсәк, Шејтанын ардынҹа ҝедәҹәјик. Биз ја Аллаһын, ја да Шејтанын тәрәфиндә ола биләрик, үчүнҹү јол јохдур (Мат. 12:30).
16. «Шејтанын далынҹа» ҝетмәмәк үчүн биз Мүгәддәс Китабын һансы мәсләһәтләринә әмәл етмәлијик?
16 Әҝәр биз Мүгәддәс Китаб мәсләһәтләринә әмәл етсәк, һеч вахт «Шејтанын далынҹа» ҝетмәјәҹәјик. Павелин буна даир вердији мүдрик мәсләһәтләрә диггәт јетирәк. «Рәббин ишиндә даима чох чалышын» (1 Кор. 15:58). Падшаһлыг иши илә фәал мәшғул олсаг, бош вә вахт апаран шејләрлә мәшғул олмаға вахтымыз галмајаҹаг (Мат. 6:33). «Иманы мөһкәмләндирән сөз сөјләјин» (Ефес. 4:29). Гејбәт етмәмәјә вә гејбәт едәнләрә гулаг асмамаға гәти гәрарлы олd. Һәмиманлыларына етибар етмәји вә һөрмәт ҝөстәрмәји өјрән. Онда сөзләрин онлары руһдан салмајаҹаг, әксинә, руһландыраҹаг. «Башгасынын ишинә гарышмајын» (1 Салон. 4:11). Инсанлара шәхси мараг ҝөстәр, амма буну онларын шәхси һәјатына гарышмадан вә һөрмәтҹил тәрздә ет. Һәмчинин унутма ки, шәхси мәсәләләрә даир башгаларына өз фикримизи јеритмәјә бизим ихтијарымыз јохдур (Галат. 6:5).
17. а) Јеһова һансы сәбәбә ҝөрә бизә мүәјјән јолларла ҝетмәји мәсләһәт ҝөрмүр? б) Сән нә етмәк әзминдәсән?
17 Јеһоваја неҹә дә миннәтдарыг ки, бизә нәјин архасынҹа ҝетмәмәли олдуғумузу ачыглајыр. Һәмишә јадда сахла ки, бу вә әввәлки мәгаләдә мүзакирә олунан мәсләһәтләри Јеһова бизи севдији үчүн верир. О, бизи Шејтанын аздырыҹы «јол ишарәләринин» ҝөстәрдији јол илә ҝетмәјин ҝәтирдији ағры-аҹыдан горумаг истәјир. Јеһованын ҝөстәрдији јол чәтин олса да, бу јол бизи әбәди һәјата апарыр. Мәҝәр бундан ҝөзәл јол ола биләр? (Мат. 7:14). Ҝәлин Јеһованын: «Јол будур, ҝедин бу јолла», — ҝөстәришинә риајәт етмәк әзмимиздән һеч вахт дөнмәјәк (Јешаја 30:21).
[Һашијә]
a «Дөнүк» вахтилә Мүгәддәс Китаб һәгигәтләрини гәбул едән, амма сонра онлары инкар едиб һәгиги ибадәтә гаршы чыхан инсана дејилир.
b Нүмунә үчүн «Товит» китабыны ҝәтирмәк олар. Бу апокрифик китаб тәхминән бизим ерадан әввәл III әсрдә јазылмышды. Павелин ҝүнләринәдәк ҝәлиб чатан бу китаб һәгигәт кими гәләмә верилән мөвһуматларла, еләҹә дә ҹадуҝәрлик вә фалчылыгдан бәһс едән ујдурма рәвајәтләрлә долу иди («Мүгәддәс Јазыларын дәрк едилмәси» енсиклопедијасынын 1-ҹи ҹилдинин 122-ҹи сәһифәсинә (инҝ.) бах).
c «Иблис» кими тәрҹүмә олунан јунан сөзү диаболос «бөһтанчы» мәнасыны верир. Бу сөз ән бөјүк бөһтанчы олан Шејтанын титулларындан биридир (Јәһ. 8:44; Вәһј 12:9, 10).
d «Күләјин совурдуғу ләләкләр» адлы чәрчивәјә бах.
Неҹә ҹаваб верәрдиниз?
Нөвбәти ајәләрдәки хәбәрдарлыглары шәхсән сән неҹә тәтбиг едә биләрсән?
[19 сәһифәдәки шәкил/чәрчивә]
Күләјин совурдуғу ләләкләр
Бир гәдим јәһуди рәвајәти гејбәт етмәјин нә гәдәр зәрәрли олдуғуну чох ҝөзәл тәсвир едир. Мүхтәлиф формаларда данышылан бу рәвајәтин мәғзи ашағыдакы кимидир.
Бир нәфәр кәндин ҹамаатына оранын ән мүдрик сакини барәдә јалан данышыр. Лакин тезликлә бу бөһтанчы һәрәкәтинин сәһв олдуғуну баша дүшүр вә һәмин адамын јанына ҝәлиб ондан үзр истәјир вә сорушур: «Ҝүнаһымы неҹә јуја биләрәм?» Мүдрик инсан она ҹаваб верир: «Сәндән бир хаһишим олаҹаг, ҝет бир јастыг ҝөтүр, ач вә түкләрини һаваја совур». Мүдрик адамын хаһиши ону тәәҹҹүбләндирсә дә, о ҝедиб онун дедији кими едир, сонра јанына гајыдыб сорушур:
— Инди мәни бағышладын?
— Әввәлҹә ҝет күләјин совурдуғу ләләкләри јығ.
— Ахы мән буну неҹә едә биләрәм?! Күләк онларын һәрәсини бир тәрәфә апарыб.
— Бу ләләкләри тәзәдән јығмаг чәтин олдуғу кими, инсанларын да бејниндән дедијин јаланы силмәк гејри-мүмкүндүр.
Дәрс ајдындыр. Дедијимиз сөзләри ҝери гајтара билмәрик, бәзән исә онларын вурдуғу зәрәри дә арадан галдырмаг мүмкүн дејил. Башгалары һаггында гејбәт етмәздән вә ја пис данышмаздан әввәл, ҝәлин унутмајаг ки, бизим сөзләримиз күләјин совурдуғу ләләкләр кими ола биләр.
[16 сәһифәдәки шәкил]
Неҹә ола биләр ки, биз дөнүкләри евимизә дәвәт едәк?