Кишинин вәзифәси
«¡Ropa, sapato, kaasa, i komida!» Бу сөзләр көһнә испан маһнысындан ҝөтүрүлүб вә бурада дејилир ки, киши аиләсини әсас дөрд шејлә — палтар, ајаггабы, ев вә гида илә тәмин етмәлидир. Аиләдәки мәсулијјәтләринә ҹидди јанашан әксәр кишиләр бу вәзифәнин өһдәсиндән лајигинҹә ҝәлир.
Лакин әҝәр сән евлисәнсә, аиләнин даһа ваҹиб тәләбаты олан руһани тәләбатыны өдәјирсәнми? Јохса, әксәр кишиләр кими, сән дә фикирләширсән ки, бу, киши иши дејил? Бәзи мәдәнијјәтләрдә кишинин ушагларына Аллаһ вә Мүгәддәс Китаб һаггында өјрәтмәк үчүн вахт ајырмасы һеч ҝөзләнилмир.
Мүгәддәс Китаб аиләсинә Аллаһа мәһәббәт вә Онун нормаларына ҝөрә дәрин миннәтдарлыг һисси ашыламаг вәзифәсини, әсас етибарилә, аилә башчысынын үзәринә гојур. Мәсәлән, Ефеслиләрә 6:4 ајәсиндә мәсиһчи кишиләр үчүн белә бир чағырыш вар: «Сиз дә аталар, ушагларынызы әсәбиләшдирмәјин, онлары Јеһованын вердији тәрбијә вә өјүд-нәсиһәтлә бөјүдүн».
Бәзиләри бу сөзләрлә таныш олсалар да, бу ајәнин мәһз аиләнин башчысына, атаја аид олдуғуну, ола билсин, ахыра кими анламырлар. Мәсәлән, испан вә португал дилләриндә данышан инсанлар елә баша дүшә биләрләр ки, Ефеслиләрә 6:4 ајәсиндәки сөзләр һәм атаја, һәм дә анаја аиддир. Бу дилләрдә «аталар» вә «валидејнләр» сөзләри ејни сөзлә ифадә олунур. Лакин Ефеслиләрә 6:1 ајәсиндә һәвари Павел һәм аталара, һәм дә аналара мүраҹиәт едәрәк гонефсин сөзүндән истифадә едир. Бу јунан сөзү «валидејн» мәнасыны верән гонефс сөзүндән әмәлә ҝәлир. Анҹаг 4-ҹү ајәдә «аталар» мәнасыны верән патерес сөзү истифадә олунур. Бәли, Ефеслиләрә 6:4 ајәсиндәки сөзләрлә Павел бирбаша олараг аталара мүраҹиәт едир.
Әлбәттә, әҝәр аиләдә башчылығы үзәринә ҝөтүрәҹәк әр јохдурса, онда бу мәсулијјәти үзәринә гадын ҝөтүрмәлидир. Јеһованын көмәји илә бир чох аналар ушагларыны Јеһованын вердији тәрбијә вә өјүд-нәсиһәтлә бөјүтмәјә мүвәффәг олмушлар. Лакин әҝәр аиләдә мәсиһчи әр варса, рәһбәрлији өз үзәринә о ҝөтүрмәлидир. Әҝәр о, өз мәсулијјәтинә ҹидди јанашмаса, аиләнин диҝәр үзвләринә руһани ишләрә диггәт јетирмәк даһа чәтин олаҹаг. Белә әр мәсулијјәтинә лагејд јанашдығына ҝөрә Јеһованын гаршысында ҹаваб верәҹәк.
Јеһованын бу мәсәләјә даир мүнасибәти јығынҹагда ағсаггал вә хидмәти көмәкчи кими хидмәт етмәк истәјәнләр үчүн Мүгәддәс Китабда јазылан тәләбләрдән ҝөрмәк олар. Орада ајдын ҝөстәрилир ки, бу ҹүр мәсулијјәт һәвалә олунан инсан «аиләсини јахшы идарә етмәли, ушаглары итаәткар вә тәрбијәли олмалыдыр (ахы инсан өз аиләсини идарә едә билмирсә, Аллаһын јығынҹағынын гајғысына неҹә галаҹаг?)» (1 Тим. 3:4, 5, 12; Тит. 1:6).
Евли киши ушагларынын руһани рифаһы наминә шәхси истәкләрини вә раһатлығыны гурбан вермәјә һазыр олмалыдыр. Һәрдән о, башга ишләрә сәрф етдији вахты азалтмалыдыр ки, мүнтәзәм олараг ушагларына кифајәт гәдәр вахт ајырсын (Ганун. т. 6:6, 7). Һәр һалда о, Аллаһын она һәвалә етдији бу мәсулијјәти башгаларынын өһдәсинә бурахмајаҹаг. О, мәһәббәтдән вә ушагларына сәмими марагдан ирәли ҝәләрәк онлары палтар, ајаггабы, ев вә гида илә тәмин етмәкдән даһа чох шеј едәҹәк.
Ушаглары ‘Јеһованын вердији тәрбијә вә өјүд-нәсиһәтлә бөјүтмәк’, һәгигәтән дә, асан дејил. Буна ҝөрә дә бу мәсулијјәт илк нөвбәдә әрин үзәринә дүшүр. Мәсиһчи ата өз мәсулијјәтини лазымынҹа јеринә јетирәрсә, Аллаһ горхусуна малик олан ушагларына Јеһовадан хејир-дуа кими бахаҹаг. О, мәзмурчу кими, нөвбәти сөзләри дејә биләҹәк: «Инсанын ҝәнҹ икән өвладлары оларса, бир иҝидин әлиндәки охлара бәнзәр. Охданы бу ҹүр долу олан нә бәхтијардыр!» (Мәз. 127:4, 5).