Nəyə görə müharibə və münaqişələr bitmək bilmir?

GÜNAH

Allah ulu valideynlərimiz Adəmlə Həvvanı Özünə bənzər yaratmışdı (Yaradılış 1:27). Bu o demək idi ki, onlar sülh və məhəbbət də daxil olmaqla, Allahın xüsusiyyətlərini təbii olaraq təzahür etdirəcəkdilər (1 Korinflilərə 14:33; 1 Yəhya 4:8). Lakin Adəmlə Həvva Allaha itaətsizlik edib günah işlədilər. Nəticədə, hər birimiz günahı və ölümü miras aldıq (Romalılara 5:12). Miras aldığımız günah bizi zorakı düşüncə və davranışlara sövq edir (Yaradılış 6:5; Mark 7:21, 22).

İNSAN HÖKUMƏTLƏRİ

Allah bizi elə yaratmayıb ki, insan insan üzərində hakimiyyət sürsün. Müqəddəs Kitabda deyilir: «Addımlarını yönəltmək insanın ixtiyarında deyil» (Ərəmya 10:23). Buna görə də insan hökumətləri müharibələrə və münaqişələrə birdəfəlik son qoya bilmir.

ŞEYTAN VƏ ONUN CİNLƏRİ

Müqəddəs Kitabda aydın şəkildə deyilir ki, «bütün dünya... Şəririn əlindədir» (1 Yəhya 5:19). Ayədəki «Şərir» Şeytan İblisdir və o, qatildir (Yəhya 8:44). O və əlaltıları olan şər ruhi qüvvələr «səhnə arxasından» müharibə və münaqişələrə təkan verirlər (Vəhy 12:9, 12).