Baa bibase gwobisôna bi niiga maliga?

1. Bimbe bibase bi nlébna i Afrika?

BEBEE le hiki mut i Afrika a neebe le i yé nseñ i bégés Djob. Ndi bôt ba nôgla bé i yi lelaa ba bégés nye. Bahogi ba mbéghene nye i ndap base bahusa, bape ba nke i minlômblak mi bahoma mi mbok loñ yap. Bape ki ba nkodba i mandap ma bibase ma ndôk bikristen. Ndi mut a hoñol bañ le bibase bi yé ndik biaa i Afrika. Bahusa ba gwé mahéñha ma matiñ ni bilem i pôla yap. To base mbok loñ ki i ta bé nlélém i pôla lini libôga ni lii. Mbagla keñi i yé yak i pôla bibase bi ndôk bikristen. Handugi balôm ba bibase bi ndôk bikristen, dikôô di bibase bipe, bi bi édi bé, bi yé ntjamak ni Afrika yosôna.

Base yés i nlama ba i umne ngii maliga

2. (a) Kii i mbéna tinde bôt i noñ ngim base? (b) Kinje jam li ñunda bé le base yés i nlémél Djob?

² Inyuki bôt ba mbégés kiki di ntip tehe? Libim li bôt li noñ base bagwal bap. Yak mam ma ngéda kôba ma bi ane bôt i bôñôl base kii di ntehe len ini. Kaat ini le The Africans​—A Triple Heritage, i nkal le: “Base bahusa i bi tjama ñombok ñoñ Sahara ni njel bémbe, . . . hala ki nyen yak ndôk bikristen i bi tjama nwelmbok ñoñ Sahara. Nlélém kii bahusa ba bi tjama i ñombok ñoñ Sahara ni njel pansoñ, hala ki nyen ndôk bikristen i bi tjama i nwelmbok ñoñ Sahara ni njel mangaa.” To hala, ngandak yés i nhoñol le base yap i nlémél Djob. Ndi base i ta bé maliga ndik inyule bagwal bés ba bi noñ yo, to inyule biloñ bipe bi bi téé yo ni bémbe ba bi bémbe basôgôl bés.

3-5. Himbe hihéga hi nhôla bés i tehe le ha bibase gwobisôna bé gwon bi niiga maliga?

³ To hala kii bibase gwobisôna bi nkatba le gwon bi ntibil unda bôt lelaa ba sélél Djob, bi gwé bé minlélém mi mahoñol. Biniigana gwap bi yé mahéñha ngandak inyu Djob ni inyu mam a nsômbôl le di boñ. Wan jam lini: hoñol ki le u nyôña kii mut nson i ndap bôlô i keñi. Hilo hi bisu hioñ hi nson, bo we le nwet nson a yé noi. Ha nyen u mbat bôt ba nson baa le ba kal we kii i yé su nson woñ. Nu bisu nye we le, isañ bôlô a mbat le u ba u sas hisi hi ndap. Nu nyônôs ba nye yom u nlama hoo ndap pén. Nu nyônôs baa nye we kabak bikaat.

⁴ Mbus hala, u bat bagwelnson mambadga inyu nwet nson nyemede. Nu bisu nye ñane a yé nténdéé, mañge wanda, ndi a nyai. Nu nyônôs ba nye ñane a yé kitik, mañ mut, ni liyômba. Nu nyônôs baa nye ñane a ta yaga bé munlôm​—ñane a yé muda. Bebek w’a sôk tehe le bagwelnson bana ba mpot bé maliga. Ibale u ngwés tééda bôlô u ntip kôs, bebek w’a wan i yi njee ñane a yé ni toi ni kii a nsômbôl le u boñ.

⁵ Hala a yé nlélém jam ni base. Hala kiki ngandak mahoñol ma yé i yi yom Djob a yé ni kii a nsômbôl le di boñ, di nlama wan i yi le too libéghag jés di mbégés nye li nkiha ni maliga. Ndi lelaa di nla nigil maliga inyu Djob?