YIGIL 2

I yi kwel

2 Korintô 2:17

I SEM KWEP: Pot kiki u mbéna pot, ba wemede kayéle u unda le nkwel u ntihba we ñem ni le u ntôñ baemble.

Kôôba nkwel loñge, ikété masoohe. Soohe le u bok bañ mahoñol moñ i ngii yoñ wemede, ndi i ngii nkwel woñ. Tibil tééda balôm ba matode u gwé ngôñ i niiga. Gwélél bibañga gwoñ wemede inyu niiga; u tiimba ndik bañ minlélém mi bibuk kiki mi yé ntilga i lipep.

Ibale u gwé le u nsoñgol Bibel tole kaat ipe, yéñ le u yi i pes i loñge inyu boñ le lisoñgol joñ li kuli tetee. Ibale ba nsima bibañga bi bôt, añ gwo i nya i mpémés yom bôt ba, ba bé nôgda ndi ibabé i boñ binjénjé.
Pot ni ñem. Hôya bañ inyuki baemble ba nlama emble nkwel woñ. Bok mahoñol moñ i ngii yap. Ha nyen litelbak joñ, linyiñghak joñ li nyuu, ni linyiñghak joñ li su, bi ga unda toi le u yé pot ni ñem woñ, ni le u yé liyômba.

I pot kiki u mbéna pot i nkobla bé le u pot tolaa tolaa. Pot i nya i nti nkwel woñ lipém, u gwéélak bibuk bi nôôga loñge, u noñok ki matiñ ma hop woñ.
Nun baemble. Béñge bôt i mbombom ibale ba ntehe bé hala kiki diyana. I ngéda u nti nkwel u mbamba, u nun bañ bôt bobasôna ngélé yada, ndi nun baemble wada wada.