Bagian Panutup na Diulas dohot na Lao Tardidi
Acara pandidion somalna dibahen di parpunguan wilayah dohot parpunguan regional ni Saksi Jahowa. Di ujung ni jamita pandidion, dipangido parjamita do asa jongjong akka na lao tardidi jala gogo ma soara ni nasida mangalusi dua sukkun-sukkun on:
1. Nungnga muba hamu sian akka dosamuna, nungnga dilehon hamu dirimuna tu Jahowa, jala nungnga diihutton hamu dalan haluaon na nilehonna marhite Jesus Kristus?
2. Diboto hamu do, molo nungnga tardidi hamu, gabe ditanda halak ma hamu Saksi Jahowa jala gabe bagian ni organisasi ni Jahowa?
Alus ni nasida na takkas patuduhon “tu na asing”, na porsea do nasida tu tobusan jala rade mangalehon dirina tu Jahowa. (Rom 10:9, 10) Ikkon denggan do dirimangi akka na lao tardidi sukkun-sukkun on jala ikkon jolo ditangiakkon nasida do i, asa pos roha ni nasida mangalusi i.
Marhite tangiang nungnga mangalehon diri hamu tu Jahowa, marjanji holan manomba Ibana jala mangutamahon lomo ni rohana di ngolumuna?
Nungnga pos rohamuna lao tardidi?
Songon dia do pakkean na cocok tikki tardidi? (1 Tim. 2:9, 10; Joh. 15:19; Plp. 1:10)
Ikkon tapakke do pakkean na tama “mardongan toruk ni roha dohot bisuk” na patuduhon hita “manomba Debata”. Alani i, dang boi akka na lao tardidi mamakke baju renang manang pakkean na adong sloganna. Ikkon ias do pakkean ni nasida, denggan idaon, jala tama dipakke di ulaon i.
Tikki tardidi sasahalak, aha do na so boi diulahon ibana? (Luk. 3:21, 22)
Pandidion ni Jesus ma na ikkon ditiru halak Kristen saonari. Diboto Jesus do na sangap pandidion i, jala tarida do i sian sikapna tikki tardidi. Alani i, dang boi hita margait-gait di inganan pandidion, marmeam-meam, marlange, manang mangulahon akka ulaon na boi mambahen gabe dang sangap pandidion i. Unang ma palobihu reaksi ni halak Kristen na baru tardidi. Tung pe pandidion i mambahen las rohatta, alai toktong ma tapatudu na sangap do ulaon i di hita.
Molo taratur hamu ro tu parpunguan jala bergaul dohot akka dongan di huria, boasa boi i mangurupi hamu asa toktong setia manomba Jahowa?
Boasa porlu dibahen hamu jadwal parsiajaran pribadi jala ringgas marbarita nang pe naung tardidi hamu?
PETUNJUK TU AKKA SINTUA
Molo adong sahalak penyiar na so tardidi na paboahon tu akka sintua molo ibana naeng tardidi, disuru do ibana asa manat manjaha “Sukkun-Sukkun tu na Lao Tardidi”, di halaman 12-50 di bukku on. Ikkon diparrohahon ibana do “Na Porlu Diingot Penyiar na So Tardidi” di halaman 7. Disi, dipaboa do songon dia carana paradehon sukkun-sukkun na lao diulas rap dohot akka sintua. Songon na dipaboa disi, akka na naeng tardidi boi do mambahen catatan jala mambukka bukku on saleleng mangulas sukkun-sukkun i. Alai, dang boi ibana mangulas akka sukkun-sukkun i dohot halak na asing sebelum dibahas ibana i dohot akka sintua.
Manang ise na naeng tardidi, ikkon dipaboa ibana do i tu koordinator punguan ni akka sintua di huria. Dilehon ma tikki tu ibana, asa jolo dipersiappon ibana “Sukkun-Sukkun tu na Lao Tardidi”. Dung i, sukkunon ni koordinator punguan ni akka sintua ma tu na lao tardidi i, nungnga martangiang ibana lao mangalehon diri tu Jahowa manang na dang dope. Molo nungnga ditangiakkon ibana i tu Jahowa, diatur koordinator ma asa adong dua sintua mangulas “Sukkun-Sukkun tu na Lao Tardidi” dohot na naeng tardidi i. Unang ma sintua na sarupa na ditugasson lao mangulas bagian na parjolo dohot na paduahon. Dang ikkon jolo diumumhon andigan dibahen parpunguan wilayah dohot parpunguan regional asa boi diulas sukkun-sukkun i tu na lao tardidi.
Somalna, dua bagian on diulas dua hali di tikki na so sarupa. Jala hira-hira sajom ma lelengna diulas ganup bagian. Ikkon martangiang do sebelum jala dung sae dibahas ganup bagian i. Unang ma pahatophu diulas akka sukkun-sukkun i. Jala unang ma dipaleleng-leleng akka sintua tikki lao mangulas sukkun-sukkun i.
Molo lobi sian sahalak na lao tardidi, unang ma rap mambahas nasida sude dibahen hamu, alai masing-masing ma. Molo songon i carana, botoon ni sintua ma sadia bagas pangattusionna. Jala boi ma diida akka sintua, nungnga rade ibana lao tardidi manang na dang. Asing ni i, molo songon i dibahen pengaturanna, gabe boi ma ibana barani mangalehon alusna. Alai molo suami istri do nasida, boi do rap mangulas sukkun-sukkun i dohot sintua.
Molo borua do na lao tardidi i, ikkon diatur do asa adong na mangida nasida saleleng mangulas sukkun-sukkun i, nata pe dang dohot manangihon. Molo porlu adong dongan ni sintua lao mangulas sukkun-sukkun i, pillit ma sahalak sintua manang parhobas. Boi do sahalak parhobas na mandongani bergantung tu bagian dia na lao dibahas, songon na lao diulas di paragraf na mangihut.
Molo otik do akka sintua di huria, boi do parhobas na memenuhi syarat na mangulas sukkun-sukkun di “Bagian 1: Haporseaon ni Halak Kristen”. Alai, molo di “Bagian 2: Hangoluan ni Halak Kristen”, holan sintua do na boi mangulas i dohot na lao tardidi. Molo dang adong donganta bawa na memenuhi syarat di huria, paboa ma tu pengawas wilayah atik na adong sintua di huria na jonok tu nasida na boi mangurupi.
Molo dakdanak dope na lao tardidi, ikkon didongani natua-tuana na Saksi Jahowa do ibana. Molo dang boi dohot natua-tuana, ikkon adong dua sintua (manang sahalak sintua dohot sahalak parhobas, sesuai tu bagian na diulas).
Ikkon takkas do diboto akka sintua sadia bagas pangattusion ni halak na lao tardidi i taringot ajaran dasar ni Bibel. Asing ni i ikkon dipastihon akka sintua, tutu do diargai ibana hasittongan dohot organisasi ni Jahowa. Molo dang bagas dope pangattusionna taringot ajaran dasar ni Bibel, diatur sintua ma asa diurupi ibana. Manang molo adong na hurang mangargai ulaon marbarita jala dang unduk tu pengaturan ni organisasi, porlu do dilehon sintua tikki lao mangurupi ibana. Dung i boi ma ibana tardidi di tikki na asing. Adong do sukkun-sukkun na ikkon leleng diulas, jala adong do na hatop. Alai ikkon sude do sukkun-sukkun i diulas. Jadi asa diboto akka sintua boi sasahalak tardidi, ikkon marbisuk do nasida mamakke tikki na sajom i lao mangulas ganup bagian.
Dung sae diulas bagian na paduahon dohot na lao tardidi, dibahen akka sintua ma rapat lao manottuhon boi do ibana tardidi manang na dang. Denggan ma dipikkirhon akka sintua latar belakang, kesanggupan, dohot na asing sian na lao tardidi i. Na uppetting, ikkon botoon ni akka sintua do sadia bagas holongna tu Jahowa jala nungnga takkas manang na dang diattusi ibana ajaran dasar ni Bibel. Molo rade hamu mangurupi nasida, boi ma akka na lao tardidi i mangulahon tugas na uppetting, i ma gabe parbarita na uli.
Dung sae dibahas bagian na paduahon i, ditugasson ma sada manang dua sintua na membahas bagian i, lao paboahon tu halak na lao tardidi i memenuhi syarat do ibana tardidi manang na dang. Molo memenuhi syarat do ibana tardidi, ikkon diulas akka sintua do rap dohot ibana “Bagian Panutup na Diulas dohot na Lao Tardidi” di halaman 51-53. Molo dang sae dope diparsiajari ibana bukku Mangolu Saleleng ni Lelengna, ikkon dijujui akka sintua ma ibana asa pasaehon parsiajaranna dung tardidi. Paboa ma tu ibana molo tanggal tardidina i, dipamasuk do i tu Kartu Penyiar Sidang. Paboa ma muse, sippanon ni akka sintua do informasi sisongon i asa boi diatur organisasi ulaon ni Saksi Jahowa di liat portibi on. Informasi i do muse na dipakke asa boi ibana dohot tu ulaon ni organisasi jala boi urupan ni akka sintua ibana. Asing ni i, porlu do dipaboa akka sintua, informasi pribadina i denggan do disippan sesuai tu Kebijakan Umum Perlindungan Data dari Saksi-Saksi Yehuwa, na adong di jw.org. Leleng ni siulason on holan sappulu menit manang hurang.
Dung sataon tardidi, ikkon dijuppangi akka sintua do penyiar naung tardidi i lao patoguhon ibana. Sada sian sintua na manjuppangi ibana ikkon pengawas kelompok dinasna. Molo dakdanak dope na tardidi i, ikkon dohot do natua-tuana na Saksi Jahowa mandongani. Ikkon lambok jala patoguhon roha do sintua i tikki makkatai dohot ibana. Dipaboa akka sintua ma kemajuan naung dibahen ibana. Dilehon sintua ma saran tu ibana asa taratur belajar pribadi, manjaha Bibel ganup ari, ibadat keluarga, ro tu parpunguan, mangalehon komentar, jala marbarita ganup minggu. (Eps. 5:15, 16) Molo dang sae dope diparsiajari ibana bukku Mangolu Saleleng ni Lelengna, ikkon diatur akka sintua ma asa adong na mangurupi ibana mangulas bukku i sahat tu na sae. Porlu do dipuji nasida akka na denggan naung diulahon ibana. Biasana, dang pola godang sipaingot na dilehon akka sintua tu ibana.