BIBLU’N I SU KOSAN’M BE SU TƐLƐ

?Cɛn wie lele’n, famiɛn kun yɛ ɔ́ síe asiɛ wunmuan’n niɔn?

Sɛ famiɛn aunnvuɛ sifuɛ kun yɛ ɔ sie asiɛ wunmuan’n, nn nanwlɛ, sran’m be liɛ yó ye dan. Afin andɛ’n, sran kpanngban be ti yalɛfuɛ. Sanngɛ, sran wie’m be ti sikafuɛ dan. ?Kɛ a niɛn i sa’n, sran’m be nuan kwla sɛ be wun kɛ famiɛn kunngba cɛ ɔ sie asiɛ’n?​—An kanngan Zeremi 10:23 nun.

Kɛ ɔ fɛ i laa lele m’ɔ́ fá jú andɛ’n, sran’m be kle kɛ be kwlá sieman be wiengu. Be siman like nga be ko yo naan sran’m b’a diman yalɛ kun’n. Siefuɛ wie’m be kle be nvle nunfuɛ’m be ɲrɛnnɛn bɔbɔ. (Akunndanfuɛ’n 4:1; 8:9) Sanngɛ, Ɲanmiɛn tali nda kɛ ɔ́ síe famiɛn kun. Famiɛn sɔ’n, ɔ́ núnnún asiɛ’n su famiɛn diwlɛ’m be kwlakwla. Kpɛkun, ɔ́ síe sran’m be kpa.​—An kanngan Ezai 11:4 ɔ nin Daniɛl 2:44 be nun.

?Ngue yɛ sran nga Ɲanmiɛn sieli i famiɛn’n ɔ́ wá yó ɔ?

Sran ng’ɔ kwla si sran’m be sie kpa’n, yɛ Ɲanmiɛn Zoova sieli i famiɛn ɔn. Sran sɔ’n yɛle i Wa Zezi. (Lik 1:31-33) I nun mɔ Zezi o asiɛ’n su wa’n, sran’m be ndɛ loli i kpa. Kɛ ɔ́ wá síe sran mun’n, asiɛ’n i sufuɛ’m be kwlakwla be bo yó kun. Kpɛkun, be su wunman ɲrɛnnɛn kun.​—An kanngan Jue Mun 72:8, 12-14 nun.

Sran wie’m be kunndɛman kɛ Zezi sie be. Sanngɛ, Zoova trɛ i awlɛn be wun. (2 Piɛr 3:9) Kpɛkun, ɔ kle be like ng’ɔ fata kɛ be yo naan Zezi w’a sie be’n. Ɔ cɛ kan’n, Zezi wá núnnún klunwifuɛ mun. Kpɛkun, fɔundi trán asiɛ wunmuan’n su.​—An kanngan Mise 4:3, 4 nun.