?Kɛ e to sran mun’n, e ka lɛ e yi wafa nga e kle sran’m be Biblu’n nun like’n i nglo kle be?

Kɛ e to sran mun mɔ e se be kɛ e kunndɛ kɛ é klé be Biblu’n nun like’n, wie’m be se e kɛ ɔ timan be cinnjin annzɛ be suan Biblu’n nun like be asɔnun’n lɔ. Kɛ mɔ be siman kɛ wafa nga e kle sran’m be Biblu’n nun like’n ɔ nin nga asɔnun nga’m be yo’n timan kun ti’n, be kwlá siman Biblu’n nun like suanlɛ’n i fɛ m’ɔ yo’n, ɔ nin wafa ng’ɔ tike be ɲin’n. ?I sɔ’n ti’n, sɛ e ka lɛ e bo be Biblu’n nun like klelɛ bo’n, ɔ flunmanman kɛ e se be ngbɛn kɛ e kunndɛ kɛ é klé be Biblu’n nun like? I yo, kɛ ɔ yo naan e se sran kun kɛ e si like tɔn naan sɛ ɔ yo’n, é tɔ́n like blɛ́ i’n, maan e ka lɛ e tɔn kan naan ɔ di nian. Ajalɛ kun yɛ. Ɔ taka afuɛ 2006, Zanvie anglo’n i Ɲanmiɛn Sielɛ Blɛ junman fluwa i bue 6 su’n su. Ɔ di miniti kpe kan.

“?A bu i kɛ cɛn wie lele ndɛ nga be kɛnnin i wa’n ɔ́ kpɛ́n su? [Kanngan i Ezai 33:24 nun, i sin’n maan sran’n tɛ kosan’n su.] Maan n fa i su ndɛ fɛ kun kle wɔ.” Fa fluwa Biblu’n kle kun mɛn i naan se i kɛ ɔ tike i i bue 36 i ndɛ kpɔlɛ 22 lika liɛ’n su. Kanngan ndɛ kpɔlɛ sɔ’n i su kosan’n nun yɛ se sran’n kɛ, kɛ á kánngan ndɛ’n nun’n maan ɔ bu i su tɛlɛ’n i akunndan. Kɛ a wie nun kanngan’n, man kosan’n su ekun naan ɔ tɛ su. Kɛ ɔ́ yó sɔ’n, sie ɔ su. I sin’n, amun kanngan Biblu’n nun ndɛ mma kun ekun nun. Ka naan amun a titi nun’n, yi kosan kun mɔ kɛ á wá bá cɛn uflɛ’n, á wá tɛ́ su ɔ. Yɛ, amun ti be wun aniɛn cɛn nga á wá bá ekun i su. Sran’n i Biblu’n nun like klelɛ yɛ w’a bo i bo lɛ!