Wafa nga é úka jasin bofuɛ uflɛuflɛ mun’n
1. ?Kpalɛ klikli nga amun boli jasin fɛ’n i bolɛ’n bo’n, wafa sɛ amun wun yoli amun ɔn?
1 ?Kpalɛ klikli nga amun boli awloawlo’m be nun jasin fɛ’n bolɛ’n bo’n, amun wla kpɛn su? Atrɛkpa’n, srɛ kunnin amun kpa. Sanngɛ sɛ amun nin sran ng’ɔ kleli amun Biblu’n nun like’n annzɛ jasin fɛ’n bofuɛ uflɛ yɛ amun boli jasin fɛ’n le kun sɔ nun’n, amun wla guali ase. Afin aniaan sɔ’n suannin amun bo. Siɛn mɔ amun sa w’a tɔ junman’n nun’n, amun kwla uka be nga be su bo i bo uflɛuflɛ’n.
2. ?Ngue yɛ jasin bofuɛ uflɛuflɛ’m be simɛn i yo m’ɔ fata kɛ be kle be ɔ?
2 Be nga be su bo jasin fɛ’n i bolɛ bo’n, kɛ be to sran kun awlo’n, wafa nga be nin i ko bo yalɛ kokolɛ bo’n, be nin a simɛn i yo. Biblu’n i junman fa dilɛ, sran’m be osu nianlɛ nin be Biblu’n nun like klelɛ i bo bolɛ’n, be sa nin a tɔman i kwlaa sɔ’n nun. Jasin fɛ’n bolɛ’n kusu’n, i fa’n sɔnnin. I wie yɛle akpɔ’m be nuan annzɛ aata diwlɛ’m be nun jasin fɛ’n bolɛ’n. I kwlaa sɔ nun’n, wafa nga e bɔbɔ e fa yo’n ɔ nin afɔtuɛ nga e man be’n, ɔ kwla uka be naan be sa w’a tɔ nun.
3. ?Jasin fɛ’n bolɛ nun’n, ngue yɛ e kwla yo naan jasin fɛ bofuɛ uflɛuflɛ’m b’a nian su ɔ?
3 E yo nga bé nían su bé yó’n: Zezi bɔbɔ boli jasin fɛ’n naan i sɔnnzɔnfuɛ’m be niɛn i liɛ’n su. (Lik 8:1; 1 Piɛ. 2:21) Sɛ e siesie kɛ e nin jasin bofuɛ uflɛuflɛ kun yɛ é bó jasin’n, maan e bu ndɛ nga é kán klé sran mun’n i akunndan sie. Maan ɔ yo ndɛ mɔ aniaan’n kwla nian su ɔ. E kwla fɛ i e fluwa’m be nun kun nun. Kpɛkun cɛn nga e nin aniaan’n é bó jasin fɛ’n, maan e kan kle i kɛ awlo klikli’n annzɛ awlo nɲɔn klikli’m be nun’n, ndɛ’n ti e liɛ. I liɛ’n, ɔ́ kwlá síe ndɛ nga é kán i nzɔliɛ. Kɛ é jáo awlo kun nun mɔ é kɔ́ uflɛ nun’n, e kwla usɛ i sɛ wafa nga e bɔbɔ e kannin ndɛ’n, ɔ ti kpa o. Sɛ e yo sɔ’n, ɔ́ wún sa nga ti yɛ ɔ ti kpa kɛ e nin sran uflɛ e bo jasin fɛ’n, i wlɛ. Kpɛkun kɛ kasiɛn su’n, é mɛ́n i afɔtuɛ’n, ɔ́ fɛ́ i ti lé.
4. ?Kɛ jasin bofuɛ uflɛuflɛ kun nin sran kun be ko wie yalɛ koko’n, wafa sɛ yɛ e kwla ukɛ i ɔ?
4 E man be afɔtuɛ: Wafa ng’ɔ fata kɛ Zezi i sɔnnzɔnfuɛ’m be bo jasin be wɔ’n, ɔ kleli be trele. (Mat. 10:5-14) E kusu, e kwla uka jasin fɛ’n bofuɛ uflɛuflɛ’m be sɔ wie. Yɛle kɛ, sɛ i yɛ ndɛ’n wo i nuan’n, maan e sie e su kpa e tie. I sin, kɛ é kɔ́ awlo uflɛ nun’n, kannzɛ bɔɔ ndɛ ng’ɔ kannin’n i ngba w’a kpɛnman su’n, sanngɛ maan e tu e klun e yi i aɛ. Sa trele nga ti yɛ e yi i aɛ’n, maan ɔ wun i wlɛ. Sanngɛ, sɛ e waan é mɛ́n i afɔtuɛ’n, wie liɛ’n e kwla minndɛ kan e nian sɛ awlo uflɛ nun’n, ɔ́ káci i sa o. Afin, atrɛkpa srɛ m’ɔ kunnin i ti yɛ ndɛ m’ɔ kannin’n w’a kpɛnman su ɔ. Kusu, nán e wla fi su kɛ jasin bofuɛ’m be kwlaa be ngwlɛlɛ sɛman naan blɛ sunman nun’n, like kun yolɛ’n i fa’n sɔnnin.—1 Kor. 12:4-7.
5. ?Sɛ aniaan’n w’a usaman e ngwlɛlɛ afɛ’n, wafa sɛ yɛ e bɔbɔ e kwla mɛn i afɔtuɛ ɔ?
5 Wie liɛ’n, jasin bofuɛ uflɛuflɛ’n kwla usa e ngwlɛlɛ afɛ. Sanngɛ sɛ w’a yoman sɔ’n, afɔtuɛ ng’ɔ kwla ukɛ i’n, man e fa mɛn i. ?Wafa sɛ yɛ e kwla yo i sɔ’n amanniɛn su ɔ? Jasin bofuɛ wie mɔ be sa w’a tɔ junman nun’n, be liɛ’n, be kanman ndɛ kaka. Be se aniaan’n kɛ: “Nán aɲinsa a o, min waan ń kán ndɛ kun klé wɔ.” Annzɛ kusu be usɛ i kɛ: “?Yalɛ nga a nin sran’n be kokoli’n, ɔ yoli ɔ liɛ’n su?” Ajalɛ kun ekun yɛle kɛ e se aniaan’n kɛ: “I nun nga uflɛuflɛ nun’n, ń bó jasin fɛ’n, like sa, yoli kekle mannin min. Sanngɛ like ng’ɔ ukali min’n yɛ: ...” Ɔ ju wie’n, sɛ e nin jasin bofuɛ’n e nian fluwa Comment raisonner nun likawlɛ’n, ɔ́ ukɛ́ i kpa. Kɛ ɔ ko yo naan y’a sɛnngɛnmɛn i akunndan’n, maan ndɛ ng’ɔ kannin nun’n, e jran sa kunngba su e mɛn i afɔtuɛ.
6. ?Jasin fɛ’n bolɛ i nun’n, sɛ é kwlá sé’n, wafa sɛ yɛ ‘limun si bese ɔ’?
6 Be fa limun si bese: Timote ti sran kun m’ɔ si jasin fɛ’n i bo kpa ɔ. Sanngɛ Pɔlu wlɛli i fanngan wie. Ɔ seli i kɛ ɔ fa like klelɛ’n yo i junman yɛ ɔ miɛn i ɲin yo kpa tra laa’n. (1 Tim. 4:13, 15) Kannzɛ bɔbɔ nán andɛ sa yɛ e sɔli jasin fɛ’n i bolɛ’n, sanngɛ nán e yaci e ɲin mianlɛ naan y’a si i bo kpa y’a tra laa’n. Jasin bofuɛ nga e nin be bo jasin’n, i li bɔɔ sɛ be sa nin a tɔman nun kpa’n, maan e nian wafa nga be yo’n naan e fa uka e wun wie. Kusu, nán e ɲin kpa sran uflɛ ukalɛ klun ufue su’n, i su. I li be nga blɛ li yɛ be su suan’n, maan e uka be naan be wun kpɛ kpa junman’n i dilɛ’n nun.—Nya. 27:17.