Zoova wá dí klunwifuɛ’m be jɔlɛ
‘Siesie ɔ wun minndɛ min mɔ n ti ɔ Ɲanmiɛn’n.’ —Amɔs 4:12.
1, 2. ?Ngue ti yɛ e kwla lafi su kɛ Ɲanmiɛn wá núnnún klunwifuɛ mun cɛn kun’n niɔn?
?CƐN wie lele’n, Zoova wá núnnún klunwifuɛ mun, ɔ nin ɲrɛnnɛn wunlɛ’n asiɛ nga su? Afuɛ ya kpɔlɛ 21 nga e o nun yɛ’n, i nun yɛ e wun kɛ ɔ fata kɛ e tɛ kosan sɔ’n su ɔ. Afin, sran’m be wiengu’m be klunwi sa yolɛ’n w’a tru lika’n kwlaa nun. Nanwlɛ, mɛn nga sa kekleekle yolɛ’n, ɔ nin nzaje sa mun, ɔ nin adi ninnge manlɛ’n be su tranman nun kun’n, yɛ e ɲin o i sin ɔn!
2 Sa ng’ɔ jɔ e klun’n yɛle kɛ, e kwla lafi su kpa kɛ Zoova wá núnnún klunwifuɛ mun. Ɲanmiɛn i wafa’m be kle weiin kɛ, ɔ su yaciman klunwifuɛ’m be lɛ sa trilili. Zoova ti sa nuan su yofuɛ, yɛ ɔ diman ndɛ kwlɛ. Jue Mun 33:5 nun, Biblu’n se e kɛ: ‘Ɔ klo sa nga be yo i i nuan su’n, ɔ klo sa nga ɔ ti nanwlɛ’n.’ Jue Mun i lika kun ekun se kɛ: ‘Klunwifuɛ’n, ɔ nin sran nga ɔ fa sa tɛ yolɛ’n cici i ti’n, ɔ [Zoova] kpɔ i sɔfuɛ mun.’ (Jue Mun 11:5). Nanwlɛ, Ɲanmiɛn Zoova mɔ like fi nunmɛn i sin’n, m’ɔ klo sa nga be yo i nuan su’n, ɔ su yaciman like ng’ɔ kpɔ i’n i lɛ sa trilili.
3. ?Sɛ e fa e ɲin sie i Ɲanmiɛn nuan su ndɛ nga Amɔsu kannin’n i su kpa’n, ngue yɛ é súan ɔn?
3 Amun e nian sa kun ekun nga ti yɛ e kwla lafi su kpa kɛ Zoova wá núnnún klunwifuɛ mun’n. I wunsu ng’ɔ yoli laa mɔ be klɛli’n, ɔ kle weiin kɛ e kwla lafi i su sakpa. Like nga Zoova fa yoli klunwifuɛ mun’n, i ndɛ o Biblu’n nun Amɔsu fluwa’n nun. Sɛ e fa e ɲin sie i Ɲanmiɛn nuan su ndɛ nga Amɔsu kannin’n i su kpa’n, é súan jɔlɛ nga Ɲanmiɛn di’n i su like nsan. I klikli’n yɛle kɛ jɔlɛ nga Ɲanmiɛn di’n, ɔ ti su titi. I nɲɔn su’n yɛle kɛ, be kwlá wanndiman jɔlɛ nga Ɲanmiɛn di’n i ɲrun. Kpɔkun i nsan su’n yɛle kɛ, be nga be nin jɔlɛ dilɛ fata’n, be yɛ Ɲanmiɛn di be jɔlɛ ɔ. Afin, klunwifuɛ mun yɛ Ɲanmiɛn nin be le i ɔ. Sanngɛ ɔ si be nga be kaci be nzuɛn’n mɔ be yo sa kpa’n be aunnvuɛ.—Rɔmfuɛ Mun 9:17-26.
Jɔlɛ nga Ɲanmiɛn di’n, ɔ ti su titi
4. ?Nin yɛ Zoova sunmannin Amɔsu ɔ? ?Zoova sunmɛnnin i lɔ kɛ ɔ ko yo ngue?
4 Kɛ Amɔsu dí i Ɲanmiɛn nuan ijɔfuɛ junman’n, nn Izraɛlifuɛ’m b’a bu be wun nun b’a yo famiɛn diwlɛ akpasua nɲɔn lalaa kpa’n. Kun yɛle Zida famiɛn diwlɛ’n. Ɔ le akpasua nɲɔn, yɛ ɔ o ngua lɔ lika’n nun. Akpasua blu onga’m be ti Izraɛli famiɛn diwlɛ, yɛ ɔ o nglo lɔ lika’n nun. Amɔsu m’ɔ ti Zidafuɛ’n, Zoova fɛli i kɛ ɔ yo i nuan ijɔfuɛ. Ɔ maan ɔ sunmannin Amɔsu Izraɛli lɔ kɛ ɔ ko kan jɔlɛ nga ɔ́ wá fá dí lɔfuɛ mun’n i ndɛ kle be.
5. ?Nvle mennin mun yɛ Amɔsu dun mmua kannin Ɲanmiɛn nuan su ndɛ’n kleli be ɔ? ?Yɛ sa nga ti yɛ ɔ nin i fata kɛ Ɲanmiɛn di nvle sɔ’m be jɔlɛ’n i kun yɛle mennin?
5 Jɔlɛ nga Zoova wá dí’n, Amɔsu w’a bomɛn i kanlɛ’n i bo w’a kleman Izraɛli m’ɔ ti nglo lɔ famiɛn diwlɛ ɲin keklefuɛ’n. Sanngɛ, ɔ dun mmua kan kleli nvle nsiɛn nga be mantan Izraɛli’n. Nvle sɔ mun yɛle Sirifuɛ mun, ɔ nin Filistifuɛ mun, ɔ nin Tirfuɛ mun, ɔ nin Edɔmufuɛ mun, ɔ nin Amɔnfuɛ mun, yɛ Moabufuɛ mun. ?Sanngɛ, ɔ nin i fata kɛ Ɲanmiɛn di nvle sɔ’m be jɔlɛ? Ɛɛn, be nin jɔlɛ dilɛ fata kpa liɛ su! Sa nga ti yɛ be nin i sɔ’n fata’n i kun yɛle kɛ, be kpɔ Ɲanmiɛn i nvle nunfuɛ’m be tɛ kpa.
6. ?Ngue ti yɛ Ɲanmiɛn seli kɛ ɔ́ wá klé Sirifuɛ mun nin Filistifuɛ mun, yɛ Tirfuɛ’m be ɲrɛnnɛn’n niɔn?
6 Amun e fa Sirifuɛ mun naan e nian. Zoova buli be fɔ, afin ‘be jɔjɔli Galaadifuɛ’m be nun.’ (Amɔs 1:3). Galaadifuɛ’m be lika’n m’ɔ o Zurdɛn nzue ba’n i fama su’n, Sirifuɛ’m be deli i be sa nun, kpɔkun be kleli Ɲanmiɛn i nvle nunfuɛ’m be ɲrɛnnɛn dan kpa lika sɔ’n nun lɔ. ?Yɛ Filistifuɛ mun nin Tirfuɛ’m be li? Filistifuɛ’m be trali Izraɛlifuɛ’m be lomuɛn, kpɔkun be ko yoli be atɛ Edɔmufuɛ’m be sa nun. Tirfuɛ’m be kusu be yoli Izraɛlifuɛ wie’m be atɛ kɛ kanga sa wie (Amɔs 1:6, 9). Ɲanmiɛn bɔbɔ i nvle nunfuɛ mun mɔ be su yo be atɛ kɛ kanga sa’n, amun bɔbɔ amun nian e! I sɔ’n ti’n, sɛ Zoova se kɛ ɔ́ fá ɲrɛnnɛn yí i Sirifuɛ mun nin Filistifuɛ mun, yɛ Tirfuɛ’m be su’n, i sɔ’n boman sran fi nuan.
7. ?Edɔmufuɛ mun nin Amɔnfuɛ mun nin Moabufuɛ’m be nin Izraɛlifuɛ’m be ti sɛ? ?Sanngɛ be yoli Izraɛlifuɛ’m be sɛ?
7 Edɔmufuɛ mun nin Amɔnfuɛ mun, yɛ Moabufuɛ mun nin Izraɛlifuɛ’m be kwlaa be ti kun. Afin be ti aniaan. Edɔmufuɛ’m be ti Abraamu i osu’n nunfuɛ mun. Afin be ti i anunman Ezau m’ɔ nin Zakɔbu be ti nda’n, i mma mun. Ɔ maan, be ti Izraɛlifuɛ’m be niaan. Amɔnfuɛ mun nin Moabufuɛ’m be kusu’n, be ti Abraamu i aosua Lɔtu i osu nunfuɛ. ?Sanngɛ, ɔ nin i sɔ ngba’n, Edɔmufuɛ mun nin Amɔnfuɛ mun, yɛ Moabufuɛ’m be nin Izraɛlifuɛ’m be trannin aniaan tranlɛ? Ɔ si’ɛ! Edɔmufuɛ’m be fali tokofi be fuannin ‘be niaan Izraɛlifuɛ mun,’ b’a siman be aunnvuɛ. Kpɔkun ɲrɛnnɛn nga Amɔnfuɛ’m be fa kleli Izraɛlifuɛ nga be trali be lomuɛn’n, ɔ yo sro (Amɔs 1:11, 13). Kannzɛ bɔbɔ Amɔsu w’a kanman ɲrɛnnɛn nga Moabufuɛ’m be kleli Ɲanmiɛn i nvle nunfuɛ mun’n i ndɛ sa trele’n, sanngɛ kpɔlɛ nga Moabufuɛ’m be fa kpɔli Izraɛlifuɛ mun’n i su ndɛ nga be klɛli’n, ɔ sɔnnin kpa. Ɔ maan, fɔ nga Ɲanmiɛn wá fá tú nvle nsan sɔ mun’n, ɔ su yoman blɛblɛ. Yɛle kɛ Zoova wá fá sin núnnún be.
Be kwlá wanndiman jɔlɛ nga Ɲanmiɛn di’n i ɲrun
8. ?Ngue ti yɛ jɔlɛ nga Ɲanmiɛn dili nvle nsiɛn nga be mantan Izraɛlifuɛ mun’n w’a toman w’a fuanman be’n niɔn?
8 E wun weiin kɛ nvle nsiɛn nga Amɔsu dun mmua kannin Ɲanmiɛn nuan su ndɛ’n kleli be’n, ɔ nin i fata kɛ Ɲanmiɛn di be jɔlɛ. Nanwlɛ, be jɔlɛ dilɛ sɔ’n su to fuanman be. Kɛ ɔ fɛ i Amɔs ndɛ tre 1, i mma 3 lele ndɛ tre 2, i mma 1 su’n, Zoova se kpɛ nsiɛn kɛ: ‘E nin be y’a ɲɛn i.’ Kɛ nga Zoova bɔbɔ fa kannin i sa’n, w’a yaciman w’a cɛman be mlɔnmlɔn. Laa sa’m be kle weiin kɛ nvle sɔ’m be tinuntinun be wunnin ɲrɛnnɛn dan kpa. I sɔ’n ti’n, be nun nnan mɔ yɛle Filistifuɛ mun, ɔ nin Moabufuɛ mun, ɔ nin Amɔnfuɛ mun yɛ Edɔmufuɛ’m be osu’n nunnunnin mlɔnmlɔn!
9. ?Ngue yɛ ɔ nin Zida mɛn’n fata ɔ? ?Yɛ ngue ti ɔ?
9 Kɛ Amɔsu kannin nvle nsiɛn sɔ’m be ndɛ wieli’n, ɔ fɛli i ɲin sieli i Zida m’ɔ ti i bɔbɔ i nvle’n i su. Kɛ Amɔsu kán jɔlɛ nga Ɲanmiɛn wá dí Zida famiɛn diwlɛ’n i ndɛ’n, atrɛkpa’n, ɔ boli Izraɛli m’ɔ ti nglo lɔ famiɛn diwlɛ’n i nunfuɛ nga be tili ndɛ sɔ’n be nuan. ?Ngue ti yɛ Zidafuɛ’m be nin jɔlɛ dilɛ fata ɔ? Amɔs 2:4 waan “mmla nga n [Zoova, NW] fa mannin be’n, be yoli i finfin.” Zoova ɲin w’a kpaman i Mmla mɔ be yoli i finfin’n, i su. Kɛ nga Amɔs 2:5 fa kan’n sa’n, ɔ dun mmua seli kɛ: ‘Ń fá sin ń yí Zida mɛn’n nun. Ɔ maan i sɔ sin liɛ’n, ɔ́ yrá sua nglanman nga be o Zerizalɛmu lɔ’n mun.’
10. ?Ngue ti yɛ Zidafuɛ’m b’a kwlá wanndiman ɲrɛnnɛn’n i ɲrun ɔn?
10 ?Ɲrɛnnɛn dan nga Ɲanmiɛn wá fá yí i Zida mɛn’n nun’n, be su kwlá wanndimɛn i ɲrun. I kpɛ nso su’n, Zoova seli kɛ: ‘E nin be y’a ɲɛn i.’ (Amɔs 2:4). Kɛ afuɛ 607 nun L.B.N. nun’n. Babilɔnifuɛ’m be wa sacili Zida mɛn’n, yɛ fɔ nga Zoova waan ɔ́ fá tú be’n, ɔ kpɛnnin su ɔ. E wun i lɛ’n nun ekun kɛ, klunwifuɛ’m be kwlá wanndiman jɔlɛ nga Ɲanmiɛn di be’n i ɲrun mlɔnmlɔn.
11-13. ?I klikli nun’n, akpasua mennin yɛ Amɔsu i ndɛ ti be liɛ ɔ? ?Yɛ sa mennin mun yɛ be yo be lɔ ɔ?
11 Ɲanmiɛn nuan ijɔfuɛ’n kannin jɔlɛ nga Zoova wá dí’n, i ndɛ kleli nvle nso cɛ. Sanngɛ, sɛ sran kun bu i kɛ ndɛ nga Ɲanmiɛn fa wlali Amɔsu nuan kɛ ɔ kan’n i ngba yɛle ngalɛ’n, nn ɔ su lɛkɛ i bɔbɔ i wun. Afin, ndɛ kpanngban te o Amɔsu nuan! I klikli’n yɛle kɛ, Ɲanmiɛn sunmannin Amɔsu kɛ ɔ ko kan sa yaya ng’ɔ́ wá jú Izraɛli m’ɔ ti nglo lɔ famiɛn diwlɛ’n su’n, i ndɛ kle be. Izraɛlifuɛ’m be nin jɔlɛ dilɛ sɔ’n fata, afin be ayeliɛ nun’n, ɔ nin Ɲanmiɛn ninnge’m be nun’n, be timan falɛ liɛ kun.
12 Ɲanmiɛn nuan ijɔfuɛ Amɔsu i ndɛ ng’ɔ kannin’n, ɔ yi sa nga Izraɛli famiɛn diwlɛ wunmuan’n nun be yo’n, i nglo. Amɔs 2:6, 7 waan: ‘Izraɛlifuɛ’m be sa tɛtɛ nga b’a yo’n sɔnnin. Ɔ maan e nin be y’a ɲɛn i. Sran nga w’a yoman sa’n, sika dunman nun ti be yo i atɛ ɔ kaci kanga. Ngbabua kunngun nɲɔn cɛ mɔ yalɛfuɛ’n w’a kwlɛmɛn i kalɛ tannin’n ti, be yo i atɛ. Nga be kunndɛ’n, yɛle kɛ be mɔ be leman like’n, bé míanmían be lele bé dé be sa nun ninnge’n kwlaa. Yalɛfuɛ’n kɛn i ndɛ liɛ ɔ, jɔlɛ difuɛ’m be bumɛn i like fi.’
13 Sran nga w’a yoman sa’n, “sika dunman nun ti” be yo i atɛ. I sɔ’n kwla kle kɛ adi ninnge’m be nun sɔlɛ’n ti jɔlɛ difuɛ’m be bu sran nga w’a yoman sa’n, i fɔ. Bosia bofuɛ’m be yo yalɛfuɛ’m be atɛ kɛ kanga sa. Be di be gua kɛ ‘ngbabua kunngun nɲɔn cɛ’ gua sa. Sanngɛ nn wie liɛ’n, kalɛ sɔ’n juman lika fi. Sran sɔ mun mɔ be siman aunnvuɛ’n, like ‘nga be kunndɛ’ mɔ be yo’n yɛle kɛ, be ‘mianmian yalɛfuɛ mun.’ Ɔ maan, yalɛfuɛ’m be fa ndutre gua be ti’n su be fa yi be awlaboɛ’n, annzɛ be ɲannzuɛn’n i nglo. Yɛ kɛ mɔ adi ninnge’m be nun sɔlɛ’n deli lika’n ti’n, ‘be mɔ be leman like’n’ be kwlá lafiman su kɛ sran kun kwla bu be ndɛ kpa cɛn kun sa le.
14. ?Wan mun yɛ Izraɛli akpasua blu’n nun lɔ be kle be ɲrɛnnɛn’n niɔn?
14 Amun nian sran nga be kle be ɲrɛnnɛn sɔ’n. Be nga be yo sa i nuan su’n, ɔ nin yalɛfuɛ mun nin wɛtɛɛfuɛ mun’n, be yɛ be kle be ɲrɛnnɛn’n niɔn. Aenguɛ nga Zoova nin Izraɛlifuɛ’m be trali’n i nun Mmla’n waan maan be si sran nga be leman like’n, be aunnvuɛ. Sanngɛ Izraɛli akpasua blu’n nun lɔ’n, i sɔfuɛ mun yɛ be wun be ɲrun kpa’n niɔn.
‘Siesie ɔ wun minndɛ min mɔ n ti ɔ Ɲanmiɛn’n’
15, 16. (a) ?Ngue ti yɛ Ɲanmiɛn seli Izraɛlifuɛ’m be kɛ be ‘siesie be wun be minndɛ i mɔ ti be Ɲanmiɛn’n’ niɔn? (b) ?Wafa sɛ yɛ Amɔs 9:1, 2 kle kɛ klunwifuɛ’m be su kwlá wanndiman jɔlɛ nga Ɲanmiɛn wá dí be’n i ɲrun ɔn? (c) ?Afuɛ 740 nun L.B.N., ngue yɛ ɔ juli Izraɛli famiɛn diwlɛ’n i su ɔ?
15 Kɛ mɔ sa sukusuku nin sa tɛ wie mun ekun be yolɛ’n truli Izraɛli mɛn wunmuan nun’n ti’n, Ɲanmiɛn sinnin i nuan ijɔfuɛ Amɔsu lika naan w’a se nvle ɲin keklefuɛ sɔ’n kɛ: ‘Siesie ɔ wun minndɛ min mɔ n ti ɔ Ɲanmiɛn’n.’ (Amɔs 4:12). Izraɛlifuɛ klunwifuɛ’m be su kwlá wanndiman jɔlɛ nga Ɲanmiɛn wá dí be mɔ w’a mantan koko’n i ɲrun. Afin i kpɛ mɔcuɛ su’n, Zoova seli kɛ: ‘E nin be y’a ɲɛn i.’ (Amɔs 2:6). Kɛ Ɲanmiɛn kán klunwifuɛ nga atrɛkpa bé wá kúnndɛ kɛ bé fíɛ i ɲrun’n be ndɛ’n, ɔ seli kɛ: ‘Sran fi su kwlá wanndiman. Be wie fi su finman nun fiteman. Sɛ be kɔ lele be ju blɔlɔ lɔ’n, ń kó fá be lɔ ḿ bá. Sɛ be ko fia ɲanmiɛn su lɔ’n, ń kó fá be lɔ ń jrá.’—Amɔs 9:1, 2.
16 Kannzɛ bɔbɔ klunwifuɛ’m be ko fia ‘blɔlɔ lɔ’n,’ yɛle kɛ sɛ be ko fia asiɛ’n i bo kpa lɔ’n, ɔ timan Ɲanmiɛn i ɲrun fiawlɛ. Kannzɛ kusu be ko fia ‘ɲanmiɛn su lɔ’n,’ yɛle kɛ sɛ be ko fia oka nglonglo kpa’n be su’n, jɔlɛ nga Ɲanmiɛn wá dí be’n ɔ su to fuanman be. Ndɛ nga Zoova kan kle be’n ti weiin. Yɛle kɛ, ɔ leman lika kun sa m’ɔ kwla yo fiawlɛ lika Ɲanmiɛn ɲrun ɔn. Ɲanmiɛn i sa nuan su yolɛ’n ti’n, ɔ fata kɛ Izraɛli famiɛn diwlɛ’n ɔ ɲɛn i klunwi ayeliɛ’n i su akatua. Akatua sɔ’n i manlɛ blɛ’n juli kusu. Kɛ Amɔsu kannin Ɲanmiɛn nuan su ndɛ’n mɔ afuɛ 60 sinnin’n, yɛle kɛ afuɛ 740 nun L.B.N., Asirifuɛ’m be wa utuli Izraɛli famiɛn diwlɛ’n.
Be nga be nin jɔlɛ dilɛ fata’n, be yɛ Ɲanmiɛn di be jɔlɛ ɔ
17, 18. ?Ɲanmiɛn i sran aunnvuɛ silɛ’n su ndɛ mennin yɛ Amɔsu ndɛ tre 9 yi i nglo ɔ?
17 Ɲanmiɛn nuan ijɔfuɛ Amɔsu i ndɛ’n uka e maan e wun i wlɛ kɛ, jɔlɛ nga Ɲanmiɛn di’n ɔ ti su titi. Kpɔkun ɔ to fuanman be nga be nin jɔlɛ dilɛ fata’n. Sanngɛ Amɔsu i fluwa’n kle e ekun kɛ be nga be nin jɔlɛ dilɛ fata’n be yɛ Zoova di be jɔlɛ ɔ. Lika kwlaa nga klunwifuɛ kun ko fia’n, Ɲanmiɛn kwla wun i, kpɔkun ɔ di i jɔlɛ. Ɔ kwla wun sran ng’ɔ kaci i nzuɛn’n m’ɔ yo sa kpa’n i wie kusu, naan w’a si i aunnvuɛ. Amɔsu fluwa’n i ndɛ tre kasiɛn’n, ɔ yiyi i sɔ liɛ’n nun klanman kpa.
18 Amɔsu ndɛ tre 9, i mma 8 nun’n, Zoova seli kɛ: ‘M’an seman kɛ ń núnnún Zakɔbu anunman’m be ngba.’ Kpɔkun, kɛ nga ndɛ mma 13 lele 15 fa kan’n sa’n, Zoova waan ‘i sran nga be trali be lomuɛn’n, ɔ́ fá be sá be sin.’ Ɔ́ sí be aunnvuɛ, kpɔkun bé trán fɔuun, yɛ be sa nun ninnge’m bé yó ye. Zoova tɛli i sɔ liɛ’n i nda kɛ: ‘Cɛn wie lele kɛ bé kpɛ́ ble’n cɛ’n, nn be su guɛ i uflɛ ekun.’ Amun bu i angunndan be nian! Ble nga be kpɛli’n ɔ bobo be su dan ti’n, be su kwlá wiemɛn i nuan tian naan i gualɛ blɛ uflɛ’n w’a ju.
19. ?Ngue yɛ ɔ kpɛnnin su Izraɛlifuɛ nin Zidafuɛ nga be kali lɛ’n, be lika ɔ?
19 E kwla se kɛ, kɛ Zoova dí Zida nin Izraɛli lɔ klunwifuɛ’m be jɔlɛ’n, w’a nunnunman sran’m be ngba. Yɛle kɛ, be nga be kacili be nzuɛn’n mɔ be yoli sa kpa’n, ɔ sili be aunnvuɛ. Kɛ nga Amɔsu ndɛ tre 9 nun’n be kannin kɛ Izraɛlifuɛ nin Zidafuɛ nga be kali lɛ’n bé sá be sin sa’n, ɔ yoli sɔ sakpa. Afuɛ 537 nun L.B.N., sa sɔ’n kpɛnnin su. Kɛ be fin Babilɔni be sali be sin be asiɛ’n mɔ be klo i dan’n i su’n, be takali Ɲanmiɛn sulɛ kpafuɛ’n i uflɛ ekun. Be kplannin be sua mun, kpɔkun be dili be viɲi fie nin ninnge uflɛ wie’m be fie fɔun nun.
Zoova i sran jɔlɛ dilɛ’n ɔ́ jú bɔɔ le!
20. ?Ngue ti yɛ ɔ fata kɛ jɔlɛ nga Ɲanmiɛn dili’n i su ndɛ mɔ Amɔsu kannin’n mɔ y’a fa e ɲin y’a sie su’n, ɔ gua e awlɛn su nzue ɔ?
20 Ɔ fata kɛ jɔlɛ nga Ɲanmiɛn wá dí’n mɔ Amɔsu kɛnnin i ndɛ mɔ y’a fa e ɲin y’a sie su’n, ɔ gua e awlɛn su nzue. Yɛle kɛ, Zoova wá núnnún e blɛ liɛ’n nun klunwifuɛ mun mlɔnmlɔnmlɔn ?Ngue ti yɛ e kwla lafi i sɔ liɛ’n su ɔ? Sa nɲɔn ti ɔ. I klikli’n yɛle kɛ, sa nga laa nun Zoova fa yoli klunwifuɛ mun’n, ɔ kle e sa nga ɔ́ wá yó i e blɛ liɛ’n nun’n. I nɲɔn su’n yɛle kɛ, sɛ Izraɛli famiɛn diwlɛ’n i klunwi’n ti Ɲanmiɛn tuli i fɔ’n, saan ɔ́ núnnún asɔnun tɛtɛ mɔ be ti “Babilɔni klɔ dan’n” i bo bia’n wie. Babilɔni klɔ dan’n yɛle mɛn’n nun Ɲanmiɛn sulɛ wafawafa kwlaa nga be ti tɛ’n.—Sa Nglo Yilɛ 18:2.
21. ?Ngue ti yɛ ɔ fata kɛ Ɲanmiɛn di asɔnun tɛtɛ’m be jɔlɛ’n niɔn?
21 Ɔ nin i fata sakpa kɛ Ɲanmiɛn di asɔnun tɛtɛ’m be jɔlɛ. Afin, be Ɲanmiɛn sulɛ’n nin be ayeliɛ nun’n, be kleman be wun yalɛ be kɛnmɛn i lele kɛ ɔ ti tɛtɛ. I sɔ’n ti’n, jɔlɛ nga Zoova wá dí be nin Satan i mɛn’n i onga’n, be nin i sɔ’n ɔ́ fáta. Yɛ be jɔlɛ sɔ’n mɔ Zoova wá dí’n, be su kwlá wanndimɛn i ɲrun mlɔnmlɔn. I sɔ nun’n, Amɔsu ndɛ tre 9, i mma 1 i nun ndɛ’n yó be liɛ wie. I waan: ‘Sran fi su kwlá wanndiman. Be wie su finman nun fiteman.’ Ɛɛn, lika kwlaa nga klunwifuɛ’m be kwla bu i kɛ bé fía lɛ’n, Zoova sa’n tó be lɔ.
22. ?Jɔlɛ nga Ɲanmiɛn wá dí’n i su ndɛ mennin yɛ 2 Tɛsalonikfuɛ Mun 1:6-8 ɔ yiyi nun weiin ɔn?
22 Jɔlɛ nga Ɲanmiɛn di’n, ɔ ti su titi, be kwlá wanndimɛn i ɲrun, sanngɛ kusu be nga be nin jɔlɛ dilɛ fata’n be yɛ Ɲanmiɛn di be jɔlɛ ɔ. Ndɛ nga akoto Pɔlu kannin’n, ɔ yi i sɔ liɛ’n i nglo weiin. I waan: ‘Nanwlɛ, Ɲanmiɛn wá yó sa ng’ɔ ti su’n, ɔ́ klé be nga be kle amun ɲrɛnnɛn’n be ɲrɛnnɛn wie, yɛ ɔ maan e nin amun mɔ an wun ɲrɛnnɛn’n, é ɲán e ti. Kɛ e Min Zezi wá yí i wun nglo’n, m’ɔ nin i anzi’m mɔ be le fanngan dan’n, bé fín ɲanmiɛn su lɔ bé jrá’n, yɛ ɔ́ yó i sɔ ɔ. Ɔ́ bá sin m’ɔ jue’n nun naan ɔ́ tú be nga be siman Ɲanmiɛn’n nin be nga be faman e Min Zezi i jasin fɛ’n su’n be fɔ.’ (2 Tɛsalonikfuɛ Mun 1:6-8). ‘Nanwlɛ, Ɲanmiɛn yo sa ng’ɔ ti su’n.’ Yɛle kɛ, be nga be kle i sufuɛ m’ɔ kpali be sieli be ngunmin’n be yalɛ’n, ɔ ti kpa kɛ ɔ kle be ɲrɛnnɛn wie. Sran tɛ sɔ’m be su kwlá wanndiman ɲrɛnnɛn nga bé wá klé be’n i ɲrun. Ɔ maan, kɛ ‘Zezi wá yí i wun nglo’n, m’ɔ nin i anzi mun mɔ be le fanngan dan’n bé bá sin m’ɔ jue’n nun’n,’ klunwifuɛ’m be su fiteman nun. Sanngɛ be nga be nin jɔlɛ dilɛ fata’n be yɛ Ɲanmiɛn wá dí be jɔlɛ ɔ. I sɔ nun’n, Zezi wá ‘tú be nga be siman Ɲanmiɛn’n nin be nga be faman jasin fɛ’n su’n,’ be fɔ. Ɔ maan jɔlɛ nga Ɲanmiɛn wá dí’n, ɔ gua be nga be sro i mɔ be wun ɲrɛnnɛn’n be awlɛn su nzue.
Sran kpa’m be kwla lafi su kɛ bé fíte nun
23. ?Fɔnvɔlɛ nin awlɛn su nzue gualɛ ndɛ mennin yɛ e kwla wun i Amɔsu i fluwa’n nun ɔn?
23 Ɲanmiɛn nuan ijɔfuɛ Amɔsu i fluwa’n i nun ndɛ’n, ɔ ti sran kpa’m be fɔnvɔlɛ nin be awlɛn su nzue gualɛ ndɛ. Kɛ nga Amɔsu fa kannin’n sa’n, Zoova w’a nunnunman i nvle nunfuɛ’m be ngba sekeseke. Ɔ yiayiali Izraɛli nin Zidafuɛ nga be kali lɛ’n, kpɔkun ɔ fa be sali be sin be asiɛ’n su. Ɔ yrali be su maan be trannin fɔun nun, kpɔkun be ninnge’m be yoli ye dan be sa nun. ?E blɛ nga nun’n, ngue yɛ i sɔ’n kwla kle e ɔ? I sɔ’n kle e weiin kɛ, e kwla lafi su kɛ, kɛ Zoova wá dí jɔlɛ’n, asiɛ’n i lika kwlaa nga klunwifuɛ’m bé fía lɛ’n ɔ́ trá be. Kpɔkun kan sran ng’ɔ nin aunnvuɛ silɛ fata o lɛ’n, ɔ́ wún i sɔfuɛ’n yɛ ɔ́ sí i aunnvuɛ.
24. ?Wafa sɛ yɛ Zoova yra andɛ i sufuɛ’m be su ɔ?
24 ?Kɛ é mínndɛ cɛn nga Zoova wá dí klunwifuɛ’m be jɔlɛ’n, ngue yɛ e mɔ e ti i sufuɛ kpa’n e ɲɛn i ɔ? Nanwlɛ, Zoova yra e su dan kpa Ɲanmiɛn ninnge’m be nun! Wafa nga e su Ɲanmiɛn’n, asɔnun tɛtɛ’m be ato like klelɛ’n nunman nun. Ɲanmiɛn ninnge’m be nun’n, Zoova man e aliɛ kpanngban. Sanngɛ maan ɔ kpɛn e klun titi kɛ, e suyralɛ sɔ’n ɔ le i sin trɔ dan kpa kun. Yɛle kɛ jɔlɛ nga Ɲanmiɛn ɔ́ wá dí’n, ɔ kunndɛ kɛ e kɛn i ndɛ kle e wiengu mun. E kunndɛ kɛ é yó like kwlaa nga e kwla yo naan é kó tó be nga be ti ‘sran kpa’n.’ (Matie 10:11). Nanwlɛ, ɔ ti e klun su kɛ sran kpanngban nga e kwla uka be’n, é úka be naan dɔ nga su’n, be ɲan Ɲanmiɛn ninnge’m be nun suyralɛ’n wie. Asa ekun’n, e kunndɛ kɛ klunwifuɛ’m be jɔlɛ dilɛ’n nga w’a mantan koko yɛ’n i nun’n, be fite nun. Sanngɛ nanwlɛ, se e waan é ɲán suyralɛ sɔ’m be wie’n, ɔ fata kɛ e awlɛn’n nun lɔ yo kpa. I sɔ’n mɔ Amɔsu fluwa’n kɛn i ndɛ wie’n, é wá yíyí nun like suanlɛ ng’ɔ́ bá lɛ’n nun.
?Wafa sɛ yɛ amún tɛ́ kosan’m be su ɔ?
• ?Wafa sɛ yɛ Amɔsu i fluwa’n kle kɛ jɔlɛ nga Zoova di’n, ɔ ti su titi ɔ?
• ?Amɔsu fluwa’n nun sa mennin y’ɔ kle weiin kɛ be kwlá wanndiman jɔlɛ nga Ɲanmiɛn di’n i ɲrun ɔn?
• ?Wafa sɛ yɛ Amɔsu fluwa’n kle kɛ be nga be nin jɔlɛ dilɛ fata’n be yɛ Ɲanmiɛn di be jɔlɛ ɔ?