An nian Ɲanmiɛn nuan ijɔfuɛ’m be liɛ’n su: Amɔsu
1. ?Ngue ti yɛ Amɔsu i su ndɛ’n kwla wla e fanngan ɔn?
1 ?Amun a bu i le kɛ, kɛ mɔ amun a diman suklu a juman mmua’n ti’n, amun su siman jasin fɛ’n i bo? Sɛ ɔ ti sɔ’n, Amɔsu i ajalɛ’n kwla wla amun fanngan kpa. Ɔ yoli nnɛn kankanfuɛ, kpɛkun ɔ yoli afuɛ nuan junman difuɛ. Sanngɛ Zoova fɛli i wawɛ’n mɛnnin i kɛ ɔ ko bo jasin cinnjin kpa kun. (Amɔ. 1:1; 7:14, 15) I wafa kunngba’n, Zoova fa wɛtɛɛfuɛ mun nin yalɛfuɛ mun di junman. (1 Kor. 1:27-29) ?Afɔtuɛ uflɛ benin yɛ Ɲanmiɛn nuan ijɔfuɛ Amɔsu i su ndɛ’n man e m’ɔ kwla uka e jasin fɛ’n bolɛ’n nun ɔn?
2. ?Kɛ be tanndan e ɲrun jasin fɛ’n bolɛ nun’n, ngue ti yɛ e kwla jran kekle ɔ?
2 Maan e jran yalɛ klelɛ’n i ɲrun kekle: Be flɛ bian kun kɛ Amazia. Ɔ tɔn i wun suɛn kɛ ɔ ti Ɲanmiɛn nuan ijɔfuɛ Izraɛli nvle’n i nglo lɔ lika m’ɔ ti akpasua blu’n i su. Kɛ ɔ tili Amɔsu i ndɛ’n, w’a yomɛn i fɛ. Sɛ é kwlá sé’n, ndɛ ng’ɔ kan kleli Amɔsu’n yɛ: ‘Jaso wa kɔ wɔ awlo! Yaci e diin! E le e Ɲanmiɛn sulɛ wafa liɛ.’ (Amɔ. 7:12, 13) Amazia kpɛli Ɲanmiɛn nuan ijɔfuɛ Amɔsu i ndɛ’n i wun kan kleli Famiɛn Zeroboamu naan Famiɛn sɔ’n tannin Amɔsu i junman’n. (Amɔ. 7:7-11) Sanngɛ srɛ w’a kunman Amɔsu. Andɛ’n, kɛ Ɲanmiɛn sulɛ wafawafa’m be su kpɛn’m be kunndɛ klé Zoova i sufuɛ’m be yalɛ’n, be kunndɛ kɛ politikifuɛ’m be jran be sin. Sanngɛ Zoova se e kɛ alɛ ninnge kwlaa nga be yi i kɛ bé fá jrán e junman’n, ɔ́ yó ngbɛn.—Eza. 54:17.
3. ?Andɛ’n, jasin wafa nɲɔn benin yɛ e bo ɔ?
3 Maan e kan Ɲanmiɛn i jɔlɛ dilɛ cɛn’n nin i sin mmlusuɛ’m be ndɛ: Amɔsu kannin Izraɛli nvle’n i nglo lɔ lika m’ɔ ti akpasua blu’n be jɔlɛ dilɛ i ndɛ sɔ. Sanngɛ i fluwa’n i awieliɛ lɔ’n, ɔ kleli kɛ Zoova wá táka i nvle’n i lika laa’n nun naan ɔ́ yrɛ́ i su. (Amɔ. 9:13-15) E kusu e bo Ɲanmiɛn i sran fɔ bulɛ cɛn’n m’ɔ su ba’n, i jɔ. Sanngɛ i sɔ’n ti “Nyanmiɛn sielɛ’n i jasin fɛ” ng’ɔ fata kɛ e bo’n, i bue. (2 Piɛ. 3:7; Mat. 24:14) Kɛ Zoova wá núnnún klunwifuɛ mun Armagedɔn alɛ’n nun’n, é wá trán mɛn klanman’n nun asiɛ’n su wa.—Jue. 37:34.
4. ?Kɛ ɔ ko yo naan y’a kwla yo Zoova i klun sa’n, ngue yɛ e kwla lafi su ɔ?
4 E wun mɔ e fa mannin Zoova’n i nuan like yolɛ’n, ɔ nin Zoova i klun sa yolɛ’n be timan pɔpɔ. Afin be nga be tanndan e ɲrun’n be afiɛn yɛ e bo jasin fɛ’n niɔn. (Zan 15:19) Kɛ mɔ Zoova jrannin Amɔsu i sin’n ti’n, e lafi su kɛ ɔ́ mán e like kwlaa nga e miɛn i wun’n naan y’a kwla yo i klun sa’n.—2 Kor. 3:5.