NDƐ NG’Ɔ KLƐ FLUWA’N SU’N | ?A BU I KƐ ƝANMIƐN BU WƆ AKUNNDAN?

?A bu i kɛ Ɲanmiɛn bu wɔ akunndan?

“N ti aunnvuɛfuɛ yɛ n ti nyrɛnnɛnfuɛ. Sanngɛ Anannganman bu min akunndan.”​—Jue Mun 40:17.

DAVIDI M’Ɔ YOLI LAA IZRAƐLI FAMIƐN’N.

?Ɲanmiɛn kwla bu Davidi i akunndan sakpa? ?Yɛ wɔ li, a bu i kɛ Ɲanmiɛn kwla bu wɔ akunndan? Sran sunman be bumɛn i kɛ Ɲanmiɛn Kpli kwla bu be akunndan. ?Ngue ti ɔ?

Like nga ti yɛ sran wie’m be bu i kɛ Ɲanmiɛn kwlá buman be akunndan’n i kun yɛle kɛ, Ɲanmiɛn timan klɔ sran, yɛ i dan tra sran mun lele. Kɛ Ɲanmiɛn nian nvlenvle mun’n, be nunfuɛ’m be kwlaa “be ti kɛ nzue m’ɔ fin so kun nun kpɛn kpɔ’n sa. Be ti kɛ ndutre kan yɛ ɔ o toe’n su sa.” (Ezai 40:15) Ɔ maan, fluwa sifuɛ kun seli kɛ, kɛ “sran’m be bu i kɛ Ɲanmiɛn o lɛ naan ɔ bu be akunndan’n, i sɔ’n ti tutre dilɛ dan.”

Sran wie’m be liɛ’n, be waan be ti sa tɛ yofuɛ dan. Naan i sɔ’n ti, Ɲanmiɛn kwlá buman be akunndan kaan sa. I sɔ akunndan yɛ gbanflɛn kun mɔ be flɛ i Jim, ɔ buli ɔ. Ɔ seli kɛ: “Cɛn kwlaa n srɛ Ɲanmiɛn kɛ ɔ uka min naan n nian min wunsu naan min awlɛn w’a yoman fufu. Sanngɛ, ndɛ’n i kaan sa’n, nn m’an fa ya. I sɔ’n ti, n seli kɛ min liɛ w’a yoman ye naan Ɲanmiɛn kwlá ukaman min.”

?Kɛ mɔ Ɲanmiɛn ti dan tra sran mun lele’n ti’n, é sé kɛ ɔ buman e akunndan? ?Wafa sɛ yɛ Ɲanmiɛn bu klɔ sran mun ɔn? Sɛ nán Ɲanmiɛn bɔbɔ’n, sran fi kwlá tɛman kosan sɔ’m be su. I sɔ’n ti’n, Ɲanmiɛn fɛli i ndɛ’n mannin sran naan b’a klɛ. I ndɛ sɔ’n nun’n, ɔ gua e awlɛn su nzue kɛ ɔ bu sran’m be tinuntinun be akunndan naan “ɔ nin ye nin e nun wie fi nun-man mmua.” (Sa Nga Be Yoli’n 17:27) Ndɛ akpasua nga bé bá lɛ’n be nun’n, é wá wún ndɛ nga Ɲanmiɛn bɔbɔ kannin m’ɔ kle kɛ ɔ bu e tinuntinun e akunndan’n. Kpɛkun, like nga Ɲanmiɛn yoli m’ɔ kle kɛ ɔ bu sran’m be akunndan sakpa’n, é wún i wie.