IMBILA NSUMA UKULINGANA NE FYO MATEO AILEMBELE

1 Ibuuku ililanda pa lyashi* lya kwa Yesu Kristu,* umwana wa kwa Davidi,+ umwana wa kwa Abrahamu:+

17 E ico inkulo shonse ukufuma pali Abrahamu ukufika pali Davidi shali 14; ukufuma pali Davidi ukufika pa nshita babasendele bunkole ku Babiloni shali 14; kabili ukufuma pa nshita babasendele bunkole ku Babiloni ukufika pali Kristu shali 14.

18 Nomba ifi e fyo cali pa kuti Yesu Kristu afyalwe. Pa nshita Maria akobekelwe kuli Yosefe, ninshi tabalaupana no kuupana, aishilekwata ifumo ilyafumine ku mupashi wa mushilo.*+ 19 Nomba apo Yosefe umulume wakwe ali uwalungama, talefwaya ukumuseebanya ku bantu. E ico apangile ukumuleka mu bumfisolo.+ 20 Nomba pa numa ya kutontonkanya pali ifi fyonse, moneni! malaika wa kwa Yehova* alishile kuli ena mu cilooto, kabili amwebele ati: “Yosefe we mwana wa kwa Davidi, witiina ukusenda umukashi obe Maria ku mobe, pantu umupashi wa mushilo+ e ulengele ukuti emite. 21 Akafyala umwana umwaume, kabili ukamwinike ati Yesu,*+ pantu akalubula abantu bakwe ku membu shabo.”+ 22 Na kuba ifi fyonse fyacitike pa kuti ifyo Yehova* alandiile muli kasesema wakwe fifikilishiwe. Atile: 23 “Moneni! Nacisungu akemita no kufyala umwana umwaume, kabili bakamwinika ati Imanuele.”+ Ili ishina nga balipilibula, lyalola mu kuti “Lesa Aba na Ifwe.”+

24 Lyena Yosefe alishibwike kabili alicitile ifyo malaika wa kwa Yehova* amwebele, alisendele umukashi ku mwakwe. 25 Lelo taleelepo nankwe mpaka afyala umwana umwaume,+ kabili amwinike ati Yesu.+

2 Ilyo papitile inshita ukutula apo Yesu afyalilwe mu musumba wa Betelehemu+ uwa mu Yudea mu nshiku sha Mfumu Herode,*+ moneni! ababukila ku ntanda* abafumine ku kabanga baliile ku Yerusalemu. 2 Lyena batile: “Ili kwi imfumu ya baYuda+ iyafyalwa? Pantu ilyo twali ku kabanga twalimwene ulutanda lwa iko, e ico twishile mu kuifukamina.”* 3 Ilyo Imfumu Herode yaumfwile ifi, yalisakamikwe, na bantu bonse mu Yerusalemu balisakamikwe. 4 Lyena ilyo yalonganike intungulushi sha bashimapepo shonse na bakalemba ba bantu, yabepwishe uko Kristu* ali no kufyalilwa. 5 Nabo bayebele abati: “Ni mu musumba wa Betelehemu+ uwa mu Yudea, pantu ifi fine e fyo kasesema alembele. Alembele ati: 6 ‘Kabili iwe, we musumba wa Betelehemu uwa mu calo ca Yuda, tauli musumba uushacindama pa balashi ba mu Yuda, pantu muli iwe e mukafuma uukaba kateka, uukacema abantu bandi abena Israele.’”+

7 Lyena Herode mu bumfisolo aitile ababukila ku ntanda no kubepusha bwino bwino ilyo ulutanda lwamoneke. 8 Ilyo alebatuma ku Betelehemu, abebele ati: “Kabiyeni muyefwaya bwino bwino uyo mwana, kabili nga mwamusanga, mukesenjeba pa kuti na ine nkayemufukamina.” 9 Ilyo baumfwile ifyalandile imfumu, balimine balaya, kabili moneni! ulutanda ulo bamwene ilyo bali ku kabanga+ lwalibatangilile, mpaka lwayaiminina apali umwana. 10 Ilyo bamwene ulutanda, balisekelele nga nshi. 11 Kabili ilyo baingile mu ng’anda, bamwene umwana na Maria nyina, kabili ilyo bafukeme, balimutootele.* Lyena baiswile umwali ifyuma fyabo no kumupeela ifya bupe ifi: golde, ububani ubwabuuta na muri. 12 Lelo apo Lesa alibasokele mu cilooto+ ukuti bebwelela kuli Herode, bapitile inshila imbi pa kubwelelamo ku calo ca ku mwabo.

13 Ilyo baile, moneni! Yosefe amwene malaika wa kwa Yehova* mu cilooto,+ kabili malaika amwebele ati: “Ima, senda umwana na nyina, mufulumukile ku Egupti, kabili mukekale kulya mpaka nkakwebe ukuti fumako, pantu Herode alatendeka ukufwaya umwana pa kuti amwipaye.” 14 E ico Yosefe alimine ubushiku no kusenda umwana na nyina, baya na ku Egupti. 15 Aikele kulya kwine mpaka Herode afwa, ici cafikilishe ifyo Yehova* alandiile muli kasesema wakwe ukuti: “Naitile umwana wandi ukufuma ku Egupti.”+

16 Nomba ilyo Herode amwene ukuti ababukila ku ntanda balimupitile pa mano, alifulilwe nga nshi. Kabili atumine abakuyaipaya abana abaume bonse mu Betelehemu na mu ncende ishaba mupepi, abali ne myaka ibili no kuya panshi, ukulingana ne nshiku isho afwailishe bwino bwino ku babukila ku ntanda.+ 17 Lyena ifyo Lesa alandile ukupitila muli kasesema Yeremia fyalifikilishiwe. Atile: 18 “Mu Rama muleumfwika ishiwi lya muntu uulelila no kuloosha nga nshi. Ni Rakele+ e uleloosha abana bakwe, kabili talefwaya no kumusansamusha, pantu nabafwa.”+

19 Ilyo Herode afwile, ninshi Yosefe acili ku Egupti, moneni! amwene malaika wa kwa Yehova* mu cilooto+ 20 kabili amwebele ati: “Ima, usende umwana na nyina, muye ku calo ca Israele, pantu abalefwaya ukwipaya umwana* balifwa.” 21 E ico alimine no kusenda umwana na nyina baingila na mu calo ca Israele. 22 Lelo ilyo aumfwile ukuti Arkelao e wapyene Herode wishi pa bufumu mu Yudea, alitiinine ukuyako. Kabili apo Lesa alimusokele mu cilooto,+ aile ku citungu ca Galili.+ 23 Kabili aileikala mu musumba wa Nasarete,*+ pa kuti ifyo Lesa alandiile muli bakasesema fifikilishiwe. Atile: “Aketwa ukuti mwina Nasarete.”+

3 Mu nshiku shilya Yohane+ Kabatisha aishile alebila+ mu matololo ya mu Yudea. 2 Alebila ati: “Lapileni, pantu Ubufumu bwa mu muulu nabupalama.”+ 3 Na kuba, uyu e o kasesema+ Esaya alandilepo ilyo atile: “Umuntu alebilikisha mu matololo aleti, ‘Pekanyeni inshila ya kwa Yehova!* Lungamikeni inshila shakwe.’”+ 4 Nomba Yohane alefwala ica kufwala ca masako ya ngamila no mushipi wa mpapa mu musana.+ Makanta no buci+ bwa mu mpanga e fyo alelya. 5 Aba mu Yerusalemu na ba mu Yudea bonse, e lyo na baleikala mu ncende ishali mupepi na Yordani baleya kuli ena,+ 6 kabili alebabatishisha* mu Mumana wa Yordani,+ baleyebelela ne membu shabo apabuuta.

7 Ilyo amwene abaFarise abengi na baSaduke+ baleisa uko alebatishisha, abebele ati: “Mwe bana ba mafwafwa+ mwe, nani amusokele pa kuti mufulumuke ubukali+ ubuleisa? 8 E ico citeni ifintu ifilelanga ukuti namulapila. 9 Mwilaesha no kulanda amuti, ‘Twalikwata shifwe Abrahamu.’+ Pantu ndemweba nati, Lesa kuti ayalula aya mabwe yaba abana ba kwa Abrahamu. 10 Isembe lili kale mupepi ne shinte lya cimuti. E ico icimuti conse icishitwala ifisabo ifisuma bakacitema no kucipoosa mu mulilo.+ 11 Ine imubatisha mu menshi pa mulandu wa kulapila+ kwenu, lelo uukankonkapo alincila amaka kabili nshalinga ukumufuula+ indyato. Uyo ena akamubatishisha ku mupashi wa mushilo+ na ku mulilo.+ 12 Naikata ica kwelelako cakwe, kabili akawamya bwino bwino apa kupumina ingano, akalonganya ingano no kushibika mu butala, lelo imisungu akayoca mu mulilo+ uo bashingashimya.”

13 Lyena Yesu afumine ku Galili no kwisa ku Yordani kuli Yohane, pa kuti amubatishe.+ 14 Lelo Yohane aeseshe ukumulesha, kabili amwebele ati: “Iwe niwe ufwile ukumbatisha, nomba ulefwaya ine nine nkubatishe?” 15 Yesu amwaswike ati: “Pali ino nshita, leka tucite ifi fine, pantu ninshi twacita fyonse ifyalungama.” Lyena Yohane alisumine ukumubatisha. 16 Ilyo Yesu abatishiwe, ilyo line afumine mu menshi, kabili, moneni! imyulu yaliswike,+ lyena Yohane amwene umupashi wa kwa Lesa uleika kwati ni nkunda, uleisa pali Yesu.+ 17 Moneni! Kabili ishiwi lyafumine mu myulu+ aliti: “Uyu e Mwana wandi,+ uwatemwikwa, uo nsekelamo.”+

4 Lyena umupashi watungulwile Yesu ku matololo uko Satana Kaseebanya+ ailemutunkila.+ 2 Pa numa ya kufunga pa nshiku 40 akasuba no bushiku, alyumfwile insala. 3 Lyena Katunka+ alishile kuli ena no kumweba ati: “Nga uli mwana wa kwa Lesa, eba aya mabwe yabe imikate.” 4 Lelo amwaswike ati: “Amalembo ya mushilo yatila: ‘Te fya kulya fyeka ifilenga umuntu atwalilila ukuba no mweo, lelo na mashiwi yonse ayo Yehova* alanda.’”+

5 Lyena Satana Kaseebanya amutwele mu musumba wa mushilo,+ kabili amwiminike pa muulu wa cibumba* ce tempele+ 6 e lyo amweba ati: “Nga uli mwana wa kwa Lesa, tolokela panshi, pantu calilembwa ukuti, ‘Akeba bamalaika bakwe ifya kucita pali iwe,’ kabili ‘bakakusendela pa maboko yabo, pa kuti wikaipununa ulukasa kwi libwe.’”+ 7 Yesu amwebele ati: “Na kabili calilembwa ukuti, ‘Wilaesha+ Yehova* Lesa obe.’”

8 Na kabili Satana Kaseebanya amutwele pa lupili ulutali sana. Lyena amulangile amabufumu yonse aya pano calo ne fyo yacindama.+ 9 E lyo amwebele ati: “Fyonse ifi ndekupeela nga wafukama no kumpepa.” 10 Lyena Yesu amwebele ati: “Fuma apa, we Satana! Pantu calilembwa ukuti, ‘Yehova* Lesa obe e o ulepepa,+ kabili eka fye e o ulebombela.’”+ 11 Lyena Satana Kaseebanya alile,+ kabili moneni! bamalaika balishile no kutendeka ukwafwa Yesu.+

12 Nomba ilyo aumfwile ukuti Yohane balimwikete,+ aile ku Galili.+ 13 Kabili ilyo afumine ku Nasarete, atendeke ukwikala mu Kapernahumu+ ku lulamba lwa bemba mu fitungu fya kwa Sebuluni ne fya kwa Naftali, 14 pa kuti ifyo Lesa asobeele ukupitila muli kasesema Esaya fifikilishiwe. Atile: 15 “We calo ca bena fyalo ica Galili, umwaba icitungu ca kwa Sebuluni ne citungu ca kwa Naftali, ifyaba mu nshila ya kuli bemba, kwi shilya lya Yordani! 16 Umo abantu abaikele mu mfifi bamwene ulubuuto ulukalamba, kabili abaleikala mu cinshingwa icileta imfwa, ulubuuto+ lwalibasanike.”+ 17 Ukutula ilya nshita, Yesu atendeke ukubila ati: “Lapileni, pantu Ubufumu bwa mu muulu nabupalama.”+

18 Ilyo ale-enda mu lulamba lwa bemba wa Galili, amwene aba bwananyina babili, Simone uo beta no kuti Petro+ na Andrea munyina, ninshi balepoosa amasumbu muli bemba, pantu bali balondo.+ 19 Kabili abebele ati: “Nkonkeni, pa kuti nkalenge mukabe abalondo ba bantu.”+ 20 Ilyo line fye, bashiile amasumbu yabo no kumukonka.+ 21 Ilyo aendeleko panono, amwene aba bwananyina na bambi babili, Yakobo na Yohane+ abana ba kwa Sebede. Bali mu bwato pamo na shibo Sebede, balelunda amasumbu kabili alibetile.+ 22 Ilyo line fye bashiile ubwato na shibo bakonka na Yesu.

23 Lyena apitile mu Galili+ monse, alesambilisha mu masunagoge+ yabo no kubila imbila nsuma ya Bufumu. Kabili aleposha imisango yonse iya malwele ne misango yonse iya ntenda.+ 24 Kabili abantu abaleikala mu Siria monse balyumfwile ululumbi lwakwe, kabili bamuleteele bonse abalwele amalwele ayalekanalekana ne ntenda,+ abali ne fibanda,+ abalwele cipumputu+ na ba bulebe, kabili alibondepe. 25 E ico amabumba ayakalamba ukufuma ku Galili, ku Dekapoli,* ku Yerusalemu, ku Yudea na kwi shilya lya Yordani yalimukonkele.

5 Ilyo amwene amabumba, aninine ulupili; kabili ilyo aikele, abasambi bakwe baile kuli ena; 2 Lyena atampile ukusambilisha ati:

3 “Ba nsansa abaishiba ukuti balakabila ifya kwa Lesa,+ pantu Ubufumu bwa mu muulu bwabo.

4 “Ba nsansa abaloosha, pantu bakabasansamusha.+

5 “Ba nsansa abafuuka,+ pantu bakapyana isonde.+

6 “Ba nsansa abomfwa insala ne cilaka+ ca bulungami, pantu bakekuta.+

7 “Ba nsansa aba luse,+ pantu bakababelela uluse.

8 “Ba nsansa abatambalala imitima,+ pantu bakamona Lesa.

9 “Ba nsansa abalenga paba umutende,+ pantu bakabeta ati abana ba kwa Lesa.

10 “Ba nsansa abo bacusha pa mulandu wa bulungami,+ pantu Ubufumu bwa mu muulu bwabo.

11 “Mukalaba ne nsansa nga ca kuti abantu bamupontela,+ bamucusha+ kabili bamubepesha ubufi ubwalekanalekana pa mulandu wandi.+ 12 Mulesekelela no kwanga+ apo icilambu+ cenu cikalamba mu muulu, pantu e fyo bacushishe na bakasesema abaliko ilyo imwe mushilabako.+

13 “Muli mucele+ wa pano isonde, umucele nga wafumuka, bushe kuti walowa shani na kabili? Takuli ico bengaubomfyako, lelo kuti baupoosa fye kunse+ na bantu balaunyantapo.

14 “Muli lubuuto lwa ba muli ici calo.+ Umusumba te kuti ukaane ukumoneka nga wabela pa muulu wa lupili. 15 Abantu nga basanika inyali tabakupikapo umuseke,* lelo baiteka pa ca kutekapo inyali, e lyo yasanikila bonse abali mu ng’anda.+ 16 Kanshi na imwe muleleka ulubuuto lwenu lulesanika ku bantu,+ pa kuti nga bamona imilimo yenu iisuma+ balecindika Shinwe uwaba mu muulu.+

17 “Mwilamona kwati naisa mu konaula ifyalembwa mu mabuuku ya Mafunde nelyo mu mabuuku ya Bakasesema. Nshaisa mu konaula ifyalembwamo iyo, lelo naishile mu kufifikilisha.+ 18 Ndemweba icine cine nati, nangu umuulu ne calo fingapita, tapakonaike icilembo icacepesha nelyo akalitoni ka cilembo mu Mafunde, mpaka fyonse fikacitike.+ 19 E ico, onse uwapula muli limo pali aya mafunde ayo abantu bamona ukuti tayacindama sana no kusambilisha abantu ukulapula muli aya yene mafunde, aketwa uwacepesha mu Bufumu bwa mu muulu. Lelo onse uwayakonka no kusambilisha abantu ukulayakonka, aketwa umukalamba mu Bufumu bwa mu muulu. 20 Pantu ndemweba nati, nga tamuli abalungama ukucila bakalemba na baFarise,+ tamwakengile mu Bufumu bwa mu muulu+ nakalya.

21 “Mwalyumfwa ifyo aba kale babebele ukuti, ‘Wilaipaya,+ lelo onse uwaipaya akalubulula mu cilye ca milandu.’+ 22 Nomba ndemweba nati, onse uutwalilila ukufulilwa+ munyina, akalubulula mu cilye ca milandu; na onse uwaeba munyina amashiwi ayabi kabili aya musaalula, akalubulula mu Cilye Cikalamba; kabili onse uwaeba umuntu ati, ‘We cipumbu ca muntu we!’ akaba no mulandu wa kumupooselapo mu Gehena*+ umwaba umulilo.

23 “E ico nga uletwala ica bupe ku ciipailo,+ kabili kulya kwine waibukisha ukuti munonko nakufulilwa, 24 ushe ica bupe cobe pa ntanshi ya ciipailo, no kubwelelamo. Uye ubalilepo ukumfwana na munonko e lyo ubwele utuule ica bupe+ cobe.

25 “Uleangufyanya ukumfwana no ulekutwala ku cilye ilyo muleya mu kulubulula, pa kuti e kutwala kuli kapingula, kapingula na o eyeba kapaso ukuti akusende pa kuti bekupoosa mu cifungo.+ 26 Ndekweba icine cine nati, tawakafumemo nakalya mpaka ukamubweseshe indalama shonse.*

27 “Mwalyumfwa ukuti batile, ‘Wilacita ubucende.’+ 28 Lelo ine ndemweba nati onse uwatwalilila ukulolekesha umwanakashi+ ica kuti amukumbwa, ninshi nacita kale nankwe ubucende mu mutima+ wakwe. 29 E ico ilinso lyobe ilya ku kulyo nga lilelenga ulelufyanya,* lilobole no kulipoosa.+ Pantu cawamapo ukukanakwata icilundwa cobe cimo ukucila bapoosa umubili obe onse mu Gehena.*+ 30 Na kabili, ukuboko kobe ukwa ku kulyo nga kulelenga ulelufyanya,* kuputuleko no kukupoosa.+ Pantu cawamapo ukukanakwata icilundwa cimo ica mubili obe, ukucila bapoosa umubili obe onse mu Gehena.*+

31 “Kabili batile, ‘Onse uwaleka umukashi, amupeele icipepala ca kupwishishapo icupo.’+ 32 Lelo ndemweba nati, onse uwaleka umukashi wakwe apashili umulandu wa bulalelale,* kuti alenga acita ubucende. Na onse uwaupa umwanakashi uo baleka ninshi acita ubucende.+

33 “Na kabili mwalyumfwa ukuti aba kale babebele ati, ‘Wilalapa ukwabula ukufikilisha,+ lelo ufwile ukufikilisha ifyo walaya Yehova.’*+ 34 Nomba ine ndemweba nati: Mwilalapa,+ nangu fye kulapa imyulu, pantu e cipuna ca Bufumu ica kwa Lesa; 35 nangu kulapa isonde, pantu e cipuna ca makasa yakwe;+ nangu kulapa Yerusalemu, pantu e musumba wa Mfumu iikalamba.+ 36 Wilalapa umutwe obe, pantu te kuti walule umushishi obe nangu fye ni umo ukuti ube uwabuuta nelyo uwafiita. 37 Muletila fye ‘Ee’ nga ca kuti mulepilibula ukuti ee, kabili muletila fye ‘Awe’ nga ca kuti mulepilibula ukuti awe;+ pantu icacila pali ifi cafuma ku mubifi.+

38 “Mwalyumfwa ukuti batile, ‘Ilinso pa linso ne lino pa lino.’+ 39 Nomba ine ndemweba nati: Mwilalwishanya no mubifi, lelo onse uwakutoba ulupi pe saya lya ku kulyo, umupeele ne libiye.+ 40 Kabili umuntu nga alefwaya ukukutwala ku cilye pa kuti apoke ica kufwala cobe ica mu kati, umuleke asende ne ca kufwala+ cobe ica kunse; 41 kabili umulashi nga akupatikisha ukumusendela ifipe apalepele kilomita* imo, umusendele apalepele amakilomita yabili. 42 Umuntu nga akulomba cimo, umupeele kabili wilakaanina uulefwaya ukumukongwesha.*+

43 “Mwalyumfwa ukuti batile, ‘Uletemwa umunobe,+ lelo ulepata umulwani obe.’ 44 Nomba ndemweba nati: Muletemwa abalwani+ benu kabili mulepepelako abamucusha+ 45 pa kuti mulange ukuti muli bana ba kwa Shinwe uwaba mu muulu,+ pantu alenga akasuba kalebalikila ababifi na basuma kabili alenga imfula ilelokela pa balungama na pa bashalungama.+ 46 Pantu nga mwatemwa fye abamutemwa, cilambu nshi mwingakwata?+ Bushe ifi te fyo na bakasonkesha ba misonko bacita? 47 Kabili nga muposha fye bamunyinenwe beka, ninshi cinshi icaibela ico mucita? Bushe ifi fine te fyo na bena fyalo bacita? 48 E ico na imwe mufwile ukuba abapwililika, nge fyo Shinwe wa mu muulu aba uwapwililika.+

6 “Cenjeleni, mwilacita ifyalungama pa menso ya bantu pa kuti fye bamumone,+ pantu nga mulecita ifi ninshi Shinwe uwaba mu muulu takamupeele icilambu. 2 E ico nga ulepeela ifya bupe,* wilabalilapo ukulisha ipenga, nge ficita aba bumbimunda mu masunagoge na mu misebo, pa kuti fye abantu babacindike. Ndemweba icine cine nati, nga bacita ifi ninshi nabapokelela kale icilambu cabo conse. 3 Lelo iwe ilyo ulepeela ifya bupe, wilaleka ukuboko kobe ukwa ku kuso kwaishiba ifyo ukwa ku kulyo kulecita, 4 pa kuti umuntu nangu umo eishiba ukuti ulepeela ifya bupe. Lyena Wiso uumona ifyo abantu bashingamona akakulambula.+

5 “Kabili ilyo mulepepa, mwilapashanya aba bumbimunda,+ pantu bena batemwa ukupepa ninshi nabeminina mu masunagoge na pa makoona ya misebo iikalamba pa kuti abantu babamone.+ Ndemweba icine cine nati, balipokelela kale icilambu cabo conse. 6 Lelo iwe pa kupepa, uleingila mu muputule obe kabili nga waisalako iciibi, ulepepa kuli Wiso uushimoneka.+ Lyena Wiso uumona ifyo abantu bashingamona akakulambula. 7 Ilyo ulepepa, wilabwekeshapo ukulanda amashiwi yamo yene nge ficita abena fyalo, pantu bamona kwati nga balanda amashiwi ayengi e lyo bengabomfwa. 8 E ico mwilaba nga bena, pantu Shinwe aleshiba ifyo mukabila+ na lintu tamulamulomba.

9 “Kanshi imwe mufwile ukulapepa nge fi:+

“‘Shifwe wa mu muulu, ishina+ lyenu libe ilya mushilo.*+ 10 Ubufumu+ bwenu bwise. Ifyo mufwaya+ ficitwe pano isonde+ nga mu muulu. 11 Tupeeleni ifya kulya* fya buno bushiku;+ 12 kabili tubeleleniko uluse pa membu shesu, ifyo na ifwe twabelela uluse abatulufyenye.*+ 13 Kabili mwitutwala mu kutunkwa,+ lelo tupokololeni* ku mubifi.’+

14 “Pantu nga mulebelela uluse abamulufyanya, Shinwe wa muulu na o akulamubelela uluse;+ 15 nomba nga tamubelela uluse abamulufyanya, na Shinwe wa mu muulu takulamubelela uluse pa fyo mulufyanya.+

16 “Ilyo mulefunga,+ mwilaba ne finso fya bulanda nge ficita aba bumbimunda, pantu balabifya pa menso* pa kuti abantu balemona ukuti balefunga.+ Ndemweba icine cine nati, nga bacita ifi ninshi nabapokelela kale icilambu cabo conse. 17 Lelo iwe ilyo ulefunga, ulesamba ku menso no kusuba amafuta ku mutwe, 18 pa kuti abantu bemona ukuti ulefunga, kano fye Wiso uwaba uko abantu bashingamona. Lyena Wiso uumona ifyo abantu bashingamona akakulambula.

19 “Mwilailonganikila ifyuma pano isonde,+ apo icipelebesha ca bushiku ne ndalawa fyonaula, kabili apo abapuupu bengengila no kwiba. 20 Lelo muleilonganikila ifyuma ku muulu,+ uko icipelebesha ca bushiku nangu indalawa fishingonaula,+ kabili uko abapuupu bashingengila no kwiba. 21 Pantu ukuli icuma cobe, e ko no mutima obe uba.

22 “Ulubuuto lwa mubili menso.+ E ico amenso yobe nga yalolesha fye pa cintu cimo, umubili obe onse ukaba umwabuuta. 23 Lelo amenso yobe nga yalolesha pa fyabipa,+ umubili obe onse ukaba umwafiita. Nomba nga cine cine muli iwe tamwaba ulubuuto lelo mwaba imfifi, ninshi iyo imfifi ikalamba nga nshi!

24 “Takwaba uwingabombela bashikulu babili; pantu kuti apatapo umo no kutemwa umbi,+ nelyo kuti abapo uwa cishinka kuli umo no kusuula umbi. Te kuti mubombele Lesa ne Fyuma.+

25 “E ico ndemweba nati: Lekeni ukusakamikwa+ pa myeo yenu, pa fyo mukalya nelyo pa fyo mukanwa, nelyo ukusakamikwa pa mibili yenu, pa fyo mukafwala.+ Bushe umweo tawacindama ukucila ifya kulya, no mubili bushe tawacindama ukucila ifya kufwala?+ 26 Lolekesheni ifyuni fya mu muulu,+ tafibyala imbuto, tafisombola kabili tafisunga ifya kulya mu matala, na lyo line Shinwe wa mu muulu alafiliisha. Bushe tamwacindama ukuficila? 27 Nani pali imwe engalundako umukono* umo ku bumi bwakwe+ nga alesakamikwa? 28 Na kabili, mulandu nshi mulesakamikilwa pa fya kufwala? Sambilileniko ku fyo amaluba ya mu mpanga yakula, tayabomba kabili tayapikula ifya kufwala; 29 nomba ndemweba nati nangu fye ni Solomone+ uwakwete ifintu ifingi ifya lulumbi, tafwelepo ifyalingene na limo pali aya maluba. 30 Nomba ifi nga e fyo Lesa afwika ifimenwa fya mu mpanga, ifya kuti lelo epo fili kabili mailo bafipoosa mu mulilo, bushe takacilepo ukufwika imwe? Icitetekelo cenu cinono! 31 E ico mwilasakamikwa+ kabili mwilatila, ‘Tulelya finshi?’ nelyo, ‘Tulenwa finshi?’ nelyo, ‘Tulefwala finshi?’+ 32 Pantu fyonse ifi e fyo abena fyalo bafwaisha. Shinwe wa mu muulu alishiba ukuti mulakabila ifi fyonse.

33 “Kanshi ico mulebika pa ntanshi, kufwaya Ubufumu no bulungami bwakwe, na fyonse ifi ifyo mukabila akalamupeela.+ 34 E ico mwilasakamikwa pa bushiku bwa mailo,+ pantu ubushiku bwa mailo bukaba na masakamika ya buko. Cila bushiku bulakwata amafya ya buko ayalinga.

7 “Lekeni ukupingula+ abantu pa kuti na imwe bekamupingula; 2 pantu ifyo mupingula abantu e fyo na imwe bakamupingula,+ kabili icipimo ico mupiminako abantu e co na imwe bakamupiminako.+ 3 Nomba cinshi ulolesesha akacani akali mu linso lya kwa munonko, lelo taumona ulusonta ululi mu linso lyobe?+ 4 Nelyo kuti waeba shani munonko ati, ‘Leka nkufumye akacani mu linso,’ e lyo ninshi iwe uli no lusonta mu linso lyobe? 5 We wa bumbimunda we! Utale ufumye ulusonta ululi mu linso lyobe, e lyo walamona bwino ifya kufumya akacani akali mu linso lya kwa munonko.

6 “Mwilapeela imbwa ifya mushilo, nangu ukupoosela inkumba+ bamargariti, pantu kuti bafinyantaula, bamwalukila, bamulepaula no kumulepaula.

7 “Mulelomba, kabili bakamupeela;+ mulefwaya, kabili mukasanga; mulekonkonsha, kabili bakamwiswila.+ 8 Pantu onse uulomba balamupeela,+ onse uufwaya alasanga, na onse uukonkonsha balamwiswila. 9 Na kuba, nani pali imwe uwingapeela umwana wakwe ilibwe nga amulomba umukate? 10 Nangu uwingamupeela insoka nga ca kuti amulomba isabi? 11 E ico, nga ca kuti imwe mwe babifi mwalishiba ukupeela abana benu ifya bupe ifisuma, ninshi Shinwe wa mu muulu akacilapo ukupeela ifisuma+ abamulomba!+

12 “E ico, fyonse ifyo mufwaya abantu balemucitila, e fyo na imwe mulebacitila.+ Na kuba, umu e mwalola+ amashiwi yaba mu mabuuku ya Mafunde na ya Bakasesema.

13 “Ingilileni pa mpongolo iyacepa,+ pantu impongolo ya musebo uwaya ku bonaushi ikalamba. Uyu musebo walipabuka, kabili bengi abengilila pali iyi mpongolo; 14 lelo impongolo ya musebo uwaya ku bumi yalicepa. Uyu musebo unono nga nshi, kabili banono abausanga.+

15 “Cenjeleni na bakasesema ba bufi+ abesa kuli imwe nabafwala+ nge mpaanga, lelo mu kati mimbulu iikali+ sana. 16 Mukabeshibila ku fisabo fyabo. Bushe abantu kuti basaba imyangashi ku myunga nelyo amakunyu kuli bacilasa?+ 17 Na kuba ifi fine e fyo caba, icimuti conse icisuma citwala ifisabo ifisuma, lelo icimuti conse icibi citwala ifisabo ifibi.+ 18 Icimuti icisuma te kuti citwale ifisabo ifibi, kabili icimuti icibi te kuti citwale ifisabo ifisuma.+ 19 Icimuti conse icishitwala ifisabo ifisuma, balacitema bacipoosa na mu mulilo.+ 20 Kanshi, abo bantu+ mukabeshibila ku fisabo fyabo.

21 “Te muntu onse uunjita ati, ‘Shikulu, Shikulu,’ akengila mu Bufumu bwa mu muulu, lelo uukengilamo+ muntu uucita ififwaya Tata uwaba mu muulu. 22 Muli bulya bushiku, abantu abengi bakanjeba abati: ‘Mwe Shikulu, mwe Shikulu,+ bushe tatwasesemene mwi shina lyenu, tatwafumiishe ifibanda mwi shina lyenu, no kucitila ifipesha amano ifingi mwi shina lyenu?’+ 23 Lelo nkabebelapo nati: ‘Nshatalile imwishiba! Fumeni apa, mwe bampulamafunde mwe!’+

24 “E ico umuntu onse uumfwa aya mashiwi yandi no kuyakonka, akaba ngo muntu uwa mano, uwakuulile ing’anda yakwe pa mwalaala.*+ 25 Imfula yalilokele pali iyi ng’anda, palipitile na mulamba kabili palipuupile ne cimwela, lelo tayabongolweke pantu aikuulile pa mwalaala. 26 Na kabili umuntu onse uumfwa aya mashiwi yandi lelo tayakonka, akaba ngo muntu umuwelewele, uwakuulile ing’anda yakwe pa mucanga.+ 27 Ilyo imfula yalokele pali iyi ng’anda,+ papita na mulamba e lyo ne cimwela, yalibongolweke kabili yawile fye yonse.”

28 Ilyo Yesu apwishishe ukulanda aya mashiwi, amabumba yalipapile imisambilishishe yakwe,+ 29 pantu alebasambilisha ngo muntu uwakwata amaka+ ayafuma kuli Lesa, talebasambilisha nge fyo bakalemba babo balebasambilisha.

8 Ilyo atentemwike ulupili, amabumba ayakalamba yalimukonkele. 2 Kabili moneni! umuntu uwali ne fibashi aishile kuli ena, amufukamina e lyo amweba ati: “Mwe Shikulu, kuti mwang’undapa+ nga mulefwaya.” 3 E ico Yesu atambalike ukuboko kwakwe, amwikata, e lyo atila: “Ee ndefwaya! Pola.”+ Kabili ilyo line fye alipolele ifibashi.+ 4 Lyena Yesu amwebele ati: “Wiebako umuntu nangu umo,+ lelo kabiye kuli shimapepo pa kuti akumone,+ utuule ne ca bupe ico balandapo mu mafunde ya kwa Mose,+ pa kuti bashimapepo bashininkishe ukuti naupola.”

5 Ilyo aingile mu Kapernahumu, umukalamba wa bashilika aishile kuli ena, alamupaapaata.+ 6 Amupaapeete ati: “Mukwai umubomfi wandi nasendama mu ng’anda pantu alilwala ubulebe, kabili alecula nga nshi.” 7 Na o amwebele ati: “Ndeya muposha nga nafika.” 8 Umukalamba wa bashilika amwebele ati: “Mukwai nshilingile ukumupokelela mu ng’anda mu mwandi, lelo landeni fye amashiwi no mubomfi wandi alapola. 9 Pantu na ine wine nalikwata abantungulula, nalikwata na bashilika abang’umfwila. Kuti naeba umo nati, ‘Kabiye!’ na o aya, na umbi nati, ‘Isa!’ na o aisa, kabili kuti naeba umusha wandi nati, ‘Cita ici!’ na o acita.” 10 Ilyo Yesu aumfwile ifi alipapile, kabili aebele abalemukonka ati: “Ndemweba icishinka nati, mu Israele nshatalamonamo umuntu uwaba ne citetekelo icikalamba ngo yu.+ 11 Lelo ndemweba nati, abengi aba ku kabanga na ba ku masamba bakesaikala pe tebulo no kuliila pamo na Abrahamu, Isaki na Yakobo mu Bufumu bwa mu muulu;+ 12 lelo abana ba Bufumu bakabapoosa kunse mu mfifi. Kulya kwine e ko bakalalilila no kusumanya ameno.”+ 13 Lyena Yesu aebele umukalamba wa bashilika ati: “Kabiye. Nacibe ifyo fine we mwine utetekele.”+ Kabili umubomfi wakwe alipolele ilya ine nshita.+

14 Kabili ilyo Yesu aingile mu ng’anda ya kwa Petro, amwene nafyala+ Petro nalaala, pantu alilwele impepo.+ 15 E ico amwikete ku kuboko,+ kabili alipolele. Lyena alimine atendeka no kupekanishisha Yesu ifya kulya. 16 Nomba ilyo cafikile icungulo, abantu bamuleteele abali ne fibanda abengi; na o alififumishe kwi shiwi fye, kabili alyundepe bonse abalwele, 17 pa kuti ifyo Lesa asobele ukupitila muli kasesema Esaya fifikilishiwe, asobele ati: “E wasendele intenda shesu na malwele yesu.”+

18 Ilyo Yesu amwene ibumba nalimushinguluka, aebele abasambi bakwe ukuti baabukile kwi shilya.+ 19 Kabili kalemba umo aishile kuli ena, e lyo amweba ati: “Mwe Kasambilisha, ndemukonka konse uko muleya.”+ 20 Lelo Yesu amwebele ati: “Bamumbwe balikwata imiimba* umo bekala, ne fyuni fya mu muulu fyalikwata ifinsa, lelo Umwana wa muntu ena takwata na pa kusaisha umutwe.”+ 21 Lyena umwaume umo pa basambi bakwe amwebele ati: “Mwe Shikulu, lekeni ntale njeshiika batata.”+ 22 Yesu amwebele ati: “Akunkonka, kabili leka abafwa bashiike abafwa babo abene.”+

23 Kabili ilyo aninine mu bwato, abasambi bakwe balimukonkele.+ 24 Nomba moneni! Pali bemba paliimine icikuuku ca mwela ica maka nga nshi, na mabimbi yalengele amenshi yalaingila mu bwato; Lelo ena alileele.+ 25 Awe abasambi baile kuli Yesu bamubuusha e lyo bamweba abati: “Shikulu, tupususheni twalafwa!” 26 Lelo abebele ati: “Cinshi muletiinina? Icitetekelo cenu cinono.”+ Lyena aliimine akalipila umwela na bemba, kwatalala na tondolo.+ 27 E ico balipapile, baleti: “Muntu wa musango nshi uyu uwa kuti nangu fye mwela na bemba filamumfwila?”

28 Ilyo afikile kwi shilya mu citungu ca bena Gadara, abaume babili abali ne fibanda abalefuma ku nshiishi* balimukumenye.+ Bali abakali nga nshi, ica kuti takwali umuntu nangu umo uushaletiina ukupita muli ulya musebo. 29 Kabili moneni! babilikishe abati: “Bushe tulomfwana na iwe, we Mwana wa kwa Lesa?+ Bushe wishile kuno mu kutukanda+ ilyo inshita tailafika?”+ 30 Nomba kwali inkumba ishingi ishalelya akatalamukila.+ 31 E ico ifibanda fyatendeke ukumupaapaata, afiti: “Nga mwatufumya, mututamfishe muli shilya inkumba.”+ 32 E ico afyebele ati: “Kabiyeni!” Ilyo line fyalifumine no kuya mu nkumba, kabili moneni! inkumba shonse shalibutukiile ukwasuluka no kuponena muli bemba, kabili shafwilile mu menshi. 33 Lelo bakacema balifulumwike, bayaingila mu musumba no kushimika fyonse ifyacitike, ukubikako fye ne fyacitikiile abaume babili abali ne fibanda. 34 Kabili moneni! abantu bonse mu musumba balifumine baya mu kukumanya Yesu, kabili ilyo bamumwene, bamupaapeete ukuti afume mu citungu+ cabo.

9 E ico ilyo aninine mu bwato, ayabukile kwi shilya aya na ku musumba ku mwabo.+ 2 Kabili moneni! bamuleteele umuntu uwalwele ubulebe ninshi nalaala pa musengele. Ilyo Yesu amwene ifyo bali ne citetekelo, aebele uwalwele ubulebe ati: “Wisakamana we mwana! Imembu shobe nashelelwa.”+ 3 Nomba bakalemba bamo batendeke ukutontonkanya ukuti: “Uyu muntu alepontela Lesa.” 4 Apo Yesu alishibe ifyo baletontonkanya, abepwishe ati: “Cinshi ico muletontonkanishisha ifyabipa mu mitima yenu?+ 5 Inga kanshi cinshi ca-angukapo ukulanda, ukulanda ati, ‘Imembu shobe shaelelwa,’ nelyo ukulanda ati, ‘Ima wende’?+ 6 Nomba pa kuti mwishibe ukuti Umwana wa muntu alikwata amaka ya kwelela imembu pano isonde . . .” lyena aebele uwa bulebe ati: “Ima, senda umusengele obe, uye ku mobe.”+ 7 Na o aliimine aya na kumwakwe. 8 Ilyo amabumba yamwene ifi, yalitiinine nga nshi kabili yalumbenye Lesa uwapeele abantu amaka ya musango uyu.

9 Ilyo Yesu alefuma kulya, amwene umuntu umo naikala pa cikuulwa ca kusonkeseshapo imisonko, ishina lyakwe ni Mateo, kabili amwebele ati: “Nkonka, ube umusambi wandi.” Ilyo line aliimine alamukonka.+ 10 Pa numa, ilyo Yesu alelya* mu ng’anda, moneni! bakasonkesha ba misonko abengi na babembu balishile no kutendeka ukuliila pamo nankwe na basambi bakwe.+ 11 Lelo ilyo abaFarise bamwene ifi, baipwishe abasambi bakwe abati: “Mulandu nshi kasambilisha wenu aliila pamo na bakasonkesha ba misonko na babembu?”+ 12 Ilyo aumfwile ifi, atile: “Abatuntulu tabakabila kondapa, kano abalwele.+ 13 E ico kabiyeni, kasambilileni umwalola amashiwi ya kuti: ‘Mfwaya muleba no luse, te malambo+ mfwaya.’ Pantu nshaisa mu kwita abalungami, kano ababembu.”

14 Lyena abasambi ba kwa Yohane baishile kuli ena e lyo bamwipusha abati: “Mulandu nshi ifwe na baFarise tufungila, lelo abasambi benu bena tabafunga?”+ 15 Yesu abaswike ati: “Bushe abanankwe ba kwa shibwinga bafwile ukuloosha ilyo shibwinga+ acili nabo? Inshiku shikesa ilyo shibwinga bakamusenda,+ e lyo bakafunga. 16 Takwaba uubilila icikamba ca nsalu iipya pa ca kufwala ca kale, pantu icikamba ca nsalu iipya kuti calenga ica kufwala calepuka, ica kuti ne cipunda cakulilako.+ 17 Kabili abantu tababika umwangashi uushilakalipa mu nyambi* sha kale. Pantu nga babikamo, inyambi shilalepuka no mwangashi ulapongoloka, ne nyambi shilonaika. Lelo nga babika umwangashi uushilakalipa mu nyambi ishipya, fyonse fibili tafyonaika.”

18 Ilyo alebeba ifi fintu, moneni! intungulushi imo yaishile kuli ena no kumufukamina,* e lyo yatila: “Ino nshita umwana wandi umwanakashi afwile no kufwa nafwa, tiyeni muye mubike iminwe pali ena pa kuti abe no mweo.”+

19 Lyena Yesu na basambi bakwe baliimine balamukonka. 20 Kabili moneni! umwanakashi uwalecula ku bulwele bwa kufuma umulopa+ pa myaka 12, alishile ku numa no kwikata ku nsenkebele sha ca kufwala+ cakwe ica kunse, 21 pantu mu mutima wakwe aleti: “Nga naikata fye ku ca kufwala cakwe ica kunse, nalapola.” 22 Yesu alipilibwike, kabili ilyo amumwene, amwebele ati: “Wisakamana, we mwana! Icitetekelo cobe nacikuposha.”+ Kabili ukufuma ilya ine nshita, uyu mwanakashi alipolele.+

23 Nomba ilyo aingile mu ng’anda ya ntungulushi amona na balelisha imitolilo ne bumba ilyalepanga icongo,+ 24 Yesu abebele ati: “Fumineni panse, pantu akakashana takafwile, kaleele fye utulo.”+ Awe batendeke ukumuseka no kumupumya. 25 Ilyo ibumba lyafumiine fye panse, alingiile aikata na kakashana ku kuboko,+ kabili akakashana kaliimine.+ 26 Awe ili lyashi lyasalanganine muli cilya citungu conse.

27 Ilyo Yesu alefuma kulya, impofu shibili+ shalimukonkele, kabili shalebilikisha ashiti: “Tumfwileniko uluse, we Mwana wa kwa Davidi.” 28 Ilyo aingile mu ng’anda, ishi mpofu shibili shaishile kuli ena, kabili Yesu ashipwishe ati: “Bushe namutetekela ukutila kuti namundapa?”+ Nasho shamwaswike ashiti: “Ee mwe Shikulu.” 29 Lyena ashikete mu menso,+ e lyo asheba ati: “Nacibe ifyo fine mwe bene mutetekele.” 30 Kabili shalitendeke ukumona. E lyo Yesu ashikonkomeshe ukuti: “Mwileka umuntu nangu umo eshibe ici cicitike.”+ 31 Lelo ilyo aba baume abali mpofu bafumiine panse, basalangenye ili ilyashi pali Yesu muli cilya citungu conse.

32 Ilyo balefuma kulya, moneni! abantu bamuleteele umwaume cibulu uwali ne cibanda;+ 33 kabili ilyo afumishe icibanda muli uyu cibulu, alitendeke ukulanda.+ Awe ibumba lyalipapile, kabili lyatile: “Tatwatala atumonapo ica musango yu mu Israele.”+ 34 Lelo abaFarise balelanda abati: “Afumisha ifibanda ku maka ya kwa kateka wa fibanda.”+

35 Kabili Yesu aile alepita mu misumba yonse ne mishi, alesambilisha mu masunagoge yabo, alebila imbila nsuma ya Bufumu kabili aleundapa umusango onse uwa bulwele no musango onse uwa ntenda.+ 36 Ilyo amwene amabumba ya bantu, alibomfwilile uluse+ pantu balebacusha kabili bali abapaswa nge mpaanga ishabula kacema.+ 37 Lyena aebele abasambi bakwe ati: “Cine cine, umulimo wa kulobolola ukalamba, lelo ababomfi bena nabacepa.+ 38 E ico, lombeni Umwine wa mulimo wa kulobolola ukuti atume ababomfi mu mulimo wakwe.”+

10 E ico aitile abasambi bakwe 12 e lyo abapeela amaka pa kuti balefumya imipashi yakowela,+ kabili baleposha amalwele yonse ne ntenda shalekanalekana.

2 Aya e mashina ya batumwa 12:+ Uwa kubalilapo ni Simone uo beta no kuti Petro+ na Andrea+ munyina; Yakobo na Yohane+ munyina, abana ba kwa Sebede; 3 Filipi na Bartolomeo;+ Toma+ na Mateo+ uwali kasonkesha wa misonko; Yakobo umwana wa kwa Alfeo, na Tadeo; 4 Simone uwacincila;* na Yuda Iskariote, uwaishilemufutuka.+

5 Yesu atumine aba 12 no kubeba ati:+ “Mwiya mu fitungu fya bena fyalo, kabili mwi-ingila mu musumba uuli onse uwa bena Samaria;+ 6 lelo muleya ku mpaanga isha mu ng’anda ya kwa Israele+ ishaluba. 7 Ilyo muleya, mulebila amuti, ‘Ubufumu bwa mu muulu nabupalama.’+ 8 Muleundapa abalwele,+ mulebuusha abafwa, muleundapa aba fibashi kabili mulefumya ifibanda. Apo mwapeelwe fye ubupe, na imwe mulepeela fye. 9 Mwisenda golde nangu silfere nelyo umukuba mu fikwama fya mu mishipi,+ 10 nangu icola ca fya kulya fya pa lwendo, nelyo ifya kufwala fibili,* nangu indyato nelyo inkonto,+ pantu umubomfi alilinga ukumupeela ifya kulya.+

11 “Umusumba onse nelyo umushi onse uo mwaingilamo, mufwayemo umuntu uulefwaya ukumfwa, kabili e ko mwikale mpaka mukafumemo.+ 12 Ilyo mwaingila mu ng’anda, posheni abalimo. 13 Nga ca kuti muli iyo ng’anda muli abalefwaya ukumfwa, umutende wenu ube muli iyo ng’anda;+ lelo nga tamuli, umutende wenu ubwelele kuli imwe. 14 Konse uko umuntu ashimupokelele nelyo ashumfwile amashiwi yenu, pa kufuma muli iyo ng’anda nelyo muli uyo musumba, kunteni ulukungu ku makasa yenu.+ 15 Ndemweba icine cine nati, pa Bushiku bwa Bupingushi, ubupingushi bwa Sodomu na Gomora+ bukaba eyefilya ukucila ubwa uyo musumba.

16 “Moneni! Ndemutuma nge mpaanga mu mimbulu; kanshi mufwile ukuba abacenjela nge nsoka, lelo aba kaele nge nkunda.+ 17 Mulecenjela na bantu, pantu bakamutwala ku filye,+ kabili bakamufopawila+ mu masunagoge yabo.+ 18 Kabili bakamutwala pa ntanshi ya balashi ne shamfumu+ pa mulandu wandi, pa kuti mulebashimikila, muleshimikila na bena fyalo.+ 19 Lelo ilyo bakamutwala, mwikasakamikwa pa nshila mukalandilamo nelyo pa fyo mukalanda, pantu pa nshita ilya ine mukeshiba ifya kulanda;+ 20 pantu te imwe fye mukalalanda, lelo mupashi wa kwa Shinwe ukalalandila muli imwe.+ 21 Na kabili, munyina akepaisha munyina, na wishi akepaisha umwana, kabili abana nabo bakemina abafyashi babo no kubepaisha.+ 22 Abantu bonse bakamupata pa mulandu we shina lyandi,+ lelo uukashipikisha* ukufika na ku mpela e ukapusuka.+ 23 Ilyo bamucusha mu musumba umo, fulumukileni kuli umbi;+ pantu ndemweba icine cine nati, tamwakapwishe ukushinguluka imisumba ya mu Israele ninshi Umwana wa muntu aisa.

24 “Umusambi tacila kasambilisha wakwe, no musha na o tacila shikulu wakwe.+ 25 Caliba fye bwino umusambi ukuba nga kasambilisha wakwe, no musha ukuba nga shikulu wakwe.+ Abantu nga beta umwine wa ng’anda ukuti Beelisebubi,*+ pali bufi aba mu ng’anda yakwe! 26 E ico mwilabatiina, pantu takuli icafiswa icishakeshibikwe, nangu inkaama iishakasokoloke.+ 27 Ifyo namweba mu mfifi, filandileni mu lubuuto, kabili ifyo mwaumfwa mu kantepentepe, fibilishisheni pa mitenge.+ 28 Kabili mwilatiina abengepaya umubili lelo abashingepaya umweo;+ nomba muletiina uwingonawila umweo* no mubili mu Gehena.*+ 29 Bushe tabashita inseba shibili mu kandalama akanono sana?* Na lyo line takuli nangu lumo ulwingapona panshi ukwabula ukuti Shinwe eshibe.+ 30 Na kuba, alishiba ne mpendwa ya mushishi wa ku mitwe yenu. 31 E ico mwilatiina: Mwalicindama ukucila inseba ishingi.+

32 “E ico umuntu onse uwansumina pa menso ya bantu,+ na ine nkamusumina pa menso ya kwa Tata uwaba mu muulu.+ 33 Lelo onse uwankaana pa menso ya bantu, na ine nkamukaana pa menso ya kwa Tata uwaba mu muulu.+ 34 Mwilatontonkanya ukuti naisa mu kuleta umutende pe sonde; nshaisa mu kuleta umutende, lelo naisa mu kuleta ulupanga.+ 35 Pantu naisa mu kulekanya umwana umwaume na wishi, umwana mwanakashi na nyina, no mwanakashi uwaupwa na nyinafyala.+ 36 Cine cine, aba mu ng’anda ya muntu e bakaba abalwani bakwe. 37 Onse uwatemwa wishi nelyo nyina ukucila ifyo antemwa, talingile ukuba umusambi wandi; na onse uwatemwa umwana umwaume nelyo umwana umwanakashi ukucila ifyo antemwa, talingile ukuba umusambi wandi.+ 38 Kabili onse uushisenda icimuti cakwe ica kucushiwilwapo* no kunkonka, talingile ukuba umusambi wandi.+ 39 Onse uufwaya ukucingilila umweo wakwe* akafwa, lelo onse uwafwila pa mulandu wandi akaba no mweo.*+

40 “Onse uwamupokelela, ninshi na ine ampokelela, no wampokelela, ninshi apokelela no Wantumine.+ 41 Onse uwapokelela kasesema pa mulandu wa kuti ni kasesema, akapokelela icilambu ca kwa kasesema,+ kabili onse uwapokelela umulungami pa mulandu wa kuti mulungami, akapokelela icilambu ca mulungami. 42 Kabili onse uwapeela umo pali aba abanono kapu fye ya menshi ya kunwa ayatalala pantu musambi, ndemweba icine cine nati, takapanye icilambu cakwe.”+

11 Ilyo Yesu apwishishe ukweba abasambi bakwe 12 ifyo balingile ukukonka, alifumineko aya alesambilisha no kushimikila abantu mu misumba yabo.+

2 Nomba ilyo Yohane ali mu cifungo+ aumfwile imilimo iyo Kristu alebomba, e ico atumine abasambi bakwe+ 3 ukuyamwipusha ati: “Bushe niwe Uli no Kwisa, nelyo kuli umbi uo tufwile ukulolela?”+ 4 Yesu abaswike ati: “Kabiyeni muyeshimikila Yohane ifyo muleumfwa ne fyo mulemona:+ 5 Impofu shilemona,+ abalemana bale-enda, aba fibashi+ balepola, bankomamatwi baleumfwa, abafwa balebuushiwa na bapiina baleshimikilwa imbila nsuma.+ 6 Wa nsansa umuntu uushisanga ica kuipununako muli ine.”+

7 Ilyo abasambi ba kwa Yohane baleya, Yesu atendeke ukweba amabumba pali Yohane ati: “Cinshi mwaile mu kumona mu matololo?+ Bushe litete ilyalepungaila ku mwela?+ 8 Nomba cinshi mwaile mu kumona? Bushe muntu uwafwele ifya kufwala ifyanakilila?* Awe nakalya, pantu abafwala ifya kufwala ifyanakilila bekala mu masano ya shamfumu. 9 E ico cinshi kanshi mwailiile? Bushe ni mu kumona kasesema? Ndemweba icine cine nati, ena alicila na pali kasesema.+ 10 Uyu e o balembelepo ukuti, ‘Moneni! Nkatuma inkombe yandi iikakutangilila,* iikakupekanishisha inshila ya kuti ukapitemo!’+ 11 Ndemweba icine cine nati, pa bana bonse abo abanakashi bafyala tapatala apaba uwacila pali Yohane Kabatisha; lelo uwacepesha mu Bufumu bwa mu muulu alimucila.+ 12 Ukufuma mu nshiku sha kwa Yohane Kabatisha ukufika na lelo, ico abantu bafwaisha Bufumu bwa mu muulu kabili ababufwaisha balebusanga.+ 13 Pantu ilyo Yohane ashilamoneka, mu mabuuku ya bakasesema na mu Mafunde, mwalembelwe ifyali no kucitika;+ 14 kabili nampo nga mulefwaya nelyo tamulefwaya, uyu wine e ‘Eliya uo balandile ukuti ali no kwisa.’+ 15 Uuli na matwi naomfwe.

16 “Ni kuli bani nalalinganya iyi nkulo?+ Yaba nga abana banono abekele pa maliketi abalebilikisha abanabo 17 abati, ‘Natumulishisha imitoolilo, lelo tamucindile; natupumapo imisowa, lelo tamulangile ukuti muli no bulanda.’* 18 Ifi fine e fyo caba, ilyo Yohane aishile talelya nangu ukunwa, lelo abantu batila, ‘Aba ne cibanda.’ 19 Umwana wa muntu aliisa, alalya no kunwa,+ lelo abantu batila, ‘Moneni! Uyu muntu muliili, alitemwisha umwangashi, kabili ni cibusa wa bakasonkesha ba misonko na babembu.’+ Nomba ifyalungama ifyo umuntu acita* e filanga ukuti wa mano.”+

20 Lyena atendeke ukukalipila aba mu misumba umo acitile ifipesha amano ifingi, pantu tabalapiile: 21 “We bulanda kuli mwe bena Korasini! We bulanda kuli mwe bena Betsaida! pantu ifipesha amano ifyacitike mu misumba yenu aficitika mu Turi na mu Sidone, abekashi ba muli iyi misumba nga ni kale balapiile, nga balifwele insamu kabili nga balikele mu mito.+ 22 E ico ndemweba nati, pa Bushiku bwa Bupingushi cikaba eyefilyako ku bena Turi na bena Sidone ukucila ifyo cikaba kuli imwe.+ 23 Na imwe mwe bena Kapernahumu,+ bushe mu kaya ku muulu? Awe mukaya ku Nshiishi.*+ Pantu abaleikala mu musumba wa Sodomu abamona ifipesha amano ifyacitike mu musumba wenu, umusumba wabo nga e po uli ukufika na lelo. 24 Lelo ndemweba nati, pa Bushiku bwa Bupingushi cikaba eyefilyako ku musumba wa Sodomu ukucila ifyo cikaba kuli imwe.”+

25 Pali ilya nshita Yesu atile: “Ndemulumbanya mwe Tata, mwe Shikulu wa muulu ne sonde, pantu mwalifisa aba mano na bacenjela ifi fintu, lelo mwafisokolwela abana abanono.+ 26 Ca cine mwe Tata, pantu ifi fine e fyo mwalefwaya. 27 Tata+ alimpeela ifintu fyonse. Takwaba uwaishiba bwino Umwana kano Wishi,+ kabili takwaba nangu umo uwaishiba bwino Wishi kano Umwana, e lyo na onse uo Umwana afwaya ukusokolwela.+ 28 Bonse mwe balecula kabili abafininwa, iseni kuli ine kabili nalamusansamusha. 29 Sendeni ikoli lyandi no kusambilila kuli ine, pantu nalifuuka kabili nali-icefya,*+ e lyo mukatuusha.* 30 Pantu ikoli lyandi talyafina, ne cipe candi calyanguka.”

12 Pali ilya nshita Yesu apitile mu mabala ya ngano pe Sabata. Ilyo abasambi bakwe baumfwile insala, batendeke ukutimpula imitwe ya ngano pa kuti balye.+ 2 Ilyo abaFarise bamwene ifyo abasambi balecita, bamwebele abati: “Mona! Abasambi bobe balecita ico amafunde yalesha ukucita pe Sabata.”+ 3 Na o abebele ati: “Bushe tamwabelenga ifyo Davidi acitile ilyo ena na bo ali nabo baumfwile insala?+ 4 Aingile mu ng’anda ya kwa Lesa abula umukate wa kutuula+ e lyo auliila pamo na bo ali nabo. Tabakwete insambu sha kulya ulya mukate, kano fye bashimapepo e bakwete insambu sha ku-ulya.+ 5 Nelyo bushe tamwabelenga mu Mafunde ukuti pe Sabata bashimapepo balabomba pe tempele, lelo tababapeela umulandu wa kutoba ifunde lye Sabata?+ 6 Nomba ndemweba nati, uwacila itempele ali pano.+ 7 Amumfwikisha umwalola amashiwi ya kuti, ‘Imfwaya uluse,+ te malambo,’+ nga tamwacipingula ababula umulandu. 8 Pantu Umwana wa muntu alikwata amaka pe Sabata.”+

9 Ilyo afumine apo bali, aingile mwi sunagoge lyabo, 10 kabili moneni! kwali umuntu uwali no kuboko+ ukwafwa!* E ico baipwishe Yesu abati, “Bushe amafunde yalisuminisha ukundapa pe Sabata?” Ico bamwipushishe ifi ni co balefwaya apa kumupeelela umulandu.+ 11 Na o abebele ati: “Bushe umo pali imwe nga alikwata impaanga imo kabili yaponena mu cilindi pe Sabata, bushe te kuti aikate no kuifumyamo?+ 12 Umuntu alicindama ukucila impaanga! E ico amafunde yalisuminisha ukucita icisuma pe Sabata.” 13 E lyo aebele uwalemana ukuboko ati: “Fungulula ukuboko kobe.” Na o alikufungulwile, kabili kwalipolele kwaba fye ukutuntulu ngo kubiye. 14 Lelo abaFarise balifuminepo baya na mu kupangana ifya kumwipaya. 15 Ilyo Yesu aishibe ifi alifumineko. Abantu abengi nabo balimukonkele,+ kabili alibondepe bonse, 16 lelo alibakonkomeshe ukuti be-ebako+ umuntu nangu umo pali ena, 17 pa kuti ifyo Lesa alandiile muli kasesema Esaya fifikilishiwe, atile:

18 “Moneni! Umubomfi wandi+ uo nasala, uo natemwa, uulenga ndesekelela!+ Nkabika umupashi wandi pali ena,+ kabili akalondolwela inko umwalola umulinganya. 19 Takacite ifikansa,+ takabilikishe kabili tapali umuntu nangu umo uukomfwa ishiwi lyakwe mu misebo iikalamba. 20 Takakontole itete ilyafunika, kabili takashimye iciku*+ icili mu kushima, mpaka akalenge konse kukabe umulinganya. 21 Cine cine, inko shikasubila mwi shina lyakwe.”+

22 E lyo bamuleteele umwaume uwali ne cibanda, uwali impofu kabili uwali cibulu, na o alimuposeshe, ica kuti alitendeke ukulanda no kumona. 23 Ici calipeseshe amabumba yonse amano, kabili yatampile ukulanda ayati: “Bushe uyu te Mwana wa kwa Davidi?” 24 Ilyo abaFarise baumfwile ifi, balandile abati: “Uyu muntu afumisha ifibanda ku maka ya kwa Beelisebubi* kateka wa fibanda.”+ 25 Apo Yesu alishibe ifyo baletontonkanya, abebele ati: “Ubufumu bonse nga bwapaatukana bulonaika no musumba onse nangu ing’anda yonse nga yapaatukana filonaika. 26 E fyo caba na kuli Satana, nga atamfya Satana, ninshi aleilwisha umwine; inga kanshi ubufumu bwakwe kuti bwatwalilila shani ukubako? 27 Kabili nga mfumisha ifibanda ku maka ya kwa Beelisebubi, ninshi abasambi benu bafumisha ifibanda ku maka ya kwa nani? E mulandu wine abasambi benu bakamwebela ukuti mwaliluba. 28 Lelo nga mfumisha ifibanda ku mupashi wa kwa Lesa, ninshi Ubufumu bwa kwa Lesa bwalisa pali imwe ukwabula ukuti mwishibe.+ 29 Nelyo bushe umuntu kuti aingila shani mu ng’anda ya muntu wa maka no kumupoka ifipe? Intanshi afwile amukaka, e lyo engasenda fyonse ifyaba mu ng’anda yakwe. 30 Onse uushaba pamo na ine, ninshi alandwisha, na onse uushilonganika abantu pamo na ine, ninshi alabasalanganya.+

31 “E ico ndemweba nati, abantu bakababelela uluse pa lubembu lonse na pa fyo bapontela ifya mushilo, lelo onse uwapontela umupashi wa kwa Lesa tabakamubelele uluse.+ 32 Ku ca kumwenako, onse uwapontela Umwana wa muntu, bakamubelela uluse;+ lelo onse uwapontela umupashi wa mushilo, tabakamubelele uluse nakalya, muli cino calo* nangu mu calo cipya.+

33 “Kuti mwalenga icimuti caba icisuma ne fisabo fya ciko fyaba ifisuma, nelyo kuti mwalenga icimuti caba icibi ne fisabo fya ciko fyaba ifibi, pantu icimuti bacishibila ku fisabo fya ciko.+ 34 Mwe bana ba mafwafwa mwe,+ kuti mwalanda shani ifisuma e lyo ninshi muli babifi? Pantu umuntu alanda+ ifyaisula mu mutima wakwe. 35 Umuntu umusuma afumya ifisuma mu cipao cakwe icisuma, lelo umuntu umubi afumya ifyabipa+ mu cipao cakwe icabipa. 36 Ndemweba nati, amashiwi yonse aya buwelewele ayo abantu balanda, bakalubulwilapo+ pa Bushiku bwa Bupingushi; 37 pantu amashiwi ayo ulanda e yakalenga bakakupingule ukuti uli mulungami nelyo tauli mulungami.”

38 Lyena bakalemba bamo na baFarise bamwebele abati: “Mwe Kasambilisha, tulefwaya mutulange icishibilo.”+ 39 Na o abebele ati: “Inkulo iibifi kabili iishaba ne cishinka kuli Lesa* lyonse ifwaya icishibilo, lelo tabakailange icishibilo cimbi kano fye icishibilo ca kwa kasesema Yona.+ 40 Pantu filya fine Yona ali mu nda ya cisabi icikalamba inshiku shitatu akasuba no bushiku,+ e fyo no Mwana wa muntu akaba mu mushili inshiku shitatu akasuba no bushiku.+ 41 Abena Ninebe bakabuukila pamo na bantu ba iyi nkulo ilyo kukaba ubupingushi kabili bakabashinina, pantu bena balilapiile ilyo Yona abilile imbila.+ Lelo moneni! uwacila pali Yona ali pano.+ 42 Namfumu wa ku kapinda ka ku kulyo akabuukila pamo na bantu ba nkulo ino ilyo kukaba ubupingushi kabili akabashinina, pantu afumine ukutali sana pa kuti ese omfwe amano ya kwa Solomone.+ Lelo moneni! uwacila pali Solomone ali pano.+

43 “Ilyo umupashi wakowela wafuma mu muntu, upita umwauma ilyo ulefwaya apa kutuushisha, lelo taupasanga.+ 44 Lyena utila, ‘Ndebwelelamo ku ng’anda yandi uko nafumine.’ Kabili ilyo wafika, usanga tamwaba kantu nangu kamo, lelo mwalipyangwa ubusaka kabili balimuyemfya. 45 Lyena ulaya no kuyasenda imipashi yalekanalekana 7 iyabipa uku-ucila. Ilyo yaingila, ilekala mulya mwine; kabili ilalenga umuntu abipa ukucila ifyo ali kale.+ Ifi fine e fyo cikaba na kuli ino nkulo iyabipa.”

46 Ilyo alelanda na mabumba, banyina na bamunyina+ baliminine panse, pantu balefwaya ukulanda nankwe.+ 47 E ico umuntu umo amwebele ati: “Mona! Banoko na bamunonko nabeminina panse, balefwaya ukulanda nobe.” 48 Na o amwebele ati: “Bushe bamayo na bamunyinane walibeshiba?” 49 Lyena asontele abasambi bakwe e lyo alanda ati: “Mona! Aba e bamayo na bamunyinane!+ 50 Pantu onse uucita ifyo Tata uwaba mu muulu afwaya, e munyinane, e nkashi yandi, kabili e mayo.”+

13 Pali bulya bushiku Yesu afumine ku ng’anda ayaikala mupepi na bemba. 2 Amabumba ayakalamba yaishilelongana uko ali, ica kuti aingile mu bwato aikala no kwikala, ne bumba lyonse lyaiminine mu lulamba.+ 3 Lyena abebele ifintu ifingi mu filangililo,+ abebele ati: “Moneni! Katanda umo aile mu kutanda imbuto.+ 4 Ilyo aletanda, imbuto shimo shaponeene mu mbali ya nshila, kabili ilyo ifyuni fyaishile fyaliliile ishi mbuto.+ 5 Shimbi shaponeene pa mushili wa mabwe apashali iloba ilingi, kabili shalimenene bwangu bwangu pantu tapali iloba ilingi.+ 6 Lelo ilyo akasuba kabalike, shalipiile, kabili pa mulandu wa kuti tashakwete imishila shalyumine. 7 Shimbi na sho shaponeene mu myunga, ne myunga yalikulile yashitabilila no kushitabilila.+ 8 Lelo shimbi shaponeene pa mushili uusuma, kabili shatendeke ukutwala ifisabo ifingi ukucila pa sho atandile. Shimo shatwele 100, shimbi 60 e lyo shimbi 30.+ 9 Uuli na matwi naomfwe.”+

10 E ico abasambi baishile kuli ena kabili bamwipwishe abati: “Cinshi mulandila nabo mu filangililo?”+ 11 Na o abaswike ati: “Imwe balimupeela amano ya kumfwikisha inkaama ya kwa Lesa+ pa Bufumu bwa mu muulu, lelo balya bena tababapeela aya mano. 12 Pantu onse uwakwata, bakamupeelelapo na fimbi kabili ifyo akakwata fikafula nga nshi; lelo onse uushakwata, bakamupoka+ no tunono uto akwata. 13 E mulandu wine nandila nabo mu filangililo, pantu balalolesha lelo tabamona, kabili balomfwa, lelo tabakutika no kwiluka tabeluka;+ 14 Kabili ifyo Esaya aseseme filefikilishiwa pali bena. Atile: ‘Ukumfwa, mukomfwa lelo tamwakeluke nakalya, kabili ukulolesha mukalolesha, lelo tamwakamone+ nakalya. 15 Pantu imitima ya aba bantu yalikunkuma. Balomfwa lelo tapali ico bacitapo, balishibatika amenso yabo pa kuti yemona, kabili amatwi yabo yeumfwa ne mitima yabo iiluka no kwalukila kuli ine, pa kuti mbaposhe.’+

16 “Lelo imwe muli ba nsansa pantu amenso yenu yalamona, na matwi yenu yalomfwa+ ifi fintu. 17 Pantu ndemweba icine cine nati, bakasesema abengi na balungami balefwaisha ukumona ifintu ifyo imwe mulemona, lelo tabafimwene,+ kabili balefwaisha ukumfwa ifintu ifyo muleumfwa, lelo tabafyumfwile.

18 “Nomba umfweni umo icilangililo ca kwa katanda+ cilolele. 19 Ulubuto ulwaponeene mu mbali ya nshila;+ muntu uwa kuti aumfwa icebo pa Bufumu, lelo telwike, e lyo umubifi+ aisasompola icebo icatandilwe mu mutima wakwe. 20 Lelo ulwaponeene pa mushili wa mabwe, muntu uwa kuti aumfwa icebo kabili ilyo line acitetekela ne nsansa.+ 21 Lelo apo icebo tacilimbile imishila mu mutima wakwe, atetekela fye pa nshita iinono, kabili ilyo akwata ubwafya nelyo nga bamucusha pa mulandu wa cebo ca pa Bufumu, ena apo pene anenuka. 22 E lyo ulwaponeene mu myunga, muntu uwa kuti aumfwa icebo, lelo pa mulandu wa kuti ifyuma fyamubeleleka, kabili akwata amasakamika ya muli cino calo,*+ icebo catusa kabili afilwa ukutwala ifisabo.+ 23 Lelo ulwaponeene pa mushili uusuma, muntu uwa kuti ilyo aumfwa icebo ailuka, atwala ne fisabo ifingi ukucila ne mbuto isho batandile. Umo atwala 100, umbi 60 e lyo umbi 30.”+

24 Abashimikile icilangililo na cimbi ati: “Ubufumu bwa mu muulu bwaba ngo muntu uwatandile imbuto ishisuma mwi bala lyakwe. 25 Umulwani wakwe aliishile ninshi abantu nabalaala no kutanda ifyani mu ngano, aya no kuya. 26 Nomba ilyo imbuto shafumishe imisonga ne ngano shapakula, e lyo ifyani fyamoneke. 27 E ico abasha ba mwine wa ng’anda bailemweba abati, ‘Mwe shikulu, bushe tamwatandile imbuto ishisuma mwi bala lyenu? Inga kanshi ifyani fifumine kwi?’ 28 Na o abaswike ati, ‘Umulwani e wacitile ifi.’+ E lyo bamwipwishe abati, ‘Bushe mulefwaya tuyefinukulamo?’ 29 Abaswike ati: ‘Awe, e pali ilyo mulenukula ifyani, mwanukwila kumo ne ngano. 30 Lekeni fyonse fibili fikulile pamo mpaka inshita ya kuseepa; kabili iyi nshita nga yafika, Nkeba aba kuseepa nati: Mubalilepo ukunukulamo ifyani mufikake mu myanshi e lyo mufyoce. Lyena muyelonganika ingano mu butala bwandi.’”+

31 Abashimikile icilangililo na cimbi ati: “Ubufumu bwa mu muulu bwaba nga akaluseke akanono sana* ako umuntu abuulile no kubyala mwi bala lyakwe.+ 32 Na kuba e kaluseke akacepesha pa nseke shonse, lelo ilyo kamena kalakula ukucila imisalu yonse ica kuti kaba fye cimuti, kabili ifyuni fya mu muulu filesa no kwikala ku misambo ya ciko.”

33 Abashimikile icilangililo na cimbi ati: “Ubufumu bwa mu muulu bwaba kwati citutumushi, ico umwanakashi abuulile e lyo akashila mu magaloni yatatu aya buunga, mpaka umufuba onse watutumuka.”+

34 Yesu aebele amabumba ifi fyonse mu filangililo. Cine cine tabebele nangu cimo ukwabula icilangililo,+ 35 pa kuti ifyo Lesa alandiile muli kasesema fifikilishiwe. Alandile ati: “Nkaasamuna akanwa kandi no kulandila mu filangililo; nkabila ne fintu ifyafiswa ukufuma pa kutendeka.”*+

36 Ilyo asalangenye amabumba, aingile mu ng’anda. Lyena abasambi bakwe baishile uko ali, e lyo bamweba abati: “Tulondolweleni umulolele icilangililo ca fyani ifyali mwi bala.” 37 Na o abalondolwelele ati: “Katanda wa mbuto ishisuma Mwana wa muntu; 38 ibala bantu ba muli ici calo.+ E lyo imbuto ishisuma, bana ba Bufumu, lelo ifyani bana ba mubifi,+ 39 umulwani uwatandile ifyani ni Satana Kaseebanya. Inshita ya kuseepa, ni nshita ya ku mpela* ya cino calo, e lyo aba kuseepa ni bamalaika. 40 E ico filya fine balonganya ifyani no kufyoca mu mulilo, e fyo cikaba na ku mpela ya cino calo.*+ 41 Umwana wa muntu akatuma bamalaika bakwe, kabili bakalonganika fyonse ifilenga abantu baleipununa no kufifumya mu Bufumu bwakwe pamo na bampulamafunde, 42 kabili bakabapoosa mwi lungu lya mulilo.+ Mulya mwine e mo bakalalilila no kusumanya ameno. 43 Pa nshita ilya, abalungama bakabengeshima nga akasuba+ mu Bufumu bwa kwa Shibo. Uuli na matwi naomfwe.

44 “Ubufumu bwa muulu bwaba kwati cuma ico bafishile mu mpanga, ico umuntu asangile e lyo na o acifisa; kabili pa mulandu wa kuti alitemenwe sana, aileshitisha fyonse ifyo akwete no kushitamo ilya mpanga.+

45 “Na kabili Ubufumu bwa mu muulu bwaba kwati wa makwebo uwalefwaya bamargariti abasuma. 46 Ilyo asangile margariti imo iya mutengo sana, alile kabili alyangufyenye ukushitisha fyonse ifyo akwete no kushitamo iyi margariti.+

47 “Na kabili Ubufumu bwa mu muulu bwaba kwati mukwau uo bapoosele muli bemba e lyo waikata isabi lya misango yonse. 48 Ilyo umukwau waiswile, baukuliile ku lulamba, kabili ilyo baikele, bafumishemo isabi ilisuma+ balibika mu fipe, lelo ilibi+ lyena balilipoosele. 49 E fyo cikaba na ku mpela ya cino calo.* Bamalaika bakaya e lyo bakafumye ababifi mu balungama, 50 kabili ababifi bakabapoosa mwi lungu lya mulilo. Mulya mwine e mo bakalalilila no kusumanya ameno.

51 “Bushe namumfwa umo fyonse ifi filolele?” Nabo bamwaswike abati: “Ee.” 52 Lyena abebele ati: “Kanshi onse uusambilisha abantu, uo basambilisha pa Bufumu bwa mu muulu, aba ngo mwine wa ng’anda, uufumya mu cipao cakwe ifintu ifipya ne fya kale.”

53 Ilyo Yesu apwishishe ukulanda ifi filangililo, alifumineko aya. 54 Ilyo aingile mu citungu ca ku mwabo,+ atendeke ukusambilisha abantu mu masunagoge yabo, ica kuti balipapile. Baleti: “Bushe uyu muntu afumishe kwisa aya mano na maka ya kucita ifi fipesha amano?+ 55 Bushe uyu te mwana wa kwa kabasa?+ Bushe nyina te Maria, na bamunyina te Yakobo, Yosefe, Simone na Yuda?+ 56 Bushe na bankashi yakwe bonse, tatwikala nabo kuno? Nomba ni kwi uyu muntu afumishe ifi fyonse?”+ 57 E ico tabamusumiine.+ Lelo Yesu abebele ati: “Kasesema balamucindika kumbi, uko bashimucindika fye ni ku citungu ca ku mwabo na mu lupwa lwakwe.”+ 58 E ico Yesu tacitile ifipesha amano ifingi muli cilya citungu pa mulandu wa kuti tabakwete citetekelo.

14 Pali ilya nshita, Herode kateka wa citungu, alyumfwile ifyo Yesu acitile+ 2 kabili aebele ababomfi bakwe ati: “Uyu ni Yohane Kabatisha. Alibuuka ku bafwa, kabili e mulandu wine alecitila ifi ifipesha amano.”+ 3 Herode* alikete Yohane, amukaka, amupoosa na mu cifungo pa mulandu wa kwa Herodia muka Filipi uwali umukalamba+ wa kwa Herode. 4 Pantu Yohane alemweba ati: “Ukulingana ne funde taufwile ukumuupa.”+ 5 Lelo nangu ca kuti alefwaya ukwipaya Yohane, aletiina abantu, pantu baishibe ukuti ni kasesema.+ 6 Lelo ilyo balesefya ubushiku bwa kufyalwa+ ubwa kwa Herode, umwana mwanakashi uwa kwa Herodia alicindile kabili Herode alitemenwe nga nshi+ 7 ica kuti alilapile ukuti aali no kumupeela conse ico aali no kulomba. 8 Lyena alyangufyenye ukuyalomba ifyo nyina amwebele. Atile: “Mpeeleni nomba line umutwe wa kwa Yohane Kabatisha+ pa mbale.” 9 Nangu ca kuti imfumu yalyumfwile ubulanda, yalandile ukuti bamupeele umutwe pa mulandu wa kuti yalilapile, na pa mulandu wa bantu abo yalelya nabo.* 10 E ico yatumine abakuyaputula Yohane umutwe mu cifungo. 11 Awe baletele umutwe wakwe pa mbale no kupeela umukashana, na o autwele kuli nyina. 12 Pa numa abasambi bakwe baishilesenda icitumbi cakwe bayashiika, e lyo bayaeba Yesu ifyacitike. 13 Ilyo Yesu aumfwile ifi, alifumineko anina ubwato aya ukwali tondolo pa kuti abe fye eka. Lelo ilyo amabumba yaumfwile ifi, yalifumine mu misumba+ yamukonka na makasa.

14 Ilyo afikile ku lulamba, amwene ibumba ilikalamba, kabili alibomfwilile uluse,+ lyena aundepe abantu babo abalwele.+ 15 Lelo ilyo cali icungulo, abasambi bakwe baishile uko ali e lyo bamweba abati: “Pano tuli ni pa mpanga na kasuba nakawa; ebeni abantu baleya pa kuti bayeishitila ifya kulya+ mu mishi.” 16 Lelo Yesu abebele ati: “Tabafwile ukuya; imwe bene bapeeleni ifya kuti balye.” 17 Nabo bamwebele abati: “Tatukwete nangu fimo, lelo tukwete fye imikate 5 ne sabi libili.” 18 Na o abebele ati: “Leteni kuno.” 19 Lyena aebele amabumba ukuti yekale pa cani. E lyo abuula imikate 5 ne sabi libili, alolesha mu muulu, apepa no kupepa,+ lyena amokawile imikate apeela abasambi, e lyo nabo bapeela amabumba. 20 E ico bonse baliliile no kwikuta, kabili ilyo balongenye ifyashelepo, fyaiswile imiseke 12.+ 21 Abaliile bali abaume nalimo 5,000, ukwabula ukupendelako abanakashi na bana abanono.+ 22 Lyena apo pene, aebele abasambi bakwe ukuti banine ubwato bamutangilile kwi shilya. Ilyo baleya ena ashele alesalanganya amabumba.+

23 Ilyo apwile ukusalanganya amabumba, aile ku lupili eka mu kupepa.+ Kabili ilyo cafikile icungulo bushiku, aliko fye eka. 24 Pali iyi nshita ubwato bwali ukutali sana* ukufuma ku mulundu, kabili bwalesunkana ku mabimbi, pantu umwela walefumina ku ntanshi yabo. 25 Lelo mu bulinde bwalenga 4* ubwa bushiku, aile kuli bena ale-enda pali bemba. 26 Ilyo abasambi bamumwene ale-enda pali bemba, balitiinine, kabili batendeke ukulanda abati: “Moneni icapala umuntu!” Lyena balipundile pa mulandu wa mwenso. 27 Lelo apo pene Yesu abebele ati: “Shipeni, nine; mwitiina.”+ 28 Lyena Petro amwebele ati: “Shikulu, nga nimwe njebeni njise kuli imwe pa menshi.” 29 Na o amwebele ati: “Isa!” E ico Petro alifumine mu bwato, atendeka no kwenda pa menshi ukuya kuli Yesu. 30 Lelo ilyo amwene icikuuku ca mwela alitiinine. Kabili ilyo atendeke ukwibila, apundile ati: “Mwe Shikulu mpususheni!” 31 Ilyo line fye Yesu atambike ukuboko kwakwe, amwikata e lyo amweba ati: “Cinshi wacitwishikila?+ Icitetekelo cobe cinono.” 32 Ilyo baninine mu bwato, icikuuku ca mwela calilekele. 33 Lyena abali mu bwato balimufukamine* e lyo balalanda abati: “Cine cine uli Mwana wa kwa Lesa.” 34 Kabili balyabwike bafika na kwi shilya ku cifulo ico beta ukuti Genesarete.+

35 Ilyo abantu abaleikala kuli ilya ncende bamwishibe, balyebeleko abaleikala mu mishi iyali mupepi, kabili abantu balimuleteele bonse abalwele. 36 Nabo baile mu kumupaapaata ukuti bakumyeko fye ku nsenkebele sha ca kufwala+ cakwe ica kunse, na bonse abakumisheko balipolelele.

15 Lyena abaFarise na bakalemba+ abafumine ku Yerusalemu baishile kuli Yesu e lyo bamwipusha abati: 2 “Mulandu nshi abasambi bobe bashikonkela intambi sha ba kale? Ku ca kumwenako, tabasamba ku minwe* pa kulya.”+

3 Na o abaswike ati: “Mulandu nshi mushikonkela amafunde ya kwa Lesa pa mulandu wa ntambi shenu?+ 4 Pantu Lesa atile, ‘Mulecindika bashinwe na banyinenwe,’+ kabili, ‘Uwasaalula* wishi nelyo nyina mufwile ukumwipaya.’+ 5 Lelo imwe mutila, ‘Onse uwaeba wishi nelyo nyina ati: “Fyonse ifyo nakwata ifyo ningabomfya pa kumwafwilisha, nalipeela kale Lesa,”+ 6 ninshi tafwile ukucindika wishi nakalya.’ E ico mwalilenga icebo ca kwa Lesa caba ica fye pa mulandu wa ntambi shenu.+ 7 Mwe ba bumbimunda mwe, Esaya alilungike ilyo aseseme pali imwe ukuti:+ 8 ‘Aba bantu bancindika fye pa tunwa twabo, lelo imitima yabo yalitaluka kuli ine. 9 Nga balempepa baicusha fye, pantu ifisambilisho basambilisha mafunde ya bantu.’”+ 10 E lyo aebele ibumba ukuti lipalame kuli ena, kabili alyebele ati: “Kutikeni no kwiluka ifyo nalamweba:+ 11 Ifyo umuntu alya te fimukowesha, lelo ififuma mu kanwa kakwe e filenga aba uwakowela.”+

12 Lyena abasambi baishile kuli Yesu, e lyo bamwipusha abati: “Bushe namwishiba ukuti abaFarise bacikalipa pali filya mwacilanda?”+ 13 Na o abaswike ati: “Icilimwa conse ico Tata wa mu muulu ashabyele bakacinukula. 14 Balekeni babe. Ni ntungulushi impofu, pantu impofu nga iletungulula impofu inankwe, shonse shibili shikawila mu cilindi.”+ 15 Lyena Petro amwebele ati: “Tulondolweleni umo ici cilangililo calolele.” 16 Na Yesu abepwishe ati: “Bushe na imwe tamulailuka umo ici cilolele?+ 17 Bushe tamwaishiba ukuti fyonse ifyo umuntu alya fipita mu mala fyaya na mu cimbusu? 18 Lelo fyonse ififuma mu kanwa fifuma mu mutima, kabili e filenga umuntu aba uwakowela.+ 19 Ku ca kumwenako, mu mutima e mufuma amatontonkanyo yabipa+ pamo nga: ukwipaya, ubucende, ubulalelale,* ukwiba, bukambone bwa bufi, no kupontela ifya mushilo. 20 Ifi e filenga umuntu aba uwakowela; lelo ukulya ukwabula ukusamba ku minwe* takulenga umuntu aba uwakowela.”

21 Ilyo Yesu afumine kulya, aile ku Turi na ku Sidone.+ 22 Kabili moneni! umwanakashi umwina Foinike uwaleikala kulya alishile, kabili alebilikisha ati: “Ng’ufwileniko uluse mwe Shikulu Mwana Davidi. Icibanda calikata ububi umwana wandi umwanakashi.”+ 23 Lelo Yesu tamwaswike nangu cimo. E ico abasambi bakwe balishile, e lyo balamulomba abati: “Mwebeni aleya, pantu ekalile fye ukutubilikisha no kutupaapaata.” 24 Na o alandile ati: “Lesa tantumine ku bantu bambi, lelo antumine ku mpaanga ishaluba isha mu ng’anda ya kwa Israele.”+ 25 Nomba umwanakashi alishile, amufukamina* e lyo alamupaapaata ati: “Mwe Shikulu, ngafweni!” 26 Lyena Yesu amwebele ati: “Tacawama ukubuula umukate wa bana no kupoosela utubwa.” 27 E lyo umwanakashi atile: “Ca cine ico mwe Shikulu, lelo no tubwa twine tulalyako ubufungau ubupona kwi tebulo lya bashikulu ba tuko.”+ 28 Lyena Yesu amwebele ati: “We mwanakashi, icitetekelo cobe cikalamba; nacibe ifyo fine we mwine ulefwaya.” Kabili umwana wakwe alipolele ukutula lilya line.

29 Ilyo Yesu afumine kulya, aile mupepi na bemba wa Galili.+ Kabili aninine ulupili, aikala na pa lupili pene. 30 Lyena amabumba ayakalamba yaishile kuli ena, ninshi nayasenda abantu abalemana, bamakunkutu, impofu, bacibulu na bantu bambi abengi abalwele. Lyena yaishilebateka ku makasa yakwe, na o alibondepe.+ 31 E ico ibumba lyalipapile ilyo lyamwene bacibulu balalanda, bamakunkutu bapola, abalemana balaenda ne mpofu shalamona. Kabili ibumba lyalicindike Lesa wa kwa Israele.+

32 Lelo Yesu aitile abasambi bakwe e lyo abeba ati: “Naumfwila ibumba uluse,+ pantu nomba inshiku shaba shitatu isho baikala na ine kabili tabakwete ifya kulya. Nshilefwaya ukubaleka baye ne nsala, pantu kuti bafwa ulushile mu nshila.”+ 33 Lelo abasambi bakwe bamwebele abati: “Pano tuli ni pa mpanga, ni kwisa twalafumya imikate iya kuti ibumba lyakula ifi lilye no kwikuta?”+ 34 E ico Yesu abepwishe ati: “Mikate inga mukwete?” Nabo batile: “Tukwete imikate 7, no tusabi utunono fye.” 35 E ico pa numa yakweba ibumba ukuti likale panshi, 36 abuulile imikate 7 ne sabi, kabili ilyo atashishe Lesa, ali-imokawile, e lyo atendeka ukupeela abasambi, abasambi nabo bapeele amabumba.+ 37 Kabili bonse baliliile no kwikuta. Ilyo balonganike ifyashelepo,+ fyaiswile imiseke* 7. 38 Nomba abaliile bali abaume 4,000, ukwabula ukupendelako abanakashi na bana abanono. 39 Kabili ilyo alekele amabumba yaya, aninine mu bwato aya na ku citungu ca Magadani.+

16 Lyena abaFarise na baSaduke baishile kuli Yesu, kabili pa kuti bamweshe, bamulombele ukuti abacitile icishibilo ukufuma ku muulu.+ 2 Na o abebele ati: “Ilyo caba icungulo mutila, ‘Mailo bukaca bwino, pantu umuulu naukashika ce,’ 3 kabili ulucelo mutila, ‘Lelo kuleba impepo ne mfula pantu umuulu naukashika ce, kabili kuli icikutuma.’ Mwalishiba ukwiluka imimonekele ya muulu, lelo tamwiluka umwalola ifilecitika pali ino nshita. 4 Mwe nkulo iibifi kabili iishaba na cishinka* kuli Lesa, lyonse mufwaya ukumulanga icishibilo, lelo tabakamulange icishibilo cimbi+ kano fye icishibilo ca kwa Yona.”+ Lyena alifuminepo abasha no kubasha.

5 Nomba abasambi baile kwi shilya kabili balilabile ukusenda imikate.+ 6 Yesu abebele ati: “Mulelola kabili mufwile ukucenjela ne citutumushi ca baFarise na baSaduke.”+ 7 E ico batendeke ukulanshanya abati: “Tatusendele imikate nangu imo.” 8 Apo Yesu alishibe ifyo balelanshanya, abebele ati: “Icitetekelo cenu cinono! Cinshi mulelanshanishisha amuti tamukwete imikate? 9 Bushe na nomba tamulailuka ico ndelandapo, nelyo bushe tamuleibukisha imikate 5 iyo abantu 5,000 baliile ne miseke iingi iyo mwalonganike?+ 10 Nangu bushe tamuleibukisha imikate 7 iyo abantu 4,000 baliile ne miseke iikalamba iingi iyo mwalonganike?+ 11 Inga cinshi tamwilukiile ukuti nshacilamweba pa mikate? Lelo nacilamweba ukuti mulecenjela ne citutumushi ca baFarise na baSaduke.”+ 12 Lyena balilwike ukuti talelanda pa citutumushi ca mikate, lelo alebeba ukuti balingile ukucenjela ne fyo abaFarise na baSaduke balesambilisha.

13 Ilyo Yesu aingile mu citungu ca Kaisarea Filipi, aipwishe abasambi bakwe ati: “Bushe abantu batila Umwana wa muntu nani?”+ 14 Nabo bamwaswike abati: “Bamo batila ni Yohane Kabatisha,+ bambi batila ni Eliya,+ bambi nabo batila ni Yeremia nelyo umo pali bakasesema.” 15 Lyena abepwishe ati: “Inga imwe mutila nine ani?” 16 Simone Petro amwaswike ati: “Nimwe Kristu,+ Umwana wa kwa Lesa wa mweo.”+ 17 Lyena Yesu amwebele ati: “Walipaalwa, Simone mwana Yona, pantu te muntu* uwakusokolwelele ici, lelo ni Tata uwaba mu muulu.+ 18 Na kabili ndekweba nati: Niwe Petro,+ kabili pali ici icilibwe+ e po nkakuula icilonganino candi, ne mpongolo sha Nshiishi* tashakacicimfye. 19 Nkakupeela amakii ya Bufumu bwa mu muulu, kabili conse ico wingakaka pano isonde, ninshi balicikaka kale mu muulu, na conse ico wingakakula pano isonde, ninshi balicikakula kale mu muulu.” 20 Lyena akonkomeshe abasambi bakwe ukuti tabalingile ukweba umuntu nangu umo ukuti e wali Kristu.+

21 Ukufuma lilya Yesu Kristu atendeke ukulondolwela abasambi bakwe ukuti alingile ukuya ku Yerusalemu, kabili abakalamba ne ntungulushi sha bashimapepo na bakalemba bali no kumucusha sana no kumwipaya, na pa bushiku bwalenga shitatu ali no kubuushiwa.+ 22 Ilyo line fye Petro amusendele pa mbali, e lyo atendeka ukumukalipila ati: “Muyumfwileko uluse mwe Shikulu; ifyo tafyakamucitikile nakalya.”+ 23 Nomba ilyo apilibwike, aebele Petro ati: “Kabiye ku numa yandi, we Satana we! Kuti walenga nalufyanya, pantu tautontonkanya ifya kwa Lesa, lelo utontonkanya ifya bantu.”+

24 Lyena Yesu aebele abasambi bakwe ati: “Umuntu nga alefwaya ukunkonka, aikaane umwine, asende ne cimuti cakwe ica kucushiwilwapo,* e lyo alenkonka.+ 25 Pantu onse uufwaya ukupususha umweo wakwe akaulofya, lelo onse uwalofya umweo wakwe pa mulandu wandi akausanga.+ 26 Na kuba busuma nshi umuntu engasangamo nga anonka icalo conse, lelo alofya umweo wakwe?+ Nelyo cinshi ico umuntu engakabulamo umweo wakwe?+ 27 Pantu Umwana wa muntu akesa no bucindami bwa kwa Wishi, akesa pamo na bamalaika bakwe, kabili akalambula umuntu onse ukulingana ne mibele yakwe.+ 28 Ndemweba icine cine nati, bamo pa beminine pano tabakafwe nakalya mpaka bakamone Umwana wa muntu aleisa mu Bufumu bwakwe.”+

17 Ilyo papitile inshiku 6, Yesu asendele Petro, Yakobo na Yohane munyina no kunina nabo ulupili ulutali pa kuti babe fye beka.+ 2 Kabili alyalwike ninshi balemonako; icinso cakwe cabengeshime nga akasuba, ne fya kufwala fyakwe ifya kunse fyabengeshime* ngo lubuuto.+ 3 Kabili moneni, bamwene Mose na Eliya balelanda nankwe. 4 Lyena Petro aebele Yesu ati: “Mwe Shikulu, kuti cawama nga twaikala pano pene. Nga mulefwaya, kuti napangapo insakwe shitatu, imo iyenu, imbi iya kwa Mose, e lyo na imbi iya kwa Eliya.” 5 Ilyo acili alelanda, moneni! ikumbi ilyalebengeshima lyalibakupile, kabili moneni! kwali ishiwi ilyafumine mwi kumbi aliti: “Uyu e Mwana wandi, uo natemwa, uo nsekelamo.+ Muleumfwa ifyo alelanda.”+ 6 Ilyo abasambi baumfwile ifi, bawile ubukupeme kabili balitiinine nga nshi. 7 Lyena Yesu alipaleme, kabili ilyo abekete, abebele ati: “Imeni. Mwitiina.” 8 Ilyo bainwine amenso tabamwenepo umuntu umbi, lelo bamwene fye Yesu. 9 Ilyo baletentemuka ulupili, Yesu abakonkomeshe ati: “Tamufwile ukweba umuntu nangu umo pali ici icimonwa mpaka Umwana wa muntu akabuuke ku bafwa.”+

10 Lelo abasambi bamwipwishe abati: “Nomba cinshi bakalemba balandila abati Eliya afwile ukubalilapo ukwisa?”+ 11 Na o abaswike ati: “Ca cine Eliya akesa, kabili nga aisa akalenga ifintu fyonse fikabe ifyo filingile ukuba.+ 12 Lelo ndemweba nati, ni kale Eliya aishile lelo tabamwishibe kabili balimucitile ifyabipa ifyo balefwaya.+ Ifi fine e fyo bakacusha no Mwana wa muntu.”+ 13 Lyena abasambi balilwike ukuti alebeba pali Yohane Kabatisha.

14 Ilyo baile ukwali ibumba,+ umwaume umo aile kuli Yesu, amufukamina e lyo amweba ati: 15 “Mwe Shikulu, umfwileni umwana wandi uluse, pantu alilwala sana, alilwala cipumputu. Ilingi line alaponena mu mulilo na mu menshi.+ 16 Nacimuleta ku basambi benu, lelo bacifilwa ukumundapa.” 17 Na Yesu atile: “Kwena muli nkulo iyabula icitetekelo kabili iishalungama,+ bushe nkaba na imwe ukufika lilali? Bushe ni lilali nkaleka ukushipikisha pa fyo mucita? Muleteni kuno.” 18 Lyena Yesu alikalipiile icibanda kabili califumine mu mulumendo, na o alipolele lilya line fye.+ 19 Lyena abasambi baishile kuli Yesu ku mbali e lyo bamwipusha abati: “Cinshi ifwe twacifililwa ukucifumya?” 20 Abaswike ati: “Ni co icitetekelo cenu cinono. Pantu ndemweba icine cine nati, nga mwakwata icitetekelo icilingene na akaluseke akanono sana,* kuti mwaeba ulu lupili amuti, ‘Fuma pano uye kulya,’ nalo kuti lwafumapo, kabili takuli ico mwingafilwa ukucita.”+ 21* ——

22 Ilyo balongene ku Galili e lyo Yesu abebele ati: “Umwana wa muntu bali no kumufutuka no kumupeela mu minwe ya balwani bakwe,+ 23 kabili bakamwipaya, e lyo pa bushiku bwalenga shitatu akabuushiwa.”+ E ico balyumfwile ubulanda nga nshi.

24 Ilyo bafikile ku Kapernahumu, abaume abalesonkesha imisonko ya pe tempele* baile kuli Petro e lyo bamwipusha abati: “Bushe kasambilisha wenu alalipila umusonko+ wa pe tempele?” 25 Na o atile: “Alalipila.” Lelo ilyo aingile mu ng’anda, Yesu e wabalilepo ukulanda nankwe, kabili amwipwishe ati: “Simone uletipo shani? Ni kuli bani ishamfumu sha pano isonde shipoka umutuulo nelyo umusonko? Bushe ni ku bana ba shiko nelyo ni ku bantu bambi?” 26 Ilyo ayaswike ati: “Ni ku bantu bambi,” Yesu amwebele ati: “Kanshi ninshi abana tabafwile ukulipila umusonko. 27 Lelo pa kuti twibakalifya,+ kabiye kuli bemba, upoosemo ubulobo no kubuula isabi ilyo ulebalilapo ukuloba, kabili nga wa-asamuna akanwa kaliko, ulesangamo indalama ya silfere.* Uibuule no kubapeela, pa kuti usonkele umusonko wandi no obe.”

18 Pali ilya nshita abasambi baile kuli Yesu e lyo bamwipusha abati: “Bushe nani akaba umukalamba pali bonse mu Bufumu bwa mu muulu?”+ 2 E ico aitile umwana umunono, e lyo amwiminika pa ntanshi yabo. 3 Lyena abebele ati: “Ndemweba icine cine nati, Nga tamwalwike* no kuba nga abana abanono,+ tamwakengile mu Bufumu bwa mu muulu.+ 4 E ico onse uwaicefya kabili uuimona ngo yu mwana umunono, e mukalamba pali bonse mu Bufumu bwa mu muulu;+ 5 kabili onse uwapokelela umwana umunono umo ngo yu pa mulandu we shina lyandi, ninshi na ine nampokelela. 6 Lelo onse uwapunwisha umo pali aba abacepesha abantetekela kuti cawama bamukakila mu mukoshi icilibwe icafina ica kupelelako cilya impunda ipindulula, no kumupoosa muli bemba uwapabuka.+

7 “We bulanda ku ba pano calo abapunwisha abantu! Kwena ifya kupunwisha abantu fikesa nangu cibe shani, lelo ca bulanda ku bakalalenga abantu bakaleipununa! 8 E ico kanshi ukuboko kobe nelyo ulukasa lobe nga filelenga ulelufyanya* fiputuleko no kufipoosa.+ Pantu cawamapo wapusuka makunkutu nelyo uwalemana, ukucila bakupoosa na maboko yabili nelyo amakasa yabili mu mulilo wa muyayaya.+ 9 Kabili ilinso lyobe nga lilelenga ulelufyanya, lilobole no kulipoosa. Pantu cawamapo wapusuka ne linso limo ukucila bakupoosa mu Gehena*+ umwaba umulilo ninshi uli na menso yabili. 10 Cenjeleni pa kuti mwisuula umo pali aba abacepesha; pantu ndemweba nati bamalaika babo mu muulu balamona lyonse icinso ca kwa Tata uwaba mu muulu.+ 11* ——

12 “Muletipo shani? Kacema nga nakwata impaanga 100 kabili paluba imo,+ bushe te kuti ashe impaanga 99 mu mpili no kuya alefwaya imo iilubile?+ 13 Ndemweba icine cine nati, nga asanga impaanga iilubile, alasekelela nga nshi pali yena ukucila ifyo asekelela pa mpaanga 99 ishishilubile. 14 Ifi fine e fyo na Tata* uwaba mu muulu ashifwaya ukuti umo pali aba abacepesha alobe.+

15 “Kabili nga ca kuti munonko akubembukila, kabiye umwebe ifyo alufyenye* ninshi muli fye babili.+ Nga akuumfwa, ninshi wabwesesha munonko+ mu nshila. 16 Lelo nga tomfwile, senda umuntu umo nelyo babili, e bo uye nabo pantu bakambone babili nelyo batatu e bengalenga caishibikwa ukuti pali umulandu.+ 17 Nga tomfwile kuli bena, webe icilonganino. Nga tomfwile na ku cilonganino cine, ulemumona fye ngo mwina fyalo+ kabili nga kasonkesha wa misonko.+

18 “Ndemweba icine cine nati, fyonse ifyo mwingakaka pano isonde ninshi na mu muulu balifikaka kale, na fyonse ifyo mwingakakula pano isonde ninshi na mu muulu balifikakula kale. 19 Na kabili ndemweba icine cine nati, Nga ca kuti abantu babili pali imwe basuminishanya pa cintu cimo icacindama ico bafwile ukulomba, Tata wa mu muulu+ akabacitila. 20 Pantu konse uko abantu babili nelyo batatu balonganina mwi shina lyandi,+ ninshi na ine ndi nabo uko kwine.”

21 Lyena Petro alishile e lyo aipusha Yesu ati: “Mwe Shikulu, miku inga ningabelela munyinane uluse nga andufyanya? Bushe miku 7?” 22 Yesu amwaswike ati: “Awe te miku 7, lelo miku 77.+

23 “E mulandu wine twingapashanishisha Ubufumu bwa mu muulu ku mfumu iyalefwaya abasha ba iko baibweseshe inkongole. 24 Ilyo yatendeke ukupoka inkongole, ababomfi baiko baileteele umuntu uwaikwatile indalama amatalanti 10,000.* 25 Lelo apo takwete inshila ya kubweseshamo inkongole, shikulu wakwe atile bamushitishe no mukashi wakwe na bana bakwe na fyonse ifyo akwete pa kuti abweshe inkongole.+ 26 E ico umusha awile panshi* alapaapaata ati, ‘Mukwai ndoleleniko, nkamubwesesha shonse.’ 27 Shikulu wakwe alimumfwilile uluse, ica kuti alimulekele asuula na ku nkongole+ shakwe. 28 Lelo ilyo ulya musha afumine, ailesanga umusha munankwe uwamukwatile inkongole ya madenari* 100, kabili alimufyambete, amukama na pa mukoshi e lyo alamweba ati, ‘Bwesha inkongole shonse isho wankwatila.’ 29 E ico umusha munankwe awile panshi, alamupaapaata ati, ‘Ndolelako, nkakubwesesha.’ 30 Lelo alikeene, kabili ailemukakisha mu cifungo mpaka akamubweseshe inkongole akwete. 31 E ico ilyo abasha banankwe bamwene ifyacitike, balyumfwile ubulanda nga nshi, kabili baileshimikila shikulwibo fyonse ifyacitike. 32 Lyena shikulu wakwe alimwitile no kumweba ati, ‘We musha mubi we, nacisuulako ku nkongole shobe shonse ilyo wacimpaapaata. 33 Bushe na iwe tawacilinga ukubelela umusha munobe uluse, ifyo ine nacikubelela uluse?’+ 34 E ico shikulu wakwe alifulilwe nga nshi, kabili amutwele ku balelinda icifungo ukuti bamukake mpaka akabweshe nkongole shonse isho akwete. 35 Ifi fine e fyo na Tata wa mu muulu akamucita+ nga tamubelela bamunyinenwe uluse ne mitima+ yenu yonse.”

19 Ilyo Yesu apwishishe ukulanda ifi fintu, alifumine ku Galili aya ku mipaka ya Yudea kwi shilya lya Yordani.+ 2 Kabili amabumba ayakalamba yalimukonkele, na o abondapiile kulya kwine.

3 E lyo abaFarise baishile kuli ena pa kuti bamweshe, kabili bamwipwishe abati: “Bushe amafunde yalisuminisha umuntu ukuleka umukashi wakwe pa mulandu fye uuli onse?”+ 4 Na o abaswike ati: “Bushe tamwabelenga ukuti uwababumbile pa kutendeka ababumbile umwaume no mwanakashi,+ 5 kabili atile, ‘E mulandu wine umwaume akashiila wishi na nyina no kulambatila ku mukashi wakwe, kabili aba babili bakaba umubili umo’?+ 6 E ico tabatwalilila ukuba babili, lelo baba umubili umo. Kanshi ico Lesa alundanya, umuntu ecilekanya.”+ 7 Nabo bamwipwishe abati: “Nomba cinshi Mose alandiile ukuti umulume kuti apeela umukashi kalata ya kumutamfishapo e lyo amuleka?”+ 8 Na o abaswike ati: “Icalengele Mose amusuminishe ukulaleka abakashi+ benu, ni co mwalikosa imitima, lelo ifi te fyo cali pa kutendeka.+ 9 Ndemweba nati, onse uwaleka umukashi wakwe apabula umulandu wa bulalelale,* aupa na umbi, ninshi acita ubucende.”+

10 Lyena abasambi bamwebele abati: “Kanshi ifi nga e fyo caba pa mwaume no mukashi wakwe, ninshi ukukanaupa kwawamapo.” 11 Na o abebele ati: “Te bantu bonse abengekala ukwabula ukuupa, kano fye abakwata ica bupe+ ca kukanaupa. 12 Pantu kwaliba abafyalwa fye ukwabula amaka ya kuupa, kwaliba na bamo abo batungula fye ku bantu, e lyo kwaliba na basalapo ukukanaupa* pa mulandu wa Bufumu bwa mu muulu. Uwingekala ukwabula ukuupa, naekale ifyo fine.”+

13 Lyena abantu baletele abana abanono kuli Yesu pa kuti ababikepo iminwe no kubapepelako, lelo abasambi balibakalipiile.+ 14 Nomba Yesu abebele ati: “Balekeni abana abanono, mwilabalesha ukwisa kuli ine, pantu Ubufumu bwa mu muulu bwa bantu ababa kwati ni aba abana.”+ 15 Kabili alibabikilepo iminwe afumako aya no kuya.

16 Nomba moneni! umuntu umo aishile kuli Yesu e lyo amwipusha ati: “Mwe Kasambilisha, fisuma nshi mfwile ukulacita pa kuti nkakwate umweo wa muyayaya?”+ 17 Na o amwaswike ati: “Mulandu nshi ulenjipushisha pa fisuma? Kwaba fye umusuma Umo.+ Lelo nga ulefwaya ukakwate umweo wa muyayaya, ulekonka amafunde lyonse.”+ 18 Na o amwipwishe ati: “Mafunde nshi?” E lyo Yesu amwebele ati: “Wilaipaya,+ wilacita ubucende,+ wilaiba,+ wilaba kambone wa bufi,+ 19 ulecindika wiso na noko,+ kabili uletemwa umunobe nge fyo waitemwa we mwine.”+ 20 Umulumendo amwebele ati: “Ndakonka aya amafunde yonse. Finshi fimbi mfwile ukucita?” 21 Lyena Yesu amwebele ati: “Nga ulefwaya ukuba uwapwililika, kashitishe ifyuma fyobe upeele na bapiina indalama. Nga wacita ifi ukakwata icuma mu muulu;+ e lyo wise ulenkonka.”+ 22 Ilyo umulumendo aumfwile aya amashiwi, afuminepo ninshi ali no bulanda sana, pantu alikwete ifyuma ifingi.+ 23 Lyena Yesu aebele abasambi bakwe ati: “Ndemweba icine cine nati, cikakosela aba fyuma ukwingila mu Bufumu bwa mu muulu.+ 24 Na kabili ndemweba nati, ca-angukilapo ingamila ukupula mu linso lya nshindano ukucila uwa fyuma ukwingila mu Bufumu bwa kwa Lesa.”+

25 Ilyo abasambi baumfwile ifi, balipapile nga nshi kabili batile: “Ninshi nani engapusuka?”+ 26 Ilyo Yesu abalolekeshe, abebele ati: “Abantu te kuti bacite ifi, lelo Lesa ena kuti acita ifintu fyonse.”+

27 E lyo Petro amwipwishe ati: “Moneni! Twalisha fyonse pa kuti tulemukonka; nomba finshi ifwe tukakwata?”+ 28 Yesu aebele abasambi bakwe ati: “Ndemweba icine cine nati, ilyo ifintu fikaba ifipya,* ilyo Umwana wa muntu akekala pa cipuna cakwe ica bufumu ica bukata, na imwe bene mwe bankonka mukekala pa fipuna fya Bufumu 12, kabili mukapingula imikowa 12 iya kwa Israele.+ 29 Kabili onse uwasha amayanda nelyo bamunyina nangu inkashi nelyo wishi nangu nyina nelyo abana nangu amabala pa mulandu we shina lyandi, akapokelela imiku 100 ifyo asha e lyo no mweo wa muyayaya.+

30 “Lelo abengi aba ntanshi bakaba aba kulekelesha, e lyo abengi aba kulekelesha e bakaba aba ntanshi.+

20 “Pantu Ubufumu bwa mu muulu bwaba kwati mwine we bala, uwaimine lucelocelo aya mu kufwaya ababomfi aba kubomba mwi bala lyakwe ilya myangashi.+ 2 Ilyo aumfwene na babomfi ukuti ali no kubalipila denari* imo imo pa bushiku bumo, abatumine mwi bala lyakwe ilya myangashi. 3 Kabili ilyo aile ku maliketi nalimo pe awala lyalenga butatu,* amwene na bambi abashakwete incito nabeminina pa maliketi; 4 kabili abebele ati, ‘Na imwe bene kabiyeni mwi bala lya myangashi, nalaisamupeela amalipilo ayalingile.’ 5 Nabo baliile. Aliile ku maliketi na kabili pe awala lyalenga 6* ne lyalenga 9,* kabili acitile cimo cine. 6 Na mu kulekelesha, nalimo pe awala ilyalenga 11,* aliile ku maliketi kabili asangile na bambi nabeminina, e lyo abepusha ati, ‘Inga imwe cinshi mwimininine pano akasuba konse ukwabula incito?’ 7 Bamwaswike abati, ‘Ni co tapali uwa kutwingisha incito.’ Na o abebele ati, ‘Na imwe bene kabiyeni mwi bala lyandi ilya myangashi.’

8 “Ilyo cali icungulo bushiku, umwine we bala lya myangashi aebele kapitao wakwe ati, ‘Ita ababomfi pa kuti ubalipile amalipilo yabo.+ Utendekele pa wa kulekelesha e lyo ulekelesheko uwa ntanshi.’ 9 Ilyo abatendeke ukubomba pe awala lyalenga 11 baishile, cila muntu amupeele denari* imo. 10 E ico ilyo aba ntanshi baishile, baletontonkanya ukuti alabapeela amalipilo ayengi, lelo nabo bene abapeele fye denari* imo imo. 11 Ilyo bapokele amalipilo yabo, batendeke ukuilishanya ku mwine we bala 12 abati, ‘Aba abacilekelesha babombele fye iawala limo; lelo mwabapeela amalipilo yamo yene na ifwe, fwe babombeshe akasuba konse no kupya ku kasuba!’ 13 Lelo aebele umo pali bena ati, ‘Mune, nshikulufyenye iyo. Bushe tatwacumfwana ukuti ndekulipila denari* imo?+ 14 Poka amalipilo yobe uleya. Ndefwaya ukupeela uyu uwa kulekelesha amalipilo yamo yene nga ayo nkupeele. 15 Bushe nshakwata insambu sha kucita ifyo ndefwaya ukucita ne fintu fyandi? Bushe nalimo icalenga umfulilwe ni co waliba no mufimbila* pantu ndi muntu umusuma?’*+ 16 Ifi fine e fyo na ba kulekelesha bakaba aba ntanshi, na ba ntanshi bakaba aba kulekelesha.”+

17 Ilyo baleya mu musebo waya ku Yerusalemu, Yesu asendele abasambi 12 pa mbali e lyo abeba ati:+ 18 “Namwishiba, tuleya ku Yerusalemu, kabili bali no kupeela Umwana wa muntu ku ntungulushi sha bashimapepo na bakalemba, nabo bakamupingula ukuti afwe,+ 19 kabili bakamupeela ku bena fyalo pa kuti bakamupumye, bakamufopaule, bakamwipaile na pa cimuti,+ e lyo pa bushiku bwalenga shitatu akabuushiwe.”+

20 Lyena nyina wa bana ba kwa Sebede+ aile kuli Yesu na bana bakwe, e lyo afukama* pa kuti amulombe fimo.+ 21 Lyena amwipwishe ati: “Cinshi mulefwaya?” Na o ayaswike ati: “Landeni ukuti aba abana bandi babili, umo akekale ku kulyo kwenu e lyo umbi ku kuso kwenu mu Bufumu bwenu.”+ 22 Yesu amwaswike ati: “Tamwishibe ico mulelomba. Bushe kuti mwanwena muli kapu iyo ndi no kunwenamo?”+ Na bo bamwaswike abati: “Kuti twanwenamo.” 23 Na o abebele ati: “Kwena mukanwena muli kapu yandi,+ nomba te ine nsala abakwikala ku kulyo kwandi na ku kuso kwandi, lelo abo Tata+ apekanishisha e bakekalako.”

24 Ilyo abasambi bambi 10 baumfwile icacitike, balifuliilwe aba aba bwananyina+ babili. 25 Lelo Yesu alibetile e lyo abeba ati: “Mwalishiba ukuti bakateka ba bena fyalo bateka abantu kwati basha kabili intungulushi na sho shilatitikisha abo shitungulula.+ 26 Ifi te fyo imwe mufwile ukulacita; lelo onse uufwaya ukuba umukalamba pali imwe,+ afwile ukulamubombela,+ 27 na onse uufwaya ukuba uwa ntanshi pali imwe, afwile ukuba umusha wenu.+ 28 Nga filya fine no Mwana wa muntu taishile pa kuti balemubombela, lelo aishile mu kubombela abantu+ no kubapeela umweo* wakwe icilubula pa kuti alubule abengi.”+

29 Ilyo balefuma mu Yeriko, ibumba ilikalamba lyalimukonkele. 30 Kabili moneni! impofu shibili ishaikele mu mbali ya musebo shalyumfwile ukuti Yesu alepita, kabili shabilikishe ashiti: “Tumfwileniko uluse mwe Shikulu, Mwana Davidi!”+ 31 Nomba ibumba lyalishikalipile, lyashebele ukuti shikale tondolo; lelo e lyo shacililemo ukubilikisha ashiti: “Tumfwileniko uluse, mwe Shikulu, Mwana Davidi!” 32 E ico Yesu aliminine, ashiita, e lyo ashipusha ati: “Cinshi mulefwaya mucitile?” 33 Na sho shamwaswike ashiti: “Mwe Shikulu, tushibuleni amenso.” 34 Yesu alyumfwile uluse kabili ashikete mu menso.+ Ilyo line fye shatendeke ukumona, shatendeka no kumukonka.

21 Ilyo bafikile pa Betifage pa Lupili lwa Miolife mupepi na ku Yerusalemu, Yesu atumine abasambi+ babili, 2 abebele ati: “Kabiyeni muli ulya mushi uli pa ntanshi, kabili ilyo mwalaingila fye, mwalasanga impunda nabaikaka pamo no mwana wa iko. Mushikakule e lyo mundetele. 3 Nga kwaba uwamwipushapo, mumwebe amuti, ‘Ni Shikulu aleshifwaya.’ Na o alemupeela ilyo line fye.”

4 Ici cafikilishe ifyo Lesa alandiile muli kasesema ukuti: 5 “Ebeni umwana mwanakashi Sione amuti, ‘Mona! Imfumu yobe ileisa kuli iwe,+ yalifuuka,+ kabili ininine pa mpunda, pa mpunda iyana iilume, umwana wa citekwa icisenda ifipe.’”+

6 E ico abasambi balile kabili bacitile filya fine Yesu abebele.+ 7 Lyena baletele impunda no mwana wa iko umulume, babikapo ifya kufwala fyabo e lyo aikalapo.+ 8 Abengi abali mwi bumba ba-anshike ifya kufwala fyabo ifya kunse mu musebo,+ e lyo bambi balekontola imisambo ku fimuti balayanshika mu musebo. 9 Na mabumba ya bantu ayali pa ntanshi yakwe na yalekonka pa numa, yalebilikisha ayati: “Pususheni Mwana Davidi!+ Alipaalwa uwishila mwi shina lya kwa Yehova!*+ Tulepepa kuli imwe mwe baikala mu muulu+ atuti, mupususheni!”

10 Kabili ilyo aingile mu Yerusalemu, mu musumba monse mwakabile na se ku congo, na bantu baleipusha abati: “Inga uyu muntu nani?” 11 Amabumba ya bantu yaletila: “Uyu e kasesema Yesu,+ uwa ku Nasarete iya mu Galili!”

12 Lyena Yesu aingile mwi tempele, atamfyamo na bonse abaleshitishamo ifintu na baleshita, kabili apenwine amatebulo ya balekabushanya indalama ne fipuna fya baleshitisha inkunda.+ 13 Kabili abebele ati: “Amalembo yatila, ‘Ing’anda yandi bakaita ati ing’anda ya kupepelamo,’+ lelo imwe muleisangula ulucengo lwa fipondo.”+ 14 Na kabili ilyo ali mwi tempele impofu na balemana baishile kuli ena, na o alibondepe.

15 Ilyo intungulushi sha bashimapepo na bakalemba bamwene ifipesha amano ifyo acitile na baice abalebilikisha mwi tempele abati: “Pususheni Umwana wa kwa Davidi!”+ balifulilwe+ 16 kabili bamwipwishe abati: “Bushe uleumfwa ifyo aba bana balelanda?” Na Yesu abaswike ati: “Ee. Bushe tamwabelenga ifyo Amalembo yalanda ukuti, ‘Mwalenga abana abanono na bana abonka balemulumbanya’?”+ 17 Kabili ilyo abashile, afumiine kunse ya musumba aya ku Betani, kabili e ko asendeme.+

18 Ilyo alebwelela ku Yerusalemu lucelocelo, alyumfwile insala.+ 19 Lyena amwene umukunyu mu mbali ya musebo, ilyo aileko tasangileko nangu kamo, asangileko fye amabula.+ E ico aebele umukunyu ati: “Wikatala autwalapo ifisabo na kabili.”+ Lyena umukunyu walyumine apo pene. 20 Ilyo abasambi bamwene ifi, balipapile abati: “Bushe umukunyu wauma shani apa pene?”+ 21 Na Yesu abaswike ati: “Ndemweba icine cine nati, nga mwaba fye ne citetekelo kabili tamuletwishika, tamwakacite fye ico ncitile kuli uyu umukunyu, lelo nangu mwaeba ulu ulupili amuti, ‘Fuma apa no kuipoosa muli bemba,’ cikacitika.+ 22 Kabili fyonse ifyo mwalomba ilyo mulepepa, nga muli ne citetekelo, mukapokelela.”+

23 Ilyo aingile mwi tempele, intungulushi sha bashimapepo na bakalamba ba bantu baishile kuli ena ninshi alesambilisha. Lyena bamwipwishe abati: “Maka nshi ubomfya pa kucita ifi fintu? Kabili nani akupeela aya amaka?”+ 24 Na Yesu abaswike ati: “Na ine nalamwipushako icintu cimo. Nga mwanjeba, na ine nalamweba amaka momfya pa kucita ifi fintu: 25 Bushe ni kwisa Yohane afumishe amaka ya kubatisha? Ni ku muulu nelyo ni ku bantu?” Lelo batendeke ukulanshanya abene beka abati: “Nga twatila, ‘Ni ku muulu,’ alatweba ati, ‘Nomba cinshi mushamusuminine?’+ 26 Lelo nga twatila, ‘Ni ku bantu,’ ibumba talyatuleke, pantu bonse baishiba ukuti Yohane ali ni kasesema.” 27 E ico ba-aswike Yesu abati: “Tatwishibe.” Na o abebele ati: “Na ine nshamwebe amaka momfya pa kucita ifi fintu.

28 “Muletipo shani? Umuntu umo alikwete abana babili. Ilyo aile ku wa kubalilapo, amwebele ati, ‘Mwana wandi, uye mu kubomba mwi bala lya myangashi lelo.’ 29 Na o ayaswike ati, ‘Nshayeko, lelo pa numa, alyumfwile ububi pa fyo akeene, e ico alile. 30 Ilyo aile-eba umwana umbi fimo fine, uyu ena atile, ‘Nalaya,’ lelo taileko. 31 Bushe pali aba babili nani wacitile ico wishi alefwaya?” Nabo ba-aswike abati: “Uwa kubalilapo.” E lyo Yesu abebele ati: “Ndemweba icine cine nati, bakasonkesha ba misonko na bacilende bakamutangilila mu Bufumu bwa kwa Lesa. 32 Pantu Yohane aishile kuli imwe mu kumulanga inshila ya bulungami, lelo tamwamusumiine. Nomba bakasonkesha ba misonko na bacilende bena balimusumiine,+ lelo imwe nangu ca kuti mwalimwene ifi, tamwalangulwike kabili tamwamusumine.

33 “Umfweni icilangililo na cimbi: Kwali umuntu uwakwete ibala, aliliminemo imyangashi+ mwi bala lyakwe, ashingulushako ilinga, aimbamo ne ca kukaminamo imyangashi, lyena alikuulile ulupungu+ e lyo aseekesha ibala lyakwe ku balimi aya na ku calo ca kutali.+ 34 Ilyo ifisabo fyapiile, atumine abasha bakwe ku balimi pa kuti bayesenda ifisabo. 35 Lelo abalimi baikete abasha bakwe, umo balimupumine, umbi balimwipeye, umbi na o balimupoolele+ amabwe. 36 Na kabili atumine abasha bambi, abengi ukucila abo abalilepo ukutuma, lelo abalimi babacitile cimo cine.+ 37 Pa kulekelesha atumineko umwana wakwe umwaume pantu aletontonkanya ati, ‘Umwana wandi ena bakamucindika.’ 38 Ilyo abalimi bamwene uyu umwana, balanshenye abati, ‘Uyu e mpyani,+ natumwipaye pa kuti tupoke ibala!’ 39 E ico balimusendele bamufumisha kunse ye bala lya myangashi, bamwipaya no kumwipaya.+ 40 Nomba bushe ilyo umwine we bala lya myangashi akesa, finshi akabacita?” 41 Nabo bamwebele abati: “Apo aba bantu babi, akabonaula icabipisha kabili akaseekesha ne bala lya myangashi ku balimi bambi, abakamupeela ifisabo nga fyapya.”

42 E lyo Yesu abepwishe ati: “Bushe tamwabelenga mu Malembo ukuti, ‘Ilibwe ilyo bakakuula bakeene e lyaishileba pa muulu pa koona.*+ Ili ilibwe lyafuma kuli Yehova,* kabili tulimona ukuti cipesha amano’?+ 43 E mulandu wine ndemwebela nati, bakamupoka Ubufumu bwa kwa Lesa no kubupeela ku luko ulutwala ifisabo ififwaikwa. 44 Kabili umuntu onse uukaponena pali ili ilibwe, akafungaika.+ Na onse uo likaponena, likamushonaula.”+

45 Ilyo intungulushi sha bashimapepo na baFarise baumfwile ifilangililo fyakwe, balilwike ukuti e bo alelandapo.+ 46 Lelo nangu ca kuti balefwaya ukumwikata, balitiinine amabumba ya bantu, pantu aya mabumba yamwishibe ukuti ni kasesema.+

22 Na kabili Yesu abebeele mu filangililo. Atile: 2 “Ubufumu bwa mu muulu kuti twabulinganya ku mfumu, iyapekanishishe umwana wa iko umwaume umutebeto wa bwinga.+ 3 Kabili yatumine abasha ba iko ku kuyaeba abo yaitile ku mutebeto wa bwinga ukuti bese, lelo tabalefwaya ukwisa.+ 4 Na kabili yatumine abasha bambi kabili yabebele aiti, ‘Kebeni abo naita amuti: “Moneni! Nimpekanya umutebeto wandi, ninjipaya ing’ombe shandi ne nama ishaina, na fyonse nimpekanya. Iseni ku mutebeto wa bwinga.”’ 5 Lelo tababikileko amano kabili balifuminepo, umo aile kwi bala lyakwe, umbi na o ku bukwebo bwakwe;+ 6 lelo abashelepo baikete abasha ba mfumu, babacusha babepaya no kubepaya.

7 “Imfumu yalikalipe, kabili yatumine abashilika ba iko ukuyaipaya abaipeye abasha ba iko no koca umusumba wabo.+ 8 Lyena yaebele abasha ba iko aiti, ‘Natupekanya kale umutebeto wa bwinga, lelo abo twaita tabalingile.+ 9 E ico kabiyeni mu misebo iyafuma mu musumba, na bonse abo mulesanga mubete bese ku mutebeto wa bwinga.’+ 10 E ico abasha baliile mu misebo no kwita bonse abo basangile, ababifi pamo na basuma; no muputule wa kusefeshamo ubwinga waiswilemo abalelya.*

11 “Ilyo imfumu yaingile pa kuti imone abaishile, yamwene umuntu uushafwele ica kufwala ca bwinga. 12 E ico yamwipwishe aiti, ‘Mune, bushe wacingila shani muno ukwabula ica kufwala ca bwinga?’ Na o akutumene fye. 13 Lyena imfumu yaebele ababomfi ba iko aiti, ‘Mukakeni amolu na maboko mumupoose na panse mu mfifi. Mulya mwine e mo akalalilila no kusumanya ameno.’

14 “Pantu abaitwa bengi, lelo abasalwa banono.”

15 Lyena abaFarise balile kabili baumfwene ukuti bamwikatile mu milandile yakwe.+ 16 E ico batumine abasambi babo pamo na ba mu kabungwe ka kwa Herode+ kuli Yesu, babebele ukuyamwipusha abati: “Mwe Kasambilisha, twalishiba ukuti mulanda icishinka kabili musambilisha inshila ya kwa Lesa mu cine, tamutiina umuntu nangu umo, pantu tamulolesha pa fyo abantu bamoneka. 17 Nomba twebeni, muletipo shani? Bushe amafunde yalisuminisha* ukusonka umusonko kuli Kaisare nelyo iyo?” 18 Nomba apo alishibe ukuti bali ni mbifi, abepwishe ati: “Cinshi mulenjesesha, mwe ba bumbimunda mwe? 19 Nangeni indalama musonkela umusonko.” Lyena bamutwaliile denari* imo. 20 E lyo abepusha ati: “Bushe uyu mutwe uuli apa ne fi balembapo fya kwa nani?” 21 Batile: “Fya kwa Kaisare.” E lyo abeba ati: “Kanshi ifya kwa Kaisare mulepeela Kaisare, e lyo ifya kwa Lesa mulepeela Lesa.”+ 22 Ilyo baumfwile ifi, balipapile, kabili balimushiile baya no kuya.

23 Pali bulya bushiku, abaSaduke abalanda ati abafwa tabakabuushiwe,+ baishile kuli Yesu e lyo bamwipusha+ abati: 24 “Mwe Kasambilisha, Mose atile: ‘Umuntu nga afwa ukwabula ukufyalapo umwana, munyina+ afwile ukuupa uwali umukashi wakwe pa kuti engamufyalila abana.’ 25 Nomba kwali aba bwananyina 7. Uwakubalilapo alyupile e lyo afwa ukwabula ukukwatapo umwana, kabili munyina e washele aupa umukashi wakwe. 26 E fyo cali na ku wa bubili e lyo no wa butatu, kabili ifi fine e fyo cali na kuli bonse ukufika fye na ku walenga 7. 27 Na mukulekelesha uyu mwanakashi alifwile. 28 Nomba ilyo abafwa bakabuushiwa, bushe akaba mukashi wa kwa nani pali balya 7? Pantu bonse balimuupilepo.”

29 Na Yesu abaswike ati: “Mwaliluba, pantu tamwaishiba Amalembo na maka ya kwa Lesa;+ 30 pantu ilyo abafwa bakalabuushiwa abaume tabakaleupa, na banakashi tabakaleupwa, lelo bakaba nga filya fyaba bamalaika mu muulu.+ 31 Mwalibelenga pa kubuuka kwa bafwa. Bushe tamwabelenga ifyo Lesa amwebele? Atile: 32 ‘Nine Lesa wa kwa Abrahamu, Lesa wa kwa Isaki kabili Lesa wa kwa Yakobo.’+ Te Lesa wa bafwa iyo, lelo ni Lesa wa ba mweo.”+ 33 Ilyo amabumba yaumfwile ifi, yalipapile nga nshi pa misambilishishe yakwe.+

34 Ilyo abaFarise baumfwile ukuti abaSaduke balifililwe ukumwasuka, bapangile ibumba limo e lyo baisa kuli ena. 35 Kabili umo pali bena uwaishibe sana Amafunde, aipwishe Yesu icipusho pa kuti amweshe. Amwipwishe ati: 36 “Mwe Kasambilisha, lifunde nshi ilikalamba pa Mafunde+ yonse?” 37 Na o amwaswike ati: “‘Uletemwa Yehova* Lesa obe no mutima obe onse, no mweo* obe onse, no kutontonkanya+ kobe konse.’ 38 Ili e funde ilikalamba pali yonse kabili e lya kubalilapo. 39 Ilya bubili ilyapalana ne li, litila, ‘Uletemwa umunobe nge fyo waitemwa we mwine.’+ 40 Pali aya amafunde yabili e pashintilila Amafunde yonse ne fyebo fya Bakasesema.”+

41 Nomba ilyo abaFarise bali bacili nabalongana, Yesu abepwishe ati:+ 42 “Muletipo shani pali Kristu? Bushe Mwana wa kwa nani?” Bamwebele abati: “Wa kwa Davidi.”+ 43 E lyo abepwishe ati: “Nomba cinshi Davidi ilyo apokelele umupashi wa mushilo+ amwitiile ati ‘Shikulu,’ ilyo atile, 44 ‘Yehova* aebele Shikulu ati: “Ikala ku kuboko kwandi ukwa ku kulyo mpaka nkabike abalwani bobe pe samba lya makasa yobe”’?+ 45 E ico nga ca kuti Davidi amwitile ukuti ‘Shikulu,’ kuti aba shani umwana+ wakwe?” 46 Tapali nangu umo uwamwaswike, kabili ukufuma pali bulya bushiku, tapali nangu umo uwapamine ukumwipusha na kabili.

23 Lyena Yesu aebele amabumba ya bantu na basambi bakwe ati: 2 “Bakalemba na baFarise bali-ibika pa cipuna ca kwa Mose. 3 E ico fyonse ifyo bamweba, mulecita kabili mulekonka, lelo mwilacita ifyo bacita, pantu balanda fye, nomba tabacita ifyo balanda.+ 4 Balakaka ifipe ifyafina no kufibika pa mabeya ya bantu,+ lelo bena tabafwaya nangu fye kwikatako umunwe umo.+ 5 Fyonse ifyo bacita, baficita pa kuti abantu babamone;+ pantu balakusha sana utubokoshi twa malembo uto bafwala pa kuti baicingilile,+ kabili balalefya insenkebele sha fya kufwala fyabo.+ 6 Balitemwa ukwikala apacindamisha ilyo balelya umulaalilo na pa fipuna fya ku ntanshi* mu masunagoge,+ 7 kabili balitemwa filya abantu babaposha pa maliketi na filya babeta ukuti ba Rabi.* 8 Lelo imwe, mwilaleka abantu balemwita ati ba Rabi, pantu mwakwata fye kasambilisha umo,+ imwe bonse muli ba bwananyina. 9 Kabili mwilaita umuntu nangu umo pano isonde ati shifwe, pantu Shinwe+ umo, Uwa mu muulu. 10 Kabili mwilaleka abantu balemwita ati intungulushi, pantu Intungulushi yenu imo, Kristu. 11 Lelo umukalamba pali imwe bonse afwile ukulamubombela.+ 12 Onse uuicindamika bakamucefya,+ na onse uuicefya bakamucindamika.+

13 “We bulanda kuli imwe, mwe bakalemba na mwe baFarise, mwe ba bumbimunda mwe! pantu mwisalila abantu pa kuti beingila mu Bufumu bwa mu muulu; pa mulandu wa kuti na mwe bene tamwingilamo, kabili tamusuminisha na balefwaya ukwingilamo.+ 14* ——

15 “We bulanda kuli imwe, mwe bakalemba na mwe baFarise, mwe ba bumbimunda mwe!+ pantu mwabuka bemba kabili mwenda imilundu iingi pa kuti mulenge umuntu asumine imipepele yenu. Nga asumina mulamulenga abipisha ukucila imwe, wa kuya fye ku Gehena* nga imwe bene.

16 “We bulanda kuli imwe, mwe ntungulushi mpofu,+ mwe batila, ‘Umuntu nga alapa itempele, ninshi te mulandu nangu tacitile ifyo alapile; lelo uwalapa golde iyaba mwi tempele, ena mulandu nga tacitile ifyo alapile.’+ 17 Mwe bawelewele, kabili mwe mpofu mwe! Bushe cinshi cacindamapo? Bushe ni golde nelyo litempele ilyalenga golde ibe iya mushilo? 18 Kabili mutila, ‘Umuntu nga alapa iciipailo, ninshi te mulandu nangu tacitile ifyo alapile; lelo nga alapa ica bupe icili pa ciipailo, ninshi afwile ukucita ifyo alapile.’ 19 Mwe mpofu mwe! Na kuba, cinshi cacindamapo? Bushe ca bupe nelyo ciipailo icilenga ica bupe caba ica mushilo? 20 E ico uwalapa iciipailo ninshi alapa iciipailo kumo na fyonse ifilipo; 21 no walapa itempele ninshi alapila kumo na Lesa uwikalamo;+ 22 kabili uwalapa umuulu ninshi alapa icipuna ca Bufumu ica kwa Lesa kumo no Wikalapo.

23 “We bulanda kuli imwe, mwe bakalemba na mwe baFarise, mwe ba bumbimunda mwe! pantu mupeela ica pe kumi ica minte, dilu na kumini.*+ Lelo mwalisuula ifyacindama sana ifyaba mu Mafunde, e kutila, umulinganya,+ uluse ne cishinka.+ Kwena mulacita bwino ifi mucita ifi fintu, lelo tamufwile ukusuula ifintu fimbi ifyacilapo ukucindama ifyo Amafunde yalandapo.+ 24 Mwe ntungulushi mpofu,+ mwe bafumya akashiishi mu fyo mulenwa+ lelo mumina ingamila!+

25 “We bulanda kuli imwe, mwe bakalemba na mwe baFarise, mwe ba bumbimunda mwe! pantu muwamya kunse ya kapu ne mbale,+ lelo mu kati mwaisula ubufunushi*+ no kukanailama.+ 26 Mwe baFarise impofu, mubale muwamye mu kati ka kapu ne mbale, pa kuti na kunse kuwame.

27 “We bulanda kuli imwe, mwe bakalemba na mwe baFarise, mwe ba bumbimunda mwe!+ pantu mwaba nge nshiishi+ isho bashingulako impemba, ishimoneka ishayemba icine cine kunse, lelo mu kati shaisulamo amafupa ya bafwa ne fya kowela ifya misango yonse. 28 E fyo na imwe mwaba, kunse abantu bamumona kwati mwalilungama icine cine, lelo mu mitima mwaisula ubumbimunda na bumpulamafunde.+

29 “We bulanda kuli imwe, mwe bakalemba na mwe baFarise, mwe ba bumbimunda mwe!+ pantu mukuulilila inshiishi sha bakasesema kabili muyemfya inshiishi* sha balungama,+ 30 kabili mutila, ‘Atubako mu nshiku sha fikolwe fyesu, ifwe nga tatwasuumisheko umulopa wa bakasesema.’ 31 E ico muleishinina fye mwe bene ukuti muli bana ba baipeye bakasesema.+ 32 Kanshi pwishishisheni umulimo ifikolwe fyenu fyatampile.

33 “Mwe nsoka mwe, mwe bana ba mafwafwa+ mwe, bushe mukafulumuka shani ilyo bakamupingula ukuti bamupoose mu Gehena?*+ 34 E mulandu wine nkatumina bakasesema,+ aba mano na bakasambilisha+ ba bantu. Mukepayapo+ bamo, bamo mukabepaila pa fimuti, e lyo bamo mukabafopaula+ mu masunagoge yenu no kubacusha+ mu misumba yonse, 35 pa kuti bakamupingule pa mulopa onse uwa balungama uo mwasuumya pano isonde, ukutampila pa mulopa wa kwa Abele+ uwali umulungami ukufika na ku mulopa wa kwa Sekaria umwana wa kwa Barakia, uo mwaipaile pa kati ke tempele ne ciipailo.+ 36 Ndemweba icine cine nati, fyonse ifi fikacitikila iyi nkulo.

37 “We Yerusalemu, we Yerusalemu, we wipaya bakasesema kabili we upoola abo bakutumina amabwe!+ Pa miku iingi nalefwaya ukulonganika abana bobe, filya nankoko afukatila utwana twakwe mu mapindo yakwe, lelo imwe tamwalefwaya.+ 38 Moneni! Lesa akalekelesha* ing’anda yenu.+ 39 Pantu ndemweba nati, ukufuma pali ino nshita, tamwakaamonepo na kabili mpaka mukatile, ‘Alipaalwa uwishila mwi shina lya kwa Yehova!’”*+

24 Nomba ilyo Yesu alefuma mwi tempele, abasambi bakwe baile kuli ena pa kuti bamulange ifikuulwa fya pe tempele. 2 Na o abebele ati: “Bushe mwafimona ifi fyonse? Ndemweba icine cine nati, apa tapakabe ilibwe nangu limo ilikashala pa muulu wa libiye ilyo bashakapoose panshi.”+

3 Ilyo aikele pa Lupili lwa Miolife, abasambi baishile kuli ena ku mbali e lyo bamwipusha abati: “Twebeni, ni lilali ifi fintu fikacitika, kabili cinshi tukeshibilako ukuti e po muli*+ no kuti icalo cili ku mpela?”*+

4 Yesu na o abaswike ati: “Mulecenjela pa kuti umuntu nangu umo ekamulufya,+ 5 pantu abengi bakeshila mwi shina lyandi abati, ‘Nine Kristu,’ kabili bakalufya abengi.+ 6 Mukalaumfwa inkondo e lyo na malyashi ya nkondo. Mukalecenjela pa kuti mwikatiina, pantu ifi fintu fifwile ukucitika ilyo impela tailaisa.+

7 “Pantu uluko lukemina uluko lumbi no bufumu bukemina ubufumu bumbi,+ kabili kukaba ifipowe+ ne finkukuma mu ncende ishapusanapusana.+ 8 Fyonse ifi fikaba e ntendekelo ya bucushi ubukaba ngo kucula kwa pa kupaapa.

9 “Lyena abantu bakamutwala ku bakamucusha+ kabili bakamwipaya.+ Na bantu ba mu nko shonse bakamupata pa mulandu we shina lyandi.+ 10 E lyo abengi bakaleka ukubombela Lesa kabili bakalafutukana no kupatana. 11 Kukesaba bakasesema ba bufi abengi kabili bakalalufya abantu abengi;+ 12 kabili pa mulandu wa kuti bumpulamafunde bukalafulilako, ukutemwa kwa bengi kukacepa. 13 Lelo uukashipikisha* ukufika na ku mpela, e ukapusuka.+ 14 Kabili iyi mbila nsuma ya Bufumu ikabilwa ku bantu bonse aba pe sonde pa kuti ikabe inte ku nko shonse,+ e lyo impela ikesa.

15 “E ico, ilyo mukamona ica bunani icileta ubonaushi, ico Lesa alandiile muli kasesema Daniele, naciminina umwa mushilo,+ (uulebelenga eluke), 16 lyena abakaba mu Yudea bakatendeke ukufulumukila ku mpili.+ 17 Uukaba pa mutenge ekekila pa kuti afumye ifipe mu ng’anda yakwe, 18 no ukaba mwi bala ekabwelela ku ng’anda mu kusenda ica kufwala cakwe ica kunse. 19 Cikabipila sana abakaba pa bukulu na bakalaonsha muli shilya nshiku! 20 Mulepepa ukuti inshita ya kufulumuka kwenu ikaba mu nshita ya mpepo nangu pa bushiku bwe Sabata; 21 pantu pali ilya nshita kukaba ubucushi ubukalamba+ ubushatala abubako ukutula pa ntendekelo ya cino calo ukufika na nomba, kabili tabwakatale abubako na kabili.+ 22 Na kuba isho inshiku nga tabakashipifye, takwakabe umuntu nangu umo uukapusuka; lelo pa mulandu wa basalwa, isho inshiku bakashipifya.+

23 “Lyena umuntu nga amweba ati, ‘Umfweni! Kristu ali kuno,’+ nelyo amweba ati, ‘Ali kulya,’ mwikasumina.+ 24 Pantu kukesaba baKristu ba bufi na bakasesema ba bufi,+ abakalacita ifipesha amano ifikalamba ifyalekanalekana kabili bakalalufya abantu abengi,+ ni cikanga fye balufye na basalwa bene. 25 Moneni! Namusokela kabela. 26 E ico, abantu nga bamweba abati, ‘Moneni! Ali mu matololo,’ mwikayako; nangu nga batila, ‘Moneni! Ali mu miputule ya mu kati,’ mwikasumina iyo.+ 27 Pantu filya fine inkuba itula ku kabanga no kubyatila ku masamba, e fyo cikaba ilyo Umwana wa muntu akabapo.*+ 28 Konse ukuli icitumbi, e ko na bakapumpe* balongana.+

29 “Ilyo ubucushi bwa muli shilya nshiku bukapwa fye, akasuba kakafiita+ no mweshi tawakabalike, kabili intanda shikapona mu muulu, ne fya maka ifya mu muulu fikatenkana.+ 30 Lyena icishibilo ca Mwana wa muntu cikamoneka mu muulu, e lyo imitundu yonse iya bantu pano isonde ikaloosha nga nshi,*+ no kumona Umwana wa muntu+ aleisa pa makumbi ya mu muulu ninshi ali na maka no bukata ubukalamba.+ 31 Kabili ilyo iciunda icikalamba ice penga cikalila, akatuma bamalaika bakwe kabili bakalonganika pamo abasalwa bakwe ukufuma ku kabanga, ku masamba, ku kapinda ka ku kuso na ku kapinda ka ku kulyo, ukufuma ku mpela imo iya mu muulu no kufika ku mpela imbi.+

32 “Nomba sambilileniko ku cilangililo ca mukunyu: Ilyo fye wakwata imisambo iiteku kabili kwaba na mabuula, muleshiba ukuti amainsa yali mupepi.+ 33 Kanshi na imwe, ilyo mukamona fyonse ifi, mukeshibe ukuti ali mupepi, ali pa mwinshi.+ 34 Ndemweba icine cine nati, abantu ba nkulo ino tabakapwe ukufwa mpaka fyonse ifi fikacitike. 35 Umuulu ne sonde fikapita, lelo amashiwi yandi tayakapite nakalya.+

36 “Takwaba nangu umo uwaishiba ilyo ubushiku bulya bukafika ne nshita bukafika,+ nangu fye ni bamalaika ba mu muulu nangu Mwana, kano fye Tata+ e waishiba. 37 Pantu filya fine cali mu nshiku sha kwa Noa,+ e fyo cikaba na lintu Umwana wa muntu akabapo.*+ 38 Pantu muli shilya nshiku ilyo ilyeshi lishilaisa, balelya no kunwa, kabili baleupa no kuupwa, mpaka ubushiku Noa aingile mu cibwato,+ 39 kabili tabapooseleko amano nakalya mpaka ilyeshi lyaisa no kubasenda bonse,+ ifi fine e fyo cikaba na lintu Umwana wa muntu akabapo. 40 Abaume babili bakaba mwi bala; umo bakamusenda e lyo umbi bakamusha. 41 Abanakashi babili bakalapela pe libwe; umo bakamusenda e lyo umbi bakamusha.+ 42 E ico mulelola, pantu tamwaishiba ubushiku Shikulwinwe akesa.+

43 “Lelo ishibeni ukuti umwine wa ng’anda nga naishiba inshita umupuupu aleishilapo ubushiku,*+ kuti alalola kabili te kuti aleke bamwingilile mu ng’anda.+ 44 E ico na imwe mube abaipekanya,+ pantu Umwana wa muntu akesa pa nshita iyo mushilemwenekela.

45 “Bushe nani umusha wa cishinka kabili uwashilimuka,* uo shikulu wakwe asontele ukuba kangalila pa ba mu ng’anda yakwe, pa kuti alebapeela ifya kulya pa nshita yalinga?+ 46 Wa nsansa uyo musha nga ca kuti ilyo shikulu wakwe akesa akamusanga alebomba umulimo wakwe!+ 47 Ndemweba icine cine nati, akamusonta ukula-angalila ifyuma fyakwe fyonse.

48 “Lelo umusha nga aba umubi kabili alalanda mu mutima wakwe ati, ‘Shikulu akokola,’+ 49 atendeka no kupuma abasha banankwe, kabili alalya no kunwa pamo na bacakolwa bene bene, 50 shikulu wa ulya musha akesa pa bushiku ubo ashile-enekela na pa nshita iyo ashishibe,+ 51 akamukanda icine cine kabili akamubika pamo na ba bumbimunda. Uko kwine e ko akalalilila no kusumanya ameno.+

25 “Lyena Ubufumu bwa mu muulu kuti twabulinganya kuli banacisungu 10 abasendele inyali+ shabo baya mu kukumanya shibwinga.+ 2 Abali 5 pali aba bali bawelewele, e lyo bambi 5 bali aba mano.+ 3 Pantu banacisungu abawelewele balisendele inyali shabo lelo tabasendele amafuta, 4 nomba aba mano bena balisendele amafuta mu fya kubikamo amafuta kabili balisendele ne nyali shabo. 5 Apo shibwinga alikokwele ukwisa, bonse batendeke ukushipula, bapona na mu tulo. 6 Ilyo cafikile ubushiku pa kati baumfwile abalebilikisha ati, ‘Shibwinga aisa! Kamusengeleni.’ 7 Lyena banacisungu bonse balibuukile no kupekanya inyali shabo.+ 8 E lyo banacisungu abawelewele baebele aba mano abati, ‘Tupeeniko amafuta yenu, pantu inyali shesu shili mu kushima.’ 9 Aba mano ba-aswike abati: ‘Nalimo tayatukumane bonse nga twamupeelako. E ico kabiyeni ku bashitisha pa kuti muyeishitila mwe bene.’ 10 Ilyo baleya mu kushita amafuta, shibwinga alifikile. Banacisungu abaipekenye balingiile nankwe mu mutebeto wa bwinga,+ ne ciibi caliiselwe. 11 Pa numa balya banacisungu bambi 5 nabo baliishile, e lyo balabilikisha abati, ‘Mwe Shikulu, Mwe Shikulu, twiswileniko!’+ 12 Na o abaswike ati, ‘Ndemweba icine cine nati, nshimwishibe.’

13 “E ico mulelola,+ pantu tamwaishiba ubushiku nangu inshita.+

14 “Pantu Ubufumu kuti twabulinganya ku muntu uwali mupepi no kuya ku calo ca kutali, uwaitile abasha bakwe no kubaseekesha ifyuma fyakwe.+ 15 Umo amupeele amatalanti* 5, umbi yabili, umbi na o limo, cila muntu amupeele ukulingana na maka yakwe, e lyo aya ku calo ca kutali. 16 Ilyo line fye, uo apeele amatalanti 5 aliile mu kucita amakwebo kabili alisangiilepo amatalanti na yambi 5. 17 Ifi fine e fyo no musha apeele yabili acitile kabili alisangiilepo na yambi yabili. 18 Lelo uo apeele fye limo aileimba icilindi panshi e mo afisa indalama* sha kwa shikulu wakwe.

19 “Ilyo papitile inshita iitali, shikulu wa balya basha alibwelele kabili alitile abasha bakwe pa kuti balondolole ifyo bacitile mu ndalama shakwe.+ 20 E ico uo apeele amatalanti 5 alishile kabili alileteelepo amatalanti na yambi 5 e lyo atila, ‘Mwe shikulu, mwanseekeshe amatalanti 5; moneni, nalisangilapo na yambi 5.’+ 21 Shikulu wakwe amwebele ati: ‘Ala walibomba bwino, we musha musuma kabili uwa cishinka! Wali uwa cishinka mu tunono. Nalakusonta ukula-angalila ifingi.+ Ingila pa kuti ulesekelela pamo na sokulu.’+ 22 Awe uo apeele amatalanti yabili na o alishile, kabili atile, ‘Mwe shikulu, mwanseekeshe amatalanti yabili; moneni, nalisangilapo na yambi yabili.’+ 23 Shikulu wakwe amwebele ati: ‘Ala walibomba bwino, we musha musuma kabili uwa cishinka! Wali uwa cishinka mu tunono. Nalakusonta ukula-angalila ifingi. Ingila pa kuti ulesekelela pamo na sokulu.’

24 “Na mu kulekelesha uo apeele italanti limo alishile, kabili atile: ‘Mwe shikulu, nalishibe ukuti mwalyafya, museepa apo mushatandile kabili mulonganika ifyo mushaelele.+ 25 E ico nalitiinine, kabili naileshiika italanti lyenu panshi. Mukwai italanti lyenu ili.’ 26 Shikulu wakwe na o amwebele ati: ‘We musha mubi kabili umunang’ani, nga watila nseepa apo nshatandile no kulonganika ifyo nshaelele, 27 ninshi cinshi ushabikiile indalama* shandi ku banki, pa kuti ilyo naisa, naisashipoka pamo na nsonsela?

28 “‘E ico mupokeni italanti mupeele uukwete amatalanti 10.+ 29 Pantu onse uwakwata, bakamupeelelapo na fimbi kabili akakwata ifingi. Lelo uushakwata bakamupoka no tunono uto akwata.+ 30 E ico pooseni uyu musha icinangwa kunse mu mfifi. Kulya kwine e ko akulalilila no kusumanya ameno.’

31 “Ilyo Umwana wa muntu+ akesa no bucindami bwakwe pamo na bamalaika bonse,+ akekala pa cipuna cakwe ica Bufumu ica bukata. 32 Ne nko shonse bakashilonganika pa ntanshi yakwe, kabili akapaatukanya abantu, filya kacema apaatukanya impaanga ne mbushi. 33 Kabili akabika impaanga+ ku kulyo, e lyo imbushi ku kuso.+

34 “E lyo Imfumu ikeba abakaba ku kulyo kwa iko aiti, ‘Iseni, mwebo Tata apaala, ingileni mu Bufumu ubo bamupekanishisha ukufuma pa kutendeka kwa calo. 35 Pantu ilyo nali ne nsala mwalimpeele ifya kulya; ilyo nali ne cilaka mwalimpeele amenshi. Ilyo nali umweni mwalimpokelele bwino;+ 36 ilyo nshakwete ifya kufwala* mwalimpeele ifya kufwala.+ Ilyo nalwele mwalintenseshe. Ilyo nali mu cifungo mwalishile mu kumpempula.+ 37 Lyena abalungama bakamwipusha abati: ‘Mwe Shikulu, ni lilali twamumwene muli ne nsala e lyo twamupeela ifya kulya, nelyo ilyo mwali ne cilaka, e lyo twamupeela amenshi?+ 38 Ni lilali mwali abeni e lyo twamupokelela bwino, nelyo ilyo mushakwete ifya kufwala e lyo twamupeela ifya kufwala? 39 Ni lilali twamumwene namulwala nelyo muli mu cifungo e lyo twaisamupempula?’ 40 Ne Mfumu ikabaasuka aiti, ‘Ndemweba icine cine nati, Apo mwacitiile ifi umo pali aba bamunyinane abacepesha, ninshi mwacitiile ine.’+

41 “Lyena ikeba abakaba ku kuso kwa iko aiti: ‘Fumeni apa,+ mwe batiipwa mwe, kabiyeni mu mulilo wa muyayaya+ uo bapekanishisha Satana Kaseebanya na bamalaika bakwe.+ 42 Pantu nali ne nsala, lelo tamwampeeleko ifya kulya nangu fimo, kabili nali ne cilaka, lelo tamwampeeleko amenshi. 43 Ilyo nali umweni, tamwampokelele bwino; ilyo nshakwete ifya kufwala, tamwampeele ifya kufwala; ilyo nalwele kabili ilyo nali mu cifungo, tamwansakamene.’ 44 Nabo bakalanda abati: ‘Mwe Shikulu, ni lilali twamumwene muli ne nsala nelyo muli ne cilaka nelyo muli abeni nelyo tamukwete ifya kufwala nelyo namulwala nelyo muli mu cifungo, e lyo twakaana ukumwafwa?’ 45 Lyena ikabaasuka aiti: ‘Ndemweba icine cine nati, apo tamwacitiile umo pali aba abacepesha ifi ifintu, ninshi na ine wine tamwancitiile.’+ 46 Aba bakabonaula umuyayaya,+ lelo abalungama bena bakaba no mweo wa muyayaya.”+

26 Nomba ilyo Yesu apwishishe ukulanda fyonse ifi, aebele abasambi bakwe ati: 2 “Namwishiba ukuti kwashala fye inshiku shibili ninshi umutebeto wa Cakucilila wafika,+ kabili Umwana wa muntu bakamutwala ku balwani bakwe pa kuti bakamwipaile pa cimuti.”+

3 Lyena intungulushi sha bashimapepo na bakalamba ba bantu balongene mu lubansa lwa kwa shimapepo mukalamba uo baleita ati Kayafa,+ 4 kabili baumfwene+ ukuti bekatile Yesu mu bucenjeshi pa kuti bamwipaye. 5 Lelo balanshenye abati: “Twikamwikatila pa mutebeto, pantu nalimo abantu kuti baimya icimfulunganya.”

6 Ilyo Yesu ali ku Betani mu ng’anda ya kwa Simone uwalwelepo ifibashi,+ 7 umwanakashi aishile kuli ena ne botolo lya mafuta ayanunkila kabili aya mutengo nga nshi, lyena atendeke ukumwitulwila pa mutwe ninshi naikala alelya.* 8 Ilyo abasambi bamwene ifi balikalipe, kabili batile: “Cinshi aleonawila amafuta? 9 Pantu aya amafuta nga baciyashitisha pa ndalama ishingi no kupeela abapiina.” 10 Ilyo Yesu aishibe ifyo balelanda, abebele ati: “Cinshi mulecushisha uyu mwanakashi? Nancitila icintu icisuma. 11 Pantu abapiina mwaba nabo lyonse,+ lelo tamwakatwalilile ukuba na ine.+ 12 Ilyo acitulwila aya mafuta ayanunkila pa mubili wandi, acicita ici pa kumpekanishisha ukushiikwa.+ 13 Ndemweba icine cine nati, konse uko bakalabila iyi mbila nsuma pano calo, ifyo uyu mwanakashi acitile na fyo bakalafilandapo pa kumwibukisha.”+

14 Lyena umo pa basambi 12 uo baleita ati Yuda Iskariote,+ aile ku ntungulushi sha bashimapepo+ 15 kabili abepwishe ati: “Finshi mukampeela nga namufutuka pa kuti mukamwikate?”+ Nabo bamwebele abati bali no kumupeela indalama sha silfere 30.+ 16 E ico ukutula lilya line, alefwaya inshita iyalinga iya kumufutukilapo.

17 Pa bushiku bwa kubalilapo ubwa mutebeto wa Mukate Uushatutumuka,+ abasambi baishile kuli Yesu e lyo bamwipusha abati: “Ni kwi mulefwaya ukuti tumupekanishishe ukwa kuliila Icakucilila?”+ 18 Na o abebele ati: “Kabiyeni mu musumba kuli Kantwa kabili mumwebe amuti, ‘Kasambilisha atila: “Inshita yandi iya kufwa naipalama; kumobe e ko ndeliila Icakucilila pamo na basambi bandi.”’” 19 E ico abasambi balicitile ifyo Yesu abebele, kabili balipekenye Icakucilila.

20 Ilyo cali icungulo,+ alikele pe tebulo alelya na basambi 12.+ 21 Nomba ilyo balelya abebele ati: “Ndemweba icine cine nati, umo pali imwe alemfutuka.”+ 22 Bonse balyumfwile ubulanda pali ifi alandile, kabili cila muntu atendeke ukumwipusha ati: “Mwe Shikulu, bushe nine?” 23 Na o abaswike ati: “Uuletobela pamo na ine mu mbale e ulemfutuka.+ 24 Ca cine ukuti Umwana wa muntu aleya filya fine Amalembo yalanda pali ena, lelo ca bulanda+ ku ulefutuka Umwana wa muntu!+ Nga caliweme uyo muntu akanafyalwa.+ 25 Yuda uwali no kumufutuka, amwipwishe ati: “Bushe nine mwe Kasambilisha?” Na Yesu amwaswike ati: “Niwe we mwine walanda.”

26 Ilyo bacili balelya, Yesu abuulile umukate, kabili ilyo apepele, aliumokawile,+ e lyo apeela abasambi bakwe. Lyena abebele ati: “Buuleni mulye. Uyu mukate cimpashanya ca mubili wandi.”+ 27 Lyena ilyo abuulile kapu, alitashishe Lesa, abapeela e lyo abeba ati: “Nwenimo bonse,+ 28 pantu uyu mwangashi cimpashanya ca ‘mulopa wandi+ uwa cipangano,’+ uulepongololwa pa kuti abengi+ bakabelelwe uluse pa membu shabo.+ 29 Lelo ndemweba nati, Nshakanwe umwangashi na kabili mpaka ubushiku bulya ilyo nkanwa uupya pamo na imwe mu Bufumu bwa kwa Tata.”+ 30 Na pa kulekelesha balimbile inyimbo sha malumbo, baya na ku Lupili lwa Miolife.+

31 Lyena Yesu abebele ati: “Buno bushiku bonse mulembutuka, pantu calilembwa ati, ‘Nkepaya kacema, ne mpaanga sha mu mukuni shikasalangana.’+ 32 Lelo ilyo nkabuushiwa, nkamutangilila ku Galili.”+ 33 Nomba Petro amwebele ati: “Nangu aba bonse bamubutuke, ine nshamubutuke nakalya!”+ 34 Lyena Yesu amwebele ati: “Ndekweba icine cine nati, buno bwine bushiku, ilyo mukolwe talati alile, ulenkaana imiku itatu.+” 35 Petro amwebele ati: “Nshamukaane nakalya+ nga kufwa ndefwila pamo na imwe.” Ifi fine e fyo na basambi bambi balandile.

36 Lyena Yesu aile na basambi bakwe ku cifulo ico beta ati Getsemane,+ e lyo abeba ati: “Ikaleni pano, ine naya palya mu kupepa.”+ 37 Ilyo asendele Petro na bana babili aba kwa Sebede, atendeke ukumfwa ubulanda kabili alisakamikwe nga nshi.+ 38 Lyena abebele ati: “Naumfwa* ubulanda nga nshi, ni cikanga fye mfwe. Ikaleni pano kabili mutwalilile ukuba abalola nge fi ine ndi uwalola.”+ 39 Kabili cilya aya akatalamukila, afukama afisha ne mpumi panshi, alapepa+ ati: “Tata, nga kuti cacitika, fumyeni iyi kapu+ pali ine. Nomba nshiletila ifyo ndefwaya e fyo ficitike, lelo ifyo mulefwaya e fyo ficitike.”+

40 Ilyo abweleele ku basambi, asangile nabalaala. Lyena aebele Petro ati: “Bushe kuti mwafilwa ukutwalilila ukuba abalola pe awala fye limo nge fi ine ndi uwalola?+ 41 Akuloleni+ kabili akupepeni+ pa kuti mwi-ingila mu matunko.+ Umutima wena ulefwaisha, lelo umubili naunaka.”+ 42 Na kabili aliile mu kupepa pa muku walenga bubili. Atile: “Tata, nga ca kuti iyi kapu te kuti ifumepo kano fye inwemo, lekeni ifyo mulefwaya e fyo ficitike.”+ 43 Ilyo abwelele na kabili, asangile nabalaala, pantu amenso yabo yalifinine ku tulo. 44 E ico alibashiile, aya na mu kupepa pa muku walenga butatu, kabili abwekeshepo ukulanda fimo fine ilyo alepepa. 45 Lyena alibweleele ku basambi, e lyo abeba ati: “Pa nshita ya musango uyu namulaala kabili muletuusha! Moneni! Inshita yapalama iya kuti Umwana wa muntu bamufutuke no kumupeela mu minwe ya babembu. 46 Imeni tuleya. Moneni! Uulemfutuka apalama.” 47 Ilyo acili alelanda, moneni! Yuda uwali pa basambi 12 aliishile, ninshi ali ne bumba ilyakwete impanga ne nkonto ilyo ntungulushi sha bashimapepo na bakalamba ba bantu+ batumine.

48 Nomba uwalemufutuka alibebele icishibilo ca kuti: “Uo ndetomona, ninshi e o; mumwikate mumusende.” 49 Kabili alungeme Yesu e lyo atila: “Mwapoleni, mwe Kasambilisha!” amutomona no kumutomona. 50 Lelo Yesu amwipwishe ati: “Mune cinshi ulefwaya kuno?”+ Lyena baliishile kuli Yesu, bamwikata bamusenda no kumusenda. 51 Lelo moneni! umo pa bali na Yesu afumishe ulupanga lwakwe akoma umusha wa kwa shimapepo mukalamba, amuputulako no kutwi.+ 52 Lyena Yesu amwebele ati: “Bwesesha ulupanga umo lwikala,+ pantu bonse abalwila ku lupanga bakabepaila ku lupanga.+ 53 Bushe ulemona kwati te kuti inombe Tata pa kuti ampeele nomba line amabumba* ukucila 12 aya bamalaika?+ 54 Nomba nga nacita ifi, bushe ifyalembwa mu Cebo ca kwa Lesa kuti fyafikilishiwa shani?” 55 Pali ilya nshita Yesu aebele amabumba ati: “Bushe mwishile ne mpanga ne nkonto mu kunjikata kwati ndi cipondo? Cila bushiku naleikala mwi tempele ndesambilisha,+ lelo tamwanjikete.+ 56 Nomba ico fyonse ifi fyacitikila ni pa kuti ifyo bakasesema balembele* fifikilishiwe.”+ Lyena abasambi bonse balimushiile bafulumuka no kufulumuka.+

57 Abaikete Yesu bamutwele kuli Kayafa+ shimapepo mukalamba, uko bakalemba na bakalamba balongene pamo.+ 58 Lelo Petro alemukonka akatalamukila, ica kuti afikile fye na mu lubansa lwa kwa shimapepo mukalamba. Ilyo aingile mu kati ka lubansa, aikele na babomfi ba pa ng’anda pa kuti amone ifyali no kucitika.+

59 Nomba intungulushi sha bashimapepo na ba mu cilye ca Sanhedrini bonse balefwaya abantu aba kushinina Yesu ifya bufi pa kuti bamwipaye.+ 60 Lelo nangu ca kuti kwaleisa bakambone ba bufi abengi,+ tabasangile umulandu wa kumupeela nangu umo. Pa numa kwaishile bakambone babili 61 kabili batile: “Uyu muntu alelanda ati, ‘Kuti nabongolola itempele lya kwa Lesa no kulikuula mu nshiku shitatu.’”+ 62 E lyo shimapepo mukalamba aimine no kumwipusha ati: “Bushe tauleasukapo nangu cimo pa fyo aba balekushinina?”+ 63 Lelo Yesu aikele fye tondolo.+ E ico shimapepo mukalamba amwebele ati: “Ndekweba nati ulape pa menso ya kwa Lesa wa mweo, bushe niwe Kristu Umwana wa kwa Lesa?”+ 64 Yesu amwebele ati: “Naulanda we mwine. Lelo ndemweba nati: Ukutendekela ino nshita mukamona Umwana wa muntu+ naikala ku kuboko kwa ku kulyo ukwa Wa Maka Yonse*+ kabili mukamumona aleisa pa makumbi ya mu muulu.”+ 65 Lyena shimapepo mukalamba alepwile ifya kufwala fyakwe ifya kunse e lyo atila: “Asaalula Lesa! Bushe tulekabila bakambone na bambi? Mwamona! Nomba mwayumfwila ifyo alesaalula Lesa. 66 Muletipo shani?” Nabo bamwaswike abati: “Afwile ukufwa.”+ 67 Lyena bamufwishile amate pa menso+ no kumuuma amakofi.+ Bambi nabo balimutobele amapi pa menso,+ 68 kabili balemweba abati: “Iwe Kristu, nga niwe kasesema twebe, nani uwakuuma?”

69 Nomba ilyo Petro ali panse mu lubansa, umubomfi umukashana aishile kuli ena e lyo amweba ati: “Na iwe wine wali pamo na Yesu umwina Galili!”+ 70 Lelo alikeene pa menso ya bonse ati: “Nshishibe ifyo ulelandapo.” 71 Ilyo afumine mu lubansa aya pa mpongolo, umukashana na umbi alimumwene kabili aebele abalipo ati: “Uyu muntu ali na Yesu umwina Nasarete.”+ 72 Na kabili alikeene, kabili alilapile ati: “Nshimwishibe uyo muntu!” 73 Ilyo papitileko akashita, abaiminine mupepi balipaleme kabili baebele Petro abati: “Ca cine na iwe wine waleba nabo, pantu ulelanda nga abena Galili.”* 74 Lyena atendeke ukuitiipwila no kulapa ati: “Nshimwishibe uyo muntu!” Kabili ilyo line mukolwe alililile. 75 E lyo Petro aibukishe ifyalandile Yesu ati: “Ilyo mukolwe talati alile, ulenkaana imiku itatu.+” Lyena afumiine panse no kulila nga nshi.

27 Ilyo bwacele, intungulushi sha bashimapepo shonse na bakalamba ba bantu balikumene pa kuti balanshanye ifya kwipaya+ Yesu. 2 Ilyo bamukakile, bamutwele ku Mulashi+ Pilato.

3 Lyena Yuda uwamufutwike, ilyo amwene ukuti bamupingula ukufwa, alyumfwile ububi pa fyo acitile kabili abweseeshe intungulushi sha bashimapepo na bakalamba+ indalama sha silfere 30, 4 kabili atile: “Nalilufyenye pa kufutuka umuntu wa kaele.”* Nabo bamwebele abati: “Bushe uyo mulandu wesu? Mulandu obe!” 5 E ico apoosele ishi ndalama sha silfere mwi tempele. Lyena alileikulika.+ 6 Lelo intungulushi sha bashimapepo shabuulile ishi ndalama sha silfere kabili shatile: “Amafunde tayasuminisha ukubika ishi ndalama mu cipao ca mushilo, pantu ni ndalama sha mulopa.” 7 Ilyo balanshenye, baileshita impanga ya kwa nakabumba muli ishi ndalama pa kuti baleshiikamo abeni. 8 E ico ilya impanga baita ukuti, “Impanga ya Mulopa”+ ukufika na lelo. 9 Lyena ifyo Lesa alandiile muli kasesema Yeremia fyalifikilishiwe. Alandile ukuti: “Kabili babuulile ne ndalama sha silfere 30, isho baleshitishishapo umuntu, e sho abana ba kwa Israele bamo basuminishenye ukumushitishishapo, 10 kabili bashilipiile pa mpanga ya kwa nakabumba, ukulingana ne fyo Yehova* anjebele.”+

11 Yesu nomba aiminine pa ntanshi ya Mulashi Pilato, kabili uyu mulashi amwipwishe ati: “Bushe uli Mfumu ya baYuda?” Na Yesu amwaswike ati: “Naulanda we mwine.”+ 12 Lelo ilyo intungulushi sha bashimapepo na bakalamba balemupeela imilandu, ta-aswike nangu cimo.+ 13 Lyena Pilato amwipwishe ati: “Bushe tauleumfwa imilandu ubwingi iyo balekupeela?” 14 Lelo tamwaswike nangu cimo. Ici calengele uyu umulashi apapa nga nshi.

15 Nomba lyonse ilyo kwaleba umutebeto wa cakucilila, umulashi alekakwila ibumba umufungwa umo uo abene balefwaya.+ 16 Pali ilya nshita kwali icipondo ico baleita ukuti Baraba icaishibikwe sana ico bakakile mu cifungo. 17 E ico ilyo balongene, Pilato abepwishe ati: “Nani mulefwaya imukakwile, Baraba nelyo Yesu uo batila Kristu?” 18 Pantu Pilato alishibe ukuti icalengele batwale Yesu kuli ena ni co balimufimbiile. 19 Na kabili ilyo aikele pa cipuna cakwe ica bupingushi, umukashi wakwe alimulaishe amashiwi aya kuti: “Mumuleke fye uyo muntu uwalungama, pantu nacicula nga nshi lelo mu ciloto pa mulandu wakwe.” 20 Nomba intungulushi sha bashimapepo na bakalamba basembeleke amabumba ukuti yalombe Baraba,+ lelo Yesu bamwipaye.+ 21 Lyena umulashi abepwishe ukuti: “Nani pali aba babili mulefwaya ukuti imukakwile?” Nabo bamwaswike abati: “Baraba.” 22 Pilato abepwishe ati: “Nomba cinshi mulefwaya ncite Yesu uo batila Kristu?” Bonse bamwaswike abati: “Mumukobeke pa cimuti!”*+ 23 Lyena abepwishe ati: “Inga kanshi cinshi alufyenye?” Nabo e lyo bacililemo ukubilikisha abati: “Mukobekeni pa cimuti!”+

24 Nomba ilyo Pilato amwene ukuti tacalemwafwa, lelo kwaba fye icimfulunganya, abuulile amenshi asamba ku minwe pa menso ya bantu, e lyo atila: “Te ine nalalenga ukuti uyu muntu afwe. Mulandu wenu mwe bene.” 25 Na bantu bonse ba-aswike abati: “Umulopa wakwe naube pali ifwe na pa bana+ besu.” 26 Lyena alibakakwiliile Baraba, lelo alandile ukuti bafopaule+ Yesu, amupeela na ku bakuyamwipaila pa cimuti.+

27 E lyo abashilika ba mulashi batwele Yesu ku ng’anda ya mulashi kabili ibumba lya bashilika lyonse lyalimushingulwike.+ 28 Ilyo bamufuulile ifya kufwala, bamufwikile insalu iyakashika ce,+ 29 bapikwile ne cilongwe* ca myunga e lyo bamufwika ku mutwe. Lyena bamufumbatike itete mu kuboko kwa ku kulyo. E lyo bamufukamina, balamupumya, abati: “Mwapoleni, mwe Mfumu ya baYuda!” 30 Kabili balimufwishile amate,+ babuula ne tete, batendeka no kumuuma pa mutwe. 31 Ilyo balekele ukumupumya, bamufuulile insalu iyakashika ce iyo bamufwikile, e lyo bamufwika ifya kufwala fyakwe ifya kunse. Lyena balimusendele pa kuti bayemupoopela pa cimuti.+

32 Ilyo balefuma mu musumba, basangile umwina Kurene uo baleita ati Simone. Kabili balimupatikishe ukusenda icimuti ca kucushiwilwapo*+ ica kwa Yesu. 33 Kabili ilyo bafikile pa ncende iyo beta ukuti Golgota, e kutila, Pa Cipanga,+ 34 bamupeele umwangashi uo basakenyemo ifyalula pa kuti anwe;+ lelo ilyo aumfwile ifyo waleumfwika, alikeene ukunwa. 35 Ilyo bamupoopele pa cimuti, balipendwile+ pa kwakana ifya kufwala fyakwe ifya kunse, 36 kabili baikele kulya kwine balemulinda. 37 Babikile ne cipampa pa muulu wa mutwe wakwe apo balembele umulandu bamupeele uwa kuti: “Uyu ni Yesu, Imfumu ya baYuda.”+

38 Lyena bakobeke ifipondo fibili pa fimuti mupepi na apo bapoopeele Yesu, cimo ku kulyo kwakwe na cimbi ku kuso kwakwe.+ 39 Kabili abapita nshila balemusaalula,+ uku ninshi balepukunya ne mitwe+ 40 kabili balelanda abati: “We wingabongolola itempele no kulikuula mu nshiku shitatu,+ ipusushe! Nga uli mwana wa kwa Lesa, ika pa cimuti ca kucushiwilwapo!”*+ 41 Intungulushi sha bashimapepo, bakalemba na bakalamba, nabo batendeke ukumupumya abati:+ 42 “Alepususha bambi; nomba afilwa ukuipususha umwine! Ni Mfumu ya bena Israele,+ naekile nomba pa cimuti ca kucushiwilwapo,* e lyo twalamusumina. 43 Alicetekela Lesa; lekeni nomba amupusushe nga alimutemwa,+ pantu atila, ‘Ndi Mwana wa kwa Lesa.’”+ 44 Ifipondo ifyo bakobeke mupepi na o, na fyo fyalemusaalula.+

45 Imfifi yakupile icalo conse ukufuma pe awala lyalenga 6* ukufika pe awala lyalenga 9.*+ 46 Nalimo pe awala lyalenga 9, Yesu abilikishe ishiwi ilikalamba ati: “Eli, Eli, lama sabaktani?” e kutila, “Lesa wandi, Lesa wandi, cinshi mwandekelesesha?”+ 47 Ilyo bamo abaiminine mupepi baumfwile ifi, batendeke ukulanda abati: “Uyu muntu aleita Eliya.”+ 48 Kabili ilyo line umo pali bena alibutwike abula icapala umwepu, acitumpika mu mwangashi uwakantuka, acibika na kwi tete, e lyo amupeela pa kuti anwe.+ 49 Lelo bambi batile: “Muleke! Lekeni tumone Eliya nga alaisamupususha.” 50 Na kabili Yesu abilikishe ishiwi ilikalamba, afwa no kufwa.*+

51 Kabili moneni! insalu ya kucingilako iya mwi tempele+ yalepwike pa kati,+ ukufuma pa muulu ukufika panshi,+ ne sonde lyalitenkene kabili ifimabwe fyalilepwike. 52 Ne nshiishi* umwali ifitumbi ifingi ifya ba mushilo shalilepwike kabili ifitumbi fyalifumiine kunse, 53 kabili abantu abengi balifimwene (na bantu abafumine ku nshiishi pa numa ya kubuuka kwa kwa Yesu baingile mu musumba wa mushilo). 54 Lelo ilyo umukalamba wa bashilika na bo ali nabo abalelinda Yesu bamwene icinkukuma ne fyalecitika, balitiinine nga nshi, kabili batile: “Cine cine uyu ali Mwana wa kwa Lesa.”+

55 Kabili kwali abanakashi abaletamba akatalamukila abo Yesu afumine nabo ku Galili abalemwafwako imilimo;+ 56 pali aba pali Maria umwina Magadala, Maria nyina wa kwa Yakobo na Yose e lyo na nyina wa bana ba kwa Sebede.+

57 Nomba icungulo kwaishile Yosefe uwa ku Arimatea, uwali umukankaala, kabili na o ali musambi wa kwa Yesu.+ 58 Uyu muntu aile kuli Pilato no kulomba umubili wa kwa Yesu.+ Pilato na o alandile ukuti bamupeele.+ 59 Yosefe abuulile umubili, no ku-upomba mu nsalu+ iisuma iya busaka, 60 kabili aubikile mu nshiishi*+ iipya, iyo aimbile mu cilibwe. Ilyo akunkulushiishe icilibwe pa mwinshi wa nshiishi,* alifumineko. 61 Lelo Maria umwina Magadala na Maria umbi bashele kulya kwine, nabekala pa ntanshi ya nshiishi.+

62 Pa numa fye ya Bushiku bwa Kupekanya,+ ubushiku bwakonkelepo ubwali bushiku bwe Sabata, intungulushi sha bashimapepo na baFarise balongene pamo pa ntanshi ya kwa Pilato, 63 kabili balandile abati: “Shikulu, natwibukisha ukuti ulya kabepa ilyo ali uwa mweo alelanda ati, ‘Ilyo pakapita inshiku shitatu, nkabuushiwa.’+ 64 E ico ebeni abakuyalonda ku nshiishi mpaka no bushiku bwalenga shitatu, pa kuti abasambi bakwe tabeshilemwiba+ no kweba abantu abati, ‘Nabuuka ku bafwa!’ Lyena ubu bufi bwa kulekelesha bukabipa ukucila no bwa kubalilapo.” 65 Pilato abebele ati: “Mwalikwata aba kulonda. Kalondeni bwino bwino ukulingana ne fyo mulefwaya.” 66 E ico pa kuti bacingilile inshiishi babikile icilibwe pa mwinshi, babikapo na ba kulonda.

28 Pa numa ye Sabata, ilyo bwaleya buleca pa bushiku bwa kubalilapo mu mulungu, Maria umwina Magadala na Maria umbi baile mu kumona inshiishi.+

2 Kabili moneni! ilyo bafikile basangile ninshi nakupita icinkukuma icikalamba, pantu malaika wa kwa Yehova* alikiile mu muulu no kwisakunkulusha ilibwe ilyali pa nshiishi e lyo aikalapo.+ 3 Alebengeshima nga filya fimoneka inkuba nga yabyasha, ne fya kufwala fyakwe fyali ifyabuuta tuutu.+ 4 Apo abalelonda balimutiinine, balitutwime ica kuti bali fye kwati nabafwa.

5 Lelo malaika aebele abanakashi ati: “Mwitiina, pantu ninjishiba ukuti mulefwaya Yesu uo baipaile pa cimuti.+ 6 Taliko kuno, pantu nabuushiwa nga filya fine alandile.+ Iseni mumone apo umubili wakwe wali. 7 Nomba kabiyeni bwangu bwangu mwebe abasambi bakwe ukuti nabuuka ku bafwa, mubebe no kuti, alemutangilila ku Galili.+ E ko mukayamumwena. Moneni, ine namweba.”+

8 E ico balyangufyenye ukufuma ku nshiishi,* ninshi bali no mwenso kabili balesekelela nga nshi. Baile ulubilo mu kweba abasambi+ bakwe ifyacitike. 9 Kabili moneni! Yesu alibakumenye e lyo abaposha ati: “Mwapoleni!” Nabo balipaleme, bamufukamina* bamwikata na ku makasa. 10 Lyena Yesu abebele ati: “Mwitiina! Kabiyeni, muye-eba bamunyinane amuti baye ku Galili, kabili kulya kwine e ko tukamonanina nabo.”

11 Ilyo baleya, bamo abalelonda+ baingile mu musumba kabili bashimikile intungulushi sha bashimapepo fyonse ifyacitike. 12 Ilyo intungulushi sha bashimapepo shalongene pamo na bakalamba, bapandana na mano, bapeele abashilika indalama sha silfere ishingi 13 kabili babebele abati: “Mulelanda amuti, ‘Abasambi bakwe balishile ubushiku no kumwiba ninshi ifwe natulaala.’+ 14 Kabili umulashi nga aumfwa ili lyashi, imwe mwikasakamana, tukamulondolwela.”* 15 E ico balipokele indalama sha silfere no kucita ifyo babebele, kabili ili lyashi lyalisalangana mu baYuda ukufika na lelo.

16 Lelo abasambi 11 baile ku Galili+ ku lupili uko Yesu apekenye ukuti bakumanine.+ 17 Ilyo bamumwene, balimufukamine,* lelo bamo balitwishike. 18 Ilyo Yesu apaleme uko bali, abebele ati: “Lesa nampeela amaka ya kwangalila ifintu fyonse mu muulu na pano isonde.+ 19 E ico kabiyeni, mu kulenga abantu ba mu nko shonse+ baleba abasambi, mulebabatishisha+ mwi shina lya kwa Tata ne lya Mwana ne lya mupashi wa mushilo, 20 mulebasambilisha ukulakonka fyonse ifyo namwebele.+ Kabili moneni! Nakulaba na imwe inshiku shonse mpaka na ku mpela ya calo.”*+