Kaana Ifya Kwelenganya fya ku Calo, Supila Ifya Cine Cine fya Bufumu

“Lelo mubale mufwaye ubufumu bwa kwa Lesa no bulungami bwakwe, ne fi fyonse fikalundwako kuli imwe.”—MATEO 6:33.

1. Kusoka nshi uko Icebo ca kwa Lesa cipeela ukulosha ku mutima wa cimpashanya, kabili ni nshila nshi imo iikalamba iyo utubepelamo?

“UKUCISHAMO ku kubaka konse, lindo mutima obe, pantu muli wene e mwaba amatuntuko ya mweo.” (Amapinda 4:23) Mulandu nshi cabelele icakabilwa ku Mfumu ya mano Solomone ukupeela uku kusoka? Pa mulandu wa kuti “umutima wa kufutika ukucile fintu fyonse, kabili walilwalisha.” (Yeremia 17:9) Imo iya nshila ikalamba umo umutima wesu uwa cimpashanya wingatubepa kutulenga ukuyobeka mu fya kwelenganya fya ku calo. Lelo cinshi caba ifya kwelenganya? Fyaba kulanguluka pa fishili fya cine cine, ukulota, ukululumba kwa muntontonkanya waisuka. Lintu ifi filoto fyasanguka ifya kwelenganya fya ku calo, tafiba fye konaula inshita lelo na kabili fyaba ifya kucena. E ico, tufwile ukufikaana umupwilapo. Na kuba, nga ca kuti twapata ubupulumushi nge fyacitile Yesu, tukabaka umutima wesu ku kuyobeka mu fya kwelenganya fya ku calo.—AbaHebere 1:8, 9.

2. Cinshi caba ifya kwelenganya fya ku calo, kabili mulandu nshi tulingile ukufikaanina?

² Lelo finshi fyaba ifya kwelenganya fya ku calo? Fyaba kwelenganya ukwaishibikilwa kuli ici calo calaala mu maka ya kwa Satana. Ukukuma kuli cene, umutumwa Yohane alembele ukuti: “Pantu conse ca pano isonde, lunkumbwa lwa mubili, no lwinso lwa menso, na mataki ya miikalile ino, tacafuma kuli Shifwe, lelo ca pano isonde.” (1 Yohane 2:16; 5:19) Mulandu nshi Abena Kristu bafwile ukukaana ifya kwelenganya fya ku calo? Pantu ifya kwelengaya fya musango yo fibimbula ukufwaisha kwa kaso mu muntontonkanya no mutima. Ukulota ukucite calubana kuti na kabushe kwaba kubelesha kwa mu muntontonkanya ukwa co umuntu mu cituntulu akacita. Umusambi Yakobo atusoka ukuti: “Lelo umuntu onse atunkwa pa kulembulwa no kubelelekwa ku lunkumbwa lwakwe lwine; e lyo ulunkumbwa ilyo lwaimita lufyalo lubembu, no lubembu ilyo lwakula lufyale mfwa.”—Yakobo 1:14, 15.

Ifya Kumwenako fya Kusoka

3. Mulandu wa kwa ani upayanya ica kumwenako cacilishapo ica kusoka pa lwa kucena kwa fya kwelenganya fya kaso?

³ Natulanguluke ifya kumwenako ifilanga umulandu ifya kwelenganya fya ku calo fifwile ukukaaninwa. Umulandu wa kwa Satana Ciwa upayanya ica kumwenako cacilapo ica kucena uko kwingafumamo mu kuyobeka mu fya kwelenganya fyabamo akaso. Asuminishe ukuyumfwa kwa kuikusha ukulunduluka mu mutima wakwe ukufika ku cipimo ico akumbilwe icifulo ca kwa Yehova icaibela pamo nga Mulopwe wa Kubumbwa konse kabili afwaile ukupepwa. (Luka 4:5-8) Ukwelenganya kushili kwa cine cine? Mu kushininkisha e fyo kwali! Ico cikashininwa ukwabulo kutwishika lintu Satana akakwa pa myaka ikana limo kabili ukucilisha lintu akapooswa muli “bemba wa mulilo,” imfwa ya cibili.—Ukusokolola 20:1-3, 10.

4. Ni shani fintu Satana abepele Efa?

⁴ Twalikwata ica kumwenako na cimbi ica kusoka mu mulandu wa mwanakashi wa kubalilapo, Efa. Mu kubombesha kwa kwa Satana ku kumwensekesha ukuibililika kwakwe, aongwele Efa pa kutambika ku muntontonkanya wakwe ukwelenganya kwa kuti nga aliile ku cisabo cabindilwe, taali na kufwa lelo aali no kupala Lesa, ukwishiba ubusuma no bubi. Bushe kulya kwelenganya kwali ukushili kwa cine cine, ukwa kaso? Mu cituntulu e fyo kwali, nge fyo twingamona ukufuma ku kusenuka kwa kwa Yehova kuli Efa no mulume wakwe, Adamu, lintu balelubulushiwa. Nge ca kufumamo, balufishe insambu ku bumi mu Paradise ku bene bene na ku bufyashi bwabo bonse ubushapwililika.—Ukutendeka 3:1-19; Abena Roma 5:12.

5. Cinshi caleteleko ukuwa kwa bana ba kwa Lesa aba bumalaika, kabili mu kuba na ca kufumamo nshi kuli bene?

⁵ Na kabili twalikwata ica kumwenako ca kusoka ica bana baume bambi aba kwa Lesa aba bumalaika. (Ukutendeka 6:1-4) Mu cifulo ca kwikushiwa na mapaalo baipakishe pa cinso ca kwa Yehova mu mulu, baelengenye pa lwa banakashi pe sonde na fintu cingaba musamwe ukukwata ukwampana kwa bwamba na bene. Pa mulandu wa kubomba muli iyi nshila ya kwelenganya, bamalaika babulwe cumfwila nomba baisalilwa ku mfifi ya ku mupashi iya Tartari, ukupembelela ukulofiwa kwabo pa mpela ya Kuteka kwa Myaka Ikana Limo iya kwa Yesu Kristu.—2 Petro 2:4; Yuda 6; Ukusokolola 20:10.

Kaana Ifya Kwelenganya fya ku Calo

6, 7. Mulandu nshi ifya kwelenganya fya ku calo pa lwa fyuma fya ku mubili fyabela ifya kucena kabili ifya kubepaika?

⁶ Nomba natulanguluke ifya kwelenganya fimo ifyacilishapo ukuseeka kabili ifyabamo ubusanso ifyafwilishiwa na Satana. Ukupitila mu musango uuli onse uwa fya kusabankanishishamo, tuleeshiwa ukuyobeka mu fya kwelenganya fya ku calo. Ifi ilingi line filengwa no kufuluka kwa cuma. Mu cine ceka, takwaba icalubana mu kukwata ubukumu. Abrahamu wa bukapepa, Yobo, ne Mfumu Davidi bali ne cuma nga nshi, lelo tabafulwike icuma ca ku mubili. Ifya kwelenganya fya kutemwe fimoneka fikunta abantu ukubombesha pa myaka ku kunonka ubukumu. Ifya kwelenganya fya musango yo na kabili fibacincisha ukuyobeka mu musango onse uwa kuteye njuka, pamo ngo kucimfyanya kwa bakabalwe no kushita amatikiti ya lotari. Shi twisuminisha itontonkanyo ilili lyonse ilya bufi pa lwa bukumu. Nga ca kuti twatontonkanya ukuti ifyuma fya ku mubili fikapayanya ukucingililwa, languluka ili pinda lya cine cine: “Ifyuma tafyafwa kantu mu bushiku bwa kububuka, lelo ubulungami bupokolola ku mfwa.” (Amapinda 11:4) Mu cituntulu, ifyuma fya ku mubili tafyakakwate kwaafwa mu kupusunsuka “ubucushi bukalamba.”—Mateo 24:21; Ukusokolola 7:9, 14.

⁷ Ifyuma fya ku mubili kuti mu kwanguka fyatubepa. Uyo e mulandu twaebelwa ukuti: “Ifyuma fya wacindama musumba wakwe uwakosa, fyaba nge cibumba icasansuka—e fyo atunga.” (Amapinda 18:11) Ee, ni mu ‘kutunga kwakwe,’ fye emo ubukumu bwa ku mubili butambika ukucingililwa kunono mu nshita sha kusumbana kwa mitengo kwabulo kulamwa, ukubotelela mu fya bunonshi, ukubukana kwa bupolitiki, nelyo ukulwala kwa kutwala ku mfwa. Yesu Kristu asokele pa lwa butumpe bwa kubipa ukucetekela kwesu mu fyuma fya ku mubili. (Luka 12:13-21) Na kabili twalikwata amashiwi ya kusoka aya mutumwa Paulo ukuti: “Ukutemwe ndalama e shinte lya bubi bonse; bamo pa kushitinamina balufiwa ukufuma ku citetekelo, no kuilasamo abene amalangulusha ayengi.”—1 Timote 6:10.

8. Ni shani fintu ifya kwelenganya fya ku calo ifya musango wa kwampana kwa bwamba, fyaanana kabili busanso nshi ifi fitambika?

⁸ Ifya kwelenganya fimbi fyakuma ku kwampana kwa bwamba ukushili kwa mwi funde. Icipimo uko umusango wa lubembu lwa muntunse ufwaya ukwikalila pa fya kwelenganya fya bwamba kuti camonwa ku kuseeka kwa kukowela kwa milandile ukwabapo pa kutuma inambala ya lamya imo no kukutika ku bukombe bwa bucisenene. Mu United States, ubukombe pali lamya ubwa bucisenene bwaba bukwebo ubuleta amabilioni ya madola. Nga ca kuti twali no kuleka imintontonkanya yesu ukwikalilila pa kwampana kwa bwamba ukushili kwa mwi funde, bushe te kuti tube ababumbimunda, ukumoneka fye ukuba Abena Kristu basanguluka? Kabili bushe takwaba busanso bwa kuti ifya kwelenganya fya musango yo kuti fyatungulula kuli bucisenene bwa bwamba? Ici calicitika kabili cafumamo bamo ukutamfiwa ukufuma mu cilonganino ca Bwina Kristu ku kuibimba mu bulalelale nelyo ubucende. Mu cilolwa ca mashiwi ya kwa Yesu pali Mateo 5:27, 28, bushe bonse abayobeka mu fya kwelenganya fya musango yo tababa aba mulandu wa kucito bucende mu mitima yabo?

9. Kufunda nshi kusuma Amalembo yakwata ku kutusoka ukulwisha ifya kwelenganya fya ku calo?

⁹ Ku kucimfya ukukongama kwa mitima yesu iya lubembu ku kuyobeka mu fya kwelenganya fya musango yo, tulekabila ukusunga mu muntontonkanya ukusoka kwa kwa Paulo ukwa ukuti: “Takuli icibumbwa icishimoneka ku menso yakwe [Lesa]; awe ifintu fyonse fyabo bwamba kabili fyalikupukulwa ku menso ya kwa uyo tuli no kulubululako.” (AbaHebere 4:13) Tulingile pa nshita iili yonse ukufwaya ukuba nga Mose, uyo “akoselele ngo umone Mfumu iishimoneka.” (AbaHebere 11:27) Ee, tufwile ukutwalilila ukuibukisha ukuti ifya kwelenganya fya ku calo tafisekesha Yehova kabili kuti fyafumamo fye ukucena kuli fwe bene. Tufwile ukuba abayangwako pa lwa kulundulula ifisabo fyonse ifya mupashi wa kwa Lesa, ukucilisha ukuilama, apantu te kuti tufyuke icishinka ca kuti nga twabyala ku mubili, tukalobolola ukubola ukufuma ku mubili.—Abena Galatia 5:22, 23; 6:7, 8.

Ifya Cine Cine fya Bufumu

10, 11. (a) Fishinka nshi fipaasha mu kwafwilisha bucine bwa kwa Kabumba? (b) Bushininkisho nshi bwabako ubwa kuti Baibolo mu cine cine Cebo ca kwa Lesa? (c) Bushinino nshi bwabako ubwa bucine bwa Mfumu ya Bufumu bwa kwa Lesa?

¹⁰ Inshila yacilishapo kuwama ku kukaana ifya kwelenganya fya ku calo kutwalilila ukusupila ifya cine cine fya Bufumu. Ifya cine cine fya Bufumu ifyo filetwako na Lesa fyabe fyapusanako apakalamba ku fya kwelenganya fya ku calo. Bushe Lesa aba uwa cine cine? Takwaba kutwishika pa lwa kubapo kwakwe. Ububumbo ubumoneka bushinina ico cishinka. (Abena Roma 1:20) Tulacinkulwako pa lwa casoselwe ukucila imyanda ya myaka iyapitapo mu citabo The Divine Plan of the Ages, icasabankanishiwe na Watch Tower Society. Calondolwele ukuti: “Uyo uwingalolesha mwi ulu na mandala, nelyo ne linso fye lyakwe ilya cifyalilwa, no kumona kulya ububumbo bwakulisha, ukulingana kwa buko, ukuyemba, umuyano, ukubombela pamo no kulekanalekana, kabili nalyo line ukutwishika ukuti Kabumba wa ifi alikulisha mu kucilapo pali fyene ponse pabili mu mano na maka, nelyo uwingatunganya fye pa kashita kanono ukuti umuyano wa musango yo waishileko ku mankumanya, ukwabula Kabumba, ukufika kuli ico cipimo alilufya nelyo ukusuula amano ya kupelulula ngo wingalangulukwa mu kulinga ku co Baibolo imwita, umupumbu (umo uusuula nelyo uwabulo kupelulula).”—Ilumbo 14:1.

¹¹ Tusambilila fyonse pa lwa Bufumu muli Baibolo wa Mushilo. Bushe Baibolo mu cine cine yaba Cebo calembwa ica kwa Lesa? Mu kushininkisha cakwe, nge fyo cingamonwa ku kumfwana kwa iko, ukulungika kwa iko ukwa busayansi, na maka ya iko aya kwalula ubumi bwa bantu kabili ukucilisha pa kufikilisha kwa masesemo ya iko.a Ni shani pa lwa Mfumu ya Bufumu bwa kwa Lesa, Yesu Kristu? Bushe mu cine cine eko aali? Ubulondoloshi bwalembwa ubwa Malandwe na makalata yapuutwamo na bulesa aya Malembo ya Bwina Kristu aya ciGreek yacitilo bunte mu kulengama kabili mu kulongoloka ku kubapo kwa kwa Yesu Kristu. Ukukuma ku kubako kwa kwa Yesu mu lyashi lya kale, kwalibako na kabili ubunte bwa Talmud ya ciYuda, iilosha kuli wene ngo muntu. E fyo caba na kuli bakalemba ba malyashi aba ciYuda ne ciRoma aba mu mwanda wa myaka uwa kubalilapo C.E.

12, 13. Fishinka nshi ficitilo bunte kuli bucine bwa Bufumu bwa kwa Lesa?

¹² Ni shani pa lwa bucine bwa Bufumu ubwine? Bwalisuulwako apakalamba kuli Kristendomu, nge fyo calangililwa muli kuno kuilishanya ukwa mwina Presbyteria uwalumbuka ukuti: “Mu kushininkisha calicila pa myaka amakumi yatatu ukutula apo nakutikile kuli minista ukwesha kwa kulondolwela abantu pa lwa bucine bwa Bufumu.” Nalyo line, ukushishiwa kwe shina lya kwa Yehova ukupitila mu Bufumu e mutwe wa Cebo cakwe. Lesa umwine acitile ubulayo bwa Bufumu bwa kubalilapo, pa kusoso kuti: “Ndebika no bulwani pa kati ka iwe no mwanakashi, kabili pa kati ka bufyashi bobe no bufyashi bwakwe: bwene bwakulakulasa ku mutwe, nobe wakulabulasa ku citende.” (Ukutendeka 3:15) Ubufumu bwacitilwe icikope ku luko lwa kwa Israele, ukucilisha mu kati ka kuteka kwa Mfumu Solomone. (Ilumbo 72) Mu kulundapo, Ubufumu bwali e mutwe wa kushimikila kwa kwa Yesu. (Mateo 4:17) Alandile pa lwa bwene mu fingi ifya filangililo fyakwe, pamo nga ifyo ifya muli Mateo icipandwa 13. Yesu atwebele ukupepela Ubufumu no kutwalilila ukufwaya bwene intanshi. (Mateo 6:9, 10, 33) Na kuba, Ubufumu bwa kwa Lesa bwalumbulwa mupepi ne miku 150 mu Malembo ya Bwina Kristu aya ciGreek.

¹³ Ubufumu ni kamfulumende wa cine cine, mu kuba na maka no bulashi, kabili bukafikilisha ukwenekela konse ukwalinga. Bwalikwata umutande wa mafunde, uusangwa muli Baibolo. Ubufumu kale kale bwaliletako ifintu ifingi mu kumonekesha. Bwalikwata abatekwa ba cishinka—ukucila pa Nte sha kwa Yehova 4,000,000. Mu fyalo 211 baleshimikila imbila nsuma iya Bufumu bwa kwa Lesa, mu kufikilishiwa kwa kwa Mateo 24:14. Mu kati ka mwaka wabo uwa mulimo uwa 1991, bapoosele amaawala 951,870,021 ukushimikila ubukombe bwa Bufumu. Iyi mibombele ileletako ifya kufumamo fyamonekesha, ifibelelela ilyo icinabwingi balesambilila “ululimi lwine lwine” ulwa cebo ca Baibolo.—Sefania 3:9.

Ukusupila Ifya Cine Cine fya Bufumu

14. Ni shani fintu twingakosha ukutesekesha kwesu ukwa bucine bwa Bufumu?

¹⁴ Ni shani, lyene, twingasupila ifya cine cine fya Bufumu? Isubilo lyesu lifwile ukushimpwa mu kulungikwa pa bushinino bwakosa. Icalo cipya ica kwa Lesa icalaiwa cifwile ukuba ica cine cine kuli ifwe. (2 Petro 3:13) Kabili tufwile ukukwata icitetekelo mu bulayo bwa kuti Lesa “akafuute filamba fyonse ku menso [yesu], ne mfwa tayakabeko kabili iyo; takwakabe kabili ukuloosha nangu kukuuta nangu kuculuka; pa kuti ifya ntanshi nafiya.” (Ukusokolola 21:4) Ni shani fintu twingashininkisha ukuti ici tacili kwelenganya fye? Cikamwensekeshiwa mu nshita yalinga iya kwa Lesa, apantu te kuti cicitike kuli wene ukubepa. (Tito 1:1, 2; AbaHebere 6:18) Tukabila ukwetetula pali ayo malayo. Ukuibika mu cikope fwe bene mu calo cipya ica kwa Lesa no kuipakisha amapaalo ya ciko takuli kwelenganya kushili kwa cine cine lelo kupeela ubushinino bwa citetekelo. Nge fyo Paulo alondolwele cene ukuti, “icitetekelo kwenekela kwaebekeshiwa ukwa fintu filesubilwa, cilangililo camonekesha ica fya cine cine nangu cingati tafilamonwa.” (AbaHebere 11:1, NW) Shi natukoshe icitetekelo cesu pa kulya lyonse pa Cebo ca kwa Lesa ne mpapulo sha Bwina Kristu isho shitwaafwa ukumfwikisha no kubomfya cene. Kabili inshita ikalamba tupeelesha ku kwebako bambi pa lwa Bufumu, mu nshila ya lyonse na mu lyashi, e kucililako tukosha icitetekelo cesu no kubuutusha isubilo lyesu.

15. Kukakililwako nshi twakwata ukulosha ku butumikishi bwa Bwina Kristu?

¹⁵ Tulekabila na kabili ukubomba mu kumfwana ne fya cine cine fya Bufumu pa kuwamya imibele ya butumikishi bwesu. Apantu kuciliko ifingi ifya kucita, ni shani twingacite ci? (Mateo 9:37, 38) Ca cishinka icebo icitila umo tabala aba umukalamba ku kusambilila. Te mulandu myaka inga twaakana mu mulimo wa kucitilo bunte, kuti twawamyako. Pa kuba abafumamo cimo mu kubomba ne Cebo ca kwa Lesa, tuba na maka ya kwaafwa bambi ukumfwa ishiwi lya Mfumu, Yesu Kristu. (Linganyeniko Yohane 10:16.) Lintu twalanguluka ukuti impela ya muyayaya iya bantu yalibimbwamo, tulingile ukufwaya ukufimba icifulo cesu ica kubombelamo mu kukumanina pa kuti twingabapeela ishuko lya mu nshita ilyabwekeshiwabwekeshiwapo ku kulangisha apo baiminina, napamo nge “mpaanga” nelyo nge “mbushi.” (Mateo 25:31-46) Kwena, ico cipilibula ukusungilila ifyalembwa fyasakamanisha ifya abo abashiba pa mayanda kabili ukucilisha abo abali abasekelela mu bukombe bwa Bufumu.

Twalilileni Ukusupila Ubufumu

16. Ni bani baimika ica kumwenako cisuma mu kusupila ifya cine cine fya Bufumu, kabili ni shani fintu “babupoka” Ubufumu?

¹⁶ Ukubombesha kwa mukoosha kulafwaikwa pa kutwalilila ukusupila ifya cine cine fya Bufumu. Bushe tatukoseleshiwa ku ca kumwenako capimpa ica Bena Kristu bashalapo abasubwa? Balisupila ifya cine cine fya Bufumu pa makumi ya myaka. Uku kusupila kwalondolwelwe mu mashiwi ya kwa Yesu aya kuti: “Ukufuma pa nshiku sha kwa Yohane Kabatisha ukufika pali nomba, ubufumu bwa mu mulu bwapatikishiwa, aba mupatikisha babupoka ku maka.” (Mateo 11:12) Pano itontonkanyo talili lya balwani ukupoka Ubufumu. Ukucila, ici cilosha ku mibombele ya abo aba pa mutande wa Bufumu. Uwasambilila Baibolo umo asosele ukuti: “Muli iyi nshila cilondolola ukutukusha kwa mupampamina, ukushingakanwa no kushombokela ubufumu bwa buMesia ubulepalamina.” Abasubwa tabanenuka mu kulenga Ubufumu ubwabo bwine. Imibombele yapalako iyapambana ilafwaikwa ku “mpaanga shimbi” pa kuti bengafikapo nga batekwa ba pe sonde aba Bufumu bwa kwa Lesa ubwa ku mulu.—Yohane 10:16.

17. Cinshi cikaba icakaniko ca abo basupila ifya kwelenganya fya ku calo?

¹⁷ Mu cine cine, tuleikala mu ciputulwa ca nshita icaibela. Abo abasupila ifya kwelenganya fya ku calo bushiku bumo bakabukila ku fya cine cine fyakaluka. Icakaniko cabo calilondololwa bwino muli aya mashiwi: “Ifyo uwa nsala alota, moneni, alelya, kabili ashibuka, mu nda mwabula akantu; ifyo uwa cilaka alota, moneni, alenwa, kabili ashibuka, moneni, atembuka, na ku mutima kwalangauka.” (Esaya 29:8) Mu cine cine, ifya kwelenganya fya ku calo tafyakabale afilenga uuli onse uwaikushiwa kabili uwa nsansa.

18. Mu cilolwa ca bucine bwa Bufumu, ni nshila nshi tulingile ukusupila, mu kuba na cilolelo nshi mu cilola?

¹⁸ Ubufumu bwa kwa Yehova bwa cine cine. Buleteka mu kucincila, ilintu ino micitile ya fintu iyabipa ilolenkene no bonaushi bulepalamina, ububelelela. E ico, langulukeni mu kukatama ukufunda kwa kwa Paulo ukwa kuti: “E ico twilaala nga bantu bambi, lelo tulole kabili tutekanye.” (1 Abena Tesalonika 5:6) Shi natusunge imitima yesu ne mintontonkanya iyatonta pa fya cine cine fya Bufumu na muli ifyo ukuipakisha amapaalo ya muyayaya. Kabili shi nacibe cakaniko cesu ukumfwa Imfumu ya ubo Bufumu ilesoso kuli ifwe ukuti: “Iseni, mwe bapaalwa ba kwa Tata, kwateni ubufumu ubwateyanishiwe imwe ukufuma pa kulengwa kwa pano isonde.”—Mateo 25:34.

[Futunoti]

Kuti Waasuka Shani?

◻ Cinshi caba ifya kwelenganya fya ku calo, kabili mulandu nshi tulingile ukufikaanina?

◻ Fya kumwenako nshi filanga ubutumpe bwa kuyobeka mu fya kwelenganya fya ku calo?

◻ Fishinka nshi fishinina bucine bwa kwa Kabumba, Icebo cakwe calembwa, Yesu Kristu, no Bufumu bwakwe?

◻ Ni shani fintu twingakosha icitetekelo cesu mu fya cine cine fya Bufumu?

[Icikope pe bula 15]

Ifya kwelenganya fya ku calo ilingi line filengwa no lunkumbwa lwa bukumu bwa ku mubili

[Icikope pe bula 16]

Ukushimikila imbila nsuma ni nshila imo iya kusupila ifya cine cine fya Bufumu

[Icikope pe bula 17]

Bushe ulesupila ifya cine cine fya Bufumu pa kusambilila Icebo ca kwa Lesa mu mukoosha?