Inshita Babelenga Baibolo na Fintu Banonkelamo

Ulucelocelo:

Abaupana babili, bonse bene abaya ku kubomba, bapingwilepo ukulabuuka amaminiti fye ikumi mu kubangilila cila lucelo no kubomfya iyo nshita ku kubelengela Baibolo capamo ilyo tabalakwankwanya ukufuma pa ŋanda. Cintu babelenga cibapeele citendekelo ca kulanshanya ukusuma pa numa lintu bafuma pa ŋanda.

Eluda umo mu Nigeria abomfya ukutantika kwe Sukulu lya Butumikishi bwa Teokrasi nge citendekelo ca kubelenga kwa Baibolo ukwa lupwa mu cinshingwa ŋanda cakwe. Balabelengamo iciputulwa cimo cila bushiku pa numa balanshanya ilembo lya bushiku, ilingi line ulucelo. Abana balalombwa ukulekanina mu kubelenga ulubali lwa ciputulwa cipeelwe. Lyene balalaalikwa ukuti bepushepo ifipusho pa fikomo fibelengelwe.

Namayanda umo mu Japan ukutula 1985 alabelenga Baibolo onse umuku umo mu mwaka. Ukutantika kwakwe kwaba kwa kubelenga pa maminiti 20 ukufika ku 30 ukutendeka pa 05:00 hrs. cila bushiku. Ukukuma ku kunonkelamo, atila: “Icitetekelo candi calikoshiwa. Cilangafwako ukulaba ku kulwala kwandi no kutontomesha pe subilo lya Paradise.”

Nkashi uwaba painiya pa myaka 30 lelo uo umulume wakwe ashaba ni Nte ashibuka pa 5 koloko akacelo kamo na kamo ku kubelenga kwakwe Baibolo. Ukutantika kwakwe kufwaya ukubelenga mupepi na mabula yane ukufuma mu Amalembo ya ciHebere, icipandwa cimo mu Amalembo ya Bwina Kristu aya ciGreek, ne cikomo cimo ukufuma mu Amapinda. Alabelenga Baibolo cila mwaka ukutula mu 1959. Atila: “Pamo nge cafuma mu kubelenga kwandi, ndayumfwa ukuba uwatemwikwa kuli Yehova . . . Ndakoseleshiwa, ukusansamushiwa, no kulungikwa.” Alundako ati: “Ukubelenga Baibolo ciba kwati Yehova alesumba mu bumi bwandi akasuba kamo na kamo.”

Nkashi uwasambilile icine mu calo umo imibombele ya Nte sha kwa Yehova yabindilwe na kabili akwete umulume uwalekaanya ifisumino fyakwe. Alaba na maka ya kubelenga Baibolo ukufuma pali Cimo ukufika pali Cisano, pa kati ka 06:00 hrs. na 07:00 hrs. Ici calimupeelako ubukose bwa lwa nkati. Ukubelebesha pa fintu ukubelenga kwakwe kwamwambukila, atila: “Tusambilila ukutemwa Yehova na Yesu no kwikala mu nsansa, nangu fye lintu kuli impika na mafya, ukwishibo kuti amalayo ya kwa Yehova tayafilwa.”

Nkashi umo uwasangilwe kwi Sukulu lya Mulimo wa Bupainiya aali uwapampamina ukubombela pa kufunda ukwapeelwe kulya ukwa kulenga ukubelenga kwa Baibolo ukuba cibelesho ca cila bushiku. Pa kubalilapo fye, aali na maka ya kubelenga pa kati ka 05:00 hrs. na 06:00 hrs. Lintu ukwaluka kwa ncito kwapumfyenye iyo mitantikile, ayalukile ku kubelenga pa kati ka 09:00 hrs. na 10:00 hrs. Lintu imibele imbi iya kusonsomba yaishileko, atila, “Natwalilile ukulateululo kutantika kwandi ukulingana ne mibele.”

Mu Nshita ya Kasuba:

Abana nkashi babili ababa filundwa fya lupwa lwa Bethel mu Brazil balikwata umwata wa kubelengela Baibolo capamo mupepi na maminiti 20 ubushiku bumo na bumo pa numa ya ca kulya ca kasuba. Balibelenga Baibolo onse mupepi ne miku 25; lelo balemba abati: “Lyonse tulasangamo ifipya, e co ukubelenga Baibolo takuba ukwa kutendusha.”

Nkashi umushimbe mu Japan ailwike ukuti nangu cingati akushiwe nga Nte, taishibe Amalembo bwino; lintu abele painiya, apampamine pa kulabelenga Baibolo lyonse. Nomba abelenga ukutantika kwa mwi Sukulu lya Butumikishi bwa Teokrasi lintu aleya ku cipatala ku kundapwa ubushiku bumo mu mulungu. Pa numa, ku ŋanda, alakonkeshapo no kusapika. Ukulola ku mpela ya mulungu, alalundapo kubelenga kwa Baibolo, ukusala amabuuku ukulingana ne fyo yatanteme pa kulembwa.

Kalume wa myaka 13 uyo kale kale abelenga Baibolo onse imiku itatu pali ino nshita alebelenga icipandwa cimo cila bushiku lintu ainuka ku sukulu. Ici, nga fintu alanda, calimwaafwa “ukucililako ukutemwa Yehova.”

Nte umo uushikwata inshita pa mulandu wa kuti alabomba, ni eluda, aba mulume, kabili wishi, alakutika ku makaseti lintu ali pa bulendo mwi shitima. Lyene ku ŋanda alabelenga pa lwakwe ifyebo fimo fine.

Mu kusansha ku kubelenga kwa pa lwakwe, painiya umo mu France alakutika ku makaseti ya Baibolo lintu alepekanya ifya kulya, lintu ali muli motoka, lintu alepita mu mafya, nelyo ku musamwe fye.

Painiya wa myaka ya bukulu 21 mu Japan ebukisho kuti nyina apampamine pa kuti alebelengako ifya ku mupashi ubushiku bumo na bumo, kabili alibelenga Baibolo cila bushiku ukutula apo abelele ne myaka itatu, nangu cingati te lyonse abelenga pa nshita imo ine. Pa numa ya kubelenga iciputulwa cintu asalile kuli ubo bushiku, alashininkisho kuti abelengamo na kabili ifikomo fya mpikwe, kabili lyene ukubuulako amaminiti yanono ukupituluka mu fintu abelengele lwa mu muntontonkanya.

Nte umbi, painiya, alibelenga Baibolo onse mupepi ne miku ikumi mu myaka 12 iyapita. Umulume wakwe tasumina, e co atantikila ukubelenga kwakwe icungulo kasuba.

Icungulo bushiku:

Eluda umo kabili painiya wa nshita yonse mu Japan uubelenga muli Baibolo ubushiku lyonse pa ntanshi talasendama alicite fyo pa myaka cinekonsekonse iyapita. Atila: “Nalitemwa maka maka amalembo ayalangilila fintu Yehova atontonkanya, ifyo ayumfwa pa fintu, na fintu abomba ne mibele. Pa kwetetula pali aya malembo, nalyafwiwa ukulenga ukutontonkanya kwa kwa Yehova ukuba ukwandi no kwaafwako bamunyina na bankashi aba Bwina Kristu ne filundwa fya lupwa lwandi.”

Eluda umo mu France alibelenga Baibolo iawala limo icungulo bushiku cimo na cimo ukutula 1979. Ilingi line alatantika amabupilibulo yasano nelyo mutanda pa ntanshi yakwe no kulalinganyako. Atila ukubelenga kwakwe ukwasakamanisha kwalimwaafwa ukukutuluka “ifya kubomfya ubwishibilo bwa Baibolo mu mibele ya bushiku no bushiku.” Ici na kabili calimwaafwa ukucilapo kubo wa kufumamo cimo lintu alepeela ukufunda ukufuma mu Malembo.

Pa myaka 28 iyapita, munyina umo mu Nigeria alicipange cibelesho ukubelenga mu cungulo Ilembo ilipeelwe mu katabo ka Ukubebeta Amalembo Cila Bushiku ku kulanshanya ulucelo lukonkelepo. Mu kulunda pali ico, alabelenga icipandwa conse umufumine ilembo lya bushiku. Pa numa ya kuupa, alitwalilile ne ci cibelesho, ukubelenga no kulanshanya ifyebo no mukashi wakwe.

Umupungwe umo uo abafyashi bakwe tabali ni baNte alicipange cibelesho ukubelenga pa maminiti yasano ukufika kwi kumi lyonse ubushiku pa ntanshi talasendama. Ayo yaba maminiti yaumo mutengo kuli wene, kabili alapepa pa ntanshi na pa numa ya kubelenga. Ubuyo bwakwe bwaba kwishiba ubukombe ubo Yehova atungulwile umo umo uwa bakalemba ba Baibolo ukulemba.

Munyina waupa umo, uwaba mu mulimo wa pa Bethel, atila alapwisho kubelenga Baibolo umuku umo mu mwaka pa myaka cinekonsekonse iyapita. Abelenga pa maminiti 20 ukufika kuli 30 ilyo talaya ku busanshi ubushiku. Nangu fye ni lintu anakile nga nshi, alasango kuti nga aya ku kusendama ukwabulo kubelenga, alafilwo kusendama. Ali no kwima no kusakamana uko kukabila kwa ku mupashi.