Baibolo—Intulo ya Cisansamushi ne Subilo mu Calo ca Macushi
1 Ici calo cabika umutundu wa muntu pe samba lya kutitikisha kukalamba no kukabila kwa cisansamushi ne subilo. Baibolo e ntulo yeka fye iya cisansamushi cine cine. Itambika isubilo ilya calo cipya ica bulungami. (Rom. 15:4; 2 Pet. 3:13) Icitabo ca Insight, Volyumu 1, ibula 311, citila: “Ukwabula Baibolo tatwingeshiba Yehova, tatwingeshiba ubunonshi bwawamisha ubufuma mwi lambo lya cilubula ilya kwa Kristu, kabili tatwingomfwikisha ififwaikwa ififwile ukufikwapo pa kuti tunonke ubumi bwa muyayaya mu Bufumu bwa kwa Lesa ubwa bulungami nelyo pe samba lya buko.”
2 Mu November tukaalwila ukusakamana kwaibela ku lubali Icebo ca kwa Lesa, Baibolo, cibomba mu kwaafwa abantu ifyo bengabomba no kutitikisha kwa ici calo. Tukalatambika New World Translation of the Holy Scriptures mu kuba ne citabo ca Baibolo—Cebo ca kwa Lesa Nelyo ca Muntu? Cinshi twingasosa icingaafwa abantu abakongamina ku bulungami ku kutesekesha ubucindami bwa Baibolo?
3 Pa numa ya kuilondolola, kuti wasosa ifyapale fi:
◼ “Mu kupalako mwalisumina ukuti twalishingwa ne mpika isho shitupokolola umutende wa muntontonkanya wesu. Ni kwi twingasanga ukufunda kubomba ku kutulangisha ifya kubomba ne shi mpika? [Muleke ankuleko.] Nalisanga Baibolo ukuba iya kwebekesha pantu itusambilisha ifya kuba aba nsansa. [Belenga Luka 11:28.] Imifwaile ya mulimo wesu yaba kukoselesha abantu ukubelenga Baibolo no kunonkelamo mu kufunda kwa iko. Ici citabo ca kwaafwa ukusambilila Baibolo icileti, Baibolo—Cebo ca kwa Lesa Nelyo ca Muntu?, kuti camwaafwa ukucite fyo. Moneni ifyo cisosa pa lwa calenga impika ishingi ishaba mu calo. [Belenga sentensi wa cibili uwa paragrafu 9 pe bula 187.] Nga mwingatemwa ukubelenga ici citabo, kuti natemwa ukumushiila uyu kope.” Lumbula umutengo wa ciko.
4 Limbi kuti wasalapo ukubomfya imitununukile yayanguka pamo nga iyi:
◼ “Tuli abasekelela mu kukoselesha umucinshi ukalamba uwa ku Cebo ca kwa Lesa, Baibolo. Kuti natemwa ukumupeelako kope wa uyu trakiti uleti, Umulandu Wingacetekela Baibolo. Alelondolola umulandu twingalolesesha kuli Baibolo ku kusanga isubilo lya cine cine ilya calo cawaminako. [Alukila kwi bula 6, no kubelenga Ilumbo 37:29 capamo na paragrafu wa kulekelesha.] Mukaibelengele uyu trakiti, kabili ilyo nkabwelako, kuti mwaisanjeba ifyo muletontonkanya pa lwe subilo ilyo Baibolo itambika.”
5 Bakasabankanya bamo kuti pambi bafwaya ukubomfya iyi mitununukile ya kulungatika ku kutampa isambililo lya Baibolo:
◼ “Namutandalila ku kumutambika isambililo lya Baibolo ilya mu ŋanda ilya pa fye. Baibolo yalipuutwamo na Lesa, kabili ukufunda kwa iko kuti kwatwaafwa ukulungika ifintu. New World Translation of the Holy Scriptures iyalembwa mu ciNgeleshi ca muno nshiku yapangilwa ku kuibomfya mwi sambililo lya pa lwenu. Amamilioni ya bakabelenga ba Baibolo ukushinguluke calo baliitemwa. Lekeni mu kwipifya mulangilile ifyo mwingaibomfya. [Kupukula pe bula 1653, kabili alwila ukusakamana kuli 23A. Ukulingana no buseko bwalangishiwa, belengeni limo nelyo yabili amalembo yaloshiweko no kulanshanya icishinka cilipo. Londolola ifyo ukubelenga amalembo yaloshiweko kukasokolola ifyo Lesa afwaya ukupwishishisha ukupitila mu Bufumu bwakwe.] Kuti natemwa ukubwela no kulanshanya ili subilo lya Bufumu mu kulundapo.”
6 Baibolo yaba ni ntulo ya cisansamushi ne subilo pamo pene ne cine icingatutungulula ku bumi bwa muyayaya. (Yoh. 17:3, 17) Ukwakana ubwishibilo bwa Baibolo na bambi kulatemuna Yehova, “uufwaya abantu bonse ukupusuka.”—1 Tim. 2:4.