Umweshi wa August Ukaba Mweshi wa Kubombeshamo!

1. Ni kampeni nshi iyaibela iikabako isonde lyonse ilyo tulepalamina ku mwaka walenga 100 ukutula apo Ubufumu bwatendekela ukuteka?

¹ Apo tulepalamina ku mwaka walenga 100 ukutula apo Ubufumu bwa kwa Lesa bwatendekela ukuteka, nacilinga ukuti tukacindike Yehova ukupitila muli kampeni yaibela! Mu mweshi wa August tukaba no mulimo wa kusabankanya trakiti iipya iileti Ni kwi Twingasanga Amasuko ku Mepusho Yacindama Sana? Iyi trakiti ilekoselesha abantu ukulafwaya amasuko muli Baibolo kabili ilelondolola ifyo Webu saiti ya jw.org ingabafwa ukusanga ifyasuko ku mepusho ya fyaba mu Baibolo.

2. Kuti twacita shani pa kuti ‘tukekatishe ishiwi no kulumbanyako Yehova’ mu August?

² Ikatisheni Amashiwi pa Kulumbanya Yehova: Pa kwafwa bakasabankanya ukubombesha muli uyu mweshi, kuli amapekanyo yaibela ku balefwaya ukubombako bupainiya bwa kwafwilisha. Mu August, bakasabankanya ababatishiwa abakabombako bupainiya bwa kwafwilisha bakasuminishiwa ukubomba ama-awala 30. Apo umweshi wa August ukwete baCisano 5, Ifibelushi 5 e lyo na ma Sunday nayo 5, bakasabankanya abengi ababomba e lyo na baya ku sukulu bakakwata ishuko lya kubombako bupainiya bwa kwafwilisha. Nga mwalikwata uo musambilisha Baibolo nangu umwana uulelunduluka uwingatemwa ukuba kasabankanya, mulingile ukulanda bwangu na kampanya we bumba lya baeluda. Kuti cawama sana nga ca kuti aba musango uyu baba bakasabankanya muli uyu umweshi ilyo kukaba ukubombesha. Nangu ca kuti bapainiya ba nshita yonse bamo balatuushako mu August pa numa ya ku kumanisha ama-awala ya pa mwaka, limbi kuti nabo bene bayalula imibombele yabo pa kuti bakabombeko nga nshi iyi kampeni yaibela. Ino e nshita iyo indupwa balingile ukulanshanya pa fyo ‘bakekatisha ishiwi no kulumbanyako Yehova’ ilyo kukaba iyi kampeni mu August.—Esra 3:11; Amapi. 15:22.

3. Finshi tule-enekela muli iyi kampeni iyaibela?

³ Nangu ca kuti twalibombapo ama kampeni ya musango uyu, tule-enekela ukuti iyi yena ikacila pali yonse. Bushe te kuti ciwame ukuti mu August tukakwate ifipendo ifipya ifya bakasabankanya, ama-awala, e lyo na bapainiya bakwafwilisha? Ilyo tukalafika ku mpela ya mwaka wa mulimo uwa 2014, tulepepela ukuti Yehova akapaale ukubombesha kwa bantu bakwe isonde lyonse pa kuti umweshi wa August ukabe mweshi wa kubombesha ukucila pa myeshi yonse!—Mat. 24:14.