Jeova i Tekemaot Mi Long Olgeta Trabol Blong Mi

Jean-Claude François i talem stori ya

From we mi no save go agensem tingting we mi trenem folem baebol, mi stap long bitim 12 prisen blong seven yia. Nating se mi safa bigwan, be mi stanap strong, mo mi ting se god i blesem mi. Bambae mi eksplenem olsem wanem.

LONG Jenuware 9, 1937, mi mi bon long taon ya Algiers long kantri blong Aljeria. Long taem ya, Franis i rulum Aljeria, mo papa blong mi i wan haeman long ami blong Franis. Sam samtaem, hem i aot long mifala blong plante manis, i go wok long Ijip, Irak, Lebanon, mo Siria. Taswe, hem i no spenem plante taem wetem ol faef pikinini blong hem.

Mi mi laekem skul tumas mo mi kasem ol gudfala mak. Be mi tingting plante long ol kwestin olsem: ?From wanem yumi ded? ?Sipos God i gat olgeta paoa mo i gud olgeta, olsem wanem ol nogud fasin oli stap? Mi no save faenem ansa blong ol kwestin ya. Mi wantem save tu, olsem wanem ol laef samting oli stat. I luk olsem se tingting blong man ya Darwin long saed blong evolusena i stret, ale sloslo mi mi lusum bilif blong mi long God.

!Mi Faenem Ansa Blong Ol Kwestin Ya!

Fren blong mi we nem blong hem Georges, hem i kam wan Witnes blong Jeova. Long yia 1954, hem i givim wan smol buk long mi we nem blong hem Evolution Versus the New World.b Wantaem nomo, mi flatem buk ya. Hem i soemaot from wanem evolusen i no stret, mo olsem wanem ol samting blong bifo we ol man oli digimaot long graon oli pruvum se tok blong Jenesis i tru, taem i talem se God i wokem evri samting “stret folem kaen blong olgeta.” (Jenesis 1:​12, 25, NW) Be mi stap tingbaot yet, from wanem ol nogud fasin oli stap.

Georges i wan paenia, i min se hem i prij fultaem mo i spenem bighaf blong taem blong hem blong tijim ol man long Baebol. Be mi mi neva ridim Baebol. Maet Georges nao i save ansarem ol kwestin blong mi. Mi go luk hem long haos blong ol paenia, mo mi kasem ansa we Baebol i givim long plante kwestin blong mi. Afta, mi stat blong stadi long Baebol mo mi haremgud tumas long stadi ya. Kam kasem tede, mi neva kam taed blong stadi long Tok blong God blong kasem ol sas save insaed long hem we i mekem bilif blong mi i strong.​—Ol Proveb 2:​1-5.

Mi stat go long ol Kristin miting tu. Oli mekem ol miting long wan rum aninit long wan restoron long medel blong Algiers. Ol Witnes oli welkamem gud mi, mo i no longtaem mi stap go long olgeta miting. Wan dei oli talemaot wan miting we bambae oli mekem long wan narafala ples, ale mi go. Taem mi kamtru long ples ya, mi kasem save se ol Witnes oli stap joen long ples ya blong go prij. (Ol Wok 20:20) Be nating, mi mi joen wetem olgeta, mo hemia nao fastaem we mi mi go prij.

Namba tri taem we mi go prij, mi toktok long ol man. Long wan haos, mi no save faenem stret vas blong Baebol we mi wantem soem long man. Man ya i talem se: “Yangfala, i moagud we fastaem yu kam naf blong tijim ol man, afta, yu kam luk mifala.” Nao hem i satem doa. Mi harem nogud, mi sidaon long wan stul mo mi lukaot vas ya. Smoltaem biaen, mi faenem, ale mi gobak luk man ya mo mi soem vas ya long hem.

Long Maj 4, 1956, mi mi baptaes blong soemaot se mi givim laef blong mi i go long God. Sikis manis biaen, mi mas mekem wan strong desisen. ?Bambae mi mekem wok blong fultaem paenia, no bambae mi kam wan skul tija long wan ples long medel blong Aljeria mo spenem smoltaem nomo long wok blong prij? Mi jusum wok blong paenia.

Papa blong mi i kros we i kros. Hem i holem wan naef long trot blong mi, mo i givim oda long mi se evri dei, mi mas kambak long haos long sapa. Hem i talem tu se bambae mi no moa save kakae long haos, nating we mi rere blong pem kakae blong mi. Taswe, mi mas aot long haos evri moning we mi no kakae nating, long dina mi kakae wetem ol paenia, mo long sapa mi kakae sanwij bifo we mi kambak long haos.

Haed Long Ol Bom Mo Ol Bolet

Aljeria i stap faet agensem Franis blong traem kasem independens. Ol bom oli stap bosta olbaot long taon ya Algiers, mo plante faet i kamaot from. Long wan manis i gat bitim 100 bom i bosta, long ol bas, ol ba, mo ol bigfala stad. Wok blong prij i no isi. Ol man oli fraet blong openem doa blong olgeta. Mo klosap oltaem, i tabu blong man i wokbaot long naet, mo oli jekem ol pepa blong ol man wetem ol narafala samting tu we oli stap karem.

Long Sande, Septemba 30, 1956, mi wetem sam narafala paenia mifala i stap klinim haos miting blong mifala, nao wan bom i bosta long restoron antap. Plante man oli ded, mo plante narafala oli karekil. I gud we mifala evriwan i oraet. Long Disemba, mi stap prij wetem wan Kristin sista long wan rod we fulap trak oli ron long hem. Wan trak i spid i kam bitim mitufala, mo i sutum ol bolet oli kam long bigfala hip blong man long rod. Mitufala i resis i go long doa blong wan haos, mi pusum sista ya i godaon long graon mo mi tu mi slip daon. Ol bolet oli pas antap long hed blong mitufala. Afta long samting ya, mifala evriwan i lukaotgud taem mifala i stap prij.

Mi No Wantem Karem Masket

Long Maj 1, 1957, oli singaot mi blong joen long ami. Tingting blong mi we mi trenem folem ol Kristin rul, i no save letem mi blong mi karem masket mo faet. Mi prea long Jeova blong i givim strong tingting long mi blong toktok long ol haeman. Mi askem long hem tu blong i mekem se mi no rao wetem papa blong mi. Mi glad tumas taem oli talem long mi blong go luk ol haeman long taon blong Lille long Franis, we i stap longwe long ples blong mi.

Afta sikis dei, mi kamtru long Strong Taon blong Lille, wan sefples blong haed we oli bin wokem long ol yia 1600, taem King Louis 14 i stap rul. Mi yusum Baebol blong eksplenem long ol haeman blong ami from wanem mi no save joen long faet. Oli sakem mi long kalabus. Wan moning, ol gad oli pulumaot mi long kalabus, oli jekemgud evri samting we mi karem, nao oli faenem wan smol Baebol. Oli pusum mi mi slip daon long bel blong mi long sno, oli sakem Baebol blong mi klosap long mi, mo oli stikim hed blong mi strong wetem handel blong masket, blong mi no save leftemap fes blong mi long sno. Oli fosem mi blong stap olsem blong haf aoa. Biaen, ol gad oli givimbak Baebol blong mi. Mi glad tumas, mo Baebol ya i stap wetem mi kasem tede. Be plante yia biaen, bel blong mi i soa yet from raf fasin we oli mekem long mi long dei ya.

Afta we sam dei i pas, komanda blong ami i ridimaot wan leta we papa blong mi i sanem long hem. Leta ya i talem se: “Yu mas fosem boe ya blong obei. Yu mas brekem stronghed blong hem.” Be mi no save jenisim desisen blong mi. From samting ya haeman blong ami i sakem mi mi go long wan rum we i tudak olgeta. Mi slip long wan plang mo mi kavremap mi wetem wan smol blangket. I no gat tolet, ale mi tolet long kona blong rum ya nomo. Mi no save swim, brasem tut blong mi, mo wasem plet we mi kakae long hem. Tu wik biaen, oli sanem mi mi go long Fresnes presin long Paris.

Long sikis yia, kot i panisim mi fo taem, mo oli putum mi long 14 defren presin. Long koltaem blong wan yia mi stap long Fontevrault, hemia wan olfala haos blong ol pris long Loire Vali we oli bin wokem long ol yia 1100 mo oli yusum olsem wan presin. Taem mi kamtru long ples ya oli tekemaot olting blong mi. Mi askem olgeta bakegen mo bakegen sipos mi save holem Baebol blong mi. From samting ya, ol gad oli sakem mi long wan rum we mi stap mi wan nomo blong wan manis. Nao wan narafala enemi i kasem mi, hemia kolkol, ale mi stat blong traot blad.

Oli tekem mi mi go long wan presin we i gud moa lelebet, hemia Château de Turquant, klosap long Saumur. Long ples ya, ol presina oli wok long haos blong ol jaj we oli ritae finis. Biaen, wan long ol presina, Ahmed Ben Bella, i kam presiden blong Aljeria. Blong plante manis mi gohed blong prij long hem. Wan dei hem i talem se: “Yu yu bon long Algiers, be yu stap kalabus from we yu no wantem karem masket blong sutum ol man Aljeria.” Hem i respektem mi from desisen we mi tekem.

Kasem Paoa Blong Winim Traem Bakegen

Mi mi kam sik moa, dokta i talem se mi gat tibi, nao oli sanem mi mi go long wan hospital long saot blong Franis. Plante manis mi slip long hospital ya. Dokta i talem se oli mas katem mi blong tekemaot wan saed waet leva we sik i stap long hem. Mi mi talem se i oraet nomo, be mi no save ‘tekem blad.’ (Ol Wok 15:29) Dokta i kros we i kros, i talem se bambae i no katem mi. Hemia i namba sikis yia blong mi long kalabus.

Mi aot long hospital ya long medel blong koltaem. Klos we mi stap werem, hemia nomo klos we mi gat. Be Jeova i sanem Brata Adolphe Garatoni blong givhan long mi olsem we i bin sanem Onesiforas blong givhan long aposol Pol. Brata ya i tekem mi mi go long haos blong hem mo i “mekem mi mi strong.” (Kolosi 4:​11, NW; 2 Timoti 1:​16-18) From kaen fasin blong hem mo from gudfala wok blong wan dokta long saot blong Franis, sloslo bodi blong mi i kamgud lelebet.

Long taem ya, mi mi gat sam bigfala kaon mo mi nidim mane. Mi no save se bambae mi pem ol kaon ya olsem wanem. Wan dei, wan woman we mi no save hem nating, i kam luk mi. Hem i talem se: “Mi mi wan loea. Presiden blong Aljeria, Masta Ben Bella, i sanem mi blong givim samting ya long yu.” Hem i givim wan envlop long mi we i gat bigfala mane insaed long hem, i bitim wanem we mi nidim blong pem ol kaon blong mi. Mi talem tangkiu wetem fulhat blong mi long Jeova, from we hem i ‘ansa long prea blong mi.’​—Ol Sam 65:2.

Ol Nambawan Blesing Mo Wan Naesfala Fren Blong Wok Wetem Mi

Taem mi kamaot long kalabus, mi stat blong prij fultaem bakegen. Long kongregesen blong Melun klosap long Paris, mi mitim wan wido we i gat 35 yia blong hem, nem blong hem Andrée Morel. Hasban blong hem we hem tu i wan Witnes, i ded long wan aksiden long trak. Ale long Septemba 26, 1964, mitufala i mared. Long Ogis 1, 1965, mitufala i stat long wok blong spesel paenia. !Nating se bodi blong Andrée i no strong, hem i prij fultaem blong 28 yia!

Long yia 1967, mi mi stat long wok blong seket elda, i min se mi goraon long ol kongregesen blong ol Witnes blong Jeova blong leftemap tingting blong olgeta. Mitufala i wok long saot blong Franis, stat long Bordeaux go kasem Monaco, mo blong wan yia mitufala i wok long Paris. From we mitufala i siksik, wok ya i no isi. Be Jeova i givhan long mitufala blong mekem wok ya blong 20 yia. Long 1986, mitufala i mekem wok blong spesel paenia bakegen.

Laef Blong Mi Naoia

Naoia, klosap mi mi gat 70 yia blong mi. Bakegen mo bakegen mi luk we Jeova i mekem yumi naf blong winim ol traem we oli kasem yumi. I tru, yumi kasem haf paoa blong yumi taem yumi stadi long Tok blong hem. Mi mi traehad evri yia blong ridim Baebol fulwan.​—Aesea 40:​28-31; Rom 15:4; 2 Timoti 3:16.

Taem mi mo Andrée i luk ol man we oli lesin long gud nius mo givim laef blong olgeta i go long Jeova, samting ya i leftemap tingting blong mitufala. Long ol yia we i pas, mitufala i luk 70 man mo woman we mitufala i mekem Baebol stadi long olgeta oli givim laef blong olgeta i go long Jeova. Samting ya i givim bigfala glad we i stap olwe. Taem mitufala i tingtingbak long laef blong mitufala, mitufala i gat sem filing olsem man blong raetem Sam ya: “Taem ol man oli stap spolem mi, mi singaot i go long Hae God, nao hem i harem mi, i tekemaot mi long olgeta trabol blong mi.”​—Ol Sam 34:6.

[Futnot]

[Tok blong pija long pej 13]

Mi stap kalabus long Château de Turquant, klosap long Saumur

[Tok blong pija long pej 15]

Mi wetem woman blong mi long 1967, mo naoia