!Yumi Stanap Strong Oltaem Long Bilif!
Ol Stampa Poen Blong Fas Pita
OL WETNES blong Jeova oli stap fesem plante samting we oli kam traem mo mekem trabol long bilif blong olgeta. Long sam kantri, oli mekem wok blong talemaot gud nyus, nating we ol man oli mekem bigfala trabol long olgeta. Antap bakegen, Devel Setan tu i wok strong blong mekem se olgeta oli no moa fren gud wetem God. Be Setan i no save win from we Jeova i mekem ol man blong hem oli kam strong—yes, hem i mekem olgeta oli kam strong long bilif bakegen.
Aposol Pita i gat gudfala wok blong ‘mekem ol brata blong hem oli strong bakegen’ “from plante samting oli stap kam blong traem [olgeta].” (Luk 22:32; 1 Pita 1:6, 7) Hem i mekem olsem long faswan leta blong hem we hem i raetem raonabaot long ol yia 62-64 K.T.a long Babilon. Long leta ya, Pita i halpem ol man Jyu mo ol hiten man we oli kam Kristin blong oli stanap strong agens long ol trik blong Setan mo oli gohed nomo “blong stanap strong long bilif.” Hem i givim advaes long olgeta, mo i leftemap tingting blong olgeta. (1 Pita 1:1, 2; 5:8, 9) Tede, Devel Setan i gat smol taem nomo blong hem i stap, mo ol trik blong hem oli nogud tumas. From samting ya, ol man blong Jeova tede oli mas tingtinggud long ol tok we God i givim long Pita.
Yumi Folem Ol Loa Blong God Long Laef Blong Yumi
Nating se yumi gat hop blong go long heven no blong stap long wol, be bilif blong yumi i mas halpem yumi blong stanap strong taem i gat trabol. Mo olgeta samting we yumi stap mekem, yumi mas mekem olgeta long fasin we God i wantem. (1:1 kasem 2:12) Olgeta we oli gat hop blong go long heven oli stap glad nomo taem we oli kasem trabol from we ol trabol we oli kasem oli mekem bilif blong olgeta i kam strong moa oltaem. Olgeta ya oli olsem haos blong God long saed blong speret, wan haos we faondesen blong hem i Kraes. Taswe oli mekem sam sakrafaes long saed blong speret we God i glad long ol. Mo oli gat gudfala fasin blong leftemap nem blong God.
Taem yumi joen wetem ol narafala man, yumi mas folem oltaem ol loa blong God. (2:13 kasem 3:12) Pita i soemaot se yumi mas ona long ol haeman. Ol man blong wok oli mas ona long masta blong olgeta, mo ol waef long hasban blong olgeta. Maet gudfala fasin blong wan Kristin woman bambae i pulum man blong hem we i no gat bilif, blong hem i kam long trutok. Mo wan hasban we i stap long trutok i mas ‘ona long waef blong hem, from we hem i no strong olsem hem.’ Ol Kristin oli mas gat sore long ol brata, oli mas laekem olgeta, mo oli mas mekem i gud, we pis i stap oltaem long medel blong olgeta.
Sipos Yumi Stanap Strong, Yumi Save Kasem Blesing
Ol tru Kristin we oli stanap strong taem oli kasem trabol, God bambae i blesem olgeta bigwan. (3:13 kasem 4:19) Sipos yumi kasem trabol from we yumi mekem stret fasin, yumi save harem glad tumas. Blong lidim yumi i go long God, Jisas tu i harem nogud long bodi blong hem. Taswe yumi no moa mas laef blong mekem ol samting we bodi blong yumi nomo i wantem. Sipos yumi stanap strong taem yumi kasem trabol, bambae yumi glad nomo taem Jisas i kamtru. Sipos yumi kasem trabol from we yumi karem nem blong Jisas, no from we yumi disaepol blong hem, yumi save harem glad. Samting ya i pruvum gud se Jeova God i givim speret blong hem long yumi. Taswe taem yumi kasem trabol from we yumi mekem ol samting we God nomo i wantem, yumi mas gohed oltaem blong trastem hem mo blong mekem ol samting we oli gud.
From we yumi Kristin, yumi mas mekem gud ol wok we yumi kasem mo oltaem, yumi mas stap aninit long han blong Jeova. (5:1-14) Ol elda oli mas glad nomo blong lidim ol sipsip blong God mo yumi evriwan yumi mas putum ol wari blong yumi long Jeova, from we yumi luksave we hem i lukaotgud long yumi. Yumi mas rere oltaem blong agensem Setan mo yumi no mas letem ol traem we yumi kasem oli mekem hat blong yumi i kam slak, from we ol narafala brata blong yumi tu oli kasem ol sem trabol we yumi kasem. Yumi mas rimemba oltaem se Jeova God nao i stap mekem yumi kam strong moa mo hem nao i mekem se yumi naf blong stanap strong long fasin blong bilif.
[Futnot]
a K.T. i min se Kristin Taem.
[Bokis blong pija long pej 31]
Ol Klos Mo Fasin Blong Hea Blong Ol Woman: Pita i givim advaes long ol Kristin woman, se: “Mo i nogud yufala i stap fasem hea blong yufala mo yufala i stap putum gol jen mo ol flas klos blong yufala blong mekem yufala i kam gudwan long fes blong ol man. I moa gud yufala i mekem tingting blong yufala i stret long fes blong God. I moa gud yufala i gat pis long laef blong yufala, mo yufala i kwaet woman, nao yufala i gudwan we bambae yufala i no save kam nogud. Mo fasin ya i gud tumas long fes blong God.” (1 Pita 3:3, 4) Long faswan handred yia, ol hiten woman oli gat spesel fasin blong kom, oli fasem hea blong olgeta mo oli tantanem blong mekem flas, mo oli stikim ol gol samting long hem. Long sem fasin tede, plante woman oli mekem flas—Fasin olsem i no stret long ol Kristin. (1 Timote 2:9, 10) Pita i talem se i nogud ol woman oli werem ol “flas klos.” Be i klia we Pita i no wantem blokem fasin blong werem klos, from we olgeta man oli nidim klos. Sam kaen klos nomo we oli blong flas, oli no stret long ol Kristin. Sem mak nomo, i no olgeta fasin blong flasem ol woman we oli rong. Sam gudfala woman blong bifo we oli wosip long God oli putum bidbid we oli wokem long gol mo selva. (Jenesis 24:53; Eksodas 3:22; 2 Samuel 1:24; Jeremaea 2:32; Luk 15:22) Be wan Kristin woman i mas waes. I nogud hem i putum ol samting we oli defren tumas, nao ol samting ya oli mekem man i sapraes. I nogud hem i werem klos blong pulum ae nomo. Mo hem i no mas bitim mak taem hem i pentem ae mo maot blong hem. Advaes we Pita i givim long saed ya i olsem: Woman i mas tinghae long ol samting we i stap insaed long hat blong hem, be i no long ol flas samting we hem i putum long bodi blong hem nomo. Blong hem i rili naes, wan woman i mas putum ol klos we i stret gud mo hem i mas fraet gud long God.—Proveb 31:30; Maeka 6:8.
[Foto Credit line]
Israel Department of Antiquities and Museums; Israel Museum/David Harris