?Yu Yu Rimemba?
?Yu bin haremgud long ol save we yu ridim long ol Wajtaoa we oli jes kamaot i no longtaem? Sipos yes, maet yu faenem se i gud blong tingbaot ol poen ya bakegen:
▫ ?I gat rod blong kasem trutok long saed blong skul?
Jisas Kraes i talem se: “Bambae yufala i save ol trutok, mo trutok ya bambae i mekem yufala i friman.” (Jon 8:32) Jisas i no talem nomo se i gat rod blong kasem trutok. Be hem i talem tu se yumi mas faenem trutok ya, mo yusum taem yumi wosip long God. Hem i talem long wan woman Sameria se: “Ol man blong mekem trufala wosip, bambae oli wosip long Papa long speret mo long trutok.” (Jon 4:23, NW)—4/15, pej 5.
▫ ?Hu ya Robert Estienne, mo olsem wanem hem i livim mak blong hem?
Robert Estienne i wan man blong prentem buk we hem i laef long ol yia 1500. Hem i givim ful laef blong hem long wok blong prentem Tabu Baebol, mo hem i traehad blong faenemaot ol stret tok blong Baebol, olsem ol man oli raetem fastaem. Fasin blong hem blong seraotem ol haf blong Baebol i go long ol vas we oli gat namba blong olgeta, hemia sem fasin we oli stap yusum yet tede long olgeta ples blong wol.—4/15, pej 10, 14.
▫ ?Olsem wanem fasin blong ridim Baebol evri dei i save givhan long yumi?
Evritaem yumi ridim Baebol, hem i gat moa mining long yumi, mo ol profet tok long saed blong ol las dei, oli wekemap tingting blong yumi moa, from ol samting we yumi stap luk, harem, mo fesem long laef blong yumi. Taem yumi kasem moa ekspiryens long laef, mo winim plante problem, yumi gat moa tangkyu long ol advaes blong Baebol. (Proveb 4:18)—5/1, pej 15.
▫ ?Olsem wanem blong rimemba ol vas blong Baebol?
Taem yu ridim Baebol, makem sam vas we yu wantem holem long tingting blong yu. Mo tu, yu save raetem olgeta long pepa, mo putum long ples we yu save lukluk olgeta evri dei. Taem yu stap traem blong lanem ol tok long ol vas ya, tingting dip long olgeta, mo yusum olgeta. Yu no mas traem blong lanem plante vas wantaem, be maet wan no tu vas nomo evri wik.—5/1, pej 16, 17.
▫ ?Gospel blong Luk i tokbaot wanem save we ol man blong raetem ol narafala Gospel oli no tokbaot?
Nating se plante haf blong Gospel blong Luk i sem mak long gospel blong Matyu, 59 pesen i no sem mak. Luk i tokbaot sikis merikel we ol narafala Gospel oli no tokbaot. Mo hem i tokbaot bitim 12 pijatok blong Jisas we ol narafala Gospel oli no tokbaot.—5/15, pej 12.
▫ ?Wanem nambawan laet blong trutok we i saenaot long 1935?
Long yia ya, ol man blong Jeova oli kasem save se bigfala hif blong man we Revelesen 7:9, 14 i tokbaot, i no namba tu grup blong man we oli go long heven, be hemia olgeta we oli gat hop blong laef long wol ya. (Jon 10:16)—5/15, pej 20.
▫ ?Wanem sam rod we oli wokgud, blong mekem man i haremgud taem hem i stap krae from wan we hem i laekem tumas i ded?
Lesin long hem. Talem ol tok we i mekem tingting i strong. Rere oltaem blong givhan. Tekem faswan step blong mekem wan samting blong givhan taem hem i nidim. Raetem wan leta no sanem wan kad blong leftemap tingting. Prea wetem hem. (Jemes 5:16) Gohed blong halpem hem.—6/1, pej 13, 14.
▫ ?Ol brata mo sista long saed blong speret, oli save mekem wanem long olgeta we sam memba blong famle blong olgeta oli no gat bilif, blong halpem olgeta blong stanap strong?
Oltaem, toktok long fasin we i leftemap tingting, tokbaot ol gudfala samting, mo yusum tok we i mekem olgeta oli haremgud. (1 Tesalonaeka 5:14) Samting ya i save mekem olgeta oli haremgud long bodi mo long tingting. Long stret taem mo taem i gat nid, tekem olgeta wetem yu long ol defren tiokratik wok blong yu mo taem yu joen wanples wetem ol narafala. Tingbaot olgeta long ol prea blong yu. (Rom 1:9; Efesas 1:16)—6/1, pej 29.
▫ ?Yumi save kasem wanem pei from longfala tingting we yumi soemaot long wok blong prij?
Longfala tingting i save halpem wan man we i stap talemaot Kingdom blong stanap strong longtaem, nating se ol man oli no intres no oli agensem hem. Ol Kristin minista we oli gat longfala tingting, oli no rao wetem ol man blong haos we oli kros, be oli naf blong givim wan ansa we i kwaet, no blong aot long haos long fasin we i kwaet nomo. Olsemia nao, pis mo glad blong olgeta i stap. (Matyu 10:12, 13) Mo tu, fasin blong olgeta i save pulum ol man we oli olsem sipsip blong oli lesin long mesej blong Kingdom.—6/15, pej 9.
▫ ?From wanem i impoten tumas blong save ol trutok blong Baebol?
Taem yumi save ol trutok blong Baebol, yumi kam fri long ol gyaman tok, gyaman hop, mo ol gyaman bilif we oli mekem man i fraet. Taem yumi folem trutok, hem i givim paoa long yumi blong stanap strong agensem ol hadtaem, mo i givim hop long yumi we i save mekem yumi naf blong stanap strong taem yumi kasem traem.—7/1, pej 8.
▫ ?Wanem bigfala wok we kongregesen blong ol tabu Kristin i tekemaot long han blong ol prapa man Isrel?
Jans blong talemaot paoa blong Jeova long medel blong ol nesen. (Aesea 43:21; 1 Pita 2:9)—7/1, pej 19.
▫ ?Wanem mining blong tok ya blong aposol Pita se man i mas ‘givim ona’ long woman blong hem? (1 Pita 3:7)
Hasban we i ona long woman blong hem i no mekem woman ya i sem mo i no daonem hem. Be, hem i soem long ol toktok mo fasin blong hem—taem tufala nomo i stap mo long fored blong ol narafala—se hem i tinghae long woman blong hem. (Proveb 31:10-31)—7/15, pej 19.
▫ ?From wanem yumi save talem se i soem lav taem Kristin kongregesen i putumaot wan man we i no wantem tanem tingting from sin blong hem?
Taem kongregesen i putumaot wan man, samting ya i soem lav long Jeova mo ol rod blong hem. (Ol Sam 97:10) Hem i wan fasin blong soem lav long olgeta we oli stap folem stret rod, from we i tekemaot wan man long medel blong olgeta, we hem i save spolem fasin blong olgeta. Mo tu, rod ya i mekem kongregesen i stap klin oltaem. (1 Korin 5:1-13)—7/15, pej 25.
▫ ?Tede, olsem wanem yumi save makemaot “slef ya we i stret mo waes” (NW), we Jisas i tokbaot long Matyu 24:45-47?
Bigfala samting we i makemaot olgeta, hemia wok we oli stap mekem blong givimaot ol buk we oli stanap long Baebol, mo blong tijim mo talemaot ‘gud nyus blong kingdom,’ mo tu, fasin blong olgeta blong folemgud Tok blong God, Baebol. (Matyu 24:14; 28:19, 20)—8/1, pej 16.