Gohed Blong Stap Glad Taem Yu Lukaot Long Wan We i Olfala o i Sik

1-2. ?Wanem tingting blong Jehova long olgeta we oli stap lukaot long wan we i olfala o i sik? (Ol Proveb 19:17) (Mo tu, yu luk ol pija.)

WAN brata blong Koria we nem blong hem Jin-yeol i talem se: “Mi mo waef blong mi i mared blong 32 yia finis. Long ol faef yia we i pas, mi nao mi lukaot long hem, from we hem i kasem sik ya Parkinson we i mekem se i had blong hem i muvum bodi blong hem. Mi lavem waef blong mi mo mi glad nomo blong lukaot long hem. Long haos, evri naet hem i slip long wan bed blong hospital, mo mi holem han blong hem taem mitufala i slip.”

² ?Yu yu stap lukaot long wan we yu lavem tumas, olsem perens blong yu, hasban o waef blong yu, pikinini blong yu, o wan fren? Sipos yes, ating yu glad blong givhan long hem. Mo taem yu lukaot long hem, yu soemaot se yu lavem Jehova. (1 Tim. 5:​4, 8; Jem. 1:27) Nating se i olsem, yu fesem sam trabol we ol narafala oli no luk, mo maet yu harem se oli no save se yu stap safa. Maet taem yu stap wetem ol narafala, yu smael, be taem yu stap yu wan, yu krae. (Sam 6:6) Nating se ol narafala oli no save ol problem blong yu, be Jehova i save. (Skelem wetem Eksodas 3:7.) Jehova i tinghae long ol wota blong ae blong yu mo long ol samting we yu lego blong yu save givhan long wan we i olfala o i sik. (Sam 56:8; 126:5) Mo hem i luk evri samting we yu mekem blong halpem man ya. Jehova i luk ol samting we yu mekem olsem wan kaon mo hem i promes blong pembak yu from.—Ridim Ol Proveb 19:17.

3. ?From wanem maet i no isi blong Ebraham mo Sera i lukaot long Tera?

³ I gat plante stori blong ol man mo woman long Baebol we oli lukaot long wan we i olfala o i sik. Traem tingbaot eksampol blong Ebraham mo Sera. Taem tufala i aot long Uru, papa blong tufala, Tera, we i gat samwe 200 yia, i folem olgeta mo oli wokbaot samwe 960 kilometa blong go long Haran. (Jen. 11:​31, 32) I sua se Ebraham mo Sera i lavem Tera, be ating i no isi blong lukaot long hem long rod, from we maet long taem ya oli yusum ol kamel mo ol dongki, mo i had blong Tera i klaem i go antap long ol animol ya mo sidaon long olgeta longtaem. Taswe i sua se samtaem, Ebraham mo Sera i taed tumas. Be Jehova i givim paoa long tufala. Mo hemia sem samting we Jehova bambae i mekem long yu.—Sam 55:22.

4. ?Bambae yumi tokbaot wanem long stadi ya?

⁴ Glad i save halpem yu blong yu gohed blong lukaot long wan we i olfala o i sik. (Prov. 15:13) Wan man we i glad oltaem, hem i save gohed blong stap glad, nating se laef blong hem i no isi. (Jem. 1:​2, 3) ?Yu save mekem wanem blong kasem glad ya? Yu save prea long Jehova mo askem hem blong i halpem yu blong yu gohed blong tingbaot ol gudfala samting. Long stadi ya, bambae yumi tokbaot sam narafala samting we yu save mekem blong stap glad taem yu lukaot long wan we i olfala o i sik. Mo tu, bambae yumi luk olsem wanem ol narafala oli save givhan long yu. Be fastaem, bambae yumi tokbaot from wanem i gud we yu gohed blong stap glad mo ol samting we i save mekem se yu no moa glad.

SAMTING WE I SAVE MEKEM SE YU NO MOA GLAD

5. ?From wanem yu mas gohed blong glad taem yu lukaot long wan we i olfala o i sik?

⁵ Sipos yu no moa glad taem yu stap lukaot long wan we i olfala o i sik, bambae i isi blong yu kam taed. (Prov. 24:10) Sipos i olsem, bambae yu no moa kaen mo givhan gud long hem. ?Wanem i save mekem se yu no moa glad?

6. ?From wanem samfala we oli lukaot long wan we i olfala o i sik oli taed bitim mak?

⁶ Maet yu kam taed bitim mak. Wan sista we nem blong hem Leah i talem se: “Nating se ol samting oli go gud, be plante taem long en blong dei mi taed tumas. Samtaem mi no gat paoa nomo blong ansa long wan teks mesej.” Sam narafala oli no slip gud mo oli no gat naf taem blong spel. Wan sista we nem blong hem Inés i se: “Mi no stap slip gud long naet. Plante taem, mi wekap evri tu aoa blong lukaot long mama blong hasban blong mi. Mo plante yia nao mi mo hasban blong mi i no gat janis blong go samples blong spel.” Samfala oli no save spenem taem wetem ol fren o mekem sam wok long oganaesesen from we oli mas lukaot long wan we i olfala o i sik. From samting ya, maet oli harem se oli stap olgeta wan mo oli fas long wan trap.

7. ?From wanem samfala oli harem nogud o oli gilti taem oli lukaot long wan we i olfala o i sik?

⁷ Maet yu harem nogud o yu gilti. Wan sista we nem blong hem Jessica i se: “Plante taem mi harem se mi sud givhan moa long papa blong mi. Mo taem mi tekem taem blong spel smol, mi harem se mi gilti.” Samfala oli harem se oli gilti from we samtaem oli no wantem gohed blong lukaot long hemia we i olfala o i sik. Sam narafala oli wari from we oli ting se oli no mekem naf samting blong givhan long hem. Sam narafala bakegen, oli harem se oli gilti from we taem oli taed, oli talem sam samting we i mekem man ya we oli stap lukaot long hem i harem nogud. (Jem. 3:2) Samfala oli harem nogud taem oli luk se man ya we bifo i strong mo i helti, naoia sik blong hem i stap kam nogud moa. Wan sista we nem blong hem Barbara i se: “Hat blong mi i soa taem mi luk se sik blong fren blong mi i stap kam mowas evri dei.”

8. Tokbaot olsem wanem ol gudfala toktok i save gat paoa long olgeta we oli lukaot long wan we i olfala o i sik.

⁸ Maet yu harem se ol narafala oli no tinghae long wok blong yu. ?From wanem? From we i no gat plante man we oli talem tangkiu o talem ol gudfala toktok long yu, from ol had wok blong yu mo samting we yu lego blong mekem wok ya. Be taem wan man i talem tangkiu long yu, hemia i mekem se yu glad tumas. (1 Tes. 5:18) Wan sista we nem blong hem Melissa i se: “Samtaem mi krae from mi harem nogud tumas. Be taem olgeta we mi lukaot long olgeta oli talem long mi se: ‘Tangkiu tumas from ol samting we yu mekem blong lukaot long mi,’ !hemia i mekem mi glad tumas! Ol gudfala toktok ya i mekem se taem mi wekap long nekis dei, mi wantem gohed blong lukaot long olgeta.” Wan brata we nem blong hem Ahmadu mo waef blong hem, tufala i stap lukaot long wan pikinini we i sik tumas, hemia pikinini blong sista blong waef blong hem. Ahmadu i tokbaot filing we hem i gat taem smol gel ya i talem tangkiu long tufala, i se: “Nating se hem i no kasemsave fulwan long ol samting we mitufala i lego blong lukaot long hem, be mitufala i glad tumas taem hem i talem tangkiu long mitufala, o i traem blong raetem toktok ya i kam long mitufala se: ‘Mi lavem yu.’”

SAMTING WE YU SAVE MEKEM BLONG STAP GLAD

9. ?Olsem wanem yu save soemaot se yu luksave limit blong yu?

⁹ Luksave limit blong yu. (Prov. 11:2) Yumi no gat naf taem mo paoa blong mekem evri samting we yumi wantem mekem. Taswe yu mas luksave samting we yu naf blong mekem mo samting we yu no naf blong mekem, mo yu mas talem no samtaem. Hemia i oraet nomo, from i soemaot se yu luksave limit blong yu. Mo i gud yu letem ol narafala oli givhan long yu. Wan brata we nem blong hem Jay i talem se: “Yumi no save mekem evri samting long wan dei nomo. Taem yumi luksave limit blong yumi mo yumi no traem blong mekem samting we yumi no naf blong mekem, bambae yumi gohed blong stap glad.”

10. ?From wanem i gud we yu traem kasemsave long narafala? (Ol Proveb 19:11)

¹⁰ Traem kasemsave long man we yu stap lukaot long hem. (Ridim Ol Proveb 19:11.) Wan man we i kasemsave long narafala, i traehad blong kasemsave from wanem wan man i talem o i mekem wan samting, nao bambae hem i save stap kwaet nating se man ya i talem o i mekem wan samting we i no stret long hem. Sam sik i save mekem se man i gat sam fasin we i narakaen. (Pri. 7:7) Eksampol, wan man we bifo hem i toktok kaen mo i mekem i gud long ol narafala, maet hem i save kam wan man we i kros, i rao, i komplen from evri smosmol samting, o i no glad long ol samting we yu mekem. Sipos yu stap lukaot long wan we i sik, i gud yu traem kasemsave long sik blong hem, from we hemia bambae i givhan long yu blong luksave se hem i gat ol fasin ya from we hem i sik, be hemia i no ol prapa fasin blong hem.—Prov. 14:29.

11. ?Evri dei, yu mas makemaot taem blong mekem wanem? (Ol Sam 132:​4, 5)

¹¹ Makemaot taem blong fren gud moa wetem Jehova. Samtaem yu mas lego sam samting, blong yu save mekem “ol samting we oli moa impoten.” (Fil. 1:10) Wan long ol samting ya, hemia blong fren gud moa wetem Jehova. King Deved i putum wosip blong Jehova i stap fasples long laef blong hem. (Ridim Ol Sam 132:​4, 5.) Long sem fasin, i impoten we yu makemaot taem evri dei blong ridim Baebol mo prea. Wan sista we nem blong hem Elisha i se: “Taem mi prea mo mi tingting dip long ol tok blong Ol Sam, hemia i givhan long mi blong stap glad. Prea i givhan bigwan long mi. Mi luk se taem mi prea plante taem long wan dei, tingting blong mi i kwaet.”

12. ?From wanem olgeta we oli stap lukaot long wan we i olfala o i sik oli mas lukaot gud long helt blong olgeta?

¹² Lukaot gud long helt blong yu. Olgeta we oli lukaot long wan we i olfala o i sik oli bisi tumas, taswe maet oli no gat naf taem blong go pem mo rerem ol gudfala kakae. Be sipos yu kakae gud mo yu gat wan gudfala program blong mekem eksesaes, hemia bambae i givhan long bodi mo tingting blong yu. Taswe i gud yu yusum gud taem we yu gat, blong mekem eksesaes mo kakae ol gudfala kakae. (Efes. 5:​15, 16) Mo tu, i impoten we yu slip gud. (Pri. 4:6) Ol man blong stadi oli talem se taem yumi slip gud, bren blong yumi i wok gud moa. Wan atikol we ol dokta oli raetem i talem se taem yumi slip gud, yumi no wari o stres tumas. I gud yu makemaot taem tu blong spel mo pleplei. (Pri. 8:15) Wan sista we i stap lukaot long wan we i olfala o i sik i tokbaot samting we i givhan long hem blong stap glad, i se: “Taem i gat gudfala weta, mi laekem blong go spenem taem aotsaed. Mo wan taem evri manis, mi mekem plan wetem wan fren blong spel mo pleplei.”

13. ?From wanem i gud blong laf? (Ol Proveb 17:22)

¹³ Samtaem i gud blong laf. (Ridim Ol Proveb 17:22; Pri. 3:​1, 4) Taem yu laf, hemia i givhan long bodi mo tingting blong yu. Taem yu stap lukaot long narafala, samtaem ol samting oli no go gud olsem we yu wantem. Be sipos yu laf, bambae yu no harem nogud tumas. Mo taem yu wetem man we yu stap lukaot long hem, yutufala i laflaf tugeta, hemia bambae i mekem se yutufala i fren gud moa.

14. ?From wanem i gud blong toktok long wan fren we yu trastem?

¹⁴ Toktok long wan fren we yu trastem. Nating se yu traehad blong stap glad, be samtaem maet yu save wari yet. Long taem olsem, i gud yu tokbaot ol filing blong yu long wan gudfala fren we bambae i no jajem yu. (Prov. 17:17) Taem hem i lesin gud long yu mo i talem ol gudfala toktok long yu, bambae yu harem gud bakegen.—Prov. 12:25.

15. ?From wanem i gud blong tokbaot samting we bambae yufala i mekem long Paradaes?

¹⁵ Tokbaot samting we bambae yutufala i mekem long Paradaes. I gud yu tingbaot oltaem se wok ya blong lukaot long wan we i olfala o i sik, i blong smoltaem nomo, mo Jehova i no wokem yumi blong mekem wok ya. (2 Kor. 4:​16-18) Long fiuja, bambae yumi haremgud long “laef ya we i prapa wan.” (1 Tim. 6:19) Taem yu mo man we yu stap lukaot long hem i tokbaot ol samting we bambae yutufala i mekem tugeta long Paradaes, bambae yutufala i glad. (Aes. 33:24; 65:21) Wan sista we nem blong hem Heather i se: “Plante taem mi talem long olgeta we mi stap lukaot long olgeta se i no longtaem bambae mifala i somap ol klos, ronron, mo ron long baskel tugeta. Mo tu, bambae mifala i bekem bred mo kukum ol kakae blong ol famle mo fren we oli laef bakegen. Ale, mifala i talem tangkiu long Jehova from nambawan hop ya we yumi gat.”

SAMTING WE OL NARAFALA OLI SAVE MEKEM BLONG GIVHAN

16. ?Yumi save mekem wanem blong givhan long olgeta we oli stap lukaot long wan we i olfala o i sik? (Mo tu, yu luk pija.)

¹⁶ Givhan long olgeta we oli stap lukaot long wan we i olfala o i sik, blong oli gat taem blong spel. Ol brata mo sista long kongregesen oli save spenem taem wetem wan we i olfala o i sik. Olsem nao, man we i stap lukaot long hem i save gat taem blong spel o mekem sam narafala samting. (Gal. 6:2) Sam brata mo sista oli mekem plan blong givhan long wan olsem evri wik. Wan sista we nem blong hem Natalya, we i stap lukaot long hasban blong hem we i no save wokbaot, i talem se: “Wan brata long kongregesen i stap kam wan o tu taem evri wik blong spenem taem wetem hasban blong mi. Tufala i prij tugeta, storian tugeta, mo wajem muvi tugeta. Hasban blong mi i glad tumas blong spenem taem wetem brata ya, mo hemia i mekem se mi gat taem blong mekem ol narafala samting, olsem blong go wokbaot.” Sam brata mo sista oli mekem plan blong stap long naet wetem wan we i olfala o i sik, blong mekem se hemia we i stap lukaot long hem i save slip gud.

17. ?Yumi save mekem wanem blong givhan long olgeta we oli stap lukaot long wan we i olfala o i sik, long taem blong miting?

¹⁷ Givhan long olgeta we oli stap lukaot long wan we i olfala o i sik, long taem blong miting. Maet sam brata mo sista oli no save lesin gud long ol miting mo ol asembli, from we oli bisi blong lukaot long wan we i olfala o i sik. Ol narafala long kongregesen oli save givhan, taem oli sidaon wetem hemia we i olfala o i sik long ful miting o long sam haf blong miting. Sipos hemia we i olfala o i sik i no save aot long haos, yu save go long haos blong hem blong yutufala i joen long miting tru long videokonfrens, olsem nao brata o sista ya we i stap lukaot long hem i save go long miting long Haos Kingdom.

18. ?Yumi save mekem wanem moa blong givhan long olgeta we oli stap lukaot long wan we i olfala o i sik?

¹⁸ Talem ol gudfala toktok long olgeta we oli stap lukaot long wan we i olfala o i sik, mo prea from olgeta. I gud we oltaem ol elda oli leftemap tingting blong olgeta we oli stap lukaot long wan we i olfala o i sik. (Prov. 27:23) Mo i gud we yumi evriwan i gohed blong talem long olgeta se yumi lavem olgeta mo yumi tinghae long wok we oli stap mekem. Yumi save askem Jehova blong i gohed blong givim paoa long olgeta mo halpem olgeta blong oli gohed blong stap glad.—2 Kor. 1:11.

19. ?Yumi stap wet blong luk wanem promes i kamtru?

¹⁹ I no longtaem, Jehova bambae i ravemaot wota blong ae blong olgeta man, mo ol man bambae oli no moa sik mo ded. (Rev. 21:​3, 4) Mo tu, “olgeta we leg blong olgeta i nogud, bambae oli jamjam olsem dia.” (Aes. 35:​5, 6) Long taem ya, bambae yumi no moa safa from we yumi kam olfala, o from we yumi luk olgeta we yumi lavem olgeta oli kam olfala o sik. Yes, ‘ol man bambae oli no moa tingbaot ol samting ya blong bifo.’ (Aes. 65:17) Be go kasem taem ya, yumi sua se Jehova bambae i gohed blong givhan long yumi. Sipos yumi gohed blong dipen long Jehova blong i givim paoa long yumi, bambae hem i halpem yumi blong ‘stanap strong long olgeta samting, gat longfala tingting mo glad.’—Kol. 1:11.